Harvey me keieu laud nanpwungen rie pwutak pahmeno. Eh peneineio iangala padahk mehlel nan Midland Junction, Western Australia, erein ahnsou apwal en mwohni nan pahr 1930 samwa. Harvey sukuhlki oh poakohngala Siohwa, oh papidaisla ni eh sounpar 14. Sohte pwand, e sukuhlki en kin ahnsou koaros pwungki ale pwukoa kan nan mwomwohdiso. Ni ahnsou me e wiahte kisin pwutak, mie pak ehu me e nda soh ong brother ko me peki en wadek Kahn Iroir nan arail mihtingo, pwehki e medewe me e sohte kak. Ahpw brothero me koasoiong Harvey kawehwehiong, “Ni emen sang sapwellimen Siohwa pwihn eh peki rehmw ken wia mehkot, met wehwehki me e medewe me ke kak!”​—2 Kor. 3:5.

I sukuhlki padahk mehlel nan England, duwehte ei nohnou oh riei serepein laudo. Nin tapio, ei pahpao sohte kin perenki Sounkadehdehn Siohwa kan, ahpw mwuhr, e pil wiahla emen. E sohte pwungki ei papidaisla ni ei sounparte duwau. I wiahda ei mehn akadei en iang pioneer oh mwuhr wiahla misineri. Ahpw ei pahpao sohte men mweidohng ie en pioneer lao I sounpar 21. I sohte  men awih soangen wereio. Eri ni ei sounparte 16, e mweidohng ien kohla Australia oh mi rehn riei serepein laudo me keseula wasao. Eri ni ei sounpar 18, I tepida pioneer.

I tuhwong Harvey nan Australia. Kiht koaros men papah Siohwa nin duwen misineri kei. Se pwopwoudla nan pahr 1951. Mwurin at pioneerki sounpar riau, se alehdi pwukoahn sounapwalih me kin seiloak. Wasa kan me se pwukoahki nan Western Australia uhdahn laud, eri se anahne tang doh nan wasa madekeng oh ihmw kan dohpeseng.

Nan 1954, se alehdi luhk en iang sukuhl en Kilead nempe 25. At men wiahla misineri kei pahn kereniong pweida! Se dake sohp kohla New York oh tepida onopki laud Paipel. Nan sukuhlo, se pil ale kasukuhl en lokaiahn Spain, oh met apwal ong Harvey pwehki e apwalki nda lepin ntingo “r.”

Erein at sukuhlo, sounpadahngko pakairki me mehmen me men kohla papah Sapan kak ntingihedi edeo pwehn iang sukuhlki lokaiahn Sapan. Se koasoanehdi en mweidohng sapwellimen Siohwa pwihn en pilada mehnia pwukoa sen ale. Mwurinte mwo, emen sounpadahk en Kilead ko, Albert Schroeder, esehda me se saik ntingihedi adat ko. E ndaiong kiht: “Kumwa kihong ahnsou en medewe duwen met.” Ahpw ni at pil saik ntingihedi adat ko, Brother Schroeder nda: “Ngehi oh sounpadahk teiko ntingihedier edomwa ko. Kumwa song en esehla lokaiahn Sapan.” E mengeiong Harvey en nda lokaiahn Sapan sang lokaiahn Spain.

Se lella Sapan nan pahr 1955 ni ahnsou me sounkalohk kan mehte 500 nan sahpwo pwon. Harvey sounpar 26 oh I sounpar 24. Se pekederla nan kahnimw en Kobe, wasa me se papahki sounpar pahieu. Mwuhr, se perenkihda at pwurehng alehdi luhk en wia pwukoahn sounapwalih me kin seiloak, oh se papah wasa ehu me karanih kahnimw en Nagoya. Se uhdahn perenki soahng koaros me pidada at doadoahko​—riat Kristian ko, mwenge ko, oh pil lingan en sahpwo. Ahpw sohte pwand, se alehdi pil ehu ahnsou mwahu en wia dahme Siohwa ketin kupwurki sen wia.

Mwurin at wia doadoahk en sounapwalih me kin seiloak erein sounpar siluh, ohpis en Sounkadehdehn Siohwa kan nan Sapan peki ma se men kohla Taiwan pwehn kalohk ong keinek en Amis ko. Ekei brother mehn Amis ko kesehla oh uhwongada kaudok mehlel, oh ohpis en Sounkadehdehn  Siohwa kan nan Taiwan anahne brother men me ese lokaiahn Sapan pwehn sewese kauhdi kahpwalo. * Se uhdahn perenki at doadoahko nan Sapan, eri met wia pilipil apwal ehu. Ahpw Harvey sukuhlkier en dehr kin nda soh ong pwukoa ehu. Eri se pwungkihda en kohla Taiwan.

Se lel Taiwan nan November 1962. Mie sounkalohk 2,271 wasao, oh pali laud en irail mehn Amis. Ahpw keieu, se anahne sukuhlki lokaiahn China. Se naineki pwuhk ehute oh sounpadahk emen me sohte kin lokaiahki lokaiahn wai. Ahpw se sukuhlkihdi lokaiao.

Mwurinte at lella Taiwan, Harvey alehdi pwukoahn apwalih doadoahko nan sahpwo pwon. Ohpis en Sounkadehdehn Siohwa kan wasao tikitik. Eri Harvey kak wia eh doadoahk kan koaros nan ohpiso oh pil papah riatail Kristian mehn Amis ko nan erein wihk siluh nan sounpwong ehu. E pil kin wia pwukoahn sounapwalih me kin seiloak ekei pak, me iangahki wia padahk kan nan mihting tohrohr kan. Harvey kak wia padahk ni lokaiahn Sapan oh riatail Kristian mehn Amis ko kin wehwehki. Ahpw koperment en wasao mweidada mihting kan en wiawihte ni lokaiahn China. Eri Harvey kin wia padahk kan ni lokaiahn China, mendahki e saikinte nohn esehla lokaiao, oh brother ko kin kawehwehda ni lokaiahn Amis.

Ahnsowo, se kin anahne ale mweimwei sang kopermento pwe sen kak wia at mihting tohrohr kan. E kin uhdahn apwal en ale doaropwe pwukat oh ekei pak e kin werei arail wiahda. Ma pilismen ko sohte wiahda nait doaropwe ko nan wihk en mihting tohrohro, Harvey pahn kohla oh mihmihte nan arail ohpiso lao re wiahda. Pwehki pilismen ko kin namenengki tohn ehu sahpw en awiawih irail nan arail ohpiso, re mwadang en wiahda doaropwe ko.

Nan wihk kan me se iang riat Kristian kan wasao, se pahn kin aluhki awa ehu de tohtohsang, aludahla ni nahna kan, oh kotehla pillap kan. I taman tepin ei aludahla ni nahna ehu. Mwurin at mwengehn nimenseng, se tepida dake bus sang kuloak 5:30 nimenseng kohlahng kisin kousapw ehu me uhdahn doh. Kiht eri alu kotehla pillap pedeped ehu me tehlap oh aludahla pohn nahna ukuda ehu. Nahnao uhdahn ukada kahrehda ma I kilengda, I pahn kilang patehnehn brothero me alu mwohi.

Ni menseng en rahno, Harvey iang ekei brother ko me wia tohn wasao kalohk, ahpw I kelehpw kalohk nan kisin kousapw kis me aramas ako kin lokaiahki lokaiahn Sapan. Kerenlahng kuloak ehu de daulih, I tepida luwetala pwehki I sohte mwenge erein awa kei. Ni ahnsou me I lella rehn Harvey, ih kelehpw me mi mwo. Harvey wiliankidahr makasihn kei ong kutohr amas siluh. E kasalehiong ie ia duwen ei pahn wiahda kisin pwoahr ni kutohro oh ihkasang kanengeo. Mendahki e mwomwen sohte iou, I song ehu. Eri ihs me kangala kesiluh en kutohro? Ngehi me kangala pwehki Harvey sohte leme me e kak waiehda ma I lipwongmaskihla ei duhpek.

Ni ehu mihting tohrohr, I lelohng kahpwal ehu. Se mihmi ni imwen emen brother me kin mi limwahnte Wasahn Kaudok ehu. Pwehki mehn Amis ko kin uhdahn kesempwalki duhdu, en sounapwalih me kin seiloako eh pwoudo kaunopada soahng koaros ong ngehi oh Harvey pwe sen kak duhdu. Harvey kedirepwla oh ndahng ie en tep. Ni wasahn duhduo, soahng siluh me mi mwo: pekid en pihl lemwulemwur ehu, pekid en pihl karakar ehu, oh peisin ehu. I pwuriamweila pwehki sistero kihdihte pekid ko likin ihmwo me sopeilahngete Wasahn Kaudoko me brother kan kaukaunop ong mihting tohrohro. I idek reh ma mie kahdeng. Ahpw e wahdo tehi pilastik ehu me ke kak kilenglahte pwar! I medewehda en kohla palio ihmwo, ahpw mie tehk kei wasao me I leme pahn ngalis ie. Ngehi eri medewe, ‘Brother ko pahn nohn kedirepw en kilang me I wie duhdu. Oh ma I sohte duhdu, re pahn suwedkihda.’ Eri I duhduhla.

Harvey esehda me e apwal ong riatail Kristian mehn Amis ko en ahneki pwoson laud pwehki me tohto rehrail sohte kak wadawad oh sohte sawasepen Paipel kan me mi ni arail lokaia. Pwehki lokaiahn Amis ahpwtehn pahn tepida doadoahngki lepin nting kan en Rom, e mwomwen mwahu en kasukuhliong brother ko en wadawad ni pein arail lokaia. Met wia doadoahk laud ehu, ahpw kedekedeo, brother ko kak sukuhlki duwen Siohwa ni pein arail lokaia. Sawasepen Paipel kan ni lokaiahn Amis tepida miehla nan pahr 1966, oh nan 1968, Kahn Iroir ni lokaiahn Amis tepida wiawihda.

Ahpw koperment en sahpwo keinapwidi pwuhk kan me sohte kin doadoahngki lokaiahn China. Eri pwehn soikala kahpwal wet, Kahn Iroir en Amis wiawihda ni soangsoangen ahl kei. Karasepe, erein sounpwong 17, Kahn Iroir me se kin doadoahngki wiawihda ni lokaiahn Mandarin oh Amis. Ma mie me peidengki duwen met, eri e pahn mwomwen me se kin doadoahngki makasihno pwehn padahkihong tohn wasao lokaiahn China. Sang ahnsowo kohdo, sapwellimen Siohwa pwihn kin wiahda sawasepen Paipel tohto ni lokaiahn Amis pwehn sewese aramas ako en sukuhlki padahk mehlel en Paipel kan.—Wiewia 10:34, 35.

Erein sounpar tohto, riatail Kristian mehn Amis tohto sohte kin kapwaiada sapwellimen Koht koasoandi kan nan arail mour. Pwehki re sohte uhdahn wehwehki kaweid kan en Paipel, ekei kin wia tiahk suwed, kamamsakau, de simoak oh kang pwuh. Harvey kin mwemweitla ni mwomwohdiso tohto, songosong en sewese riatail Kristian ko en wehwehkihla sapwellimen Siohwa madamadau ong soangen tiahk pwukat. Dahme I koasoiahda ni tapio iei me wiawi ni ehu eh mwemweit ko.

Irail brother aktikitik kan kin men wiahda wekidekla kan, ahpw e kansensuwed me me tohto sohte men. Eri nempehn sounkalohk kan nan Taiwan me tohtohki 2,450 malaulaula lel meh 900 nan erein sounpar 20. Met uhdahn kamworus. Ahpw se ese me Siohwa sohte pahn ketin kapaiahda pwihn ehu me sohte mwakelekel. (2 Kor. 7:1) Kedekedeo, mwomwohdiso ko tepida papah Siohwa ni ahl pwung, oh pwehki sapwellimen Siohwa kapai, mieier sounkalohk daulih 11,000 nan Taiwan ahnsou wet.

Sang pahr 1980 samwa kohdo, se kilang me riat Kristian kan nan mwomwohdiso en Amis kekeirda, oh Harvey kak kihong ahnsou laud rehn mehn China ko. E uhdahn perenki sewese ahn ekei sister ko arail pwoud ren wiahla Sounkadehdehn Siohwa. I tamanda eh nda me e uhdahn perenkihda ni emen ohl ako eh ehdin pahn kapakap ong Siohwa. I pil perenkihda ei kak kasukuhliong lih tohto me ahneki mohngiong mehlel ren karanihala Siohwa. I pil perenkihda ei iang nein emen nei tohnsukuhl en Paipel ko nah pwutak oh serepein papah ni ohpis en Sounkadehdehn Siohwa kan nan Taiwan.

Ahpw met, solahr ei pwoud. Mwurin at pwopwoudki kereniong sounpar 59, ei pwoud kompoakeo Harvey mehkihla kanser ni January 1, 2010. E doadoahngkihla pali laud en eh ahnsou ong papah Siohwa kereniong sounpar 60! I kin uhdahn loaloidkihte ih. Ahpw ia uwen ei perenki iangih papah nan sahpw riau ko! Se sukuhlki en lokaiahki lokaia apwal riau​—lokaiahn Amis oh China, ahpw Harvey pil anahne esehla ntingih lokaia ko.

Sounpar kei mwuhr, Pwihn me Kin Apwalih Mwomwohdiso nan Sampah Pwon koasoanehdi me pwehki I mahmahla, e pahn mwahu ong ie en pwurala Australia. I tepte medewe, ‘I sohte men kohkohsang Taiwan.’ Ahpw Harvey padahkihong ie en dehr kin nda soh ong sapwellimen Siohwa pwihn, eri I kohla. Mwuhr, I wehwehkihda kamwahupen pilipil wet.

Rahnwet, erein wihk kan I kin papah ni ohpis en Sounkadehdehn Siohwa kan en Australasia, oh ni imwin wihk kan, I kin iang ehu mwomwohdiso wasao kalohk. Nan Pedel, I perenki doadoahngki lokaiahn Sapan oh China ni ei kin kahre aramas akan me kin mwemweitdo pwehn kilang ohpiso. Ahpw I uhdahn kasikasik kaiasadao me Siohwa ketin inoukihda. I ese me Siohwa pahn ketin tamataman Harvey me kin ahnsou koaros wia dahme Siohwa ketin kupwurki en wia.​—Sohn 5:28, 29.