Haarviyi shoolu roduuwisi giddo bayiraho. Maatesi halaale macciishshitinohu Galchimi Awustiraaliyira Midilaandi Jaankishiini yinanniwaati; hakka woyite yaano 1930 balla hatte gobbara miinju qarri no. Haarviyi Yihowa baxanno gede assine lossinoonnisi; isi 14 dirisinni cuuamino. Isi mulenni songote giddo uyinannisi loosira maahoyye yaa rosino. Isi shiimu heeꞌreenna gambooshshunniwa Agarooshshu Shae nabbawanno gede xaꞌminisita, dandoo dinoe yee hede nabbawa giwino. Haarviyi hasaawisi rodii isi hedosi biddi assiꞌranno gede kaaꞌlinosi; isi, “Mittu manchi Yihowa dirijjite giddo looso aannohehu hakkonne looso loosa dandaatto yee hedeeti” yiinosi.—2 Qor. 3:5.

Ani, amaꞌyanna bayira rodooꞌya halaale ronsoommohu Ingilaandeteeti. Anniꞌya Yihowa Farciꞌraasincho ikkinohu yannate gedensaanniiti; umi qara kayinni isi Yihowa Farciꞌraasine dibaxanno. Anniꞌya cuuamammara hasiꞌrannokkiha ikkirono, honsu diriti heeꞌre cuuamumma. Suwisaancho ikke soqqamatenna misiyoone ikkate mixo fushshiꞌrumma. Ikkirono, anniꞌya 21 diro ikkae geeshsha suwisaancho ikkammara dihasiꞌrino. Ani kayi hakka geeshsha keeshsha dihasiꞌroomma. Hakkiinni 16  diro ikkieta Awustiraaliyaho heedhannote bayira rodooꞌyawa haꞌre heeꞌreemma gede fajjie. Konnira 18 diro ikkieta suwisaancho ikke soqqama hanafumma.

Awustiraaliyaho Haarviyi ledo egennamumma. Isino ane gede misiyoone ikke Yihowara soqqama hasiꞌrannota kulie. Hakkiinni 1951 adhammummo. Lame diro suwisaano ikkine soqqammummohu gedensaanni woradu looso loonseemmo gede xaꞌmininke. Galchimi Awustiraaliyira noohu woradinke halaꞌlado ikkinohura, duucha woyite makeenunni halallitte baatto widoonni hinge xeertowa haꞌneemmo.

Hakkiinni 1954nni Giiliyaadi Rosi Mine 25^ki kifile eꞌne ronseemmo gede koyinsinke. Misiyoone ikkate halchonke woꞌmitaraati. Markaawetenni Niwu Yoorke marrummohu gedensaanni, Qullaawa Maxaafa seekkine xiinxalla hananfummo. Giiliyaadi Rosi Mine Ispeenete Afoono rosa hasiissinonke; Haarviyi hakko afiinni “r” fidale woshsha dandiinokki daafira konne afoo rosa qarra ikkitinosi.

Rosiisaanonke, Jaappaanete hadhe soqqama hasidhanno roduuwi Jaappaanete Afoo rosate borreessantanno gede egensiissino. Ninke kayinni loonseemmo looso Yihowa dirijjite doortonke yine sammi yinoommo. Hakkiinni Giiliyaadi Rosi Mini rosiisaanchi Alberti Shiroyideri rosate borreessammoommokkita afi. Isi, “Tenne daafira seekkitine hedde” yiinonke. Xaano borreessammoommokki daafira, “Aninna wole rosiisaano suꞌmaꞌne borreessinoommo. Jaappaanete Afoo rosate woꞌnaalle” yiinke. Haarviyi konne afoo qarramikkinni rosino.

Jaappaane haꞌnoommohu 1955nniiti; hakka waro hatte gobbara 500 halashshaano calla no. Hakka woyite Haarviyira 26 dirosiiti; ani kayinni 24 dirite. Sonkoonninkehu Kobe yinannihu malkate noo katamaati; hakkiicho shoole diro soqqammoommo. Hakkiinni wirro woradu looso loonseemmo gede koyinsinketa lowo geeshsha hagiidhinoommo; soqqammoommohuno Nagoya yinanni katami muleeti. Soqqanshonke lowo geeshsha banxoommo; roduuwa, hatte gobba sagalenna gaxarete qooxeessa lowo geeshsha banxoommo. Mulenni, xaano Yihowara gimbi yaa hasiissannonkekkita leellinsheemmo faro afiꞌnoommo.

Sase diro woradu looso loonsummohu gedensaanni, Jaappaanenniti sinu biiro Tayiwaane haꞌne  Amiisi mannira sabbankeemmo gede xaꞌmitunke. Hakkiicho kaadaasine kaꞌino daafira, Tayiwaanennite sinu biirora konne qarra tirate Jaappaanete Afoo coyiꞌranno rodii hasiisinonsa. a Jaappaanete soqqama lowo geeshsha banxoommo daafira, hakkiinni agurre haꞌra shota diꞌꞌikkitinonke. Ikkirono Haarviyi uyinannisi looso gimbi yaa hasiissannosikkita rosino daafira, haꞌrate sumuu yinummo.

Tayiwaane haꞌnoommohu Bocaasa 1962nniiti. Hakka waro hakko noo halashshaano 2,271te; insa giddo rooru Amiisi gosaati. Balanxe kayi Chayinu Afoo rosa hasiissinonke. Chayinu Afoo rosate kaaꞌlannonkehu noonkehu mitto maxaafaatinna Ingilizete Afoo dandiitannokkite mitte rosiisaanchooti; ikkirono konne qaale ronsoommo.

Tayiwaane marrummohunni shiima yanna gedensaanni, Haarviyi sinu biiro soqqamaancho ikke soqqamanno gede assinoonni. Sinu biiro shiima ikkitino daafira Haarviyi biirote looso loosanni heeꞌre, aganu giddo sase lamala Amiisi roduuwi ledo soqqamanno. Qoleno mito woyite woradu aliidi laꞌꞌaancho ikke soqqamanno daafira jajjabbu gambooshshiwa lallawo shiqishanno. Haarviyi lallawo shiqishannohu Jaappaanete Afiinni ikkino daafira, Amiisi roduuwi huwata dandiitanno. Ikkirono gashshootu ammaꞌnote gambooshshe Chayinu Afiinni calla assinanni gede fajjino. Konnira Haarviyi Chayinu Afoo hakkeeshshi geeshsha dandaannokkiha ikkirono, mittu rodii Amiisi Afiira qole tiranna ikkita ikke lallawo shiqishino.

Hatte yannara Tayiwaane olanto gashshite noo daafira, roduuwu jajjabba gambooshshe assiꞌrate insa fajjishiishiꞌra hasiissannonsa. Duucha woyite polise rakke fajjitannonkekki daafira fajjo afiꞌra qarraho. Polise gambooshshe assiꞌnanni lamala geeshsha fajja hoogguro, Haarviyi insa fajjita geeshsha mare xaawinsara ofollanno. Polise wole gobba manchi xaawinsara ofolle noota affuro saaltanno daafira rakke fajjitanno.

Roduuwu ledo mitteenni soqqammeemmo yannara, duucha woyite ilaalla fullanninna lagga tayinsanni lekkatenni mitte saate woy hakkuyi ale haꞌneemmo. Mite yee ilaala fuloomma yanna qaageemma. Soodimaro shooꞌminummohu gedensaanni, 11:30 otobise giddine xeertowa haꞌnummo; hakkiinni laga tayinse saꞌne hossi yiino ilaala fullummo. Ilaalu lowo geeshsha hossi yiinoha ikkino daafira, iima hige laeemma woyite albaꞌyaanni fulanni noo rodiihu lekkasi hoowi leellannoe.

Hatte soodo Haarviyi hakko qooxeessira heedhanno roduuwi ledo soqqamino; ani kayinni Jaappaanete Afoo coyiꞌranno manni noo qooxeessira callichoꞌya soqqamoomma. Sagale itummakkinni keeshshoomma daafira lamala saate balla hudiꞌre shaqqumma. Gedensaanni Haarviyi ledo xaadumma woyite, roduuwu ledosi dino. Haarviyi mite metseete ee sase bura quuphicho adhe dayino. Hakkiinni mitto quuphicho dhoose anganni gara leellishie. Agate baxisannokkiha ikkirono, ikkummata ikke mitto agumma. Sayikkiha aye adhiyya? Haarviyi ani hudiꞌre shaqqeenna duhe eelallicho dirrise afannoekkita hedino daafira gatino quuphichono ani agumma.

Mittu woradu gambooshshi yannara egennoommakkiri tuncu yiinoe. Gambooshshu Addaraashe mule noohu mittu rodii mine wosinsinoonninke. Amiisi manni biso hayishshiꞌra lowori gede asse laꞌꞌanno daafira, woradu aliidi laꞌꞌaanchi minaama biso hayishshiꞌneemmo gede hasiisannore qixxeessitunke. Haarviyira loosu batiꞌrinosi daafira ane balaxxe hayishshiꞌri yiie. Rodoo sase baalde abbitinonke: mittete qiidino wayi no, mittete iibbino wayi no, sayikkitera kayinni wayi dino. Dhagge ikkinoe coyi, woradu aliidi laꞌꞌaanchi minaama baalduwa minu gobbaanni, roduuwu woradu gambooshshira bayicho biddi assitanni noowa Addaraashete albaanni abbite wortu. Ise mitore goꞌle hayishshiꞌreemmare abbitannoe gede xaꞌmiꞌrumma. Hakkiinni hakkeeshsha goltannokkita shaalado laastike abbitue. Minu badheenni goꞌle hayishshiꞌrate heedoommaha ikkirono, hakko daakiyye nooti qassannoe yee waajjoomma. Hakkiinni togo yee hedumma: ‘Roduuwu loossanni kachaachantanni noo daafira hayishshiꞌranni noommata diwodanchitanno. Biso hayishshiꞌra hoogummaro koyisinke manni koffi yaara dandaanno. Hayishshiꞌra hasiissannoe.’ Konnira hayishshiꞌrumma.

Haarviyi Amiisi roduuwi giddo batinyu roso rossinokkire ikkitinohuranna insa afiinni borro qixxeessinoonnikki daafira, ayyaanaamittetenni lopha qarra ikkitinonsata wodanchino. Muli yanna kawa Amiisi Afii borrote afoo ikkino daafira, roduuwu uminsa afiinni nabbawa dandiitanno gede rosiisa dancha ikkitinota huwantoommo. Kuni lowo loosooti; ikkirono gedensaanni roduuwu uminsanni xiinxalla dandiitino. Amiisi Afiinni 1960 balla borro qixxeessa hananfoonni; 1968nni Amiisi Afiinni Agarooshshu Shae qixxeessa hananfoonni.

Ikkirono gashshootu Chayinu Afiinni borreessinoonnita agurranna wole borro difajjanno. Konnira, konne qarra tirate Amiisi Afiita Agarooshshu Shae babbaxxino garinni attama hananfi. Lawishshaho, mite yanna geeshsha Agarooshshu Shae Mandariini yinannihu Chayinu Afiinninna Amiisi Afiinni mitteenni qixxeessinoonni. Huluullame laꞌꞌannonkehu mitu mannira mannaho Chayinu Afoo rosiinsanni heeꞌnoommohalla lawannonsa. Hakka warinni kayise Yihowa dirijjite kuni manni Qullaawu Maxaafi halaale rosanno gede kaaꞌlate Amiisi Afiinni lowo borro qixxeessitino.—Soq. 10:34, 35.

Mitu 1960nna 1970 balla, batinyu Amiisi roduuwi Maganu biddishshi garinni diheeꞌrino. Insa Qullaawu Maxaafiha xintu seera seekkite huwattinokkihura, mitu maaeela heeshsho heedhanno, agge dimbitanno woy sijaara agganno hattono biiteli nati yinannita jingilli assitanno xagga corqitanno. Haarviyi, Yihowara kuri coyibbara noosi lao roduuwu affanno gede kaaꞌlate lowo songuwa towaatino. Hanafote kulummaꞌneri tuncu yiinonkehu hatte yannaraati.

Insaneeto heeshshi assitanno roduuwi biddi assiꞌra hasiissannonsare biddi assiꞌrate maahoyye yitino; wolu batinyu roduuwi kayinni gibbino; tini dadillissannote. Konnira Tayiwaanete nooti 2,450 saꞌannoti halashshaanote kiiro 20 diri giddo ajjanni ajjanni 900 balla calla ikkitino. Tini hexxo mudhinanni gede assitannote. Ikkirono, Yihowa xalala ikkitinokki dirijjite maassiꞌrannokkita anfoommo. (2 Qor. 7:1) Gedensaanni kayinni roduuwu busha rosicho agurtino; Yihowa kaaꞌlonni xaa yannara Tayiwaanete gobbara 11,000 saꞌanno halashshaano no.

Mitu 1980 kawa, Amiisi songo roduuwi ammana lexxitanni hadhinota laꞌnoommo; Haarviyino roore yanna Chayinu Afoo coyiꞌranno mannira sabbakino. Isi lowo roduuwi minaannuwi Yihowa Farciꞌraasine ikkitanno gede kaaꞌlino. Kuri manni giddo mittu, mite yee Yihowa huucciꞌranna afe lowo geeshsha hagiidhinota kulinoeta qaageemma. Anino suwashshu wodani noonsahu lowo manni Yihowawa shiqanno gede rosiise lowo hagiirre afiꞌroomma. Alba Qullaawa Maxaafa xiinxallisoomma rodoote lame ooso ledo Tayiwaanete Beeteelera soqqamaꞌyanni lowo geeshsha hagiidhoomma.

Xa minaanniꞌya lubbote dino. Mito 59 diro mitteenni heeꞌnummohu gedensaanni, kaanserete dhibbi waadannasi keeshshe Arfaasa 1, 2010nni baxeemma minaanniꞌya Haarviyi mannu aalo ikkino. Isi mito 60 diro woꞌma yanna soqqansho soqqamino. Xaano isi lowo geeshsha qalli assannoe. Ikkirono, isi ledo baxissannote lame gobbara soqqamaꞌyanni lowo geeshsha hagiidhoomma. Iisiyunniha lame rosate shota ikkinokki afoo ronsoommo; Haarviyi konne qaale borreessano rosino.

Boodu diri gedensaanni, Aliidi Bisi jawooꞌmoomma daafira Awustiraaliya higummaro woyyannota kulie. Umi qara, ‘Tayiwaanetenni fula dihasiꞌreemma’ yee hedoomma. Kayinni Haarviyi Yihowa dirijjitera gimbi yaa hasiissannokkita rosiisinoe daafira, hatto diassoomma. Gedensaanni, Awustiraaliya higaꞌya maltinota ikkitinota wodanchoomma.

Xa Sanyotenni Arbete geeshsha Awustiraaleezhiyunnite sinu biirora looseemma; Qidaamenna Sambata kayinni songoꞌya roduuwi ledo soqqameemma. Jaappaanetenna Chayinu Afiinni Beeteele daaꞌꞌachisha baxissannoe. Yihowa reyitinore kayisanno yanna quqquxame agadheemma; Yihowara gimbi yaa hasiissannosikkita rosinoha Haarviyi Yihowa hawannosikkita afoomma.—Yoh. 5:28, 29.