Harveyga wawguincunapa guechpan cajmi cargan. Familianga Australiachomi rasunpa cajta reguirgan, 1930 wata wichan alapa muchuy chay naciuncho caycaptin. Harveyga Jehovata alapa cuyaj, chaymi 14 watayojlaraj caycar bautizacurgan. Chaypita ichiclatami yachacurgan, lapan Jehová nishganta upalala casucunanpaj. Chaypitami ancianucuna Atalayata leinanpaj nirgan pero payga mana puedinanpaj cajta pensarmi manami nirgan. Chaypita juc hermano parlar cayno nirgan: “Jehovapa marcancho imata ruranayquipaj cajta nishuptiquega, imaypis manami ninquichu porque Jehovaga puedinayquipaj cajta musyarmi imata ruranayquipäpis nishunqui” (2 Cor. 3:5).

Nogaga rasunpa cajta reguirgä Inglaterra naciunchomi, nanäwan y mamanïwan. Papänëga tiemputaran chasquicushga. Nogaga precursora y misionerano sirviyta munarmi, pusaj watayojlaraj caycar bautizacurgä taytä mana munaycaptinpis. Pero taytäga manami munanmanchu  precursora canäta 21 watayoj cashgäcama, nogaga chay achca watacunaraj manami shuyarayta munargächu. Chaymi 16 watayojlaraj caycar nanä cajman aywacurgä Australiapa. Chaychonami 18 watayoj caycar precursora ticrarergä.

Australiachonami reguirirgä Harveyta. Ishcäcuna misionero cayta munapäcorgä. Chaymi 1951 watacho casacärergä. Ishcay watapa precursorno sirvipäcuptëmi congregaciuncuna watucacojno sirvipäcunäpaj invitapäcamargan. Watucaj aywanapaj congregaciuncunaga caru caru marcacunachomi caycargan, chaymi carruwan o chaquipa jircacunapa imaypis viajarcaycargä.

1954 watachonami Galaad escuelaman invitapäcamargan 25 caj clasiman. ¡Misioneruno cayta munapäcushgä ichiclachonami ticrapäcunäpaj cargan! Juc barcuwan Estados Unidos chayarirmi Bibliata alapa estudiar galaycärirgä. Chaychomi español rimayta yachachipäcamargan pero Harveypäga alapa sasami cargan porque payga manami erre (r) letrata shumäga pashtachejchu.

Yachachicamojcunami wilacamorgan Japonman sirviyta aywayta munajcunaga chay clasiman aywapäcunanpaj. Pero nogacunaga Jehovapa marcan mandapäcamänanta munar apuntacärergächu. Jucnin caj yachachicoj Albert Schroeder, mana anotacushgäta musyarirmi más yarpachacärinäpaj nimargan. Manaraj decidipäcushgäta ricarirmi turi Schroeder nipäcamargan: “Noga y waquin yachachicojcunaga anotapäcushcä japonés rimayta yachacunayquipaj, mä chaycho camay”. Harveypäga chay rimayta yachacuyga más facilmi cargan.

Japonmanga chärergä 1955 watachomi. Chay wichanpäga 500 hermanucunalami cargan chay naciuncho. Harveyga 26 watayoj cargan, noganami 24. Chaypitami mandapäcamargan Kobe marcaman, chaychomi chuscu watapa sirvipäcorgä. Chaypitana, alapami cushicärergä Nagoya marcaman yapay congregaciuncuna watucacojno sirvej aywapäcunäpaj invitapäcamaptin. Japoncho sirviyga alapami gustapäcamargan: hermanucuna, chacrancuna, micuynincuna y mascunapis. Chaypita ichiclatami yapay puedipäcorgä Jehová nimashgancunata upalala rurayta.

Quimsa watapa congregaciuncunata watucaj sirviycaptëmi Japón naciunpa sucursalnin tapupäcamargan Taiwán marcaman, Ami rimayta parlaj runacunata yachachej aywayta puedipäcushgäta o mana puedipäcushgäta. Chaycho waquin hermanucunaga Diospa contranman ticrarirgan, chaymi sucursalga necesitargan pipis japonés rimayta parlayta yachajta yanapänapaj. * Japón nación alapa gustapäcamaptinpis Harveyga yachacushganami cargan lapan Jehová mandacushganta casucuyta, chaymi aywapäcunäpaj awnirirgä.

Taiwán marcaman chayanapäga 2.271 hermanucunalami cargan. Chino rimayta yachacunapaj librucuna mana captinpis y profesornëpis inglés rimayta parlayta mana yachaycaptinpis yachacurgämi.

Chaypita ichiclatanami Harveyta sucursalcho yanapänanpaj nirgan. Sucursal ichicla captinmi, Harveyga chaycho aroj y amis hermanucuwanpis semanacho achca cuti predicaj yargoj. Öra oraga congregaciunta watucajcunatapis watucajmi y asambleacunachopis discursucunatami goj. Japonés rimaycho discurso goptinga, Ami rimayta parlajcunaga más shumajchi tantianman cargan pero gobiernuga chino rimaylacho parlananta permitej. Chaymi chaylacho discursargan y juc hermanuna yanapargan Ami rimayman ticrachinanpaj.

Chay wichanga militarcunatami gorgan lapanta controlananpaj. Chaymi asamblea ruracänanpäga autoridäcunataraj permisuta mañacunä caj. Chay permisuta chay policiacuna goshunayquipäga alapami demoracoj. Chay asamblea junaj chämushganyaj mana goptinga, Harveyga comisariapita manami yargojchu tarishganyaj. Policiacunaga alapami pengacoj juc japa runa comisariancho shuyaraptin, chaymi Harvey rurashganga alapa alipaj cargan.

Hermanucunawanmi chaquilapa yachachicoj aywapäcoj cä y juc hora o masta jircacunapa y mayucunata chimpar. Chaychomi juc cuticho desayunuta rasla upurir tutala carruman wicharcur aywapäcorgä juc ichic marcapa. Jircacunapa y mayucunata pasarirmi derechunpa shaycaj jircata wichar galaycärergä. Derechunpa captinmi puntata aywaj hermanupa chaquinpis ñawïta casi tacarejraj.

Chay tutami japonés rimaycho noga predicaycargä y Harveyga juc ladupa predicaycargan chay jinan hermanucunawan. Almuerzo hora chäramuptinga manami más micanayta aguantayta puedirgänachu. Harveywan tincuriptëga chay jinan hermanucunapis aywacushganami cargan, payga revistawanmi quimsa runtucunata trucamorgan. Chaychomi yachachimargan chagua runtuta micuyta quimsa uchcucunata rurarir y jucnin cajpa shoguypa micuyta. Mana munaycarpis micanaywan micurgämi.  Nogami chay ishcay runtuta micurgä y Harveyga jucta, chay ishcay runtuta mana micurga manami chaquilapa puriyta puedïmanchu cargan y Harveyga manami aprimayta puedinmanchu cargan.

Juc cutichomi, asamblea captin, salonpa nawpancho juc hermanupa wasincho posadacurgä. Ami rimayta parlaj hermanucunapäga armacuy alapa importantimi. Chaymi congregaciunta watucaj hermanupa warmin, armacunäpa alistapämargan. Harvey ocupado captin, noga puntata armacunäpaj nimargan. Chaymi chay nanaga gomargan juc balde alaj yacuta y juc balde goñoj yacuta y tinatapis. Nircur churapämargan patiuman, nogaga manami creirgächu patiuman churapämashganta, lapan hermanucunapa ricananman. Chaymi juc cortinata mañacurgä pero chay nanaga gomargan ricacaycaj huleta, chaymi wasi wajtanpa aywacuyta munargä pero chaychoga tawshicoj gansocunami caycargan. Chaymi yarpachacurir nirgä: “Bueno, hermanucunaga ocupado caycan, ricamangachu maylacuycashgäta, jinamanpis mana maylacurga amis hermanucunatami ofendishaj”.

Ami rimayta parlaj hermanucunaga Diosta masta sirviyta puedipäcojchu idiumancunacho publicaciuncuna mana captin y escribiyta mana yachashpanmi. Chayta Harvey cuentata gocurirmi y ichiclachona Ami rimaycho escribiyta yachacuycashganta musyarirmi decidirgan hermanucunata escribiyta y leiyta yachachinanpaj. Chay trabajuga alapa sasami cargan, pero tiempuwanga hermanucunata alapa yanapashga quiquincunana estudiananpaj. Chaymi 1960 watacho punta caj publicaciuncuna Ami rimaycho yargamurgan, 1968 watachona La Atalaya yargamushga.

Pero gobiernuga manami munajchu Ami rimayta pipis parlananta o yachacunanta. Chaymi publicaciuncunaga tucuynopa yargamurgan, juc tiempupämi La Atalaya yargamurgan pulan Ami rimaycho, pulan chino rimaycho, chaynopa cuentata mana gocunanpaj.  Chaypitaga Jehovaga maychicaj publicaciuncunatami jorgamushga Ami rimayta parlaj hermanucunapaj (Hech. 10:34, 35).

1960 y 1970 wata wichanga waquin hermanucunaga manami casucojchu Jehová mandacushganta. Jehová mandacushganta shumaj mana tantiarmi waquincunaga cigarruta shogoj, upiarcur shincaj y drogacunata cachoj. Chaycunata yanapänanpämi Harveyga congregación watucaj aywaj, chay watucashganchomi pasamargan cay galaycunancho wilapashgä wilacuy.

Humilde cajcunaga cambiarganmi pero waquinga manami. Chaymi 20 watacunacho 2.450 hermanucunapita 900 hermanucunala quedargan. Chayga laquicuypämi cargan. Pero alimi musyapäcorgä mana alicunata ruraycaptinga Jehová mana bendicinanpaj cajta (2 Cor. 7:1). Chaypitaga manami mana alitaga rurapäcurgannachu. Jehová bendicishgami marcanta, canancama 11.000 mil pitapis más hermanucunami can Taiwán marcacho.

1980 wata wichanga, Ami rimayta parlaj hermanucunapaj Jehovawan amigun caynin masmi aliyargan. Chaymi Harveypäga masna tiempun cargan chino rimayta parlajcunata yanapänanpaj. Hermanacunapa mana testigo majancunatapis yanaparganmi. Paypäga alapa cushicuypaj cargan jucnin cajta mañacuycajta ricarmi. Nogapis achcajta yanapashcä Jehovawan amigo cananpaj. Y alapa cushicuypäga cargan, Bibliata yachachishgäpa wamrancunawan Taiwán marcapa sucursalnincho yanapacushgämi.

Cuyashga runä Harveyga 2010 watachomi cáncer gueshyawan wanucushga. Sesenta watacunapami lapan tiempunwan Jehovata sirvishga. Imanomi laquiculä. Pero alapami cushicö predicación galaycunanpaj ishcay naciuncunacho yanapashgäpita. Ishcay sasa rimaycunatami yachacurgä y payga escribiytapis yachacurganmi.

Wanushganpita ichic tiempula pasarilaptinmi Australia marcaman cutinäpaj nimargan. Pero nogaga manami Taiwán marcapita aywayta munargachu. Pero Harveyga yachachimashga cargan, Jehová mandamashganchitaga upalala wiyacunapaj. Tiempuwanmi cuentata gocurgä Australia marcaman cutimuyga alapa alipaj cashganta.

Cananga alapa cuchishgami yanapacö, chino rimayta y japonés rimayta Betelta reguej shamoj hermanucunata reguichirmi, semana ushaycunanami congregaciunwan predicaj yargö. ‘Lapantapis upalala wiyacoj Harveyga’, Jehovapa yarpayninchomi caycan, ¡imanomi shuyaraycä Harvey cawarimunan junajta! (Juan 5:28, 29).