A Harvey a mle kot el klou er a reteua el sechal. A telungalek er ngii a mlo medengelii a klemerang er a Midland Junction, Western Australia, er aike el rak er a 1930 el mle klou a chelebuul er a beluu. A Harvey a mlukeroul el mo betik a rengul er a Jehovah e miltecholb er a le 14 a rekil. Ngika silubii el kmo, ngdiak el kirel kotouar a ngerachel er a cheldebechelel a Jehovah. Sera lekekerei el buik e ngmle kotouar el mo menguiu er a temel A Ongkerongel e le ngulemdasu el kmo, ngdirkak el bo el sebechel. Me nguaisei engdi ngike el odam el milengedecheduch er ngii a dilu el kmo, “A lsekum ngar ngii a chad er a cheldebechelel a Jehovah el olengit er kau el mo meruul er a tekoi e ngbelkul a kmo, ngoumerang el kmo ngsebechem el kutmeklii!”​—2 Ko. 3:5.

Ak silubii a klemerang er a England el obengkel a delak me a chudelek. A demak a ulemtok er a uchelel engdi uriul e ngmlei er a klemerang. Sera el 9 a rekik e ak miltecholb alta demak a dimlak el soal. Ak rirellii a turrekong er ngak el mo pioneer e mo missionari. Me nguaisei engdi a demak a dimlak lebechikak me bok pioneer el dimerekmo bok 21.  Ngdimlak el soak el mengiil el kemanget el taem me sera bok 16 e ak ngiluu a kengei er ngii e millukl el mo kiei er a Australia el obengkel a chudelek el ngii a millukl el mong. Me sera bok 18 e ak ulemuchel el pioneer.

Ak mlo medengelii a Harvey er a Australia. Ngmle osisiu a turrekong er kemam el mo missionari. Aki mlo bechiil er a 1951. Aki dilak el pioneer el eru el rak e mlo teloi er a omesiou el oldingel a ongdibel. Aki milsiou er a Western Australia, e tia kmal mle klou el beluu me ngmle kiram el omekall el kemanget el taem er a medideriik el beluu el meringel er kid a mo er ngii.

Sera 1954 e aki ngiluu a invitation el mora 25 el klas er a Gilead. A urungulam el mo missionari a mo tmaut! Me aki mlara diall el mora New York e ulemuchel er a dmolech el omesubam er a Biblia. Ngar tia el skuul, e ngdirrek el mle kiram el mesuub a tekoi er a Sebangiol, e tia mle meringel er a Harvey e le ngdiak el sebechel lomult er a chural.

Ngar er a skuul, e tirke el olisechakl a dirrek el milsubed el kmo tirke el sorir el mo mesiou er a beluu er a Siabal a sebechir el lemuches a ngklir el mo mesuub a tekoi er a Siabal. Aki tilbir el kmo aki mo mecherei a cheldebechelel a Jehovah me ngmelilt el kiram. Kedeb el taem er uriul e a Albert Schroeder, el ta er tirke el olisechakl er a Skuul er a Gilead, a mlo medengei el kmo ngdimlak ki mluches a ngklam. Me ngdilu er kemam el kmo: “Mluut el mo melatk el kirel.” Me nguaisei, engdi ngdimlak ki mluches a ngklam me ngdilu er kemam el kmo: “Ngak me tirke el bebil er a olisechakl a mla lmuches a ngkliu. Ka mesa el kmo ngsebechiu el suubii a tekoi er a Siabal.” A Harvey a mle beot er ngii a suubii tia el omelekoi.

Me aki mlora Siabal er a 1955, e seikid el taem e te di mle 500 a publisher er ngii. A Harvey a mle 26 e ngak a 24. Aki mlukngerachel el mo mesiou er a mats er a Kobe, me aki milsiou er tiang el eua el rak. E a uriul e aki liluut el mo mesiou el oldingel a ongdibel, e milsiou el kmeed er a mats er a Nagoya. Ngkmal mle somam tia el ngerechelam, el rudam, kall, me a ues er tia el beluu. Ngdimlak el meketeket e ngkuk mlo kiram el diak kim kotouar er a Jehovah.

A uriul er a edei el rak el ki mosiou el oldingel a ongdibel, e a branch er a Siabal a ulengit er kemam  el mora Taiwain el mo olengeseu er a rechad er a Amis. A bebil er a rudam er a Amis a mlo omtok a osisechakl me a branch er a Taiwan a uluusbech er a odam el sebechel el melekoi a tekoi er a Siabal el mo olengeseu el sumechii tia el tekoi. * Tia kmal mle meringel er kemam e le ngmle somam a omesiungam el ngar er a Siabal. Me nguaisei a Harvey a silubii el kmo ngdiak lekirel kotouar a ngerachel, me aki kilengei el mong.

Aki mlora Taiwan er a November er a 1962. Tiakid el taem e te mle 2,271 a re publisher el oumesingd er tir a rechad er a Amis. Me nguaisei engdi ngmle kiram el suubii a tekoi er a Sina el kot. Ngdi mle chimong a book el ki muluusbech er ngii el mesuub a tekoi er a Sina e ngike el ulisechakl er kemam a dimlak lolekoi a tekoi er a Merikel.

Sera ki bora Taiwan, e a Harvey a mlukngerachel el mo omes a ureor el meketmokl er tia el beluu. Ngdimlak el klou a branch office me ngmle sebechel meruul a ngerechelel e a osisiu el taem e ngolengeseu er a rudam el chad er a Amis el bekord el edei el sandei er a chelsel a ta el buil. Ngdirrek el mle blechoel loltobed a cheldecheduch er a assembly. Ngmle sebechel loltobed a cheldecheduch el tekoi er a Siabal e a rudam el chad er a Amis a mle sebechir el medengei a lolekoi. Me nguaisei engdi a llach er a kabelment a kmo, a ngii di el kldibel er a klechelid a kirel motobed el tekoi er a Sina. Me a Harvey a ultobed aika el cheldecheduch el tekoi er a Sina alta ngdirkak el sal mo medengelii tia el omelekoi, e a odam a oliuid el mo tekoi er a Amis.

A Taiwan a dirk mla er cheungel a omerreder er a resoldau me ngmle kirir a rudam el melai a permit el mo meruul a assembly. Tia dimlak el beot el tekoi, e a rebulis a mle blechoel meoud lotobed. Me a lsekum e ngmla mo er sel sandei er a assembly e dirkak lotobed, e a Harvey a mora blil a bulis me ngdengchokl el mengiil el dimerekmo lotobed. Tia rirelleterir me te mereched lotobed, e le rebulis a mle merur lomes er a chad er a ngodech el beluu el dengchokl el mengiil.

Aike el taem el ki mobengkel a ongdibel, aki blechoel merael el kemanget el taem, el melemiakl a rois e chemaot er a chelsel omoachel. Ak mo dobedebekii sera kkot el melemiakl a rois. Aki ngiluu a bus er a 5:30 er a tutau el mora cheroid el beluu. A uriul aki mirrael el mo imuul er a klou el omoachel e ngimeklii a rois. Tia el rois a mle kongesachel me aki melemiakl e ak di omes a ochil ngike el odam el mla ruchei er ngak.

Tiaikid el osisiu el tutau e a Harvey a uluureor lobengterir a rudam e ngak a mlo oldingel er a basio el ngar ngii a remelekoi a tekoi er a Siabal er ngii. Ngar er a ta klok e ngkora mlo mechitechut a bedengek e le ngdirkak a ngera el kkelii. Tia er a bok kebetech ngak me a Harvey e a rudam a mla merael. A Harvey a rirous a magazine e ngmai a kldei el ngais el kirel. Ngulechotii a rolel a dongang aika el ngais. Kede lingir a bebul me a cheungel e timetmii. Me alta ngkora dimlak lungil kall engdi ak chilermii. Me ngtecha mo menga er sel ongedei el ngais? Ak killii e le Harvey a dimlak el soal mengider er ngak a lsekum ak taorer el klengerenger a uchul.

Ngar er a ta el assembly, e ak mlo chelebangel er a ngodech el bedengel omelsemai. Aki mle kiei er a blil a odam el mla er a bita er a Blil a Ongdibel. Ngike el bechil a circuit overseer a riruul a olechelbelam e le rechad er a Amis a ulemes a omelecholb el kmal klou a ultutelel. A Harvey a mle mechesang me ngdilu er ngak me ak me a mo ruchei. Aika mle kldei el klekedall er a omelechong: ngbaket el blil a mekelekolt el ralm, blil a mekeald el ralm, me a bechachau el kanadarai. Ngkora mle mechas a renguk e le nglilecha er rikl, el sebeched el ngar ngii e meseterir a rudam el mengetmokl er a Blil a Ongdibel el kirel a assembly. Me ak ulengit a kateng er ngii. Ngika milskak a mechellings el plastic! Ak ulemdasu a mora rebai er a blai, engdi a suebek el charm el geese a mo el mengchak. Me ak millatk el kmo: ‘A rudam a kmal mechesang me ngdiak lesekak a kulecholb. E a lsekum ngdiak kulechong, e ak mo melibas er tir. Becherei di kulecholb!’ Me ak millecholb.

A Harvey a miltebengii el kmo a rudam el chad er a Amis a mle meringel er tir el olengeriakl er a tekoi er a klereng, e le tir el mle metitur el menguiu e dirrek el dimlak aike el babilenged el ngar er a omelekingir. Ngmle ungil a rudam a lemosisechakl el mo menguiu e meluches a tekingir e le tekoi er a Amis a mla mo er ngii a omelechesel. Tia mle klou el ureor, me nguaisei engdi omerolel a taem e a rudam a mlo meduch el di tir el mesuub. Ngmlo er ngii aike el babilenged el tekoi er a Amis er a chelsel aike el rak er a 1960, e a 1968 e te ulemuchel el oltobed er A Ongkerongel.

Me nguaisei engdi a kabelment a milerrob aike el babilenged el diak el tekoi er a Sina. Me te ultebedii a Ongkerongel er a Amis el ngar er a kakerous el rolel. El ua tiang, A Ongkerongel a lultebedii el tekoi er a Amis me a Sina el telkib el taem. Me a chad el mle melemlim a mlo omdasu el kmo aki ousbech er ngii el olisechakl er a rechad a tekoi er a Sina. Seikid el taem el mei er chelechang e a cheldebechelel a Jehovah a mla oltobed a betok el babilenged el tekoi er a Amis lolengeseu er tia el kebliil el mesuub a klemerang er a Biblia.​—Rel. 10:34, 35.

Ngar er aike el rak er a 1960 me a 1970 e a rebetok el odam el chad er a Amis a dimlak lekiei loltirakl  a omellach er a Biblia. Te dimlak el cherrungel a klemedengei er tir me a rebebil a kiliei el ngar er a deleboes, me a redi cheltelaol, me a ruusbech a dekool me a buuch. Me a Harvey a uleldingel a betok el ongdibel el olengeseu er a rudam el mo oba uldesuel a Jehovah el kirel aika el tekoi. Ngar er a ta er aika el odngelam e aki mlo chelebangel er sel tekoi el dulsaod er ngii er a uchelel tia el cheldecheduch.

A rengariou a rengrir el odam a mle kongei omelodech, engdi ngklengiterreng e le rebetok el odam a dimlak lekengei el melodech a klengar er tir. Chelsel a 20 el rak e te mle kuk betok er a 2,450 a ildisir a re publisher er a Taiwan engdi ngngilanget el mo 900. Tia kmal milengitechut a reng. Me nguaisei engdi aki mle medengei el kmo, a Jehovah a diak bo lomekngeltengat er a diak el klikiid el cheldebechel. (2 Ko. 7:1) Cherengel a taem e a ongdibel a mlekikiid, e oeak a klengeltengat er a Jehovah e a Taiwan er chelechang a kuk betok er a 11,000 a re publisher er ngii.

Ngulemuchel er aike el rak er a 1980 el mei, e aki milsa klaumerang er aike el ongdibel er a rechad er a Amis el meleketek, me a Harvey a mlo sebechel mengoit er a klou el taem el obengterir a rechad er a Sina. Ngmle dmeu a rengul ngosuterir a rebecherir a rudos el mei er a klemerang. Ak mo dobedebekii a taem er a ledu el kmo ngkmal mlo dmeu a rengul er a lerengesii el kmo a ta er tirka el chad a ketengel el meluluuch el mora Jehovah. Ngak me ak dirrek el kmal dmeu a renguk el mla ngosuterir a rebetok el chad el mo kmeed er a Jehovah. Ngdirrek el mle dmeu a renguk el obengterir a reteru er a rengelekel a mle study er ngak el mesiou er a branch er a Taiwan.

Me chelechang e ngdi ngak el tang. A uriul er a bekord el 59 el rak er a chebechiil, e a betik er a renguk el Harvey a mlad er a kasinoma er a January 1, 2010. Ngika mla chemoit a bekord el 60 el rak el ngar er a mui el taem el omesiou! Ak kmal dirk miss er ngii. Me nguaisei engdi ngkmal dmeu a renguk el mlo sebechek el mesiou lobengkel er a uchelel a ureor er aika el teblo el beluu! Aki mlo meduch el melekoi a teblo el meringel el omelekoi er a Asia, e a Harvey a dirrek el mle sebechel meluches aika el omelekoi.

Sesei el rak er a uriul, e a Chelechad er a Ruungerachel a tilbir el kmo ngbai ungil ak lluut el mora Australia e le ngak el chudelang. Sel kot el tekoi el siliseb er a uldesuek a kmo, ‘Ngdiak el soak el choitii a Taiwan.’ Engdi Harvey a ulsisecheklak el kmo, ngdiak lekired el kotouar er a cheldebechelel a Jehovah, me ak mirrael. A uriul ak mlo mtebengii el kmo tia mle olechotel a llomeserreng.

Chelecha el taem e ak mesiou el ngar er a branch er a Australasia e sel weekend e a kuureor el obengkel a ta er a ongdibel. Ngdmeu a renguk el sebechek el ousbech er a dechak el melekoi a tekoi er a Siabal me a Sina el tour er a Bethel. Me nguaisei engdi ak kmal semeriar el mengiil er a otutel a telbiil er a okiis e le ak medengei el kmo a Harvey, el ngii a silubii el kmo ngdiak lekired el kotouar er a Jehovah, a ngar er a Omeltkel.​—Jn. 5:28, 29.