Hav Vim lawv muaj 4 tug kwvtij, nws yog tus hlob. Lawv tsev neeg los paub qhov tseeb xyoo 1930, lub sijhawm uas tebchaws Auxitalia muaj kev txom nyem ntau heev. Thaum ntawd lawv nyob rau ntawm lub zos Miv Lees Ntsav Xeem (Midland Junction) hauv tebchaws Auxitalia. Hav Vim hlub Yehauvas heev. Nws ua kevcai raus dej thaum nws muaj 14 xyoos. Nws kawm tau tias thaum Yehauvas muab ib txoj haujlwm rau peb ua hauv lub koom txoos peb yuav tsum tsis txhob yig. Nws hais tias thaum nws tseem hluas, ib tug kwvtij nug seb nws puas kam nyeem Phau Tsom Faj tiamsis nws tsis kam vim rau qhov nws xav hais tias nws yuav nyeem tsis tau zoo. Tiamsis tus kwvtij ntawd ua tib zoo hais rau nws tias: “Thaum ib tug hauv Yehauvas lub koom haum hais kom koj ua ib yam dabtsi, nws yeej paub hais tias koj yuav ua tau!”​—2 Kauleethaus 3:5.

Kuv los paub qhov tseeb nyob hauv tebchaws Askiv ib yam li kuv niam thiab kuv tus niam laus. Lub sijhawm ntawd kuv txiv tsis nyiam Yehauvas Cov Timkhawv li tiamsis tom qab no nws kuj los ntseeg lawm thiab. Kuv txiv yeej tsis kam kuv ua kevcai raus dej tiamsis kuv ua kevcai raus dej  thaum kuv muaj 9 xyoos. Thaum ntawd kuv xav ua ib tug tho kev tshwj xeeb thiab kuv xav ua ib tug tshaj tawm txawv tebchaws. Tiamsis kuv txiv hais tias thaum twg kuv muaj 21 xyoos nws mam li pub kuv ua ib tug tho kev. Kuv tos tsis taus ntev npaum li ntawd ces thaum kuv muaj 16 xyoo kuv thiaj taij kom nws cia kuv mus nrog kuv tus niam laus nyob tebchaws Auxitalia. Kuv pib tho kev thaum kuv muaj 18 xyoo.

Kuv ntsib Hav Vim hauv tebchaws Auxitalia. Wb ob leeg puav leej xav mus tshaj tawm txawv tebchaws. Wb sib yuav xyoo 1951. Wb tho kev tau 2 xyoos ces wb mam mus ua tus saib xyuas thaj tsam. Thaj tsam wb saib xyuas ntawd loj thiab dav heev. Wb thiaj tsav tsheb mus rau tej lub zos deb heev thiab hla tej chaw do dus tsis muaj dabtsi li.

Xyoo 1954, wb raug caw mus koom Kev Kawm Vajlugkub Kile-a pab 25. Zaum no wb yuav tau mus tshaj tawm txawv tebchaws li wb lub siab xav lawm tiag! Wb caij nkoj mus txog Nus Yauj (New York) thiab rau siab ntso kawm Vajlugkub. Tiamsis peb yuav tau kawm lus Xapee thiab. Qhov no nyuaj heev rau Hav Vim rau qhov nws dov tsis tau nws tus nplaig li cov neeg Xapee.

Thaum peb tseem tabtom kawm, cov xibhwb hais tias yog leejtwg xav mus tebchaws Nyiv Pooj kom tso npe kawm lus. Tiamsis Hav Vim wb tsis tso rau qhov wb xav cia Yehauvas lub koom haum xaiv rau wb xwb. Kwvtij Alanpaw Saudaws (Albert Schroeder) uas yog ib tug xibhwb qhia Kile-a pom tias wb tsis tau tso npe kawm lus Nyiv Pooj. Nws thiaj hais kom wb ua tib zoo xav. Thaum wb tseem ua xyem xyav, Kwvtij Alanpaw hais rau wb tias: “Peb cov xibhwb twb muab neb tso npe kawm lus Nyiv Pooj lawm. Sim seb neb kawm puas tau.” Hav Vim kawm tau lus Nyiv Pooj yoojyim dua li lus Xapee.

Wb mus txog tebchaws Nyiv Pooj xyoo 1955. Thaum ntawd tag nrho Nyiv Pooj teb tsuas muaj 500 tus tshaj tawm xwb. Lub sijhawm ntawd Hav Vim muaj 26 xyoo hos kuv muaj 24 xyoos. Lawv xa wb mus rau lub nroog Khaunpe (Kobe). Wb tshaj tawm nyob ntawd tau 4 xyoos. Ces wb ho mus ua tus saib xyuas thaj tsam hauv lub nroog Nankauya (Nagoya). Wb nyiam wb tes haujlwm heev. Wb nyiam cov kwvtij nkauj muam, tej zaub mov, thiab tej toj roob hauv pes. Tiamsis Yehauvas ho muab ib tes haujlwm tshiab rau wb ua.

Thaum wb ua tus saib xyuas thaj tsam tau 3 xyoos, ceg Npe-ee nyob Nyiv Pooj nug wb seb wb puas kam mus tshaj tawm rau cov neeg Amis nyob tebchaws Tais Vam. Lub sijhawm ntawd ib co kwvtij Amis fav xeeb rau pawg ntseeg. Ceg Npe-ee nyob Tais Vam thiaj xav tau ib tug kwvtij uas paub lus Nyiv Pooj mus pab lawv. * Wb yeej nyiam wb tes haujlwm nyob tebchaws Nyiv Pooj kawg tiamsis wb yuav tau mus rau qhov wb xav ua li Hav Vim hais thaum Yehauvas muab ib tes haujlwm rau wb ua, wb tsis txhob yig.

Wb mus txog tebchaws Tais Vam lub 11 Hlis xyoo 1962. Thaum ntawd lawv muaj 2,271 tus tshaj tawm, feem coob yog cov neeg Amis. Wb tsuas muaj ib phau ntawv qhia lus Suav thiab ib tug xibhwb uas tsis paub lus Askiv qhia wb xwb los wb kuj kawm tau lus Suav lawm thiab.

Thaum wb mus txog tsis ntev, lawv muab Hav Vim ua tus saib xyuas ceg Npe-ee nyob Tais Vam. Vim ceg Npe-ee tsis loj ces Hav Vim tseem mus pab tau cov kwvtij Amis ib hlis 3 lub limtiam thiab. Muaj tej thaud Hav Vim kuj mus ua tus saib xyuas cheeb tsam thiab muab lus qhuab qhia rau tej rooj sib txoos. Tiamsis Hav Vim yuav tsum hais ua lus Suav xwb es ib tug kwvtij mam li txhais rau cov kwvtij Amis rau qhov lub sijhawm ntawd cov nom tswv tsis pub tej kev ntseeg hais lwm yam lus.

Thaum ntawd cov tub rog kav lub tebchaws Tais Vam. Ces cov kwvtij yuav tsum tau mus thov ntawv ua ntej muaj rooj sib txoos. Tiamsis muaj ntau zaus cov tub ceev xwm ua nyuaj heev. Ces peb yuav tsum tau tos ntev loo. Yog tias twb txog lub limtiam uas peb muaj rooj sib txoos lawd es lawv tseem tsis tau muab ntawv rau peb ces Hav Vim yeej mus zaum tos mus txog thaum lawv muab. Thaum nws mus zaum zov ces lawv yeej ua sai rau nws vim cov tub ceev xwm txaj muag yog muaj ib tug neeg txawv tebchaws pheej zaum tos lawv.

Thaum peb mus xyuas cov kwvtij, peb nyiaj zaus taug kev li ib ob txoos teev tej. Peb nce roob nqis hav thiab kwm dej. Kuv nco qab thawj zaug kuv nce roob. Peb caij npav (bus) thaum 5:30 sawv ntxov mus rau ib lub zos deb heev. Peb kwm ib tug dej thiab peb nce ib lub roob ntxhab ntxhab heev. Kuv ntsia pem hauv ntej ces yeej pom tus kwvtij txhais kotaw.

Tagkis ntawd Hav Vim nrog ib co kwvtij mus tshaj tawm hos kuv mus ib leeg rau ib lub menyuam zos uas lawv hais lus Nyiv Pooj. Thaum tav su dua kuv tsis muaj zog li vim kuv tsis tau noj mov. Thaum kuv mus ntsib Hav Vim, cov kwvtij twb mus tsev tas lawm. Hav Vim muab ob peb phau ntawv pauv tau 3 lub qe qaib nyoos. Nws qhia kuv muab lub qe tho qhov ib lub saum toj ib lub hauv qab thiab ntxais cov kua qe. Thaum xub thawj kuv tsis xav ua li tiamsis kuv kuj sim ib lub. Nws muab 2 lub qe rau kuv rau qhov nws ntshai tsam kuv tsis muaj zog nqis hav es nws ev tsis taus kuv.

Thaum peb mus ib lub rooj sib txoos, kuv ua ib yam uas kuv tsis tau ua dua li. Wb mus so hauv ib tug kwvtij nyob npuab lub Tsev Nceeg Vaj. Tus saib xyuas thaj tsam tus pojniam npaj dej rau wb da tiamsis Hav Vim tsis khoom ces nws kom kuv mus ua ntej. Tus viv ncaus ntawd npaj tau ib thoob dej kub, ib thoob dej txias, thiab ib lub thoob qhuav txawb nraum zoov ntsia ntsoov lub Tsev Nceeg Vaj uas cov kwvtij tabtom npaj rau lub rooj sib txoos, tsis muaj dabtsi thaiv li. Kuv thiaj nug tus viv ncaus seb nws puas muaj ib daim ntaub tuaj rau kuv thaiv tiamsis nws nqa ib daim ntaub yas pom pom kev tuaj rau kuv xwb. Kuv thiaj xav tias cia kuv mus da dej nram qab tsib taug tiamsis ho muaj ib co os caj dab ntev cev taubhau ntawm laj kab tuaj xauj kuv thiab yuav tom kuv. Kuv thiaj xav hais tias: ‘Cov kwvtij haujlwm ntau ntau li nyaj lawv tsis pom kuv da dej thiab yog kuv tsis da ces nyab tsam nkawd ho tu siab!’ Kuv thiaj ua ib siab da dej.

Hav Vim pom hais tias cov kwvtij Amis txojkev ntseeg tsis tshua ruaj khov vim lawv tsis paub ntaub ntawv thiab tsis muaj ntaub ntawv Vajlugkub ua lawv yam lus. Thaum ntawd cov Amis twb pib muaj ntawv sau ua lawv yam lus lawm ces Hav Vim thiaj qhia kom lawv paub nyeem ntawv Amis. Tsis ntev xwb ces lawv nyeem tau lawv lawm. Xyoo 1966, pib muaj ntaub ntawv ua lus Amis thiab peb pib luam Phau Tsom Faj ua lus Amis xyoo 1968.

Txawm li ntawd los nom tswv txwv tsis pub peb tseb tej ntaub ntawv uas tsis yog lus Suav. Yog li ntawd, yuav kom peb tsis txhob ntsib teeb meem peb thiaj luam Phau Tsom Faj kom txawv mentsis. Xws li peb luam Phau Tsom Faj ua lus Amis thiab lus Suav ua ke kom ho muaj leejtwg nug los zoo li peb pab qhia lus Suav rau cov neeg no xwb. Txij thaum ntawd los, Yehauvas lub koom haum luam ntau yam ntaub ntawv ua lus Amis los pab cov kwvtij nkauj muam no kawm qhov tseeb txog phau Vajlugkub.​—Tes Haujlwm 10:34, 35.

Tau ntau xyoo cov kwvtij Amis coob tus tsis ua lawv lub neej raws li Vajtswv tej kevcai. Vim lawv tsis to taub phau Vajlugkub tej hauv paus ntsiab lus zoo ib txhia thiaj tseem ua nkauj ua nraug ua  plees ua yi, quav dej quav cawv, haus luam yeeb, thiab ntsuas peeb lab. Hav Vim mus xyuas ntau ntau lub koom txoos thiab pab cov kwvtij kom lawv to taub tias Yehauvas xav li cas txog tej uas lawv ua. Muaj ib zaug wb mus pab cov kwvtij wb thiaj ntsib li kuv qhia nej thaum xub thawj.

Thaum ub, hauv tebchaws Tais Vam, muaj li 2,450 tus tshaj tawm tiamsis li 20 xyoo tom qab no tsuas muaj li 900 tus lawm xwb vim ib co kwvtij tsis txo hwjchim thiab tsis kam hloov lawv lub neej. Yeej ua rau peb qaug zog kawg, tiamsis peb paub hais tias Yehauvas yuav tsis foom koob hmoov rau lub koom haum uas tsis dawb huv. (2 Kauleethaus 7:1) Tom qab no hauv tebchaws Tais Vam muaj tshaj li 11,000 tus tshaj tawm lawm vim rau qhov lawv ua li Yehauvas lub siab nyiam thiab Yehauvas foom koob hmoov rau lawv.

Txij xyoo 1980 los wb pom hais tias cov kwvtij nkauj muam Amis txojkev ntseeg ruaj khov heev lawm. Hav Vim thiaj muaj sijhawm ntau mus pab cov kwvtij Suav. Hav Vim zoo siab heev uas nws pab tau ib co viv ncaus hauv lub koom txoos cov txiv los ntseeg. Kuv nco qab muaj ib zaug Hav Vim zoo siab heev thaum nws pom ib tug viv ncaus tus txiv thov Vajtswv thawj zaug. Kuv los kuj zoo siab heev uas kuv pab tau coob tus los teev tiam Yehauvas thiab. Kuv kuj zoo siab heev uas kuv tau nrog ib tug uas thaum ub kuv qhia Vajlugkub rau tus tub thiab tus ntxhais ua haujlwm ua ke hauv ceg Npe-ee nyob Tais Vam teb.

Hav Vim wb sib yuav tau 59 xyoos. Tiamsis nws mob kheeb xawm ces lub 1 Hlis ntuj tim 1 xyoo 2010 Hav Vim thiaj tas sim neej lawm. Hav Vim ua haujlwm puv ntoob rau Yehauvas yuav luag 60 xyoo. Nimno tsis muaj nws lawm mas kuv nco nws heev. Tiamsis kuv zoo siab heev uas kuv tau nrog nws mus tshaj tawm rau 2 lub tebchaws. Wb ob leeg puav leej kawm hais lwm yam lus. Tiamsis Hav Vim kuj paub sau 2 yam lus Axia uas nyuaj heev thiab.

Plaub xyoo tom qab ntawd, Pab Uas Ntaus Thawj hais kom kuv rov qab mus rau tebchaws Auxitalia vim kuv laus lawm thiab cheem tsum kev pab. Thaum ntawd kuv tsis xav mus li tiamsis kuv nco qab Hav Vim hais tias yog Yehauvas lub koom haum hais kom peb ua dabtsi, peb tsis txog yig. Tom qab no kuv mam to taub tias qhov uas kuv tsiv rov los Auxitalia yeej yog ib qho zoo.

Niaj hnub nimno kuv ua haujlwm rau ceg Npe-ee hauv Auxitalia. Thiab kuv nrog lub koom txoos mus tshaj tawm thaum kuv so. Kuv zoo siab heev uas thaum cov kwvtij nkauj muam tuaj xyuas Npe-ee es kuv tseem siv tau lus Nyiv Pooj thiab lus Suav coj lawv mus ncig xyuas Npe-ee thiab. Kuv tos ntsoov txog hnub uas Yehauvas yuav tsa cov tuag sawv rov qab los. Kuv paub hais tias Yehauvas yeej yuav nco qab Hav Vim vim nws ua txhua yam li Yehauvas hais.​—Yauhas 5:28, 29.