Harvey niwe yaabaire ari mukuru aha boojo bana. Abazaire be bakeega amazima obu baabaire nibatuura Midland Junction, omu burugwa izooba bwa Australia, omu bwire bw’embeera mbi y’eby’entaatsya omu myaka ya 1930. Harvey akakura arikukunda Yehova kandi yaabatizibwa aine emyaka 14. Bwanyima akeetegyereza ngu butoosha aine kwikiriza obuheereza bwona obu arikuheebwa omu kibiina. Obu yaabaire ari omutsigazi, rimwe akanga kushoma Omunaara gw’Omurinzi omu ruteerane, ahabw’okuteekateka ngu tarikuhikiiriza ebirikwetengyesa. Kwonka ow’eishe-emwe akagaaniiraho nawe yaamugira ngu, “omu kibiina kya Yehova omuntu yaakushaba kukora ekintu, nikimanyisa ngu noobaasa kukikora!”​—2 Kor. 3:5.

Amazima nkagegyera omuri England, na maawe na mukuru wangye. Tata akaikiriza amazima bwanyima, kwonka omu kubanza akaba naahakanisa. Nkabatizibwa ntakahikire n’emyaka ikumi, kandi tata taraikiriziine naanye. Nkataho ekigyendererwa ky’okuba payoniya kandi bwanyima naaba omumiisani. Kwonka, tata akangira ngu tindikubaasa kuba payoniya kureka naahitsya emyaka 21. Nkaba ntarikwenda kutegyereza obwire buraingwa. N’ahabw’ekyo ku naahikize emyaka 16, akanyikiriza  kuza Australia kutuura na mukuru wangye owaabaire afurukiireyo. Nkaba payoniya, ku naahikize myaka 18.

Nkashanga Harvey omuri Australia. Twembi tukaba twine ekyetengo ky’okuheereza Yehova nk’abamiisani. Tukataaha hamwe omu bushwere omuri 1951. Bwanyima y’okumara emyaka ebiri turi baapayoniya, tukashabwa kutaayaayira ebibiina. Tukaba nitutaayaayira ebibiina omu kicweka kihango eky’oburugwa izooba bwa Australia, n’ahabw’ekyo tukaba nitukira kuvuga turikuraba omu myanya mihango eyomire n’omu byaro.

Omuri 1954, tukeetwa kuza omu ishomero rya Gileadi erya 25. Obwo nibwo twamanya ngu ekirooto kyaitu kyaza kuhikiirira! Tukagyendera omu meeri kuhika New York kandi twatandika kwegyera kimwe Baibuli. Eby’okwega bikaba nibitwariramu Orusipania, orwagumiire Harvey ahabw’okugira akaba naagumirwa kwatura enyuguta ya “r” nk’oku erikwaturwa omu rurimi orwo.

Turikwega, bakaranga ngu abarikwenda kuza kuheereza omuri Japan nibabaasa kuhandiika amaziina gaabo kutandika kwega Orujapani. Tukacwamu kureka ekibiina kya Yehova kuba nikyo kyacwamu ahu turaaze kuheereza. Omu bwire bukye, Albert Schroeder, omwe aha beegyesa ba Gileadi, akeetegyereza ngu tukaba tutehandiikiise kwega Orujapani. Akatugira ati: “Mwongyere kukiteekateekaho.” Ku twagumire nitweziringa, Ow’eishe-emwe Schroeder akagira ati: “Nyowe n’abandi beegyesa twaherize kubahandiikisa. Mureebe yaaba nimubaasa kuteeraho kwega Orujapani.” Harvey akarahuka kwega orurimi oru.

Tukahika omuri Japan omuri 1955, kandi hakaba hariho ababuurizi 500 omu ihanga rwona. Harvey akaba aine emyaka 26, kandi nyowe nkaba nyine 24. Tukoherezibwa kuza kuheereza aha mwaro gw’orurembo Kobe, ahu twabuurire kumara emyaka ena. Bwanyima tukashemererwa ku twayetsirwe kugaruka kutaayaayira ebibiina, haihi n’orurembo Nagoya. Tukaba nitukunda obuheereza bwaitu, ab’eishe-emwe, eby’okurya, n’emyanya y’ebyaro. Bwanyima, tukatunga ogundi mugisha ogw’okukorera Yehova.

Bwanyima y’emyaka eshatu turikutaayaayira ebibiina, ofiisi y’eitaagi eya Japan ekatushaba yaaba nitubaasa kuza kuheereza omuri Taiwan omu bantu abarikwetwa Abaamisi. Haine abaabaire beehagwire aha mazima, kandi kikaba nikyetengyesa  ow’eishe-emwe orikugamba gye Orujapani kuhwera omu kutereeza embeera. * Tukaba nitukunda kuheereza omuri Japan, n’ahabw’ekyo kikatugumira kucwamu. Kwonka Harvey akaba ayegire kwikiriza buri buheereza, n’ahabw’ekyo tukacwamu kugyenda.

Tukahikayo omu Kwaikumi-na-kumwe 1962. Taiwan ekaba aine ababuurizi 2,271, kwonka abarikukira obwingi n’Abaamisi. Tukaba twine kubanza twayega Oruchaina. Tukaba twine ekitabo ky’okutuhwera kwega orurimi orwo n’omwegyesa owaabaire atarikumanya Rungyereza, kwonka nabwo tukarwega.

Ahonaaho tuherize kuhika Taiwan, Harvey akatooranwa kuba omuheereza w’eitaagi. Rikaba riri rikye, n’ahabw’ekyo akaba naabaasa kukora emirimo ye kandi aheereza n’ab’eishe-emwe Abaamisi kumara saabiiti ishatu buri kwezi. Kandi obumwe n’obumwe akaba aheereza nk’omureeberezi wa disiturikiti arikuha embazo aha nteerane empango. Harvey akaba naabaasa kuha embazo omu Rujapani, kandi ab’eishe-emwe Abaamisi bakaba nibamwetegyereza. Kwonka, gavumenti ekaba neeyikiriza enteerane z’ediini omu Ruchaina rwonka. N’ahabw’ekyo Harvey, n’obu araabe yaabaire atarikugamba gye Oruchaina, akaba aha embazo omu Ruchaina reero ow’eishe-emwe azivunuura omu Amisi.

Taiwan ekaba neegyendera aha biragiro by’ekinyamahe, n’ahabw’ekyo ab’eishe-emwe bakaba baine kushaba orusa kugira enteerane empango. Kikaba kitoorobi kutunga orusa, kandi poriisi obwire obwingi ekaba neeyeziringa kubaha orusa. Poriisi ku yaabaire eyanga kutuha orusa omu saabiiti y’oruteerane, Harvey akaba ashutama aha poriisi kuhitsya baatuha orusa. Ahabw’okugira ngu kikaba nikikwatsa abaporiisi enshoni kureeba otari w’eihanga ryabo ashutami aha poriisi ategyereize, akakoryo ako kakakora.

Omu saabiiti ezi twabaire nitumara n’ab’eishe-emwe, tukaba tugyenda kumara eshaaha nk’emwe n’okurengamu, turikutemba enshozi kandi turikwambuka emigyera. Ninyijuka obu naabanza kutemba orushozi. Bwanyima y’okurya kyantsya ahonaaho, tukatemba baasi shaaha 5:30 z’akasheeshe kuza omu kyaro kya hare, twayambuka omugyera, kandi twatemba n’orushozi. Ahabw’okugira ngu rukaba rutungami munonga, ow’eishe-emwe owaabaire anyebembeire omu kutemba ebigyere bye bikaba biteebaine n’amaisho gangye.

Omu kasheeshe ako, Harvey akabuurira n’ab’eishe-emwe b’ekicweka ekyo, kandi nyowe naabuurira nyenka omu kyaro ky’abantu abarikugamba Orujapani abarikutuura omu kyanga ekyo. Shaaha nka mushanju z’eihangwe, nkahwamu amaani naagira oruzengyerera ahabw’okumara obwire bwingi ntakariire. Nkabugana Harvey, ku yaatsigaire wenka. Harvey akaba yaaheza kuha abantu magaziini reero baamuhamu amahuri ashatu mabisi. Akanyoreka oku ndikubaasa kurya eihuri ndikufumura aha rubaju reero nkarinyuunyuuta. N’obu riraabe ryabaire nirireebeka kubi, nkekwatirira naaryaho rimwe. Kwonka shi n’oha waabaire naija kurya eihuri erya kashatu? Niinye,  ahakuba Harvey akaba atarikwenda kumpeeka kunshuumya orushozi obwo enjara yaaheza kundyembya.

Aha izooba ry’oruteerane oruhango orw’ekiro kimwe, nkahikwaho embeera y’omutaano. Tukaba nituraara omu ka y’ow’eishe-emwe haihi n’Ekyombeko ky’Obukama. Obu Abaamisi barikutwara okwoga nk’ekintu kikuru munonga, muka omureeberezi orikutaayaayira ebibiina akatuteebeekanisiza amaizi g’okwoga. Harvey akaba akiine eby’okukora, yaangira ngu mbanzeyo. Bakatuha ebintu bishatu eby’okukoresa kwoga: ebaketi y’amaizi garikufuka, ey’agarikwotsya, n’ebaafu erimu busha. Ekyantangaarize, muka omureeberezi ogwo akabita aheeru y’enju aharikureebana n’Ekyombeko ky’Obukama ahu ab’eishe-emwe baabaire bari barikutebeekanisiza oruteerane oruhango. Nkamushaba kumpa orutimbe. Akandeetera ekipapura kya purasitika ekirikureeberwamu! Nkaba niinyenda kweshereka enyima y’enju, kwonka hakaba hariyo embaata zirabize emitwe yaazo omu rugo zeteekateekire kushonda weena owaazihika haihi. Nkateekateeka nti: ‘Ab’eishe-mwe bahugiire aha mirimo tibarikubaasa kumanya ngu ndiyo niinyoga. Kandi naaba ntoogire, nikiza kubagwisa kubi. Ka ngumire embeera egi!’ N’ahabw’ekyo nkooga.

Harvey akeetegyereza ngu ab’eishe-emwe Abaamisi bakaba nibagumirwa kutunguuka omu by’omwoyo ahabw’okuba bakaba bateegire, kandi bataine n’ebitabo. Ahabw’okugira ngu orurimi rw’Amisi rukaba rutandikire kuhandiikwa omu nyuguta z’Orurooma, kikareebeka nk’eky’obwengye kwegyesa ab’eishe-emwe kushoma omu rurimi rwabo. Eki kikaba kitoorobi, kwonka ab’eishe-emwe bakahendera babaasize kurweyegyesa. Ebitabo by’Amisi bikatandika kukoresibwa omu myaka ya 1960, kandi 1968, bakatandika kushohoza Omunaara gw’Omurinzi omu rurimi rw’Amisi.

Kwonka, gavumenti ekaba neeremesa ebitabo ebitari mu Ruchaina. Kubaasa kwetantara oburemeezi, Omunaara gw’Omurinzi omu rurimi rw’Amisi gukatandika kujanjaazibwa omu miringo etari emwe n’emwe. Nk’eky’okureeberaho, kumara obwire, tukaba nitukoresa Omunaara gw’Omurinzi oguri omu rurimi rw’ekijwangye Mandarin na Amisi. Omuntu ku yaabaire ayemurugunya, kikaba kireebwa nk’abariyo nitwegyesa abantu Oruchaina. Okwiha obwo, ekibiina kya Yehova kibaasise  kuteera ebitabo bingi omu rurimi rw’Amisi kuhwera abantu abacureezi kwega amazima ga Baibuli.​—Byak. 10:34, 35.

Omu myaka ya 1960 na 1970, ab’eishe-emwe Abaamisi bakaba batarikugyendera aha mitindo ya Ruhanga. Ahabw’obutetegyereza gye emisingye ya Baibuli, bamwe bakaba nibashambana, barikutsinda, kandi barikukoresa etaabe n’amairungi. Harvey akataayaayira ebibiina bingi, kuhwera ab’eishe-emwe kwetegyereza emiteekateekyere ya Yehova aha nshonga ezo. Omuri kumwe aha kutaayaaya okwo, nibwo twahikwaho embeera eyaagambwaho omu kutandika.

Ab’eishe-emwe abacureezi bakaba beeteekateekire kuhinduraho, kwonka abandi bakanga, kandi omubaro gw’ababuurizi gukatuuba kuruga aha babuurizi abarengire 2,450 kuhika ahari 900 omu myaka ebiri. Eki buzima kikaba ni kimaramu amaani. Kwonka, tukaba nitumanya ngu Yehova tarikubaasa kushagika ekibiina ekitashemeire. (2 Kor. 7:1) Aha muheru, ab’emicwe mibi ku baihirwe omu kibiina, Yehova akakiha emigisha, hati Taiwan eine babuurizi abarikurenga 11,000.

Kuruga omu myaka ya 1980 n’okweyongyerayo, tukareeba ebibiina by’Amisi nibitunguuka omu by’omwoyo, kandi Harvey akaba naabaasa kumara obwire n’Abachaina. Akashemererwa kuhwera ba iba ba banyaanyazi-itwe kuba abaheereza ba Yehova. Ninyijuka oku yaashemereirwe obu omwe aha bashaija abo yaashaba Yehova omurundi gw’okubanza. Naanye niinshemererwa ahabw’okwegyesa abantu abacureezi kwirira haihi Yehova. Kandi nyine obugwagye ahabw’okuheereza aha ofiisi y’eitaagi eya Taiwan n’abaana b’omwe aha beegi abu naabaire ninyegyesa Baibuli.

Hati, tindi n’omukundwa wangye. Bwanyima y’okumara emyaka nka 59 omu bushwere, nkunzi yangye Harvey akafa omu Kwokubanza 1, 2010, bwanyima y’okunyangarazibwa ekookoro. Akaba amazire emyaka nka 60 omu buheereza bw’omutaano! Na hati buzima nkimwiniire orushusho rwingi. Kwonka ka naashemereirwe munonga kumushagika obu omurimo gwabaire nigukitandika omu mahanga abiri! Tukeega kugamba endimi ebiri ezigumire kwega ez’Asia, kandi we Harvey akeega n’okuzihandiika.

Bwanyima y’emyaka mikye, Akakiiko Akareeberezi kakacwamu ngu kikaabaire kirungi nyowe kugaruka omuri Australia ahabw’emyaka ya bukuru. Nkabanza kuteekateeka ngu, ‘niinyenda kuguma omuri Taiwan.’ Kwonka Harvey akaba anyegyeise kwetantara kwanga kukorera Yehova, n’ahabw’ekyo nkacwamu kugyenda. Bwanyima, nkareeba ngu kikaba kiri eky’obwengye kucwamu batyo.

Ebiro ebi, nimpeereza aha ofiisi y’eitaagi eya Australasia omu saabiiti, kandi nimbuurira n’ekibiina aha wiikenda. Ninshemererwa kukoresa Orujapani n’Oruchaina kuhwera abarikwija kurambura aha Beseeli. Kwonka, ntegyereize n’ekihika eizooba ry’okuzooka, ndikumanya ngu Harvey, owaabaire atarikwanga kukorera Yehova, hati naakimwijuka.​—Yoh. 5:28, 29.