Harvey ye bäri umbre mräkätre nimä mada ye kräke. Mräkätre kwe ie kukwe metre namani gare nünanbare bobre krubäte kä 1930 ye ngwane, juta kädeka nämäne Midland Junction, Australia nindrikri yekänti. Harvey nämäne Jehová tarere, yebätä ja ngökani ñöte kwe kä nämäne 14 biti ye ngwane. Ye bätäräbe, ja kitani kwe ñaka ñakare niekäre sribi Ngöbökwe ie. Bati, nämäne bati ye ngwane ñäkädre kwe täräkwata Ni Mikaka Mokre yebätä ribebare ie, akwa ñaka kani ngäbiti kwe ñobätä ñan aune ñan nuaindi kwin kwe nämäne ruin ie yebätä. Akwa, ja mräkä käkwe blitabare Harvey ben yekwe niebare ie: “Juta Jehovakwe te, mäkwe kukwe keteiti nuaindre ye ni itikwe ribedre mäi ngwane, mä raba nuainne kwin ye ruin ie yebätä tä nuainmana mäi” (2 Cor. 3:5).

Kukwe metre rababa gare tie Inglaterra, ti meye aune ti eteba umbre ye ie rababa gare arato. Ti rünkwe kukwe metre ye ka ngäbitiba ja känenkäre, akwa kenanbe ñan rababa debe kräke. Tikwe ja ngökaba ñöte kä nämä kwä ökän tibiti ngwane, ti rün ñan törbaba yebiti ta. Tikwe sribi prekursor mikaba ja käne, rabakäre misionera ja känenkäre. Akwa ti rün ñaka ti tuainmetre ja mike prekursora nememe kä rabadre  21 tibiti ye ngwane. Kä rikadre raire ta ye ti ñan törbaba ngübabätä. Aisete, kä rababa 16 tibiti ye ngwane, permiso ti rünkwe yebiti ti rikaba Australia nünankäre ti eteba bäri umbre ben, niara nikani nüne juta yekänti. Aune kä rababa 18 tibiti ngwane, tikwe sribi prekursor ye kömikaba.

Australia yete Harvey rababa gare tie. Nun nibu töi nämä sribi misionero ye nuainbätä. Nunkwe ja mikaba gure kä 1951 ye ngwane. Kä kubu te nunkwe sribi prekursor nuainba gwairebe, ye bitikäre nun nübaiba circuito tuinbiti. Circuito tuabiti nämä nunkwe ye kri krubäte Australia nidrinkri yekänti, aisete käre nun nämä dikekä mobe karo nunkwe te kä mente aune nötare yete ta.

Kä 1954 ye ngwane, nun nübaiba clase número 25 Galaad yebätä. ¡Sribi misionero ie nun tö nämä ye rababara chi rabakäre nunkwe! Nun rababa ru mrenbiti yete Nueva York aune ja tötika nguseta Bibliabätä kömikaba nunkwe. Clase Galaad yete, kukwe suliarebiti rababa ja kitadre nunye, akwa Harvey kräke ñan rababa nuäre ñobätä ñan aune kukwe erre ye ñan rababa betekä kwin kadate.

Nire tö rabadre rikabätä sribire Ngöbö kräke Japón rabadre ja kä bien clase japonés kräke, ye nitre nun tötikaka käkwe mikaba gare. Nunkwe ñaka ja kä bianba ñobätä ñan aune juta Ngöbökwe ye ara nun juandre sribire ye ie nun tö nämä. Nun ñaka ja kä bianba ye rababa gare ja mräkä iti nun tötikaka, kädeka nämä Albert Schroeder ie ngwane nieba kwe nunye: “Töbike chibätä munkwe”. Nun rababa töbike kukwe yebätä ye jutuaba ie ngwane, nieba kwe nunye: “Ti aune nitre mada mun tötikaka käkwe mun kä bianina. Mun raba ño kukwe japonés yebiti ye gain munkwe”. Rababa bäri nuäre Harvey kräke ja kitakäre kukwe japonés yebätä.

Kä 1955 ye ngwane nun rababa Japón. Ye ngwane ja mräkätre 500 aibe nämä juta Japón yete. Harveybiti kä nämä 26 aune tibiti kä nämä 24. Nun juanba juta känime mrenbätä Kobe yekänti aune yete nunkwe nuaba kä kobokä te. Ye bitikäre, nun nübaibata circuito tuinbiti juta Nagoya ye ken aune ye käi raba juto krubäte nunbätä. Kä nämä juto nunbätä sribibätä Japón: ja mräkätre, mrö aune kä bä nuäre krubäte juta yete. Akwa bätäräbe, nun nämä juto biare Jehová nämä dre ribere nunye ye mikakäre täte o ño ye rababa nuaindre nunye.

Kä rababara komä nunbiti circuito tuabitibätä, ye bitikäre nun nämä juto biare rikakäre kukwe driekäre  nitre amis ie Taiwán ye sukursal ngwantariba nunye. Nitre amis ye juta keteiti indígena Taiwán yete. Ja mräkätre amis ruäre ja mikani apóstata, yebätä ja mräkä iti ie blita gare kukwe japonés yebiti käkwe kukwe ye ükadrete ribe nämä sukursal Taiwán yekwe. * Nun rikadre ye ñaka rababa nuäre nun kräke ñobätä ñan aune kä nämä juto nunbätä Japón. Akwa Harvey ja kitani ñaka ñakare niekäre sribi mrä ie, yebätä nunkwe ja töi mikaba niken.

Noviembre kä 1962 ye ngwane nun rababa Taiwán, ye ngwane ja mräkätre 2,271 nämä juta yete. Bäsi jökrä ye amis. Kukwe chino yebätä rababa ja kitadre nunye, tärä keteitibe nämä nunkwe aune ni dirikä itibe merire ñan blite inglere nämä dirire nunye. Akwa yebiti ta, nunkwe ja kitaba kukwe chino yebätä.

Nun rababa Taiwán, ye bätäräbe Harvey kädekaba siervo de sukursal. Sukursal ye chi, aisete sribi nämä Harvey kötärä ye rababa nuainne aune bämän kabre te rababa kukwe driere ja mräkätre amis ben sö kratire kratire. Ruäre ngwane, nämä sribire ni distrito tuabitikä erere arato, yebätä kukwe nämä kädriere ie gätä krite siba. Kukwe ye kädriedre kwe kukwe japonés yebiti aune rükadre gare nitre amis ie, akwa gätä nuaindre kukwe chino aibebiti ye ükaninte gobrankwe kä ye ngwane. Aisete Harvey nämä kukwe kädriere kukwe chinobiti, blita ñan gare kwin ie yebiti ta aune ja mräkä iti nämä kukwe ye kwite kräke kukwe amibiti.

Kä ye ngwane gätä ñaka nuaindre ükaninte Taiwán. Yebätä gätä krikri nuainkäre ja mräkätre nämä permiso denkä. Permiso diandrekä ye ñaka nuäre aune bä kabre policía ñaka nämä bien jötrö. Bämän te gätä kri nuaindi ye nämä nüke aune policía jämi permiso bien ngwane, Harvey nämä niken policía jue yekänti aune nämä nemen täkänintibe yete permiso biandre ie yekäre. Ni menteni tädre täkänintibe policía jue yekänti ye nämä nemen gaidre policía kräke, yebätä kukwe ye nuain nämä ye nämä nemen bare kwin.

Nun nämä kukwe driere ja mräkätre ben ngwane, bäsi käre nun nämä dikekä ora krati o bäri te ngutuäbätä krökwin aune ñö krite ta. Tikwe dikakaba kena käbätä mintu ye törö tie. Nunkwe mrö kwetaba jötrö ngwarbe dekä, nunkwe bus dianba jai ora 5:30 dekä rikakäre kä mente känti. Nun rikaba ñö krite ta aune biti nun rikaba ngutuäbätä mintu mada. Ngutuä ye krökwin krubäte, aisete ja mräkä nämä näin ti känenkri ye ngoto rababa tuin tie ti okwä ngwäre ta.

Köbö yete dekä, Harvey nämä kukwe driere ja mräkätre ruäre ben kä keteiti känti aune ti nämä kukwe driere kä chi keteiti känti nitre blitaka kukwe japonés ie. Ora krati dere ti di ñan jatabara ñobätä ñan aune ora rikabara kabre ta ti jämi mröre yebätä. Mrä mada ti gätäbata Harvey ben, akwa ja mräkätre jökrä nikaninanta. Harvey ie kwi mrüke biani komä täräkwata ütiäre. Kwi mrüke niki mäkä tikadrekä chi kwärikwäri aune biti duadrete ye kwetadre ño Harvey drieba tie. Ye ñan rababa tuin ai tie dikaro, akwa tikwe kwetaba kwati. ¿Se nirekwe kwi mrüke komäkäre ye kwetadre? Ti ara käkwe kwetaba ñobätä ñan aune Harvey ñan raba niken ti  ngwena kötärä niken ngutuäbätä moto kä nötaninte tibiti mrö miare yebätä.

Bati, gätä kri circuito kräke kukwe ngüba ñaka tikwe rababa bare tibätä. Ja mräkä nämä nüne Ju Ja Ükarakrö ye ken ye juete nun rababa. Nitre amis tä nüne ño, yekänti jübadre ye ütiäte krubäte. Yebätä, ni circuito tuabitikä muko käkwe kukwe jökrä ükateba nunkwe jübadre yekäre. Sribi nämä nuaindre krubäte Harvey ie, yebätä ti juanba jüben käne kwe. Ni circuito tuabitikä muko käkwe ñö ngwä komä ükaninte: kwati ñö tibo kräke, kwati ñö ngire kräke aune siä ngäbä kwati nämä tökare. Mikaba kwe jubätä mentokwäre, ja mräkätre nämä Ju Ja Ükarakrö ükete gätä kri kräke ye ngwärekri yekwe ti töi mikaba ñan krütare. Dänkwä o jondron dänkwä kwrere ye tikwe käräba ie, ¡akwa niarakwe dänkwä nginimo kä tuin teta ye bianba tie! Ti jababa niken ju trökri mada, akwa yete ganso nämä juto biare nire rikadre yete ye kwetakäre gaba tikwe. Yebätä tikwe nütüba: “Ja mräkätre tä sribire krubäte aisete ti täi jüben ngwane ñan gadi kwetre. Ne madakäre, tikwe ñaka jübai ngwane, ye ñaka matai kwin bätätre. Aisete tibike nuainne”. Aune tikwe nuainba.

Ñan rababa nuäre ririakäre kukwe ja üairebiti ja mräkätre amis ie ñobätä ñan aune kwati ie ñäkä ñaka gare täräbätä ye rababa gare Harvey ie. Ne madakäre, täräkwata ñan nämä niaratre kukweibiti. Ye ngwane, kukwe ami ye tika jatani krire alfabeto suliare yebiti, yebätä ja mräkätre dimikadre ñäke niaratre kukweibiti ye rababa tuin kwin nunye. Sribi kri rababa nun kisete. Akwa, ja känenkäre ja mräkätre jataba ja tötike kaibe. Kä 1966 ngrabare ngwane, täräkwata nitre ami kukweibiti sribe jataba. Aune kä 1968 ye ngwane täräkwata Ni Mikaka Mokre sribeba kena.

Akwa täräkwata kukwe madabiti ñaka döräidre, ñakare aune chino kukweibiti aibe döräidre ie gobran tö nämä. Yebätä, kukwe ñan mikakäre ja kisete täräkwata Ni Mikaka Mokre kukwe amibiti ye sribe nämä bätäkä ngwarbe. Ñodre, kä ruäre te täräkwata Ni Mikaka Mokre ye tikani ja näirebe kukwe ketebubiti: chino mandarín aune ami yebiti. Aisete, nun nämä jerekäbe blita chino driere nitre ie ye erere nämä tuin nitre ie. Yete ja käne juta Jehovakwe täräkwata keta kabre sribebarera nitre ami dimikakäre ja kitakäre kukwe metre Bibliakwe yebätä (Hech.10:34, 35).

Kä 20 näre te, ja mräkätre kwati ñaka nämä kukwe biani Ngöbökwe ye mike täte. Kukwe ja jie ngwankäre Bibliabätä ye ñaka nämä nüke gare jökrä ietre, yebätä nämäntre nemen kämekäme jabe, dröba nike, nämäntre sö duin o nuez betel ye duin. Harvey konkrekasion keta kabre tuaninbiti ja mräkätre dimikakäre Jehovata kukwe ye mike tuin ño jai ye driekäre ietre. Nun nämä nitre tuinbiti, ye bati känti kukwe kädininte kena tikwe ye rababa bare nunbätä.

Ja mräkätre töi bobre ye nämä juto biare ja töi kwitakäre, akwa kwati krubäte ñaka nuainba. Kä 20 näre te, ja mräkätre nämä 2,450 näre akwa rababa 900 aibe näre Taiwán. Kukwe ye nun mikaba di nekä krubäte. Akwa, juta meden ñaka ja ngwen mrebe ye kräke Jehovakwe kukwe ñaka kwin mikai nemen bare jire ye nämä gare nunye (2 Cor. 7:1). Ja känenkäre ja ngwan nämä kämekäme ye riakaba konkrekasionte. Aune Jehovakwe kukwe kwin mikaba nemen bare ye köböire matare nengwane ja mräkätre 11,000 näre tärä Taiwán.

Kä 1980 ye bitikäre, konkrekasion blitaka kukwe amisbiti ye jataba ja ngwen kwin ja üairebiti. Aisete kä jataba nemente bäri Harvey ie nitre blitaka kukwe chinobiti dimikakäre. Ja etebatre testiko muko ñaka kukwebätä ye Harvey käkwe dimikaba nemen testiko Jehovakwe ye käi rababa juto krubätebätä. Iti käkwe oraba kena Jehovai ye käkwe kä mikaba jutobätä ye törö tie. Aune tikwe nitre kwati dimikanina nökrö Jehová ken ye käi juto krubäte tibätä. Tikwe ni iti tötikaba Bibliabätä ye ngobo aune ngängän ben tikwe sribiba gwairebe sukursal Taiwán yete ye käi rababa juto krubäte tibätä.

Nän muko tikwe ñaka niena tikwe matare. Kä 59 nikani ta nunkwe ja mikaba gure ye bitikäre, krütaba cáncer kisete 1 enero kä 2010 ye ngwane. Sribibare köbö täte kwe bäsi kä 60 te. Tita uliere krubäte. Akwa juta ketebu te sribi kömika jatani yebätä tikwe dimikaba siba ye käi juto krubäte tibätä. Blita rababa gare nunye aune kukwe tika rababa gare kukwe ketebu asiático ribibiti Harvey ie.

Harvey krütaba ye käi rikaba ruäre ta ye bitikäre, kä nuäi tibiti yebätä Nitre Braibe Konkrekasion Jökrä Ngübabitikä käkwe ti juanbata Australia ñobätä ñan aune ye bäri kwin ti kräke nämäne ruin ietre yebätä. Kenanbe tikwe töbikaba: “Ti ñan tö kämikaikä Taiwán nete”. Akwa ñaka ñakare niedre juta Jehovakwe ie ye Harvey drieba tie. Yebätä ti rikabata. Ja känenkäre, ye bäri kwin ti kräke rükaba gare tie.

Nengwane tita sribire sukursal Australasia bämän ngrabare aune bämän krüte yete tita kukwe driere konkrekasion keteiti ben. Nitre blitaka kukwe chino o japonés yebiti tä kite Betelte ye ie tita kä mike gare aune ye käi juto tibätä. Akwa nitre krütanina gaikröta ye ti tö tuai nemen bare. Aune Harvey ja kitani ñaka ñakare niekäre Jehovai tä kä kriemikani bäri kwin yekänti, Jehová töite ye gare metre tie (Juan 5:28, 29, TNM).