Harvey na a bee lu gbɛnɛ nɛɛ loo nia pya ye wuga nɛɛdam a. Pya wa butɔ bee yii bu kaka bie Midland Junction, ziī buɛ̄ a le naɛsī loo enaani wee dɛp kii li Australia sɔ̄ nu bee le enaɛ̄ bu pya zua 1930 a. Harvey bee wereloo Jɛhova sa a bee liamaā sɔ̄ a bee le 14 zua. Sɔ̄ esaa, a bee nɔ esi ɛrɛgeba tam alu enɛ ye bu bɔŋanaloo. Sɔ̄ a bee lege etera, a ɛrɛ sɔ̄ a naa bee yiga ebuū Watchtower bie enɔānu, nyɔnɛbee a bee kɛɛrɛ kɔ a naa nyim etura. Mɛ ziī wuga nɛɛdam bee kɔ nɛ Harvey kɔ: “Sɔ̄ ziī nɛɛ a le bu bɔŋanaloo Jɛhova a kɔ nɛ kɔ o doo ziī nu, a kɛɛrɛ kɔ o dap doo!”—2 Kɔr 3:5.

M bee su kaka ue bie England, gbaāloo na ka le na gbɛnɛ wuga nɛɛwa. Na tɛ bee i gbānasī tua sɔ̄, mɛ sɔ̄ esaa a bee sunage kaka. M bee liamaā sɔ̄ m bee le ɛrɛnia zua, kere a naa bee ye nia. M bee seeasī kɔ m lue nɛɛ sɛmdee dɛ̄dɛɛ̄ sɔ̄, lɛɛ sɔ̄ esaa m lu nɛɛ zue ue dɔɔ̄na edo. Kerewo, na tɛ naale elɛɛ mɛ bahloo kɔ m sɛmdee mmɛ sɔ̄ m elua 21 zua. Mm bee gbī etɔɔ̄ bu nyɔɔnyɔɔ sɔ̄ doo  wo. Nyɔɔwo sɔ̄ m bee le 16 zua, a bee mɛ lɛɛbaloo kɔ m kii kpaɛ̄ na gbɛnɛ wuga nɛɛwa a bee le Australia. Bu kpɛdumɛ, sɔ̄ m elua 18 zua, m bee bɔātɛ̄ si tam sɛmdee.

M bee zɔ̄ŋia Harvey bie Australia. A bee nia baɛ ii lo esitam nɛ Jɛhova doodoo pya zue ue aā ziī edo yii ziī. E i bee iya ziī bu zua 1951. Sɔ̄ i esiatam sɛmdee loo baɛ zua, a bee lu ekɔ i si tam kuūdɛɛ̄loo sɛkiut. I wee si tam kuūdɛɛ̄loo sɛkiut gbɛnɛ-edo kɛ̄ a le dee kɛ̄ enaani wee dɛp kii li Australia, nyɔɔwo i wee ɔp fah tɛɛ̄ gbɛnɛ-edo kagara kɛ̄ le kɛ̄ a binia.

A bee lu ekue i kɔ i si lo eree 25 class Tɔkpa Gilɛd a bu zua 1954. Nu i gaa bee ɛmadɛɛ̄ lo a le zue ue dɔɔ̄na edo, esira sɔ̄ sɔ̄ naa binia! I bee yii bu fah maā ina New York sa bɔātɛ̄ biibahkɛ̄ nɔ Baibol. I bee nɔnage muɛ̄ ue pya Spain, lo a bee le yɛɛ pya nu alu etɔgɛ bie lo tɔkpa, e a bee agaloo Harvey lo enɔ nyɔɔbee a naa dap kue ‘r’ dookɛ̄ pya Spain wee kue doo.

Bie lo tɔkpa, pya i nɛɛ tɔgɛ nu bee kɔ ɛrɛgeba nɛɛ a ɛrɛ taɛ lo esitam bie Japan a yere bee lo enɔ muɛ̄ ue pya Japan. I bee biaɛfii kɔ i lɛɛebaloo kɔ bɔŋanaloo Jɛhova a sagɛ kɛ̄ i si tam i nɛ. Sɔ̄ esaa, ziī i nɛɛ tɔgɛ nu a kura Albert Schroeder, bee yere nukuādɛɛ̄ loo kɔ ii bee yere bee lo enɔ muɛ̄ ue pya Japan. A bee i kɔ nɛ kɔ: “Siaa kɛ̄ kɛɛrɛ.” Sɔ̄ ii bee yigage e’ɛm i bee, wuga Schroeder bee kɔ: “Mda le pya dɔɔ̄na nɛɛ tɔgɛ nu eyere bui bee. Ɛbaa lo a le bui dapge nɔ muɛ̄ ue pya Japan.” Harvey bee nwaabah para lo muɛ̄ ue.

I bee ina Japan bu zua 1955 sɔ̄ aba 500 pya zue ue na a bee le bu dɛ̄dɛɛ̄ lo edo a. Harvey bee le 26 zua, e mda bee le 24 zua. A bee lu eyere i ture Kobe, kɛ̄ i bee si tam zue ue loo nia zua. Bu i bee ɛɛ sɔ̄ a bee lu ekɔ i sikɛ̄ si tam kuūdɛɛ̄loo sɛkiut, e i bee si tam bie kɛ̄ a waɛloo gbɛnɛ buɛ̄ Nagoya. Dɛ̄dɛɛ̄ nu a le loo i esiatam bee i nia, lo a le pya i wuga, nuede pya lo barasī, le kɛ̄ lo barasī mɛā doo. Sɔ̄ sɔ̄ naa binia, i bee ɛrɛ dɔɔ̄na dee edoo ɛrɛgeba nu Jɛhova kɔ i doo.

Sɔ̄ i esiatam kuūdɛɛ̄loo sɛkiut loo taa zua, tɔ naatam a le Japan bee i bip lo a le eniage i esitam bie Taiwan yɛɛ pya a wee kɔ muɛ̄ ue Amis. Pio nɛɛ a le Amis ebee anna yira, e tɔ  naatam a le Taiwan gbī wuga nɛɛdam a para kɔ muɛ̄ ue pya Japan leere lokwa a dap yerebah kwa lo kɛ̄tɔɔ̄. * Bu i bee ɛɛ loo tam i gaa bee si bie Japan, nyɔɔwo, a bee le biɛafii a aga. Mɛ Harvey ebee nɔ esi ɛrɛgeba tam alu enɛ ye, nyɔɔwo, i bee yiga lo esi.

I bee ina lo kɛ̄ bu Lop Le Eziī Enɔɔ̄ bu zua 1962. Pya zue ue a bee le Taiwan lo sɔ̄ bee lu 2,271, e gbɛnɛ-edo aba bee le pya Amis. Mɛ bu tua dɔ, bee lu ebɛɛ̄ kɔ i dasī nɔ muɛ̄ ue pya China. I bee ɛrɛ aba ziī ekpo kpa enɔā, le ziī nɛɛ a wee i tɔgɛ lo a naa dā Beke, mɛ i bee nɔ.

Nwīgbagbara sɔ̄ aā sɔ̄ i bee ina Taiwan, bee lu ekɔ Harvey a kuūdɛɛ̄loo tɔ naa tam a le lo barasī. Lo tɔ naa tam bee tera, nyɔɔwo Harvey bee dap kuūdɛɛ̄loo ye tam bie tɔ naa tam sa nyɔɔnɛ nage pya wuga a le Amis siniatam nu alu taa kaɛ bu ziī ziī enɔɔ̄. Aā ziī sɔ̄ yii ziī, a wee sinage tam doodoo nɛɛ kuūdɛɛ̄loo district, sa a wee nɛnage ekɔaue bie asɛmbli. Harvey ebee dap nɛ pya lo ekɔaue bu muɛ̄ ue pya Japan, sa pya wuga a kɔ muɛ̄ ue Amis ebee dānage beeloo. Kerewo, aba muɛ̄ ue pya bɛbɛɛ bee lɛɛbaloo kɔ a dap lu esu kɔāue bie ɛrɛgeba zɔ̄zɔ̄ŋia pya yigabari na China. Nyɔɔwo, sɔ̄ Harvey gaa piigage lo ekɔ lo muɛ̄ ue a, a wee nɛ lo ekɔaue bu muɛ̄ ue China sa dɔɔ̄na wuga nɛɛdam tap ture bu muɛ̄ ue pya Amis.

Pya nɔ̄ na a gaa bee bɛɛ Taiwan lo sɔ̄ a, nyɔɔwo pya wuga wee bara lokwa ba dap ɛrɛ asɛmbli. Lo babara naa wee waɛ, e pya polis naa wee wa nwaabah nɛ dee. Lo e’ina taɛ kaɛ asɛmbli sa pya polis sii biige bahtɛ̄ kpa, Harvey wee ɛŋɛtɛ̄ bia polis station mmɛ sɔ̄ ba edoo wo. Kuma sɔ̄ a wee lu nu kɛɛ kɔ nɛɛ a aa dɔɔ̄na edo a ɛŋɛtɛ̄ bia wa polis station a, ba wee nwaabah biibahtɛ̄ lo kpa.

Bu pya kaɛ i bee tɔma kpaɛ̄ pya lo wuga, i wee kiā nu alu ziī awa ale ee wo, dɛɛ̄gi egu sa ɔpgi fah tɛɛ̄ nyɔɔ maā. M nyɛŋiabu tua sɔ̄ m bee dɛɛ̄ egu. Sɔ̄ i ebagara de nuede lɔɔrɛ sah, i bee yii fah sɔ̄ elua 5:30 lɔɔrɛ sa kii ziī ebini buɛ̄, kiā tɛɛ̄ nu egā ziī gbɛnɛ pɛnɛ, sa dɛɛ̄ ziī gbɛnɛ egu akii nyɔɔ. Lo egu bee kii nyɔɔ mmɛ kɛ̄ sɔ̄ m dana dɛɛ̄ ɛma pya wuga a gaa bee mɛ zasī, wa ekaɛtɔ bee le kunakuna loo na ekobee.

Lo lɔɔrɛ, Harvey bee nyɔɔnɛ pya wuga alu lo buɛ̄ zue ue, sɔ̄ aba mda bee zue ue bu ziī nwīgbagbara buɛ̄ pya a kɔ Japan wee tɔɔ̄. Sɔ̄ ebee luge nu alu ziī eleke sɔɔ̄pie, bee bee kɔ m gbaa nyɔɔbee ebee binia sɔ̄ m bee denu. Bu kpɛdumɛ, sɔ̄ m bee zɔ̄ŋia Harvey, lɔgɔ pya wuga naa bee ye lena loo. Harvey ebee su pio i kpa nyaana loo taa bee enyim kɛ̄ kɔɔ̄. A bee mɛ tɔgɛ kɛ̄ e’ɔ̄ maā bu doo tɛ̄maloo ekɔ m tubara edee loo sa m piora tɛ̄ma lo kɛ̄. M bee ɔ̄ maā bu ziī bee kere a naa bee mɛ kpe nu. Mɛ mɛɛ̄ na e’ɔ̄ maā bu lo kpɛdumɛ bee kɛ̄ kɔɔ̄ a? Ɛɛ mda na m bee ɔ̄ a, kuma sɔ̄ Harvey naale edap mɛ dana tɛ̄ma nyɔɔ egu lo lɛɛraloo doo kɔ m gbaa lo.

Bie ziī sɛkiut asɛmbli, m bee kpesī ziī e’aga nu finiabah. I gaa bee tɔɔ̄ tɔ ziī wuga nɛɛdam a le kpaɛ̄ Tɔ Nɔnu Buɛ̄-mɛnɛ. Kuma sɔ̄ pya Amis wee ɛp bira maā nua kaāna nu a kuī a, wa lo nɛɛ kuūdɛɛ̄loo sɛkiut bee kwa ziī kɛ̄ bira maā i nɛ. Harvey gaa bee doo dɔɔ̄na nu, nyɔɔwo a bee kɔ m dasī kii wee bira. Lo kɛ̄ bira maā bee ɛrɛ taa nu bira maā bu: ziī lo tɔɔ maā le bu, lo miā maā le bu, le ziī dɔɔ̄na ekobu fɛrɛ. A bee mɛ lu nyɛŋia loo kɔ wa lo nɛɛ kuūdɛɛ̄loo sɛkiut bee su pya lo nu sere kɛ̄ ee, kɛ̄ alu lera sī loo Tɔ Nɔnu Buɛ̄-mɛnɛ, kɛ̄ pya wuga nɛɛdam bee le gaa si tam lɛɛ asɛmbli gae bɔātɛ̄. M bee ye bara kɔ a nɛ mɛ ɛrɛgeba nu m su kpɛɛra dee. A bee mɛ nɛ ziī eba nu a dap lu emuɛ̄ nɛɛ tɛ̄ma bu. M bee kɛɛrɛ kɔ m dabe obia kii dumɛ be alu kina kɛ̄ gɔā, mɛ ziī enuɛ̄ a bee kɔɔ̄ beke bee le lo kɛ̄ sa gbī etia ɛrɛgeba nɛɛ a tɔɔ̄ waɛloo lo kɛ̄. M bee kɛɛrɛbu na loo kɔ: ‘Pya wuga nɛɛdam ama le elu kiri-kiri sa ba naale esuā kɔ m gaa bira maā. E lo mm bira maā, bu wa ebiira. M aadee bira!’ Nyɔɔwo, m bee bira.

Harvey bee muɛ̄ kɔ pya wuga a kɔ muɛ̄ ue Amis gaa bee zura lo ekiisī bu edɔɔ̄ nyɔɔbee gbɛnɛ-edo aba naa bee suā kpa, e lɔgɔ kpa naale bu wa muɛ̄ ue. Kuma sɔ̄ ebee lu esu eyuu kpa pya Rom ɛma muɛ̄ ue pya Amis a, a bee bɔloo kɔ alu etɔgɛ pya lo wuga kɔ ba a buū wa muɛ̄ ue. Lo ama bee lu kaāna gbɛnɛ tam, mɛ a bee sira kɔ pya lo wuga bee dap nɔ nu akiiloo Jɛhova nyɔɔ wa loo. Pya i kpa bu muɛ̄ ue Amis bee bɔātɛ̄ le kɛ̄ aābu zua 1966, e bu zua 1968, a bee bɔātɛ̄ lu elɛɛ Watchtower tɔ bu muɛ̄ ue Amis.

Kɛādoo, pya bɛbɛɛ bee kpaɛ̄ pya kpa a naale bu muɛ̄ ue China. Nyɔɔwo, lokwa taāŋa naa dɔ, Watchtower bu muɛ̄ ue Amis wee lu elɛɛ tɔ bu keekee sīdee. Bu edoba, bu pio enɔɔ̄, bee lu elɛɛ lo ekpo Watchtower i wee nɔ bu bɔŋanaloo tɔ, e ba bee gba muɛ̄ ue Mandarin le Amis ɛma. Lo ziī nɛɛ gbī esuā nu i gaa doo, lo sɔ̄ e kura kɔ i gaa bee su muɛ̄ ue China tɔŋɛnu pya lo buɛ̄. Aāge lo sɔ̄, bɔŋanaloo Jɛhova edora kɔ booboo pya i kpa a le kɛ̄ bu muɛ̄ ue Amis lokwa  a dap yerebah nɛ pya wuga ama kɔ ba a nɔ kaka ue.—Doonu 10:34, 35.

Bu pya zua 1960 le 1970, gbɛnɛ-edo pya wuga a bee le Amis naa gaa bee tɔɔ̄na dum a gbaaloo daakuu Bari. Kuma sɔ̄ ba naa bee dābeeloo pya biakɛ̄ lok Baibol leere a, pio aba gaa bee kunagā, ɔ̄ mii tɛɛā dɛɛ̄, ɔ̄ sɔɔ̄ sa taa betel nut. Harvey bee si gbɛnɛ-edo bɔŋanaloo, sa piiga lo eyerebah nɛ pya lo wuga ama kɔ ba a suā kɛ̄ Jɛhova ɛp pya dogo ama doo. A bee le sɔ̄ i gaa bee si ziī pya lo kiā na nu m bee kɔ tua sɔ̄ a bee i sira loo a.

Pya wuga a kumalookɛ̄ bee gbī enyaa, mɛ alu ekiɛ̄nu kɔ gbɛnɛ-edo aba naa bee yiga, e bu nu alu 20 zua, buā pya zue ue a bee le Taiwan bee dɔ kiikɛ̄ aaloo 2,450 sa obia lu nu a dap lu 900. Lo ama bee i ɔɛloo. Kerewo, i bee suā kɔ Jɛhova naale enɛ leelee bɔŋanaloo a naa le ɛɛ. (2 Kɔr 7:1) Nu a bee sira na kɔ bee lu elɛɛ pya lo ekwɔ dogo, sa tɛ̄maloo leelee Jɛhova, Taiwan ɛrɛ nu a eeloo 11,000 pya zue ue anyaawo.

Aābu pya zua 1980 kiisī, i bee muɛ̄ kɛ̄ kɛ̄tɔɔ̄ bu edɔɔ̄ pya wuga a bee le bu pya bɔŋanaloo a kɔ muɛ̄ ue Amis bee yiiloo doo, sa Harvey bee dap su gbɛnɛ-edo sɔ̄ tɔ̄ma kpaɛ̄ pya a kɔ China. A bee ye ɛɛrɛbu lo eyerebah nɛ dam gbɛnɛ-edo pya wuga nɛɛwa kɔ ba a taāŋabah Bari. M nyɛŋiabu sɔ̄ a bee kɔ dua kɛ̄ bu ye bee ɛɛ doo sɔ̄ ziī lo gbara ama bee yere kara nɛ Jɛhova tua sɔ̄ bu ye dum. Mda ɛrɛnage ɛɛbu kɔ m bee dap tɔgɛnu pya nɛɛ le beenyiɛ kɔ ba a tɔɔ̄ waɛloo Jɛhova. M bee ɛrɛnage ɛɛbu aāloo nyɔɔnɛ ziī nwiīnɛɛdam le nwiīnɛɛwa nɛɛ m wee nɔɛ̄ Baibol si tam bie tɔ naa tam li Taiwan.

Nyaawo, na dam naa mɛ lena loo. Sɔ̄ i ebee iya ziī bu nu alu 59 zua, nale Harvey bee u 1 biradee bu Tua Enɔɔ̄, 2010, aāloo dumɛ kansa. A bee suge nu a waɛloo 60 zua siātam mmɛɛ̄ sɔ̄. A lege gaa mɛ kiɛ̄ kaāna. Mɛ naa ɛp dua ɛɛbu m bee ɛrɛ lo enyɔɔnɛ ye si tam bu pya sɔ̄ ama bu baɛ gbɛnɛ-edo ama a! I bee nɔ ekɔ baɛ e’aga muɛ̄ ue pya Asia, sa Harvey bee nɔnage e’ɛm pya lo muɛ̄ ue nyɔɔ tam a gaa bee si.

Sɔ̄ pio zua etɛ̄na, Eku A Baɛbee bee biaɛfii kɔ elee m obia kii Australia nyɔɔbee m e’ina gaa ana. Tua nu m bee kɛɛrɛ na kɔ, ‘Mm gbī e’aa Taiwan.’ Mɛ Harvey bee mɛ tɔgɛ kɔ mm ɛrɛ edoo eeye nɛ bɔŋanaloo Jɛhova, nyɔɔwo mm bee gbī edoo wo. Sɔ̄ esaa, m bee muɛ̄ suānu a le bu lo biaɛfii.

Nyaawo, m gaa nyɔɔnɛ tɔ naa tam a le Australasia siniātam taɛyɛɛ kaɛ, sa sɔ̄ elua takaɛ, m gbaaloo pya bɔŋanaloo a le lo kɛ̄ siniātam. Sɔ̄ m le Bɛtɛl, bu mɛ ɛɛ lo esu muɛ̄ ue Japan le China kɔāue nɛ pya nɛɛ alu wee ɛp lo tɔ naa tam. Kerewo, m gaa tɔɔ̄ baɛ aakɛ̄ bu luh alu eyira yii loo, e m suā kɔ Harvey a naa wee doo eeye nɛ Jɛhova a, le bu ye ekɛɛrɛ.—Jɔn 5:28, 29.