Harvey kinpiaya yeyimej ikniuan, yejua akin más iueyi katka. Ikipiya kanaj 80 xiuitl ijkuak ichanejkauan opeuj kinmachtiaj itech Biblia ipan se ueyikalpan tlen itoka katka Midland Junction, ipan estado de Australia Occidental. Ijkuakon, ipan yejon país miyekej xkipiayaj tomin. Harvey kitlasojtlaya Jehová niman onoapolakti ijkuak kipiaya 14 xiuitl. Sakin, okasikamat ika melak kuajli tla se nochipa kichiua tlen ikalpan Jehová kitlajtlanilia. Sejpatipan, ijkuak yejua telpochtli katka, okijlikej makiamapoua revista Amatl Tekakistilijketl ipan tlanechikojli, san ika, yejua xokinek pampa kinemiliaya ika xueliskia. San ika, tokniuj akin okitlajtlanili matlaamapoua, okijli: “Tla se tokniuj itlaj mitstlajtlanilia xchiua, yejua ijkon mitsijlia pampa kimatstika ika uelis tikchiuas” (2 Cor. 3:5).

Nejua iuan nonan niman nokniuj siuatl akin más iueyi opeuj tomachtiaj Biblia ne Inglaterra. Notaj kachtopa xkinekiya nomachtis Biblia, san ika, sakin noijki opeuj nomachtia. Maski yejua xkinekiya maninoapolakti, oninoapolakti ijkuak nikpiaya chiknaui xiuitl. Sakin, oniknemili ninochiuas precursora niman ijkon ueliskia ninochiuas misionera. San ika, notaj onechijli ika xnechkauiliskia maninochiua  precursora hasta ijkuak nikajxiltis 21 xiuitl. Nejua xniknekiya uejkaujtipan nitlamachias. Yejua ika, ijkuak onikajxilti 16 xiuitl, oniktlajtolti notaj tla ueliskia nonchantis iuan nokniuj akin más iueyi akin chantiya Australia. Notaj onechkauili iuan manichantiti, niman, ijkuak onikajxilti 18 xiuitl, oninochiuj precursora.

Ne Australia, onikixmat Harvey. Yejua noijki kinekiya tlapaleuis ken misionero. Otonamiktijkej ipan 1951. Ijkuak san sekan yotitlapaleuijkaj ome xiuitl ken precursores, ikalpan toTajtsin otechtlajtolti tla ueliskia tikomintlajpaloskej tlanechikoltin ipan circuito. Tikomintlajpalouayaj tlanechikoltin tlen onkatkaj kampa noixmati ken Australia Occidental. Yejuin tlanechikoltin melak uejuejka nokauayaj. Ijkuak tikomintlajpalouayaj, melak tiuejkauiyaj ika tajsiyaj niman nonekiya tipanoskej kampa melak tona.

Ipan 1954, otechnotskej ipan iTlamachtil Galaad número 25. ¡Yejon kijtosnekiya ika itochiuaskiaj misioneros! Otajsikej Nueva York ipan barco. Ipan iTlamachtil Galaad melak kuajli techmachtiayaj Biblia. Noijki techmachtiayaj español, san ika, Harvey ouijtika okitak pampa xueliya kintenkixtiaya erres.

Akin techmachtiayaj otechijlikej ika akin kinekiskiaj ontlapaleuiskej Japón ueliskia kinmachtiskej tlajtojli japonés. Tejuamej xotikteijlikej matechmachtikan japonés pampa tiknekiyaj ika ikalpan toTajtsin matechijli kanon tontlapaleuiskej. Ijkuak Albert Schroeder, se tokniuj akin techmachtiaya, okimat ika xotikteijlikej matechmachtikan japonés, otechijli: “Kuajli xnemilikan”. Pampa tokniuj Schroeder okitak ika xtoyolchikauayaj, otechijli: “Nejua niman oksekimej tokniuan yotikteijlikej mamechmachtikan japonés. Xyejyekotij, kanaj nenkuelitaskej yejon tlajtojli”. Harvey más totoka ouel yejon tlajtojli.

Ipan 1955, otajsikej Japón. Ipan yejon xiuitl, ompa san nemiyaj 500 tokniuan. Harvey kipiaya 26 xiuitl niman nejua 24. Otechontitlankej ipan ueyikalpan Kobe, tlen onka itenko mar. Ompa otiuejkaujkej naui xiuitl. Niman melak otechyolpakti ijkuak otechijlikej ika oksejpa titlapaleuiskiaj ipan circuito. Otikintlajpalojkej tlanechikoltin tlen onkatkaj nisiuj ueyikalpan Nagoya. Melak tikuelitayaj titlapaleuiskej Japón: tikuelitayaj kenon tokniuan tetlasojtlaj, kenon tlakualtsinkan niman melak tikueliliayaj tlen ompa nokua. San ika, sakin, ikalpan toTajtsin otechtlajtlanili itlaj kampa ononek tikteititiskej tla melauak tiknekiyaj tikchiuaskej tlen Jehová techtlajtlaniliaya.

Ijkuak yotitlapaleuijkaj yeyi xiuitl ipan circuito, sucursal de Japón otechtlajtolti tla ueliskia tiaskej Taiwán niman ijkon tikinnojnotsaskej akin tlajtouaj ami. Sekimej tokniuan akin tlajtouayaj ami yonoxelojkaj itech tlanechikojli niman kijtouayaj tlen xmelauak itech ikalpan Jehová, yejua ika, sucursal de Taiwán kinekiya kontitlanis se tokniuj akin maueli matlajto japonés niman ijkon makinpaleui. * Melak yotikuelitakaj titlapaleuiskej Japón, ika yejon, ouijtika otikitakej ijkuak tokniuan otechijlikej ika kinekiyaj oksekan matitlapaleuitij. San ika, Harvey kuajli yokijtoka ika nochipa kichiuaskia tlen ikalpan toTajtsin kijliskia. Kuakon, ompa otitlapaleuitoj.

Otajsikej Taiwán ipan noviembre de 1962. Ijkuakon, ompa nemiyaj 2,271 tokniuan, niman miyekej tokniuan tlajtouayaj ami. Aman nonekiskia tomachtiskej chino. San ika, ouijtika otikitakej tiueliskej yejon tlajtojli pampa techmachtiaya yakaj akin xtlajtouaya inglés niman san tikpiayaj se libro tlen ika tomajmachtiayaj chino. Maski ijkon, otiuelkej chino.

Sakin ika otajsikej Taiwán, Harvey opeuj tlapaleuiya ken siervo de sucursal. Pampa yejon sucursal xueyi katka, Harvey ueliya ompa tekitiya niman noijki ueliya ontenojnotsaya seki semanas imiuan tokniuan akin tlajtouayaj ami. Kemantika noijki tlapaleuiaya ken tlayekanketl ipan distrito, ika yejon, noijki kintemakaya tlamachtiltin ipan uejueyimej tlanechikoltin. Yejua ueliskia kinpanoltiskia itlamachtiluan ika japonés pampa akin tlajtouayaj ami kasikamatiyaj japonés, san ika, tekiuajkej san kitekauiliayaj makinpanoltikan ika chino. Ika yejon, maski Harvey xmás ueliya tlajtouaya chino, kinpanoltiaya itlamachtiluan ika chino, niman se tokniuj kitlajtolkuepilijtiaya ika ami.

Ipan yejon tonaltin, tekiuajkej de Taiwán yokintlalijkaj yenkuikej tlanauatiltin. Ipampa nochi yejuin, tokniuan nonekiya kintlajtlaniliskej policías makinkauilikan makinpanoltikan inueyitlanechikoluan. Yejuin melak ouijtika katka, niman kemantika policías xnimantsin kinnankiliayaj tokniuan. Ijkuak ajsiya yejon semana para nopanoltis se ueyi tlanechikojli niman policías xkinnankiliayaj tokniuan, Harvey yaya comisaría niman ompa notlaliaya hasta makijlikan tla kema kinkauiliskiaj. Policías pinauiyaj ijkuak kitayaj ika yakaj akin xompa chanej uejkaujtipan tlamachiaya comisaría, ika yejon, nimantsin kinankiliayaj.

Ijkuak tontenojnotsayaj iuan tokniuan, tinejnemiyaj se hora noso más. Nonekiya titlejkoskej ipan uejueyimej tepemej niman tikinpanauiskej atentin. Nikilnamiki ijkuak kemach onitlejkok ipan se tepetl kampa melak tlapilkayan katka. Ijkuakon, san nimantsin otitlakuajkej niman a las 5:30 ika kualkan otikajsikej se autobús tlen otechuikak kampa tontenojnotsaskiaj. Otikpanauijkej se ueyi atentli niman opeuj titlejkouaj ipan se ueyi tepetl. Pampa melak tlapilkayan katka, hasta nikimitstiaya ikxiuan tokniuj akin yaya noyekapan.

Ipan yejon kualkan, Harvey tenojnotstinemiya imiuan sekimej tokniuan akin ompa chantiyaj niman nejua noselti nitenojnotstinemiya ipan se pitentsin kalpan kampa tlajtouayaj japonés. Kanaj la 1 ika teotlak nikmachiliaya ika inisotlauiskia pampa xnitlakuaya. Ijkuak oniknextito Harvey, tokniuan  xok ompa nemiyaj. Harvey okimakakej yeyi totoltetl ipampa seki revistas. Yejua onechititi kenon ojkan nijkoyonis se totoltetl niman ijkon nikonis. Maski xmás niknekiya, se onikonik. San ika, ¿akinon koniskia on sa ika nochi totoltetl? Nejua onikonik, pampa tla nisotlauiya, Harvey xueliskia nechuajmamajtiaskia ipan yejon tepetl kampa melak tlapilkayan katka.

Ijkuak otiajkaj ipan se ueyi tlanechikojli, opanok itlaj tlen nion xnikchiaya. Otokaujkaj ichan se tokniuj akin chantiya inakastlan se Kajli kampa tosentlaliaj. Akin tlajtouaj ami kitaj ika melak noneki ika se manalti. Yejua ika, isiuauj tlayekanketl ipan circuito otechmakak tlen ika taltiskiaj. Harvey melak tekititoya, ika yejon, onechijli nejua kachtopa maninalti. Tokniuj otechtemiltili se cubeta ika atl sesek niman okse ika atl totonki, noijki otechmakak se cubeta tlen xtlaj kipiaya. Onimojkatlachix ijkuak onikitak ika kiyauak okintlali cubetas, kampa ueliskia ontlachiaskiaj tokniuan akin kiyektlalijtoyaj toueyitlanechikol ipan Kajli kampa tosentlaliaj. Onikijli tla ueliskia nechmakas itlaj tlen ika ninokajkaltis, ¡san ika, onechmakak se capote kampa nochi nesiya! Oniknemili nias ikuitlapan kajli, san ika, ompa nemiyaj sekimej gansos akin ueliskia nechtsojtsopiniskiaj. Kuakon oniknemili: “Tokniuan melak tekititokej, nion xkitaskej ika ninaltijtika. Niman, tla xninaltia, uelis kinemiliskej tlen xkuajli. Kuakon, maski maninalti”. Niman ijkon onikchiuj.

Harvey okitak ika tokniuan akin tlajtouaj ami xueliyaj kichikauayaj intlaneltokil pampa xueliyaj tlaamapouayaj niman pampa xkinpiayaj amatlajkuiloltin ika intlajtol. Ijkuakon, kemach yopeujka noijkuiloua tlajtojli ami, yejon otechpaleui matikinmachtikan tokniuan matlaamapouakan ika intlajtol. Yejuin se ueyi tekitl katka. San ika, sakin tokniuan ouelkej san yejuamej nomachtiaj. Ipan xiuitl 1966, opeuj kisaj amatlajkuiloltin ika tlajtojli ami. Niman, ipan 1968, opeuj kisa Amatl Tekakistilijketl.

San ika, tekiuajkej san kinekiyaj manochijchiuakan amatlajkuiloltin ika tlajtojli chino. Pampa xtiknekiyaj tlauejli, Amatl Tekakistilijketl tlamantik ken nochijchiuaya. Ipan 17 metstin, onokixtijkej revistas Amatl Tekakistilijketl tlen ijkuiliujtiayaj ika tlajtojli chino mandarín niman ika ami. Ijkon nesiya ika san tiknekiyaj titemachtiskej chino. Desde ijkuakon, ikalpan toTajtsin yokinchijchiuj miyek  amatlajkuiloltin ika ami niman ijkon kinpaleuiskej akin tlajtouaj yejuin tlajtojli makimatikan tlen kijtoua Biblia (Hech. 10:34, 35).

Yeuejkaui, miyekej tokniuan akin tlajtouayaj ami xkitlakamatiyaj itlanauatiluan toTajtsin. Sekimej xmás kasikamatiyaj tlen kijtouaya Biblia, ika yejon, auilnemiyaj, tlauaniyaj niman pokiyaj noso kikuajkuayaj nuez de areca (noso de betel). Harvey okintlajpaloto miyek tlanechikoltin niman ijkon kimasikamachiltis tokniuan ika nochi yejon xkuelita Jehová. Sejpatipan, ijkuak otiktlajpalotoj se tlanechikojli, topan onochiuj tlen onimechijli ijkuak opeuj yejuin tlamachtijli.

Miyekej xokinejkej onopatlakej, san tokniuan akin yolyemankej katkaj onopatlakej. Maski kachtopa nemiyaj más de 2,450 tokniuan, ipan 20 xiuitl melak miyekej okiskej niman sa onokaujkej 900 tokniuan. Yejon melak otechajman. San ika, noijki tikmatiyaj ika Jehová xkiteochiuaskia ikalpan tla xkitlakamatiya (2 Cor. 7:1). Oajsik se tonajli ijkuak tokniuan xok kichiuayaj tlen Jehová kitlauelita. Jehová yokichiuj ika ne Taiwán manemikan más de 11,000 tokniuan.

Ijkuak yopanoka xiuitl 1980, tokniuan akin tlajtouayaj ami más kuajli opeuj kitekichiuiliaj Jehová. Ika yejon, Harvey más kipiaya tiempo niman ijkon kinmachtis akin tlajtouayaj chino. Melak oyolpak pampa ouel okinpaleui inueuentsitsinuan sekimej tokniuan siuamej manomachtikan itech Biblia. Nikilnamiki ijkuak Harvey melak oyolpak pampa okitak kenon se itech yejuamej kemach ika sejpa okinots Jehová. Nejua noijki melak kuajli ninomachilia pampa yonikinpaleui miyekej makixmatikan toTajtsin. Noijki melak nechyolpaktia ika ipan sucursal de Taiwán ouel onitekit iuan itelpoch niman ichpoch se akin nikmachtiaya Biblia.

Yomik noueuentsin. San sekan otinenkej 59 xiuitl. Harvey okajsik cáncer niman omik ipan 1 de enero de 2010. Okitekichiuili Jehová kanaj 60 xiuitl. Melak niktemoua. San ika, melak niyolpaki pampa ouel onikpaleui ipan ome países kampa kemach peujtoya itekiyo toTajtsin. Otiuelkej ome tlajtojli tlen melak ouijtika, niman Harvey hasta ouel tlajkuiloua ika yejon tlajtoltin.

Ijkuak yopanoka naui xiuitl ika Harvey yomijka, Grupo akin Tlayekana ipan nochi tlanechikoltin onechijli ika, pampa inilamajtsin katka, kuajli yeskia tla ninokuepaya Australia. Kachtopa oniknemili: “Xnikneki nikisas de Taiwán”. San ika, Harvey onechititi ika melak kuajli tla se nochipa kichiua tlen ikalpan Jehová kitlajtlanilia. Ika yejon, oniknek ninokuepas Australia. Sakin onikasikamat ika melak kuajli ika oniuajnokuep.

Aman nitlapaleuiya ipan sucursal de Australasia, niman itlamiyan semana nitenojnotsa iuan se tlanechikojli. Ijkuak tokniuan akin tlajtouaj chino noso japonés kualixmatij Betel, nejua nikinpaxaloltia. ¡Melak nikuelita! San ika, sa nikchiatika mayejko yejon tonajli ijkuak yoliuiskej akin yomijkej. Niman nikmatstok ika Jehová kilnamiktika Harvey, akin nochipa kichiuaya tlen yejua kitlajtlaniliaya (Juan 5:28, 29).