Е Харви сине ле трин пхраља. Ов сине о најпхуредер. Лескири фамилија дознајнѓа о чачипе англедер 80 берш ко Мидланд Џанкшн, ки западно Австралија џикоте ки адаја пхув сине бари економско криза. О Харви панда таро тикнипе мангела сине е Јехова хем кеда сине ле 14 берш крстинѓа пе. Сигате сиклило кај ваљани те прифатинел секоја задача тари организација. Сар? Јекх пути кеда добинѓа задача те читинел и Стражарско кула ко собрание, ов одбинѓа ла адалеске со мислинѓа кај ов нане доволно способно башо адава. Ама, о пхрал кова со денѓа ле адаја задача, поможинѓа леске јаверчхане те размислинел. Ов вакерѓа леске: „Кеда некој ки е Јеховаскири организација дела тут несави задача ов мислинела кај ту шај те кере адава!“ (2. Кор. 3:5).

О чачипе дознајнѓум ле ки Англија, заедно ме дајаја хем ме попхуре пхењаја. Крстинѓум ман кеда сине ман само ења берш, иако мо дад на мукхља ман те керав адава. Ко почеток мо дад на мангела сиен е Јеховаскере сведокон, ама покасно  ов да прифатинѓа о чачипе. Чхивѓум манге сар цел те овав пионери а покасно те овав мисионери. Ама, мо дад на дозволинѓа манге те овав пионери са џикоте на пхерава 21 берш. На сине ман намера те аџикерав добором време. Адалеске кеда сиен ман само 16 берш мо дад дозволинѓа манге те селинав ман ки Австралија коте со живинела сине ми попхури пхен. Конечно, кеда пхерѓум 18 берш почминѓум ки пионерско служба.

О Харви хем ме запознајнѓем амен ки Австралија. Солдуј џене манглем те служина е Јеховаске сар мисионерија. Венчинѓем амен ко 1951 берш. Откеда служинѓем дуј берш сар пионерија, пучле амен те служина ки покраинско служба. Амари покраина ки западно Австралија сине бут бари, адалеске ваљани сине те патујна преку пуста хем изолириме тхана.

Ко 1954 берш сием сине каниме те присуствујна ко 25-то класи тари Школа Гилеад. Амари желба те ова мисионерија почминѓе те исполнинел пе! Ко Њујорк реслем бродеа. Ки Школа хор проучинаја сине и Библија, ама исто аѓаар ваљани сине те сикљова шпански. Е Харвиске сине пхаро те сикљовел шпански соске нашти сине те изговоринел и буква „р“.

Џикоте трајнела сине и школа, о инструкторија денѓе известување кај окола со мангена те џан ки Јапонија шај те пријавинен пе башо курси ки јапонско чхиб. Амен решинѓем е Јеховаскири организација те одлучинел кај ка служина. Пало адава, о пхрал Алберт Шредер, јекх таро инструкторија ки Школа Гилеад, дознајнѓа кај амен на пријавинѓем амен ко адава курси. Ов вакерѓа аменге: „Размислинен хари пошукар башо адава“. Пало несаво време кеда панда на одлучинѓем амен со ка кера, о пхрал Шредер вакерѓа аменге: „Ме хем о јавера инструкторија пријавинѓем тумен ко курси баши јапонско чхиб. Дикхен дали ка шај те сикљовен адаја чхиб“. О Харви шај сине полокхе те сикљовел јапонски.

Ки Јапонија реслем ко 1955 берш кеда ки цело пхув сине само 500 објавителија. Ме роме сине ле 26 берш а манде сине ман 24. Сием сине бичхалде ки диз Кобе, коте со ачхилем те служина штар берш. Пало адава сием сине бут бахтале кеда вакерѓе аменге кај шај палем те служина ки патувачко служба, хем служинѓем паше ки диз Нагоја. Мангаја сине са со сине поврзимо амаре задачаја — е пхрален, о хајбе хем и околина. Ама, кратко пало адава добинѓем јавер задача таро Јехова со на одбинѓем ла.

Откеда трин берш служинѓем ки патувачко служба, и подружница ки Јапонија замолинѓа амен те џа ко Тајван те шај те проповедина е манушенге таро племе Амис. Несаве пхраља таро акава племе уле отпадникија. Адалеске ки подружница ко Тајван ваљани сине јекх пхрал кова со керела сине шукар јапонски лафи те шај те поможинел ки акаја пхари ситуација. * Адаја сине бут пхари одлука аменге соске мангаја сиен бут и служба ки Јапонија. Ама, о Харви сиклило више те на одбинел о теократска задаче, хем адалеске решинѓем амен те селина амен ко Тајван.

Ко Тајван реслем ко 1962 берш. Адатхе сине само 2.271 објавителија хем повише лендар сине таро племе Амис. Ама, ваљани сине те сикљова кинески. Сине амен само јекх лил хем јекх учители кова со на џанела сине те керел лафи ки англиско чхиб. Ама, сепак сиклилем кинески.

Кратко откеда реслем ко Тајван, о Харви добинѓа задача те служинел сар надгледнико ки адаја подружница. Адалеске со и подружница сине бут тикни, о Харви успејнела сине те завршинел и канцелариско бути јекхе куркеске, а окола трин курке сине ки служба заедно е пхраленцар таро племе Амис. Понекогаш служинела сине сар областно надгледнико хем адалеске икерела сине говорија ко покраинска конгресија. О Харви ка шај сине те икерел говорија ко јапонски хем о пхраља хем о пхраља таро племе Амис ка хаљовен ле сине. Ама, и влада родела сиен о религиозна состанокија те икерен пе само ки кинеско чхиб. Адалеске ов икерела сине о говорија ки кинеско чхиб иако на џанела ла сине шукар, а јекх пхрал превединела сине ко Амис.

Ко Тајван сине прогласими вонредно состојба, адалеске о пхраља ваљани сине те добинен дозвола те шај те икерен о конгресија. На сине локхо те добинен пе асавке дозволе а понекогаш ваљани сине бут те аџикерел пе. Ако и полиција на дела амен сине дозвола башо конгрес со ка икерел пе сине адава курко, о Харви ка бешел сине ки полициско станица са џикоте на добинела ла сине. Акаја тактика сине успешно соске о полицајција лаџана сине јекх странцо те аџикерел ки ленгири станица.

Адала курке кеда сием сине е пхраленцар, обично пхираја сине повише таро јекх саати, укљаја сине ко планине хем накхаја сине таро реке. Сетинава ман кеда прво пути уклиљум ки планина. Адава диве, откеда халем сабалуко, уклилем ко автобуси ко 5:30 сабајле со ингарела сине ко јекх дур гав. Пало адава пешки накхлем тари јекх бувли река хем уклилем ки јекх стрмно планина. И планина сине добором стрмно со кеда дикхава сине право шај сине те дикхав о пре е пхралескере со уклела сине англи манде.

Цело сабај о Харви проповединѓа несаве пхраленцар таро адава тхан, а ме коркори сведочинѓум ко јекх тикно гав коте со о мануша керена сине јапонски лафи. Околу јекх о саати пало ручко на осетинава ман сине шукар адалеске со на хаљум маро некобор саатија. Кеда конечно ме хем о Харви аракхлем амен, леа на сине више никој таро пхраља. Англедер, ов денѓа несаве списанија хем ленге добинѓа трин свежа јаре тари кхани.  О Харви керѓа јекх дупка ко јаро хем сикавѓа манге сар шај те пијав ле. Иако адава на дикхјола сине манге бут вкусно, ме да пиљум јекх јаро. А кој пиља о трито јаро? О Харви денѓа ле манге соске џанела сине кај ако пељум ко несвест тари бокх, ов ка нашти сине те хуљавел ман тари планина.

Ко јекх покраинско конгрес случинѓа пе манге нешто необично. Бешаја сине ко кхер таро јекх пхрал со сине паше узи дворана. Адалеске со е манушенге таро племе Амис о нанѓојбе тано бут важно, и ромни таро покраинско надгледнико спреминѓа аменге са те шај ме хем о Харви те нанѓова. Адалеске со сине зафатимо, о Харви пучља ман дали шај ме прво те нанѓовав. Ој спреминѓа манге јекх кофа тате пањеа, јекх кофа шудре пањеа хем јекх чучи копана. Бут сиум сине изненадими кеда ој чхивѓа акала буќа аври ко дворо, соске адатхар дикхјола сине и дворана коте со о пхраља поможинена сине те спреминел пе о конгрес. Адалеске пучљум ла дали шај те дел ман несави завеса. Ој анѓа манге јекх проѕирно најлони. Мислинѓум те џав пало кхер, ама адатхе сине несаве гуске со шај сине те кицинен ман. Адалеске мислинѓум манге: „О пхраља тане добором зафатиме со нане те приметинен кај нанѓовава. А ако на керава адава, и пхен хем лакоро ром ка вреџинен пе“. Адалеске решинѓум те нанѓовав.

О Харви халило кај е пхраленге таро племе Амис сине пхаро духовно те напредујнен адалеске со побаро дело лендар на џанена сине те читинен хем на сине лен публикацие ки ленгири чхиб. Адалеске со англедер кратко време почминѓа те пишинел пе ки чхиб Амис, мислинѓем кај тано шукар те сикава е пхрален те читинен ки пумари чхиб. Иако на сине локхо, сар со накхела сине о време, о пхраља почминѓе те сикљон башо Јехова ки пумари чхиб. О публикацие ки чхиб Амис почминѓе те икљон ко 1966 берш, хем дуј берш покасно почминѓа те икљовел и Стражарско кула.

Ама, и влада на мангела сине те да публикацие со нане ки кинеско чхиб. Адалеске, те шај те на овен амен проблемија, и Стражарско кула икљола сине ко различна начинија. На пример, несаво време, и Стражарско кула икљола сине хем ко кинески хем ки чхиб Амис. Аѓаар изглединела сине кај сикаваја е манушен те керен кинески лафи. Оттегани, е Јеховаскири организација икалѓа бут публикацие ки чхиб Амис те шај те поможинел  адале мила манушенге те сикљовен о библиска чачипа (Дела 10:34, 35).

Бершенцар, бут пхраља таро племе Амис на живинена сине спрема е Девлескере мерилија. Адалеске со на халиле шукар о библиска начелија, несаве лендар живинена сине неморално, маќовена сине, пушинена сине хем чамкерена сине бетелско акхор. О Харви посетинѓа бут собранија те шај те поможинел е пхраленге те хаљовен сар о Јехова дикхела ко акала буќа. Ки јекх асавки посета, случинѓа пе аменге адава со вакерѓум ко почеток тари статија.

О понизна пхраља сине спремна те керен промене, ама жално тано адава, со бут јавера на керѓе промене хем ко периоди таро 20 берш о број таро објавителија ко Тајван кола со сине повише таро 2.450, пело ко околу 900. Акава бут обесхрабринѓа амен. Ама, џанаја сине кај о Јехова никогаш нане те дел берекети ако лескири организација нане чисто (2. Кор. 7:1). Пало несаво време, о собранија служинена сине е Јеховаске ко исправно начин, хем о Јехова денѓа пло берекети. Акана ко Тајван иси повише таро 11.000 објавителија.

Таро 1980 берш надари, дикхлем кај о пхраља хем о пхења ко собранија ки чхиб Амис сине лен позорали вера, хем о Харви шај сине те накхел повише време е кинезенцар. Ов сине бахтало со шај сине те поможинел некоборе пхењенгере ромен те овен е Јеховаскере сведокија. Сетинава ман кеда вакерѓа манге кобор сине бахтало кеда јекх таро акала мануша прво пути молинѓа пе е Јеховаске. Ме да сиум бут бахтали со шај сине те поможинав буте искрена манушенге те овен попаше е Јеховаја. Сине ман чак прилика те служинав ки подружница ко Тајван е чхавеа хем е чхајаја тари јекх интересентка касаја со проучинава сине и Библија.

Пало скоро 59 берш брако, мло мангло ром о Харви, муло ко 1 јануари 2010 берш таро рако. Заедно накхлем скоро 60 берш ки полновремено служба! Панда фалинела манге бут. Сиум сине бут бахтали те служинав леа ко дуј бут шуже пхувја! Сиклилем те кера лафи — хем о Харви исто аѓаар сиклило те пишинел — ко дуј пхаре азиска чхибја.

Пало штар берш, о водечко тело одлучинѓа кај ка овел пошукар ме те иранав ман ки Австралија. Прво нешто со ало манге ки годи сине: „На мангава те џав манге таро Тајван“. Ама, о Харви сикавѓа ман никогаш на ваљани те вакерав „на“ е Јеховаскере организацијаке, хем адалеске гељум. Покасно халиљум кобор сине мудро адаја одлука.

Авдиве, служинава ки подружница Австралазија. Бахтали сиум со ко Бетел шај те керав обиколке ки јапонско хем ки кинеско чхиб. Ко викендија проповединава е пхраленцар хем е пхењенцар таро јекх собрание сој паше. Едвај аџикерава о воскресение со ветинѓа ле о Јехова. Џанава кај о Јехова никогаш нане те бистрел е Харви, кова со секогаш керела сине адава со о Јехова родела лестар (Јован 5:28, 29).