Noqaqa Inglaterrapi testigosta rejserqani. Mamaywan kuraj hermanaywan ima Bibliata estudiarqayku. Tatayqa qallariypi mayta churanakuwaj kayku. Jinapis qhepaman, paypis testigoman tukorqa. Tatayqa mana munarqachu bautizakunayta. Jinapis 9 watasniypi bautizakorqani. Mayta misionera kayta munaspa, precursorallaña kayta munarqani. Tataytaj, “veintiunoykita juntʼasparaj precursora kawaj” niwarqa. Noqatajrí mana chay chhika unayta suyakuyta munarqanichu. Chayrayku 16 watasniyoj kashaspa, tataymanta permisota mañakuspa kuraj hermanaywan tiyakoj rerqani. Payqa Australiapi tiyakorqa. Ajinapi 18 watasniyta juntʼaytawan precursora karqani.

Harveytaqa chaypi rejserqani. Paypis noqa jinallataj misionero kayta munarqa. Chantá 1951 watapi casarakorqayku. Iskay watasta precursores jina llankʼashajtiyku, congregacionesta waturinaykupaj invitawarqayku. Australiaj inti yaykuynin ladomanta hermanosta visitanayku karqa. Chay lugarqa manchay jatun karqa. Chayrayku may karusta, qʼara pampastataj autopi viajanayku karqa.

1954 watapi Galaad Escuelaman wajyariwarqayku, clase número veinticincoman. Misioneros kayta munasqaykoqa juntʼakusharqaña. Galaad Escuelaqa Nueva York llajtapi karqa. Chayrayku barcopi chayman rerqayku. Chay escuelapeqa maytapuni Bibliata estudiarqayku. Chantapis castellanota yachakunallaykutaj karqa. Harveyqa  mana “r” letrata tʼojyachiyta atejchu. Chayrayku mana castellanota yachakuyta aterqachu.

Chayllapi Galaad Escuelamanta yachachejkunaqa, tukuy alumnosman niwarqayku: “Japonman predicaj riyta munajkunaqa, japonés parlayta yachakunaykichejpaj anotachikuychej”, nispa. Noqaykutaj Diospa llajtanpuni maymanpis kachanawaykuta munarqayku. Chayrayku mana anotachikorqaykuchu. Ujnin yachachejniykoqa hermano Albert Schroeder karqa. Paytaj mana anotachikusqaykuta yacharqosqa. Chayrayku niwarqayku: “Piensariychej, sumaj kanman japonés parlayta yachakunaykichej”, nispa. Jinapis nipuni anotachikorqaykuchu. Hermano Albertaj ujpiwan niwarqayku: “Tukuynin yachachejkunaña parlarikuyku, anotachiykuñataj. Ichapis japonesta atinkichejpacha”, nispa. Qosaytaj japonesta rato yachakorqa.

Graduakusqaykutawan Japonman kachawarqayku. Chaypacha 1955 wata karqa, chay suyupitaj 500 willajkunalla karqa. Harveyqa 26 watasniyoj kasharqa, noqataj veinticuatroyoj. Japonman chayaytawan, Kobe nisqa llajtapi sirverqayku. Chaypeqa tawa watasta karqayku. Chaymantataj sucursalqa Nagoya llajtaj qayllanpi congregacionesta waturinaykuta niwarqayku. Chaytaj mayta kusichiwarqayku. Japonpi predicayqa mayta gustawaj kayku. Japonqa kʼachitu lugaresniyoj. Hermanosqa may kʼachas kanku, mikhunapis sumaj. Jinapis pisi tiemponman, Jehovaj llajtanqa waj lugarmanñataj kachawarqayku.

Japonpeqa kinsa watata congregacionesta waturerqayku. Chantá sucursalmanta hermanosqa, Taiwán suyuman kachayta munawasqaykuta niwarqayku. Hermanosqa amis nisqa parlayniyoj runasman predicanaykuta munarqanku, niwarqaykutaj wakin hermanos Jehová Diosta wasanchasqankuta. Taiwanmanta sucursaltaj, chay hermanosta yanapariyta munarqa. * Chayrayku japonés parlayta yachaj hermanota necesitarqanku. Noqaykoqa manchay kusisqapuni Japonpi kasharqayku. Chayrayku Taiwanman rinaykuta niwajtiyku, iskay sonqolla kasharqayku. Jinapis yacharqayku, Diospa llajtan imatapis kamachiwajtiyku chay rato kasukunayku kasqanta. Chayrayku Taiwanman rerqayku.

Taiwanmanqa noviembre de 1962 watapi chayarqayku. Chaypachaqa chaypi 2.271 predicajkuna karqanku. Casi tukuytaj amis ayllumanta karqanku. Jinapis Taiwanpeqa chino parlayta  parlallajtaj kanku. Chayrayku chinota yachakunayku karqa. Yachakunaykupajqa uj librolla kapuwarqayku, profesorniykutaj mana inglesta parlajchu. Noqaykutaj inglesta astawan parlakoj kayku. Jinapis chinota yachakorqayku.

Taiwanman chayasqaykumanta pisi tiemponman, Harveyta sucursalta kamachinanpaj churarqanku. Sucursalqa juchʼuysitulla karqa. Chayrayku Harveyqa ruwanasninta juntʼaytawan, killapi kinsa semanata jina amista parlaj hermanoswan predicaj. Wakin kutistaj superintendente de distrito jina yanapakoj. Asambleaspipis discursosta qoj. Harveyqa japonespi discursayta atinman karqa. Amis ayllumanta hermanostaj entiendenkuman karqa. Jinapis gobiernoqa, iglesiaspi chino parlayllapi yachachikunanta munarqa. Chayrayku Harveyqa atin mana atin chinopi discursaj. Waj hermanotaj, hermanosman amis parlaypi entiendechej.

Chaypacha Taiwanqa soldadoswan controlasqa kasharqa. Chayrayku asambleasta ruwanapaj, permisota orqhona kaj. Chaytaj mana atikullajchu. Policiasqa permisota unaypi jaywakoj kanku. Asamblea semanakama manapuni permisota qowajtiyku, Harveyqa policía wasiman rej. Chaypitaj permisota qochikunankama chukukamoj. Policiaspajqa gringuitota chaypi chukuchinanku pʼenqay karqa. Chayrayku rato permisota qoj kanku.

Taiwanpeqa hermanoswan karusta predicaj rej kayku. Uj horata chayri astawan unayta purej kayku. Chantapis lomasta wicharej kayku, ashkha mayustataj pasaj kayku. Ni jaykʼaj qonqasajchu lomaman primera vez wicharisqayta. Chaypacha desayunaytawan, cinco y media de la mañanata uj karu ranchitoman rinapaj autota japʼerqayku. Chantá mayuta pasaytawan, allin sayasqa lomata wicharerqayku. Chay lomaqa ancha sayasqapuni karqa. Ñaupaqeyta rej hermanoj chakisnenqa, casi umay patapi kasharqa.

Chay paqarenqa, Harveyqa chay lugarmanta wakin hermanoswan predicarqa. Noqataj japonesta parlaj ranchitopi sapallay predicarqani. Sutʼiyaymantapacha mana mikhusqa kasharqani. Chayrayku la una chayta desmayarpaj jinaña kasharqani. Chaymanta Harveyta taripaj rerqani. Payqa sapallanña kinsa runtus oqharisqa kashasqa. Chay runtustaqa, predicacionpi runas revistasmanta qosqanku. Qosayqa iskay runtusta puraj ladonta juskʼuspa chawallata jaywawarqa. Millachikuspapis yarqhaymanta jina upiykorqani. Mana chayta ruwaspaqa, waj qʼepinachá kayman karqa. Lomata uraykunaykutaj karuraj karqa.

Uj pacha, jatun tantakuyman rispa uj hermanoj wasinpi alojakorqayku. Chay hermanoqa Tantakuna Wasej ladonpi tiyakorqa. Amis ayllumanta runasqa, chʼichi kayta mana allinpajchu qhawanku. Chayrayku congregacionesta waturej hermanoj señoranqa, bañakunaykupaj iskay baldespi yakuta qowarqayku. Ujnin baldeqa qʼoñi yakuyoj karqa, ujnintaj ila yakuyoj. Chantá uj bañadorcitotawan jaywawarqayku. Harveyqa jatun tantakuyta wakichispa mana tiempoyoj kasharqa. Chayrayku “qanraj bañakuy” niwarqa. Wasi patiollapitaj bañakunay karqa. Jinapis salonpi jatun tantakuyta wakichej hermanos rikunawankuta manchachikorqani. Chayrayku hermanata nerqani tapakunaypaj imallatapis mañarinawanta. Paytaj mana colorniyoj nailonta qowarqa. Chayrayku wasi wasaman  rerqani, chaypitaj gansoswanñataj tinkorqani. Gansosqa pilisman rijchʼakunku, chhutukunkutaj. Chayrayku chaypi bañakuyta manchachikorqani. Chantá piensarerqani: “Mana bañakuspaqa, hermanosta phiñachiyman. Chantapis paykunaqa ruwanasninkupi kashanku, nichá bañakushajta reparawanqankupischu. Jina kay patiopi bañarqokusaj”, nispa. Chayrayku patiopi bañakorqani.

Amista parlaj hermanosmanta ashkhas, mana leeyta yacharqankuchu, nitaj amis parlaypi publicaciones kajchu. Chayrayku hermanosqa mana sinchʼi creeyniyojchu karqanku. Harveytaj chayta repararqa. Chay tiempopeqa, amis parlayta letrasninchejwan escribiyta qallarisharqanku. Chayrayku manchay trabajo kajtinpis, hermanosman leeyta yachachiyta qallarerqayku. Hermanostaj tiempowan sapallankumantaña Bibliata estudiakuyta aterqanku. Chantá 1966 wata chaynejmantapacha, publicacionesqa amis parlaypi llojserqa. 1968 watapitaj Torremanta Qhawaj revista llojserqa.

Jinapis gobiernoqa, publicaciones chinollapi kananta munaj. Chayrayku amis parlaypi Torremanta Qhawaj revistaqa, waj jinasmanta orqhokoj. Uj tiempota, revistasqa chino parlaywan amis parlaywan chajru llojserqa. Chino parlaytapis yachachishaykuman jina karqa. Chaymantapacha Diospa llajtanqa, amis parlayniyoj runaspaj ashkha publicacionesta orqhoshan (Hech. 10:34, 35).

Amis ayllumanta ashkha hermanosqa, 20 watasta jina mana Diospa munayninman jinachu kausarqanku. Bibliaj nisqanta mana sutʼita entiendesqankurayku, wakenqa millay kausayniyoj karqanku, machaj kanku, cigarrotapis pitaj kanku. Wakintaj nuez de betel nisqata qʼauchej kanku. Chaytaj droga karqa. Harveyqa hermanosta yanapananpaj ashkha congregacionesta waturerqa. Paykunatataj entiendecherqa, Jehová chay ruwasqankuta mana allinpajchu qhawasqanta. Ajinapi uj pacha Taiwanpa inti llojsimuy ladomanta hermanosta waturej rerqayku. Chayqa 1971 watapi karqa.

Chaypacha mama qochamanta yaku wasariykamorqa. Pasanayku karqa chay mayutataj ashkha yaku risharqa. Lamawan rumiswan juntʼataj karqa. Puentetapis apakapusqa. Qosay, noqa, amis parlayman tijrachipuwaj kayku chay hermanopis, mancharisqas kasharqayku. Mayu chimpapi  suyashawarqayku chay hermanospis, mancharisqallataj kasharqanku. Autoykutaqa camionpi mayuta pasacherqayku, nitaj imayku karqachu camionman wataykunaykupaj. Ñakʼaytapuni mayuta pasarqayku. Pasashaspaqa Jehová Diosmanta mayta mañakorqayku. Chantá chay lugarmanta hermanosta visitarqayku. Amis parlayniyoj ashkha congregacionesta visitarqayku. Harveytaj paykunata yanaparqa, Jehová Diospa kamachiykunasninta astawan sutʼita entiendenankupaj.

Kʼumuykukoj sonqo hermanosqa, kausayninkuta cheqancharqankupacha. Jinapis ashkha hermanos mana kasukorqankuchu. Chayrayku 20 wataspi jina, 2.450 hermanosmanta 900 hermanosman jina pisiyarqayku. Chayqa mayta llakichiwarqayku. Jinapis sutʼita yacharqayku, Jehová Diosqa llajtanta llimphu kajtillan bendecinanta (2 Cor. 7:1). Tiempowantaj congregacionespeqa niña Diospa chejnisqan imasta ruwarqankuchu. Jehová Diospa bendicionninwan, kunanqa Taiwanpi 11 mil hermanosmanta astawan tiyan.

1980 wata chaynejmantapacha, amista parlaj hermanospa creeyninkoqa astawan sinchʼiyarqa. Chayrayku Harveyqa chinota parlaj runastañataj yanaparerqa. Payqa wakin hermanaspa qosasninkuta testigoman tukunankupaj yanaparqa. Uj pacha, uj hermanaj qosan primera vez orakorqa. Qosaytaj mayta kusikorqa. Noqapis ashkha runasta Diosman qayllaykunankupaj yanaparqani. Chaymantataj mayta kusikuni. Taiwán sucursalpi kashajtiy, ujnin estudioypa iskay wawasninwan khuska sirverqayku. Chaytaj may kusiy noqapaj karqa.

Harveyniywanqa 59 watasta Jehová Diospaj khuska llankʼarqayku. Jinallapi enero de 2010 watapi cancerwan wañuporqa. Payqa casi 60 watasta Jehová Diospaj tiempo juntʼasqata llankʼarqa. Maytapuni faltachani. Jinapis mayta kusikuni Japonpiwan Taiwanpiwan khuska sirvisqaykumanta. Chay lugarespi predicación qallarikushajtin yanapakorqayku. Chantapis iskay mana atinapaj jina parlaykunata yachakorqayku. Qosayqa chay parlaykunata escribiytapis yachakullarqataj.

Harvey wañupusqanmanta tiemponman, Diospa Llajtanta Kamachejkunaqa viejitaña kasqayrayku Australiaman kutipunayta niwarqanku. Noqataj mana Taiwanmanta ripuyta munarqanichu. Jinapis yuyarikorqani, imatachus Harvey yachachiwasqanmanta. Payqa Jehová Dios imatapis kamachiwajtinchej, chay rato kasukuna kasqanta yachachiwarqa. Chayrayku Australiaman kutiporqani. Walejtachá kutinporqani. Sutʼita reparani chay kamachiwasqanku allinniypaj kasqanta.

Kunanqa lunesmanta vierneskama, Australasia sucursalpi yanapakuni. Semana tukukuytataj congregacionniymanta hermanoswan predicani. Chinota chayri japonesta parlaj hermanos Betelta rejsej jamojtinku, noqa paykunata atiendeni. Paykunaman Betelta rejsicheyqa mayta gustawan. Harveyqa Jehová Diospa kamachisqanta kasukuyta yachakorqa. Paytaj mana kamachisninta qonqakunchu, wañupojtinkutaj kausarichimunanta nin. Chayrayku mayta munashani qosaywan watejmanta tinkukapuyta (Juan 5:28, 29).