Harvey nya anak tuai ari empat iku menyadi lelaki. Sida sebilik nerima pemendar ba Midland Junction, Australia Barat. Ba maya nya, bisi penanggul ekonomi ti balat nyadi kena taun 1930-an. Pengerindu Harvey ngagai Jehovah majak nambah, lalu iya dibaptisa lebuh beumur 14 taun. Lebuh iya agi biak, iya kala nulak pengawa macha Menara Jaga ba gempuru laban iya ngumbai diri enda layak. Tang seiku menyadi lelaki madah ngagai Harvey, “Enti bisi orang ba gerempung Jehovah meri nuan siti-siti pengawa, reti nya iya nemu nuan ulih ngereja pengawa nya.” (2 Kor. 3:5) Utai ke nyadi tu ngajar iya nerima semua pengawa ke diberi ba eklisia.

Aku nerima pemendar ba England, sama enggau indai sereta menyadi indu aku ke tuai. Apai aku laun nerima pemendar. Terubah iya, apai aku enda rinduka Saksi-Saksi Jehovah. Taja pan iya enda setuju, aku dibaptisa lebuh beumur 9 taun. Aku ngembuan juluk ati nyadi pengerintis, lalu udah nya nyadi pengerintis seberai tasik. Taja pia, apai aku semina ngemendarka aku ngerintis enti aku beumur 21 taun. Tang aku enggai lama nganti! Lebuh aku beumur 16 taun, apai aku ngemendarka aku  pindah ngagai Australia, diau enggau menyadi indu aku ke tuai. Lalu lebuh aku beumur 18 taun, aku berengkah ngerintis.

Ba Australia, aku betemu enggau Harvey. Kami duai bisi juluk ati nyembah Jehovah nyadi pengerintis seberai tasik. Kami duai jadi ba taun 1951. Pengudah ngerintis pengelama dua taun, kami nerima pengawa ba pelilih. Pelilih kami ba Australia Barat amat besai. Nya alai kami patut deriba jauh nengah jalai ti rangkai sereta nadai entu bisi orang.

Ba taun 1954, kami duai dikangau ngagai Sekula Gilead kelas ke-25. Enda lama agi, juluk ati kami duai nyadi pengerintis seberai tasik deka dijapai! Kami nepan kapal ngagai New York, lalu berengkah belajarka Bup Kudus enggau silik. Ba Sekula Gilead, kami mega patut belajar jaku Sepanyol. Tu enda senang ba Harvey laban iya tusah deka nyebut urup ‘R’ enggau betul.

Maya ba Gilead, bala pengajar madahka sapa ke deka dianjung ngagai Jepun ulih nulis nama sida enggau kelas jaku Jepun. Tang kami duai mutuska deka ngelakka gerempung Jehovah nentuka pengawa kami. Enda lama udah nya, seiku ari pengajar Gilead, Albert Schroeder, nemu kami duai nadai nulis nama kami. Iya ngasuh kami duai berundingka baru pemutus kami. Lebuh kami agi kakang ati, Menyadi Albert madah: “Pengajar ke bukai enggau aku udah nulis nama seduai. Seduai tau nguji belajarka jaku Jepun.” Harvey senang agi belajar jaku Jepun ari belajarka jaku Sepanyol.

Lebuh kami datai di Jepun ba taun 1955, semina bisi 500 iku penginjil ba menua nya. Maya nya, Harvey beumur 26, lalu aku 24 taun. Kami dianjung ngagai nengeri Kobe. Kami ba dia pengelama empat taun. Udah nya kami dianjung baru ngereja pengawa ba pelilih. Kami ngereja nya semak nengeri Nagoya. Kami amat rindu ke pengawa kami, nyengkaum bala menyadi, pemakai sereta rampa menua. Enda lama udah nya, kami bisi siti agi peluang ngereja utai ke diasuh Jehovah.

Pengudah tiga taun kami ngereja pengawa ba pelilih, pampang opis ba Jepun nanya enti kami ulih ngagai Taiwan nulung orang ke bansa Amis. Sekeda menyadi lelaki bansa Amis udah  limpang ari pengarap, lalu pampang opis ba Taiwan begunaka menyadi lelaki ke landik jaku Jepun nulung mutarka penanggul tu. * Kami rindu pengawa kami ba Jepun. Nya alai pemutus tu tusah digaga. Tang Harvey belajar nerima enda ngira nama pengawa diasuh kereja iya. Nyadi kami duai setuju nerima pengawa nya.

Kami datai ba Taiwan bulan sebelas, taun 1962. Maya nya bisi 2,271 iku penginjil. Mayuh ari sida bansa Amis. Tang kami patut belajarka jaku Cina. Kami semina bisi siti bup kena belajar jaku Cina sereta seiku pengajar ke enda nemu jaku Inggeris. Taja pia, kami agi ulih belajar.

Pengudah datai ba Taiwan, Harvey diasuh kereja ba pampang opis, ngemataka pengawa ba menua nya. Pampang opis nya mit. Nya alai Harvey bisi awak ngereja pengawa iya ba opis lalu agi ulih gawa enggau bala menyadi bansa Amis nyauka tiga minggu sebulan. Kekadang iya nyadi tuai ti ngemata pengawa ba pelilih, nyengkaum meri cheramah ba gempuru besai. Harvey ulih meri cheramah ngena jaku Jepun, lalu menyadi bansa Amis agi ulih mereti. Tang perintah Taiwan semina ngasuh ngena jaku Cina enti bisi aum pasal pengarap. Nya alai, Harvey patut meri cheramah ngena jaku Cina taja pan iya agi belajarka jaku nya lalu iya ngasuh menyadi nyalin jaku nya ngagai jaku Amis.

Maya nya Taiwan dipegai perintah soldadu. Nya alai bala menyadi patut minta permit bejalaika gempuru besai. Maya nya tusah deka bulih permit, lalu polis laun ngeluarka permit. Enti polis enda meri permit ba minggu gempuru besai, Harvey deka terus nganti ba balai polis sampai sida meri permit nya. Laban sida berasai malu enti orang luar nganti lama ba balai polis, nya alai sida jampat ngeluarka permit nya.

Ba maya minggu kami begulai enggau bala menyadi, kami selalu bejalai sejam tauka lebih niki bukit sereta meraka sungai. Aku agi ingat keterubah kali aku niki bukit. Pengudah ngirup pagi, kami nepan bas pukul 5:30 pagi ngagai kampung ti jauh. Udah nya kami meraka sungai ti besai lalu niki bukit ti renjan. Bukit nya amat renjan nyentukka aku ulih meda kaki menyadi ke ba mua aku.

Pagi nya, Harvey gawa enggau bala menyadi bukai ba pengawa nginjil, lalu aku nginjil kediri ba siti kampung. Orang ke diau dia nemu bejaku Jepun. Lebuh udah jam 1 ngalih hari, aku berasai lemi laban lapar. Lebuh aku betemu enggau Harvey baru, nadai agi menyadi bukai enggau iya. Harvey udah nukar sekeda majalah enggau tiga igi telu manuk ti mata. Iya nunjuk ngagai aku chara makai telu nya. Iya nebuk lubang mit ba atas enggau ba baruh telu nya lalu ngasuh aku nyedut telu nya ari siti lubang. Taja pan makai ngena chara tu baka ke enda entu nyamai, tang aku nguji sigi. Sapa ke deka bulih telu ti sigi agi? Harvey meri telu nya ngagai aku laban iya ngasaika diri enda ulih ngangkat aku enti aku luput ketegal lapar.

Ba siti gempuru besai, kami diau enggau seiku menyadi lelaki. Rumah iya sepiak enggau Palan Gempuru. Orang Amis ngumbai mandi nya amat  beguna. Nya alai bini tuai ti ngabas nyediaka ai kena kami mandi. Ketegal Harvey amat kisuk, iya ngasuh aku mandi dulu. Bini tuai ti ngabas nyediaka tiga beledi: siti beledi ai chelap, siti beledi ai angat sereta siti beledi kusung. Tang aku amat tekenyit lebuh iya nepu tiga iti beledi tu ba luar rumah, lalu ulih dipeda ari Palan Gempuru! Maya nya, bisi mayuh menyadi ba Palan Gempuru ke benung nulung nyediaka utai kena gempuru besai. Aku minta iya kain kena belindung, tang iya meri aku kain plastik ke senayau! Aku bisi ati deka mandi ba belakang rumah, tang bisi mayuh ansa ke deka mantuk aku. Aku lalu berunding: ‘Bala menyadi engka kelalu kisuk. Sida tentu enda beratika aku mandi lalu enti aku enda mandi, tuai ti ngabas enggau bini iya enda nyamai ati.’ Nya alai aku mandi aja!

Harvey nyau sedar, bala menyadi bansa Amis tusah deka ngembuan pengarap ti tegap laban sida enda nemu macha lalu nadai litaricha ba bansa jaku sida. Laban jaku Amis baru ngaga urup, nya alai nya maya ti manah ngajar sida macha dalam jaku diri empu. Tu begunaka mayuh pengawa. Tang asil iya, bala menyadi Kristian ulih belajar pasal Jehovah dalam bansa jaku diri empu. Litaricha jaku Amis bisi ba urung taun 1966. Lalu ba taun 1968, Menara Jaga dalam jaku Amis berengkah dikeluarka.

Taja pia, perintah Taiwan enggai kami nyadung litaricha enti ukai dalam bansa jaku Cina. Kena nyeliahka penanggul tu, Menara Jaga Amis dikeluarka dalam bemacham chara. Ambika chunto, kami ngena Menara Jaga ke ditulis dalam jaku Mandarin enggau jaku Amis. Enti bisi orang deka nemu, tu baka ke kami ngena majalah nya ngajar orang jaku Cina. Kenyau ari nya, gerempung Jehovah udah nyediaka mayuh litaricha dalam bansa jaku Amis ngambika sida ulih belajarka pemendar Bup Kudus.—SKR. 10:34, 35.

Kira-kira 20 taun, bala menyadi Amis idup enda nitihka standard Jehovah. Laban sida enda entu meretika prinsip Bup Kudus, sekeda ari sida ngereja ulah ti kamah, mabuk, ngena tembakau sereta makai buah pinang. Harvey ngabas mayuh  eklisia lalu nulung sida meretika runding Jehovah bekaul enggau pekara tu. Ba siti pejalai, kami bisi peneleba baka ke ditusui aku ba pun cherita tu.

Menyadi ke baruh ati sanggup ngaga ubah. Tang sayau amat, mayuh ari sida enda. Lalu penyampau penginjil ba Taiwan nurun ari 2,450 ngagai 900 iku dalam timpuh 20 taun. Tu amat enda meransang. Tang kami nemu, Jehovah tentu enggai merekat gerempung ti enda tuchi. (2 Kor. 7:1) Nyau kelama, bala menyadi ulih nyembah Jehovah enggau chara ti betul. Lalu, enggau berekat ari Jehovah, Taiwan diatu bisi lebih ari 11,000 iku penginjil.

Kenyau ari taun 1980, kami ulih meda pengarap bala menyadi Amis majak tegap. Ketegal nya, Harvey ulih ngena mayuh agi awak nulung eklisia bansa Cina. Iya gaga ati ulih nulung laki sekeda menyadi indu nyadi Saksi-Saksi Jehovah. Aku agi ingat lebuh iya madahka diri amat gaga ati ninga seiku ari lelaki nya besampi keterubah kali. Lalu aku mega gaga ati bisi peluang ngajar mayuh orang ke baruh ati semak ngagai Jehovah. Aku indah bisi peluang gawa ba pampang opis Taiwan enggau seiku anak lelaki sereta seiku anak indu pemelajar Bup Kudus aku suba.

Diatu, kaling pengidup aku udah nadai. Nyauka 59 taun kami udah jadi. Harvey nadai kena 1 Januari 2010 ketegal penyakit riman. Iya gawa penuh jam ke Jehovah nyau ka 60 taun! Aku agi lelengauka iya. Tang aku amat gaga ati ulih nyukung iya ba pengawa di dua bengkah menua. Kami duai ulih bejaku dalam dua iti bansa jaku ti tusah, iya nya jaku Jepun enggau jaku Cina. Harvey indah ulih nulis dalam dua iti jaku nya!

Kira-kira empat taun udah nya, Raban ti Ngiring mutuska manah agi aku pulai ngagai Australia ketegal aku mansang tuai. Terubah iya aku berunding, ‘Aku enggai ninggalka Taiwan.’ Tang Harvey seruran meransang aku nerima pengawa ke diberi gerempung Jehovah. Aku nyau nemu tu pemutus ti manah!

Kemayaharitu, aku gawa ba pampang opis Australasia, lalu ba ujung minggu aku begulai enggau bala menyadi ba eklisia. Aku gaga ati ulih ngena jaku Jepun enggau jaku Cina lebuh mai bala menyadi ke datai ngelawa Betel. Lalu aku nganti semaya Jehovah pasal pengangkat ari mati dikeamatka. Aku nemu Jehovah deka ingatka Harvey, ke seruran ngereja utai ke diasuh Iya!—Jhn. 5:28, 29.