Aave ˈnën ˗tɔ ˗a dhö ˗bha ˈnëngɔɔn˗ ˗nu ˗yiishiö bhë ˗a mɛn ˈˈkpii˗ ˗sü. ˈDhɛ ˗a ˗mɛn ˗nu ˗wo gagade ˗dɔ Midlandö Ʒɔnkshiɔn, Ɔstrali ˗sɛ ˈgü, ˗a ˗kwɛ ˗ya ˗mɔn 80 ˗bha ꞊dɛɛ. ˈÖ ˗kë ˈˈdhʋ̈, kö ˈˈsɛ ˈö bhë ˗ya ˗pö ˈˈflɛɛdhɛ ꞊dede ˈgü. Zoova ˗dhɔ ˗ya ˗kë, ˈyö bɔ ˈˈyi ꞊bhaa kö ˗a ˗kwɛ ˗yö 14. ˗A ˗dhɛ ˈti ꞊gwëë, ˈyö˗ ˈwɔn dɔ ꞊dhɛ ˗wa yö nu ö ˗dhɛ ˗zlanwokɔdhi ˈgü, ö dua ˈyaa ˗mü ˈö ˗kɔ ˗a ˈka. Yi do ˈka, kö ˗yö ꞊kun ˈˈtɩtɩ, kwa ꞊dhegblü do ˗ya ˗pö ˗a ˗dhɛ ˗yö ˈˈGlaadhiʋ̈ ˗tɔn ˗wo pö ˗bhɔkwëë ˗ta. ˗Yö ˗kë ˗a ˈgü ꞊dhɛ ö ˗kɔ ˈyaa ꞊mɔɔn˗ ˗bha, ˈˈkɛɛ ˈyö kwa ꞊dhegblü bhë ˈö dhiaŋ zë ˗a ˗dhɛ ˈö pö: «Mɛn ˈbha ꞊yaa˗ pö ˈü pë ˈbha kë Zoova ˗bha ˗kɔlokota ˈgü, kö ˗ya ˈwɔn ˗dɔ ꞊dhɛ ü ˗kɔ ˗mɔn ˗a kë ˗sü ˗bha.»​—2 Ko. 3:5.

Man ˈdhö, n dhe ˈdhö, waa n dhegbaan, yi gagade ˗dɔ ˈˈtʋ̈ŋ dosɛnŋ ˈgü, Anglötɛɛ. ꞊Taabha, n dë ˗kë Zoova ˗bha ꞊Gbɛkiö ˈka. ˈˈKɛɛ ˗a zübhodhɛ ˈgü, ˗yö ˗kun ˗gban ˗ni ˈgü yi ˗gɔ. ˈKö ˗kë ꞊dhɛ ˈyaa kun ˈˈwɩ ˗ni ˈgü ˗a ˗bha, a ˗dho ˈa bɔ ˈˈyi ꞊bhaa kö n ˗kwɛ ˗yö ˈˈseishiö ˈˈkpaan. A˗ ˗ya n ˗zo ˈˈpiʋ̈ kö ˈa kë ˗yödhiʋ̈ ˈka, kö ˈa ˈˈdhʋ ˈa kë bɔmɛn ˈka. ˈˈKɛɛ ˈyö  n dë ˗ya pö n ˗kwɛ ˈti yö 21 ˗bha ꞊köŋ, ö ˈti ˗dho ˈˈwɩ ˗a ˗bha kö ˈa kë ˗yödhiʋ̈ ˈka. ˈYaa kun n ˈˈpiʋ̈ ˈpö ˈa n ˈˈɲan ˈto ˈˈtʋ̈ŋ ꞊gblɛɛn ˈˈpiʋ̈. ˗Dhɛ ˈö n ˗kwɛ ˗yö ˗kë 16, ˈyö ˗we ˗a ˗bha kö ˈa ˈdho n dhegbaan ꞊kee˗ Ɔstrali. ꞊Taabha, kö n ˗kwɛ ˗ya kë 18, ˈyö ˈa ˗kë ˗yödhiʋ̈ ˈka.

ˈDhɛ Ɔstrali ˈyö yaa Aave ˈyi yi ˈko dɔ ˗a ˗bha. ˗Kɔ ˈyi˗ ˗bha ꞊plɛ yi ˗kun ˗a ˈˈpiʋ̈ kö ˈyi kë bɔmɛn ˗nu ˈka, ˈyö ˈyi yi ˈko sü ˗kwɛ 1951 ˈgü. ˗Dhɛ ˈö ˈya ˗yödhiʋ̈dhɛ kë ˗kwɛ ꞊plɛ ˈka, ˈyö n ꞊gɔɔn ˗yö ˗kë ˈˈpian do ˈˈpiʋ̈ ˗maankëmɛn ˈka. Ɔstrali ˗sɛ ˈˈpian ˈˈgbɛɛ ˗dhɛ ˈö ˈɲënŋ˗ ˗pö ˗ʒian ˈka bhë ˈyö ˈwo yi bɔ mü. ˗A ˗wɔn ˈgü, yi ˈˈta ˗sü ˈyö ˈyi dho ˈˈyɛtadhɛ waa ˈpödhɛ ˗nu ˈwo mü ꞊gblɛɛn ˗an ˈgü.

˗Kwɛ 1954 ˈgü, ˈyö ˈwo yi ˗dhɛ Galaadö ꞊klaŋ ˈkɔdhi 25 ˗bha ˗naan ˗ta. Yi ˗bha ˗kë bɔmɛn ˈka ˗sü ˈyi˗ ˗ya yi ˗zo ˈˈpiʋ̈ bhë, ˗yö ˈdho˗ yö ˈko ˈˈdhiʋ̈. Yi ˗ya ˈˈyitagɔ ˈgü, ˈyö ˈyi dho Ni Yɔɔkö. ˗Dhɛ ˈyi dho Galaadö, yi Biblö ˗draan ꞊dedewo, ˈö ˈwo Ɛspaɲɔlö ˗wo ˗zɔn yi ˗dhɛ ˈpö. ˗Wo ˈö bhë ˗a draanˈˈ ˗sü ˗kë ˈˈgbɩɩ˗ Aave ˗bha ˈka, ˈyö ˗tɔ ꞊dhɛ ˈyaa dɔ r pö ˗dhɛ ˈka.

꞊Klaŋ ˈö bhë ˗a ˈˈdhiʋ̈, ˗wa ˗pö yi ˗dhɛ ˈmɛn ˈwo˗ ˈˈpiʋ̈ kö ˗wo ˗an bɔ Ʒapɔn ˗sɛ ˈgü, ˗wo ꞊mɔɔn˗ ˗bha ˈö ˈwo wo ˈtɔ ˗ya, kö ˗wo Ʒapɔnnɛ ˗wo draanˈˈ. ˈYö yaa n ꞊gɔɔn ˈyi˗ pö ˗dhɛ ˈˈoo ˗dhɛ ˈö Zoova ˗bha ˗kɔlokota dho yi bɔ ˗a ˗bha, ˗yö yi bɔ mü. ˗Dhɛ ˈˈtʋ̈ŋ ˈnën ˈbha ˗ʒiö, ˈyö Alübɛɛ Skroedëë, ˈö ˗kë yi ˗bha ꞊klaŋgɔmɛn do ˈka Galaadö bhë, ˈö˗ yö ꞊dhɛ yi ˈtɔ ˈyaa ˈsëëdhɛ bhë ˗a ˗ta. ˈYö˗ pö yi ˗dhɛ ˈyi yi ˗zota ˗a ˈgü ˈzü ˗së ˈka. ˗Dhɛ ˈyi ˈzëzë dɔ ˗ni ˈgü, ˈyö˗ pö yi ˗dhɛ: «Yaa ꞊klaŋgɔmɛn ˈˈwɛɛ ˗nu ˈwo to ˈya ka ˈtɔ ˗ya. ˗Ka ˗ya Ʒapɔnnɛ ˗wo draanˈˈ ˗sü ˗bha.» ˗Wo ˈö bhë, Aave ˗ya pö ˗dhɛ ˗dɔ ˈzodhö.

˗Dhɛ ˈyi ˗lo Ʒapɔn ˗kwɛ 1955 ˈgü, kö ˗zlanwopömɛn ˗nu 500 ˈˈkpaan ˈnën ˈwo ˈˈsɛ bhë ˗a ˗dhɛ ˗todhʋ̈sü ˈgü. ˈÖ ˗kë ˈˈdhʋ̈ kö Aave ˗kwɛ ˗yö 26, kö n ˗bha ˗yö 24. Yi ˗kë bɔmɛn ˈka ˈˈkwipö ˈö ˈˈyitagɔ dɔdhɛ ˈdhö mü ˈwo˗ Kobe ˗kë bhë ˗a ˈgü. ˗Kwɛ ˗yiishiö ˈnën ˈyi˗ ˗kë mü, ˈyö wo n ꞊gɔɔn ˗dhɛ kö ˗yö kë ˈˈpian do ˈˈpiʋ̈ ˗maankëmɛn ˈka. Yi zuʋ̈ˈˈ ꞊nii ˗kun ˗da ˗sü ˈka ꞊dedewo. ˈˈKwipö ˈwo˗ Nagoya ˗kë bhë, ˈyö ˈwo yi bɔ ˗a ˈˈpian ˗ta. Yi ˗bha yö ˈö bhë oo, yi ꞊dhegblü ˗nu oo, ˗bhöpë ˗së ˗nu waa ˗gapë ˗së ˗nu, ˗an ꞊gban ˗dhɔ ˗kun yi kë ˗ni ˈgü. ˈˈKɛɛ ˗a yi ˈti ꞊gwëë, ˈyö ˈwo yi bɔ ˈzü ˗dhɛ ˈˈwɛɛ ˈgü. ˈYaa kun ˗a ˈˈpiʋ̈ kö ˈyi˗ pö Zoova ˗dhɛ:«˗Abin!»

˗Dhɛ ˈö ˈya ˗kwɛ ˗yaaga kë ˗maankëmɛn ˗dhɛ ˈgü, fidhiadhö ˈö Ʒapɔn ˗ya ˗pö ˈyi ˈdho Taiwanö kö ˈyi Amisö ˗wopömɛn ˗nu ˗takun. ˗A  ˈˈtʋ̈ŋ bhë˗ ˈgü, kö kwa ꞊dhegblü ˗nu ˈwo Amisö ˈka, ˗a mɛn ˈbha ˗nu ˗wa kë ˗gban ˗Zlan ˗gɔ ˗mɛn ˗nu ˈka. Fidhiadhö ˈö ˈˈsɛ bhë˗ ˈgü ˗yö kun kwa ꞊dhegblü ˈbha ˈö Ʒapɔnnɛ ˗wo man ˗së ˈka ˗a mɛɛnˈˈ ˗ni, kö ˗yö ˗an ˗takun. * ˈDhɛ ˗kë ꞊dhɛ yö ˈö ˈyi kun ˗a kë ˗ni Ʒapɔn bhë ˗yö ˗kun yi ˗dhɛ ˗së, ˗go ˈmü ˗sü ˗kë yi ˗kwaa ˈˈgbɩɩ˗. ˈˈKɛɛ ˗dhɛ ˈö ˗kë ꞊dhɛ ˗wa yö dɔ Aave ˗kɔ ˈka ˈyaa ˗kɔ, yi ˗wɩ ˗a ˗bha.

Yi ˗lo ˈmü ˗kwɛ 1962 ˈgü Novanblö ˈˈsu ˈgü. Mɛn 2.271 ˈnën ˈwo kun ˗zlanwopömɛn ˈka, ˈyö ˗a mɛn ꞊vadhɛ kun Amisö ˗nu ˈka. ˗A züdɔdhɛ ˈgü, ˗a ˗dhɛ ˗kun ˗a ˗bha kö ˈyi Shinɔa ˗wo draanˈˈ. ˗A ˈsëëdhɛ ˈˈkee dosɛnŋ ˈnën ˗kë yi ˗gɔ, ˈö yi ˗bha ꞊klaŋgɔmɛn ˈyaa kun ꞊Glee˗ ˗wo man ˗ni ˈgü. ˈˈKɛɛ yi˗ ˗draan.

˗Dhɛ ˈyi ˗lo Taiwanö ˗a ˗dhɛ ˈti ꞊gwëë, ˈyö ˈwo Aave ˗kë Betɛdhö ˈwɔnyëë˗ ˈka. ˈDhɛ ˗kë ꞊dhɛ ˗a Betɛdhö ˈyaa kun ˈkpii˗, Aave ˗yö ö ˗bha yö ˗nu ˗kë mü, ˈö ˈˈdhoogɔ ˗yaaga sü ˈˈsu do ˈgü ˈpö, ˈö bɔ Amisö ˗zlanwokɔdhi ˗nu ˈgü. ˈˈTʋ̈ŋ ˈbha ˗nu ˈka, ˗yö ˗kë ˗maankëmɛn ˈka, ˗a ˗wɔn ˈgü ˗bhɔkwëë ˈkpii˗ ˗nu ˗wa kë, ˗yö ˈˈdhɛɛtadhiaŋ˗ ˗nu ˗zë. ˗Yö ꞊mɔɔn˗ ˗bha ˗be ˈö ö ˗bha ˈˈdhɛɛtadhiaŋ˗ ˗nu zë Ʒapɔnnɛ ˗wo ˈgü, ˈö kwa ꞊dhegblü ˗nu ˈwo Amisö ˗wopömɛn ˈka, ˈwo˗ ˈgüman. ˈˈKɛɛ ˗a ˈˈtʋ̈ŋ ˈö bhë ˗a ˈgü, kö ˈˈsɛgɔdhiʋ̈mɛn ˗nu ˗wa ˈtɔŋ˗ dɔ ꞊dhɛ ˗zlanwopömɛn ˗nu ˗bha ˗bhɔkwëë ˈˈpɛpɛ ˈö dho kë, ˗a dua ˗mü ˗yö kë Shinɔa ˗wo ˈgü. Aave ˗yö ö ˈgü ˗dɔ ö ˗de ˗gɔ ˈˈgbɩɩ˗ ˈyö ˈˈdhɛɛtadhiaŋ˗ zë Shinɔa ˗wo ˈgü, ˈyö ˈwo˗ ˗wo ˈˈdhiʋ̈ ˗lo Amisö ˗wo ˈgü.

ˈDhɛ ˗kë ꞊dhɛ Taiwanö ˗dhɛ ˗kun ˈˈsɔdha ˗nu ꞊kwɛɛ˗, kwa ꞊dhegblü ꞊waa˗ pö ˈwo˗ ˗bhɔkwëë ˈkpii˗ ˗nu kë, ˗wa ˈˈplɛnŋsɔn ˗sü ꞊köŋ. ˈSëëdhɛ ˗nu bhë ˗an ꞊slɔɔ ˗sü ˈyaa kun ˈˈplëëplë. ˈˈTʋ̈ŋ ˈbha ˗nu ˈka, polishie ˗nu ˈwaa˗ nu ˈˈvaandhö. ꞊Ya kë ꞊dhɛ ˈˈdhoogɔ ˈö ˗bhɔkwëë dho kë ˗a ˈgü ˗ya ˗wo, ˈö polishie ˗nu ˈti ˗a ˈˈplɛnŋsɔn nu ꞊köŋ, Aave ˗dho ˈdho ˈö ˗ya ˗an ꞊zlöö. ˈDhɛ ˗kë ꞊dhɛ mɛn ˈˈwɛɛ ˗ya kë ˗an ˗bha ˈˈkaan˗ ˈgü ˈyaa kë ˗an ˗dhɛ ˗së, Aave ˗ya ˈdhö ˈmü, ˗wa ˈsëëdhɛ ˗yökë ˈzozodhö.

ˈˈTʋ̈ŋ ˈyi kun ˗wo ˗ni ˗a ˈka kwa ꞊dhegblü ˗dhɛ bhë, yi ˈbha ˗nu ˈka, yi pë ˈö ˗ʒiö ˈˈlɛlɛ do ˗ta ˈyi˗ ˗kë kö yi ˈˈta ˗sü ˗ni yi ˗gɛn ˗ta. Yi ˗da ˗tɔn ˗nu ˗bha, ˈö ˈyi ˈˈyiga ˈˈgblʋ̈gblʋ̈ ˗nu ˗kan. ˗Da ˗blɛblɛsü ˈa˗ wo ˗tɔn ˗bha, n ˗zo ˈti bhɔ ˗a ˈka. Dhiapiʋ̈ bhë˗ ˈka, ˈdhɛ ˈyi ˗bhöpë pë ˈˈtɩɩ ˗bhö, yi ˗suö 5:30 ˈka, ˈyö ˈyi ˗ya gɔ ˈgü, ˈyi dho ˈpödhɛ do ˈbha ˈö ˈmü ꞊gblɛɛn ˗a ˈgü. Yi ˈˈyiga ˈˈgbɛɛ do ˗kan, ˈyö ˗yi ˗da ˗tɔn ˗bha. ˗A ˗tɔn ˗kun luuˈˈ ˗sü ˈka ˈgbɛ, ˈö yö mü kö kwa ꞊dhegblü ˈö kun n ˈˈdhiʋ̈ bhë, ˗a ˗gɛn ˗ya yö n ˈˈɲan ˈka ꞊klöö˗.

˗Dhɛkpaɔyi bhë˗ ˈka, Aave waa kwa ꞊dhegblü ˗nu ˈwo kun ˈmü ˈyö ˈwo ˗zlanwo pö ˗wo ˈkwëë˗, ˈyö man do ˈa dho ˈpödhɛ ˈˈtɩtɩ do ˈö mɛn ˗nu ˗wo Ʒapɔnnɛ ˗wo pö mü ˗a ˈgü. ˗Dhɛ ˈkwa dɔ ˈɲënŋgü 1:00 ˈka, kö din ˗ya n ˈkun, ˈman kë ˈˈtëkë ˗tëkë. ˗Dhɛ ˈö ꞊taabha yaa Aave ˈyi ˗kpan yi ˈkwëë˗, kö kwa ꞊dhegblü ˗nu ˈwo to ˗wa ˈdho. Kö Aave ˗ya ˈsëëdhɛ nu mɛn ˗nu ˗dhɛ ˗tɔ ˗ɲaan bhɛ ˗yaaga ˗bha. ˈYö ˗tɔ ˗ɲaan ˗saa ˗bhö ˗kɔ ˗zɔn n ˗dhɛ. ˗Dhɛ ˈö˗ zua ˗a ˗gɔ ˈˈpiʋ̈, ˈö˗ zua ˗a zü ˗bha, ˈyö˗ ˈˈyi ˗gan. ˈKö ˗kë ꞊dhɛ ˗a din ˈyaa kun ˗së, a˗ do ˗sü ˈyö ˈa˗ ˈˈyi mü ˈpö. ˈˈKɛɛ de ˈö dho ˗a ˗totaabhasü mü? Man ˗mü, ˈö sü ꞊dhɛ n ˈti mü, ˈman ꞊fuëë, ˈde dho n ˈsü kö ˗yö yɔɔˈˈ n ˈka? Aave yöö dosɛnŋ ˈyaa ˗mɔn n ˗bha.

ˈˈPian do ˈˈpiʋ̈ ˗bhɔkwëë do ˗ta, ˈwɔn ˈbha ˈö˗ suu ˈti kë n ˈka ˈdo, ˗yö ˗kë. Yi ˗dhɛŋ ˗bhɔ kwa ꞊dhegblü do ˈö˗ ˗bha ˈkɔ kun ˗Bhɔkwëëkëgükɔ ˈwëëdhɛ ꞊dede ˈgü, ˗a ˗gɔ ˈkɔɔ. ˈDhɛ ˗kë ꞊dhɛ Amisö ˗nu ˗bha wɔkɔ ˈgü, ˈˈyi ˗nu ˗dhɛŋ ˗nu ˗dhɛ ˗sü kö ˗wo wo ˈˈzu bhë ˗a ˗wɔn ˗yö ˈˈgbɩɩ˗, ˗an ˗bha ˗maankëmɛn ˗bha dhebɔ ˗yö ˈˈyi ˗nu yi ˗dhɛ kö ˈyi yi ˈˈzu. Yö ˗kun Aave ˗kɔ ˗ta ꞊va, ˈyö˗ pö ˈa ˈdho ˗blɛɛsü. ˈˈYi ˗gbɔ ˗yaaga ˈnën ˈwo kun mü: ˈˈGbʋŋgbʋ do ˈö ˈˈyi ˗saa ˈdhö˗ ˈgü, ˗a do ˈö ˈˈyi ˈˈwoosü ˈdhö˗ ˈgü, waa ˈˈtia ˈˈgbɛɛ do. ˈA ˗dho ˈˈkan n ˗ta, kö ˗maankëmɛn ˗bha dhebɔ ꞊yaa˗ pö n ˗dhɛ ꞊dhɛ ˈya˗ dɔ ˈˈkpɛɛndhö, ˈˈkɛɛ kö kwa ꞊dhegblü ˗nu ˈwo yö kë ˗ni ˈgü ˗bhɔkwëëkëgükɔ ˈgü, ˗wa dɔ ˈmü ˗wo ˗kpan n ˗bha. ˈYö ˈa˗ pö ˗a ˗dhɛ ˗yö pë ˈbha nu n ˗dhɛ kö ˈa˗ dɔ n ˈˈdhiʋ̈. ˈYö nu ˈˈmlan ˈˈlʋ̈ŋkʋ̈ ˗lʋ̈ŋkʋ̈ do ˈka n ꞊dhia. ˈDhɛ ˗kë ˈˈdhʋ̈, ˈyö ˈa ꞊plʋʋ ˈkɔ ˈka, kö mɛn ˗nu ˈwa ˗dho n ˗ga. ˈˈKɛɛ ˈdhɛ ˈa ˗dhɛ ˗ga, kö ˈˈkwitɔ ˈˈgblʋ̈gblʋ̈ ˗nu ˗wa wo ˗gɔ bɔ ˈˈkplʋʋ ˗ta, kö mɛn ˈö dho ꞊ɲɔɔn mü, ˗wa zë ˈgbaa. ˗Dhɛ ˈö ˗kë ˈˈdhʋ̈ ˈya˗ pö: «ˈAa ˈmɛn ˈka yö! A ˗dho dɔ ˈyö ˈa n ˗zu. Yö kwa ꞊dhegblü ˗nu ˗bha ꞊va, ˗an ˗zo ˈti ˗dho kë n ˈˈpiʋ̈. N ˈti n ˈˈzu, ˗yö ˗dho kë yi ˗dhɛŋbhɔadë ˗nu ˈgü ˈya˗.» A ˗dɔ ˈˈkpɛɛndhö ˈa n ˗zu.

Aave ˗ya ˗yö ꞊dhɛ Amisö ˗nu ˗gɛn ˈyaa ˈdho ˈˈdhiʋ̈ ˈyö sü ꞊dhɛ ˗a mɛn ꞊vadhɛ ˈwaa pë ˗wo pö ˗dhɛ dɔ, ɛɛnˈˈ kwa ˗bha ˈsëëdhɛ ˗nu ˈwaa kun ˈdhö ˗an ˗wo ˈgü. ˈÖ ˗kë ˈˈdhʋ̈ kö ˗wo Amisö ˗wo ˗bɛnzë ˗kɔ ˗yökë ˗dɛɛ ˈgü. ˗A ˗wopösü ˈyaa kun ˈˈgbɩɩ˗. ˈYö Aave ˗yö ˗ya ˗a ˗wo pö ˗kɔ ˗zɔn kwa ꞊dhegblü ˗nu ˗dhɛ ˗sü ˗bha. ˗Yö ˗kun yö ˈˈgbɩɩ˗ ˈka, ˈˈkɛɛ ˗yö kwa ꞊dhegblü ˗nu ˗takun ˈyö wo ꞊dede ˈwo ˗mɔn Biblö draanˈˈ ˗sü ˗bha wo ˗de ˗wo ˈgü. Kwa ˗bha ˈsëëdhɛ ˗nu ˗ya ˗yö ˈˈkpɛɛn ˗sü ˗bha Amisö ˗wö ˈgü ˗kwɛ 1966 ˈgü, ˈyö ˗kwɛ 1968 ˈgü, ˈˈGlaadhiʋ̈ ˗tɔn ˈsëëdhɛ ˗ya yö ˈˈkpɛɛn ˗sü ˗bha ˗wo bhë˗ ˈgü.

ˈˈKɛɛ ˗a ˈˈtʋ̈ŋ bhë˗ ˈka, ˈsëëdhɛ ˗nu ˗wa kë ˗wo ˈˈwɛɛ ˈgü, kö ˗yö ˈti kë Shinɔa ˗wo ˗zë ˗a ˈka, ˈˈsɛgɔdhiʋ̈mɛn ˗nu ˈwaa ˈˈwɩ ˗a ˗bha kö ˗wo ˗an ˗gblü ˗dhɛ ꞊gban ˈgü. ˈDhɛ ˗kë ꞊dhɛ ˈyaa kun kwa ꞊dhegblü ˗nu ˈˈpiʋ̈ kö ˗yö kë ˈwɔn ˈka, ˗wo ˗ya ˈˈGlaadhiʋ̈ ˗tɔn ˗nu ˗yökë ˗sü ˗bha ˗kɔ ꞊va ˗ta. ˗A ˈwɔnzuan ˈtɔ˗ ꞊dhɛ ˈˈtʋ̈ŋ ˈbha ˈgü, ˗wo Shinɔa ˗wo waa Amisö ˗wo ˗an ˗da ˈko ˈˈpiʋ̈, ˈyö ˈwo ˗an ˗bɛnzë ˈˈGlaadhiʋ̈ ˗tɔn ˗nu ˈgü. ˈÖ sü ˈˈtʋ̈ŋ bhë˗ ˗bha, Zoova ˗bha ˗kɔlokota ˗yö ˈsëëdhɛ ꞊va ˗yökë Amisö ˗wo ˈgü, kö ˗yö ˗an ˗takun gagade ˗nu ˈwo Biblö ˈgü ˗an dɔ ˗sü ˗bha.​—Këw. 10:34, 35.

˗Kwɛ ˈö ˗mɔn ˗kɔŋ ꞊plɛ ˗bha ˗a ˈˈpiʋ̈, kwa ꞊dhegblü ˗nu ꞊vadhɛ ˈwo Amisö ˈka, ˈwaa kun ˗Zlan ˗bha ˈtɔŋ˗ ˗nu ˈkun ˗ni. ˗Dhɛ ˈö ˗kë ꞊dhɛ wo ˈti Biblö ˗bha ˈtɔŋ˗ ˗gɛngbandhɛ ˗nu ˈgüman ˗së ˈka, ˗a mɛn ˈbha ˗nu ˗kun ˈˈɲangüyaa kë ˗ni, ɛɛnˈˈ we ꞊va mü ˗ni. Mɛn ˈbha ˗nu ˗kun ˈgɔ˗ suu ˈwo˗ ˗dhɛ betɛlö bhë ˗a ˗bhö ˗ni, ˈö mɛn ˈbha ˗nu ˗wo ˈˈzaŋ ɛɛnˈˈ ꞊shɛti mü. Aave ˗yö ˗bɔ ˗zlanwokɔdhi ꞊vadhɛ ˈgü ˈö ˗an ˗takun, kö ˗kɔ ˈö Zoova ˗yö pë ˗nu bhë ˗an yö˗ ˈka, ˗wa ˈgüman. ˗A ˈˈtʋ̈ŋ bhë˗ ˈka, ˈyö ˈwɔn ˈa˗ ˗gɛn dɔ ˗a zübhodhɛ ˈgü bhë, ˈyi bɔ ˗a ˈgü.

ˈMɛn ˈwo wo ˗de ˗kë ˈˈtɩtɩ, ˗wo ˗we ˗a ˗bha ˈyö ˈwo wo ˈˈtakɔ ˗nu bho ˈˈgblʋʋ. ˈˈKɛɛ ˗a mɛn ꞊vadhɛ ˈti ˈˈwɩ ˗a ˗bha. ˗Kwɛ 20 ˈˈkpaan ˈgü, ˗zlanwopömɛn ˗nu 2.450 ˈwo kun Taiwanö bhë, ˗wo ˗to 900. ˗Yö ˗kë mɛn ˈgü ga ˗wɔn ꞊dede ˈka. ˈˈKɛɛ ˗yö ˗kun yi ˈˈɲaan ꞊dhɛ Zoova ˈyaa ꞊mɔɔn˗ ˗bha kö ˗yö ˈdhuëë˗ ˈkpɔ ˗kɔlokota ˈö˗ ˈgümɛn ˗nu ˈdhö ˗dhiiwɔn ˗nu kë ˗ni ˈgü, ˗a ˗bha. (2 Ko. 7:1) Zoova ˗yö ˈwɔnyaakëmɛn ˗nu ˗bho ˗zlanwokɔdhi ˈgü, ˈyö ˗a ˈsaa˗ ˈgü, ꞊dɛɛ ˗zlanwopömɛn ˗nu 11.000 ˈnën ˈwo Taiwanö.

ˈÖ sü ˗kwɛ 1980 ˗bha, ˗zlanwokɔdhi ˗nu ˈwo Amisö ˗wo ˈgü, ˗wo wo ˗de ˗slɔɔ ˗zuu ˈgü. ˈDhɛ ˗kë ˈˈdhʋ̈, ˈyö Aave ˗yö ö ˈˈtʋ̈ŋ ˗kë ˈmɛn ˈwo Shinɔa ˗wo pö ˗an ˈgü. ˗Yö kwa ꞊dhegblüdhe ꞊vadhɛ ꞊gɔɔn ˗nu ˗takun, ˈö ˈwo ˗kë Zoova ˗bha ꞊Gbɛkiö ˗nu ˈka. ˗A zuʋ̈ˈˈ ꞊nii ˗da ˗a kë ˗sü ˈgü. Yi do ˈka, ˗dhɛ ˈö˗ man ꞊dhɛ ˗a mɛn do ˗ya bhɛɛˈˈ ˗blɛblɛsü wo Zoova ˗dhɛ, ˗yö ˗kë ˗a ˗dhɛ ˗së. Man ˗de ˈpö, ˗a kë ˗sü kö ˈa zuʋ̈puumɛn ˗nu ꞊vadhɛ ˗takun kö ˗wo ꞊ɲɔɔn Zoova ˗bha bhë, n zuʋ̈ˈˈ ˈˈgblü ˗yö dhi ˗sü ˈka ˗a ˗wɔn ˈgü. Mɛn ˈbha ˈö yaa˗ ˗nu ˈyi Biblö ꞊draan, yaa˗ gbö waa˗ ˈdhu yi yö ˗kë yi ˈkwëë˗ Betɛdhö ˈö Taiwanö ˗a ˈgü. ˗Yö n zuʋ̈ˈˈ ˈˈgblü ˗dhi ˈgbɛ.

꞊Dɛɛ, n ꞊gɔɔn ˈyaa mü ˈzüdho. ˗Yö ˗to ˈˈyua ˈwo˗ kanŋsɛɛ ˗kë bhë ˗a ꞊kwaa, ˗kwɛ 2010 Zanvie 1 ˈka. Yaa˗ ˗nu yi pë ˈö ˗mɔn ˗kwɛ 59 ˗bha ˗a ˗kë yi ˈkwëë˗. ˈPë ˗mɔn ˗kwɛ 60 ˗bha ˗ya ˗kë ˈˈtʋ̈ŋ ꞊gban ˈgü ˗yö ˈgü. ˗A ˗dhɔ ꞊kun n ˗bha ˗kplawo. ˈˈKɛɛ ˗a kë ˗sü kö ˈa˗ ˗takun kö ˈyi yö kë ˈˈsɛ ꞊plɛ ˗sɛnŋbɔ ˈwo bhë ˗an ˈgü, ˗yö n zuʋ̈ˈˈ ˈˈgblü ˗dhi. ˗A ˈˈtʋ̈ŋ bhë ˗a ˈgü, kö ˗dhɛ ˈö ˈwo ˗zlanwopösü zübho ˈmü, ˗a yi ˈti ꞊gwëë ꞊köŋ. Azi ˗wo ˈˈgbɩɩ˗ ꞊plɛ ˈwo ˈdhö, yi ˗an ˗wopösü ˗draan, ˈö Aave ˗yö ˗an ˗bɛnzë ˗kɔ ˗nu dɔ.

ˈDhɛ ˗kwɛ ˈbha ˗ʒiö, ˈyö kwa ˈˈdhiʋ̈ʒiöwomɛn ˗nu ˗wa pö ꞊dhɛ, ˈdhɛ ˗kë ꞊dhɛ ˈman kë zii bhë, ˈa ˈdho kö ˈa ˗ya Ɔstrali. Pë ˗blɛɛsü ˈa˗ pö n ˗zo ˈˈpiʋ̈ ˈyö ˈtɔ˗: «ˈMaan˗ ˈˈpiʋ̈ ˈa ˈgo Taiwanö.» ˈˈKɛɛ pë ˈö Aave ˗ya ˗zɔn n ˗dhɛ ˈyö ˈtɔ˗ n dua ˈyaa ˗mü kö ˈa˗ pö Zoova ˗bha ˗kɔlokota ˗dhɛ: «Abin!» ꞊Taabha, a˗ ˗yö ꞊dhɛ pë ˈö kwa ˈˈdhiʋ̈ʒiöwomɛn ˗nu ˗wa pö bhë, ˗yö ˗kun n ˗bha ˈwɔn ˗së ˈka.

꞊Dɛɛ, ˈman yö kë Betɛdhö ˈö Ɔstralazi ˗a ˈgü ˈˈdhoogɔ ˈgü, ˈyö ˈa ˗zlanwopö n ˗bha ˗zlanwokɔdhigümɛn ˗nu ˈˈpiʋ̈ ꞊glooyi ˗nu ˈka. Mɛn ˗nu ˈwo Ʒapɔnnɛ ˗wo waa Shinɔa ˗wo pö ˗wa nu ˗wo Betɛdhö, man ˈnën ˈa yö ˗an ˗dhɛ ˈˈdhiʋ̈. N zuʋ̈ˈˈ ꞊nii ˗da ˗sü ˈka ˗a kë ˗sü ˈgü. N ˈˈɲan ˗yö ˗go ga ˈgü ˗sü ˗gɔ ꞊dedewo. A˗ ˈwɔn ˗dɔ ꞊dhɛ Aave, ˈö ˈyaa˗ pö toŋtoŋdhö Zoova dhɛ «˗Abin!» bhë, Zoova ˗zo ˈti ˗dho bhɔ ˗a ˈka.​—Zan 5:28, 29.