Харвийӕн ма адтӕй ӕртӕ кӕстӕр ӕнсувӕри. Сӕ бийнонтӕ рӕстдзийнадӕ базудтонцӕ 1930 ӕнзти, Нигулӕн Австралий горӕт Мидленд-Джанкшени. Еци рӕстӕги экономикӕ хъӕбӕр лӕгъуз уавӕрмӕ ӕрхаудтӕй. Харви донаргъуд райста 14 анзи ибӕл ку цудӕй, уӕд, уомӕн ӕма Йегови берӕ уарзта. Уобӕл берӕ нӕ рацудӕй, уотемӕй балӕдӕрдтӕй еу ӕхсидзгӕ гъуддаг: ӕмбурди дин ӕнсувӕртӕ ести ку баихӕс кӕнонцӕ, уӕд ӕй бакӕнун гъӕуй. Еухатт ин баихӕс кодтонцӕ ӕмбурди «Гъӕуайгӕнӕн мӕсуг»-и статья бакӕсун. Фал Харвимӕ уотӕ кастӕй, ӕма ӕ бон не ’суодзӕй. Ӕма ин уӕд еу ӕнсувӕр загъта: «Йегови организаций дин ести ку баихӕс кӕнунцӕ, уӕд ӕй ӕнсувӕртӕ фӕззонунцӕ, ке имӕ исарӕхсдзӕнӕ» (2 Кор. 3:5).

Ӕз, мӕ мадӕ ӕма мӕ хестӕр хуӕртӕ рӕстдзийнадӕ базудтан Англий. Мӕ фиди зӕрдӕмӕ фиццӕгти нӕ цудӕй Йеговӕн ке лӕггадӕ кӕнӕн, е, фал нӕмӕ фӕстагмӕ е дӕр ӕрбайеу ӕй. Кӕд мӕ фиди нӕ фӕндадтӕй, уӕддӕр донаргъуд райстон, 10 анзи дӕр мӕбӕл ку нӕма цудӕй, уӕд. Ӕма мӕхецӕн нисан исӕвардтон, пионерӕй ке лӕггадӕ кӕндзӕн, уой фӕсте ба миссионерӕй дӕр. Фал мӕ мӕ фидӕ пионерӕй лӕггадӕ кӕнун нӕ бауагътайдӕ, цалинмӕ мӕбӕл 21 анзи не ’сӕнхӕст адтайдӕ, уӕдмӕ. Уойбӕрцӕ хезун ба мӕ нӕ фӕндадтӕй. Ӕма мӕбӕл 16 анзи ку исӕнхӕст ӕй, уӕд мӕ Австралимӕ мӕ хуӕрӕмӕ рауагъта. Уоми ба мӕбӕл 18 анзи ку исӕнхӕст ӕй, уӕд пионерӕй лӕггадӕ кӕнун райдӕдтон.

Харвий хӕццӕ дӕр, Австралий ку адтӕн, уӕд базонгӕ дӕн. Нӕ дууей дӕр хъӕбӕр фӕндадтӕй миссионертӕй лӕггадӕ кӕнун. 1951 анзи ба нӕ цард байеу кодтан. Пионертӕй дууӕ анзи ку ралӕггадӕ кодтан, уӕд Харвий районон цӕстӕдарӕгӕй иснисан кодтонцӕ, ӕз ба ин ӕнхус  кодтон. Нӕ район Нигулӕн Австралий адтӕй ӕма адтӕй хъӕбӕр устур. Ӕма нӕ тӕвдити хъӕбӕр идард рауӕнтӕмӕ цӕун гъӕуидӕ.

1954 анзи нӕ фӕххудтонцӕ Галаади скъоламӕ, 25 къласмӕ. Е ба уобӕл дзорӕг адтӕй, ӕма тагъд гъӕуама нӕ зӕрди фӕндӕ исӕнхӕст адтайдӕ. Нью-Йоркмӕ науӕбӕл исхъӕрдтан. Скъолай ахур кӕнгӕй Библи арф ӕртастан, удта ма испайнаг ӕвзаг дӕр ахур кодтан. Фал Харвийӕн ӕнцон н’ адтӕй еци ӕвзаг ахур кӕнун, уомӕн ӕма ин нӕ уадӕй испайнаг «р» дзорун.

Галаади скъолай нин нӕ ахургӕнгутӕ загътонцӕ, Японий лӕггадӕ кӕнун ке фӕндуй, етӕ, дан, сӕхе япойнаг ӕвзаги курситӕмӕ ниффинсӕнтӕ. Мах ба расагъӕс кодтан, кумӕ нӕ ӕрветонцӕ, уордӕмӕ рандӕ ун хуӕздӕр уодзӕй, зӕгъгӕ, ӕма нӕхе курситӕмӕ нӕ ниффинстан. Минкъий фӕстӕдӕр уой нӕ ахургӕнгутӕй еу, Альберт Шрёдер базудта ӕма нин уотӕ, никкидӕр ма, дан, расагъӕс кӕнтӕ. Фал мах уӕддӕр дузӕрдуг кодтан. Ӕма нин уӕд загъта, нӕхуӕдтӕ, дан, уӕ ниффинстан еци курситӕмӕ ӕма, дан, бавзаретӕ. Ӕма ӕцӕгӕйдӕр, Харвийӕн япойнаг ӕвзаг ахур кӕнун дзӕвгарӕ ӕнцондӕр адтӕй.

Японимӕ ӕрцудан 1955 анзи. Уӕд си 500 игъосунгӕнӕгемӕй ӕндӕр н’ адтӕй. Харвибӕл уӕд 26 анзи цудӕй, мӕнбӕл ба – 24 анзи. Иснисан нӕ кодтонцӕ горӕт Кобемӕ, ӕма си 4 анзи фӕллӕггадӕ кодтан. Уой фӕсте ба Харвий нӕуӕгӕй районон цӕстӕдарӕгӕй иснисан кодтонцӕ, ӕма лӕггадӕ кодтан горӕт Нагойӕмӕ хӕстӕг. Уоми алцидӕр цудӕй нӕ зӕрдӕмӕ: хуӕртӕ ӕма ӕнсувӕртӕ, бунӕттон хуӕруйнӕгтӕ ӕма ӕрдзӕ. Фӕстӕдӕр ба нӕ ӕндӕр бунатмӕ иснисан кодтонцӕ, ӕма бабӕй аци хатт дӕр Йеговӕн «нӕ» нӕ загътан.

Харви 3 анзи районон цӕстӕдарӕгӕй ку фӕллӕггадӕ кодта, уӕд нӕ Японий филиали ӕнсувӕртӕ бафарстонцӕ, Тайванмӕ, дан, уӕ нӕ фӕндуй ӕма «ами» ка хуннуй еци адӕнихаттӕн игъосун кӕнун. Еци ӕвзагбӕл ка дзурдта, еци ӕнсувӕртӕй кадӕртӕ рӕстдзийнадӕ ниууагътонцӕ. Ӕма цӕмӕй иннети дӕр сӕ фӕдбӕл ма ракодтайуонцӕ, уой туххӕй гъудӕй, япойнаг ӕвзаг ка зудта, уӕхӕн ӕнсувӕри ӕнхус *. Японий лӕггадӕ кӕнун нӕ зӕрдӕмӕ хъӕбӕр цудӕй ӕма нӕ уомӕ гӕсгӕ Тайванмӕ нӕ фӕндадтӕй. Фал Харви алкӕддӕр, ци гъуддаг ин баихӕс кӕниуонцӕ, уой исӕнхӕст кӕнидӕ. Ӕма бабӕй аци хатт дӕр исарази ан.

 Тайванмӕ ӕрцудан 1962 анзи ноябри. Адтӕй си 2 271 игъосунгӕнӕги ӕма сӕ фулдӕр адтӕнцӕ амисӕгтӕ. Фиццаг нӕ китайаг ӕвзаг исахур кӕнун гъудӕй. Ӕма нӕмӕ ӕрмӕстдӕр еунӕг киунугӕ адтӕй. Удта ма нин ӕнхус кодта, англисагау ка нӕ дзурдта, уӕхӕн ахургӕнӕг. Фал уотемӕй дӕр китайаг ӕвзаг исахур кодтан.

Минкъий фӕстӕдӕр Харвий иснисан кодтонцӕ филиали цӕстӕдарӕгӕй. Филиал устур ке н’ адтӕй, уомӕ гӕсгӕ Харвийӕн ӕ бон адтӕй, уоми дӕр ӕ ихӕстӕ ӕнхӕст кӕнун ӕма ма мӕйӕ ӕртӕ къуӕрей, амисаг ӕвзагбӕл ка дзурдта, еци ӕнсувӕрти хӕццӕ дӕр лӕггадӕ кӕнун. Рӕстӕгӕй-рӕстӕгмӕ ма Харви облӕстон цӕстӕдарӕгӕй дӕр ралӕггадӕ кӕнидӕ, удта ин конгрессти радзубандитӕ уидӕ. Ӕ бон адтӕй ӕ радзубандитӕ япойнаг ӕвзагбӕл дӕр дзорун ӕма ’й амисаг ӕнсувӕртӕ лӕдӕрдтайуонцӕ, фал хецауади бардзурдмӕ гӕсгӕ дини фембӕлдтӕ ӕрмӕстдӕр китайаг ӕвзагбӕл уадзун ӕнгъизтӕй. Гъема Харви дӕр ӕ радзубандитӕ китайаг ӕвзагбӕл дзурдта, кӕд ин еци ӕвзагбӕл дзорун дзӕбӕх нӕма уадӕй, уӕддӕр. Ӕнсувӕр ба ’й амисагмӕ тӕлмац кодта.

Еци рӕстӕг Тайвани змӕнститӕ цудӕй ӕма ӕнсувӕрти конгресстӕ рауадзунмӕ полицийӕй барӕ ракорун фӕгъгъӕуидӕ. Е уотӕ ӕнцон н’ адтӕй, удта ибӕл берӕ рӕстӕг рандӕуидӕ. Уотӕ ку рауайидӕ, ӕма ма конгресмӕ цалдӕр бони гъӕуй, барӕ ба нин нӕма равардтонцӕ, уӕд сӕмӕ Харви фӕццӕуидӕ. Ӕма ин цалинмӕ еци гӕгъӕди нӕ раттиуонцӕ, уӕдмӕ уоми бадидӕ. Ӕрцӕуӕггаг ке адтӕй, уомӕ гӕсгӕ си полиций косгутӕ фефсӕрми уинонцӕ ӕма ’й берӕ нӕ дариуонцӕ.

Ӕмбурди хӕццӕ ку лӕггадӕ кӕнианӕ, уӕд нӕ фестӕгӕй цӕун берӕ гъӕуидӕ, кӕми сахат, кӕми ба сахат ӕма ӕрдӕг дӕр. Уӕд нӕ хонхмӕ ’схезун фӕгъгъӕуидӕ, уӕдта цӕугӕдони сӕрти рахезун. Гъуди ма ’й кӕнун, фиццаг хатт хонхмӕ куд иссудтӕн, уой. Сӕумӕй цидӕртӕ рахуардтан ӕма ӕхсӕз сахатти дӕр нӕма адтӕй, уотемӕй автобуси рабадтан ӕма идард гъӕутӕй еуемӕ рандӕ ан. Кӕми рахизтан, уордиги ма нӕ фестӕгӕй дӕр цӕун гъудӕй. Гъема цӕугӕдони сӕрти рахизтан, удта нӕ хонхмӕ иссӕун гъудӕй. Гъе уӕхӕн къолӕ си адтӕй, ӕма мӕ разӕй ка цудӕй, еци ӕнсувӕрӕн ӕ къелтӕ мӕ цӕстити баррӕстӕ адтӕнцӕ.

Харви ӕнсувӕрти хӕццӕ игъосун кӕнунмӕ рандӕ ’й, ӕз ба еу минкъий гъӕуи еунӕгӕй игъосун кодтон, япойнаг ӕвзагбӕл ка дзурдта, еци адӕнӕн. Рӕфтӕмӕ гъе уотӕ исӕстонг дӕн, ӕма размӕ цӕун нӕбал фӕразтон. Уӕдмӕ ба Харви дӕр фӕззиндтӕй ӕма ӕ хӕццӕ ӕртӕ хом айки ӕрбахаста, журналтӕбӕл ин сӕ баййивтонцӕ. Ӕма мин ӕй бавдиста, хом айкӕ хуӕрун куд гъӕуй, уой, дууердиги, дан, ӕй фӕцъцъасӕ кӕнӕ ӕма ’й исцъирӕ. Кӕд имӕ мӕ били дӕнттӕ нӕ уадӕнцӕ, уӕддӕр си еу равзурстон. Инней Харви рахуардта. Фал ӕртиккаг ба кӕбӕл ӕруадӕй? Е дӕр мӕнбӕл, уомӕн ӕма фур ’стонгӕй мӕ зӕрдӕ ку багъар адтайдӕ, уӕд мӕ Харви бунмӕ ӕ рагъи кутемӕй хастайдӕ.

Еухатт районон конгресмӕ рандӕ ан, ӕма нӕ, Паддзахади зали рази ка цардӕй, еу уӕхӕн ӕнсувӕр  баиуазӕг кодта. Амисӕгтӕн кӕдзосдзийнади гъуддаг хъӕбӕр устур бунати ӕвӕрд ӕй. Ӕма нин районон цӕстӕдарӕги уосӕ алцидӕр ӕрцӕттӕ кодта, цӕмӕй нӕхе ниртадтайанӕ. Харвий нӕма евдалдӕй, ӕма мин загъта, цо бал, дан, ду ниртайӕ. Ӕртайунмӕ ба нин хуӕрӕ тургъи ниввардта дууӕ къибилай ма тас. Еу къибилай уазал дон адтӕй, иннеми ба – тӕвдӕ. Мӕ тӕккӕ баррӕстӕ ба Паддзахади зали ӕнсувӕртӕ конгресмӕ цидӕртӕ цӕттӕ кодтонцӕ ӕма сӕмӕ зингӕ кодтайнӕ. Ӕма хуӕри рафарстон, неци ӕмбӕрзӕн, зӕгъун, си ес. Ӕма мин целофан ку нӕ рахӕссидӕ! Хӕдзари фӕсте дӕр ӕнгъизтӕй рартайун, фал уоми ба хъӕзтӕ адтӕй. Сӕ сӕртӕ сеткӕй радариуонцӕ ӕма сӕмӕ хӕстӕг ка бацӕуидӕ, уомӕ лӕборгӕ кодтонцӕ. Ӕма ӕз дӕр расагъӕс кодтон: «Цӕй, ка мӕмӕ кӕсуй? Ӕнсувӕртӕ нур сӕ хабӕртти ’нцӕ ӕма мӕ неке фӕууиндзӕй. Мӕхе ку нӕ ниртайон, уӕдта нӕ ка биуазӕг кодта, уони зӕрдихудти бацӕудзӕн». Гъема ӕз дӕр ниртадтон.

Амисаг ӕнсуӕвртӕй беретӕ кӕсун нӕ зудтонцӕ, удта се ’взагбӕл литературӕ ке н’ адтӕй, уой туххӕй син се ’ууӕндундзийнадӕ федар кӕнун зин адтӕй. Еци ӕвзагбӕл 1963 анзи финсунадӕ ку фӕззиндтӕй, уӕд ӕнсувӕртӕ исфӕндӕ кодтонцӕ бунӕттон ӕнсувӕрти се ’взагбӕл кӕсун исахур кӕнун. Е ӕнцон н’ адтӕй. Фал, кӕсун ке базудтонцӕ, уой фӕрци сӕхе бон дӕр адтӕй Библи ӕртасун. 1968 анзи ба нӕ организаци еци ӕвзагбӕл «Гъӕуайгӕнӕн мӕсуг» уадзун райдӕдта.

Фал хецауадӕ ӕрмӕстдӕр китайаг ӕвзагбӕл уагъта литературӕ мухур кӕнун. Гъема цӕмӕй нӕ гъуддаг ма ӕрлӕудтайдӕ, уой туххӕй ӕнсувӕртӕ хъӕбӕр архайдтонцӕ. Зӕгъӕн, журнали статьятӕ китайаг ӕвзагбӕл финст уиуонцӕ, удта ма си ӕ тӕлмац дӕр уидӕ амисаг ӕвзагбӕл. Уой фӕсте нӕ организаци амисаг ӕвзагбӕл берӕ литературӕ рауагъта. Ӕма нӕ литератури фӕрци еци адӕнӕн сӕ бон ӕй рӕстдзийнадӕ базонун (Гъуд. 10:34, 35).

1960–1970 ӕнзти ӕнсувӕртӕй беретӕ Хуцауи закъӕнттӕмӕ гӕсгӕ нӕ цардӕнцӕ. Библий уагӕвӕрдтӕ кӕронмӕ ке нӕ лӕдӕрдтӕнцӕ, уомӕ гӕсгӕ си еуӕй-еуетӕ ӕнӕгъдау цард  кодтонцӕ, фудниуӕзт кодтонцӕ, тамаку думдтонцӕ ӕма бетель ӕууилдтонцӕ. Харви берӕ ӕмбурдтӕ бӕрӕг кодта ӕма ӕнсувӕртӕн ӕнхус кодта, Йеговӕ еци гъуддӕгтӕмӕ ци цӕстӕй кӕсуй, уой балӕдӕрун. Райдайӕни ци хабар радзурдтон, е дӕр нӕбӕл гъе уӕд ӕрцудӕй.

Сӕрниллӕг ӕнсувӕртӕ цӕттӕ адтӕнцӕ сӕ цард раййевунмӕ, фал, гъигагӕн, алке нӕ бафӕндадтӕй. Еци рӕстӕг Тайвани 2 450 игъосунгӕнӕгемӕй фулдӕр адтӕй. Фал 20 анземӕ сӕ нимӕдзӕ дзӕвгарӕ фӕмминкъийдӕр дӕр ӕма ма си байзадӕй еу 900 игъосунгӕнӕги. Уомӕ гӕсгӕ нӕ нифс еу минкъий расастӕй. Фал ӕй зудтан, Йеговӕ ӕрмӕстдӕр кӕдзос организацийӕн ке арфӕ кӕндзӕй (2 Кор. 7:1). Гъема еу афони ӕмбурдтӕ искӕдзос ӕнцӕ. Йеговӕ син арфӕ кодта, ӕма нур Тайвани ес 11 000 игъосунгӕнӕгемӕй фулдӕр.

1980 анзӕй амисаг хуӕртӕ ӕма ӕнсувӕрти ӕууӕндундзийнадӕ федар кӕнун райдӕдта. Харвийӕн фулдӕр рӕстӕг фӕззиндтӕй, ӕма ӕ бон адтӕй китайаг ӕвзагбӕл кӕми дзурдтонцӕ, еци ӕмбурдтӕн ӕнхус кӕнун. Хъӕбӕр цийнӕ кодта, нӕ хуӕртӕй кӕмӕндӕрти сӕ лӕгтӕн рӕстдзийнади надбӕл ӕрлӕуунмӕ ке банхус кодта. Гъуди ма ’й кӕнун, куд цийнӕгӕнгӕй мин дзурдта, еци нӕлгоймӕгтӕй еу Йеговӕмӕ фиццаг хатт куд искувта, уой. Ӕз дӕр цийнӕ кӕнун, берӕ кӕдзосзӕрдӕ адӕнӕн ке банхус кодтон, уобӕл. Удта ма мин хъӕбӕр ӕхцӕуӕн ӕй Тайвани филиали, раздӕр Библи ке хӕццӕ ахур кодтон, еци силгоймагӕн ӕ биццеуи ӕма ӕ кизги хӕццӕ ке лӕггадӕ кодтон.

2010 анзи 1 январи мӕ хъазар цардӕмбал ракӕй рамардӕй. Еумӕ 59 анзи фӕццардан. Харви ӕнхӕстрӕстӕг фӕллӕггадӕ кодта 60 анзей бӕрцӕ. Абони дӕр ма ибӕл хъӕбӕр ферхун кӕнун. Фал еумӕ дууӕ дессаги бӕстеми лӕггадӕ кодтан, ӕма ин ке ӕнхус кодтон, е мин устур цийни хуасӕ ӕй. Мах исахур кодтан дууӕ зин ӕвзаги, Харви ба ма сӕбӕл финсун дӕр базудта.

Харвий фӕсте цалдӕр анзи ку рацудӕй, уӕд Разамонӕг совет унаффӕ рахаста, хуӕздӕр мин ке уодзӕй фӕстӕмӕ Австралимӕ раздӕхун, ӕнзтӕ мӕбӕл сӕ уӕзӕ ке ӕруагътонцӕ, уомӕ гӕсгӕ. Фиццаг мӕ Тайванӕй цӕун нӕ фӕндадтӕй. Фал мӕ Харви еу ӕхсидзгӕ гъуддагбӕл исахур кодта: Йегови организацийӕн «нӕ» макӕд дзорӕ. Ӕма ӕз дӕр исарази дӕн. Фӕстӕдӕр ӕй балӕдӕрдтӕн, е раст унаффӕ ке адтӕй, уой.

Нур лӕггадӕ кӕнун Австралазий филиали. Уолӕфгӕ бӕнтти ба ӕмбурди хӕццӕ фегъосун кӕнун. Ӕхцӕуӕн мин ӕй, мӕ бон ке ӕй филиали экскурситӕ уадзун япойнаг ӕма китайаг ӕвзӕгтӕбӕл. Удта хъӕбӕр ӕнгъӕлмӕ кӕсун, мӕрдтӕ ку райгас уонцӕ, еци рӕстӕгмӕ. Ӕз ӕй зонун, Йеговӕ Харвий ке нӕ байронх уодзӕй, уомӕн ӕма ин «нӕ» некӕд загъта (Иоан. 5:28, 29).