A Harvey n da yaa kãsma, b ba wã kom-dibli a naasã sʋka. A zakã rãmb bãnga sɩdã Miidlãnd Zõnksɩyõ, Ostrali soolmẽ wã. Rẽ tɩ naong meng-meng n da kẽ tẽngã yʋʋmd 1930 tɛka. A Harvey wa n bɩɩme n nong a Zeova. A reega lisg a sẽn wa n tar yʋʋm 14. A wa n bãngame t’a pa segd n zãgs tʋʋm nins b sẽn da kõt-a tigingã pʋgẽ wã ye. A sẽn wa n yaa biigã, daar a ye, a zãgsame t’a pa na n karem Gũusg Gasgã tigsg sasa, n da tagsdẽ t’a minimã pa sek ye. La saam-biig ning sẽn kos-a t’a karmã sõng-a lame t’a tags neere. A yeel-a lame yaa: “A Zeova siglgã pʋgẽ, ned sã n kõ foo tʋʋmde, yaa a sẽn get tɩ fo tara minim tɩ sekã yĩnga.”—2 Kor. 3:5.

Maam ne m ma la m kẽem bi-puglã bãnga sɩdã Ãngeletɛɛre. M baaba wa n saka sɩdã kaoosg zugẽ. La sɩngrẽ wã, a ra pa nong a Zeova Kaset rãmbã ye. M deega lisg tɩ m da pa ta yʋʋm piiga, la pa yɩ m baaba noog ye. M da yãka yam n na n lebg wakat fãa so-pakda, n wa paam n lebg misioneere. La m baaba ra yeelame t’a pa na n sak tɩ m lebg so-pakda, sã n pa m taa yʋʋm 21 ye. M da pa rat n gũ n  kaoos woto ye. M sẽn wa n tar yʋʋm 16, m baaba sakame tɩ m na n tɩ zĩnd Ostrali ne m kẽem bi-puglã sẽn da yik n tɩ vɩ be wã. La m sẽn wa n ta yʋʋm 18, m sɩnga so-pakrã.

Yaa Ostrali la mam seg a Harvey. Tõnd d yiibã fãa ra tʋll n lebga misioneer-dãmba. Yʋʋmd 1951 wã, d kẽe kãadem. D naaga taab n yɩ so-pakdb n kaoos yʋʋm a yiibu. Rẽ poore, b kos-d lame tɩ d gilgd n kaagd tigimsã. D ra segd n gilga Ostrali tẽngã babg a ye sẽn yaa yaleng wʋsgo. Rẽ n so tɩ d ra wae n wẽnd mobill n pasgd we-rasempʋɩɩga, hal n kẽng zĩ-zãrsẽ.

Yʋʋmd 1954, b bool-d-la Galaad lekoll 25 soabã. Ra pa na n yã n kaoos la d raabã sẽn da yaa lebg misioneer-dãmbã paam pidsg ye. D kẽe batayo n kẽng Niuyorke. D sẽn ta wã, d sɩngame n zãmsd Biiblã n zulgdẽ. Lekollã sasa, d ra segd n zãmsa Ɛspayõlle. Ra yaa toog ne a Harvey, bala gom-biis kẽer boolg ra pa nana ne-a ye.

Lekollã sasa, karen-saam-dãmbã yeelame tɩ neb nins sẽn dat tɩ b tʋm-b tɩ b tɩ moond koɛɛgã Zapõ wã tõe n gʋlsa b yʋyã, tɩ b zãms-b zaponeemdo. D yãka yam n na n bas t’a Zeova siglgã wilg tõnd d sẽn segd n kẽng zĩig ningã. Pa yã n kaoos la a Albert Schroeder sẽn yaa Galaad lekollã karen-saamb a ye wã bãng tɩ d pa gʋls d yʋyã ye. A yeela tõnd yaa: “Maneg-y n tags-y neere.” D ra ket n maanda sãmbse, tɩ saam-biig a Schroeder wa yeel yaa: “Maam ne karen-saamb a to wã gʋlsa yãmb yʋyã. Ges-y yãmb sã n na n tõog n zãmsa Zaponeemdã.” Buud-gom-kãng zãmsg yɩɩ nana ne a Harvey.

D kẽnga Zapõ yʋʋmd 1955. Rẽ tɩ koe-moondb 500 bal n be be. A Harvey ra tara yʋʋm 26, tɩ mam tar 24. D tɩ zĩnda Kobe sẽn yaa tẽng sẽn be mogrã noore, n moon koɛɛgã yʋʋm a naase. D sũy yɩɩ noog b sẽn wa n yeel tɩ d le gilgd n kaagd tigimsã. Kɩtame tɩ d tɩ zĩnd zĩig sẽn pẽ Nagoya tẽngã. Bũmb wʋsg n da noom tõnd beenẽ, wala saam-biisã, rɩbdã, la zĩ-neebã. Pa yã n kaoos la d le paam segb n na n maan a Zeova sẽn yeel-d tɩ d maanã ye.

D sẽn gilg n kaag tigimsã yʋʋm a tãab poore, Zapõ filiyallã kos-d lame tɩ d sã n data, bɩ d tɩ zĩnd Taiwan n moon Amis buudã nebã. Sɩdã-kɩɩsdb n da be beenẽ, tɩ ra yaa tɩlɛ tɩ saam-biig sẽn wʋmd zapõneemdã sõma wa  sõng n maneg yellã. * D ra nonga d tʋʋmdã Zapõ. Rẽ n so tɩ ra yaa toog tɩ d yãk yam n yik n kẽng be. La a Harvey sẽn da yãk yam n pa na n tol n yeel a Zeova tɩ ayo wã yĩnga, d sak n kẽngame.

D taa Taiwan yʋʋmd 1962 sɩpaolg kiuugã. Koe-moondbã ra yaa bãmb 2271, tɩ b wʋsgã ra yaa Amis buudã neba. Sɩngrẽ wã, yɩɩ tɩlɛ tɩ d zãms sinoaamdo. D ra tara sebr a yembr bal n get n zãmsdẽ, tɩ d karen-saambã me ra pa wʋmd ãngilind ye. La ne rẽ fãa, d tõog n zãmsa sinoaamdã.

D sẽn ta Taiwan poor bilfu, b yãka a Harvey t’a lebg filiyallã taoor lʋɩta. Ra yaa filiyall-bila. Kɩtame t’a Harvey ra tõe n tʋmd a biru wã tʋʋm sõma, la a paamd sẽk n sõngd Amis buudã saam-biisã semen a tãab kiuug fãa. Wakat n zĩnd tɩ b ra yãkd-a t’a yaa Distrik yel-gɛta, n mi n wɛgsd sõss tigis-kãsemsẽ. A Harvey ra tõe n wɛgsa sõssã ne zapõneemdo, tɩ Amis buudã saam-biisã wʋm a võore. La tẽngã taoor dãmb ra yiisa noor n wilg tɩ tũudmã rãmb segd n maanda b tigissã ne sinoaamd bala. Baa ne a Harvey sẽn da maood n zãmsd sinoaamdã, a wɛgsa sõsgã ne buud-gom-kãnga, tɩ saam-biig a to lebg ne Amis buud-gomdã.

Taiwan tẽngẽ wã, wakat-kãng tɩ ra yaa sodaas n zãad tẽngã, tɩ kɩt tɩ saam-biisã ra segd n deng n kos sore, n yaool n paam n maan b tigis-kãsemsã. Yɩl n paam sorã ra pa nana ye. Sẽn paase, polɩɩs-rãmbã ra basdame tɩ kaoos wʋsgo, tɩ b yaool n kõ sore. Tigis-kãsengã sã n wa ket tɩ semen tɩ b nan pa kõ sore, a Harvey ra mi n tɩ zĩnda polɩɩs-rãmbã biru zĩigẽ, hal tɩ b wa kõ sor tɩ b tõe n maana tigis-kãsengã, t’a yaool n yik n looge. Polɩɩs-rãmbã sẽn da pa rat tɩ sãan zĩnd b biruẽ wã n kaoosã yĩnga, a sẽn da maand woto wã yãkda nenga.

Semen nins tõnd sẽn mi n zĩnd ne saam-biisã, d ra tõe n kẽna sẽn yɩɩd lɛɛre, n dʋ tãmse, la d pasg kʋɩls sẽn pid ne bɛgdo. M ket n tẽra mam sẽn na n dʋ tãng pipi. D sẽn sãd yibeoog n sok d noor tʋʋll-tʋʋll n sa bala, sẽn wa n zems yibeoog wakat a 5 sẽn loog minit 30, d kẽe biis n na n kẽng tẽn-bil sẽn zãre. D wa n kẽna ne nao n pasg kʋɩlg sẽn yaa yalenga, la d rʋ tãnga. Tãngã ra yaa sell wʋsgo, tɩ kɩt tɩ saam-biig ning sẽn da be mam taoorã naoã zẽkd n tat mam zugã.

Baraar yibeoogã, a Harvey moona ne tẽngã saam-biisi, tɩ mam tɩ moon m ye zĩig b sẽn gomd zapõneemdo. La sẽn wa n zems lɛɛr a ye midi wã poore, m da pa le tar pãng ye. Bala hal yibeoogẽ no-soakã tɛka, m pa le rɩ ye. Mam sẽn wa n tɩ seg a Harvey wã, saam-biig baa a ye ra pa le be ne-a ye. A Harvey teka sɛbã ne gel-kãad a tã. A wilga maam gell sẽn yũud to-to. A pooga gellã võore, n bas n fõog-a. Yaa sɩd tɩ ra pa maneg n noomẽ ye. La m makame n yũ a yembre. Ãnd n da na n yũ gell a tãab-n-soabã? Yaa maam. Bala komã ra tar-m-la wʋsgo, t’a Harvey pa tagsd a na tõog n buk-m n sig tãngã, m sã n sobg ye.

Tigims sull tigis-kãseng a ye sasa, yell a ye n tolg n pa yɩ nana ne-ma. Tõnd rag n bee saam-biig a ye zakẽ sẽn da yɛg Rĩungã roogo. Koomã soob yaa bũmb sẽn tar yõod wʋsg Amis buudã neb nifẽ. Rẽ n so tɩ tigims sull yel-gɛtã pag yãk koomã n tɩ rɩgl tõndo. A Harvey tʋʋmã ra yaa wʋsgo, t’a yeel maam tɩ m tɩ sɩng soobo. Koomã ra bee so-rãmb a yiib pʋsẽ. So a yembr da yaa ko-maasga, t’a to wã yaa ko-tʋʋlga, tɩ la-peoog sẽn yaa vɩʋʋg ra rɩg be. Bũmb ning sẽn ling maamã, yaa tɩ tigims sull yel-gɛtã pag yiime n tɩ rɩgl koomã n tees Rĩungã roogo. Saam-biis me n da be be n sõngd ne tʋʋmã, tigis-kãsengã seglg yĩnga. Mam kos-a-la fu-lilldga, t’a wa ne sũud sẽn yaa yaleng wa fu-poko, tɩ f sã n getẽ bɩ f ne a poorẽ wã. M da rat n leba roogã poore, la lad-bɛd buud n da be beenẽ, n yiisd b zutã giryaasẽ tɩ ned sã n pẽneg bɩ b geok-a. M da yeta m meng yaa: ‘Saam-biisã tʋʋm yell pak-b lame tɩ b pa ne meng tɩ m dat n soo koom ye. M sã n zãgs me n pa so, zakã rãmb sũy na n sãamame. Yaa m wee n so bala.’ La m sɩd n kell n soome.

A Harvey gũus n gesame tɩ yaa toog wʋsg ne Amis buudã neb tɩ b bɩ tẽebã wɛɛngẽ, bala wʋsg ra pa mi karengo, sɛb me ra pa be b buud-gomdã pʋgẽ ye. La b sẽn wa n sɩng Amis rãmbã buud-gomdã gʋlsgã tɛka, lebga nana tɩ b zãms saam-biisã b mengã buud-gomd kareng la a gʋlsgo. Ra yaa tʋʋm-kãsenga, la saam-biisã wa n tõog n bãnga bũmb wʋsg a Zeova zug b buud-gomdã pʋgẽ. Yʋʋmd 1960 tɛkã, sɛb la b sɩng yiisg Amis rãmbã buud-gomdã pʋgẽ. La yʋʋmd 1968 wã, d sɩnga Gũusg Gasgã yiisg Amis rãmbã buud-gomd pʋgẽ.

La goosneema wã ra gɩdga sɛb nins fãa sẽn pa sinoaamdã yiisgu. Sẽn na yɩl n gil yel-kãngã, d yiisa Gũusg Gasgã t’a yaa toor Amis rãmbã buud-gomdã pʋgẽ. Wala makre, wakat n zĩnd tɩ Gũusg Gasg ning d sẽn da zãmsdã ra gʋls ne Mandaarẽ la Amis rãmbã buud-gomde. Ned sã n da rat n bãng a võore, d yetame tɩ d tallda Gũusg Gasgã n zãmsd Amis rãmbã sinoaamdo. Wakat-kãng tɛka, a Zeova siglgã sɩnga sɛb wʋsg Amis rãmbã buud-gomd pʋgẽ wã yiisgu, n na n sõng bu-kãng nebã tɩ b bãng Biiblã sẽn yetã.—Tʋʋ. 10:34, 35.

Yʋʋmd 1960 n tãag yʋʋmd 1970 wã tɛka, Amis buudã saam-biis wʋsg ra pa tũud Wẽnnaam noyã sõma ye. B sẽn da pa wʋmd Biiblã sẽn yetã võor sõma wã kɩtame tɩ kẽer ra vɩ yoob pʋgẽ, rã-tɩgre, wall b rɩt tab la b rɩkd dorge. A Harvey gilg n kaaga tigims wʋsgo, n na n sõng saam-biisã tɩ b bãng a Zeova tagsg yel-kãens wɛɛngẽ. Yaa tiging a ye d sẽn kẽng n tɩ kaag kibar la m sẽn togs sɩngrẽ wã.

Saam-biis nins sẽn tall sik-m-mengã sakame n tek b vɩɩmã, la bʋko, wʋsg zãgsame. Yʋʋm 20 pʋgẽ bala, Taiwan saam-biisã sõor sẽn da yɩɩd 2450 wã boogame n zems bãmb 900 bala. Woto sɩd ra sãamda sũur wʋsgo. La d bãngame t’a Zeova pa na n tol n ning siglg sẽn yaa rẽgd bark ye. (2 Kor. 7:1) Neb sẽn da tar minim-wẽns wa n pa le be tigingã pʋgẽ ye. A Zeova ninga barka, tɩ Taiwan koe-moondbã yɩɩd bãmb 11000 masã.

Yʋʋmd 1980 wã tɛka, d yãame tɩ Amis buudã tigimsã neb tẽeb paama pãnga. A Harvey paama sẽk n paase, n tõe n sõng sinoaambã. Yɩɩ ne sũ-noog wʋsg la a tõog n sõng saam-bi-pogs wʋsg sɩdb tɩ b lebg a Zeova Kaset rãmba. M ket n tẽra a sũ-noogã sẽn da yaa to-to, a sẽn yã saam-bi-poak a ye sɩd sẽn pʋʋs a Zeova pipi a vɩɩmã pʋgẽ wã. Mam sũurã yaa noog wʋsg me, m sẽn tõog n sõng sũ-tɩrs rãmb tɩ b paam zood sõma ne a Zeova wã. M sũur yɩɩ noogo, m sẽn paam n naag m Biibl karen-biig a ye bi-ribl ne a bi-pugl n tʋm Taiwan Betɛllẽ wã.

Masã, m lebga m yembre. D sẽn kẽ kãadem yʋʋm 59 poore, m sɩd a Harvey maoo ne kãnsɛɛre, n wa maan kaalem yʋʋmd 2010 yʋʋm-vẽkr kiuugã pipi daare. A kẽesa a sẽkã zãng Wẽnnaam tʋʋmdã pʋgẽ sẽn kolg yʋʋm 60. M tagsda a yell wakat fãa. M sũur yɩɩ noog wʋsg m sẽn paam n teel-a Wẽnnaam tʋʋmdã pʋgẽ, tẽns a yiib sẽn da be yamleoog pʋgẽ wã. D zãmsa Aazi buud-goam a yiib sẽn da yaa toogo. A Harvey zãmsa b gʋlsg me.

Mam sɩdã kaalmã yʋʋm a naas poore, siglgã taoor lʋɩtb sullã yeelame tɩ na n yɩɩ sõma ne maam tɩ m leb Ostrali m yʋʋmã sẽn vẽsgã yĩnga. Bũmb sẽn wa m yamẽ pipi yaa: ‘M pa rat n loog n bas Taiwan ye.’ La a Harvey ra yeta maam tɩ m da tol n yeel a Zeova siglgã tɩ ayo ye. Rẽ wã, mam sak n loogame. Mam wa n yãame tɩ m sẽn sak n tũ siglgã sẽn yeelã yaa yam tʋʋmde.

Rũndã-rũndã, mam tʋmda Ostralazi Betɛllẽ wã. La wɩkɛn fãa, mam moonda koɛɛgã ne m tigingã. Betɛllẽ wã, m sũur nooma wʋsg m sẽn tũnugd ne zapõneemdã la sinoaamdã n sõngd sãambã la saam-biisã sẽn wat n na n gilg n ges Betɛllã. M gũuda kũum vʋʋgrã pʋleng pidsg daar ne m sũur fãa, n miẽ t’a Zeova pa na n yĩm a Harvey sẽn yãk yam n pa na n tol n yeel-a tɩ ayo wã yell ye.—Zã 5:28, 29.