ဟၣ်​ဖံၤ​န့ၣ်​ အ​ဒီပုၢ်ဝဲၢ်​ခွါ​အိၣ်​လွံၢ်ဂၤ ဒီး​အမ့ၢ်​ပှၤ​ဝဲၢ်ကိ​လီၤ. အ​ဟံၣ်ဖိ​ဃီဖိ ဒိးန့ၢ်​တၢ်မ့ၢ်​တၢ်တီ​လၢ Midland Junction လၢ​အီးစတြ့လံယါ အ​မုၢ်နုာ်​တခီ​လီၤ. Midland Junction န့ၣ်​ လၢညါ​မ့ၢ်တ့ၢ်​ဝဲ ဝ့ၢ်​တဖျၢၣ်​လီၤ. က​​ဘၣ်​ဖဲ ၁၉၃၀ နံၣ်​ စံပွါယ့​​လီၤ​အဆၢ​ကတီၢ်​လီၤ. ဟၣ်​ဖံၤ​သ့ၣ်ညါ​ထီၣ်​ယဟိဝၤ​ယွၤ ဒီး​အ​ဒိး​ဘျၢထံ​ဖဲ အသး​အိၣ်​ ၁၄ နံၣ်​န့ၣ်​လီၤ. ဖဲ​အ​ဝဲ​ဒိးန့ၢ်​တၢ်မ့ၢ်​တၢ်တီ ဝံၤ​တယံာ်ဒံး​ဘၣ်​န့ၣ်​ အ​ဒိးန့ၢ်​ဘၣ်​ဝဲ မူဒါ​တခါ​လၢ တၢ်​အိၣ်ဖှိၣ်​အ​ပူၤ​လီၤ. ဘၣ်ဆၣ်​ အ​ဂ့ၢ်လိာ်​ကွံာ်​ဝဲ​လီၤ. ဒီး​ပှၤ​ဟ့ၣ်​လီၤ​အီၤ​မူဒါ​လၢ အ​က​ဖး​ဝဲ တၢးထီခိးတၢ် လၢ​တၢ်​အိၣ်ဖှိၣ်​အ​ပူၤ ဒီး​အ​ဆိကမိၣ်​​ဝဲ​လၢ အ​တ​တုၤထီၣ်​ထီၣ်ဘး​ဘၣ်​ အဃိ အ​ဂ့ၢ်လိာ်​ကွံာ်​ဝဲ​စ့ၢ်ကီး​လီၤ. ဘၣ်ဆၣ်​ ဒီပုၢ်ဝဲၢ်​ခွါ​တဂၤ တဲသကိး​တၢ်​ဒီး​အီၤ ဒီး​တဲ​ဘၣ်​အီၤ​လၢ “ဖဲ​ယဟိဝၤ​ယွၤ​အ​တၢ်​ကရၢကရိ မ့ၢ်​ဟ့ၣ်​လီၤ​နၤ​မူဒါ တခါဂ့ၤ​တခါဂ့ၤ​အခါ အဝဲသ့ၣ်​ထံၣ်​ဝဲ​လၢ န​တုၤထီၣ်​ထီၣ်ဘး​လံ.”—၂ ကရံၣ်သူး ၃:၅.

ယ​မၤလိ​န့ၢ် တၢ်မ့ၢ်​တၢ်တီ​လၢ ကီၢ်အဲကလံး​အ​ပူၤ​လီၤ. ယ​မိ​ဒီး​ယ​နီ​စ့ၢ်ကီး ဒိးန့ၢ်​တၢ်မ့ၢ်​တၢ်တီ​လီၤ. မ့မ့ၢ်​ယ​ပါ​န့ၣ်​ လၢခံ​မး အ​စးထီၣ်​တူၢ်လိာ်ဝဲ တၢ်မ့ၢ်​တၢ်တီ​လီၤ. ဘၣ်ဆၣ်​ အ​ခီၣ်ထံး​ခါ​ဒု အ​ထီဒါ​ပှၤ သပှၢ်​ကတၢၢ်​လီၤ. အ​ဝဲ​ထီဒါ​ပှၤ​သနာ်က့ ဖဲ​ယ​အိၣ်​ခွံ​နံၣ်​ဘျဲၣ်​အခါ ယ​ဒိး​ဘျၢထံ​လီၤ. ယ​ပာ်​လီၤ​ဖီတၢၣ်​လၢ ယ​က​မၤ​ပှၤ​လဲၤလၢညါ​ဒီး ယ​က​ကဲထီၣ်​မံးၡ့ၣ်နရ့ၣ်​တဂၤ​လီၤ. ဘၣ်ဆၣ်​ ယ​သး​နံၣ်​မ့ၢ်​တ​ပှဲၤထီၣ်​ ၂၁ ဒံး​​ဘၣ်​န့ၣ်​ ယ​ပၢ်​တ​ဟ့ၣ်​ယၤ​ အခွဲး​လၢ ယ​က​မၤ​ပှၤ​လဲၤလၢညါ​ဘၣ်. အဃိ ယ​​ဘၣ်​အိၣ်ခိး​တုၤလၢ​န့ၣ်​ညါ​ဒု ယ​အိၣ်ခိး​တကဲ​ဘၣ်. ဘၣ်ဆၣ်​ ဖဲ​ယ​သး​နံၣ်​ပှဲၤထီၣ်​ ၁၆ အခါ ယ​လဲၤ​အိၣ်ဒီး​ယ​နီ​လၢ ကီၢ်အီးစတြ့လံယါ​လီၤ. ဖဲ​ယ​သး​နံၣ်​အိၣ်​ ၁၈ နံၣ်​န့ၣ်​ ယ​စးထီၣ်​မၤ ပှၤ​လဲၤလၢညါ​လီၤ.

လၢ​ကီၢ်အီးစတြ့လံယါ​န့ၣ်​ ယ​ထံၣ်​လိာ်သး​ဒီး ဒီပုၢ်ဝဲၢ်​ခွါ​ဟၣ်​ဖံၤ​လီၤ. ပ​ဝဲ​ခံဂၤလၢာ် ပ​အဲၣ်ဒိး​မၤ ယဟိဝၤ​ယွၤ​အ​တၢ်မၤ ဒ်​မံးၡ့ၣ်နရ့ၣ်​အသိး​လီၤ. ပ​ဖျီ​ပသး​ဖဲ ၁၉၅၁ နံၣ်​န့ၣ်​လီၤ. ဖဲ​ပ​မၤ​ပှၤ​လဲၤလၢညါ ခံ​နံၣ်​ဝံၤ​အလီၢ်​ခံ ပှၤ​မၢ​ပ​မၤ​ကဝီၤ​အ​တၢ်မၤ​လီၤ. မ့ၢ်​လၢ​ကဝီၤ​အ​တၢ်မၤ​လၢ ကီၢ်အီးစတြ့လံယါ အ​မုၢ်နုာ်​တခီ​န့ၣ်​ တၢ်လီၢ်​လဲၢ်​မး​အဃိ ပ​က​​ဘၣ်​လဲၤ​နီကါ လၢ​တၢ်လီၢ်​ဃ့ထီ ဒီး​တၢ်လီၢ်​လၢ​အ​အိၣ်ယံၤ​ဒီး ဝ့ၢ်​တဖၣ်​န့ၣ်​လီၤ.

ဖဲ ၁၉၅၄ နံၣ်​န့ၣ်​ ပှၤ​ကွဲမုာ်​ပှၤလၢ ပ​က​လဲၤထီၣ်​ဘၣ်​ ကံးလဧး​ကၠိ​လၢ အ​ပှဲၤထီၣ်​ ၂၅ ဝီ​တဝီ​န့ၣ်​လီၤ. ပ​တၢ်​မုၢ်လၢ်​လၢ ပ​က​ကဲထီၣ်​ဘၣ်​ မံးၡ့ၣ်နရ့ၣ်​န့ၣ်​ ဟဲ​လၢထီၣ်​ပှဲၤထီၣ်​​ဝဲ​လီၤ. ပ​လဲၤ​ဒိး​ကဘီ​တုၤလၢ နူယီး​ဒီး ပ​စးထီၣ်​ထီၣ်​ဝဲ​လံာ်စီဆှံ​ကၠိ​လီၤ. လၢ​ကံးလဧး​အ​ကၠိ​န့ၣ်​ ပ​​ဘၣ်​မၤလိ​ဝဲ စပဲနံး​အကျိာ်​လီၤ. ဒီး​ကျိာ်​အံၤ​ကီဒိၣ်မး​လၢ ဒီပုၢ်ဝဲၢ်​ခွါ​ဟၣ်​ဖံၤ​အဂီၢ် ခီဖျိ​လၢ အ​ဖး​သီၣ်ဝဲ R’s အ​ကလုၢ်​တ​သ့​​ဘၣ်​အဃိ​လီၤ.

ဖဲ​ပ​ထီၣ်​ကၠိ​အခါ ပှၤ​သိၣ်လိ​တၢ်​တဖၣ်​ဒုး​သ့ၣ်ညါ​ဝဲ ပှၤလၢ​အသး​အိၣ်​ ဟံးထီၣ်​မူဒါ​လၢ ကီၢ်​ယပၣ်​တဖၣ်​ က​လဲၤ​ဆဲး​လီၤ​အ​မံၤ​လၢ က​မၤလိ​ယပၣ်​အကျိာ်​လီၤ. ပ​ဃုထၢ​လၢ ယဟိဝၤ​ယွၤ​အ​တၢ်​ကရၢကရိ က​ရဲၣ်ကျဲၤ​န့ၢ်​ဝဲ​လၢ​ပဂီၢ်​လီၤ. ဖဲ​န့ၣ်​ဝံၤ​အလီၢ်​ခံ ဒီပုၢ်ဝဲၢ်​ခွါ အဲလ်ဘၢၣ်​ စိဒၢၤ လၢ​အမ့ၢ်​ပှၤ​သိၣ်လိ ကံးလဧး​ကၠိ​တဂၤ ထံၣ်​ဝဲ​လၢ ပ​တ​လဲၤ​ဆဲး​လီၤ​ပ​မံၤ​ဒံး​ဘၣ်. အဃိ အ​ဝဲ​တဲ​ဘၣ်​ပှၤလၢ “ဆိကမိၣ်​ထံ​အီၤ​သၢၤ.” ခီဖျိ​လၢ ပ​ထုးယံာ်​ထုး​နီၢ်သး​အဃိ ဒီပုၢ်ဝဲၢ်​ခွါ​တဲ​ဝဲ​လၢ “ယၤ​ဒီး​ပှၤ​သိၣ်လိ​တၢ်ဖိ​အဂၤ​တဖၣ်​န့ၣ်​ ပ​ကွဲး​လီၤ​န့ၢ်​သု​မံၤ​ဝံၤ​လံ. ခိးကွၢ်​ထံၣ်, မ့ၢ်​သု​တဲ​ယပၣ်​အကျိာ်​က​​ဘၣ်​ကၠ့ၤ​ဧါ.” ဒီပုၢ်ဝဲၢ်​ခွါ​ဟၣ်​ဖံၤ မၤလိ​​ဝဲ​ကျိာ်​အံၤ ညီ​ဒိၣ်န့ၢ်​ဒံး စပဲနံး​အကျိာ်​လီၤ.

ပ​လဲၤ​တုၤလၢ ကီၢ်​ယပၣ်​ဖဲ ၁၉၅၅ နံၣ်​ လၢ​ထံကီၢ်​အံၤ​အ​ပူၤ​န့ၣ်​ ပှၤ​စံၣ်တဲၤ​တဲ​လီၤ​တၢ်ဖိ အိၣ်​ထဲ​အဂၤ ၅၀၀ လီၤ. ဒီပုၢ်ဝဲၢ်​ခွါ​ဟၣ်​ဖံၤ​န့ၣ်​ အိၣ်​ ၂၆ နံၣ်​ ဒီး​ဖဲ​န့ၣ်​ယ​အိၣ်​ထဲ ၂၄ နံၣ်​ဒံး​လီၤ. ပ​​လီၤ​​ဘၣ်​မူဒါ​လၢ ဝ့ၢ်​ခိ​ဘံ ဒီး​ပ​မၤ​ကစၢ်​ယွၤ​တၢ်မၤ​ဖဲ​န့ၣ်​ လွံၢ်​နံၣ်​လီၤ. ဝံၤဒီး ပှၤ​မၢ​ပ​က့ၤ​မၤ​ကဒါ​လၢ ကဝီၤ​အ​တၢ်မၤ​လၢ​အဘူး​ဒီး ဝ့ၢ်​နါ​ကိၤ​ယၤ​လီၤ. ပအိၣ်​ဖဲ​န့ၣ်​မုာ်မး ခီဖျိ​လၢ​ဒီပုၢ်ဝဲၢ်​မုၣ်​ခွါ, တၢ်အီၣ်​တၢ်အီ ဒီး​တၢ်လီၢ်​ဖဲ​န့ၣ်​တဖၣ်​ ပ​ကၠဲး​အီၤ​ဒိၣ်မး​အဃိ​လီၤ. တယံာ်​ဘၣ်​န့ၣ်​ ပ​ဒိးန့ၢ်​ဘၣ်​က​ဒီး တၢ်ခွဲး​တၢ်ယာ်​အဂၤ​တခါ​လၢ ပ​ဂ့ၢ်လိာ်​ယဟိဝၤ​ယွၤ​တ​သ့​​ဘၣ်​လီၤ.

ဖဲ​ပ​မၤ​ကဝီၤ​အ​တၢ်မၤ သၢ​နံၣ်​ဝံၤ​အလီၢ်​ခံ ယပၣ်​အ​ဝဲၤတြၢ်​မၢ ပ​လဲၤ​မၤစၢၤ​တၢ်​လၢ ထဲၣ်ဝၣ်​ လၢ​ပှၤ​အါမံး(စ်)ဖိ ကလုာ်ဒူၣ်​အကျါ​လီၤ. ဒီပုၢ်ဝဲၢ်​အါမံး(စ်)ဖိ​တနီၤ ကဲထီၣ်​​ဝဲ​ပှၤလၢ​အ​ထီဒါ​က့ၤ တၢ်မ့ၢ်​တၢ်တီ​အဃိ ထဲၣ်ဝၣ်​အ​ဝဲၤတြၢ်​လိၣ်ဘၣ်​ ပ​ဒီပုၢ်ဝဲၢ်​ခွါ​လၢ အ​ကတိၤ​ယပၣ်​အကျိာ် ဒ်သိး​က​ပတုာ်​ကွံာ်ဝဲ ပှၤလၢ​အ​ထီဒါ​က့ၤ တၢ်မ့ၢ်​တၢ်တီ​သ့ၣ်​တဖၣ်​အံၤ​လီၤ. *​  ပ​မၤ​တၢ်မၤ​လၢ ကီၢ်​ယပၣ်​န့ၣ်​မုာ်​ဒိၣ်မး အဃိ ပ​က​ဟံးထီၣ်​ဖီၣ်ထီၣ်​ မူဒါ​အသီ​န့ၣ်​ ကီ​လၢ​ပဂီၢ်​ဒိၣ်မး. ဘၣ်ဆၣ်​ ဒီပုၢ်ဝဲၢ်​ခွါ​ဟၣ်​ဖံၤ သ့ၣ်ညါ​​ဝဲ​လၢ ပ​တ​ကြၢး​ဂ့ၢ်လိာ်​ကွံာ် ပ​မူဒါ​အသီ​အံၤ​​ဘၣ်​အဃိ ပ​တူၢ်လိာ်​ဝဲ​မူဒါ​အသီ​အံၤ​လီၤ.

ပ​လဲၤ​တုၤလၢ ထဲၣ်ဝၣ်​ ဖဲ​လါနိၣ်ဝ့ဘၢၣ် ၁၉၆၂ နံၣ်​လီၤ. ဖဲ​န့ၣ်​အဆၢ​ကတီၢ် ထဲၣ်ဝၣ်​န့ၣ်​ ပှၤ​စံၣ်တဲၤ​တဲ​လီၤ​တၢ်ဖိ အိၣ်​ဝဲ​ထဲ ၂,၂၇၁ ဂၤ ဒီး​အဝဲသ့ၣ်​အါတက့ၢ်​မ့ၢ်ဝဲ ပှၤ​အါမံး(စ်)ဖိ​လီၤ. အဆိ​ကတၢၢ် ပ​​ဘၣ်​မၤလိ​ဝဲ တရူး​အကျိာ်​လီၤ. ပ​က​မၤလိ တရူး​ကျိာ်​အဂီၢ်​န့ၣ်​ ပအိၣ်​ထဲ​တရူး​လံာ်​တဘ့ၣ်​ဧိၤ ဒီး​ပှၤလၢ​အ​သိၣ်လိ​ပှၤ တရူး​အကျိာ်​တဂၤ​န့ၣ်​ အ​တဲ​ကီၤလၤဝါ​ကျိာ် တ​ဘၣ်​စ့ၢ်ကီး​ဘၣ်. သနာ်က့ ပ​မၤလိ​​ဝဲ​လီၤ.

ဖဲ​ပ​လဲၤ​တုၤလၢ​ထဲၣ်ဝၣ်​ဒီး တယံာ်​ဘၣ်​န့ၣ်​ ဒီပုၢ်ဝဲၢ်​ခွါ​ဟၣ်​ဖံၤ ဒိးန့ၢ်​ဘၣ်​ဝဲ မူဒါ​လၢ​ဝဲၤတြၢ်​န့ၣ်​လီၤ. ဒီး​ဝဲၤတြၢ်​န့ၣ်​ ဆံး​ဝဲ​အဃိ ဒီပုၢ်ဝဲၢ်​ခွါ​ဟၣ်​ဖံၤ ဖီၣ်ထီၣ်​​ဝဲ​မူဒါ​ဒီး ​ဘၣ်​ကွၢ်ထွဲ​စ့ၢ်ကီး ပှၤ​အါမံး(စ်)ဖိ ဒီပုၢ်ဝဲၢ်​တဖၣ်​ တလါ​သၢ​နွံ​ညါ​လီၤ. တကးဒံးဘၣ်​ အ​ဝဲ​​ဘၣ်​ကွၢ်ထွဲဝဲ ကဝီၤ​အ​တၢ်မၤ​စ့ၢ်ကီး​လီၤ. အ​ဝဲ​​ဘၣ်​ဟ့ၣ်​ဝဲ တၢ်​စံၣ်တဲၤ​တဲ​လီၤ​တၢ်​လၢ ကဝီၤ​အ​တၢ်​အိၣ်ဖှိၣ်​တဖၣ်​လီၤ. ဒီပုၢ်ဝဲၢ်​ခွါ​ဟၣ်​ဖံၤ ဟ့ၣ်​လီၤ​တၢ်​စံၣ်တဲၤ​တဲ​လီၤ​တၢ်​လၢ ယပၣ်​အကျိာ် ဒီး​ပှၤ​အါမံး(စ်)ဖိ ဒီပုၢ်ဝဲၢ်​တဖၣ်​နၢ်ပၢၢ်​​ဝဲ​လီၤ. ဘၣ်ဆၣ်​ ပဒိၣ်​ပပှၢ်​တဖၣ်​ ဟ့ၣ်​​ဝဲ​အခွဲး​လၢ တၢ်ဘူၣ်​တၢ်ဘါ​တဖၣ်​ က​​ဘၣ်​အိၣ်ဖှိၣ်​ရိဖှိၣ်​ထဲ​လၢ တရူး​အကျိာ်​လီၤ. မ့ၢ်​လၢ ဒီပုၢ်ဝဲၢ်​ခွါ​ဟၣ်​ဖံၤ တဲ​ဝဲ​တရူး​အကျိာ်​တဘၣ်​ ဂ့ၤဂ့ၤ​ဒံး​​ဘၣ်​အဃိ ဖဲ​အ​ဟ့ၣ်​တၢ်​စံၣ်တဲၤ​တဲ​လီၤ​တၢ်​လၢ တရူး​အကျိာ်​အခါ ဒီပုၢ်ဝဲၢ်​ခွါ​တဂၤ ကျိာ်ထံ​က့ၤ​ဝဲ​လၢ အါမံး(စ်)အကျိာ်​လီၤ.

ဖဲ​န့ၣ်​အဆၢ​ကတီၢ် ထဲၣ်ဝၣ်​အိၣ်​လၢ Martial law တၢ်ဘျၢ​အ​ဖီလာ်​အဃိ ဒီပုၢ်ဝဲၢ်​တဖၣ်​ က​မၤ​ကဝီၤ​တၢ်​အိၣ်ဖှိၣ်​အဂီၢ် က​​ဘၣ်​ဃ့​ထီၣ်​ဝဲ​အခွဲး​လီၤ. အဝဲသ့ၣ်​က​ဒိးန့ၢ်​ဘၣ်​အခွဲး​အဂီၢ် တ​ညီ​ဝဲ​ဘၣ်. ညီနုၢ်​န့ၣ်​ ပလံး​သ့ၣ်​တဖၣ်​ ထုးယံာ်​ထုး​နီၢ်​တၢ်​ဆၢကတီၢ်​ဒီး တ​ဟ့ၣ်​လီၤ​​ဝဲ​အခွဲး​ညီ​ညီ​ဘၣ်. ပလံး​သ့ၣ်​တဖၣ်​ မ့ၢ်​တ​ဟ့ၣ်​​ဝဲ​အခွဲး​ဖဲ တၢ်​အိၣ်ဖှိၣ်​ဖးဒိၣ်​အ​နွံ​​ဘၣ်​န့ၣ်​ ဒီပုၢ်ဝဲၢ်​ခွါ​ဟၣ်​ဖံၤ က​လဲၤ​လၢ​ပလံး​အ​ရူ ဒီး​က​ဆ့ၣ်နီၤ​အိၣ်ခိး​​ဝဲ​တုၤလၢ အဝဲသ့ၣ်​ဟ့ၣ်​​ဝဲ​အခွဲး​တထံၣ်​လီၤ. ညီနုၢ်​ပလံး​သ့ၣ်​တဖၣ်​န့ၣ်​ ဖဲ​ကီၤလၤဝါ​ဟဲ​ဆ့ၣ်နီၤ အိၣ်ခိး​တၢ်​လၢ အဝဲသ့ၣ်​အ​ရူ​မဲာ်ညါ​အခါ အဝဲသ့ၣ်​မဲာ်ဆှး​အဃိ ကရီ​ဟ့ၣ်​လီၤ​​ဝဲ​လံာ်​အုၣ်သး​န့ၣ်​လီၤ.

ဖဲ​ပ​လဲၤ​ထံၣ်​လိာ်သး​ဒီး ဒီပုၢ်ဝဲၢ်​တဖၣ်​အခါ ညီနုၢ်​ယံာ်ဝဲ တဘျုး​နွံ​ညါ​လီၤ. ဖဲ​န့ၣ်​ ပ​​ဘၣ်​ဟး​လၢ​ပ​ခီၣ်​ ယံာ်​ဝဲ​တ​နၣ်ရံၣ်​ဘျဲၣ်​ညါ. တကးဒံးဘၣ်​ ပ​​ဘၣ်​ထီၣ်​ကစၢၢ် ဒီး​ခီဂာ်​ထံကျိ​တဖၣ်​လီၤ. ယ​နီၣ်ဘၣ်က့ၤ​ဖဲ ယ​ထီၣ်​ကစၢၢ်​အဆိ​ကတၢၢ်​တဘျီ​အခါ​လီၤ. ပ​ကရီ​အီၣ်​ဂီၤခီ​တၢ်အီၣ်​ဝံၤ ပ​လဲၤ​ဒိးထီၣ်​ဘၢး(စ်)ကါ ဖဲ​ဂီၤခီ ၅:၃၀ ဒီး​ဒ်သိး​ပ​က​လဲၤ​တုၤလၢ​သဝီ​အဂီၢ် ပ​​ဘၣ်​လဲၤ​ခီဂာ်​ဝဲ​ထံကျိ ဒီး​လဲၤထီၣ်​ကစၢၢ်​လၢ​ပ​ခီၣ်​ဒံး​လီၤ. ကစၢၢ်​လၢ​ပ​​ဘၣ်​လဲၤထီၣ်​အီၤ​န့ၣ်​ အိၣ်​ထီၣ်​ထူၣ်​ဒိၣ်မး​အဃိ ဒီပုၢ်ဝဲၢ်​လၢ​အ​လဲၤထီၣ်​လၢ​ယ​မဲာ်ညါ​န့ၣ်​ အ​ခီၣ်​အိၣ်​ဝဲ​လိၤလိၤ​ဒီး ယ​မဲာ်သၣ်​လီၤ.

ဖဲ​တၢ်​တ​ဂီၤ​န့ၣ်​ ဒီပုၢ်ဝဲၢ်​ခွါ​ဟၣ်​ဖံၤ မၤ​သကိး​တၢ်​ဒီး လီၢ်ကဝီၤ​ဒီပုၢ်ဝဲၢ်​တနီၤ​လၢ တၢ်​စံၣ်တဲၤ​တဲ​လီၤ​တၢ်မၤ​အ​ပူၤ​လီၤ. မ့မ့ၢ်​ယၤ​န့ၣ်​ ယ​လဲၤ​စံၣ်တဲၤ​တဲ​လီၤ​တၢ်​လၢ သဝီ​ဆံး​ဆံး​ဖိ​တဖျၢၣ်​အ​ပူၤ ထဲ​တဂၤဧိၤ​လီၤ. ဖဲ​န့ၣ်​ ပှၤ​တဲ​ယပၣ်​အကျိာ်​အိၣ်​ဝဲ​လီၤ. ဘၣ်ဆၣ်​ ဖဲ​မုၢ်​ဃ့ၢ်​​လီၤ​တ​နၣ်ရံၣ်​တီတီ​န့ၣ်​ ယ​တူၢ်​ဘၣ်​လၢ ယ​လီၤဘဲ​ဒီး​ယ​ဂံၢ်​တအိၣ်​လၢၤဘၣ်. မ့ၢ်​လၢ​ယ​တ​အီၣ်​​ဘၣ်​တၢ်အီၣ်​ န့ၢ်​ဝဲ​တဘျုး​နၣ်ရံၣ်​လံ​အဃိ​လီၤ. ဖဲ​ယ​ထံၣ်​လိာ်သး​ဒီး​ယဝၤ​အခါ ဒီပုၢ်ဝဲၢ်​တအိၣ်​လၢ​ပ​ခိၣ်​ပဃၢၤ​နီ​တဂၤ​ဘၣ်. ဖဲ​န့ၣ်​အဆၢ​ကတီၢ် ယဝၤ​ဆီတလဲ​ဝဲ မဲးကစံ​တနီၤ​ဒီး ဆီဒံၣ်​သံ​သိ​သၢဖျၢၣ်​လီၤ. အ​ဝဲ​ပၠး​ယၤ​လၢ ယ​က​​ဘၣ်​အီၣ်​ ဆီဒံၣ်​သံ​သိ​ဒ်လဲၣ်​ဒီး အ​မၤ​ဖျိ​​ဝဲ​ဆီဒံၣ်​အ​ခိၣ်ထိး​တစဲး ဒီး​တ​ကျီၤ​​လီၤ​လၢ​အ​ကိာ်​ပူၤ​န့ၣ်​လီၤ. ယ​မ့ၢ်​တဲ​တီတီ​န့ၣ်​ ဖျါ​လၢ​အ​တ​ဝံၣ်​ဘၣ်​ ဘၣ်ဆၣ်​ ယ​အီၣ်​ကွၢ်​အီၤ​တဖျၢၣ်​လီၤ. ဒီး​ဆီဒံၣ်​လၢ​အ​အိၣ်တ့ၢ်​တဖျၢၣ်​န့ၣ်​ မ​တဂၤ​က​အီၣ်​​ဝဲ​လဲၣ်. မ့ၢ်​လၢ​ယ​လီၤဘဲ​ဒိၣ်​တလၢ​အဃိ ယ​အီၣ်​​ဝဲ​ဆီဒံၣ်​လၢ အ​အိၣ်တ့ၢ်​​ဝဲ​တဖျၢၣ်​န့ၣ်​လီၤ. ယ​ဘၣ်ယိၣ်​လၢ ယ​မ့ၢ်​သးပ့ၤနီၣ်​ယ​သး​န့ၣ်​ ယဝၤ​စိာ်​​လီၤ​ယၤ​လၢ ကစၢၢ်​ဖီလာ်​တန့ၢ်​ဘၣ်​အဃိ​လီၤ.

​ဘၣ်​တဘျီ ဖဲ​ကဝီၤ​တၢ်​အိၣ်ဖှိၣ်​​ဘၣ်​​ဝဲ​အခါ ယ​ထံၣ်​ဘၣ်​တၢ်ကီ​တၢ်ခဲ​တခါ​လၢ ညီနုၢ်​တ​ကဲထီၣ်​အသး​ကြီကြီ​ဘၣ်. ပ​​ဘၣ်​လဲၤ​အိၣ်​လၢ ဒီပုၢ်ဝဲၢ်​ တဂၤ​အဟံၣ်​ လၢ​အ​အိၣ်​လၢ ဘီမုၢ်ဘျီၣ်ဒိၣ်​အ​ကပၤ​လီၤ. ပှၤ​အါမံး(စ်)ဖိ​တဖၣ်​န့ၣ်​ ပာ်ဒိၣ်​ဝဲ​တၢ်​လုၢ်ထံ​လီၢ်​အဃိ ကဝီၤ​အပှၤကွၢ်တၢ်​အမါ ကတဲာ်​ကတီၤ​န့ၢ်​ပှၤ တၢ်​လုၢ်ထံ​အလီၢ်​တခါ​လီၤ. ခီဖျိ​လၢ ယဝၤ​အ​တၢ်မၤ​အါ​အဃိ အ​ဝဲ​မၢ​ယ​လဲၤ​လုၢ်​ဆိ​ထံ​န့ၣ်​လီၤ. ဒီး​ဒီပုၢ်ဝဲၢ်​မုၣ်​န့ၣ်​ ဟ့ၣ်​လီၤ​ယၤ​ထံစဲၤ​သၢဖျၢၣ်​ ထံ​ကိၢ်​တဖျၢၣ်, ထံ​ချံၣ်​တဖျၢၣ်​ ဒီး​အ​ဝဲ​တဖျၢၣ်​န့ၣ်​ အိၣ်​ဝဲ​ခီလီလီ​လီၤ. ယ​ကမၢ​ကမၣ်​ဒိၣ်မး​လၢ ကဝီၤ​အပှၤကွၢ်တၢ်​အမါ​အံၤ ပာ်​လီၤ​ဝဲဒၣ်​လၢ ဟံၣ်​ချၢ​လိၤလိၤ ဒီး​ဘီမုၢ်ဘျီၣ်ဒိၣ်​အမဲာ်ညါ အဃိ ဒီပုၢ်ဝဲၢ်​မုၣ်​ခွါ​သ့ၣ်​တဖၣ်​ ထံၣ်စိ​နၤ သ့​လိၤ​ညါ. ဒီး​တကးဘၣ်​ န​ကွၢ်စိ​ဒီပုၢ်ဝဲၢ်​မုၣ်​ခွါ​တဖၣ်​လၢ အ​ကတဲာ်​ကတီၤဝဲ တၢ်​အိၣ်ဖှိၣ်​ဖးဒိၣ်​န့ၣ်​ ဖျါ​လိၤ​ညါ​ဒၢး. အဃိ ယ​ဃ့​ဒီပုၢ်ဝဲၢ်​မုၣ်​လၢ က​ဟဲ​စိာ်​န့ၢ်​ယၤ တၢ်​ဘျး​သဒၢ​တၢ်​တဘ့ၣ်​လီၤ. ဒီး​အ​ဝဲ​ဟဲ​စိာ်​န့ၢ်​ယၤ​လၢ ဖျးစတံး​ဖးလဲၢ်​တဘ့ၣ်. ယ​ဆိကမိၣ်​လၢ ယ​မ့ၢ်​လဲၤ​လုၢ်ထံ​လၢ ဟံၣ်​လီၢ်ခံ​န့ၣ်​ ပှၤ​တထံၣ်​ယၤ​နီ​တဂၤ​ဘၣ်. ဘၣ်ဆၣ်​ ထိၣ်​ဒ့ၣ်​တနီၤ ဟဲ​မိာ်ထီၣ်​အခိၣ်​ဒီး ယ​ဆိကမိၣ်​လၢ က​ဟဲ​စိး​ယၤ​လီၤ. ယ​တဲ​လီၤ​ယ​သး​လၢ ‘ဒီပုၢ်ဝဲၢ်​မုၣ်​ခွါ​သ့ၣ်​တဖၣ်​န့ၣ်​ အ​တၢ်မၤ​အါ​အဃိ တမ့ၢ်​လၢ​အဝဲသ့ၣ်​ က​ပာ်သူၣ်​ပာ်သး​​ဝဲ​လၢ ယ​လုၢ်ထံ​ဘၣ်. အဃိ ယ​တ​ဆိကမိၣ်​တၢ် နီတမံၤ​လၢၤဘၣ်’ ဒီး ယ​လုၢ်​က့ၤ​ဝဲ​ထံ​န့ၣ်​လီၤ.

ဒီပုၢ်ဝဲၢ်​ခွါ​ဟၣ်​ဖံၤ သ့ၣ်ညါ​​ဝဲ​လၢ ဒီပုၢ်ဝဲၢ်​အါမံး(စ်)ဖိ​သ့ၣ်​တဖၣ်​ ကဒိၣ်ထီၣ်​ထီထီၣ်​လၢ နီၢ်သး​တခီ​အဂီၢ် ကီဒိၣ်မး​လီၤ. ခီဖျိ​လၢ လံာ်လဲၢ်​လၢ​အဝဲသ့ၣ်​အကျိာ် တအိၣ်​အါအါ​​ဘၣ်​အဃိ​လီၤ. ပှၤ​အါမံး(စ်)ဖိ​အကျိာ်​န့ၣ်​ ပှၤ​သူ​ဝဲ​ကီၤလၤဝါ​လံာ်မဲာ်ဖျၢၣ်​အဃိ ညီ​ဒိၣ်မး​လၢ ပ​က​သိၣ်လိ ဒီပုၢ်ဝဲၢ်​မုၣ်​ခွါ​တဖၣ်​လၢ က​ဖး​​ဝဲ​အ​နီၢ်ကစၢ်​အကျိာ်​လီၤ. တၢ်မၤ​အံၤ​တ​ညီ​ဝဲ​ဘၣ်​ ဘၣ်ဆၣ်​ လၢခံ​ဒီပုၢ်ဝဲၢ်​မုၣ်​ခွါ​သ့ၣ်​တဖၣ်​န့ၣ်​ ဖး​​ဝဲ​လံာ်လဲၢ်​လၢ အ​နီၢ်ကစၢ်​အကျိာ်​သ့​ဝဲ​လီၤ. တၢ်​ကရၢကရိ​လံာ်လဲၢ်​လၢ အါမံး(စ်)အကျိာ်​တနီၤ​န့ၣ်​ ပှၤ​စးထီၣ်​ဒိးန့ၢ်​ဘၣ်​အီၤ ဖဲ ၁၉၆၀ နံၣ်​ဘူး​က​ကတၢၢ်​ဒီး တၢးထီခိးတၢ်​လၢ အါမံး(စ်)အကျိာ်​စ့ၢ်ကီး ပှၤ​စးထီၣ်​ရၤ​လီၤ​အီၤ​ဖဲ ၁၉၆၈ နံၣ်​န့ၣ်​လီၤ.

လံာ်လဲၢ်​လၢ တမ့ၢ်​တရူး​ကျိာ်​​ဘၣ်​န့ၣ်​ ပဒိၣ်​ပပှၢ်​တဖၣ်​တ​အဲၣ်​လၢ ပှၤ​က​ရၤ​လီၤ​အီၤ​ဘၣ်. အဃိ ဒ်သိး​တၢ်ကီ​တၢ်ခဲ သု​တ​ကဲထီၣ်​တဂ့ၤ​အဂီၢ် တၢးထီခိးတၢ် လၢ​အါမံး(စ်)အကျိာ်​န့ၣ်​ ​ဘၣ်​တၢ်​ထၢနုာ်​အီၤ​လၢ ကျဲ​အ​ကလုာ်​ကလုာ်​လီၤ. အဒိ, လၢ​တနံၣ်​ဘျဲၣ်​အတီၢ်ပူၤ တၢးထီခိးတၢ် ​ဘၣ်​တၢ်​ထုးထီၣ်​အီၤ​လၢ မဲ​ဒ​ရ့(န်)-အါမံး(စ်)အကျိာ်​ခံ​ကျိာ်​လၢာ် တပူၤဃီ​လီၤ. ပှၤလၢ​အ​အဲၣ်ဒိး​သ့ၣ်ညါ​တၢ်​တဖၣ်​ မ့ၢ်​ဟဲ​ကွၢ်​ဝဲ​ဒီး အဝဲသ့ၣ်​ဆိကမိၣ်​​ဝဲ​လၢ ပ​သိၣ်လိ​ပှၤ​လီၢ်ကဝီၤ​ဖိ​တဖၣ်​လၢ တရူး​အကျိာ်​လီၤ. ဒီး​ဖဲ​န့ၣ်​ဝံၤ​အလီၢ်​ခံ ယဟိဝၤ​ယွၤ​အ​တၢ်​ကရၢကရိ ထုး​ထီၣ်​ဝဲ​လံာ်လဲၢ်​တဖၣ်​ အါမံး(စ်)အကျိာ် ဒ်သိး​က​မၤစၢၤ​ပှၤဂၤ​တဖၣ်​လၢ က​မၤလိ​ဘၣ်​ လံာ်စီဆှံ​တၢ်မ့ၢ်​တၢ်တီ​အဂီၢ်​လီၤ.—မၤတၢ် ၁၀:၃၄, ၃၅.

လၢ​အ​နံၣ်​ခံ​ဆံ​အတီၢ်ပူၤ ဒီပုၢ်ဝဲၢ်​ပှၤ​အါမံး(စ်)ဖိ​အါဂၤ တ​အိၣ်မူ​မၤထွဲ​ဒ် ကစၢ်​ယွၤ​အ​တၢ်ဘျၢ​အိၣ်ဝဲ အသိး​ဘၣ်. ခီဖျိ​လၢ အဝဲသ့ၣ်​တ​နၢ်ပၢၢ်  လံာ်စီဆှံ​အ​တၢ်​ဟံးစု​နဲၣ်ကျဲ ဂ့ၤဂ့ၤ​​ဘၣ်​အဃိ အဝဲသ့ၣ်​တနီၤ​န့ၣ်​ အိၣ်ဒီး​လုၢ်လၢ်​သကဲာ်ပဝး လၢ​အ​တဂ့ၤ, အီ​လုၢ်​ကိ​သံး, အီမိာ်​ဒီး အီၣ်​သဘျုၣ်​န့ၣ်​လီၤ. ဒီပုၢ်ဝဲၢ်​ခွါ​ဟၣ်​ဖံၤ လဲၤ​အိၣ်သကိး​တၢ်​အိၣ်ဖှိၣ်​အါ​ဖျၢၣ်​ ဒီး​ဂုာ်ကျဲးစၢး​မၤစၢၤ ဒီပုၢ်ဝဲၢ်​မုၣ်​ခွါ​သ့ၣ်​တဖၣ်​ ဒ်သိး​က​နၢ်ပၢၢ်ထီၣ်​ ယဟိဝၤ​ယွၤ​အ​တၢ်ထံၣ်​လၢ တၢ်ဂ့ၢ်​သ့ၣ်​တဖၣ်​အံၤ​အ​ဖီခိၣ်​လီၤ. ပ​ထံၣ်​ဘၣ်​ဒီး တၢ်အိၣ်သး​တခါ ဒ်​တၢ်​လဲၤခီဖျိ​လၢ ယ​တဲဖျါထီၣ်​အီၤ​လၢ အ​ခီၣ်ထံး​အသိး​လီၤ.

ဒီပုၢ်ဝဲၢ်​လၢ​အ​အိၣ်ဒီး တၢ်ဆီၣ်​လီၤသး​သ့ၣ်​တဖၣ်​ အဝဲသ့ၣ်​ဆီတလဲ အ​တၢ်အိၣ်မူ​လီၤ. ဘၣ်ဆၣ်​ လီၤသးအုး​ဒိၣ်မး​လၢ ဒီပုၢ်ဝဲၢ်​အါတက့ၢ်​န့ၣ်​ တဆီ​တ​လဲ​အ​တၢ်အိၣ်မူ​ဘၣ်. လၢ​အ​နံၣ်​ ၂၀ အတီၢ်ပူၤ လၢ​ထဲၣ်ဝၣ်​န့ၣ်​ ပှၤ​စံၣ်တဲၤ​တဲ​လီၤ​တၢ်ဖိ အိၣ်​အဂၤ ၂,၄၅၀ န့ၣ်​ အိၣ်​တီၢ်​က့ၤ​ထဲ​အဂၤ ၉၀၀ လီၤ. ပ​ထံၣ်​ဘၣ်​ဒ်အံၤ​န့ၣ်​ ပသး​ဂံၢ်ဘါ​လီၤစၢ်​ဒိၣ်မး​လီၤ. ဘၣ်ဆၣ်​ တၢ်​ကရၢကရိ​လၢ အ​အိၣ်ဒီး​လုၢ်လၢ်​သကဲာ်ပဝး​လၢ အ​တ​ကဆှီ​​ဘၣ်​န့ၣ်​ ပ​သ့ၣ်ညါ​လၢ ယဟိဝၤ​ယွၤ​တ​ဆိၣ်ဂ့ၤ​ဝဲ​ဘၣ်. (၂ ကရံၣ်သူး ၇:၁) လၢခံ လုၢ်လၢ်​သကဲာ်ပဝး လၢ​အ​တဂ့ၤ​​ဘၣ်​သ့ၣ်​တဖၣ်​န့ၣ်​ ​ဘၣ်​တၢ်မၤ​ကဆှီ​ထီၣ်​က့ၤ​အီၤ ကယီ​ကယီ​လီၤ. ခီဖျိ​လၢ ယဟိဝၤ​ယွၤ အ​တၢ်ဆိၣ်ဂ့ၤ​အဃိ ပ​ထံၣ်​ဘၣ်​လၢ မုၢ်မဆါ​တနံၤ​အံၤ လၢ​ထဲၣ်ဝၣ်​န့ၣ်​ ပှၤ​စံၣ်တဲၤ​တဲ​လီၤ​တၢ်ဖိ အိၣ်​ဝဲ​အဂၤ ၁၁,၀၀၀ ဘျဲၣ်လံ​န့ၣ်​လီၤ.

စးထီၣ်​ဖဲ ၁၉၈၀ နံၣ်​န့ၣ်​ ပ​ထံၣ်​ဘၣ်​လၢ ပှၤ​အါမံး(စ်)ဖိ​အ​တၢ်​အိၣ်ဖှိၣ်​ အ​နီၢ်သး​လဲၤထီၣ်​လဲၤထီ​​ဝဲ​လီၤ. ဒီး​ဒီပုၢ်ဝဲၢ်​ခွါ​ဟၣ်​ဖံၤ ဟ့ၣ်​လီၤ​အါထီၣ်​အ​တၢ်​ဆၢကတီၢ်​လၢ ပှၤ​တရူး​ဖိ​အကျါ​လီၤ. အ​ဝဲ​သူၣ်ဆူၣ်​သးဆူၣ်​ဒိၣ်မး​လၢ အ​မၤစၢၤ​ဒီပုၢ်ဝဲၢ်​မုၣ်​လၢ​အဝၤ​တမ့ၢ် ယဟိဝၤ​ပှၤအုၣ်​အသး​သ့ၣ်​တဖၣ်​လီၤ. ယ​ထံၣ်​ဘၣ်​လၢ ယဝၤ​သးခု​ဒိၣ်မး ဖဲ​အ​နၢ်ဟူ​​ဘၣ်​ဝဲ ဒီပုၢ်ဝဲၢ်​မုၣ်​အဝၤ​သ့ၣ်​တဖၣ်​အံၤ ဃ့​ဘါ​ထုကဖၣ်​တၢ်​လၢ ယဟိဝၤ​ယွၤ​အ​အိၣ်​ အဆိ​ကတၢၢ်​တဘျီ​အခါ​န့ၣ်​လီၤ. ယၤ​စ့ၢ်ကီး ယ​သးခု​ဒိၣ်မး​လၢ ယ​မၤစၢၤ​​ဘၣ်​ဟံၣ်ဖိ​ဃီဖိ​အါ​ဒူၣ်​ လၢ​က​သုးဘူး​အသး​ဆူ ယဟိဝၤ​ယွၤ​အ​အိၣ်​လီၤ. ခဲအံၤ ယ​မၤ​သကိး​​ဘၣ်​တၢ်​ဒီး ယ​ပှၤ​မၤလိ​လံာ်စီဆှံ​ဖိ အ​ဖိမုၣ်​ဖိခွါ​တဖၣ်​ လၢ​ထဲၣ်ဝၣ်​အ​ဝဲၤတြၢ်​အဃိ ယ​သးခု​ဒိၣ်မး​လီၤ.

ခဲအံၤ ယ​မၤ​ယဟိဝၤ​ယွၤ​အ​တၢ်မၤ​န့ၣ်​ ယ​သးသမူ​တံၤသကိး တအိၣ်​လၢၤဘၣ်. ဖဲ​ပ​ထီၣ်ပှၢ်​ကအိၣ်​ ၅၉ နံၣ်​ဝံၤ​အလီၢ်​ခံ ယဝၤ​သးဘိ​သံဝဲလီၤ. ဖဲ​လါယနူၤအါရံၤ ၁ သီ, ၂၀၁၀ နံၣ်​န့ၣ်​ ယဝၤ​သံ​လၢ ခဲစၢၣ်​တၢ်ဆါ​အဃိ​လီၤ. ဒီး​အ​ဝဲ​မၤ​ကစၢ်​ယွၤ​အ​တၢ်မၤ လၢ​ဆၢကတီၢ်​လၢပှဲၤ န့ၢ်​ဝဲ​အ​နံၣ်​ဃုဆံ​လီၤ. ယ​သ့ၣ်နီၣ်​​ဘၣ်​အီၤ​ဒိၣ်မး​လီၤ. ဘၣ်ဆၣ်​ ယ​သးခု​ဒိၣ်မး​လၢ ယ​ဆီၣ်ထွဲ​မၤစၢၤ​​ဘၣ်​အီၤ လၢ​ကစၢ်​ယွၤ​အ​တၢ်ဖံး​တၢ်မၤ တနံၤ​​ဘၣ်​တနံၤ​လၢ ထံကီၢ်​ခံဘ့ၣ်​အ​ပူၤ​လီၤ. ဒီး​ပ​တဲ​လိ​​ဘၣ်​ဝဲ အ့ၡၢၣ်​အကျိာ်​လၢ အကီ​ကတၢၢ်​ခံ​ကျိာ်​အံၤ​လီၤ. မ့မ့ၢ်​ယဝၤ​န့ၣ်​ အ​ဘၣ်​ကွဲး​လိ​အသး​စ့ၢ်ကီး​လီၤ.

ဖဲ​စှၤကိာ်​နံၣ်​ဝံၤ​အလီၢ်​ခံ ခီဖျိ​လၢ​ယ​သးပှၢ်​ထီၣ်​အဃိ ပှၤ​ပၢဆှၢတၢ်​ကမံးတံာ် ဆၢတဲာ်​​ဝဲ​လၢ ယ​ဘၣ်က့ၤ​အိၣ်​ကဒါက့ၤ​လၢ ကီၢ်အီးစတြ့လံယါ​လီၤ. အဆိ​ကတၢၢ် ယ​ဆိကမိၣ်​လၢ ‘ယ​တ​အဲၣ်ဒိး​ပာ်တ့ၢ်​ကွံာ် ထဲၣ်ဝၣ်​နီ​တစဲး​ဘၣ်.’ ဘၣ်ဆၣ်​ ယဝၤ​သိၣ်လိ​ယၤ​လၢ ပ​တ​ဘၣ်​ဂ့ၢ်လိာ်​ကွံာ် ယဟိဝၤ​ယွၤ​အ​တၢ်​ကရၢကရိ နီတဘျီ​ဘၣ်. အဃိ ယ​တ​ဂ့ၢ်လိာ်​ကွံာ်​လၢၤဘၣ်. လၢခံ ယ​သ့ၣ်ညါ​​ဘၣ်​လၢ ယ​က့ၤ​အိၣ်​ကဒါက့ၤ​လၢ ကီၢ်အီးစတြ့လံယါ​န့ၣ်​ မ့ၢ်​တၢ်​ဆၢတဲာ်​လၢ အပှဲၤ​ဒီး​တၢ်ကူၣ်သ့​န့ၣ်​လီၤ.

အ​ခဲအံၤ မုၢ်တနံၤ​တုၤလၢ မုၢ်ယဲၢ်နံၤ​န့ၣ်​ ယ​မၤတၢ်​လၢ ကီၢ်အီးစတြ့လံယါ​အ​ဝဲၤတြၢ် ဒီး​မ့မ့ၢ်​လၢ မုၢ်ဃုနံၤ​ဒီး မုၢ်​အိၣ်ဘှံး​နံၤ​န့ၣ်​ ယ​မၤ​သကိး​တၢ်​ဒီး လီၢ်ကဝီၤ​အ​တၢ်​အိၣ်ဖှိၣ်​လီၤ. ဒီး​ယ​သးခု​ဒိၣ်မး​လၢ ယ​ဒိးန့ၢ်​ဘၣ်​တၢ်ခွဲး​တၢ်ယာ်​လၢ ယ​တဲ​ဘၣ်​ယပၣ်​အကျိာ် ဒီး​တရူး​အကျိာ် ဖဲ​ပှၤ​ဟဲဟး​ကွၢ်ကီ​တၢ်​လၢ ဘ့ၤသ့လး​အခါ​န့ၣ်​​လီၤ​. ယ​မ့ၢ်​တဲ​တီတီ​န့ၣ်​ ယ​အိၣ်ခိး​တၢ်​အၢၣ်​လီၤ​ဘၣ်ဃး​ဒီး တၢ်​ဂဲၤ​ဆၢထၢၣ်​သမူထီၣ်​က့ၤ​လီၤ. ဒီပုၢ်ဝဲၢ်​ခွါ​ဟၣ်​ဖံၤ မၤလိ​​ဘၣ်​​ဝဲ​လၢ တၢ်​လၢ​ယဟိဝၤ​ယွၤ​တဲ​အီၤ​န့ၣ်​ အ​တ​ဂ့ၢ်လိာ်​ကွံာ်ဝဲ နီတဘျီ​ဘၣ်. အဃိ ယ​သ့ၣ်ညါ​လၢ ယဟိဝၤ​ယွၤ တ​သးပ့ၤနီၣ်​အီၤ နီတဘျီ​ဘၣ်.—ယိၤဟၣ်​ ၅:၂၈, ၂၉.