Harvey wainga no hama murongomuna. Asi iyena ndiyena wainga dangwe. Mbhuri yake yakajijira cokwadi ku Midland, mu nyika yo Australia, panguya yo vainga vecihwisana maningi no urombo mu gore ro 1930. Iyena wakakurira pa mbhuri yaida maningi Jehovha zve wakabhabhatijwa paainga no 14 o makore. Wakajijira kuashira mabasa ese aivhunjwa kuita mu ungano. Asi njiku imweni paakavhunjwa kuiti averenge Murundiri pa musongano, iyena wakarangarira kuti aacaikwanirisa. Asi hama imweni yakamuvhunja kudari: “Mu sangano ra Jehovha kudari hama ikavhunjwa kuti iite ciri cese, hama jinonga javona kuti iyona inokwanirisa!”—2 VaKorinto 3:5.

Inini ndakajija cokwadi ku Ingratera pamwepo na mai wangu i na yayangu. Pakutanga, babangu vainga vacikadakariri cokwadi. Asi pokupejisira, vakazovavo umwe o Zvapupu zva Jehovha. Ndakabhabhatijwa pandainga no makore 9 o kubhahwa. Asi babangu vainga vacikazvidi. Ndaida kuva piyona kuti ndizokwanirise cido cangu co kuva misionario. Asi babangu avacaida kuti ndive piyona ndicito ndaano  21 o makore. Ndainga ndicikakwanisi kuvetera mbhera ndive no makore aya. Pondainga no 16 o makore, ndakathuta ndoenda ku Austraria, kwainga kuno yayangu. Ivona vainga vakaenda kogara nyika ii. Aya akava makomborero kwandiri, ngokuti pandakava no 18 o makore, ndakatanga kushanda inga piyona.

Ku Australia ndikona kwandakazivana na Harvey. Cido cedu cainga co kushandira Jehovha inga mamisionario. Takacadha mu gore na 1951. Potakapeja makore maviri tecishanda inga mapiona, takatanga kushanda inga vavonereri vo ndharaundha. Ndharaundha yedu yaikwakwatija ndau huru yo kumavirira ko Austraria. Ngokudaro, taidikana kufamba mumango wakakura maningi no ndau jicikagahwi maningi.

Mu gore ro 1954, takakokwa kuti tiende kokursari turma 25 yo Gireadhi. Cido cedu co kuda kuva mamisionario cainga caaphedo no kukwanirisika! Takaguma ku Novha Yorki ngo piketi, totanga kujija Bhaibheri mu njira yakajika kamare. Inga divi ro kujija kwedu, takadikanavo kujija ndumi inobhuiwa ku Shipanya. Cakava cineso cikuru maningi kuna Harvey, ngokuti aacaikwanisa ushoni kunanga retra “r.”

Potainga teciija, hama jaitijijisaro jakananga kuti ndiyani anoda koshandira ku Japau, ngaataririse zina rake kuti aende kojijira ndumi inovereketwa Japau. Takatema civaringo co kuti Jehovha ndiyena angasana kwatinoenda koshandira. No papera mukuvo mushoma, hama Albert Schroeder, umwe mujijisi wo cikora co Gireadhi, vakavona kuti itusu atizivi kutaririsa mazina edu. Ivona vakativhunja kudari: “Amborangariranyizve padoko ngo pamusoro pazvo.” Patakaenderera mberi no cisungo cedu co kutama kutaririsa mazina edu, hama Schroeder vakati: “Inini no mujijisi umweni takatirira mazina enyu. Ejanyi kujijira ndumi inovereketwa ku Japau.” Zvakava zviro zvicikanesi kuna Harvey.

Takaguma ku Japau mu gore ro 1955 pa mukuvo wo kuti kwainga no 500 o vacumaeri mu Japau yese. Harvey wainga no makore anokwana kuita 26, inini ndainga no 24. Takagajwa kuti tishandire ku dhorobha ro Kobhe, takashandireyo ko makore marongomuna. No papera mukuvo wakati kuti, takadakara ngo kukokwazve kuti tishande inga vavonereri vo ndharaudha zve takashandira phedo no ndhorobha ro Nagoya. Itusu taidakarira zvese mu basa rotakagajwa: Hama, zvokuha pomwe no zvese zvataivona. Asi, takavazve no mukana umweni wo kuita zvese zvatakavhunjwa ndi Jehovha kuti tiite.

No pakhirira makore anokwana kuita matatu mu basa ro kufambira ungano, bheteri ro ku Japau rakatikumbira kuti tiende ku Taiwani kuti ticumaere cikwata co vandhu vaibhuya Ciamisi. Kondhono kwainga kuno hama jainga jaavapanduki. Ngokudaro, bheteri raida hama inokwanisa kubhuya ushoni Cijapau kuti iende kopeja zvaingari zveciitika kondhoyo. * Taida maningi basa redu ku Japau. Ngokudaro, cainga civaringo cinonesa maningi. Asi Harvey waida kuita zvese zvaida Jehovha, inini ndakatenderana nazvo.

Takaguma ku Taiwani mu gore ro 1962. Kondhoyo kwainga kuno vacumaeri vanokwana kuita 2.271. Vazinji vavo vaivereketa Ciamisi. Asi pakutanga taidikana kujijira Cishina. Tainga no bhuku rimwe basi kuti tijijire Cishina no mujijisi umwe aacaikwanisa kuvereketa Cingezi, asi takajijira.

No papera mukuvo wakati kuti no taguma Taiwani, Harvey wakagajwa kuti ashande inga mushandiri wo cine. Bheteri rokondhono rainga doko, ngokudaro, Harvey waikwanisa kuita mabasa ese mu hofise no kushanda no hama jaibhuya Ciamisi, sumana ndhatu pa mweji. Nguva jimweni, iyena waishandazve inga muvonereri wo dhistiritu, zvaibatanija kuita hurukuro mu magungano. Harvey waiita hurukuro ngo ndumi inovereketwa ku Japau, hama yaivereketa Ciamisi yaiturukira. Asi, utongi wakatendera kuti musongano jo Ciara jiitwe basi ngo Cishina. Ngokudaro, Harvey wakavangisira, woita hurukuro ngo Cishina, hama yaibhuya Ciamisi yaiturukira.

Ku Taiwani kwainga maningi no zvimutemo-mutemo, ngokudaro, hama jaidikana kuvangisira maningi kuti jitendehwe kuita gungano. Azvicaireruka kutendehwa kuti tiite gungano, nguva jimweni zvaitora mukuvo wakareba maningi. Kudari, maporisiya akatama kupa citendehwa co kuti gungano riitwe, Harvey waienda kogara pa maporisiepo. Ivona pavaivona munyikanja akagara pondhopo, vaiita nyowa, ngo kukasika vaimupa citendehwa. Izvo zvakashanda kamare.

Pasure po kupeja sumana nganani no hama, kazinji itusu taipeja nguva imwe kana nguva jakawanda, tecikhira matundhu no kuvona murambo. Ndinoceuja dundhu ro ndakatanga kuhwira. No tapera kuha matabhicu ngo kukasika, pa nguva jaikwana kuita 5:30 jo mangwanani, takakhwira karu kuti tiende ku ndharaudha iri ndhambo no kotaigararo. Perapo, taifamba ngo mumbhiripiri mo murambo totanga kukhwira matundhu. Zvainesa maningi kukhwira, zvokuti ndaidikana kusota paicika hama yainga kumbeji kwangu kuti ndikwanisevo kukhwira.

Pa mangwanani ondhoo, Harvey wainga ecicumaera ngo divi rimweni no hama jimweni, kuveni inini ndainga ndecicumaera ndoga ngo divi rimweni rainga no vandhu vaibhuiwa Cijapau. Asi pojaiita nguva imwe, ndainga ndaremba maningi, ngokuti ndainga ndaano nguva jakati kuti ndicizivi kuha ciri cese. Asi pondakasongana na Harvey, apacaengazve no hama jimweni. Ngo kudaro, Harvey wakacinja marevhista manganani no manda matatu o huku. Iyena wakanditatija manera andaizokwanisa kusvuta rimwe nga rimwe ngo kubovora padoko. Ndaizvivona inga zvinonesa maningi, asi ndakazvieja. Waro, ndiani waizosvuta zanda ro citatu? Ndini, ngokuti Harvey aacaizokwanisa kunderuka na inini mbhera pasi.

Pa vhaza imweni yo tainga pa gungano ro ndharaundha, ndakava no cineso candicikazivi kumbovonazve. Takagumira pa muzi po hama imweni yaigara phedo no Nyumba yo Umambo. Zvinovoneka inga kuti kuvaamisi kugeza kusisira maningi. Ngokudaro, mukaji wo muvonereri wo ndharaundha, wakanasirira kumwa kuti tiende kogeza. Harvey wainga wakabatikana maningi, iyena wakandivhunja kuti nditange ndini. Ipona painga no zviro zvitatu: Bhagedhi rino kumwa yo kutondhora, rimweni rino kumwa yo kupisa pomwe no basia ricina ciri cese. Zvakandishamaisa ngo kuti, mukaji wo muvonereri wo ndhaundha uwu, wakamuka kuzvidira pambeji kamare no Nyumba yo Umambo, paaingaya no hama jecinasirira kuitira gungano. Ndakakumbira kuti andipevo kurtina hayo. Iyena wakandiviisira ransori rinovonekera! Ndakarangarira kwenda hwangu ngo sure ko nyumba, asi akucaiendekepi, ngokuti kwainga kwakadihwa mawaia, kuti ukhuvaze ari wese waizokhwederepo. Ngokudaro, ndakarangarira kudari: ‘Hama jakabatikana maningi, ajizondivoni kuti ndiri kugeza. Ndikatama kugeza, vanozonyangajwa. Ndinodikana kuzviita.’ Ngo iyo ndava ndakatogeza.’

Harvey wakazwisisa kuti hama zinji caibhuya Ciamisi ajiripi kwenderera mberi ku divi ro kumujimu, ngokuti ajikwanisi ushoni kuverenga zve ajina mabhuku mu ndumi yajo. Kuvhira pondhopo, ndumi yo Ciamisi yakatanga kutahwa vecishandisa maretra o Ciroma. Zvaivoneka inga kuti zvaishanda kujijisa hama kuti jiverenge ngo ndumi yavo. Rainga basa guru, asi pa kufamba ko nguva hama jakakwanisa kujija joga. Mabhuku o Ciamisi akatanga kubudiswa mu gore ro 1960 zve Murindiri wakabudiswa mu gore ro 1968.

Asi utongi aucaidepi kuti tikovanise mabhuku acikaripi o Cishina. Kuti titize cineso ici, Murindiri mu ndumi yo Ciamisi, wakabudiswa mu njira yakasiyana-siyana. Inga muezaniso, ko mweji jinokwana kuita gumi na nomwe, Murindiri umwe waiviya no ndumi mbiri, Cishina no Ciamisi. Mundhu ari wese paainga no muvhunjo, taishandisa marevhista kuti timujijise. Kuvhira pondhopo, sangano ra Jehovha, riri kuita zvese zvarinokwanisa kuti ribesere vandhu vanovereketa ndumi yo Ciamisi kuti vajije zvokadi zvo Bhaibheri.—Maitiro o Vapostori 10:34, 35.

Kutangira mu gore ro 1960 mbhera 1970, hama zinji jaibhuya Ciamisi ajicaipona mukuzwirana no ndhungamiro ja Jehovha. Ivona avacainasa kuzwisisa ndhungamiro jo Bhaibheri, vamweni vaiita zvo uhure, vairejera kana kushandisa mutombo jinodhakwisa. Harvey wakavhakacira ungano jakawanda maningi, ecieja kubesera hama kuti jizwisise mavonero a Jehovha ngo pamusoro po shwiro iji. Cimwe co cineso condhoco, ngo cotanangaya pa kutanga.

Hama jimweni jainga no cido co kuita cinjo, asi zvinosuruvarisa ngo zvokuti vazinji avacaida. Mutengo wo vacumaeri ku Taiwani wakaderera maningi kuvha pa 2.450 kwenda pa 900 pa makumaviri o makore. Izvo zvairembesa maningi. Asi, taizviziva kuti Jehovha aakomboreri sangano ricina mufambiro wakacena. (2 VaKorinto 7:1) Asi no papera mukuvo wakati kuti, ungano zinji jakatanga kushandira Jehovha mu njira kwayo. Ngo besero ra Jehovha, wari ku Taiwani kwaano vacumaeri vanokwana kuita 11.000.

Kuvhira mu gore ro 1980, takanga kuvona kuti hama no hambzaji jaibhuya ndumi yo Ciamisi, jeciitisa nane ku divi ro kumujimu. Harvey waikwanisa kupeja nguva yakawanda no vandhu vaibhuya Cishina. Iyena wakava no mudakaro mukuru maningi ngo kubesera majimamuna o hambzaji jakawanda kuti vave Zvapupu zva Jehovha. Ndinoceuja kuti iyena wakadakara maningi paakavona umwe mwanarume waakabesera eciita mukumbiro kuna Jehovha pa vhaza yo kutanga. Inini ndakavavo no mudakaro wo kubesera vano mwoyo wakanaka kuti vajije ngo zva Jehovha. Ndakavazve no mudakaro wo kushanda ku bheteri ro Taiwani no vana vo vajiji vangu vo Bhaibheri.

Wari, ndingatonanga kuti andicina mudoni wangu. Pasure po makore anokwana kuita 59 o mucadho, mwamunangu anodiwa, Harvey wakatamika mu njiku 1 ya Janeiro wo 2010, ngokuti wainga no kanseri. Iyena wakapeja makore anokhwedera kuita 60 ari mu nguva yakazara! Ndinocisuwo naye. Asi, ndinodakara maningi ngo kumubesera kwandakamuita mu basa rake mu nyika mbiri jinodakajisa. Takajijira kuvereketa ndumi mbiri jinonesa maningi jinobhuya ku Azia, asi Harvey wakatodikana kujijira kujitara.

Zvecivoneka kuti ndaamusharuka, makore manganani aperari, Mukhumbi Unotonga wakatema civaringo co kuti zvaizova zviri nane kuti ndihwirire ku Austraria. Murangariro wangu wokutanga, wakava wo kuti ‘andidi kubuda ku Taiwani kuno.’ Asi Harvey wakandijijisa kuti nguva jese tinodikana kutendera zvese zvatinovhunjwa ngo sangano ra Jehovha, ngokudaro, ndakaenda. Perapo, ndakazwisisa kuti civaringo ciya cainga caushoni kamare.

Wari, ndiri kushanda ku bheteri ro Austrarazia zve kumbhiri ko sumana ndinoenda kocumaera no ungano yangu. Pa Bheteri ndino cidakajiso co kushandisa ndumi mbiri jo ndakajijiraya kuti ndikhombije Bheteri vandhu vanoviya koovhakacira. Hina, ndiri kuvetera no cidaka-daka cese cigondiso ca Jehovha co rumuko. Ndinozviziva kuti, Harvey uwo waiitaya zvese zvaanokumbihwa ndi Jehovha, wakangwaririka mu murangariro Wake.—Johani 5:28, 29.