Harvey char bhavam modem sogleam-von vhoddlo aslo. Tachi famil Midland Junction, Poschim Australia-nt jietali, ani 80 vorsam poilim desant khub goribi asli tea vellar tim sotant ailim. Jehova pasot Harvey-cho mog vaddot gelo ani 14 vorsachea piraier tannem bautizm ghetlo. Sobhent koslem-i kam melltta tednam naka mhunnche nhoi mhunn to xiklo. Punn ekuch pavtti taka mittingent Pahrogopur vachunk sanglo tednam apunn purto na mhunn taka dislem. Tornnattea Harvey lagim uloitalo tea bhavan taka oxem somzailem, “Jehovachea songottnnent ek bhav tuka kitem korunk sangta, hacho orth tem kam korunk tum purto asa mhunn to chinta!”—2 Kor. 3:5.

Mhojea avoik, vhoddlea bhoinnik ani mhaka England-ant sot mell’llem. Mhozo bapui poilim amcho virodh kortalo, punn zaitea vorsam uprant to-ui sot xiklo. Mhojea bapaichea khuxe add vochon fokot nnov vorsachem astana hanvem bautizm ghetlo. Hanvem pioneer zaun uprant mixinori zauncho dhei dovorlolo. Punn mhozo bapui mhaka 21 vorsam zaisor pioneer zaunk mellchena mhunn sangonk laglo. Tori astana mhaka tachea poili pioneer zaunk zai aslem. Tednam meren mhoji vhoddli bhoinn Australia-nt ravonk gel’li. Tor hanv 16  vorsachem zalem tednam mhojea bapain mhaka tichea sangata ravonk porvangi dili. Xevottak, 18 vorsanchea piraier hanvem pioneer seva suru keli.

Australia-nt mhaka Harvey mell’llo. Amkam dogaim-kui mixinori zaun Jehovachi seva korunk zai asli. 1951-ant ami kazar zalim. Don vorsam sangata pioneer seva kelea uprant amkam sorkittachi dekhrekh korunk dhaddlim. Ami bhett diunk asleo teo sobha Australia-chea Poschim vattarant eka-meka thaun khub pois asleo. Taka lagon, amkam chodd paus poddona toslea ani kheddea ganvantlean khub pois gaddi choloun voichem poddttalem.

1954-ant amkam Gilead-achea 25-avea korsak apounnem mell’llem. Ami New York-ak boat-in gelim. Mixinori mhunn seva korchem amchem sopon beginuch purnn zaunchem aslem. Ami Gilead-achea korsant Bible-acho kholaiecho obheas korunk laglim. Tea bhair, amkam tea korsant Spanish bhas pasun xikchi poddli. Punn Harvey-k hem kotthin zalem, karonn taka Spanish bhaxent r jea toren mhunnttat tea toren uch’charunk taka kotthin zalem.

Korsachea vellar, Japan-ant seva korunk sodhtat tannim Japanese-bhaxa xikonk nanvam diunk zata mhunn amchea xikoupeamnim amkam sanglem. Punn ami diunk na, karonn Jehovachea songottnnen amchea pasot nirnnoi kel’lo amkam zai aslo. Hea vixim amchea Gilead xikoupeak, Albert Schroeder-ak, koll’llem tednam tannem amkam mhunnttlem: “Hea vixim anik ek pavtti chintun polloiat.” Ami fatti-fuddem sortat tem polloun, Bhav Schroeder-an mhunnttlem: “Hanvem ani bakichea xikoupeamnim tumchim nanvam dileant. Tor atam Japanese bhas xikonk tumi proitn korat.” Harvey-k Spanish-a poros Japanese utram mhunnonk sompim zalim.

1955-ant ami Japan-ant ailim tednam tea desant fokot 500 porgottnnaram aslim. Harvey 26 vorsancho, ani hanv 24 vorsanchem aslem. Doria deger aslolea Kobe xarant amkam seva korunk dhaddlim. Thoim ami char vorsam seva keli. Uprant, portun amkam sorkittachi dekhrekh korpeachem kam korunk dhaddlem. Ani ami Nagoya xarachea lagim seva keli. Hea sevent amkam soglem avoddlem—thoinchim bhav-bhoinnam, thoinchem jevonn ani thoinchi sobitkai. Punn thoddeach tempa uprant, Jehovan dil’lem kam manun gheun amkam anik ek sondhi mell’lli.

Tin vorsam sorkittachem kam kelea uprant, Japan-antlea xakhen amkam Taiwan-ant aslolea  Amis kullachea lokank porgottnni korunk dhaddlim. Thoim thodde bhav dhormbroxtt zal’le. Tor, thoinchi poristhiti sudharunk Japanese bhaxa bore toren ulounk xokta toslea bhavachi goroz asli dekhun xakha ofisan amkam thoim dhaddlim. * Japan-ant ami kortali ti seva amkam khub avoddttali ani ho nirnnoi gheunk amkam khub kotthin zalem. Punn Harvey Deva thaun melltta tea kamak na mhunnchem nhoi mhunn xiklolo. Tor ami hem kam manun ghetlem.

Ami Novembr 1962-ant Taiwan-an ailim tednam thoim 2,271 porgottnnaram aslim. Punn tantuntlim choddxim porgottnnaram Amis kullantlim aslim. Tor sogleant poilim amkam Chinese bhas xikchi goroz asli. Chinese xikonk amchea lagim fokot ek pustok aslem ani ek xikoupi asli, punn tika Inglez bhas ienasli. Tori astana, ami Chinese xiklim.

Taiwan-an pavlea uprant, rokddench Harvey-k tea desantlea porgottnnechea kamachi dekhrekh korunk nemlo. Xakhecho vattar lhan aslolean, Harvey aplea zobabdaream sangata mhoineak tin sumanam Amis bhav-bhoinnam sangata seva korunk xoktalo. Tea bhair, to bhonvddi korpachem kam pasun kortalo ani zomatimnim bhaxonnam pasun ditalo. Harvey Japanese bhaxent bhaxonn diunk xoktalo ani Amis bhav-bhoinnam tem somzonk xoktalim. Punn thoinchea sorkaran Chinese bhas soddun dusrea khoinchea-i bhaxen dhormik mittingo korunk porvangi diunk nasloli. Harvey-k Chinese bhas itli bori ulounk kollona zalear pasun taka teach bhaxent aplim bhaxonnam diunchim poddlim. Ani ek bhav, tim bhaxonnam Amis bhaxent bhaxantor kortalo.

Taiwan des military-chea hukuma khala aslolean zomati korunk bhavank sorkara koddlean porvangi gheunchi poddttali. Punn ti mellonk sompi nasli ani taka zaito vell lagtalo. Zomatichea sumanam meren porvangi mellonasli zalear ti mello poriant Harvey pulis station-antuch bosun ravtalo. Ek pordexi, pulis station-ant ieun bosla tem polloun lojen pulis rokddech porvangi ditale.

Ami bhavank bhett ditalim tednam, ek vor vo tachea poros chodd vell dongra voilean ani nhoim-tlean cholon voitalim. Hanv poilea pavtt dongrar choddlem tem mhaka ugddas asa. Sokallim 5:30-ank chaie uprant, ami eka poixil’lea ganvant vochonk ek bus dhorli. Uprant, ami ek vhodd nhoim cholon par keli, ani ek unch dongor choddlim. Tea dongrachi choddtti itli asli ki mhojea fuddem choltalo tea bhavache paim hanv mhojea dolleam fuddem pollounk xoktalem.

Tea disa sokallim, Harvey-n thoinchea bhav-bhoinnam sangata porgottnnent kam kelem. Ani hanvem ekleanuch eka lhan ganvant Japanese bhas uloitale tea lokank porgott kelem. Donparam sumar ek vorancher, mhaka gunvoll ieunk lagli. Karonn zaitim voram poriant hanvem kainch khaunk naslem. Tor porgottnni zalea uprant, hanv Harvey-k mell’llem tednam tachea sangata her bhav nasle. Harvey-n prokaxonam dilim tea lokamnim taka tin kombddechim tantiam dilim. Tantiank eke vatten burak korun koxem khaunk zata tem Harvey-n mhaka dakhoilem. Mhaka tem khaum-xem disonk na. Tori astana, hanvem ek khalem. Harvey-n ek khalem ani tisrem tantim tannem mhaka dilem. Karonn bhukek lagon dongrar thaun denvun ietana hanv  gunvoll ieun poddlem zalear mhaka uklunk tachean zaunchem na mhunn Harvey zannam aslo.

Eka sorkitt zomatichea vellar, ami eka bhavachea ghora ravtalim, jem Raj-ghorachea kuxik aslem. Amis lok nhanvunk khub mhotv ditale dekhun, sorkitt dekhrekh korpeachea bailen amkam nhanvunk goroz ti sogli toiari keli. Tinnem mhaka tin baldeo dileo: eka baldent thondd udok, ekant gorom, ani ek khali baldi. Harvey-k tednam vell naslo dekhun tannem poilim mhaka nhanvunk sanglem. Ojapachem mhunnttlear, sorkittachea dekhrekh korpeachea bailen teo baldeo oslea zagear dovorloleo zo zago Raj-ghora thaun dixtti poddonk xoktalo. Ani Raj-ghorant bhav zomatichi toiari kortale. Tor thoim nhanvunk ek podd’ddo asa kai mhunn hanvem vicharlem tednam, ti bhoinn ar-par dista tosli ek plastic gheun aili! Hanv ghorachea fattlean vochon nhanvunk sodhtalem. Punn thoim thoddim bokim mhaka chonch martolim mhunn bhieun hanv thoim vochonk na. Tor hanvem chintlem: ‘Bhavank zaitem kam asa. Tor tanchem dhean hanv nhata thoim poddchem na. Punn hanv nhanvona zalear, bhav-bhoinnank borem dischem na. Tor hanv toxench nhatam mhunn chintun, hanv toxench nhanvlem!’

Amis bhas uloitat te bhav choddxe onpodd asle ani tea bhaxent prokaxonam naslim. Taka lagon, te aplo bhavarth ghott korunk xokonasle mhunn Harvey-k kollon ailem. Inglez letram uzar korun Amis bhas borounk suru kelim mhunn polloun, bhavank tanchea bhaxent prokaxonam bhaxantor korop borem zatolem mhunn dislem. Hantunt zaitem kam mellon aslem. Tori astana, hollu-hollu bhav aplea bhaxent Jehova vixim xikonk pavle. Sumar 1966-ant, Amis bhaxent prokaxonam chhapunk suru zalim, ani 1968-ant, Pahrogopur masik chhapunk suru zalem.

Punn, Chinese soddun dusrea khoinche-i bhaxent prokaxonam chhapunk sorkaran porvangi diunk na. Taka lagon, Pahrogopur masik Amis-ant veg-vegllea toren bhavank pavonk proitn kelo. Udharonnak, thoddea tempa poriant, Pahrogopur masik don bhasamnim, mhunnche, Mandarin ani Amis bhaxent sangata chhapunk lagle. Tor, konnem-i hea vixim prosn ubarlo zalear, amchim masikam polloun tantuntlean ami lokank Chinese xikoitalim oxem distalem. Amis bhas uloitat tea lokank Bible-antlim sotam xikounk tednam thaun aiz meren Jehovachem songotton zaitim prokaxonam Amis bhaxent toiar korit asa.—Itihas 10:34, 35.

1960 uprant, sumar 20 vorsam, choddxe Amis bhas uloitat te bhav Devachea dorjeam pormonnem jienasle. Karonn tankam Bible-antlim totvam sarkim somzonaslim. Te onoitik jivit jietale, bebdikai kortale, vo tankam tombaku ani supari khaunchi sonvoim asli. Jehovachea dorjeam vixim bhavank somjikai diunk Harvey-n zaitea sobhank bhett dili. Osli ek bhett kortana, ghoddloli ek ghoddnni hanvem hea onnbhovachea survatek sanglea.

Khalte bhav bodlunk toiar asle, punn dukhachem mhunnttlear, zaitim bodlunk toiar naslim. Ani 20 vorsam bhitor, Taiwan-ant aslolea porgottnnarancho ankddo denvlo. To ankddo 2,450 thaun sumar 900 zalo tem polloun ami nirax zalim. Punn bhav-bhoinnam noitik toren nitoll aslolim Jehovak zai mhunn ami zannam aslim. (2 Kor. 7:1) Thoddea tempa uprant, Jehovachea modotin tim Jehovachi seva sarke toren korunk pavlim, ani Taiwan-ant aiz 11,000-a poros chodd porgottnnaram asat.

1980 uprant, Amis bhas uloupi bhav-bhoinnancho bhavarth ghott zata tem amkam dison ailem. Tor Harvey-k Chinese bhas uloitat tea bhavancher dhean diunk chodd vell mell’llo. Tannem zaitea bhoinnanchea ghovank Jehovache Sakxi zaunk modot keli. Tantuntlea eklean poilea pavtti Jehovak magnnem kelem tednam Harvey-k kitli khuxalkai bhogli, tea vixim tannem mhaka sanglolem tem ugddasak ieta. Promannik lokank, Jehova lagim soronk zaiteank modot korunk mhaka pasun sondhi mell’lli mhunn hanv khuxal. Mhojea poilinchea eka Bible videarteachea cheddea ani cheddva sangata Taiwan-antlea xakha ofisant seva korchi sondhi mell’lli mhunn pasun hanv khuxal.

Atam mhojea sangata Harvey na. Amchem kazar zaun 59 vorsam zalea uprant mhozo mogall Harvey 1 Janer, 2010-ant, cancer zaun melo. Tannem sumar 60 vorsam purnn vellachi seva keli! Mhaka tacho khub ugddas ieta. Punn don desamnim seva korunk taka tenko diunk pavlem mhunn hanv khub khuxal! Hanv Aziantleo don kotthin bhas ulounk xiklem ani Harvey teo ulounk ani borounkui xiklo.

Thoddea vorsam uprant, mhojea piraiek lagon Sonchalon Monddollan mhaka Australia-nt porot vochun seva korunk sanglem. Survatek mhaka Taiwan soddun vochonk naka oxem dislem, punn Jehovachem songotton amkam sangta tem kam na mhunnchem nhoi, mhunn hanv Harvey thaun xiklem. Tor hanvem tannim sanglem toxem kelem. Ani hem mhaka boreak poddlem mhunn atam mhaka kollon ieta.

Aiz hanv Australasia xakhechea ofisant suman-bhor kam kortam. Ani Sonvara-Aitara laginchea eka sobhentlea bhav-bhoinnam sangata porgottnni kortam. Mhaka Japanese ani Chinese bhas kolltta dekhun, hea bhasamnim hanv Bethel-ant ttur diunk xoktam. Jehovan bhasailolea punorjivontponnachi hanv vatt polloitam. Jehovan sanglam tea kamak na mhunnche nhoi, hi sonvoim aslolo Harvey, Jehovachea ugddasant asa mhunn hanv zannam.—Juanv 5:28, 29.