Omulume wange Harvey, velilandula vekuana ngwe oe omukulu watyo. Nae nombunga yae vanoñgonokela otyili oko Midland Junction koutundilo wo Australia, pomuvo opo momanima 1930, mo Australia ankho ovanthu vahepa unene. Wehimbikale okuhumba Siovaa tunde poututu ambatisalwa etyi ena omanima 14. Tupu o pomuvo opo anoñgonoka okuti ovilinga vya Huku kavianyua. Nthiki imwe atumwa atange Omutala Womulavi meliongiyo, mahi asoko okuti hamwe kametyivili mokonda ngwe ankho omukuendye vala. Omukulu umwe mewaneno atomphola na Harvey, emukuatesako ati: “Tyina wamapeua otyilinga meongano lya Siovaa, ngotyo wamonua-le okuti otyilinga otyo motyivili.” — 2 Kol. 3:5.

Na ame, na mee yange, nomukulu wange, tuanoñgonokela otyili ko Inglaterra. Tate wakalele ehimbwe tyihetavela otyili, ankho uyele onombangi. Nambatisalwa etyi ankho ndyina omanima etyive, mahi tate kahandele ndyimbatisalwe. Andyilingi omphango yokukala omukokoli-ndyila ha andyikala omisionaliu. Mahi tate ahandyeke ndyikale omukokoli-ndyila ati tyitavela vala tyina namatukisa omanima 21. Mahi ame okukevela ankho hahandele. Etyi natuukisa omanima 16, elao liatyo andyiilukila ko Australia ankho kuailukila omukulu wange, ngae ndyikakala nae. Pahe etyi natuukisa omanima 18, andyikala omukokoli-ndyila.

Ko Australia oko nakavasa Harvey. Atuho ankho tuhanda okukala onomisionaliu. Etyi tyati mo 1951 atulinepe.  Atuundapa motyilinga tyoukokoli-ndyila omanima evali, konyima atupewa otyilinga tyokutalelapo omawaneno. Omawaneno ankho tutalelapo akala koutakelo wo Australia, ankho elitandela unene, ankho tuenda ehimbwe netuku-tuku mono hika mbakukuta.

Mo 1954, atuende mosikola 25 yo Gileade. Otyilinga tupeleya unene tyokukala onomisionaliu pahe ankho matutyivasi. Atuende ko Nova York nombapolo, tuati vala hikee oko, atuhimbika okulilongesa unene Ombimbiliya. Ankho omunthu unyingila mosikola oyo, una okulilongesa unene espanhol, otyo atyipuiya unene omulume wange Harvey, mokonda ngwe ketyivili okutumbula o letela “R”.

Tyina ankho tulongesiwa mosikola oyo, ovalonge- si vetu avetupopila atuho okuti una uhanda okutumwa ko Japão, una okulihonekesa alongeswe elaka lyo ko Japão. Ngwe ankho tuelipakelamo-ale okuti otyilinga tuamapewa meongano lya Siovaa otyo tutavela. Pakala vala katutu umwe po valongesi vetu utiwa Albert Schroeder, etyimono okuti onthue katuahonekele pomukanda omanyina etu. Eya etupopila ati: “Sokei-po vali katutu, kamuhande?” Onthue nkhele atuhuhana atuhahoneka eya etupopila vali ati: “Onthue tuemuhonekelakua-le omanyina enyi otyo mutala oñgeni mamulilongesa elaka lyo ko Japão.” Omulume wange Harvey kwe ankho katyalemene okulilongesa elaka olio.

Ko Japão tuaya-ko mo 1955. Pomuvo opo, motyilongo atyiho tyo Japão, ankho muna vala ovaivisi vena 500. Omulume wange Harvey ankho una vala omanima 26, ame ankho ndyina omanima o 24. Atutumwa tukaundape mepunda-umbo limwe litiwa Kobe, ngamo tukala omanima ekuana. Etyi pakala, atuhambukwa unene etyi tuakondolwa vali motyilinga tyetu tyokutalelapo omawaneno, ankho tundapa popepi nepunda-umbo limwe litiwa Nagoya. Otyilinga otyo ankho tutyihole unene, tuhole vakuetu tuvasa momawaneno, tuhole okulia tupewa iya tupu ankho tutyihole tyokuenda komaumbo akala kondye yepunda-umbo. Kapakalele-ale Siovaa etuavela vali otyilinga otyikuavo atuhetyianye.

Tuakala omanima etatu motyilinga tyokutalelapo omawaneno, pahe ombetele yoko Japão aitutumu tuende kotyilongo tyimwe tyitiwa o Taiwan, ngoko tukaundapa melaka liovanthu vatiwa ova Amis. Kotyilongo oko ankho kuna ovanthu ovanyingi vatyitukilapo otyili, pahe ankho kusukisa omunthu umwe makakuatesako ovanthu vatunde motyitateka otyo. * Onthue  ankho tutyihole unene tyokuundapa ko Taiwan, okutavela otyilinga otyo ankho tuapewa pahe ankho tyalema kapii. Mahi omulume wange Harvey ankho kanye otyilinga amapewa, pahe atutavela otyilinga otyo atuende.

Ko Taiwan tuehikako mohanyi ya Novembro mo 1962. Pomuvo opo, ankho kuna ovaivisi vena 2.271. Ovanyingi po vaivisi ovo ankho o vomuhoko wo Amis. Hikee oko etyi tuatetekela okulinga ankho okulilongesa elaka lyo China. Mahi, ankho tuna vala omukanda wike, nomunthu wike vala metulongesa. Iya ankho omunthu metulongesa elaka olio ketyivili okupopia o Ingelesi, mahi atutyiivili okulipopia.

Tuati vala hikee ko Taiwan, omulume wange ngae ukala onkhalamutwe yo mbetele yo ko Taiwan. Mokonda ombetele ankho onthutu, Harvey etyivili okuti oe undapa moseketa yae, oe ukuatesako ovaivisi vo Amis, mohanyi ankho undapa navo onosimanu ononthatu. Omulume wange tupu ankho pamwe-pamwe ukala o distritu okuundapa kumwe novatalelipo vomawaneno. Motyilinga otyo ankho una okulinga omalongomona movionge. Harvey ankho utyivila okulinga elongomona melaka lyo Japão, iya ovaivisi vo Amis elaka olio ankho velii, vetyiiva tyipopiwa. Mahi etyi pakala ovatumini avatumu okuti omaliongiyo alingwa nonongeleya ena okulingwa melaka lyo China. Pahe ankho omulume wange una okulinga ononkhono mbokulinga omalongomona melaka lyo China, umwe po vaivisi otyo apitiya melaka lyo Amis.

Pomuvo opo, o Taiwan ankho ituminwa vala nomafualali itupu ovatumini, opo ovanthu valinge otyonge, ankho pena omukanda umwe vena okukapola komakakunye. Omukanda oo pamwe ankho kaveveavela-o liwa. Tyina omulume wange amaiko, omakakunye aasete okumupa omukanda oo, iya osimano yo tyonge aihiki-po, ankho upumphama pohi ahatundu-ko atee vemuavela omukanda oo. Mokonda omakakunye ankho kahande omunthu wokovilongo ovikuavo, okukala ponthele yavo tyina omulume wange ankho amalingi ngotyo, vemupa omukanda pahe aende.

Mono simanu ankho tukakala navakuetu mewaneno, pamwe ankho tukaeda-enda navakuetu, atulondo konomphunda pamwe atuyauka onondongi. Nkhele ndyihinangela onthiki yotete nalondele komphunda. Tuapinduka-po komuhuka-huka atuli, tyina ovifufwa vituluka (5:30) atuvelama mekalela atuende komaumbo amwe kokule-kule, oko atuvasi-ko ondongi imwe onthanda yehena omaande, atuitauluka atulondo komphunda ankho yapita unene peulu.

Onthiki oyo, komuhuka watyo omulume wange Harvey avaundapa navakuavo movilinga viokuivisa, ame andyuundapa andyike pomaumbo opopepi ankho pena ovanthu vapopia o Japão. Tyina tyiti komutenya, ndyilitehela ñgaa naliwa unene nondyala, nasosoloka mokonda nkhele tualile vala tyakomuhuka katunelie vali. Tyina ndyiti ñgaa, omulume wange weya, vakuavo ankho vapitale pahe ankho wesala vala aike. Ankho una ovanthu avela omikanda ngwe avemuavela omayiyi. Andongesa oñgeni mandyili omayiyi ahapile, ati weetiula okamphana pahe ohimbika okuhipa, ankho okutyitala tyitoyesa mahi andyili-po like. Mahi pahe ponthue olie ankho malipo liatatu? Ngame ndyililiapo mokonda Harvey walinga otyiho tyokuti ine ankho ndyiliwa nondyala anehetyivili okutuluka komphunda ngwe ankho kemetyivili okumbelekapo.

Nthiki imwe, ankho matulingi otyonge tyonthiki ike, andyikondyo notyitateka tyimwe tyityatyo, tuehikila meumbo liomukulu umwe ombangi ankho ukala popepi nondyuo yomaliongiyo. Vomuhoko wo Amis tyokulikoha vesuka natyo unene, omukai womutalelipo womawaneno  etuovolela omaande tulikohe. Omulume wange ankho una ovilinga amphopila ame ndyitetekele okulikoha. Okulikoha kuatyo tyilingilwa monombasiya ononthatu: Ombasiya oyo maande atenda, onkhuavo oyo maande atokota, yatatu itupu natyike. Soka-ko tembwa omutalelipo womawaneno, wamphakela onombasiya ombo pondye poluhandya vala komutwe wondyuo yomaliongiyo ankho kuna vakuetu veli nokuviukisa ovipuka matulingi navio tyonge. Andyimuiti otyinyanga natyindyuvikiye, ngwe soka andyetela opapelo imonekela. Pahe andyisoko andyiti ndyende nokonyima yeumbo, mahi oko ankho kuna omahasa omunthu ufuena ponthele yao emutyoka andyitili owoma anahaiko. Andyilipopila andyiti: ‘Ava vakuetu veli nokuundapa tyafwa kavendyuete-ale, mokonda vena ovilinga, ankho hilikoho mavanumana ndyilikohe vala’, andyilikoho.

Harvey etyimono okuti ovaivisi velaka lyo muhoko wova Amis, ankho kaveli nokupama motyili mokonda vati ovo vehetyivili okutanga ovo vehena omikanda melaka liavo. Mokonda melaka lyo Amis opo liehimbika nono letela mbo Loma, atulipakela-mo atuti hahe tulongese ovaivisi vetyivile okutanga melaka liavo muene. Otyo ankho otyilinga tyimwe otyinene, okulinga ngotyo ankho matyivekuatesako avetyivili muene okulilongesa aveke avanoñgonoka otyili melaka liavo muene. Ova Amis vakala vala nomikanda melaka liavo muene menima lyo 1960, tyina tyiti mo 1968, avehimbika okulingilwa Omutala Womulavi melaka liavo muene.

Mahi ovatumini availika okulinga omikanda melaka ekuavo liehe lyo China. Opo tulityilike vala ovitateka, Omutala Womulavi welaka lyo Amis auhimbikwa okulingwa mononkhalelo mbelikalaila. Mongeleka, apakala omuvo umwe, otyo ovanthu vapewa vala Omutala Womulavi wahonekua momalaka evali nolio Mandarin elaka lipopiwa mo China nolio Amis. Omunthu ankho ketyinoñgonoka utyivala hamwe tuna nokulongesa ovanthu melaka lyo China. Okuhimbikila opo, Eongano lya Siovaa alihimbika okulinga omikanda ominyingi mavikuatesako ovanthu vanoñgonoke otyili Tyombimbiliya, lihimbika okulinga omikanda ominyingi melaka lyo Amis ankho mavikuatesako ovanthu voko. — Ovil. 10:34, 35.

Okuhimbikila menima lyo 1960 atee mo 1970, ovanyingi povaivisi velaka lyo Amis ankho kaveli nokulandula etyi Ombimbiliya ipopia. Ankho valinga tupu ngotyo ovitumino Viombimbiliya ankho kavevinoñgonoka nawa-nawa, tyati vala vamwe ankho veli vala movinepo ovivi, iya ovakuavo ankho vanwa unene, ava  vapwena (okusipa), iya ava vanwa ovihemba viokukoleswa. Harvey aenda-enda momawaneno omanyingi, okukuatesako ovaivisi vanoñgonoke oñgeni Siovaa akala tyina atala ovanthu valinga ovipuka ovio. Nthiki imwe etyi tuaya okukatalela-po ewaneno limwe opo tuakala notyitateka napopiale konthyimbi, tyondongi yateyapo otyilalo.

Ovaivisi vamwe ankho velikondola koututu avalingi ononkhono mbokupiluluka, avayekepo ovipuka ovivi. Mahi ovanyingi vatyo avehetavela. Mo Taiwan ovaivisi ankho valamba po 2.450, mahi mokonda yo vaivisi ovo vahahandele okupiluluka avatepuluka apesala vala 900, ngavo tukala navo momanima 20, otyo ankho tyiponeswa unene! Mahi ankho tutyii okuti Siovaa utupu onthiki mayambe eongano liasila. (2 Kol. 7:1) Katutu-katutu ovipuka ovio viasila ovanthu avehimbika okuviyekapo. Siovaa ayambe ononkhono ovaivisi ovo valinga motyilongo tyo Taiwan, pehepano muna ovaivisi valamba po 11.000.

Okutuka mo 1980, tuamona okuti ovaivisi vomewaneno lyo Amis veli nokupama motyili. Omulume wange ankho ukala unene no nosinesi. Ovaivisi vamwe ankho Amis vanepwa novalume vehelilongesa.Omulume wange akuatesako ovakuendye vovaivisi ovo, navo avakala Onombangi mba Siovaa. Ndyihinangela onthiki imwe etyi omulume wange ati: “Nahambukwa unene etyi neiva umwe povakuendye ovo, tuakuatesako welikuambela ku Siovaa monthiki yotete.” Na ame tyinthyambukiswa unene etyi netyivila okukuatesako ovanthu vomutima omuwa avakala omapanga a Siovaa. Otyikuavo tyinthyambukiswa okuaundapa mo Mbetele yo ko Taiwan novana vevali, omukuendye nomukainthu, vomunthu umwe tualongesile Ombimbiliya.

Pahe, omulume wange tuaundapa-undapa nae, ndyitupu-e vali. Tuakala nae omanima 59 tunde apa tuelinepa. Omulume wange Harvey ankho ndyihole unene, wanyima monthiki 1 ya Janeiro yo 2010, ankho una ouvela utiwa o cancer. Omanima akala movilinga viomuvo auho, ehungi pomanima omakwi epandu, na hono nkhele ndyiivaluka unene omulume wange. Mahi tyinthyambukiswa unene tyina ndyihinangela etyi nalinga puetyi ankho ndyimukuatesako movilinga apewa movilongo vielikalaila. Tuelilongesa okupopia omalaka evali o ko Asia, omulume wange Harvey, tupu ankho utyivila okuehoneka.

Etyi omulume wange anyima, pakala vala omanima ehehi, Ononkhalamutwe mbo Nombangi avanthumu ndyikondoke ko Australia, mokonda pahe nakulupa. Potete nkhele nasoka, andyiti: ‘Ame hitundu kuno ko Taiwan.’ Mahi ngetyi nalongehilwe nomulume wange Harvey, hipondola okuanya etyi eongano lya Siovaa lianthuma, andyiende ko Australia. Netyimona okuti nalingile netavelele okuya kuno ko Australia.

Pehepano pahe, ndyiundapa mombetele yo Australasia mononthiki mbosimanu, tyina tyiti konthyulilo yosimanu tuundapa navakuetu mewaneno. Muno mombetele ndyihambukwa unene okuundapa mokonda ndyityivila okupopia elaka lyo Japão nelaka lyo China. Tyina kuameya ovaenda vapopia omalaka oo, ame ndyipopia navo. Tupu, ndyikevelela nehambu limwe enene omulume wange Harvey meya okututila, wandongehile okuhaanye etyi Siovaa atuma. Pehepano nkhele uli mehinangelo lya Siovaa. — Suau 5:28, 29.