Omusamane gwandje Harvey oye osheeli noya valwa ye li aamati yane. Uukwanegumbo wawo owa li hawu zi kuuninginino waAustralia mokandoolopa kedhina Midland Junction. Oya ningi Oonzapo dhaJehova mo 1930 nasha, pethimbo uuhupilo wa li tawu shongola. Harvey okwi ilongo okukala e hole Jehova nokwa ninginithwa e na omimvo 14. Nziya konima yaashoka, okwi i ilongo okukala aluhe ha taamba ko iinakugwanithwa megongalo. Sho a li okamatyona, oshikando shimwe okwa li a tindi okulesha Oshungolangelo pokugongala, oshoka okwa li ta dhiladhila kutya ite ke shi enditha nawa. Ihe omumwatate ngoka a li ta popi naye okwe mu kwathele a lundulule okudhiladhila kwe, a ti: “Uuna gumwe mehangano lyaJehova e ku pula wu ninge sha, oha kala e shi kutya oto shi vulu!” — 2 Kor. 3:5.

Ngame onda ningi Onzapo yaJehova moIngilanda, pamwe nameme nomumwamemekadhona gwosheeli. Tate petameko ka li e hole Oonzapo dhaJehova, ihe konima yethimbo naye okwa ka ninga Onzapo. Onda ninginithwa manga ndi na omimvo omugoyi, nonando Tate ka li e shi panda. Ondi itulile po elalakano lyokuninga omukokolindjila nondi ka ninge omutumwa. Ihe Tate ka li a pitike ndje ndi kokole ondjila omanga inaandi gwanitha omimvo 21. Kanda li nda hala okutegelela ethimbo eleeleka. Onkee ano, sho nda gwanitha omimvo 16, tate okwa pitike  ndje ndi tembukile koAustralia ndi ka kale nomumwamemekadhona gwosheeli, ngoka a adhika a tembukila hoka. Sho nda gwanitha omimvo 18, onda tameke okukokola ondjila.

Otwa tsakanene naHarvey moAustralia. Atuhe otwa li twa hala okulongela Jehova tu li aatumwa, notwa hokana mo 1951. Konima yokukokolondjila uule womimvo mbali, otwa pulwa tu ye miilonga yuutonatelishikandjo. Oshikandjo shetu mUuninginino waAustralia osha li oshinene noonkondo. Onkee ano, otwa li hatu hingi iinano iile tatu taakana iitopolwa ya mbugala noyi lyaathane kokule.

Mo 1954, otwa li twa hiywa KOsikola onti-25 yaGilead. Kungawo, elalakano lyetu lyokuninga aatumwa otwa li poku li adha. Otwa li twa thiki moNew York, moAmerika nosikepa notwa tameke nootundi dhetu dhOmbiimbeli. Kosikola yaGilead, otwa li wo tu na okwiilonga Oshispania nosha li oshidhigu kuHarvey, oshoka okwa li ta nyengwa okutumbula oo-r.

Manga tu li kosikola, aalongi yetu oya li ye tu tseyithile kutya mboka ya hala okuya koJapani otaya vulu okwiinyolitha yi ilonge Oshijapani. Otwa tokola tu ethe ehangano lyaJehova olyo li tokole kutya openi tu na okuya. Konima yaashono, omumwatate Albert Schroeder, gumwe gwomaalongi yetu, okwa mono kutya inatu inyolitha. Okwe tu lombwele a ti: “Dhiladhileni ishewe nawa kombinga yasho.” Sho a mono kutya otatu kakadhala natango, omumwatate Schroeder okwa ti: “Ngame naalongi ooyakwetu, otwe mu nyolitha. Kambadhaleni okwiilonga Oshijapani.” Osha li oshipu kuHarvey okutumbula iitya yOshijapani shi vulithe yOshispania.

Otwa thiki moJapani mo 1955, sho mwa li owala aauvithi 500 moshilongo ashihe. Harvey okwa li e na omimvo 26, omanga ngame ndi na 24. Otwa li twa tuminwa koshilando shedhina Kobe, hoka twa kala tatu uvithile uule womimvo ne. Opo nduno otwa ka shuna ishewe miilonga yuuyendi, tatu longo popepi noshilando Nagoya notwa li twe shi tyapula. Otwa li tu hole oshilonga shetu, aamwatate, iikulya notwa li wo hatu nyanyukilwa eshito. Inapu pita ethimbo ele, tse natango otatu pewa ompito yokuninga shoka Jehova a hala tu ninge.

Konima yokulonga miilonga yuuyendi uule womimvo ndatu, oshitayimbelewa shaJapani oshe tu pula ngele otu na ehalo lyokuya koTaiwan, tu ka uvithile aapopi yelaka lyOshiamis. Aamwatate yamwe mboka haya popi Oshiamis oya li ya ningi aashunimonima, noshitayimbelewa shaTaiwan osha li sha pumbwa omumwatate ha popi Oshijapani a ka kwathele koshitopolwa shoka, opo uushunimonima kaawu taandele. *  Otwa li tu hole okulongela moJapani noonkondo, onkene osha li oshidhigu kutse okuninga etokolo. Ihe Harvey okwa li i ilonga okutaamba ko oshinakugwanithwa kehe ta pewa, notwa zimine tu ye.

MoTaiwan otwa thiki mo muNovomba 1962. Omwa li aauvithi 2 271, noyendji yomuyo oya li aapopi yOshiamis. Ihe tango otwa li tu na okwiilonga Oshichiina. Nonando otwa li owala tu na embo limwe lyokwiilonga Oshichiina, ye omulongi gwetu ka li ha popi Oshiingilisa, otwa pondola okwiilonga Oshichiina.

Konima owala yokathimbo okashona sho twa thiki moTaiwan, Harvey okwa pewa oshinakugwanithwa shokukala omutonateli gwiilonga moshilongo. Oshitayimbelewa osha li oshishona, onkee Harvey okwa li e na ethimbo lya gwana lyokulonga iilonga ye mombelewa, ye ta ka longa ishewe naamwatate Aayamis uule wiiwike itatu omwedhi kehe. Okwa li wo ha longo e li omutonateli gwoshitopolwa omathimbo nomathimbo, noshinakugwanithwa shoka osha li sha kwatela mo okugandja iipopiwa piigongi. Harvey okwa li ha vulu okugandja iipopiwa mOshijapani, naamwatate mboka haya popi Oshiamis oya li haye shi uvu. Ihe epangelo olya li owala lya pitika Oshichiina osho shi kale hashi longithwa momalongelokalunga. Onkee ano, Harvey okwa li e na okugandja iipopiwa mOshichiina, nonando ka li e shi shi nawa, yo tayi tolokwa mOshiamis.

Pethimbo ndyoka etangakwiita olyo lya li tali pangele moTaiwan. Onkene aamwatate oya li ye na okupula epitikilo ya ninge iigongi. Osha li oshidhigu okupewa epitikilo, yo aapolisi olundji oya li haya kwata ethimbo ye li gandje. Ngele oshiwike moka oshigongi shi na okuningwa osha thiki, ihe inatu pewa epitikilo natango, Harvey okwa li ha kuutumba mositaasi yopolisi sigo e li pewa. Molwaashoka osha li hashi kala oshisithahoni kaapolisi okukala ye na omukwiilongo e ya kuutumbila mositaasi yawo, oya li haye tu pe epitikilo nziyanziya.

Uule wiiwike sho twa li hatu ka talela po aamwatate, otwa li hatu ende uule wowili lwaampono tatu londo oondundu notatu taakana omilonga. Otandi dhimbulukwa oshikando shotango nda londo ondundu. Konima yokulya oshuumbululwa, otwa londo ombesa po 5:30 yongula onene, notwa taaguluka omulonga gwa pwina, e tatu tameke okulonda ondundu onde noonkondo. Ondundu ndjoka oya li onde lela, nokuli ngele tandi tala komeho gandje, onda li handi kala ndi wete oompadhi dhaangoka e li ndje komeho.

Ongula yesiku ndyoka, Harvey okwa li a longo muukalele pamwe naamwatate yomoshitopolwa, omanga tandi uvitha ngame awike mokamukunda okashona kaapopi yOshijapani. Lwopoyimwe yomutenya, onda li tandi hala okungambuka kondjala. Sho nda ka tsakanena naHarvey okwa li oye awike. Harvey okwa li a pewa omayi gatatu gondjuhwa komuntu gumwe sho e mu pe iifo. Okwa li u ulukile ndje nkene ndi na oku li lya, moku li ninga okambululu okashona, ngame tandi thipi. Nonando kanda li naanaa nda hala oku li lya, onda kambadhala okulya po limwe. Ihe mbela olye a li ta ka lya po eyi lyahugunina? Harvey okwe li pe ndje, oshoka ka li e wete ta ka vula okuhumbata ndje sho tatu londoloka kondundu, ngele onda ka ngambuka kondjala.

Sho twa li twa ya koshigongi shimwe, onda li ndi iyadha monkalo ondhigu. Otwa li hatu zi megumbo lyomumwatate gumwe li li popepi nOshinyanga  shUukwaniilwa. Molwaashoka aantu yomuhoko gwAayamis oya li ya tala ko okwiiyoga ku li oshinima sha simana noonkondo, omukulukadhi gwomutonatelishikandjo okwa longekidha iinima ayihe, opo tu iyoge. Harvey okwa li i ipyakidhila, onkee okwa ti nandi ki iyoge tango. Iinima itatu mbyoka twa li twa longekidhilwa ongaashi: eyemele lyomeya omatalala, eyemele lyomeya omapyu noshiyaha. Onda li nda kumwa sho omukulukadhi gwomutonatelishikandjo a tula iinima mbyoka komeho yOshinyanga shUukwaniilwa, mpoka pwa li aamwatate taya longekidha iinima yoshigongi. Onde mu pula a pe ndje elapi ndi li longithe, opo kaandi kale ndi wetike. Okwe etele ndje othayila onenenene, ihe ohayi imonikila! Onda li tandi dhiladhila ndi ye konima yegumbo, ihe okwa li ku na oombaka ndhoka dha li hadhi shomona aantu okupitila moshipa moka dhi li. Ondi ipopile momwenyo tandi ti: ‘Aamwatate oyi ipyakidhila unene, noitaya mono ndje sho tandi iyogo. Nongele onda kala inaandi iyoga, itaye ke shi tala ko nawa. Otandi iyogo owala!’ Shoka osho ngaa nee nda ningi.

Harvey okwa li a ndhindhilke kutya osha li oshidhigu kaamwatate naamwameme oyendji Aayamis ya hume komeho, oshoka oyendji yomuyo kaya li ye shi okulesha, po kapwa li iileshomwa melaka lyawo. Molwaashoka elaka lyOshiamis olya li lya tameke okunyolwa noondanda dhOshiroma, osha li tashi ka kala pandunge okulonga aamwatate naamwameme mboka okulesha melaka lyawo. Otwa li tu na okulonga nuudhiginini, ihe mokweendela ko kwethimbo aamwatate oya ka vula okwiilonga kombinga yaJehova melaka lyawo. Iileshomwa mOshiamis oya tameke okunyanyangidhwa mo 1960 nasha, nomo 1968 Oshungolangelo oya tameke wo okunyanyangidhwa melaka ndyoka.

Ihe epangelo kalya li lya hala tu andjaganeke iileshomwa mbyoka kaayi li mOshichiina. Onkee ano, opo katu iyetele uupakadhi, Oshungolangelo mOshiamis oya li ya andjaganekwa momikalo dhi ili nodhi ili. Pashiholelwa, uule woomwedhi 17, otwa kala hatu longitha Oshungolangelo ya nyolwa momalaka gaali, mOshichiina nomOshiamis. Ngele opwa li omuntu e tu limbililwa, otwa li hatu ningi twa fa tatu uvithile aantu mOshichiina. Okuza mpono, ehangano lyaJehova olya kala nokunyanyangidha iileshomwa melaka lyOshiamis, opo aapopi yelaka ndyoka yi ilonge oshili yOmbiimbeli. — Iil. 10:34, 35.

Momukokomoko gwomimvo 1960 nasha no 1970 nasha, aamwatate naamwameme oyendji Aayamis kaya li hayi iyutha komithikampango dhaJehova.  Molwaashoka kaya li yu uvite ko thiluthilu omakotampango gOmbiimbeli, yamwe yomuyo oya li haya hondele, haya nu sha pitilila nenge haya hili omakaya nosho wo iingangamithi. Harvey okwa kala ha talele po omagongalo ogendji, a kambadhale a kwathele aamwatate yu uve ko nkene Jehova a tala ko iinima mbyoka. Sho twa li tatu talele po omagongalo gontumba moshitopolwa shimwe, otwa adha mo omagongalo ngoka ge li monkalo ya fa ndjoka nda popi metetekelo.

Aamwatate naamememe aaifupipiki oya li ye na ehalo lyokuninga omalunduluko, ihe shinikitha oluhodhi, yamwe kaya li ya hala. Onkee omwaalu gwaauvithi moTaiwan ogwa yi pevi muule womimvo 20, okuza paauvithi ye vulithe po 2 450, e taya kala owala ye li 900 lwaampono. Shoka osha li she tu teya omukumo noonkondo. Ihe otwa li tu shi kutya Jehova ke na esiku a laleke nuuyamba ehangano inaali yogoka. (2 Kor. 7:1) Mokweendela ko kwethimbo, aamwatate naamwameme momagongalo ngoka oya tameke okulongela Jehova momukalo gwa yogoka, na Jehova okwa li yambeke iilonga yawo, oshoka ngashingeyi moTaiwan omu na aauvithi ye vulithe 11 000.

Okuza mo 1980 nasha, otwa mono nkene eitaalo lyaamwatate naamwameme Aayamis lye ende tali kolo. Onkee ano, Harvey okwa li ta vulu okugandja eitulomo kaamwatate yAachiina. Okwa li a nyanyukwa sho a kwathele aasamane yaamwameme yamwe ya ninge Oonzapo dhaJehova. Otandi dhimbulukwa sho a tile kutya okwa li ha kala a nyanyukwa noonkondo uuna gumwe gwomaasamane mboka a galikana kuJehova oshikando shotango. Nangame onda nyanyukwa sho nda vula okukwathela aantu oyendji ya hedhe popepi naJehova. Onda li nokuli nda nyanyukwa okulonga koshitayimbelewa shaTaiwan pamwe nomwanamati nosho wo nomwanakadhona gwomukonakonimbiimbeli gwandje gumwe.

Ngashingeyi omuholike gwandje ke po we. Harvey okwa si kokankela me-1 Januali 2010, konima sho twa kala mondjokana uule womimvo 59 lwaampo. Okwa kala uule womimvo tadhi ihilile 60 miilonga yethimbo lyu udha! Ohandi kala nde mu yuulukwa noonkondo. Ihe onda nyanyukwa sho, nda li nda vulu okulonga pamwe naye miilongo iyali muna aantu ye na lela ohokwe! Otwa li twi ilongo okulesha omalaka gaali omadhigu ngoka haga popiwa moAsia, nokuli Harvey okwa li wo ha vulu oku ga nyola.

Konima yomimvo ne lwaampono, Olutuwiliki olwa tokola kutya oshi li hwepo ndi shune koAustralia, molwaashoka onda kulupa nonda pumbwa eyambidhidho. Petameko kanda li nda hala okutembuka mo moTaiwan. Ihe Harvey okwa li a longo ndje okukala aluhe handi taamba ko kehe shoka ehangano lyaJehova tali pula ndje ndi ninge, onkee onda yi. Konima yethimbo onda ka mona kutya okugalukila koAustralia osha li edhiladhilo ewanawa.

Ngashingeyi ohandi longo moshitayimbelewa shaAustralasia mokati koshiwike, nokuuvitha mehuliloshiwike pamwe negongalo lyetu. Onda nyanyukwa sho tandi vulu okulongitha elaka lyOshijapani nolyOshichiina ndyoka ndi ilonga, uuna tandi ulukile aatalelipo oshitayimbelewa. Ihe onda tegelela noondjulukwe esiku lyeyumuko ndyoka Jehova u uvaneka. Ondi shi kutya Jehova ina dhimbwa Harvey ngoka a li aluhe ha ningi shoka Jehova te mu pula a ninge. — Joh. 5:28, 29.