Harvey ti annan trwa pti frer. Son fanmir ti konn laverite ler zot ti pe reste Midland Junction, Western Australia, plis ki 80 an pase ler i ti annan en gro problenm ekonomik dan sa pei. Harvey ti aprann kontan Zeova e i ti batize ler i ti annan 14 an. I pa ti pran bokou letan pour li aprann pour toultan aksepte bann responsabilite dan kongregasyon. En fwa, ler i ti ankor zenn, i ti refize lir Latour Veyer pandan renyon akoz i ti krwar ki i pa ti pou kapab fer li byen. Me sa frer ki ti pe koz avek Harvey ti fer li reflesir. I ti dir li: “Ler en dimoun dan lorganizasyon Zeova i demann ou pour fer en keksoz, sa i vedir ki i krwar ki ou kapab fer li!”​—2 Kor. 3:5.

Mon ti konn laverite ansanm avek mon manman ek mon gran ser ler mon ti Langleter. Mon papa pa ti kontan Temwen Zeova o konmansman me pli tar i ti vin en Temwen li osi. Menm si mon papa pa ti dakor, mon ti batize ler mon ti annan ne-v-an. Mon ti annan lobzektif pour vin en pionye e pli tar en misyonner. Malerezman, mon papa ti dir ki mon ti pou kapab vin en pionye ler mon ti annan 21 an. Mon ti napa lentansyon espere ziska ki mon ti annan 21 an. Alor, ler mon ti annan 16 an, mon papa  ti les mwan al reste Lostrali kot mon gran ser, ki ti pe deza reste laba. Finalman, ler mon ti ganny 18 an, mon ti konmans fer pionye.

Mon ti zwenn Harvey, ler mon ti Lostrali. Nou tou le de nou ti anvi servi Zeova konman bann misyonner. An 1951, nou ti marye. Apre ki nou ti’n fer pionye pour de-z-an, Harvey ti ganny demande pour vin sirveyan rezyonal e nou ti pou kouver en gran parti Western Australia. Pour nou kapab fer sa, nou ti bezwen voyaz bann gran zistans dan bann landrwa sek e izole.

An 1954, nou ti ganny envite pour asiste vennsenkyenm laklas Gilead. Nou rev pour vin bann misyonner ti pou byento vin vre. Nou ti pran bato pour al New York e ler nou ti ariv laba, nou ti konmans etidye Labib o profon. Dan lekol Gilead, nou ti osi bezwen aprann Espanyol me sa ti difisil pour Harvey parski i pa ti kapab pronons r parey i sipoze dan langaz Espanyol.

Dan sa lekol, bann formater ti dir ki bann ki anvi al servi Zapon, i kapab met zot non pour zwenn en laklas ki montre langaz Zaponnen. Nou ti deside ki nou pou les lorganizasyon Zeova swazir kote pour anvoy nou. Pa bokou letan apre, Albert Schroeder, ki ti enn bann formater, ti tande ki nou pa’n met non pour zwenn sa laklas. I ti dir nou: “Mazin lo la ankor.” Me nou ti ezite menm. Alor Frer Schroeder ti dir: “Mwan avek lezot formater, nou’n fini met zot non. Gete si zot kapab aprann langaz Zaponnen.” I ti pli fasil pour Harvey pronons bann mo Zaponnen ki Espanyol.

Nou ti ariv Zapon an 1955 e i ti annan zis 500 proklanmater dan sa pei. Harvey ti annan 26 an e mwan mon ti annan 24 an. Nou ti ganny anvoye dan lavil Kobe, kot nou ti servi pour kat-r-an. Apre sa, nou ti ganny demande pour repran servis sirveyan rezyonal e sa ti fer nou vreman kontan. Nou ti al servi dan zanmirant lavil Nagoya. Nou ti vreman kontan nou servis. Nou ti kontan bann frer ek ser, lakwizin Zaponnen e osi peizaz. Pa bokou letan apre, nou ti ganny en lot loportinite pour fer sa ki Zeova i demann nou pour fer.

Apre trwa-z-an ki nou ti’n servi konman sirveyan rezyonal, biro brans Zapon ti demann nou si nou ti pou anvi al Taywann pour anons sa  bon nouvel avek bann dimoun dan tribi Amis. Serten frer laba ti’n vin aposta e biro brans Taywann ti bezwen en frer ki ti kapab koz Zaponnen pour ede. * Nou ti kontan sa ki nou ti pe fer Zapon alor sa pa ti en desizyon fasil pour nou fer. Me Harvey ti’n aprann pour pa zanmen refiz en responsabilite alor nou ti dakor pour ale.

Nou ti ariv Taywann Novanm 1962. Laba, i ti annan 2,271 proklanmater e laplipar zot ti bann Amis. Me premyerman, nou ti bezwen aprann langaz Sinwan (Mandarin). Nou ti annan zis en liv Sinwan ek en ansenyan ki pa ti konn koz Angle me nou ti nobou aprann.

Pa bokou letan apre ki nou ti’n ariv Taywann, Harvey ti ganny sa responsabilite konman serviter biro brans. I ti en pti biro brans e i ti napa bokou travay pour fer. Alor Harvey ti kapab fer son travay dan lofis e an menm tan ed bann frer Amis pour apepre trwa semenn par mwan. Tanzantan, i ti osi servi konman sirveyan distrik, ki ti enkli fer diskour kot bann lasanble. Harvey ti’n kapab fer diskour dan langaz Zaponnen e bann frer ek ser Amis ti pou’n kapab konpran. Me gouvernman ti dir ki bann rasanbleman relizye ti devret ganny fer dan langaz Sinwan. Alor menm si Harvey pa ti kapab koz langaz Sinwan byen, i ti fer son diskour anmezir ki en frer ti tradwir dan langaz Amis.

Sa letan, nou ti bezwen rod permi pour fer bann lasanble. I ti difisil pour ganny en permi e parfwa i ti pran en kantite letan avan nou ti gannyen. Si sa semenn ki nou ti sipoze fer lasanble nou pa ti ankor ganny permisyon avek lapolis, Harvey ti pou asiz dan sa stasyon lapolis ziska ler nou ti gannyen. Vi ki lapolis ti anbarase pour annan en etranze pe espere dan stasyon, zot ti donn nou permi vitman.

Pandan bann semenn ki nou ti pase avek bann frer ek ser, normalman nou ti marse pour plis ki enn erdtan, mont montanny e travers larivyer. Mon rapel premye fwa mon ti mont montanny. Apre ki nou ti’n pran en pti brekfas, nou ti pran en bis 5:30 bomaten pour al dan en vilaz ki ti lwen. Apre nou ti travers en gran larivyer e nou ti mont en montanny apik. Sa montanny ti telman apik ki lipye sa frer ki ti par devan mwan ti zis vizavi avek mon lizye.

Sa zour bomaten, Harvey ti travay ansanm dan predikasyon avek bann frer ki reste dan sa landrwa anmezir ki mwan mon ti travay mon tousel dan en pti vilaz kot dimoun i koz Zaponnen. Ver apepre enn er apremidi, mon ti pe konmans ganny febles vi ki mon pa ti’n manz nanryen depi bomaten. Ler mon ti zwenn Harvey, i ti napa okenn lezot frer avek li. Harvey ti’n fer lesanz detrwa magazin pour trwa dizef poul. Sa trwa dizef ti ankor kri e Harvey ti montre mwan ki mannyer pour fer de pti trou dan lakok pour mwan kapab bwar sa dizef. Menm si sa pa ti paret bon, mon ti esey enn. Me lekel ki ti pou manz sa trwazyenm dizef? Mwan ki ti manze akoz Harvey pa ti krwar ki i ti pou kapab anmenn mwan si mon ti tonm feb.

En fwa, mon ti fer fas avek en sityasyon drol. Nou ti’n al en lasanble rezyonal e nou ti pe reste kot en frer, zis akote Lasal Rwayonm. Vi ki dan kiltir Amis i ti vreman enportan pour en dimoun bennyen alor madanm sirveyan rezyonal ti prepar tou keksoz pour nou kapab bennyen. Harvey ti okipe alor i ti dir mwan al benny avan. Pour bennyen, i ti annan trwa kivet. Enn ti annan delo fre, en lot ti annan delo so e sa lot ti vid. Mon ti sirprann ki sa madanm sirveyan ti’n met sa bann kivet deor e bann frer ki ti kot Lasal Rwayonm pe ede avek bann reparasyon pour lasanble, ti kapab vwar mwan. Mon ti demann li en rido pour bar mwan me i ti anmenn en plastik kler pour mwan. Mon ti mazin al deryer lakaz me laba i ti annan bann zwa ki mon ti krwar pou bek mwan. Mon ti mazinen: ‘Bann frer i tro bizi pour vwar mwan kot pe bennyen. Si mon pa bennyen, sa bann dimoun pou ofanse. Zis bennyen!’ Alor mon ti bennyen.

Harvey ti realize ki i ti difisil pour bann frer ek ser Amis annan en lafwa for vi ki en kantite zot pa ti konn lir e i ti napa piblikasyon dan zot langaz. Vi ki langaz Amis ti’n fek konmans ganny met an ekri, i ti paret en bon keksoz pour montre bann frer ek ser pour lir dan zot prop langaz. Sa ti en gro travay me avek letan sa bann frer ek ser ti aprann konsernan Zeova dan zot prop langaz. Bann piblikasyon dan langaz Amis ti vin disponib ver 1966 e Latour Veyer ti konmans ganny pibliye an 1968.

Me gouvernman pa ti oule nou pibliy bann piblikasyon ki pa ti dan langaz Sinwan. Alor pour evit problenm, nou ti pibliy Latour Veyer dan langaz Amis dan diferan fason. Par egzanp, pour en pe letan, bann Latour Veyer ki nou ti servi ti annan tou le de langaz ladan, Sinwan (Mandarin) ek Amis. Si okenn dimoun ti annan kestyon, i ti pou paret konmsi nou ti pe servi Latour Veyer pour ansenny langaz Sinwan. Depi sa letan, lorganizasyon Zeova in pibliy en kantite piblikasyon dan langaz Amis pour ed bann dimoun ki annan leker senser pour aprann laverite dan Labib.​—Akt 10:34, 35.

Dan bann lannen 1960 ek 1970, i ti annan plizyer frer Amis ki pa ti pe viv dapre bann  standar Bondye. Vi ki zot pa ti vreman konpran bann prensip Labib, serten ti pe viv en lavi imoral, bwar pour sou, fimen e servi lagrenn betel. Harvey ti vizit plizyer kongregasyon pour li esey ed bann frer ek ser konpran pwennvi Zeova lo sa bann keksoz. I ti lo enn sa bann vizit ki nou ti ganny sa leksperyans ki mon’n mansyonnen o konmansman sa lartik.

Bann frer ki ti annan limilite ti pare pour fer bann sanzman me malerezman, en kantite lezot pa ti pare pour fer sa. Sa ti fer ki lakantite proklanmater Taywann ti desann, sorti 2,450 pour ariv 900 pandan en peryod 20 an. Sa ti vreman dekourazan. Me nou ti konnen ki Zeova pa ti pou zanmen beni en lorganizasyon ki pa prop. (2 Kor. 7:1) Apre en pe letan, kongregasyon ti pe servi Zeova dan sa bon fason e avek benediksyon Zeova, Taywann i aprezan annan plis ki 11,000 proklanmater.

Depi bann lannen 1980, nou ti vwar ki lafwa bann frer ek ser dan bann kongregasyon Amis in pli for e Harvey ti kapab pas plis letan avek bann Sinwan. I ti vreman kontan pour ed msye bann ser vin Temwen Zeova. Mon rapel ler Harvey ti dir ki i ti kontan ler enn parmi sa bann msye ti priy Zeova pour premye fwa. Mwan osi mon kontan ki mon’n kapab ansenny en kantite dimoun pour vin pli pros avek Zeova. Mon’n annan lazwa pour servi dan biro brans Taywann avek garson ek fiy, enn mon ansyen etidyan.

Aprezan, mon nepli annan en konzwen. Harvey ti mor avek kanser le 1 Zanvye 2010 apre ki nou ti’n pas apepre 59 an maryaz. I ti’n pas apepre 60 an dan servis a plen tan. Mon ankor mank li en kantite. Me mon vreman kontan ki mon’n servi ansanm avek li dan de pei. Nou ti aprann koz de langaz difisil e Harvey ti menm kapab ekri tou le de.

De trwa lannen pli tar, Konsey Direkter ti deside ki i ti pou pli bon pour mwan retourn Lostrali. Premye keksoz ki ti pas dan mon lespri ti, ‘Mon pa anvi kit Taywann.’ Me Harvey ti’n montre mwan pour pa zanmen dir non avek lorganizasyon Zeova e alor mon ti ale. Avek letan mon ti vwar, ki sa ti en bon desizyon parski mon ti’n vin pli vye e mon ti bezwen plis led.

Ozordi, mon travay dan biro brans Australasia pandan lasemenn e dan wikenn mon fer predikasyon avek en kongregasyon dan sa landrwa. Mon vreman kontan pour servi sa langaz Zaponnen ek Sinwan pour koz avek dimoun ler zot vin vizit Betel. Mon enpasyan pour vwar sa rezireksyon ki Zeova in promet. Mon konnen ki Harvey i dan memwar Zeova akoz Harvey in toultan fer sa ki Zeova in demann li pour fer.​—Zan 5:28, 29.