Harvey va kwaterwe ovazandu vane nu eye ongwa ri otjiveri. Eṱunḓu re ra rira ovakarere va Jehova mokahuro nga oMidland Junction, ku ka ri morukondwa ndwi Western Australia. Ehi ndwo rari esyona mozombura 80 nḓa kapita. Harvey wa suverere Jehova nu wa papitisiwa tja ri nozombura 14. Eye we rihonga okuyakura otjiungura atjihe tja pewa mombongo. Indu tja ri omutanda wa panḓa okulesa okambo kOruhungu pombongarero, tjinga ee rimunu kutja kamaa yenene okulesa nawa. Posi yokutja omurumendu omukambure we mu raera kutja, “Indu omundu motjira tja Jehova tje ku ningire okutjita otjiṋa, okutja eye ma munu kutja ove mo yenene okuungura otjiungura ho.”—2 Kor. 3:5.

Ami, mama nerumbi randje twe rihonga ouatjiri mehi raEngland. Tate wa tondere Ovahongonone va Jehova, posi yokutja kombunda wa karira Omuhongonone wina. Ami mba papitisiwa tji mba ri nozombura muvyu, nandarire kutja tate kaa vanga. Mba ri nondando yokurira omukandjira nu kombunda mbi karire omuhindwa. Nungwari, tate we ndji raera kutja mbi undje nga tji mba tjiti ozombura 21. Posi yokutja hee vanga okuundja orure nao. Kunao indu tji mba ri nozombura 16, eye we ndji yandjera okukatura koAustralia ku nerumbi randje nda tjindira  ngo. Nu indu tji mba ri nozombura 18, mba rira omukandjira.

Ngunda mbi ri moAustralia, mba hakaena kuna Harvey. Nu atuyevari aatu vanga okukarera Jehova otjovahindwa. Eṱe twa kupasana mombura ndji 1951. Kombunda yokuungura otjiungura tjoukandjira pamwe ozombura mbari, eṱe twa ningirwa okuungura otjiungura tjokukavarura ozombongo. Orukondwa ndwaatu varura moWestern Australia rwa ri orunene tjinene, kunao potuingi aatu hingi ozondjira ozonde kotuveze twokokure.

Mombura ndji 1954, eṱe twa ṋangwa okuyenda koskole ya Gilead oitja-25. Ondando yetu yokurira ovahindwa otji ya yenenisiwa. Eṱe twa ya noskepi nu tji twa vaza moNew York twa uta okukonḓonona omahongero wOmbeibela omakoto. Otjorupa rwoviṋa mbyaatu rihongo poskole ya Gilead, eṱe aatu sokurihonga Otjispanish. Nu ya ri ouzeu ku Harvey okuposisa oleṱera ndji “r.”

Ngunda tu ri poskole, imba mbaave tu hongo va tjivisa kutja, imba mbe nonḓero okukaungurira koJapan mave yenene okuritjangisa kutja ve rihonge Otjijapan. Eṱe twa tya kutja onawa otjira tja Jehova tji tja toorora kutja matu sokukaungurira pi. Katjisupi kombunda yanao, Albert Schroeder, umwe wa imba mbaave hongo po Gilead, wa muna kutja katu ritjangisire okukerihonga Otjijapan. Eye wa tja: “Ripuriye ohunga notjiṋa ho.” Indu Mbuti Schroeder tja muna kutja eṱe katu ye ritjangisa, eye wa tja: “Ami novakwetu varwe mbu tu honga pamwe twa tjangisa omana weṋu. Ka kondjeye okurihonga Otjijapan.” Otjijapan tja ri otjipupu ku Harvey okukapita Otjispanish.

Eṱe twa vaza moJapan mombura ndji 1955 indu tji mwa ri ovazuvarise 500 mouparanga wehi ndwo. Ami mba ri nozombura 24 nu Harvey wa ri nozombura 26. Eṱe twa hindwa kotjihuro oKobe, ku twa kazuvarisa oure wozombura ine. Twa ri nondjoroka indu tji twa ṋangwa okukauta otjiungura tjokukavarura ozombongo, popezu notjihuro hi oNagoya. Nu twa suverere oviṋa avihe ohunga notjiungura tjetu, ovakambure ovakwetu, ovikurya noruveze ongondoroka. Kombunda yoruveze orusupi, eṱe twa pewa otjiungura tjarwe, nu twe rimanena kutja atjihe Jehova tje tu ningire okutjita matu tji tjiti.

Ozombura ndatu kombunda yokuungura otjiungura tjokukavarura ozombongo, orutavi rwomberoo rwaJapan rwe tu ningira okukazuvarisa koTaiwan, kovandu mbe hungira eraka ndi Otjiamis. Otjivaro tja imba mba poka ku Jehova aa tji yerurukire  ko, nu moTaiwan aa mu hepwa omurumendu omukambure ngu hungira Otjijapan nawa kokutja e ve vatere. * Eṱe twa suverere otjiungura tjetu moJapan, kunao imbwo wa ri omukambo omuzeu okutoora. Posi yokutja, twa yakura otjiungura ho mena rokutja Harvey we rihonga kutja ka nawa okupanḓa kotjiungura tji twa pewa.

Eṱe twa vaza mu Novemba mombura ndji 1962 moTaiwan. Mu mwa ri ovazuvarise 2 271 nu ovengi vawo mba ri Ovaamis. Nungwari rutenga aatu hepa okurihonga Otjichina. Eṱe twa ri nembo rimwe okurihongera ko nu omiṱiri ndjaai tu hongo kaai tjiwa Otjiingirisa, posi yokutja twa yenena okurihonga eraka ndwo.

Indu tji twe ya moTaiwan, Harvey wa pewa omerizirira wokuhongorera po orutavi rwomberoo. Orutavi rwomberoo rwa ri oruṱiṱi, kunao Harvey aa yenene okuungura oviungura vye pomberoo na wina okuungura pu novakambure ovakwetu Ovaamis ovivike vitatu momueze. Eye wina povikando aa karere otjomutarere wotukondwa nu iho aatji kamburire mo okuyandja omahungi pomaworonganeno worukondwa. Ka yari ouzeu ku Harvey okuyandja omahungi mOtjijapan, nu ovakambure ovakwetu Ovaamis ave yenene okuzuva eraka ndo. Nungwari, ohoromende aai yandjere ozombongarero zozongamburiro ze kayendisiwe mOtjichina uriri. Kunao Harvey, ngu hina aa hungire erako ndo nawa, eye aa yandja omahungi mOtjichina nu omurumendu omukambure a toroka mOtjiamis.

Moruveze ndwo moTaiwan ovakambure aave hepa okuningira ousemba okukara nomaworonganeno worukondwa. Ya ri ouzeu okumuna ousemba, nu ovapolise povikando tjiva aave kambura orure okuyandja ousemba. Indu ovapolise tji ve ha yandjere ousemba motjivike tjomaworonganeno worukondwa, Harvey aa kahaama pomberoo yovapolise nga tja pewa ousemba. Mena rokutja aave ṱohoṋi omundu wehi rarwe okuundja, owo aave hakahana okutupa ousemba.

Movivike mbi twa kakara pu novakambure ovakwetu, eṱe aatu yenene okukayenda pehi oure woiri imwe poo kombanda yanao, okuronda ozondundu nokukonda ozonḓonḓu. Me zemburuka otjikando otjitenga tji mba karonda ondundu. Tji twa za nokurya ovikurya vyomuhuka omunene, eṱe twa karonda ombesi po 5:30, okuyenda kotjirongo tji tja ri kokure. Okuzambo twa kayenda pehi okukonda omiramba nokuronda ondundu onde. Oyo ya ri onde tjinene, indu tji me tara kombanda ee yenene okumuna ozombaze zomurumendu omukambure ngu ma rondo.

Omuhukomunene mbwo, Harvey wa ungura otjiungura tjokuzuvarisa pu novakambure mba tura momaturiro ngo, nu ami mba kazuvarisa mokarongo ovandu ovengi mu ve hungira Otjijapan. Ami ee rimunu okazozera ape mo imwe yometaha, mena rokutja mba kara orure nokuhinokurya. Indu tji mba ka hakaena kuna Harvey, eye wa ri erike. Eye wa yandja omambo tjiva nu a pewa omai yetatu wohunguriva omavihu. Eye we ndji toporera ondovi mei kutja mbi nwe. Nandarire kutja hi mba ri nonḓero mba rora rimwe. Nu ouṋe ngwa muna ei indi esenina? Harvey wa yandja kwami mena rokutja aa munu kutja kamaa yenene okundjitoora indu tji mba seuka.

Pomaworonganeno yemwe yorukondwa, ami mba kara mongaro ndje hina ee undjire ko. Eṱe twa ri po yomurumendu omukambure ngwa turire popezu nEtuwo rwOmerikotameneno. Omukazendu womutarere worukondwa wetu rongerisira oviṋa okukerikoha, mena rokutja okurikoha otjiṋa otjinanḓengu kOvaamis. Harvey wa ri noviungura, nu otje ndji ningira kutja mbi tenge po okukerikoha. Pa ri otjiyemere tjomeva omatarazu, otjiyemere tjomeva omapyu notjiyaha okurikohera mo. Ami mba himinwe tjinene indu omukazendu womutarere worukondwa tja twapo oviṋa mbyo pendje, munda wEtuwo rwOmerikotameneno ku kwa ri ovakambure mbaave rongerisa omaworonganeno worukondwa. Ami mba ningira erapi poo otjiṋa tji matji tjiti kutja eha munika. Eye we ndji yetera osaira ndja i munine. Mbe ripura okuyenda kongotwe yondjuwo, posi yokutja kwa ri ozonḓera nḓee tira kutja maze ndji tokora. Ami mbe ripura kutja, ‘Ovakambure ovakwetu mba mave ungura oukukutu, owo kamaave ndji munu tji me rikoho. Nu tji mbi he rikohere otjiṋa ho matji ve hihamisa.’ Kunao ami mba ṱokurikoha.

Harvey wa muna kutja ya ri ouzeu kovakambure Ovaamis okukara nongamburiro onḓikame, orondu ovengi kaave yenene okulesa nu kapa ri omambo meraka rawo. Eraka rOtjiamis ra uta okutjangwa nu aa ri ungurisa omutjangahingo wOvaroma. Mena ranao twa muna kutja onawa okuhonga ovakambure ovakwetu okulesa meraka rawo oveni. Imbyo vya ri oviungura ovingi, posi yokutja korusenina ovakambure ovakwetu va yenena okurihonga ohunga na Jehova meraka rawo oveni. Omambo meraka rOtjiamis ya uta okupitisiwa kombunda yombura ndji 1960, nu Oruhungu meraka rOtjiamis ra uta okupitisiwa mombura ndji 1968.

Nungwari, ohoromende kaai yandjere omambo nge he ri mOtjichina okupitisiwa. Kunao Oruhungu meraka rOtjiamis aaru pitisiwa momiano pekepeke. Otjotjihorera, oure womieze ape 17, okambo kOruhungu aa ke pitisiwa momaraka ayeevari, Otjimandarin nOtjiamis. Indu ovandu tji ve nomapuriro, aape munika tjimuna aatu ungurisa oumbo mbo okuhonga ovandu Otjichina. Kombunda yanao, otjira tja Jehova tja pitisa omambo omengi meraka rOtjiamis okuvatera ovandu okurihonga ouatjiri wOmbeibela.—Oviung. 10:34, 35.

Mozombura nḓa 1960 na inḓa 1970, ovakambure ovengi mbaave hungire Otjiamis kaave hupu otja  komirari vya Mukuru. Mena rokutja kaave zuu nawa omirari mbi ri mOmbeibela, tjiva vawo va uta okutjita oruvakiro, okunwa okukapitisa etota, poo okupepa omakaya nokuungurisa ovipurukise. Harvey wa karyangera ozombongo ozengi, okukondja okuvatera ovakambure okuzuva nawa oumune wa Jehova ohunga nomapu otja ingo. Mouyenda wetu umwe, pa tjitwa imbi mbi mbe mu raere komautiro wehungi ndi.

Ovakambure tjiva overisusuparise va yenena okutjita omarundurukiro, posi yokutja ouhumandu ovengi kave tjitire omarundurukiro. Kunao, otjivarero tjovazuvarise moTaiwan mba ri 2 450 tja rira ape 900 moure wozombura 20. Otjiṋa ho tje tu wisa momuinyo tjinene. Posi yokutja, eṱe aatu tjiwa kutja Jehova kamaa sere ondaya kotjira tje indu tji tu hi nokurikohorora. (2 Kor. 7:1) Kombunda yoruveze kaaṋi, ozombongo aaze karere Jehova momuano omusemba. Kunao, Jehova we ve sera ondaya. Ndino moTaiwan mu novazuvarise vokombanda 11 000.

Okuza mombura ndji 1980, eṱe twa muna omuano ovakambure mba ri mozombongo zeraka rwOtjiamis mu va ri nongamburiro onḓikame. Nu Harvey aa yenene okukara oruveze oruingi pu novakambure mbaave hungire Otjichina. Eye wa ri nondjoroka okuvatera ovarumendu wovakazendu ovakambure okurira Ovahongonone va Jehova. Ami mbi zemburuka omuano mbwa ri nondjoroka indu tja muna umwe wovarumendu mbo ama kumbu ku Jehova otjikando otjitenga. Mbi nondjoroka kutja mba yenena okuvatera ovandu ovengi okutumbuka popezu na Jehova. Nu wina mba yenena okukara nondjoroka yokukarera porutavi rwomberoo rwa Taiwan pu nomuatje omuzandu nomukazona wovahongwa vandje ovakuru.

Ami nai hi ri pu nomusuverwa wandje. Kombunda yozombura ape 59 morukupo, omusuverwa wandje Harvey wa ṱa tji yari 1 ku Januari 2010, mena rokangera. Eye wa karera Jehova oruveze aruhe ape ozombura 60. Ami mbi hihamenwa i ye tjinene ngamba. Posi yokutja, mbi nondjoroka kutja mba yenena okukarera Jehova puna ye momahi yevari pekepeke. Eṱe twe rihonga okuhungira omaraka yevari omazeu morukondwa rwa Asia, nu Harvey wina we rihonga okuyetjanga.

Kombunda yozombura ape ine, Orutu Orunane rwa tya kutja ma rire nawa ami tji mba yaruka koAustralia mena rokutja mba kurupire nu ee hepa ombatero onyingi. Rutenga ami mbe ripura kutja, ‘Hi nokuvanga okupita moTaiwan.’ Posi yokutja Harvey we ndji honga kutja e roro okutja kako kotjira tja Jehova. Kunao mba ya koAustralia. Korusenina, ami mba kamuna kutja ya ri ondunge ombwa okutjindira ngo.

Ndino, mbi karera porutavi rwomberoo moAustralasia nu momaandero wotjivike mbi kazuvarisa pu nombongo. Mbi nondjoroka kutja mbi yenena okuungurisa Otjijapan nOtjichina tjandje okuraisira ovandu oBetel. Ami mbi undja nonḓero ombendukiro Jehova ndje tu kwizikira. Me tjiwa kutja eye ma zemburuka Harvey, ngwaa tjiti avihe Jehova mbyee mu ningire okutjita.—Joh. 5:28, 29.