Harvey ena tadikaka be foa bona ia be roboana. Lagani 1930, hitolo bada negana ai, Harvey ena famili be Midland Junction, Western Australia ai hereva momokani idia dibaia. Harvey ia tubu daekau lalonai Iehova ia lalokau henia, bona ena mauri lagani be 14 neganai ia bapatiso. Bona ia ura lasi kongrigeisen ena asainmen ta do ia dadaraia. Ia mero neganai ia idia noia hebou ai Gima Kohorona duahiduahi do ia karaia, to ia laloa ia hegeregere lasi. To tadikaka ta ese Harvey ia hamaoroa: “Bema Iehova ena orea lalonai ta be oi ia noia gaukara ta oi karaia totona, ia diba oi hegeregere!”​—2 Kor. 3:5.

Lau be England ai hereva momokani lau dibaia, egu sinana bona egu taihuna badana danu. Matamanai egu tamana be Iehova ena Witnes taudia ia inai henia, to gabeai Witnes ta ai ia lao. Ena be ia moale lasi, to egu mauri lagani be 9 neganai bapatiso lau abia. Egu tahua gauna be do lau painia bona misinari gaukara lau karaia. To, egu tamana ia ura lasi do lau painia ela bona egu lagani be 21. To lau  ura lasi do lau naria daudau. Lau be 16 neganai, egu tamana be gwau maoro ia henia, egu kakana dekenai do lau lao, ia be Australia dekenai ia noho. Lau be 18 neganai, painia gaukara lau matamaia.

Australia ai, Harvey lau hedavari henia. Ai ruaosi emai ura be misinari gaukara ai Iehova do ai hesiai henia. Lagani 1951 ai ai headava. Lagani rua ai painia murinai, ai idia noia sekit gaukara do ai karaia. Emai sekit ena teritori be Western Australia ena kahana badana, unai dainai nega momo motuka amo ai lao, unai gabu momo be daudau bona kaukau gabudia.

Lagani 1954 ai, ai idia boiria Gilead ena klas 25 do ai lao. Misinari gaukara do ai karaia urana be kahirakahira do ai hagugurua! Sisima amo New York dekenai ai lao bona Baibel stadi kosi ai hamatamaia. Kosi ena kahana ta be Spanish gado do ai dibaia, to Harvey be ia hekwarahi badina unai gado ai leta r idia gwauraia dalana ia gwauraia diba lasi.

Unai kosi lalonai, emai tisa taudia idia gwau bema ai ura Japan dekenai ai lao, Japan gado dibaia totona emai ladana ai henia diba. Ai laloa namona be Iehova ena orea ese emai asainmen do ia abia hidi. Unai murinai, Albert Schroeder, Gilead tisa ta ia kamonai ai be emai ladana ai henia lasi. Ia gwau: “Mani umui laloa namonamo.” Emai ladana ai do henia lasi neganai, Tadikaka Schroeder ia gwau: “Lau bona tisa haida ese emui ladana ai torea vadaeni. Mani Japan gado umui tohoa.” Harvey be Japan gado ia dibaia haraga.

Lagani 1955 ai Japan dekenai ai ginidae neganai, pablisa ibounai be 500 sibona. Harvey ena mauri lagani be 26 bona lau be 24. Kobe siti dekenai ai idia siaia, ia be davara badinai bona unuseniai lagani foa ai noho. To ai moale badina ai idia boiria sekit gaukara do ai karaia lou, bona emai asainmen be Nagoya siti kahirakahira. Emai tadikaka, aniani bona edia hanua maragidia ai ura henia bada. To daudau lasi murinai, Iehova ena ura do ai karaia dalana ma ta ia kehoa.

Lagani toi sekit gaukara ai karaia murinai, Japan brens ese ai idia noia bema Taiwan dekenai do ai lao Amis iduhu taudia ida ai gaukara hebou totona. Amis tadikaka haida be aposteit taudia ai idia lao, bona Japan gado  ia diba namonamo tadikaka ta ia lao be namo, unai hekwakwanai hamaoromaoroa totona. * Emai gaukara Japan ai ai moalelaia bada, unai dainai disisen ai karaia be auka. To, Harvey be asainmen ta ia dadaraia diba lasi, unai dainai emai lalona ai hadaia ai lao totona.

November 1962 ai, Taiwan dekenai ai ginidae. Unuseniai pablisa ibounai be 2,271 bona idia momo be Amis iduhu taudia. To, China gado ai dibaia guna be namo. China gado ai dibaia totona buka be tamona sibona, bona emai tisa be English gado ia diba lasi, to ai kwalimu.

Taiwan dekenai ai ginidae murinai, Harvey idia abia hidi brens ofesi ia naria totona. Brens ofesi be maragi sibona, unai dainai Harvey be iena ofesi gaukara ia karaia bona nega ia noho hua ta ta ai wiki toi lalonai Amis tadikaka ida ia gaukara totona. Nega ta ta ai, distrik ovasia gaukara ia karaia, anina be hebouhebou ai tok ia henia danu. Harvey be Japan gado ai ena tok ia henia diba bona Amis tadikaka be do idia laloparara. To, gavamani idia gwau tomadiho heboudia dekenai China gado sibona do idia gaukaralaia. Unai dainai, Harvey be mai hekwarahi ida China gado ai ena tok ia henia, bona tadikaka ma ta ese Amis gado ai ia hahanaia.

Unai nega ai gavamani ena tuari taudia ese tano idia biagua, unai dainai tadikaka ese hebouhebou karaia totona gwaumaoro idia abia be namo. Gwaumaoro pepana ai abia be auka, bona nega momo pulisi ese idia henia haraga lasi. Bema hebouhebou ena wiki ai pulisi be gwaumaoro pepana idia do henia lasi, Harvey be pulisi steiseni ai do ia helai ela bona idia henia. Pulisi taudia idia nao tauna ia do helai noho dainai, idia hemarai bona gwaumaoro pepana idia henia haraga.

Wiki haida lalonai tadikaka ai vadivadi henidia neganai, nega momo hora tamona o momo lalonai ororo ai daekau bona sinavai ai raka hanaia. Nega ginigunana ororo lau daekau lau do laloatao noho. Daba ai, ai aniani haraga, bena 5:30 ai basi ta amo daudau hanuana ta dekenai ai lao. Unuseniai, sinavai ta ai raka hanaia, bona mai hekwarahi ida ororo latana ta ai daekau. Unai ororo ena gabana dekenai ai daekau neganai, vairanai ia raka tadikaka ena aena geduna lau itaia diba.

Unai dabai, Harvey be tadikaka haida ida ia haroro, to lau be Japan gado idia gaukaralaia hanua maragina ta dekenai sibona lau haroro. Adorahi 1 oklok bamona neganai, kahirakahira lau maserea, badina hora momo lalonai lau aniani lasi. Harvey lau hedavari neganai, tadikaka be idia lao vadaeni. Harvey be magasin toi ia hariharilaia neganai, ruma taudia be kokoroku ena gatoi toi idia henia. Lau dekenai kasiri gatoi ania dalana ia hadibaia, bona gatoi ena kahana ta ai matu lau karaia bona lau topoa. Ena be ena mamina be dika, to tamona lau tohoa. To, daika ese ihatoina do ia ania? Lau ese lau ania, badina Harvey ia gwau bema lau maserea, do ia hegeregere lasi ororo amo lau ia huaia diho.

Sekit hebouhebou ta dekenai, hekwakwanai idauna ta lau davaria. Ai be Kingdom Hall badinai ia noho tadikaka ena ruma dekenai ai noho. Amis taudia be digu karana idia laloa bada, unai dainai sekit ovasia ena adavana ese emai digu ranu ia hegaegaelaia. Harvey be ia bisi dainai, ia gwau do lau digu guna. Baketi ta be mai ena ranu keruma, ta be ranu siahu bona disi ma ta be ranu lasi. Lau hemarai badina taihu ese ruma ena vairana momokani ai ia atodia, bona hebouhebou totona Kingdom Hall ai idia gaukara tadikaka ese lau idia itaia diba. Taihu lau noia keten ta do ia atoa. To ia be plastik severana ta ia mailaia! Lau ura ruma murinai lau lao, to unuseniai daki idia noho bona dika lau idia koria. Vadaeni lau laloa: ‘Tadikaka be idia bisi noho bona lau digu neganai lau do idia itaia lasi. Bona bema lau digu lasi, do idia moale lasi. Do lau digu sibona!’ Vadaeni lau digu.

Harvey ia laloparara Amis tadikaka edia abidadama be ia goada lasi, badina momo be idia duahiduahi idia diba lasi bona edia gado ai litrisa be lasi. Unai negai, Amis taudia edia gado be hari ita gaukaralaia leta dekenai idia torea matamaia, unai dainai ai laloa tadikaka taihu do ai durua edia gado duahia dalana idia dibaia totona. Unai be gaukara badana, to gabeai tadikaka be sibona edia gado ai Iehova idia dibaia. Lagani 1966 bamona ai Amis gado edia litrisa idia halasia, bona lagani 1968 ai, Gima Kohorona be Amis gado ai idia halasia matamaia.

To, gavamani idia ura China gado litrisa sibona do idia halasia, bona gado ma haida idia taravatua. Unai dainai hekwakwanai ia vara lasi totona, Amis Gima Kohorona be dala idauidau amo ai halasia. Hegeregere, hua 17 lalonai, Mandarin bona Amis gado idia torea Gima Kohorona ai gaukaralaia. Bema ta ia henanadai, ai hamaorodia unai magasin ai gaukaralaia hanua taudia dekenai China gado ai hadibaia totona. Unai nega amo, Iehova ena orea ese Amis gado ai litrisa momo idia halasia, unai hanua taudia dekenai Baibel ena hereva momokani idia hadibaia totona.​—Kara 10:34, 35.

Lagani 1960 bona 1970 lalodiai, Amis tadikaka momo be Dirava ena taravatu hegeregerena idia noho lasi. Baibel ena hakaua herevadia idia lalopararalaia lasi dainai, idia momo be matabodaga karadia idia karaia, idia inuinu kekero, kuku bona buatau idia ania. Harvey be kongrigeisen momo ia vadivadi henidia, bona tadikaka ia durudia Iehova ena lalohadai unai gaudia dekenai idia lalopararalaia totona. Unai vadivadi ta lalonai, inai atikol ena matamanai lau kikilaia gauna ia vara.

Idia manau tadikaka be edia mauri idia haidaua, to madi momo be unai bamona lasi. Unai dainai lagani 20 lalodiai, Taiwan ena pablisa ena namba be 2,450 amo ia diho lao 900 dekenai. Ai lalomanoka bada. To, ai diba Iehova be ia miro oreana do ia hanamoa lasi. (2 Kor. 7:1) Lagani haida murinai, tadikaka taihu be dala maorona ai Iehova idia tomadiho henia, bona Iena lalonamo dainai hari Taiwan ena pablisa namba be 11,000 mai kahana.

Lagani 1980 lalodiai, ai itaia Amis kongrigeisen be idia goada idia lao, bona Harvey ena nega bada ia gaukaralaia China gado idia hereva tadikaka ia durudia totona. Ia ese taihu momo edia witnes lasi adavadia ia durua Iehova ena Witnes taudia ai idia lao totona. Lau laloatao ia gwau ia moale bada, badina ia durua tauna ta be nega ginigunana Iehova ia guriguri henia. Lau danu lau moale bada badina kudou-maoro taudia momo lau hadibaia Iehova kahirakahira idia lao totona. Danu, lau moale badina Taiwan brens ai, guna lau stadi henia hahinena ena natuna mero bona kekeni ida lau gaukara hebou.

To hari, lauegu gaukara turana be lasi. Emai headava laganidia 59 murinai, January 1, 2010 ai egu adavana lalokauna, Harvey, be kensa gorere amo ia mase. Ia be lagani 60 lalodiai ful-taim hesiai gaukara ia karaia! Ia lau reaia bada. To lau moale badina ai matamata neganai, unai tano rua ai hesiai gaukara ai karaia hebou! Asia ena gado aukadia rua ai dibaia, bona Harvey be unai gado ia torea diba.

Lagani foa gunanai, Hakaua Oreana ese lau idia hamaoroa lau buruka dainai, namona be Australia dekenai lau giroa lou. Egu lalohadai ginigunana be, ‘Lau ura lasi Taiwan lau rakatania.’ To, Harvey ese lau ia hadibaia gauna be Iehova ena orea edia noinoi do lau dadaraia lasi, unai dainai lau lao. Gabeai, lau laloparara unai be abia hidi maorona.

Hari, wiki lalodiai lau be Australasia brens dekenai lau gaukara, bona wiken ai egu kongrigeisen lau durua. Lau moale badina China bona Japan taudia be Betele idia vadivadi neganai, edia gado dekenai lau hereva henidia diba. To, Iehova ese ia gwauhamatalaia toreisi lou negana lau naria noho. Lau diba Iehova ese Harvey do ia laloatao, ia be Iehova ese ia henia gaukara ia dadaraia diba lasi.​—Ioa. 5:28, 29.