Awannyaka, Harvey, phaari oolupale iriyari yaasunnaya acese. Amucyaaya yiitthucile ikhweeli u Midland Junction, ilapo yo Austrália Ocidental, ukati waahuviye cinene ile ilapweele, myaakha 80 uttuli. Awannyaka Harvey yaavira yatepaka unfenta cinene Yehova. Phimaana, ukati waarinaaya myaakha 14, ayo yahopattisiya. Anaryeene mmirawo, ayo yahiitthuca uhikhotta yavahaceriyaka miteko mumphwinkoni wa Yehova. Wootakihera, nihuku nimoca, awannyaka anari mmirawo, munna mmoca ahaalepela usoma irevista Ukhalenla wanlokoni, masi ayo yahokhotta, yiiraka wiira khayaahala ukhitiri kontha khayeetthenkacile. Uyo munnooyo ahowiirela awannyaka co: “Wamoonaka ntthu oovahaceraka nteko mumphwinkoni wa Yehova, uyo ntthuuyo naacuwela wiira weeva unaahala ukhitiri uvara!”—2 Akor. 3:5.

Mi kiitthucile ikhweeli u Inglaterra, wamoca naamaama ni anuunu. Apaapa yiitthucile ikhweeli wahoolo. Wuupaceroni, apaapa khayaaciveliya ni Masaahiti a Yehova, masi wahoolo ayo yahokhala Saahiti a Yehova. Mi kipattisiye kinarina paahi myaakha 9, hataa apaapa wahaacivelaka. Mi kaapheela ukhala piyoneera ni misiyonaariya. Masi apaapa khayaahala ukitthunihera ukhala piyoneera kihinapiiha myaakha 21, ni mi akaapheela uweherera cinene. Phimaana, uwakati waarinaaka myaakha 16, mi kahaalepela apaapa wiira kirwee kakhale naanuunu yaathamenle u Austrália, ni apaapa yahokitthunihera. Vano waapiihilyaaka myaakha 18, mi kahancera uvara nteko weepiyoneeru.

 Kinari u Austrália, mi kahoncuwela Harvey. Uyo ciicammo aapheela ukhala misiyonaariyu. Hi nithelanne mwaakha wo 1951. Uvira waya myaakha miili nivaraka nteko weepiyoneeru, hi naholattuliya wancera uvara nteko wo wootola maloko. Isirikwiitwiihu ilapo yo Austrália Ocidental, yaari yuulupale. Nahaana nirwaaka niikaaro mapuro oottayi, ni uvira mapuro oothwaa maaci ni oohikhaliya naatthu enci.

Mwaakha wo 1954, naholattuliya urwaa usoma icikola yo Gileade, iturma nummeru 25. Itthu yaapheeleehu waari ukhala mamisiyonaariyu, ni iyo yaahanle vakaani wiirannya. Hi naarweele u Nova York mpaketini ni, uphiya wihu, nahancera usoma cinene Ibiiblya. Waasomeehu iyo icikoleeyo, ciicammo naaneetthucihiya wuuluma iluuka espanhol. Awannyaka Harvey wahaarika cinene wiitthuca iyo iluukeeyo. Ayo khayaakhitiri unromola ratta “r”.

Ukati waasomeehu iyo icikoleeyo, mayamunna yaanisomiha yahohimya wiira ale yaahala upheela urwaa uvara nteko u Japão, pooti waayantikhihaaya wiira yancere wiitthucihiya ijaponês. Hi nahohiya wiira mphwinko wa Yehova uthanle nipuro hiiva naahaleehu urwaa uvara nteko. Uvira waya ukati vakaani, munna mmoca aanisomiha eehaniya Albert Schroeder, ahoona wiira hiiva khanaayantikhihile wiira nisomihiye ijaponês. Uyo ahoniirela: “Muupuwelace tootho iyo itthwiiyo.” Masi toothooni khanaayantikhihile. Phimaana, munna Schroeder aheera: “Mi ni mayamunna akiina anoosomihani nihowantikhihani. Mmananihe wiitthuca ijaponês.” Awannyaka khawaarikile wiitthuca iyo iluukeeyo.

Hi naaphiile u Japão mwaakha wo 1955. Ule ukatyuule, u Japão yaarivo anamalalyeera 500 paahi. Harvey aarina myaakha 26 ni mi kaarina myaakha 24. Naarumiye urwaa uvara nteko isittatti yo Kobe. Nahokhala myaakha 4 navaraka nteko nwo. Ni wahonitteela nrima waalattuliyeehu wiira navare-tho nteko wo wootola maloko. Ncoko waavareehu nteko waahowaattamela isittatti yo Nagoya. Citthu cotheene caari comaana: mayamunnaayo, icoolyannyo ni ncokweennyooyo waari wooreeraca. Masi woohipica, naheereliya wiira nirwee navare nteko nipuro nikhwaawe. Uyo ukatyuuyo ciicammo khanankhottenle Yehova.

Uvira waya myaakha miraru navaraka nteko wo wootola maloko, ipeteeli yo Japão yahonilattula wiira nirwee uvara nteko u Taiwan, ncoko waapoovu anooluma iluuka amis. Mayamunna akiina o ule nkocoole, yahohiya weettela ikhweeli ni umananiha waahapusa akhwaaya. Vano aapheeliya munna oocuwela wuuluma ratta ijaponês wiira arwee akavihere umaliha itthu  yaakhumelela. * Hi waanaanicivela cinene nteko waavareehu u Japão; phimaama wahonirika utthuna urwaa u Taiwan. Masi ukhala wiira awannyaka Harvey yahiitthuca uhikhotta miteko caavahaceriyaaya mumphwinko wa Yehova, hiiva nahotthuna..

Hi naaphiile u Taiwan mwaakha wo 1962, mweeri wo Novembro. Ule ukatyuule, u Taiwan yaarivo anamalalyeera 2.271. Enci yaari apoovu anooluma iluuka amis. Itthu yoopacera yaalamuliyeehu upanka, waari wiitthuca ichinês. Wiira niitthuce, naarina ilivuru imoca paahi ni yahaavo athiyana yaaniitthuciha, masi ayo khayoonuma inglês. Waahookhalaru commo, hi nahokhitiri wiitthuca ichinês.

Uphiya wihu u Taiwan, awannyaka Harvey yahovahaceriya uwacera nteko woolalyeera ile ilapweele. Ukhala wiira Ipeteli yaari yankaani, ayo yankhitiri uvara nteko u Peteli ni ciicammo ukhala isumana cookhalaka tthaaru khula mweeri yavaraka nteko ni mayamunna yooluma iluuka amis. Ikwaha cikiina, awannyaka ciicammo yaanootolaka maloko ni yahaana yataphulelaka myaha mmamithukumanoni cosirikwiitu. Unari wiira awannyaka yaataphulela nnyo myahannyo niiluuka japonês, mayamunna yanhala ukhitiri wiiweeha. Masi ule ukatyuule, ikuvernu yaatthuniha upankiya mithukumano cooswaliya niiluuka ichinês paahi. Phimaana, waahookhalaru wiira awannyaka khayaacuweleeha ichinês, ayo yahotaphulela myaha niiyo iluukeeyo ni munna nkiina aanaataphulela niiluuka amis.

Ule ukatyuule, anatoropa phaahoolela ilapo yo Taiwan. Wiira nirwee umithukumanoni cosirikwiitu, hi nahaana nilepelaka itokumentu yaahimya wiira nihotthuniheriya. Waanaarika cinene uvahiya iyo itokumentwiiyo, ni ukati nkiina yaanaavira mahumu menci nihinavahiya. Uhaavo ukati mapoliisiya waapicaaya univaha iyo itukumentwiiyo, mpaka uphiya usumana yo nthumumano wosirikwiitu. Uyo ukatyuuyo, awannyaka Harvey yanrwaa wonkoma upoliisiya ni khayaakhuma mpaka waavahiyaaya. Khula ukati waapankaaya commo, ayo yanvahiya iyo itokumentwiiyo woohipica, kontha mapoliisiya yaanoona ihaaya yamoonaka ntthu ookhuma ilapo ikhwaawe nonkomile upoliisiya.

Isumana caakhaleehu naavaranaka nteko mayamunna yooluma iluuka amis, hiiva naaneettaka iwoora imoca awula upwaha niwelaka myaako ni nilapuwaka myooloko, wiira niphiye mapuro yaarweehu ulalyeera. Mi kinawuupuwela ikwaha yaapacenryaaka uwela mwaako. Nne nihukunne, naalilye vakaani uwicisu. Vano phankeleehu karera yeettaka iwoora 5 ni imunutu 30, wiira nirwee aliteeya oottayi. Naholapuwa mooloko wowaatapuwa ni nahancera uwela mwaako. Uyo mwaakooyo waari wowiinama cinene, mpaka kawehaka uhoolo, kaanoona sana-saana inyaa cawe munna anttharaaka.

Ule uwicisuule, awannyaka Harvey yaalalyeera ni mayamunna o ule ncokoole, ni mi kaalalyeera veekha aliteeya ankaani yaakhala atthu yooluma ijaponês. Uthana, yeettaka iwoora 13, mi khayaakilipa makhuva nlattu wookhala iwoora cinci woohilya. Uwakati waaphiilyaaka nipuro naaryaawa awannyaka, mi kaaphwanyile veekha. Ayo yahokhitiri waakakhaniha irevista ni manyoce mararu oohaapennya. Awannyaka yahocisa nnyoce nimoca ni yahokithoonyera mananna caahalaaka ulya. Ayo yahottemula nnyoce nimoca ni yahancera uwurya. Akonne ukhala itthu yoociva, masi kaholawiha. Vano tipani aahala uwurya nnyoce noneerarunno? Thi mi kaawunrye, kontha awannyaka yenre wiira kacirikhaka nlattu wotala, ayo khayaahala ukhitiri ukikhuruwana ule mwaakoole.

Ikwaha imoca yaarweeleehu wanthukumanoni wosirikwiitu, yahonikhumelela itthu yooteehaca. Hi naalukamile uwannyawe munna mmoca, wowaattamela Isalau yo Umwene. Apoovu anooluma iluuka amis, urapa anwehera ukhala itthu yuulupale. Phimaana, amwaarawe mootoli osirikwiitu yahonitthenkacera nipuro noohala hiiva urapa. Awannyaka Harvey yaari ni nteko mwinci. Phimaana yahokilepela wiira miiva kirwee kapacere urapa. Ukati woorapa, apoovu amis anvarela nteko iparti tthaaru: iparti imoca yo maaci ooririya, ikiina yo maaci ooviha ni ikiineeyo yoohiheliya itthu. Ukati waarweelyaaka urapa, mi kahokhala ootikhinihiya. Amwaarawe mootoli osirikwiitu yaaneesenre maaci vate, nipuro noowehanana Isalau yo Umwene. Ni Usalau yo Umwene yahaavo mayamunna yaatthenkaca nipuro naahala upankiya nthukumano wosirikwiitu. Mi kahaalepela amwaarawe mootoli osirikwiitu wiira akaacime ikortina. Masi ayo yaakiwaanenle plástico owoonnyaaca. Mi kahoopuwela urukunuwela upirothi inupa wiira karape. Masi upirothi inupanwo yahaavo marattha ni kaanoova ukikovola. Vano mi kahiiciirela co: ‘Ala mayamunnaala ari ni nteko mwinci, phimaana khanhala ukoona kirapaka. Ni kaahirapeke, mayamunna khunhala waacivela. Phimaana kinaarapa!’

Awannyaka Harvey yahoona wiira mayamunna enci yooluma iluuka Amis khayoonuwa mminepani kontha khayaacuwela usoma, ni khacaarivo ilivuru niiluukaaya. Ule ukatyuule, iluuka amis yaapacenre wantikhiya phiyaaru. Phimaana, wahoreera uwiitthuciha mayamunna usoma niiluukaaya. Uwiitthuciha usoma niiluuka amis waari nteko mwinci, masi wahoolo, ayo mayamunnaayo yahokhitiri wiitthuca myaha ca Yehova niiluukaaya. Mwaakha wo 1966, cahaavo ilivuru cihu vakaani niiluuka amis. Ni mwaakha wo 1968, yahancera upankiya irevista Ukhalenla.

Masi ikuvernu yankhottiha ilivuru cahantikhiye niichinês. Phimaana, wiira mayamunna ahiiphwanyihe masakha, yahokela upanka irevista Ukhalenla yoluuka amis ni mananna oovirikanaca. Wootakihera, wahovira ukati mwinci nivarelaka nteko irevista Ukhalenla yaakhalana myaha niiluuka piili: ichinês ni amis. Commo, ntthu anikohakohaka, aahala woona toko wiira naamananiha paahi uwiitthuciha ichinês atthu o ule ncokoole. Ukhuma uyo ukatyuuyo, mphwinko woothotokanihiya wa Yehova wahokumihera ilivuru cinci niiluuka amis wiira waakavihere ayo apoovwaayo wiitthuca ikhweeli co mbiibliyani.—Mite. 10:34, 35.

Nhina wo myaakha cinci, yahaavo mayamunna yooluma iluuka amis yaheettela malamulo a Yehova. Nlattu woohiiweeha saana mattharelelo o mbiiblyani, yahaavo mayamunna yaararuwa, yaahapaliya awula yanlya soone ni mwiri uneehaniya bétele. Awannyaka Harvey yahootola maloko menci yamananihaka waakavihera ayo mayamunnaayo wiiweeha mananna Yehova cinweheraawe ayo meettelwaayo. Ikwaha imoca nootoleehu ayo malokwaayo, phuukati uttonkacilyaaka wiipaceroni, waalapuwileehu mooloko navinreene sikolooni phiyaaru.

Mayamunna owiiyeviha yahorukunusa meettelwaaya woohipica, masi wooriipiha nrima, mayamunna enci khayaaphenle urukunusa meettelwaaya. Phimaana, nhina wo myaakha 20 paahi, anamalalyeera yahovukuwa. Wuupaceroni yaari 2.450, masi yaahanle paahi 900. Iyo yaari itthu yooriipiha nrima, masi hi nancuwela wiira Yehova khaahala ucaaliha mphwinko woohiirya. (2 Akor. 7:1) Wahoolo, maloko yahancera unswalela Yehova sana-saana. Yehova hocaaliha, phimaana nna co u Taiwan ahaavo anamalalyeera oopwaha 11.000.

Ukhuma mwaakha wo 1980 mpaka uhoolo, hi nahoona yoonuwaka maloko o mayamunna yooluma iluuka amis. Vano, awannyaka yaanaakhitiri ukhala ukati mwinci yaakaviheraka ale yooluma ichinês. Ayo yankhala ootteeliya cinene yaakaviheraka ukhala Masaahiti a Yehova asiwannyaka asirokorihu enci. Mi kinawuupuwela inanna awannyaka caakhanlyaaya ootteeliya ukati waamwiiwilyaaya ntthu ansomihaaya Ibiiblya anlompaka Yehova ikwaha yoopacera. Ni mi wahokitteela nrima nlattu wo waakavihera atthu enci umpatthanana Yehova. Ni kahokhalana iparakha yoovara nteko u Peteli yo Taiwan wamoca naasaana eeli, nlopwana ni nthiyana, anumwanaya yaasomihaaka Ibiiblya khalayi.

Nna co, mi akirina-tho awannyaka. Uvira waya myaakha 59 ninathelanacile, awannyaka Harvey ahokhwa, nihuku 1 no mweeri wo Janeiro 2010, nlattu wowaawerya iretta yowiipa ineehaniya cancro. Ayo yahokhala myaakha cookhalaka 70 yavaraka nteko wo wiivahereriya ukati wotheene. Mi nanlelo anaakinukhela venci awannyaka, masi unaakitteela nrima nlattu woocuwela wiira kihaakavihera, ninswalelaka Yehova nkhayi ilapo piili cooreera. Niheetthuca wuuluma iluuka piili co Ásia coorikarikaca, ni awannyaka yaheetthuca wantikha iluuka coopiili.

Uvira waya myaakha vakaani awannyaka anakhwile, Mphwinko wo Mahumu Unhoolela wahoona wiira phataari miiva uturuwela u Austrália, ukhala wiira kihooluvala. Wuupaceroni, mi kahoopuwela: ‘Mena, mi akimpheela uthama u Taiwan!’ Masi Harvey ahokiitthuciha uhikhottela mphwinko woothotokanihiya wa Yehova. Phimaana mi akaakhottile. Wahoolo, mi kahoona wiira phataari wahaakhottilyaaka, kontha kaanaahala upheela ukaviheriya.

Nna co, mi kinvara nteko u Peteli yo Australásia ni wuumaleloni isumana, kinaarwaaka wuulalyeerani ni mayamunna o wanlokoni. Kihaana iparakha yoovara nteko u Peteli, kaathoonyeracaka mapuro mayamunna anooluma ijaponês ni ichinês anwa wootola Ipeteli. Kinaapheela cinene wiira uphiye ukati Yehova unhalaawe uwunweleliha ale akhwile! Kinaakupali wiira Yehova naahala uwuupuwela awannyaka Harvey, yahankhottela miteko cawe.—Joau 5:28, 29.