Ka gabo Harvey e be e le bana ba bane ba bašemane, gomme yena e le wa mathomo. Lapa la gabo le ithutile therešo toropong ya Midland Junction yeo e bego e le ka Bodikela bja Australia. Seo se diragetše mengwageng ya ka godimo ga e 80 e fetilego ge go be go na le bodiidi bjo bogolo kudu nageng yeo. Harvey o ile a ithuta go rata Jehofa ke moka a kolobetšwa ge a be a na le mengwaga e 14. Kapejana ka morago ga moo o ile a ithuta gore ga se a swanela go gana dikabelo tšeo a di newago ka phuthegong. Ge e be e sa le mošemane, o kile a gana go bala dirapa tša Morokami ka dibokeng ka ge a be a nagana gore a ka se kgone go di bala gabotse. Ngwanabo rena yo a bego a thuša Harvey o ile a re go yena: “Ge motho yo mongwe ka mokgatlong wa Jehofa a go kgopela gore o dire selo se itšego, o nagana gore o ka kgona go se dira!”—2 Bakor. 3:5.

Nna ke ithutile therešo ge ke be ke le kua England, gotee le mma le sesi. Mathomong tate o be a sa rate Dihlatse tša Jehofa, eupša ka morago le yena o ile a ithuta therešo. Ke ile ka kolobetšwa ge ke be ke na le mengwaga e senyane feela, tate a sa nyake. Ke be ke nyaka go ba mmulamadibogo ke moka ka morago ke tle ke be moromiwa. Eupša tate o be a nyaka gore ke lete go fihlela ke na le mengwaga e 21  pele nka thoma go bula madibogo. Ke be ke se ka ikemišetša go leta nako e telele ka tsela yeo. Ge ke be ke na le mengwaga e 16, tate o ile a ntumelela gore ke hudugele Australia go yo dula le sesi yo a bego a hudugetše nageng yeo. Ke moka ge ke be ke na le mengwaga e 18, ke ile ka thoma go bula madibogo.

Ge ke be ke le moo Australia ke ile ka kopana le Harvey. Bobedi bja rena re be re nyaka go hlankela Jehofa re le baromiwa. Re ile ra nyalana ka 1951. Ka morago ga gore re bule madibogo gotee ka mengwaga e mebedi, mokgatlo o ile wa re kgopela gore re yo dira modiro wa tikologo. Re be re abetšwe tikologo e kgolo ya ka Bodikela bja Australia, ka gona re be re sepela nako e telele mafelong ao a omilego le ao a lego kgole le metse e mengwe.

Ka 1954, re ile ra laletšwa go ya klaseng ya bo-25 ya Sekolo sa Gilead. Toro ya rena ya go nyaka go ba baromiwa e be e le kgauswi le go phethagala. Re ile ra fihla New York ka sekepe ke moka ra thoma go tsena sekolo seo go sona re bego re ithuta Beibele ka mo go tseneletšego. Gare ga dilo tšeo re bego re ithuta tšona sekolong seo e be e le leleme la Sepaniši. Harvey o be a thatafalelwa ke go ithuta leleme le ka ge a be a sa kgone go bitša “r” gabotse.

Ge re be re le sekolong seo, bahlahli ba rena ba ile ba re botša gore bao ba nyakago go ya Japane ba ngwadiše maina a bona gore ba tle ba kgone go tsena klase ya go ithuta Sejapane. Rena re ile ra dira phetho ya gore mokgatlo wa Jehofa e be wona o re kgethelago gore re tla ya kae. Kapejana ka morago ga moo, yo mongwe wa bahlahli ba rena e lego Albert Schroeder, o ile a lemoga gore ga se ra ngwadiša maina a rena. O ile a re go rena: “Eyang le naganišišeng gape ka taba ye.” Le ge ka morago ga go naganišiša ka taba ye re ile ra se ngwadiše maina a rena, Ngwanabo rena Schroeder o ile a re: “Nna le bahlahli ba bangwe re ngwadišitše maina a lena. Bonang ge e ba le ka se kgone go ithuta Sejapane.” Go ile gwa ba bonolo gore Harvey a ithute Sejapane go feta Sepaniši.

Re ile ra fihla Japane ka 1955 ge nageng yeo ka moka go be go na le bagoeledi ba 500 feela. Harvey o be a na le mengwaga e 26 gomme nna ke na le e 24. Re ile ra abelwa go ya toropong ya Kobe moo re ilego ra hlankela gona mengwaga e mene. Re ile ra thaba kudu ge re be re kgopelwa go boela modirong wa tikologo kua toropong ya Nagoya. Re be re rata selo se sengwe le sengwe ka kabelo yeo ya rena, bana babo rena ba moo, dijo tša moo le bobotse bja tikologo yeo. Eupša go se go ye kae re ile ra hwetša sebaka se sengwe gape sa go amogela kabelo yeo Jehofa a bego a re nea yona.

Ka morago ga gore re fetše mengwaga e meraro modirong wa tikologo, ofisi ya lekala ya Japane e ile ya re kgopela ge e ba re ka rata go ya Taiwan go yo bolela  ditaba tše dibotse morafong wa batho bao ba bolelago Seamis. Bana babo rena ba bangwe bao ba bolelago Seamis ba be ba fetogile bahlanogi, ka gona ofisi ya lekala ya Taiwan e be e nyaka ngwanabo rena yo a kgonago go bolela Sejapane gore a kgone go thuša go rarolla bothata bjoo. * Re be re lebane le phetho e thata ka gobane re be re rata kabelo ya rena Japane. Eupša ka ge Harvey a be a ithutile go se gane kabelo le ge e le efe yeo a e newago ka mokgatlong, re ile ra dumela go ya Taiwan.

Re fihlile Taiwan ka November 1962. Ka nako yeo go be go na le bagoeledi ba 2 271 gomme ba bantši ba bona ba bolela Seamis. Eupša re ile ra swanelwa ke go thoma pele ka go ithuta Se-China. Re be re na le puku e tee feela ya go ithuta Se-China le morutiši yo a bego a sa tsebe Seisemane. Eupša re ile ra kgona go ithuta leleme leo.

Kapejana ka morago ga gore re fihle Taiwan, Harvey o ile a newa kabelo ya go hlokomela modiro wa go bolela ditaba tše dibotse nageng yeo. Ka ge ofisi ya lekala ya moo e be e le e nyenyane, Harvey o be a kgona go dira modiro wa gagwe wa ofising ya lekala, e bile mo kgweding a kgona go fetša dibeke tše tharo a šoma tšhemo le bana babo rena bao ba bolelago Seamis. E bile o be a fela a dira modiro wa go ba molebeledi wa selete woo o bego o akaretša go nea dipolelo dikopanong tša tikologo. Harvey o be a ka nea dipolelo ka Sejapane gomme bana babo rena bao ba bolelago Seamis ba be ba tlo mo kwešiša. Eupša mmušo o be o dumelela gore diboka tša bodumedi di swarwe feela ka Se-China. Ka gona ge Harvey a be a sa katana le go ithuta Seamis, o be a nea dipolelo ka Se-China ke moka ngwanabo rena yo mongwe a mo tolokela ka Seamis.

Ka nako yeo naga ya Taiwan e be e laolwa ke mašole, ka gona bana babo rena ba be ba swanetše go hwetša mangwalo a tumelelo gore ba sware dikopano. Go be go se bonolo go hwetša mangwalo ao, e bile gantši maphodisa a be a tšea nako go re nea ona. Ge beke ya kopano e be e ka fihla re se ra tšwa re hwetša mangwalo ao, Harvey o be a dula moo maphodiseng go fihlela ba mo nea mangwalo ao. Ka ge maphodisa a be a lewa ke dihlong ge a bona motho yo a tšwago nageng e nngwe a dutše moo, a be a nea Harvey tumelelo kapejana.

Dibekeng tšeo re bego re di fetša re šoma tšhemo le bana babo rena, gantši re be re fetša nako ya ka godimo ga iri re namela dithaba e bile re sesa dinokeng. Ke gopola letšatši la ge ke be ke namela thaba la mathomo. Ka morago ga gore re je dijo tša mesong kapejana, re ile ra namela pese yeo e bego e tloga ka 5:30 mesong e eya motseng wo o bego o le kgole. Ge re fetša go fologa pese yeo re ile ra tshela noka ke moka ra namela thaba e telele. Thaba yeo e be e rotogela kudu moo ke bego ke re ge ke lebelela pele ke kgona go bona maoto a ngwanabo rena yo a bego a le ka pele ga ka.

Mesong yeo Harvey o ile a šoma tšhemo le bana babo rena ba moo mola nna ke be ke šoma tšhemo ke nnoši motsaneng o mongwe wa batho bao ba bego ba bolela Sejapane. Mo e ka bago ka iri ya pele mosegare, ke be ke ikwa ke dikologa ka ge ke be ke šetše ke na le diiri tše ntšinyana ke sa je selo. Mafelelong ge ke be ke kopana le Harvey go be go se na bana babo rena ba bangwe mo kgauswi. Harvey o be a neile batho dimakasine ke moka bona ba mo nea mae a mararo ao a sa butšwago. O ile a mpontšha kamoo nka jago lee leo ka go bula lešoba mo go lona ke moka ka le nwa. Le ge le be le bonagala le se bose, ke ile ka no le leka. Eupša lee la boraro le be le tlo ja ke mang? Le ile la ja ke nna ka ge Harvey a be a nagana gore o be a ka se kgone  go tlo nkuka a theoga le nna moo thabeng ge ke be nka idibala.

Nakong e nngwe ge re be re le kopanong ya tikologo ke ile ka diragalelwa ke selo seo se sa tlwaelegago. Re be re dula ka ntlong ya ngwanabo rena yoo a bego a dula kgauswi le Holo ya Mmušo. Ka ge go ya ka setšo sa Maamis go hlapa go le bohlokwa kudu, mosadi wa molebeledi wa tikologo o ile a re lokišeletša meetse gore re tlo hlapa. Ka ge Harvey a be a sa swaregile ka mešomo e mengwe, o ile a kgopela gore go hlape nna pele. Mosadi wa molebeledi wa tikologo o be a tlišitše dilo tše tharo: pakete ya meetse a go tonya, pakete ya meetse a go fiša le sekotlelo seo se se nago selo. Sa go mmakatša ke gore o be a beile dilo tšeo go lebana le bana babo rena bao ba bego ba lokišeletša kopano Holong ya Mmušo. Ke ile ka mo kgopela gore a ntlišetše gareteinenyana. O ile a ntlišetša polasetiki yeo o kgonago go bona sa ka kua! Ke ile ka nagana go yo ikuta ka morago ga ntlo, eupša go be go na le mapidibidi ao ke bego ke tšhaba gore a tlo ntoma. Ke ile ka no ipotša gore: ‘Bana babo rena ba swaregile kudu, ba ka se mpone le gore ke a hlapa. Le gona ge nka se hlape ba tlo kgopišega. E re ke no hlapa!’ Ka gona ke ile ka hlapa.

Harvey o ile a lemoga gore bana babo rena bao ba bolelago Seamis ga ba kgone go dira tšwelopele gabotse ka gobane ba bantši ba bona ba be sa kgone go bala e bile go be go se na dikgatišo ka Seamis. Ka ge leleme la Seamis le be le sa tšwa go thoma go ngwalwa, go be go bonagala e le kgopolo e botse gore re rute bana babo rena go bala segagabo bona. Wo e be e le mošomo o mogolo kudu, eupša mafelelong bana babo rena ba ile ba kgona go ithuta ka Jehofa ka segagabo bona. Dikgatišo tša Seamis di ile tša thoma go hwetšagala mafelelong a bo-1960, ke moka ka 1968, Morokami wa Seamis o ile wa thoma go gatišwa.

Eupša mmušo o be o sa nyake gore re nee batho dikgatišo tšeo e sego tša Se-China. Ka gona e le gore bana babo rena ba pheme mathata, ba ile ba tšweletša Morokami wa Seamis ka ditsela tše di fapafapanego. Ka mohlala, re ile ra fetša nako e itšego re diriša Morokami wo o ngwadilwego ka Se-China le ka Seamis. Ge e ba go be go na le yo a nago le dipelaelo, o be a tla no nagana gore re diriša makasine woo go ruta batho ba moo Se-China. Ga e sa le go tloga ka nako yeo, mokgatlo wa Jehofa o tšweleditše dikgatišo tše dintši ka Seamis go thuša batho ba gore ba ithute ditherešo tšeo di lego ka Beibeleng.—Dit. 10:34, 35.

Mengwageng ya bo-1960 le ya bo-1970, bana babo rena ba bantši bao ba bolelago Seamis ba be ba sa phele ka go dumelelana le melao ya Modimo. Ka ge ba be ba sa kwešiše gabotse melao ya motheo ya Beibele, ba bangwe ba be ba phela ka tsela e gobogilego, ba bangwe e le matagwa goba ba kgoga e bile ba diriša motšoko wo o bitšwago betel nut. Harvey o ile a etela diphuthego tše dintši a leka go thuša bana babo rena gore ba kwešiše ka tsela yeo Jehofa a bego a lebelela ditaba tše ka gona. Ge re be re etetše e nngwe ya diphuthego tšeo, re ile ra diragalelwa ke seo re boletšego ka sona mathomong a sehlogo se.

Bana babo rena bao ba ikokobeditšego ba be ba ikemišeditše go dira diphetogo, eupša go be go na le ba bangwe ba bantši bao ba bego ba sa nyake go dira diphetogo. Ka baka leo, mengwageng e 20 bagoeledi kua Taiwan ba ile ba fokotšega go tloga go ba 2 450 go ya go ba e ka bago ba 900. Se se be se nyamiša kudu. Eupša re be re tseba gore Jehofa a ka se tsoge a šegofatša mokgatlo wo o sego wa hlweka. (2 Bakor. 7:1) Mafelelong, bana babo rena ba ile ba thoma go hlankela Jehofa ka tsela yeo a e amogelago gomme o ile a ba šegofatša. Gona bjale kua Taiwan go na le bagoeledi ba ka godimo ga ba 11 000.

Go tloga ka bo-1980 go ya pele, re ile ra bona bana babo rena le dikgaetšedi ba diphuthegong tša Seamis ba dira tšwelopele gomme tumelo ya bona e tia. Ka gona Harvey o ile a kgona go fetša nako a na le bana babo rena bao ba bolelago Se-China. O ile a thabela go thuša banna ba dikgaetšedi tše mmalwa gore e be Dihlatse tša Jehofa. Ke gopola a bolela kamoo a bego a thabile ka gona ge yo mongwe wa banna ba a be a rapela Jehofa ka lekga la mathomo. Le nna ke thabela gore ke ile ka thuša batho ba bantši gore e be Dihlatse tša Jehofa. Le gona ke ile ka thabela go šoma lekaleng la Taiwan le bana ba babedi ba ba bangwe ba batho bao ke ilego ka ithuta Beibele le bona.

Se se nyamišago ke gore gona bjale ga ke sa na molekane. Ka morago ga gore re fetše mengwaga e ka bago e 59 re nyalane, monna wa ka o ile a bolawa ke kankere ka di-1 tša January 2010. O be a feditše mengwaga e ka bago e 60 a le tirelong ya nako e tletšego! Ke mo gopola kudu. Ke thabetše kudu go hlankela le yena dinageng tše pedi tše di kgahlišago! Re ile ra ithuta go bolela maleme a mabedi a mathata a kua Asia. Eupša Harvey yena o ile a swanelwa ke go ithuta le go a ngwala ka baka la mošomo wa gagwe.

Ka morago ga mengwaga e ka bago e mene, Sehlopha se Bušago se ile sa dira phetho ya gore go ka ba kaone ge nka boela Australia ka ge ke be ke tšofala gomme ke hloka thekgo. Selo sa pele seo se ilego sa tla ka kgopolong ya ka ke gore: ‘Ga ke nyake go tloga Taiwan.’ Eupša Harvey o be a nthutile gore le ka mohla ke se ke ka gana kabelo yeo e tšwago mokgatlong wa Jehofa, ka gona ke ile ka ya Australia. Mafelelong ke ile ka bona gore e be e le kgopolo e botse gore ke boele morago.

Gona bjale ke šoma lekaleng la Australasia gare ga beke, ke moka mafelobekeng ke ya tšhemong le phuthego yeo ke abetšwego go yona. Ke thabela go bontšha batho meago ya Bethele ka Sejapane le Se-China. Ke fela pelo ya gore Jehofa a tsoše bahu ka gobane ke a tseba gore o tla gopola Harvey yoo ka mehla a bego a dira seo Jehofa a mo kgopelago sona.—Joh. 5:28, 29.