Avi bin gɛt tri brɔda dɛn, ɛn na in na di big wan. In famili bin bi Jiova Witnɛs arawnd 1930, we dɛn bin de na wan tɔŋ we nem Midland Jɔnkshɔn, na di Wɛst pat na Ɔstrelia. Insay dɛn tɛm dɛn de, tin bin tranga. Avi bin kam fɔ lɛk Jiova, ɛn i baptayz we i ol 14 ia. I nɔ tu te, i bin lan se i fɔ gri fɔ du ɛni wok we dɛn gi am na di ɔganayzeshɔn. Wan tɛm we i bin yɔŋ, dɛn bin tɛl am fɔ rid Di Wachtawa na mitin, bɔt i bin se i nɔ go ebul bikɔs i tink se i nɔ kwalifay. Bɔt di brɔda we bin kam tɔk to Avi bin ɛp am fɔ tink difrɛn we. I bin tɛl am se: “If pɔsin tɛl yu fɔ du sɔntin na Jiova in ɔganayzeshɔn, na bikɔs di pɔsin no se yu kwalifay.”—2 Kɔr. 3:​5.

Mi, mi mama, ɛn mi big sista bin bi Jiova Witnɛs we wi de na Ingland. Mi papa nɔ bin lɛk Jiova Witnɛs dɛn fɔs, bɔt leta insɛf bin kam fɔ bi Jiova Witnɛs. Mi papa nɔ bin want fɔ mek a baptayz, bɔt a bin baptayz we a ol nayn ia. A bin sɛt gol fɔ bi  payɔnia ɛn leta bi mishɔnari. Bɔt mi papa nɔ bin gri, i se pas a ol 21 ia bifo a bigin payɔnia. Bɔt a nɔ bin want fɔ wet te da tɛm de. So we a bin ol 16 ia, i bin gri fɔ mek a go de wit mi big sista we bin dɔn muf go na Ɔstrelia. Faynali, we a bin ol 18 ia, a bin bigin fɔ payɔnia.

Mi ɛn Avi bin mitɔp na Ɔstrelia. Wi ɔl tu bin want fɔ bi mishɔnari. Wi bin mared insay 1951. Afta we wi bin payɔnia fɔ tu ia, dɛn bin aks wi fɔ du di sakit wok. Wi sakit na di Wɛst pat na Ɔstrelia bin rili big, so wi bin nid fɔ drayv fɔ lɔng bifo wi rich na fa fa say dɛn we wi bin nid fɔ go.

Insay 1954, dɛn bin invayt wi fɔ atɛnd di 25 klas na Giliad. I nɔ bin de fa fɔ lɛ wi drim fɔ bi mishɔnari kam tru. Wi bin travul bay ship fɔ rich na Nyu Yɔk, ɛn wi bin bigin fɔ stɔdi di Baybul gud gud wan. Na Giliad skul, wi bin nid fɔ lan Spanish, bɔt dat nɔ bin izi fɔ Avi bikɔs i nɔ bin sabi kɔl r lɛk Spanish pipul dɛn.

We wi bin de na di skul, di instrɔktɔ dɛn bin se pɔsin kin rayt in nem fɔ lan Jepaniz if i want fɔ go prich na Jepan. Wi bin disayd se wi nɔ go rayt wi nem, wi go alaw Jiova in ɔganayzeshɔn fɔ pik usay wi go go. I nɔ tu te, Albat Shroda we na bin wan pan wi Giliad instrɔktɔ dɛn bin notis se wi nɔ bin rayt wi nem. I bin tɛl wi se: “Una tink bɔt am bak.” We wi stil nɔ rayt wi nem, i bin se: “Mi ɛn di ɔda instrɔktɔ dɛn dɔn rayt una nem. So una jɔs si if una kin ebul fɔ lan Jepaniz.” I bin izi fɔ lɛ Avi lan dis langwej.

Wi bin rich na Jepan insay 1955, ɛn da tɛm de na 500 pɔblisha dɛn nɔmɔ bin de na di wan ol kɔntri. Avi bin ol 26 ia, ɛn mi bin ol 24. Dɛn bin sɛn wi na wan siti we nem Kobɛ, ɛn wi bin prich de fɔ 4 ia. Wi bin gladi we dɛn invayt wi bak fɔ kam du di sakit wok, ɛn dɛn bin sɛn wi nia wan siti we nem Nagoya. Wi bin lɛk ɔltin bɔt wi asaynmɛnt. Wi bin lɛk di brɔda dɛn, di it dɛn, ɛn di we aw di ples bin fayn. I nɔ tu te, wi bin gɛt ɔda chans bak nɔ fɔ se nɔ to Jiova.

Afta we wi dɔn du di sakit wok fɔ tri ia, di Jepan branch bin aks wi if wi go want fɔ go na Taywan ɛn go prich to di pipul dɛn we de tɔk wan langwej we na Amis. Sɔm Amis brɔda dɛn bin dɔn tɔn agens Jiova, ɛn di branch na Taywan bin nid brɔda we sabi tɔk Jepaniz fɔ ɛp dɛn wit da prɔblɛm de. * Wi bin lɛk wi wok na Jepan, so dis nɔto bin izi tin fɔ disayd. Bɔt Avi bin dɔn lan se i nɔ fɔ ɛva se i nɔ de du wok na Jiova in ɔganayzeshɔn, so wi bin gri fɔ go.

Wi rich de insay Novɛmba 1962. Da tɛm de, Taywan bin gɛt 2,271 pɔblisha dɛn, ɛn bɔku pan dɛn bin de tɔk Amis. Bɔt fɔs, wi bin nid fɔ lan Chayniz. Wi bin jɔs gɛt wan buk ɛn wan ticha we nɔ de tɔk Inglish, bɔt wi bin lan di langwej.

Jɔs afta we wi rich na Taywan, dɛn bin tɛl Avi fɔ bi di branch savant. Di branch nɔ bin big, so Avi bin de ebul fɔ du in ɔfis wok dɛn ɛn stil ebul fɔ wok wit di Amis brɔda dɛn fɔ lɛk tri wiks insay di mɔnt. Sɔntɛnde, i bin de sav as distrikt ovasia bak we min se i bin de gi tɔk dɛn na asɛmbli bak. Avi fɔ bin dɔn gi di tɔk dɛn insay Jepaniz ɛn di Amis brɔda dɛn fɔ bin dɔn ɔndastand. Bɔt di gɔvmɛnt bin se ɛni mitin we na bɔt Gɔd biznɛs, na Chayniz nɔmɔ dɛn fɔ tɔk. Avi bin stil de fɛt fɔ lan di langwej, bɔt i bin gi di tɔk dɛn insay Chayniz ɛn wan ɔda brɔda bin intaprit am insay Amis.

Dɛn tɛm dɛn de insay Taywan, wi bin nid fɔ go tek pamit bifo wi gɛt asɛmbli dɛn. Ɛn i nɔ bin izi fɔ gɛt dɛn pamit dɛn de, i kin tek lɔng tɛm bifo dɛn gri. If di polis dɛn nɔ gi wi di pamit te to di tɛm we wi de insay di wik fɔ di asɛmbli, Avi kin go sidɔm na di polis steshɔn te dɛn gi wi. Bikɔs di polis dɛn kin shem we fɔrina de kam sidɔm na dɛn polis steshɔn, dɛn kin gi wi di pamit kwik.

Di wik dɛn we wi kin spɛn tɛm wit di brɔda dɛn, wi kin nid fɔ waka fɔ lɛk wan awa ɔ mɔ, wi kin klem mawntin dɛn, ɛn wi kin waka insay riva dɛn. A mɛmba di fɔs tɛm we a klem mawntin. Afta we wi it kwik kwik wan na mɔnin, wi tek bɔs arawnd 5:​30 na mɔnin fɔ go na wan vilej we de fa say. Wi bin krɔs wan watasay, ɛn wi bin klem ɔp wan ay mawntin. Di mawntin bin so ay dat di brɔda we bin de bifo mi in fut bin de na di sem lɛvul wit mi yay.

Da mɔnin de, Avi bin prich wit sɔm brɔda dɛn, ɛn mi wan bin prich na wan smɔl vilej usay pipul dɛn we de tɔk Jepaniz bin de. Arawnd wan oklɔk aftanun, a bin dɔn wik bikɔs i bin dɔn te we a nɔ it. We mi ɛn Avi mitɔp, di ɔda brɔda dɛn bin dɔn go. Avi bin ɛkschenj sɔm magazin dɛn fɔ tri rɔ eg. I bin sho mi aw fɔ it di rɔ eg bay we i se mek a mek smɔl ol tu say ɛn sɔk di eg we de insay de. Pan ɔl we i nɔ bin swit, a bin it  wan. Avi bin gri fɔ mek a it di tɔd eg bikɔs if a fent, i nɔ bin tink se i go ebul tot mi fɔ go dɔŋ di mawntin.

We wi bin go wan sakit asɛmbli, a bin lan fɔ was wan nyu we. Wi bin go de to wan brɔda we de nia di Kiŋdɔm Ɔl. Fɔ was bin rili impɔtant to Amis pipul dɛn, so di sakit ovasia in wɛf bin rɛdi ɔltin fɔ mek mi ɛn Avi go was. Avi bin bizi, so i se lɛ mi fɔs go was. Di sista bin put tri kɔntena dɛn: Wan bin gɛt ɔt wata, wan gɛt kol wata, ɛn di ɔda wan bin ɛmti. Bɔt a bin sɔprayz fɔ si se i put am rayt bifo di Kiŋdɔm Ɔl usay ɔda brɔda dɛn bin de ɛp fɔ pripia fɔ di asɛmbli. A bin tɛl am fɔ gi mi sɔntin fɔ kɔva, so i bin gi mi wan wayt plastik. A bin tink fɔ go biɛn di os, bɔt sɔm dɔks dɛn bin de de, ɛn a bin de fred se dɛn go chuk mi. So a tɛl misɛf se: ‘Di brɔda dɛn bizi, dɛn nɔ go ivin notis se a de was. Ɛn if a nɔ was, di pipul dɛn go fil bad so lɛ a jɔs was.’ Ɛn na dat a bin du.

Avi bin kam fɔ si se di Amis brɔda ɛn sista dɛn nɔ bin de go bifo pan dɛn padi biznɛs wit Jiova bikɔs bɔku pan dɛn nɔ go skul, ɛn dɛn nɔ bin gɛt no buk ɛn magazin dɛn insay dɛn langwej. Bikɔs dɛn bin jɔs dɔn bigin fɔ yuz Roman alfabɛt dɛn fɔ rayt Amis, i bin tan lɛk i go fayn fɔ mek dɛn tich di brɔda dɛn aw fɔ rid dɛn yon langwej. Dis nɔto bin izi wok, bɔt smɔl smɔl di brɔda dɛn bin ebul fɔ lan bɔt Jiova insay dɛn langwej. Ɛn arawnd 1966, dɛn bin bigin fɔ mek buk dɛn insay Amis, ɛn insay 1968, dɛn bigin fɔ print Di Wachtawa.

Bɔt di gɔvmɛnt nɔ bin de gri fɔ mek wi sheb sheb buk dɛn we nɔ de insay Chayniz. So fɔ avɔyd prɔblɛm, wi bin de fɛn difrɛn we dɛn fɔ print di Amis Wachtawa. Fɔ ɛgzampul, fɔ sɔm tɛm wi bin de rayt Di Wachtawa insay Chayniz ɛn Amis. So if ɛnibɔdi bin de dawt wi, i bin tan lɛk se wi de tich di pipul dɛn Chayniz. Frɔm da tɛm de,  Jiova in ɔganayzeshɔn dɔn de yuz buk dɛn insay Amis fɔ ɛp wi brɔda ɛn sista dɛn fɔ lan bɔt Jiova.—Akt 10:​34, 35.

Fɔ lɛk 20 ia, bɔku pɔblisha dɛn nɔ bin de liv di we aw Gɔd want. Bikɔs dɛn nɔ bin rili ɔndastand Baybul prinsipul dɛn, sɔm pan dɛn bin de du mami ɛn dadi biznɛs di we aw Gɔd nɔ want, dɛn bin de chak, dɛn bin de smok, ɛn dɛn bin de cham wan tin we dɛn kɔl betel nut. Avi bin go na bɔku kɔngrigeshɔn dɛn fɔ tray fɔ ɛp di pɔblisha dɛn fɔ ɔndastand aw Jiova de si dɛn tin ɛn de. Na wan pan dɛn trip dɛn de wi bin tɔk bɔt na di atikul in biginin.

Di wan dɛn we bin ɔmbul bin gri fɔ chenj, bɔt bɔku nɔ bin gri fɔ chenj. Ɛn bikɔs ɔf dat, insay 20 ia di pɔblisha dɛn na Taywan bin ridyus frɔm ova 2,450 to lɛk 900. Dis bin rili mek wi at pwɛl. Bɔt wi bin no se Jiova nɔ go blɛs in pipul dɛn if dɛn nɔ de du tin we klin na in yay. (2 Kɔr. 7:​1) Afta sɔm tɛm, di pɔblisha dɛn bigin fɔ sav Jiova di rayt we, ɛn wit Jiova in blɛsin, naw Taywan gɛt pas 11,000 pɔblisha dɛn.

Frɔm 1980, wi si se di brɔda ɛn sista dɛn na di Amis kɔngrigeshɔn dɛn de go bifo pan Gɔd biznɛs, ɛn Avi bin ebul fɔ spɛn mɔ tɛm wit di Chayniz pipul dɛn. I bin gladi fɔ ɛp bɔku sista dɛn man dɛn fɔ bi Jiova Witnɛs. A mɛmba we i tɔk se i bin rili gladi we wan pan di man dɛn bin pre to Jiova fɔ di fɔs tɛm. Misɛf gladi fɔ we a bin ebul fɔ tich bɔku uman dɛn fɔ lan bɔt Jiova. A bin ivin gɛt di chans fɔ wok wit wan mi Baybul studɛnt in bɔypikin ɛn galpikin na di Taywan branch.

Naw, mi man dɔn day. Mi ɛn Avi bin mared fɔ lɛk 59 ia. I bin gɛt kansa, ɛn i day Janwari 1, 2010. I bin spɛn lɛk 60 ia na fultaym savis! A stil de mis am. Bɔt a bin rili gladi fɔ sɔpɔt am fɔ wok na tu fayn fayn kɔntri dɛn. Wi bin lan fɔ tɔk, ɛn fɔ Avi i bin ivin lan fɔ rayt tu Eshian langwej dɛn we nɔ izi fɔ tɔk.

Afta lɛk 4 ia, di Gɔvnin Bɔdi bin disayd se bikɔs a dɔn ol, i go fayn fɔ mek a kam bak na Ɔstrelia. We dɛn tɛl mi dat, fɔs a bin tink to misɛf se, ‘A nɔ want fɔ kɔmɔt na Taywan.’ Bɔt Avi bin dɔn mek a lan se a nɔ fɔ ɛva se nɔ to Jiova in ɔganayzeshɔn, so a nɔ bin du dat. Leta, a bin kam fɔ si se di tin we dɛn disayd mek sɛns.

Naw, a de wok na di Ɔstraleshia branch insay di wik, ɛn a de prich wit wan kɔngrigeshɔn insay di wikɛnd. We a de wok na Bɛtɛl, a kin gladi fɔ tɔk Jepaniz ɛn Chayniz we a de du tɔ. Bɔt a de wet fɔ di tɛm we di wan dɛn we dɔn day go gɛt layf bak. A no se Jiova de mɛmba Avi we bin lan nɔ fɔ ɛva se nɔ to Jiova.—Jɔn 5:​28, 29.