O Harvi hine najphureder hem hine le pana trin phralja. Olesi porodica upoznajinđa o ćaćipe ko Midland Džankšn, ki Zapadno Australija, ked ko 1930-ta berša hine bari ekonomsko kriza. O Harvi ćaće zamanglja e Jehova hem krstinđa pe ked hine le 14 berš. Sigate sikljilo kobor tano važno te prihvatini svako zaduženje ki skupština. Jekh puti, đi pana hine terno, odbinđa te čitini i Stražarsko kula ko sastanak, sose mislinđa so odova na ka ćerel šukar. Ama, jekh phral pomožinđa lese averćhane te dikhel ko buća, ađahar so phenđa lese: „Ked neko ki e Jehovasi organizacija pućela tut te ćere diso, ov mislini so tu odova šaj te ćere! (2. Kor. 3:5).

Me upoznajinđum o ćaćipe ki Engleska, zajedno me dajaja hem me najphuredere phenjaja. Ko početko, mo dad protivinđa pe, ama kasnije hem ov ulo e Jehovaso svedoko. Krstinđum man ked hine man enja berš, iako odova na sviđinđa pe me dadese. Mo cilj hine te ovav pioniri hem palo odova te ovav misionari. Mo dad na manglja te mukhel man te ovav pioniri sa đi na pherava 21 berš. Ama, me na mangljum te ađićerav odobor. Ked hine man 16 berš, ov dozvolinđa maje  te đav te živinav ki Austalija, ki mi phureder phen, koja preselinđa pe uduri. Konačno, ked hine man 18 berš, uljum pioniri.

O Harvi hem me upoznajinđam amen ki Australija. Solduj mangljam te služina e Jehovase sar misionarija. Ko 1951. berš, leljam amen. Palo odova so duj berš zajedno služinđam sar pionirija, počminđam te služina ki pokrajinsko služba. Amari pokrajina ki Zapadno Australija hine but bari. Morandiljam but te vozina prekalo sušna područja te bi resa đi o dur thana.

Ko 1954. berš, hijam le vićime ki škola Galad. Hijam le deo ando 25. razred. Amaro suno te ova misionarija hine paše te ispunini pe. Brodoja resljam ko Njujork hem počminđam but hor te proučina e Devleso Lafi. Jekh deo andi nastava hine te sikljova špansko ćhib, ama me romese hine pharo sebepi so o slovo r naštinđa te vaćeri sar so vaćerena le o Špancija.

Ði trajinđa i škola, o instruktorija phenđe so sa okola soj tane zainteresime te služinen ko Japan, šaj te prijavinen pe te sikljon japanski. Amen odlučinđam te mukha e Jehovasi organizacija te odlučini kaj ka služina. Sigate palo odova, o phral Albert Šroder, jekh ando instruktorija ki škola Galad, dikhlja so amen na prijavinđam amen. Ov phenđa amenđe: „Razmislinen pana hari.“ Sebepi so hijam le ko duj gođa, o phral Šroder phenđa amenđe: „Avera instruktorija hem me prijavinđam tumen. Pokušinen te sikljon japanski.“ E Harvise polokho hine te vaćeri japanski, nego španski.

Ko Japan aljam ko 1955. berš. Tegani, ki odija phuv hine samo 500 objaviteljija. O Harvi hine le 26, a me 24 berš. Hijam le bićhalde te služina ki diz Kobe. Odothe služinđam štar berš. But hijam le bahtale ked hijam le vićime palem te služina ki pokrajinsko služba. Služinđam paše uzi diz Nagoja. Uživinđam ko sa – hem e phralencar hem e phenjencar, hem ko habe, hem ki okolina. Ama, soj tano najvažno, hine amen pana jekh prilika te ćera odova so o Jehova rodela amendar.

Palo odova so trin berš služinđam ki pokrajinsko služba, o phralja kotar i japansko podružnica pućlje amen da li hijam spremna te đa ko Tajvan, te propovedina e manušenđe kola avena ando pleme Amis. Disave phralja kotar odova pleme,  ulje otpadnikija hem hine potrebno jekh phral, kova šukar vaćeri japanski, te bi zaustavini pe o otpadništvo. * Amen but mangljam amari služba ko Japan. Odolese, hine amenđe but pharo te ana i odluka. Ama, o Harvi sikljilo niked te na odbini disavo zaduženje. Odolese, anđam i odluka te đa.

Ko novembar, ko 1962. berš, amen resljam ko Tajvan. Tegani, odothe hine 2 271 objaviteljija. But olendar hine Amisija. Ama, sar prvo morandiljam te sikljova kineski. Hine amen samo jekh knjiga te sikljova kineski hem e učiteljica, koja na vaćerđa engleski. Ama, amen ipak sikljiljam kineski.

Sigate palo odova so resljam ko Tajvan, o Harvi počminđa te služini sar sluga andi podružnica. Sebepi so i podružnica hine tikni, ov šajinđa hem te ćerel sa i buti odothe hem trin kurće ko masek te sarađujini e phralencar ando pleme Amis. Isto ađahar, jekh vreme služinđa sar oblasno nadglednik hem odolese valjanđa te ićeri o govorija ko bare skupija. Sebepi so šajinđa te ićeri o govorija ko japanski, o phralja kola hine Amisija, šajinđe te haljon. Ama, o vlastija dozvolinđe o verska sastankija te ićeren pe samo ko kineski. Odolese, o Harvi, iako pana borinđa pe te sikljol kineski, ićerđa o govorija ko kineski, a o phral prevodinđa le ko amis.

Ko odova vreme, ko Tajvan hine vanredno stanje. Odolese o phralja svako puti morandilje te roden i dozvola te šaj te oven ićerde bare skupija. Na hine lokho te dobini pe i dozvola. But putija i policija amari molba ćhivđa ki strana. Ked na bi dela amen i dozvola jekh kurko angleder o kongres, o Harvi bi bešela ki policijsko stanica sa đi na dobini i dozvola. Olenđe hine lađavo so jekh stranco bešela ki olengi stanica hem odolese sigate bi dena i dozvola.

Odola kurće ked hijam le e phralencar, obično bi phiraja jekh sati, a podijekh puti hem pobuter, bi nakhaja prekalo planine hem reke. Našti te bistrav ked prvo puti ukljiljum ki planina. Odova sabale, ki sig haljam maro hem ko ekvaš ko šov hine amen autobus koleja putujinđam đi jekh gav kova hine dur. Palo odova nakhljam prekali jekh buvli reka hem ukljiljam uzi jekh strmo planina. I planina hine odobor strmo so ked vazdinđum mo šero, dikhljum o pre kotar jekh phral kova hine poupreder mande.

Odova sabale, o Harvi hine ki služba disave phralencar, a me kokri svedočinđum ko jekh tikno gav kuri živinđe o manuša kola vaćerena japanski. Negde, oko jekh o sati, dolđa man i nesvestica sebepi so nekobor satija ništa na haljum. Ked o Harvi hem me konačno arakhljam amen, niko ando phralja na hine paše. O Harvi dinđa nekobor časopisija hem sar zamena dobinđa trin jare. Sikavđa man sar te ćerav jekh tikni rupa ko jaro hem upre hem tele hem te pijav le. Na dićhilo maje so odova ka ovel ukusno, ama probinđum jekh. Ama, ko ka hal o trito jaro? O Harvi dinđa le maje, sose mislinđa ako perava ko nesvest  sebepi i bokh, so na ka šaj te akhari man hem te huljel mancar kotar i planina.

Ked hine amen jekh pokrajinsko sastanak, doživinđum diso neobično. Sućam ko jekh phral kaso ćher hine odmah uzi dvorana. Sebepi so aso Amisija o nanđovibe hine but važno, i romni kotar o phral kova služinđa sar pokrajinsko nadglednik, spreminđa amenđe sa te šaj te nanđova. O Harvi hine le pana diso te ćerel, hem odolese phenđa prvo me te đav. I phen pripreminđa amenđe trin buća: jekh kofa šudre panjeja, jekh kofa tate panjeja, hem kopana. But hijum le iznenadimi so sa odova ćhivđa anglo ćher, a odothar dikhlja pe i dvorana kuri o phralja pripreminđe sa aso pokrajinsko sastanak. Pućljum la da li isi la disavi zavesa ja diso slično. Oj anđa maje jekh providno najloni. Mangljum te đav palo ćher te nanđovav, ama odothe hine guske kola kotar i ograda ikalđe po šero hem manglje te kicinen svakone kova bi avela but paše. Kokri maje phenđum: „O phralja tane but zauzeta te bi šaj te dikhen so me nanđovava. Ako na nanđovava, me domaćinija ka holjanen. Ka ćerav hem odova.“ Ađahar hem ćerđum.

O Harvi haljilo so e phralenđe hine pharo te napredujinen sebepi so but olendar na đanđe te čitinen hem te pisinen hem na hine len publikacije ki pi ćhib. Samo hari angleder i ćhib amis počminđa te pisini pe ki latinica, hem odolese dićhilo amenđe so ka ovel šukar te sikava e phralen te sikljon te čitinen ki pi ćhib. Odija hine but bari buti, ama ko krajo o phralja šajinđe kokri te proučinen. Disave publikacije iklilje ki ćhib amis ko 1960-ta berša, hem ko 1968. berš i Stražarsko kula počminđa te ikljol.

Ama, o vlastija zabraninđe sa o publikacije kola na hine ko kineski. Te na bi ovel amen problemija, i Stražarsko kula ki ćhib amis, hine objavimi ko razna načinija. Na primer, jekh vreme, sa ki Stražarsko kula hine pisimo hem ko kineski hem ko amis. Ako bi neko pućela diso, šaj hine te dićhol so prekalo odova časopis sikavaja e manušen kineski. Kotar tegani, iklilje razna publikacije ki ćhib amis, kola pomožinđe akale manušenđe,  kola tane ćaće šukar, te sikljon o ćaćipe kotar e Devleso Lafi (Dela 10:34, 35).

Ko 1960-ta hem ko 1970-ta berša, but phralja, o Amisija, na ićerđe pe ko e Devlese merilija. Sebepi so na haljilje potpuno e biblijake načelija, disave olendar nemoralno živinđe, but pilje, koristinđe o duvani hem o betelsko orah. O Harvi posetinđa but skupštine hem dinđa sa pestar te pomožini e phralenđe te haljon sar o Jehova dikhela ko sa odola buća. Ko jekh ando odola posete doživinđam odova so vaćerđum ko početko.

O phralja kola hine ponizna hine spremna te menjinen pe. Nažalost, hine hem but phralja kola na hine spremna te menjinen pe. Ko Tajvan hine pobuter ando 2 450 objaviteljija, a aso 20 berš, o broj pelo ko oko 900. Odova hine but pharo vreme. Ki aver strana, đanđam so o Jehova niked na ka blagoslovini i organizacija koja tani melali (2. Kor. 7:1). Palo disavo vreme, o phralja ko skupštine počminđe te služinen e Jehovase ko ispravno način hem sebepi so o Jehova dinđa len po blagoslov, akana ko Tajvan isi prekalo 11 000 objaviteljija.

Kotar 1980-ta berša, dikhljam sar o phralja hem o phenja, o Amisija, duhovno napredujinena. Odolese, o Harvi hine le pobuter vreme aso Kinezija. Ov hine but bahtalo so šajinđa te pomožini nekobor roma kotar amare phenja te oven e Jehovase svedokija. Našti te bistrav ked vaćerđa maje kobor hine bahtalo ked jekh olendar prvo puti molinđa pe e Jehovase. Hem me hijum bahtali so šajinđum te proučinav bute manušencar hem te pomožinav lenđe te oven pana popaše e Jehovaja. Čak hine man prilika te služinav ki podružnica, ko Tajvan zajedno jekhe ćhaveja hem jekha ćhajaja, kolenge dajaja proučinđum.

Nažalost, akana hijum kokri. Palo odova so skoro 59 berš hijam le ko brako, ko 1. januar 2010. berš, mo manglo Harvi mulo, palo odova so naborsalo ando rak. Skoro 60 berš hine ki punovremeno služba. Hem akana but nedostajini maje. Ama, but hijum bahtali so šajinđum te podržinav le đi služinđam ko duj but šukar phuvja. Sikljiljam te vaćera duj but phare azijska ćhibja, a o Harvi sikljilo hem te pisini ko odola ćhibja.

Nekobor berš palo odova, o Vodeće telo odlučinđa so sebepi me berša tano najšukar te irinav man ki Australija. Najangleder, na mangljum te đav kotar Tajvan. Ama, o Harvi sikavđa man niked te na phenav na e Jehovase hem odolese irinđum man. Ko krajo, dikhljum kobor odija odluka hine mudro.

Avdije, prekalo kurko ćerava ki podružnica ki Australija hem prekalo vikend đava ki služba e phralencar hem e phenjencar kotar i skupština. Bahtali hijum ked ko japanski hem ko kineski šaj te legarav e manušen te dikhen o Betel. Jedva ađićerava o dive ked ka ovel o uskrsenje. Ðanava so mo Harvi, kova sikljilo niked te na phenel na e Jehovase, tano ko najsigurno than, ko Oleso sećanje (Jov. 5:28, 29).