Harvey an uxtiquil i yijtsʼin i jiñʌch jiñi ascuñʌl. Añix ñumen ti 80 jab cheʼ bʌ jiñi i familia tsiʼ cʌñʌ i sujmlel cheʼ bʌ chumulob ti jumpʼejl tejclum i cʼabaʼ ti wajali Midland Junction, am bʌ yaʼ ti Australia Occidental, cheʼ bʌ wen an pʼumpʼuñiyel ti jiñi país. Harvey tsiʼ wen cʼuxbin Jehová i tsiʼ chʼʌmʌ jaʼ cheʼ bʌ an 14 i jabilel. Ti wiʼil, tsaʼ cʼoti i cʌn chaʼan yom miʼ jacʼ pejtelel eʼtel (troñel) tac muʼ bʌ i yʌqʼuentel tiʼ yorganización Jehová. Ti jumpʼejl bʌ qʼuin, cheʼ bʌ chʼitonto, tsaʼ subenti chaʼan miʼ pejcan jiñi Lac Tsictesʌbentel, pero Harvey maʼañic tsiʼ jacʼʌ come tsiʼ ñaʼta chaʼan mach mejlic i mel. Pero juntiquil hermano tsaʼ bʌ i pejca Harvey tiʼ sube: «Mi an chuqui maʼ subentel a mel tiʼ yorganización Jehová, mach yomic maʼ wʌl chaʼan maʼañic come jiñi hermanojob miʼ qʼueletob chaʼan mucʼʌch mejlel a mel ti wen» (2 Co. 3:5).

Jiñi c mamá, c chich yicʼot joñon tsaʼ cʼoti lon j cʌn jiñi i sujmlel cheʼ yaʼañon lojon ti Inglaterra. Anquese ti ñaxan jiñi c papá mach yomic, tsaʼʌch cʼoti i cʌn jiñi i sujmlel. Jiñi c papá mach yomic chaʼan mic chaʼlen chʼʌmjaʼ, pero tsaʼ cʼoti c chʼʌmjaʼ cheʼ 9 c jabilel. Tsaʼ c ñaʼta ochel bajcheʼ precursora come ti wiʼil com sujtel bajcheʼ misionera. Pero jiñi c papá  mach yomic mij cochel ti precursora, jinto cheʼ añix 21 c jabilel. Joñon mach comic j cʌlʌx pijtan. Cheʼ bʌ añix 16 c jabilel, tsaʼ c sube c papá chaʼan com majlel ti chumtʌl quicʼot c chich tsaʼ bʌ majli ti chumtʌl ti Australia. I cheʼ bʌ 18 c jabilel, tsaʼ ochiyon ti precursora.

Cheʼ bʌ yaʼañon ti Australia, tsaʼ j cʌñʌ Harvey. Ti lon c chaʼticlel com lojon ochel bajcheʼ misionero. I cheʼ ti 1951, tsaʼ ñujpuñiyon lojon. Cheʼ bʌ añix chaʼpʼejl jab cajel c mel lojon queʼtel bajcheʼ precursor, tsaʼ subentiyon lojon ochel bajcheʼ superintendente i chaʼan circuito. Yaʼ ti Australia Occidental wen colem jiñi circuito muʼ bʌ c julaʼtan lojon, jin chaʼan ti bele ora ñajt mi lac xʌn ti carro.

Ti 1954, tsaʼ pʌjyiyon lojon yaʼ ti clase número 25 i chaʼan Galaad. Wen com lojon sujtel ti misionero, i tsaʼ j qʼuele lojon chaʼan muqʼuix caj i tsʼʌctiyel. Tsaʼ cʼotiyon lojon ti barco yaʼ ti Nueva York i tsaʼ caji c ñumen chaʼlen lojon ti estudiar jiñi Biblia. Ti Galaad yomʌch mi lon j cʌn español, pero Harvey wen wocol tsiʼ yubi come maʼañic miʼ mejlel i yʌl jiñi erre.

Jiñi xcʌntesajob tsiʼ yʌlʌyob chaʼan mi an majqui yomob majlel i chaʼleñob coltaya yaʼ ti Japón miʼ mejlel i tsʼijbuñob i bʌ chaʼan miʼ cʌñob jiñi tʼan japonés. Joñon lojon tsaʼ lon c ñaʼta chaʼan maʼañic mi caj c tsʼijbun lon c bʌ come com lojon chaʼan jiñʌch jiñi organización muʼ bʌ i subeñon lojon baqui mi caj c majlel lojon ti subtʼan. Juntiquil hermano am bʌ bajcheʼ xcʌntesa yaʼ ti Galaad i cʼabaʼ Albert Schroeder, tsiʼ yubi chaʼan maʼañic tsaʼ c tsʼijbu lojon c bʌ, i tiʼ subeyon lojon: «Wen ñaʼtanla». Come maʼañic woli (choncol) c tsʼijbun lojon jiñi lon j cʼabaʼ, tiʼ subeyon lojon: «Jiñi yambʌ xcʌntesajob yicʼot joñon tsaʼix c tsʼijbu lojon laʼ cʼabaʼ. Ñopola miʼ mucʼʌch mejlel laʼ cʌn jiñi tʼan japonés». Harvey mach wocolic tsiʼ yubi chaʼan miʼ cʌn ili tʼan.

Tsaʼ cʼotiyon lojon ti Japón ti 1955. Ti jimbʌ ora an jaxto 500 xsubtʼañob ti jiñi país. Harvey an 26 i jabilel i joñon 24 c jabilel. Tsaʼ chojquiyon lojon majlel ti jiñi tejclum i chaʼan Kobe baqui an puerto tac, tsaʼ ajñiyon lojon yaʼi chʼʌmpʼejl jab. Cheʼ jiñi, tsaʼ chaʼ subentiyon lojon chaʼan mi lon c chaʼ chaʼlen eʼtel bajcheʼ circuito ti jumpʼejl tejclum lʌcʼʌl bʌ an ti Nagoya, i tsiʼ wen aqʼueyon lojon c tijicñʌyel. Tsaʼ c wen mulaj lojon coltaya ti Japón: Jiñi hermanojob, jiñi bʌlñʌcʼʌl tac, jiñi tʼojol tac jax bʌ chuqui tac an yicʼot yan tac bʌ. Pero mach jalic tsaʼ ñumi i tsaʼ chaʼ caji lojon c pʌs mi comʌch lon c mel jiñi muʼ bʌ i subeñon lojon Jehová.

Cheʼ bʌ añix uxpʼejl jab lon j cajel bajcheʼ circuito, jiñi sucursal i chaʼan Japón tsiʼ cʼajtibeyon lojon mi  com lojon majlel ti subtʼan ti Taiwán ti jiñi tʼan amis. An hermanojob yujiloʼ bʌ jiñi tʼan amis tsaʼ bʌ sujtiyob ti apóstatajob, i jiñi sucursal i chaʼan Taiwán yom chaʼan juntiquil hermano yujil bʌ tʼan japonés miʼ coltan i tojʼesan jiñi wocol. * Wen wocolʌch tsaʼ lon cubi chaʼan mi lon c jacʼ majlel ti Taiwán come tsaʼ lon c mulaj ajñel yaʼ ti Japón. Pero Harvey tsiʼ cʌñʌ chaʼan yom miʼ jacʼ pejtelel jiñi eʼtel muʼ bʌ i yʌqʼuentel, jin chaʼan tsaʼʌch majliyon lojon ti Taiwán.

Cheʼ ti noviembre i chaʼan 1962 tsaʼ cʼotiyon lojon ti Taiwán, i an 2 mil 271 xsubtʼañob. Lʌcʼʌ tiʼ pejtelel jiñi tejclum yujilob jiñi tʼan amis. Yom mi lon j cʌn jiñi tʼan chino, i cojach an lon c chaʼan ti jiñi bʌ ora jumpʼejl libro am bʌ ti chino, cheʼ jaʼel an juntiquil woli (yʌquel) bʌ i cʌntesañon lojon jiñi tʼan, pero mach yujilic inglés. Pero tsaʼʌch lon j cʌñʌ jiñi tʼan chino.

Cheʼ maxto jalic lon j cʼotel ti Taiwán, Harvey tsaʼ aqʼuenti tiʼ wenta jiñi sucursal. Come mach wen colemic jiñi sucursal, Harvey miʼ mejlel i mel jiñi i yeʼtel tac yicʼot mucʼʌch mejlel i loqʼuel ti subtʼan yicʼot jiñi hermanojob yujiloʼ bʌ jiñi tʼan amis. Cheʼ jaʼel, mucʼʌch i yʌcʼ discurso tac yaʼ ti colem tempa bʌ tac. Harvey miʼ mejlel i yʌcʼ jiñi discurso tac ti japonés i jiñi hermanojob yujiloʼ bʌ jiñi tʼan amis mucʼʌch mejlel i chʼʌmbeñon i sujm, pero jiñi yumʌl tsiʼ yʌlʌ chaʼan jiñi tempa bʌ tac yom miʼ mejlel ti chino. Jin chaʼan, anquese Harvey maxto wen yujilic jiñi tʼan chino, tsiʼ ñusa jiñi discurso tac ti jiñi tʼan, i juntiquil hermano tsiʼ ñusa majlel ti jiñi tʼan amis.

Ti jimbʌ ora yaʼ ti Taiwán tsaʼ waʼchoconti jumpʼejl mandar (jiñi ley marcial). Jiñi hermanojob yom miʼ cʼajtiñob jiñi permiso tac chaʼan miʼ mejlel i melob jiñi colem tempa bʌ tac. Wocolʌch chaʼan miʼ yʌjqʼuel jiñi permiso tac, i lʌcʼʌ ti pejtelel ora jiñi policíajob miʼ jalʼañob i yʌcʼob jiñi permiso tac. Mi ti jiñi semana cheʼ bʌ yomix miʼ mejlel jiñi colem tempa bʌ, jiñi policíajob maxto i yʌcʼʌyob jiñi permiso, Harvey miʼ majlel yaʼ baqui mucʼob ti eʼtel jiñi policíajob i miʼ buchtʌl i pijtan jinto miʼ yʌqʼuentel jiñi permiso. Jiñi policíajob quisintic jax miʼ yubiñob cheʼ bʌ miʼ qʼuelob chaʼan juntiquil wiñic ñajt bʌ chʼoyol yaʼ buchul yaʼ baqui mucʼob ti eʼtel, jin chaʼan mucʼʌch cʌqʼuentel lojon jiñi permiso.

Cheʼ bʌ mic chaʼlen lojon subtʼan yicʼot jiñi hermanojob, mic chaʼlen lojon xʌmbal jumpʼejl hora o ñumen cheʼ bʌ mic letsel lojon ti chan bʌ wits yicʼot mi lon j cʼaxel tac ti jaʼ. Cʼajal c chaʼan cheʼ bʌ cojaxto tsaʼ letsiyon ti wits. Orajach tsaʼ lon c chaʼle uchʼel, i tsaʼ c chʼʌmʌ lojon juncojt autobús cheʼ ti a las 5:30 ti sʌcʼan chaʼan mi lon c majlel ti jumpʼejl ñajt bʌ alʌ lumalʌl. Tsaʼ cʼaxiyon lojon ti jaʼ, i tsaʼ cajiyon lojon ti letsel ti wits. Come wen chan jiñi wits muqʼuix i taj c wut jiñi i yoc jiñi hermano yaʼ bʌ ñaxan majlel baʼañon.

Ti jiñi bʌ sʌcʼan, Harvey tsiʼ chaʼle subtʼan yicʼot chaʼtiqui uxtiquil hermanojob i joñon tsaʼ c bajñel chaʼle subtʼan ti jumpʼejl alʌ lumalʌl baqui chumulob jiñi yujiloʼ bʌ jiñi tʼan japonés. Cheʼ ti a la 1:00 p.m. maʼañix c pʼʌtʌlel come maʼañic chuqui cʼuxul c chaʼan. Cheʼ bʌ tsaʼ c taja Harvey, jiñi hermanojob tsaʼix majliyob. Harvey tsaʼ aqʼuenti uxpʼejl tumut tiʼ qʼuexol revista tac. Harvey tsiʼ cʌntesayon j cʼux tsij bʌ tumut cheʼ bʌ mic chʼuben i pat i mic tsʼuʼ. Anquese mach comic tsaʼ cʌlʌ, tsaʼʌch c tsʼuʼu jumpʼejl. Pero ¿majqui mi caj i cʼux jiñi i yuxpʼejlel? Joñon tsaʼ  c tsʼuʼu come Harvey maʼañic mi caj i mejlel i cuchon jubel ti jiñi wits mi tsaʼ cʼuñʼayon tiʼ caj wiʼñal.

An junyajl, ti jiñi jumpʼejl bʌ qʼuin colem tempa bʌ an chuqui tsaʼ c ñusa mach bʌ pijtʌbilic c chaʼan. Tsaʼ cʌyleyon lojon tiʼ yotot juntiquil hermano chumul bʌ tiʼ tʼejl jumpʼejl i Yotlel tempa bʌ. Jiñi yujiloʼ bʌ tʼan amis wen ñuc miʼ qʼuelob cheʼ bʌ mi lac chaʼlen tsʼʌmel. Jin chaʼan, jiñi i yijñam jiñi superintendente i chaʼan circuito tsiʼ wen chajpa chaʼan mi lon c tsʼʌmel. Come Harvey cabʌl chuqui woliʼ mel, tiʼ subeyon chaʼan joñon mic ñaxan tsʼʌmel. Jiñi hermana tsiʼ chajpa jumpʼejl cubeta jaʼ tsʌwam bʌ yicʼot ticʌw bʌ, i tsiʼ yʌqʼueyon jumpʼejl tsima. Tsaʼ toj sajti c pusicʼal cheʼ tsaʼ j qʼuele chaʼan jiñi hermana tsiʼ cʌyʌ jiñi muʼ bʌ caj j cʼʌn ti tsʼʌmel tiʼ tojel jiñi i Yotlel tempa bʌ baqui an jiñi hermanojob woli bʌ i chajpañob jiñi colem tempa bʌ. Tsaʼ j cʼajtibe chaʼan miʼ yʌqʼueñon mejl bʌ j cʼʌn chaʼan mic mʌc baqui mic tsʼʌmel. Pero tsiʼ yʌqʼueyon jay bʌ naylo maʼañic bʌ miʼ mʌcon. Tsaʼ c ñaʼta majlel tiʼ pat jiñi otot, pero yaʼan cabʌl ganso muʼ bʌ i chaʼlen cʼux mi an majqui miʼ lʌcʼtesan i bʌ baqui an. Tsaʼ c ñaʼta: «Jiñi hermanojob wen cabʌlob i yeʼtel i maʼañic mi caj i qʼuelob chaʼan woliyon ti tsʼʌmel. Cheʼ jaʼel, mi maʼañic mic tsʼʌmel tajol maʼañic mi caj i mulañob. Jin chaʼan mucʼʌch j cajel ti tsʼʌmel». I tsaʼʌch tsʼʌmiyon.

Harvey tsiʼ qʼuele chaʼan jiñi hermanojob yujiloʼ bʌ jiñi tʼan amis wocol chaʼan miʼ pʼʌtʼañob tiʼ chaʼan bʌ Dios come cabʌlob mach yujilobic pejcaya jun. I cheʼ jaʼel, maʼañobic i chaʼan jun tac añoʼ bʌ tiʼ tʼan. Come maxto jalic tsaʼ tejchi ti tsʼijbuntel jiñi tʼan amis, tsaʼ lon j qʼuele chaʼan miʼ mejlel lon j cʌntesan jiñi hermanojob ti jiñi i tʼañob. Ili wen ñuc bʌ eʼtel. Pero xucʼu xucʼul tsaʼ caji i cʌñob i bajñel pejcañob jun. Cheʼ ti jabil 1966 tsaʼ tejchi ti mejlel jiñi jun tac ti tʼan amis. I cheʼ ti 1968 tsaʼ loqʼui jiñi Lac Tsictesʌbentel.

Pero jiñi yumʌlob mach yomobic chaʼan miʼ pujquel jun tac ti yambʌ tʼan cojach ti jiñi tʼan chino. Jin chaʼan, chaʼan maʼañic miʼ tejchel wocol, jiñi Lac Tsictesʌbentel ti jiñi tʼan amis tsaʼ caji ti mejlel ti cabʌl formato. Jumpʼejl ejemplo, yaʼ ti Lac Tsictesʌbentel miʼ chʼʌm tilel chaʼpʼejl tʼan: Chino mandarín yicʼot amis. Tsaʼ caji lon c poj pʌs chaʼan wolʌch lon j cʌntesan jiñi wiñicob xʼixicob (quixtañujob) ti jiñi tʼan chino. Cʼʌlʌl ti jimbʌ ora jiñi i yorganización Jehová an i locʼo jun tac ti jiñi tʼan amis chaʼan miʼ coltan jiñi quixtañujob chaʼan miʼ cʌñob jiñi i sujmlel tac am bʌ ti Biblia (Hch. 10:34, 35).

Cheʼ bʌ 20 jab jiñi hermanojob yujiloʼ bʌ tʼan amis maʼañic miʼ jacʼbeñob jiñi i mandar Dios. Come maʼañic miʼ wen chʼʌmbeñob i sujm jiñi principio tac am bʌ ti Biblia, an muʼ bʌ i melob tsʼiʼlel, miʼ yʌcʼañob (qʼuixñañob) o miʼ ñucʼob cʼujts o miʼ jachʼob nuez de areca (o de betel). Harvey tsiʼ julaʼta cabʌl congregación tac chaʼan miʼ coltan jiñi hermanojob i chʼʌmbeñob i sujm bajcheʼ yilal miʼ qʼuel Jehová jiñi woli bʌ i melob. Cheʼ bʌ woli c julaʼtan lojon jumpʼejl congregación, tsaʼ lon c ñusa jiñi wocol tsaʼ bʌ c subeyetla ti ñaxan.

Jiñi hermanojob añoʼ bʌ i pecʼlel tsaʼʌch i qʼuextayob i melbal (chaʼlibal), pero an yambʌlob maʼañic bʌ tsiʼ jacʼʌyob. Ti ñaxan yaʼ ti Taiwán an 2 mil 450 xsubtʼañob pero tsaʼ jubi ti 900. Ili tsiʼ yʌqʼueyon lojon cabʌl c chʼijyemlel. Pero cujil lojon chaʼan Jehová maʼañic baqui ora mi caj i yʌqʼuen i bendición i yorganización mach bʌ sʌquic (2 Co. 7:1). Ti wiʼil, sʌquix tsaʼ cʌyli jiñi congregación tac. I wocolix i yʌlʌ Jehová ili ora yaʼ ti Taiwán an ñumen ti 11 mil xsubtʼañob.

Cheʼ ñumeñix jiñi jabil 1980, jiñi hermanojob yujiloʼ bʌ jiñi tʼan amis tsaʼ caji i ñumen pʼʌtʼañob tiʼ chaʼan bʌ Dios. Jin chaʼan, Harvey tsaʼix mejli i wen coltañob jiñi yujiloʼ bʌ jiñi tʼan chino. Tsiʼ wen tijicñesʌbe i pusicʼal cheʼ bʌ tsiʼ colta sujtel tiʼ Testigo Jehová i ñoxiʼal jiñi hermanajob. Cʼajal c chaʼan cheʼ bʌ i ñoxiʼal juntiquil hermana cojaxto tsiʼ melbe oración Jehová i Harvey wen tijicña tsiʼ yubi i bʌ. Joñon jaʼel tijicña mi cubin c bʌ chaʼan tsaʼ j colta cabʌl quixtañujob chaʼan miʼ lʌcʼtesañob i bʌ ti Jehová. I wen tijicña tsaʼ cubi c bʌ cheʼ bʌ tsaʼ c chaʼle eʼtel yaʼ ti sucursal i chaʼan Taiwán yicʼot chaʼtiquil i yalobil juntiquil tsaʼ bʌ cʌqʼue estudio.

C bajñelix tsaʼ cʌyleyon. Cheʼ bʌ 59 jab temel tsaʼ chumleyon quicʼot c ñoxiʼal, pero Harvey tsaʼ chʌmi (sajti) tiʼ caj cáncer cheʼ ti enero i chaʼan 2010. Cheʼ bʌ 60 jab, Harvey tsiʼ melbe i yeʼtel Jehová tiʼ pejtelel ora. Mic wen cʼajtesan. Pero wen tijicña mi cubin c bʌ cheʼ bʌ tsaʼ lon c chaʼle coltaya cheʼ bʌ tsaʼ tejchi jiñi subtʼan ti chaʼpʼejl país. Tsaʼ j cʌñʌ lojon chaʼpʼejl tʼan i Harvey tsiʼ cʌñʌ i tsʼijbun jiñi tʼan tac chaʼan miʼ coltan tiʼ yeʼtel.

Cheʼ bʌ maxto cabʌlic jab tsaʼ chʌmi Harvey, jiñi Junmojt muʼ bʌ i pʌsob bij tsiʼ qʼueleyob chaʼan ñumen wen cheʼ mic chaʼ majlel ti Australia tiʼ caj wen añix c jabilel. Ti ñaxan tsaʼ c ñaʼta: «Bej com ajñel ti Taiwán». Pero Harvey tsiʼ cʌntesayon chaʼan yom mic mel muʼ bʌ i subeñon i yorganización Jehová. Jin chaʼan tsaʼʌch chaʼ majliyon ti Australia. Xucʼu xucʼul tsaʼ j qʼuele chaʼan ñumen weñʌch cheʼ tsaʼ chaʼ tiliyon ila ti Australia.

Ili ora woliyon ti eʼtel ti jiñi sucursal i chaʼan Australasia i mucʼon ti subtʼan yicʼot jiñi congregación cheʼ ti sábado yicʼot ti domingo. Mi cʌqʼuen gira jiñi muʼ bʌ i tilel i julaʼtañob Betel i yujiloʼ bʌ jiñi tʼan chino o japónes i mic wen mulan ili eʼtel. Pero comix chaʼan Jehová muqʼuix i chaʼ tejchesañob jiñi chʌmeñoʼ bʌ. Harvey tsiʼ cʌñʌ chaʼan tiʼ pejtelel ora yom mic jacʼ i mel pejtelel muʼ bʌ i suben Jehová. Jin chaʼan Jehová, chʌn cʼajalʌch i chaʼan Harvey (Jn. 5:28, 29).