Harvey ye nye tsitsia le nɔviaŋutsu eneawo dome. Woƒe ƒomea srɔ̃ nyateƒea le ƒe 1930-awo me le du si nye Midland Junction, si le Australia ƒe ɣetoɖoƒe esime ganyawo nɔ sesẽm. Harvey va lɔ̃ Yehowa, eye wòxɔ nyɔnyrɔ esime wòxɔ ƒe 14. Eva srɔ̃e be mele be yeagbe dɔdeasiwo le hamea me o. Esime wònye ŋutsuvi dzaa, egbe zi ɖeka aɖe kpɔ be yemaxlẽ Gbetakpɔxɔ le hamea me o, elabe esusu be yemedze o. Gake nɔviŋutsu si nɔ dzea ɖom kplii la gblɔ nɛ be: “Ne ame aɖe bia tso asiwò le Yehowa ƒe habɔbɔa me be nàwɔ dɔ aɖea, ke enya be èdze awɔe.”—2 Kor. 3:5.

England ye nye, nɔnye kple nɔvinyenyɔnu tsitsitɔ míesrɔ̃ nyateƒea le. Tɔnye melɔ̃ Ðasefowo ƒe nya o, ke hã emegbea eya hã va zu Yehowa Ðasefo. Togbɔ be tɔnye meda asi ɖe edzi o hã, mexɔ nyɔnyrɔ esi mexɔ ƒe asieke. Meɖoe be mawɔ gbesiagbe mɔɖeɖedɔa ne mava zu dutanyanyuigblɔla. Ke hã, tɔnye be ele be maxɔ ƒe 21 hafi awɔ mɔɖeɖedɔa. Nyemedi be malala ʋuu alea hafi o. Eya ta esi mexɔ ƒe 16 la, tɔnye lɔ̃ be mayi avae nɔ nɔvinyenyɔnu tsitsitɔ si ʋu vae tsi Australia la gbɔ. Eya ta medze mɔɖeɖedɔa gɔme esime mexɔ ƒe 18.

Medo go Harvey le Australia. Mí ame evea míedi be míava nye dutanyanyuigblɔlawo. Míeɖe  srɔ̃ le ƒe 1951 me. Esi míewɔ mɔɖeɖedɔa ƒe eve megbea, wobia tso mía si be míava wɔ nutome sue dzikpɔla dɔa. Teƒe si míawɔ dɔa lee nye Australia ƒe ɣetoɖoƒe ƒe akpa gãtɔ, eya ta ahiã be míaku ʋu to dzogbewo dzi kple teƒe siwo sa ɖe aga.

Le ƒe 1954 mea, wokpe mí be míade Gilead Suku ƒe klas 25 lia. Míekpɔe be nu si míenɔ mɔ kpɔm na be míava zu dutanyanyuigblɔlawo la ava eme na mí. Míeɖo meli yi New York eye míedze Biblia sɔsrɔ̃ gɔme ŋkubiãtɔe. Sukunusɔsrɔ̃a ƒe akpa aɖe bia be míasrɔ̃ Spaingbe, eye eya nye kuxi gã aɖe na Harvey elabe eƒe aɖe metea ŋu trɔna ɖe woƒe ŋɔŋlɔdzesi si nye “r” yɔyɔ ŋu o.

Le sukua, nufialawo gblɔ be ame siwo adi be woaɖo yewo ɖe Japan la nava ŋlɔ ŋkɔ asrɔ̃ Japangbe. Míegblɔ na mía ɖokuiwo be míayi afi sia afi si Yehowa ƒe habɔbɔa aɖo mí ɖo. Medidi o, Albert Schroeder, si nye nufialawo dometɔ ɖekaa, kpɔe be míeva ŋlɔ miaƒe ŋkɔwo na gbea sɔsrɔ̃ o. Egblɔ na mí be: “Migabu eŋu ake.” Esi míenɔ hehem ɖe megbea, Nɔviŋutsu Schroeder va gblɔ na mí be: “Nye kple nufiala mamlɛawo míeŋlɔ míaƒe ŋkɔwo. Mikpɔe ɖa be yewoate ŋu asrɔ̃ Japangbea hã.” Japangbea sɔsrɔ̃ nɔ bɔbɔe na Harvey wu.

Míeva ɖo Japan le ƒe 1955 me, eye gbeƒãɖela 500 koe nɔ dukɔ bliboa me. Harvey xɔ ƒe 26, eye mexɔ ƒe 24 ɣemaɣi. Woɖo mí ɖe Kobe dugãa si nye melidzeƒe la me, eye míesubɔ le afi ma ƒe ene. Emegbe wogakpe mí be míava wɔ dzikpɔla mɔzɔla ƒe dɔa le Nagoya dugã me. Míekpɔ dzidzɔ le dɔa me—míelɔ̃ nɔviawo, nuɖuɖua kple ale si nutoa me nya kpɔe. Gake eteƒe medidi o, mɔnukpɔkpɔ gasu mía si be míawɔ dɔ bubu si Yehowa bia tso mía si.

Esi míewɔ dzikpɔla mɔzɔla dɔa ƒe geɖe megbea, Japan alɔdzedɔwɔƒea bia tso mía si be míadi be míavae subɔ le Amisgbea dolawo dome le Taiwan dukɔa me hã. Xɔsegbegbe ƒe nyawo va do mo ɖa le Taiwan, eya ta wohiã nɔvi aɖe si ate ŋu ado Japangbea nyuie akpe  ɖe wo ŋu. * Dɔwɔwɔ le Japan vivia mía nu ŋutɔ, eya ta esesẽ na mí be míatso nya me. Ke hã, Harvey srɔ̃ ale si wòawɔ dɔ ɖe sia ɖe si wode esi, eya ta míelɔ̃ be míayi.

Míeyi Taiwan le November ƒe 1962 me. Gbeƒãɖela 2,271 ye nɔ dukɔa me, eye wo dometɔ akpa gãtɔ nye Amisgbe dolawo. Gake gbã, ele be míasrɔ̃ Chinagbe. Agbalẽ si míatsɔ asrɔ̃ gbea ƒe ɖeka koe nɔ mía si eye míaƒe nufiala hã mese Eŋlisigbe o, gake míesrɔ̃e.

Esi míeɖo Taiwan eteƒe medidi o la, woɖo Harvey be wòanye alɔdzedɔwɔƒea dzi kpɔla. Alɔdzedɔwɔƒea melolo o, eya ta Harvey tea ŋu wua eƒe dɔwo nu eye wògawɔa dɔ kple nɔvi siwo doa Amisgbea kwasiɖa etɔ̃ le ɣletia me. Ewɔa nutome gã dzikpɔla dɔa ɣeaɖewoɣi, eye wòƒoa nuƒowo le takpekpewo me. Ne eƒo nuƒoa le Japangbe mea, nɔvi siwo doa Amisgbea ate ŋu ase egɔme hafi. Gake dziɖuɖua de se be Chinagbe me koe woawɔ subɔsubɔwɔnawo le. Eya ta togbɔ be Harvey mese Chinagbea o hã la, egiglii kɔ ɖi eye nɔvi aɖe nɔ eme ɖem ɖe Amisgbe me.

Ɣemaɣia, asrafowoe kpɔ ŋusẽ ɖe dukɔa dzi le Taiwan, eya ta ehiã be nɔviawo naxɔ mɔɖeɖe tso wo gbɔ hafi awɔ takpekpewo. Esia menɔa bɔbɔe o, eye polis-awo metsona ɖe mɔɖegbalẽwo nana ŋu kaba o. Ne kwasiɖa si me míawɔ takpekpea ɖo evɔ womeɖe mɔ oa, Harvey va nɔa anyi ɖe wo gbɔ va se ɖe esime woɖe mɔ na mí. Esi polis-awo medi be ŋu nakpe yewo o taa, wonaa mɔɖegbalẽa mí kaba.

Le kwasiɖa siwo me míele nɔviawo gbɔa, míezɔa gaƒoƒo geɖe le gbeadzi kpli wo, míelia towo eye míetsoa tɔwo kple afɔ. Meɖo ŋku zi gbãtɔ si melia to dzi. Esi míeɖu ŋdinu vɔa, ehiã be míatso ʋu aɖo ŋdi ga atɔ̃ kple afã ayi kɔƒe didi aɖe me, atso tɔ gã aɖe kple afɔ, eye míalia to. Toa dzɔ ale gbegbe be nɔvi si nɔ eliam le ŋgɔnyea ƒe afɔwo va nɔ nye ŋgonu lɔƒo.

Ŋdi maa, Harvey wɔ dɔ kple nutoa me nɔviwo le gbeadzi, eye nye ɖeka meɖi ɖase na Japangbe dolawo le kɔƒe sue aɖe me. Kaka wòaƒo ŋdɔ ga ɖekaa, nye lãme nɔ ƒoƒom kpakpakpa, elabe nyemeɖu naneke o gaƒoƒo geɖee nye ema. Esi meva do go Harvey la, nɔviawo dzo. Harvey xɔ koklozi mumu etɔ̃ ɖe magazine aɖewo ta. Eya ta Harvey fiam ale si maŋɔ azia ano. Togbɔ be mevivi nunye o hãa, medze agbagba no ɖeka. Gake ame kae ano etɔ̃lia? Esi Harvey mate ŋu akɔm aɖi tso toa dzi ne meku ƒenyi o ta, nyee noe.

Meto nane me le takpekpe aɖe wɔɣi gbe ɖeka. Míedze nɔvi aɖe gbɔ eye aƒea medidi tso Fiaɖuƒe Akpataa gbɔ o. Esi Amis-awo bua tsilele nu vevii taa, nutome sue dzikpɔlaa srɔ̃ di tsi aɖe na mí be míale. Harvey xaxa vie, eya ta ebe mava lee gbã. Mekpɔ nugo etɔ̃ le teƒea, tsi dzodzo le ɖeka me, tsi fafa le evelia me eye  gagbã kpe ɖe eŋu. Ewɔ nuku nam be teƒe si dze ŋgɔ Fiaɖuƒe Akpataa afi si nɔviawo nɔ dzadzram ɖo na takpekpea lee wòda nuawo ɖo be míale tsia le. Mebiae be wòadi avɔ aɖe nam matsɔ axe teƒea. Etsɔ aŋe falɛfalɛ si me woate ŋu akpɔ nu toe vɛ nam! Mebu eŋu be mayi xɔa godo, gake kpakpa ƒomevi aɖewo siwo wɔa adã siwo ate ŋu atɔ dɔm la le afi ma. Gake megblɔ na ɖokuinye be: ‘Nɔviawo ƒe ŋku biã ɖe dɔ ŋu, womakpɔe be mele tsi lem o. Eye ne nyemele tsia oa, aɖia nɔviawo nu. Ehiã be malee!’ Ta melee.

Harvey de dzesii be esesẽ na Amis nɔviawo be woatsi le xɔse me, elabe wo dometɔ geɖe menya agbalẽ o eye míaƒe agbalẽ aɖeke hã mele gbe ma me o. Esi wova nɔ Roma ŋɔŋlɔdzesiwo zãm tsɔ nɔ Amisgbea ŋlɔm taa, edze abe anya wɔ be woafia nɔviawo be woate ŋu axlẽe ene. Menye dɔ vie esia bia o, gake vivivia, nɔviawo tea ŋu va srɔ̃a nu le wo ɖokuiwo si. Wova te agbalẽwo tata ɖe Amisgbe me le ƒe 1960-awo me, eye le ƒe 1968 mea, wodze Gbetakpɔxɔ tata gɔme.

Ke hã, dziɖuɖua meɖe mɔ be woama agbalẽ siwo mele Chinagbe me o le dukɔa me o. Be míagakpɔ nya le dziɖuɖua gbɔ oa, wota Amisgbe me Gbetakpɔxɔa le mɔ vovovowo nu. Le kpɔɖeŋu me, ɣeaɖewoɣia, míezãa gbe vovovo eve, Chinagbe si nye Mandarin kple Amisgbe le Gbetakpɔxɔ ɖeka me. Ne ame aɖe be yeake ŋku ɖe nu mea, awɔ nɛ be míele magazinea zãm tsɔ le Chinagbea fiam amewo. Tso ɣemaɣia, Yehowa ƒe habɔbɔa ta agbalẽ geɖe ɖe Amisgbe me tsɔ le kpekpem ɖe amewo ŋu be woasrɔ̃ Biblia me nyateƒea.—Dɔw. 10:34, 35.

Le ƒe 1960 kple ƒe 1970-awo mea, Amis nɔviawo menɔa agbe ɖe Mawu ƒe nudidiwo nu o. Esi womese Biblia me mɔfiamewo gɔme bliboe o taa, wonɔa gbɔdɔdɔ ƒe agbe gbegblẽ, womua aha eye wonoa atama. Harvey vae srã hame geɖewo kpɔ eye wòdze agbagba be yeakpe ɖe nɔviawo ŋu woakpɔ Yehowa ƒe susu  le nu mawo ŋu. Esi míeyina sasrãkpɔ mawo dometɔ aɖe ye míeto nɔnɔme si ŋu meƒo nu tsoe le gɔmedzedzea me la me.

Nɔvi siwo bɔbɔ wo ɖokuiwo lɔ̃ faa wɔ tɔtrɔwo. Gake nublanuitɔea, nɔvi gbogbo aɖewo gbe, eye gbeƒãɖela siwo le Taiwan la ƒe xexlẽme ɖiɖi tso 2,450 va ɖo 900 le ƒe 20 me. Esia ɖe fu na mí ŋutɔ. Gake míenya be Yehowa mayra habɔbɔ si ŋu mekɔ o. (2 Kor. 7:1) Vivivia, nɔviawo va ɖe asi le nɔnɔme gbegblẽ mawo ŋu eye le Yehowa ƒe kpekpeɖeŋu mea, gbeƒãɖela siwo wu 11,000 ye le Taiwan fifia.

Le ƒe 1980-awo mea, Amis nɔviawo va tsi le xɔse me, eya ta Harvey ate ŋu azã ɣeyiɣi geɖe wu ɖe Chinagbe dolawo ŋu azɔ. Ekpe ɖe nɔvinyɔnu geɖewo srɔ̃wo ŋu wova zu Yehowa Ðasefowo. Meɖo ŋku edzi be egblɔ be dzi dzɔ ye ŋutɔ esi nusrɔ̃vi siawo dometɔ ɖeka do gbe ɖa na Yehowa zi gbãtɔ. Dzi dzɔ nye hã be mekpe ɖe ame geɖe ŋu wova te ɖe Yehowa ŋu. Mekpɔ dzidzɔ ŋutɔ be nye kple nye Biblia nusrɔ̃vi aɖe ƒe viwo, siwo va zu Ðasefowoa, míewɔ dɔ ɖekae le Taiwan alɔdzedɔwɔƒea.

Fifia, nye ɖeka koe li. Le míaƒe srɔ̃ɖeɖe ƒe 59 kloe megbea, kansa wu Harvey le January 1, 2010 dzi. Ezã ƒe blaade kloe tsɔ wɔ ɣeyiɣiawo katã ƒe subɔsubɔdɔa! Mègasusu nɛ ŋutɔ. Gake edzɔ dzi nam be nye kplii míewɔ dɔ le dukɔ mawo siwo me míese vivi le la me! Míesrɔ̃ Asiagbe sesẽ eve mawo, eye le Harvey gomea, esrɔ̃ wo ŋɔŋlɔ hã.

Ƒe ʋɛ aɖewo megbea, Dɔdzikpɔhaa gblɔ be esi metsi taa, anyo be matrɔ agbɔ va Australia. Megblɔ gbã be, ‘Nyemedi be madzo le Taiwan o.’ Gake mesrɔ̃e tso Harvey gbɔ be magagbe dɔ aɖeke si tso Yehowa ƒe habɔbɔa gbɔ o, ta melɔ̃. Emegbea, mekpɔe be enyo be metrɔ gbɔ.

Fifia, mekpea asi ɖe dɔ ŋu le Australia alɔdzedɔwɔƒea le kwasiɖaa me, eye le kwasiɖa nuwuwua mewɔa ɖeka kple hamea ɖea gbeƒã. Mezãa nye Japan kple China gbe siwo mesrɔ̃ tsɔ kplɔa amewo ɖia tsae le Betel. Mele mɔ kpɔm vevie na ɣeyiɣi si me Yehowa afɔ Harvey, ame si megbena be yeawɔ dɔ si wode esi le Yehowa ƒe habɔbɔa me o la, ɖe tsitre.—Yoh. 5:28, 29.