Harvey be abi dii taa baala, neen a be moo gaanwan. Wan sani fu 80 yali pasa, den sama fi en be e tan a Midland Junction, aini Australiya. Na ape den kon a waaleiti. Harvey be lobi Yehofa, neen meke a dopu di a be abi 14 yali. Yonkuuyonkuu a leli taki te den gi en wan wooko aini a olikanisâsi a á mu taki nono. Wan leisi den baala be akisi en fu leisi na a Wakititolen-sutudi, ma a á be wani bika a be fende taki a nai leisi bun. Ma wan baala taigi en taki: ‘Te wan sama gi i wan wooko aini a olikanisâsi, a di a sabi taki yu o poi du en.’​—2 Kor. 3:5.

A Ingiisikondee mi be de di mi anga mma anga mi gaan sisa kon a waaleiti. Nda á be lobi Yehofa Kotoigi, ma bakaten enseefi be kon a waaleiti. Mi dopu di mi be abi 9 yali, winsi fa nda á be wani. Mi be wani pionili fosi, baka dati mi be o du a zendeling wooko. Ma nda be fende taki a te mi abi 21 yali fosi da mi be sa bigin anga a pioniliwooko. Mi á be wani wakiti so langa, neen meke di mi be abi 16 yali, mi akisi en efu mi sa go tan anga mi gaan sisa. A so a meke  mi go a Australiya, a pe mi gaan sisa be foloisi go. Di mi tapu 18 yali, neen mi bigin pionili.

A Australiya mi miti Harvey. Enseefi be wani du a zendeling wooko. U toow aini 1951. Baka di u du a pioniliwooko 2 yali, den baala akisi u fu du a kelen wooko. A pisi pe u be e du a kelen wooko be bigi. Den baala anga sisa be e tan faawe.

Aini 1954, den baala kai u fu go na a Gileyad sikoo. Disi a be du fu 25 leisi di a sikoo ya be o holi. Baka a sikoo ya u be o toon zendeling, a sani di u be wani du senten. Anga sipi u go a New York, neen u bigin anga a sikoo. Den baala be meke u leli Sipaniyootongo tu. A sani ya be taanga gi Harvey, bika a á be poi kai ‘r’ bun.

Den baala di be e gi leli na a sikoo taigi u taki den sama di be wani go yeepi a Yapan sa poti den nen fu leli Yapantongo. Wi á be wani poti u nen, bika u be e denki taki a moo bun fu a olikanisâsi fu Yehofa seefi taigi u pe u mu go. Di Albert Schroeder, wan fu den baala di be e leli u si taki wi á be poti u nen a taigi u taki: ‘U denki fu a toli moo.’ Di a baala ya si taki wi á poti u nen baka, a taigi u taki: ‘Mi anga den taa baala luku a toli, neen u poti u nen. U seeka fu leli Yapantongo.’ A be moo makiliki gi Harvey fu leli a tongo ya.

U doo Yapan aini a yali 1955. A ten de a 500 peleikiman be de aini a kondee. Harvey be abi 26 yali a ten de, mi be abi 24. Den be sende u go a wan foto den e kai Kobe. U yeepi ape fo yali, neen den baala akisi u fu du a kelen wooko koosube fu a foto di den e kai Nagoya. U be lobi a peesi ya, u be lobi den baala anga sisa, anga a nyanyan tu. Baka ten, den baala sende u go a wan taa peesi. U leli baka taki wi á mu puu nono gi Yehofa.

Di u du a kelen wooko 3 yali a Yapan, neen a beikantoo a Yapan akisi wi efu u wani go yeepi a Taiwan. Den be sende u go yeepi den baala anga sisa fu a Amis lo. Wantu baala fu a lo ya di be komoto a waaleiti be e paati lei fu a olikanisâsi, neen meke  a beikantoo a Taiwan be e suku baala di be poi taki Yapantongo bun fu go yeepi den baala anga sisa fu a lo ya fu den á gwe fika Yehofa. * Wi á be wani komoto a Yapan, bika u be lobi a wooko di u be e du ape. Ma Harvey be leli taki te Yehofa gi i wan wooko yu á mu taki nono. Neen meke u go a Taiwan.

Aini november 1962 u doo Taiwan. A 2271 peleikiman be de a Taiwan a ten de, gaanse fu den a be fu a Amis lo. Di u doo, u be abi fu leli Sineisitongo. A wan buku namo u be abi fu leli a tongo ya. A sama di be e leli wi á be e taki Ingiisitongo.

Bakaten, a Harvey be e teke fesi na a beikantoo a Taiwan. Winsi fa a be e du den kantoo wooko fi en, a be man yeepi den baala fu a Amis lo dii wiki aini wan mun bika a wooko a Betel á be ipi. A be e du a distrikt-opziener wooko tu. A be e holi lezing a den gaan komakandaa. Den baala anga sisa be e fusutan Yapantongo, ma Harvey be abi fu holi a lezing aini Sineisitongo bika lanti á be wani sama holi keliki aini taa tongo. Te Harvey be meke moiti holi a lezing aini Sineisitongo, da wan baala be e puu en aini Amistongo gi den baala anga sisa.

A ten de u be mu akisi lanti piimisi fosi u be holi gaan komakandaa. A sani ya á be makiliki. Te u be akisi, son leisi a baka omen ten fosi den be e piki u. Efu a wiki fu a gaan komanadaa be doo neen wi á be fende a pampila ete, da Harvey be e go sidon wakiti na a sikowtu osu te enke a be fende en. Den sikowtu á be lobi te taa kondee sama e luku fa den e wooko, neen meke den be e gi Harvey a pampila gawgaw fu a gwe.

Te u be e wooko anga den Amis baala anga sisa, a omen yuu langa u be e waka. U be e subi mongo, u be e abaa liba tu. Mi sabi ete a fosi mongo di u subi. Alufu sigisi mamanten di u kaba diingi te, neen u teke wagi go a wan kampu. Di u komoto aini a wagi, neen u bigin waka. Wi abaa wan liba fosi, neen u waka subi wan mongo. A á be makiliki fu subi a mongo ya.

A mamanten de, Harvey be wooko anga wantu baala aini a peleikiwooko, mi wawan be e peleiki a wan pikin kampu pe sama be e taki Yapantongo. Den wan yuu ten neen falanfalan naki mi, bika senten di u be diingi te mi á be nyan moo. Di mi anga Harvey miti, den taa baala be gwe kaba. Wantu sama be gi Harvey lala igi di a gi den buku. A soi mi taki mi mu boo olo a den tu se fu a igi, da mi diingi en. A á be switi, ma toku mi nyan wan. A mi nyan a lasiti igi tu, bika di falanfalan be o naki mi baka, Harvey á be o poi tyai mi saka a mongo.

Wan leisi u be e siibi na a osu fu wan kelen-owluman anga en uman di be e tan koosube fu a Kownukondee zaal. A uman seeka  sani gi u mooin fu u wasi, bika den Amis-sama nai meke kalapu anga wasi. Harvey be e seeka wantu sani, neen meke a taki mi fosi sa go wasi. Den be gi u wan boketi waan wataa, wan boketi koo wataa anga wan leigi gaan beenki. Mi dyombo di mi si taki a doose a poti den gi u. Efu den baala di be e wooko na a Kownukondee zaal be towe ain kon ape, den be o si fa mi e wasi. Mi akisi a sisa fu a sa gi mi wan sani fu tei tapu pe mi be o wasi, neen a tyai wan pisi pela kon gi mi. Ma i be man si doo taa se fu a pela. Mi be wani go wasi na a baka-osu, ma mi be e feele den foo di den be e kweki. Neen mi pakisei taki i sabi san: ‘Mi o pina wasi fu mi leti ya, bika den baala nai luku kon dise. Efu mi á wasi, a baala anga a sisa o fii wan fasi.’ Neen mi wasi a pe den be seeka gi mi.

Harvey be kon si taki a be e taanga gi den Amis baala anga sisa fu go a fesi bika omen fu den á be sabi leisi. Wi á be abi buku aini a tongo fu den tu. Sama be bigin meke buku aini Amistongo, neen meke u si enke a be o bun fu leli den baala anga sisa leisi a tongo fu den. A sani ya á be makiliki, ma bakaten den baala anga sisa be poi sutudeli anga denseefi. Aini 1966 den baala bigin meke buku aini Amistongo. U bigin meke A Wakititolen aini 1968 tu.

Ma lanti á be wani u paati buku aini a tongo ya. A soso buku di be de aini Sineisitongo sama be sa paati aini a kondee. Neen meke u suku taa fasi fu den baala anga sisa ya sa fende A Wakititolen. Wan pisiten u be e poti a Sineisi anga Amis Wakititolen aini wan. Te sama be akisi u saide wi e paati sani aini Amistongo, da u be e soi den taki a Sineisitongo wi e leli den Amis-sama. Fanafu a ten de, a omen buku a olikanisâsi meke aini Amistongo fu yeepi den sama ya kon sabi a Beibel moo bun.​—Toli 10:34, 35.

Na a pisiten fu a yali 1966, omen fu den kemeente aini Amis be e du sani di Gadu á lobi. Den á be e fusutan omen fu den leli  fu Beibel, neen meke son fu den be e diingi duungu, den be e libi wan yayo libi, taawan be e somoko sigaleti, tabaka efuso kaw wan sowtu noto di e meke sama hei. Harvey be e go luku den kemeente fu yeepi den baala ya fu fusutan fa Yehofa e si den sowtu toli ya. A wan fu den kemeente ya u be e go luku di u be mu abaa a liba di u be taki fi en na a bigin.

Den sama di be abi sakafasi be e meke moiti fu kengi, ma a omen fu den á be wani kengi. A 2450 peleikiman be de aini a kondee a pisiten di u tyai a taki ya go a den. Ma aini wan sani fu 20 yali, a 900 namo be fika. A sani ya be meke u booko-saka. Ma u be sabi tu taki Yehofa á be o belesi wan olikanisâsi di be e du sani di a á lobi (2 Kor. 7:1). Baka wan pisiten, den kemeente be bigin du sani baka enke fa Yehofa wani. Neen meke Yehofa belesi den. Nownow a moo enke 11.000 peleikiman de aini Taiwan.

Baka 1980 u be si taki den kemeente di be e taki Amistongo be e go a fesi, neen meke Harvey be abi moo ten fu yeepi den sama di be e taki Sineisitongo. A be poolo te di a yeepi den man fu wantu sisa fu toon Kotoigi. Mi sabi fa a be e piisii di wan fu den man ya begi Yehofa fu a fosi leisi. Miseefi e piisii taki mi be poi yeepi omen sama fu kon dini Yehofa. Bakaten mi be e wooko makandaa a Betel anga wan boi anga wan meisyo fu wan sama di mi be yeepi fu kon a waaleiti.

Baka di u toow 59 yali, neen Harvey kon lasi libi na a 1 yanuari 2010. A kanker kii en. A wan sani fu sigisitenti yali langa a du a fuuten diniwooko. Te enke now a dede fi en e du mi ogii ete. Ma mi e piisii taki mi be sa wooko makandaa anga en aini tu kondee di wi á be gwenti. U leli taki tu nyun tongo. Harvey leli fa fu sikiifi den tongo ya tu winsi fa den á be makiliki.

Wantu yali baka di Harvey dede, den baala di e tii a wooko taigi mi taki a be o moo bun efu mi go a Australiya baka, bika mi yali be kon gwe kaba. Mi á be wani komoto a Taiwan. Ma Harvey be leli mi taki te a olikanisâsi fu Yehofa akisi i wan sani yu á mu taki nono, neen meke mi du san den baala taki. Bakaten miseefi kon si taki a be wan koni sani den baala du di den sende mi go a Australiya baka.

Nownow mi e wooko na a Australasiya beikantoo. Sataa anga sonde mi e de makandaa anga a kemeente. Te sama di e taki Yapantongo anga Sineisitongo kon luku a beikantoo, mi e taki anga den aini den mamabee tongo. Mi e angii fu a dei di Yehofa o du san a paamisi u. Mi sabi taki a o weki Harvey baka, bika a á be e puu nono gi Yehofa.​—Yoh. 5:28, 29.