Harvey are ri nabʼeʼal chkiwach ri e oxibʼ chi rachalal. Ri ufamilia xretaʼmaj ri qastzij chrij ri Jehová pa ri tinamit che ojer kbʼix Midland Junction che, che kʼo pa ri tinamit Australia Occidental, are chiʼ kʼax xbʼan che uriqik ri pwaq (crisis económica) pa taq ri junabʼ treinta. Harvey sibʼalaj xuloqʼoqʼej ri Jehová y xubʼan uqasanjaʼ are chiʼ kʼo 14 ujunabʼ. Chiʼ xqʼax ri tiempo, xretaʼmaj che are utz kukʼam ronojel uwach chak che kyaʼ che pa ri utinamit ri Dios. Jumul, are chiʼ kʼa nitzʼ na, xbʼix che, che kusikʼij uwach ri wuj Ri chajinel pa ri riqbʼal ibʼ, are kʼu xraj taj rumal che xuchomaj che kkun ta che ubʼanik. Are kʼu, ri qachalal che xchʼaw rukʼ Harvey, xubʼij che: «Pa ri utinamit ri Jehová, are chiʼ jun winaq kubʼij chawe che kabʼan jun jastaq, are rumal che retaʼm che katkun che ubʼanik» (2 Cor. 3:5).

In xwetaʼmaj ri qastzij chrij ri Jehová pa Inglaterra, junam rukʼ ri nunan y ri watz. Ri nutat utz ta xrilo che xqetaʼmaj ri kukʼut ri Biblia, are kʼu chiʼ xqʼax ri tiempo xux Testigo. Are chiʼ kʼo 9 nujunabʼ ri nutat kraj taj che kinbʼan nuqasanjaʼ, are kʼu xinbʼano. Xinchomaj che utz we kinux precursora, tekʼuriʼ misionera. Are kʼu ri nutat kuya ta bʼe  chwe rech kinux precursora kʼa ktzʼaqat na 21 nujunabʼ. In xwaj taj xweyej nim tiempo. Rumal laʼ, are chiʼ kʼo 16 nujunabʼ, ri nutat xuya nupermiso rech kinbʼe pa ri tinamit Australia rukʼ ri watz che kʼo chilaʼ. Y are chiʼ xtzʼaqat 18 nujunabʼ, xinmaj ri precursorado.

Pa Australia, xwetaʼmaj wi uwach ri Harvey. Ri oj kebʼ xqaj xojux misioneros. Xojkʼuliʼ pa ri 1951. Are chiʼ kebʼ junabʼ chik oj precursores, xbʼix che ri wachajil che kux solinel re circuito. Sibʼalaj nim ri circuito kqasolij che kʼo pa ri Australia Occidental, rumal laʼ paneʼ kʼo qacarro ronojel tiempo nim kqabʼinibʼej rech kojopan pa ri lugares che naj e kʼo wi y che sibʼalaj kubʼan qʼaqʼ.

Pa ri junabʼ 1954, xojsikʼix pa ri tijobʼal número 25 re Galaad. Are laʼ ri sibʼalaj xqaj ¡kojux misioneros! Pa barco xojopan wi pa Nueva York y xqamaj unikʼoxik más ri Biblia. Pa ri tijobʼal re Galaad, rajawaxik kqetaʼmaj español, are kʼu ri Harvey kʼax xuriqo rumal che kkun ta che ubʼixik ri letra erre.

Ri ajtijabʼ xkibʼij che ri kkaj keʼepatanin pa Japón kekunik kkitzʼibʼaj kibʼ pa ri clases re japonés. Ri oj xqatzʼibʼaj ta qibʼ rumal che xqachomaj che are utz are ri utinamit ri Jehová kbʼinik jachiʼ kojpatanin wi. Are chiʼ ri qachalal Albert Schroeder, jun chke ri ajtijabʼ re Galaad, xretaʼmaj che xqatzʼibʼaj ta qibʼ pa ri clases, xubʼij chqe: «Qas chichomaj na». Rumal che xrilo che qetaʼm ta ri kqabʼano, xubʼij chi chqe: «In y ri e nikʼaj chi ajtijabʼ xqatzʼibʼaj ri ibʼiʼ pa ri clases. Chiwilaʼ, weneʼ kixkunik kiwetaʼmaj ri japonés». Kʼax ta xubʼan Harvey che retaʼmaxik wajun chʼabʼal riʼ.

Xojopan pa Japón pa ri junabʼ 1955. Pa ri tiempo riʼ xa 500 publicadores e kʼo pa ronojel ri tinamit. Harvey kʼo 26 ujunabʼ y ri in 24. Xojtaq bʼi pa ri tinamit re Kobe, y chilaʼ xojpatanin wi kajibʼ junabʼ. Tekʼuriʼ xojtaq chi bʼi jumul che solinel re circuito, naqaj che ri tinamit Nagoya, y sibʼalaj xojkikot rumal wariʼ. Sibʼalaj utz xqilo xojpatanin pa Japón, kumal ri qachalal, ri rikil, ri paisaje... Tekʼuriʼ, xbʼix chqe che kojbʼe chi pa jun lugar, are jun oportunidad rech kqakʼutu we qas kqaj kqabʼan ri kubʼij ri Jehová chqe.

Are chiʼ qʼaxinaq chi oxibʼ junabʼ che Harvey are solinel re circuito, ri sucursal re Japón xubʼij chqe  we kqaj kojbʼe pa Taiwán rech kqatzijoj ri utzij ri Dios chke ri amis, jun tinamit indígena. E jujun chke ri e qachalal re amis xeʼux apóstatas, y ri sucursal re Taiwán xrilo che rajawaxik jun qachalal che retaʼm kchʼaw pa japonés rech kuya tobʼanik chilaʼ. * Sibʼalaj xojbʼisonik rumal che sibʼalaj utz kqilo kojkʼojiʼ pa Japón. Are kʼu ri Harvey xretaʼmaj che kukʼam ronojel eqelen che kuya ri utinamit ri Jehová che, rumal laʼ xojbʼek.

Are chiʼ xojopan pa Taiwán, pa ri noviembre re 1962, e kʼo 2,271 publicadores. Ri kichʼabʼal konojel are ri ami. Rajawaxik kqetaʼmaj ri chʼabʼal chino, y xa jun libro kʼo qukʼ re ri chʼabʼal chino y jun winaq che kojutijoj, are kʼu kkun taj kchʼaw pa inglés. Paneʼ jeʼ wariʼ, xqetaʼmaj ri chʼabʼal.

Are chiʼ majaʼ naj kojopan pa Taiwán, ri Harvey xkoj che siervo de sucursal. Rumal che nitzʼ ri sucursal, Harvey kkunik kubʼan ri uchak chilaʼ y kkunik kutzijoj utzij ri Dios kukʼ ri e qachalal re ri chʼabʼal ami kʼi taq semanas pa ri ikʼ. Xuqujeʼ jujun taq mul are solinel re distrito, y kuya chʼabʼal pa ri e nim riqbʼal ibʼ. Xkun ta riʼ xuya ri chʼabʼal pa japonés, y ri e qachalal re ri chʼabʼal amis kkichʼobʼ riʼ, are kʼu ri qʼatbʼal tzij xaq xiw kuya bʼe che kbʼan e riqbʼal ibʼ pa ri chʼabʼal chino. Rumal laʼ paneʼ Harvey qas ta retaʼm chino, xuya ri e chʼabʼal y jun qachalal kuqʼaxej pa ri chʼabʼal ami.

Pa ri tiempo riʼ pa Taiwán, xkoj jun taqanik che kbʼix ley marcial che. Ri e qachalal rajawaxik kkitaʼ permiso rech kkibʼan ri e nim riqbʼal ibʼ. Kʼax kkiriqo rech kyaʼ ri permiso chke y kʼi mul ri policía aninaq ta kuyaʼo. We kuriq ri semana re ri nim riqbʼal ibʼ y ri policía uyaʼom ta ri permiso, Harvey kbʼe pa ri comisaría y ktʼuyiʼ chilaʼ y kel ta loq kʼa kyaʼ na che. Kuya kʼixbʼal chke ri policías we kʼo jun winaq re ta ri kitinamit naj kkʼojiʼ pa ri comisaría, wariʼ sibʼalaj ktobʼanik rumal che chanim kkiya permiso.

Are chiʼ kqatzijoj utzij ri Dios kukʼ ri e qachalal, kʼi mul naj kojbʼinik, weneʼ jun hora o más cho taq ri e juyubʼ y kojqʼax pa taq e jaʼ. Knaʼtaj chwe ri nabʼe mul che xinpaqiʼ chuwach jun juyubʼ. Aninaq xqatij bʼi qawa re aqʼabʼil, a las cinco y media xojbʼe pa jun camioneta che xojukʼam bʼi pa jun alaj tinamit che naj kʼo wi. Xojqʼax pa jun jaʼ tekʼuriʼ xojpaqiʼ pa jun juyubʼ. Sibʼalaj paqal uwach ri juyubʼ rumal laʼ ri e raqan ri qachalal che nabʼe chnuwach chinupalaj e kʼo wi.

Pa ri aqʼabʼil riʼ, Harvey y e nikʼaj chi qachalal tajin kkitzijoj utzij ri Dios pa jun tinamit, are kʼu ri in nutukel tajin kintzijoj utzij ri Dios pa jun alaj tinamit ri e kʼo wi winaq che kechʼaw pa japonés. A la una bʼenaqʼij kʼo ta chi más nuchuqʼabʼ, rumal che kʼo ta nutijom. Xqariq qibʼ rukʼ Harvey are chiʼ e kʼo ta chi ri e qachalal. Harvey rukʼam lo oxibʼ saqmoʼl che xyaʼ che rumal ri wuj che xuya kanoq. Xukʼut chnuwach ri kbʼan che utijik saqmoʼl che tzakom taj, xaq xiw kinwotzʼij ri uwiʼ y kinjikʼ ri kʼo chupam. Paneʼ qas ta utz kwil ubʼanik wariʼ, xintij jun. Are kʼu, ¿jachin ktijow ri urox? In xintijowik, rumal che Harvey kkun taj kinreqaj lo cho ri juyubʼ we kinsachiʼ rumal ri numik.

Jumul, are chiʼ xbʼan jun nim riqbʼal ibʼ re circuito, xinkʼulmaj jun jastaq che weyeʼm taj. Xojkʼojiʼ pa rachoch jun qachalal che kʼo naqaj che ri Ja rech Ajawbʼal. Pa ri kicultura ri amis, nim ubʼanik che kkichʼajchʼobʼej kibʼ. Rumal laʼ, ri rixoqil ri solinel re circuito xril ri xubʼano rech kojkunik kqabʼan qatinem. Rumal che Harvey sibʼalaj latzʼ uwach, xubʼij chwe che in nabʼe kinbʼan watinem. Ri qachalal xuya oxibʼ palanganas: jun nojinaq che joron, jun re kʼatan y ri jun chik kʼo ta kʼo chupam. Xinmayo are chiʼ xwilo che xuya chuwach ri ja chkiwach ri e qachalal che e kʼo pa ri Ja rech Ajawbʼal che tajin kkil ri kbʼan che ri nim riqbʼal ibʼ. Xintaʼ che, che kuya jun cortina chwe o jun chi atzʼyaq, ¡are kʼu xuya jun cortina chwe che kinqʼalajin chupam! Xinchomaj kinbʼe chrij ri ja, are kʼu chilaʼ e kʼo jujun gansos che sibʼalaj ketzoponik. Rumal laʼ xinchomaj: «Kinkil ta laʼ ri e qachalal rumal che sibʼalaj latzʼ kiwach. Xuqujeʼ, we kinbʼan ta watinem, weneʼ utz ta kkilo. Rumal laʼ kinbʼano». Y xinbʼano.

Harvey xrilo che ri e qachalal re ri chʼabʼal ami kekun taj kekʼiy pa ri kikojonik rumal che e kʼi ketaʼm ta kkisikʼij uwach wuj; xuqujeʼ, kʼo ta jun wuj bʼanom pa ri kichʼabʼal. Rumal che pa ri tiempo riʼ majim chi utzʼibʼaxik jastaq pa ri chʼabʼal ami —pa ri tiempo riʼ are kkoj ri alfabeto latino—, xqachomaj che utz keqatijoj ri e qachalal che usikʼixik wuj pa ri kichʼabʼal. Are jun nimalaj chak xkʼojiʼ chqawach. Are kʼu, chiʼ xqʼax ri tiempo ri e qachalal kitukel xekunik xkibʼan ri ketaʼmanik chrij ri Biblia. Chukʼisbʼal ri e junabʼ sesenta, xmajix ubʼanik wuj pa ri chʼabʼal ami. Y pa ri 1968 xel lo ri wuj Ri chajinel.

Are kʼu, ri qʼatbʼal tzij xaq xiw pa ri chʼabʼal chino kraj kebʼan wi ri e wuj. Rumal laʼ, rech kʼo ta kkʼulmatajik, Ri chajinel xbʼan pa jalajoj taq formatos. Jun kʼutbʼal, kʼo jun tiempo, Ri chajinel pa junam tiempo xel lo pa kebʼ chʼabʼal: ri chino mandarín y ri ami. Jeriʼ kqʼalajinik che xaq xiw tajin kqakʼut ri chʼabʼal chino chkiwach ri e winaq. Xumaj lo pa ri tiempo riʼ ri utinamit ri Jehová ubʼanom kʼi wuj pa ri chʼabʼal ami rech ri e winaq kketaʼmaj ri qas kukʼut ri Biblia (Hech. 10:34, 35).

Pa ri décadas 1960 y 1970, e kʼi qachalal amis tajin ta kkibʼan ri e utaqanik ri Dios  pa kikʼaslemal. Rumal che qas ta kkichʼobʼ ronojel ri kukʼut ri Biblia, e jujun e qajinaq pa ri inmoralidad sexual, keqʼabʼarik, kkitij sikʼ o nuez de areca (o de betel). Harvey xeʼusolij kʼi congregaciones rech keʼutoʼ ri e qachalal che uchʼobʼik ri kuchomaj ri Jehová chrij ri tajin kkibʼano. Are chiʼ tajin kqasolij jun congregación, xqakʼulmaj ri xinbʼij chiwe nabʼe.

Ri e qachalal che kemachʼachʼik xkaj xkikʼex ri kikʼaslemal, are kʼu sibʼalaj bʼisobʼal che e kʼi xkaj taj. Y weneʼ pa 20 junabʼ, ri publicadores xqaj ri kikʼiyal, rumal che nabʼe e kʼo 2,450 xekanaj kan 900. Wariʼ sibʼalaj xuya bʼis chqe. Are kʼu, qetaʼm che ri Jehová keʼutewchiʼj ta ri e winaq che keniman ta che (2 Cor. 7:1). Are chiʼ xqʼax ri tiempo, ri e winaq che e kʼo pa ri congregaciones xkibʼan ta chi ri jastaq che utz ta kril ri Jehová. Y rumal ri utewchibʼal ri Jehová kimik e kʼo chi más che 11,000 publicadores pa Taiwán.

Xumaj lo pa ri década re 1980, ri congregaciones re ri chʼabʼal ami xesukʼiʼ pa ri kikojonik. Jeriʼ Harvey xkunik xeʼutoʼ más ri e winaq che kechʼaw pa chino. Sibʼalaj xkikotik che xeʼutoʼ ri kachajil e jujun qachalal ixoqibʼ rech xeʼux Testigos. Sibʼalaj xkikot Harvey are chiʼ xrilo che jun chke ri achijabʼ xumaj ubʼanik ri uchʼawem che ri Jehová. In xuqujeʼ sibʼalaj kinkikotik rumal che xeʼentoʼ e kʼi winaq rech xeqebʼ rukʼ ri Jehová. Y sibʼalaj xinkikotik rumal che junam qapatanij ri Jehová pa ri sucursal re Taiwán kukʼ e kebʼ ral jun winaq che xinya etaʼmanik re ri Biblia che.

Kʼo ta chi ri wachiʼl. Are chiʼ qʼaxinaq chi 59 junabʼ che oj kʼulanik, ri loqʼalaj nuHarvey xkam rumal ri cáncer, wariʼ xkʼulmataj pa ri 1 re enero 2010. Ri tiempo che xupatanij ri Jehová pa tiempo completo xa jubʼiqʼ xraj che seis décadas. Sibʼalaj kinbʼisoj. Are kʼu sibʼalaj kinkikotik che xinkunik xintoʼ are chiʼ xumaj ri chak che ri Dios pa kebʼ jeʼlalaj taq tinamit. Xqetaʼmaj xojchʼaw pa kebʼ chʼabʼal re Asía che kʼax retaʼmaxik y Harvey xuqujeʼ xretaʼmaj xtzʼibʼan pa ri e chʼabʼal riʼ.

Are chiʼ qʼaxinaq chi jujun junabʼ che kaminaq Harvey, ri Jupuq Ajkʼamal bʼe cho ronojel ri uwach Ulew xubʼij che are utz kintzalij pa Australia rumal che nim chi ri nujunabʼ. Nabʼe xinchomaj: «Kwaj taj kinya kan Taiwán». Are kʼu Harvey xukʼut chnuwach che are utz amaqʼel kqanimaj ri kojutaq wi ri utinamit ri Jehová. Rumal laʼ xintzalij pa Australia. Chiʼ xqʼax ri tiempo xinchʼobʼo che utz che xintzalijik.

Kimik tajin kinpatanin pa ri sucursal re Australasia lunes a viernes y kinel che utzijoxik ri utzij ri Dios pa taq sabádo y domingo kukʼ ri e qachalal re ri congregación. Kinya gira chke ri kepe che usolixik ri Betel y sibʼalaj kinkikotik are chiʼ kechʼaw pa chino o japonés. Are kʼu sibʼalaj kwaj che kopan ri qʼij che kekʼastaj lo ri kaminaqibʼ. Y qas wetaʼm che Harvey, che xretaʼmaj ubʼanik ronojel ri xtaq wi, kʼo pa uchomanik ri Jehová (Juan 5:28, 29).