Harvey taari mutokweene wa asinnawe axexe. Emusi awe yaahusenrye eparipari o Midland Junction, makupa onaneelawo nsuwa o Australiya, opwaha iyaakha 80 ivirale elukuluku waaryaayavo ohaawa veelaponi. Harvey unnunwe amusivelaka Yehova nave aapatisiwe arino iyaakha 14. Mwawaakuveya aahihuserya weemererya mirici sa mmulokoni. Mu ekwaha emoha, owo aakhooca omwaalakhanya Mulipeleli va muthukumano, uupuwelaka wi haari oophwanelela. Nyenya munna mmoha aahimukhaviherya Harvey moorweela wa oloca ariki, “Vaavaa muchu onoovekeiye wi opake muteko vyakala mmarehereryo, owo onnasuwela wi onnaphwanelela!”—2 Kor. 3:5.

Kaahusenrye eparipari o Inklatera, ni amama vamoha ni murokoraka mutokweene. Apapa aka yaahusenrye eparipari ivinrevo iyaakha sincipale, nyenya woopaceryani awo yaanakhooca. Naamwi yahaachuna, kaapatisiwe pahiru kirino iyaakha 9. Kaahitikitherya yoolakelela ya okhala piyoneera nave voocharela okhala misiyonaariya. Naamwi hiiha apapa hiyaachuna wi kikhale piyoneera ophiyerya kaakhwaninhe iyaakha 21. Miyaano nkaachuna owehererya mu iyaakha sincipale. Moohakalaliha apapa yaakeemererya wi kithaamele o  Australiya, wi kakhaleke ni murokora aka mutokweene yoowo athaamenle weiwo. Vookuchula, vaavaa kaakhwaninhaaka iyaakha 18, kaahikhala piyoneera.

O Australiya, kaahimusuwela Harvey. Nave oopiili ahu naanachuna omurumeela Yehova ntoko mamisiyonariyu. Naathelanne mu 1951. Nimanle orumeela mu iyaakha piili ntoko mapiyoneero, naahivekiwa olapa mmuteko wa ekulucu. Ekulucu ahu yaari etokweene makupa onaneelawo nsuwa wa Australiya, nave naanapaka mikwaha soorakama n’yaaka mapuro oorakamela.

Mu 1954, naahiwompwa wi navolowe mu esikola yo Kiliyati etuuruma 25. Yoolakelela ahu ya okhala mamisiyonariyu yaahaakhwanela! O Nova York naakelewo ni pophoro nave naaphin’yaahu, naapacerya omuhuserya Piipiliya mwawiiseela. O esikola yo Kiliyati, naaphwanela ohuserya elocelo ya Espanyola, nave eyo yaari yoovila wa Harvey nthowa nawi haawerya omuromola phaama ‘r’ mu elocelo ya Espanyola.

Variyari va esikola, ahusiha ahu yaahilokoha wi yoole aachuna orumeela o Xapau, aaphwanela orepela nsina wi avolowe mu esikola ya elocelo yo Xapau. Nyenya hiyo naahilakelela wi marehereryo a Yehova enithanlele orummwa ahu. Nyenya voocharela munna Albert Schroeder, mmoha a ahusiha a esikola ya Okiliyati, aahisuwela wi hinaarepenle nsina wi nivolowe mu esikola ya elocelo yo Xapau. Owo aahiloca ariki: “Muupuwele phaama sa yeela.” Vaavaa naalekenlaahu orepela masina, Munna Schroeder aahiloca: “Miyaano ni ahusiha akina nihoothanlelaani orummwa. Mweererye wi moone waakhanle munahaala ohuserya elocelo yo Xapau.” Harvey mookhweya aahiikhoveleliha elocelo yeeyo.

Naaphin’ye o Xapau mu 1955 nave mu elukuluku yeeyo, yaariwo alaleeryi 500 pahiru. Harvey aarino iyaakha 26 nave miyaano kaarino iyaakha 24. Naarumihiwe mu epooma yo Kope, weiwo naarumenlaahuwo mu iyaakha xexe. Voocharela naahiwompwa wanaawiili wi narumeele mmuteko wa weeceeca, nave naarumeela waacamela epooma yo Nakoya. Naanasiveliwa ni echu vyakala mu orummwa ahu—anna ni arokora, yoolya naari elapo. Moovira wa elukuluku, naahikhalano ekari ekina ya opaka echu ekina yeeyo Yehova aanirummeiye opaka.

Nimanle orumeela mu iyaakha raru mmuteko wa weeceeca, efiliyale yo Xapau yaahinikoha waakhanle wi naahaala osiveliwa oya o Taiwani wi naalaleerye achu a nloko na Amisi. Anna akina a nloko na Amisi yaahikhala alipa oomwaryeya nyenya efiliyale yo Taiwani yaamuchuna munna aaloca elocelo  yo Xapau wi aamaalihe alipa oomwaryeya. * Naanasiveliwa orumeela o Xapau, nyenya ela yaari yoolakelela yoovila. Nyenya Harvey aahihuserya ohikhooca murici vyakala, mwawiihiiha naaheemererya oyawo.

Naaphin’ye o Taiwani mu 1962. O Taiwani yaariwo alaleeryi awaakhwana 2.271 nave ancipale yaari a nloko na Amisi. Nyenya voopacerya, naaphwanela ohuserya elocelo yo Xina. Naarino liivuru mmoharu pahi wi nihuserye Exina nave muhusiha ahu haaloca Enklesi, nyenya naahihuserya.

Mu elukuluku vakhaani nimanle ophiya o Taiwani, Harvey aahithanliwa orumeela mu nikhuuru na efiliyale. Efiliyale yaari ekhaani, mwawiihiiha Harvey aanawerya olapa miteko soothene so efiliyale aniiha aakhaviheryaka anna a nloko na Amisi mu isumana raru mweeri ti mweeri. Owo tho aahirumeela ntoko ooweherya a muceche mu elukuluku yincipale, yeeyo yaaphitaanyerya operekha miyaha mmithukumano sa ekulucu. Harvey aanaperekha miyaha mu elocelo yo Xapau nave anna a nloko na Amisi yaanawerya wiiwexexa. Ohoolo waya, alamuleli yaaheemererya wi mithukumano sa malapelo seeriweke ni elocelo yo Xina. Mwa yeeyo, Harvey aahiilipiserya ohuserya Exina nave aanaperekha miyaha mu elocelo eyo aniiha munna mukina ataphulelaka mu elocelo Amisi.

O Taiwani waahikhalawo owanawana wa maloko, mwawiihiiha anna yaaphwanela oveka weemereryiwa wi epake mithukumano sa ekulucu. Waari woovila weemereryiwa opaka muthukumano wa ekulucu nave yaanaviravo elukuluku yincipale wi yeemereryiwe. Wakhala wi mapilisa hiyeemerenrye variyari va esumana ya muthukumano wa ekulucu, Harvey aanatitelela oyawo ophiyerya yeemerenrye. Woona wi mapilisa yaanuuliheya muru omoona namarwa aawehereryaka mu nipuro naya, awo yaaneemererya mwawaakuveya.

Variyari va isumana naakhalaahu vamoha ni anna, naanamaliha ewora emoha naari opwaha niwelaka miyako ni olapuwa mihice. Kinnuupuwela mwaako woopacerya kaawenlaaka. Nimanle olya woosiiselo naahiwela ekaaro iwora saakhwanaka 5:30, woosiiselo niyaaka mu epooma ekhaani yeeyo yaari yoorakameela, voocharela naahilapuwa muhice mutokotoko yoowo waakhuma omwaako nave naahiwela isikata wi niphiye omwaako. Isikata iho saari soorekama ophiyerya wi, vaavaa naawelaahu niyaaka omwaako, kaweha ohoolo pahiru kaawerya woona nnaani na munna niwelaka.

Mu woosiiselo yoole, Harvey aalapa vamoha ni anna avanipuroni mmuteko woolaleerya, nave miyaano kaalampe meekhaaka mmuceche mukhaani weiwo yaakhalawo achu yaaloca Exapau. Vaava elukuluku yaakhwannaaya 13:00 kaahiceecheya nthowa nawi kaahimaliha elukuluku yincipale kihicile. Elukuluku kaakumannaaka ni Harvey, owo iiha ari meekheiye. Harvey aahitorokaniha irevista ikina ni mooce mararu a mwanakhu makithi. Owo aakihusiha mukhalelo wa olya moorweela wa othorola vakhaani ni opacerya onuula. Naamwi weerano eyo waari woovila, kaahiilipixerya weerano. Nyenya taani aahaala olya nooce naneeraru? Harvey aakivaha nlo wi kilye nthowa nawi haahaala owerya okiteexa vaavaa naakhuruwaahu omwaako waakhanle wi kooceecheya ni etala.

Va muthukumano mmoha wa ekulucu, kaahihoolela yaweereya yootikhiniha. Naakhala vaate va munna mmoha, waacamela va Empa ya Omwene. Woona wi achu a nloko na Amisi annoona orapa okhala echu yoochuneya, mwaara a ooweherya ekulucu aanarehererya maahi oorapa ntakhara hiyo. Harvey aahitepa oweiwa, mwa yeeyo aakileela wi kikhale oopacerya orapa. Mu empa yoorapamo saaheliwamo ipasiya raru: mu epasiya emoha yaaheliwamo maahi ooriirya, ekina yaaheliwamo maahi ooviha nave yaneeraru hiwaakhalamo echu. Nyenya yaari yootikhiniha woona wi, mwaara ooweherya ekulucu aahin’ye maahi awo vaate va empa yeeyo yaawehana ni Empa ya Omwene weiwo yaariwo anna yaakhaviherya orehererya muthukumano wa ekulucu. Kaahimveka owo wi aruuhe ekuwo ya mukhalelo vyakala. Nave aakiruuhela ekurtina ya palastiku yawooneela! Nyenya kaahupuwela oya opithela wa empa ele, nto yaahikhalawo mapwacha yaawo yaari mu nikhola naya nave yaanakumiha muru wi emuthupe muchu vyakala aawaacamela. Nyenya kaahuupuwela mukhataaka: ‘Anna aatepa oweiwa nave heeni ekoone vaavaa kinahaalaaka orapa. Navetho wakhala wi nkirampe kinahaala owuukhula. Kinahaala opacerya orapa!’ Nave kaahirapa.

Harvey, aahisuwela wi waari woovila wa anna a elocelo Amisi, wuunnuwa omunepani nthowa nawi ancipale hiyaawerya waalakhanya navetho hisaarivo soolaleeryiwa mu elocelo aya. Vaava elocelo Amisi yaapacenryaaya orempwa ephariheliwaka marepelo o Roma, yaari ya mphurelo waahusiha anna waalakhanya elocelo aya. Ola waari muteko mutokweene, nave moovira wa elukuluku anna yaanawerya ohuserya vooloca sa Yehova mu elocelo aya. Soolaleeryiwa mu elocelo Amisi saahipacerya ophwanyeya mu 1967 nave mu 1968 Mulipeleli mu elocelo Amisi, aahipacerya olaleiwa.

Nyenya alamuleli, yaanakhwatiiha soolaleeryiwa seiho sahaari sa elocelo yo Xina. Mwa yeeyo wi nisepe makacamiho, Mulipeleli mu elocelo Amisi aanalaleiwa mmikhalelo soohiyanahiyana. Ntoko yootakiherya, mu eyaakha emoha ni miyeeri mithanu, naampharihela Mulipeleli mu ilocelo soopiili Exina ni Amisi. Wakhala wi muchu ohooniherya nchuno, yaakhala ntoko wi naapharihela erevista ya Exina wi naahusihe achu a weiwo. Ohoolo waya, marehereryo a Yehova yaahivahererya soolaleeryiwa sincipale mu elocelo Amisi, wi yaakhaviherye achu ale ohuserya iparipari sa Mpiipiliyani.—Saw. 10:34, 35.

Variyari va iyaakha 20, anna ancipale a nloko na Amisi hiyaakhala mwawiiwanana ni malakiheryo a Muluku. Woona wi hiyiiwexexa malakiheryo a Mpiipiliyani mwawaakhwanela, akina yaanacapaheya, ohapaliwa, omulya soona ni olya mirece. Harvey aahixekurya miloko mincipale eereryaka waakhaviherya anna wiiwexexa moonelo wa Yehova vooloca sa miyaha seihe. Mu mmoha wa mikwaha seiha, naahiihoolela yaweereya kiloncaaka woopaceryani wa mwaha yoola.

Anna awiiyeviha yaanapaka matorokelo, nyenya moothananiha ancipale hiyaachuna nave nuumuru na alaleeryi naahivukuwa ovinyerya va 2.450 ophiyerya 900 variyari va iyaakha 20. Ela yaari yooceecheiha vancipale. Mwa yeeyo, naahisuwela wi Yehova haahaala oreeliha marehereryo ooriipiheya. (2 Kor. 7:1) Moovira wa elukuluku, meerelo ooriipiheya yaaheelihiwa nave nnikhaviheryo na Yehova hiihaano o Taiwani eriwo alaleeryi awaakhwana 11.000.

Mu elukuluku ohoolo waya emanle ovira eyaakha ya 1980, naahiwoona anna ni arokora a miloko sa elocelo Amisi yunnuwihaka nroromelo naya noolipa. Nave eyo yaamukhaviherya Harvey omaliha elukuluku yincipale ni achu a nloko na Exina. Owo aathanliwe wi aakhaviherye asiya ancipale a arokora wi ekhale Anamoona a Yehova. Kinnuupuwela wi Harvey aahikileela mukhalelo aareiye oohakalala vaavaa aamonneiye mmoha a alopwana yaale avekelaka wa Yehova mu ekwaha yoopacerya. Mi tho kinnahakalala woona wi kohaakhaviherya ancipale a murima waphaama omwaacamela Yehova. Kaanahakalala orumeela mu efiliyale yo Taiwani vamoha ni mwaana mwaamulopwana ni mwaamuthiyana a oohuserya aka a Piipiliya.

Vano koomuyeleela oosiveliwa aka. Imanle ovira iyaakha waacamela 59 mu othela, oosiveliwa aka Harvey ookhwa mu 1 a Yaneru a 2010, amanle ohooxeya ni ereca ya kanser. Owo oomaliha iyaakha waacamela 60 mmuteko wa elukuluku yoothene! Kinnatepa ochuna omoona Harvey. Kaanatepa ohakalala orumeela vamoha ni yoowo mu ilapo piili soohakalaliha! Oopiili ahu naahihuserya oloca—nave Harvey aahihuserya orepa—ilocelo piili soovila so Asiya.

Ivinre iyaakha piili ohoolo waya, Nikhuuru Noolamulela naahikileela wi, wa nthowa na wuuluvala yaamukhala yaphaama okookela o Australiya. Nyenya woopaceryani kaahuupuwela wi, ‘nkinachuna ovinyawo o Taiwani.’ Nyenya Harvey aahikihusiha ohikhooca matorokelo vyakala mmarehereryo a Yehova, mwawiihiiha kaahipwaha. Moovira wa elukuluku kaahiiwexexa wi yaari yaphaama wa miyo okookela o Australiya.

Olelo kinarumeela o efiliyale yo Australiya variyari va esumana, nave omakuchuwelo wa esumana, kinalaleerya vamoha ni muloko. Olelo kinnahakalala opharihela Exapau ni Exina vaavaa anna ni arokora anarwaaya oxekurya o Peteli. Kinnawehererya ovinya mookhwani yoowo Yehova ororomelinheiye, nave kinnasuwela wi Yehova onahaala omuupuwelela Harvey yoowo eemererya muteko vyakala yoowo Yehova aamurumeiye opaka.—Yoh. 5:28, 29.