Efatsy mirahalahy ry Harvey, le ie ty talanolo. Ta Midland Junction, an’Ostralỳ Andrefa any ty nahitan-drozy trano raiky fahamarina. Mbo nahantra biby tanà io tamy zay, tamy tao 1930 tany ho any. Nitezà tamy fahamarina ie, le natao batisa tamin’ie 14 tao. Nianatsy haneky ani-ze kila raha ampanaovini-fiangona azy ie tafara atoy. Tsy naneky hamaky fehintsoratsy amy fianara Tilikambo Fiambena am-pivoria any ie tamin’ie mbo nikely, satria nieritseritsy hoe tsy nahafeno fepetra. Fe nisy ranadahy nanampy azy le niresaky hoe: “Lafa misy olo mampanao raha anao amy fandaminani-Jehovah eo, le hitany zay hoe mahafeno fepetra amy raha iny iha!”​—2 Kor. 3:5.

Ty ahy tan’Angletera any ty nahitako fahamarina, niaraky tamy reniko noho zokinay ampela voalohany zay. Tafara atoy babako vo naneky fahamarina, fa mbo nanohitsy ie tamy zay. Fe natao batisa avao aho ndre tsy nekeny. Mbo nisivy tao aho tamy zay. Nataoko raha kendrè ty hoe ho mpisava lala bakeo ho misionera. Fe tsy mahazo manao mpisava lala aho hoasani-babako laha tsy feno 21 tao. Tsy liniko fotoa zay, ka lafa nifindra  tan’Ostralỳ any zokiko ampela iny tamy zaho 16 tao, le nengany hiaraky aminy aho. Nanao mpisava lala avao aho lafa ni-18 tao.

Tan’Ostralỳ tany ty nifankahitanay amy Harvey. Samby ta ho misionera zahay roe. Nifanambaly zahay tamy 1951. Niaraky nanao mpisava lala roe tao zahay, bakeo nanao ty asani-faritsy. Bevata biby faritsy nanendrea anay tan’Ostralỳ Andrefa any io ka matetiky zahay tsy maintsy nandeha lavitsy, sady nandeha amy liomonto be noho amy faritsy mitoka.

Nasà hanatriky ty sekolini-Gileada kilasy faha-25 zahay tamy 1954. Ho tanteraky avao zany fanirianay hanao misionera iny! Nandeha sambo ho a Etazinỳ zahay, le nanomboky nandiniky laliky ty Baiboly lafa niavy tany. Nianatsy Espanioly koa zahay tamy sekoly iny. Nisarotsy tamy Harvey ty nianatsy ani-safà io satria tsy nahay nanono “r” ie.

Nivola mpampianatsy anay tamy sekoly iny hoe afaky misoratsy anara amy fianara safà japonè ze ta hanompo a Japon any. Fe engao, hoasanay, ty fandaminani-Jehovah ro hifily ze hanompoanay. Tsiela tafarani-zay, niambini-Albert Schroeder raiky amy mpampianatsy anay rey hoe tsy nisoratsy anara zahay. Hoy ty asany taminay: “Mba dinihonareo soa avao.” Mbo nisalasala zahay ka hoy Ranadahy Schroeder: “Fa niresaky zahay amy mpampianatsy ilany rey, le fa nisoratinay any ty anaranareo. Mba anoharo avao tse.” Nimora tamy Harvey ty nianatsy ani-safà io.

Niavy ta Japon any zahay tamy 1955. Mbo ni-500 avao ty mpitory tany tamy zay. Roapolo eninamby tao Harvey le zaho 24 tao. Nivoatendry tan-davilini-Kobe any zahay. Nanompo tany zahay tanatini-efatsy tao. Bakeo zahay nampoly nanao ty asani-faritsy ndraiky, le Nagoya ty faritsy nitsidihinay. Nifalifaly biby zahay. Tena niteanay ty raha iaby tamy fanendrea anay iny. Anatini-zay ty mpiara-manompo, ty hany, noho ty pozipozini-tanà rey. Fe tsiela tafarani-zay, le afaky nampiseho ndraiky zahay hoe tsy nandà ty raha nampanaovini-Jehovah anay.

Nanao ty asani-faritsy tanatini-telo tao zay, bakeo nanontany anay ty sampani-Japon hoe maneky va zahay laha alefa amin’olo manao fivolana amis a Taiwan any. Nisy mpivadi-pinoa ty tany, le nila ranadahy mahay soa fivolana japonè mba  hanampy tany. * Niteanay ty ta Japon any, ka tsy nimora ty hoe hiala any. Fe Harvey moa fa tapa-kevitsy avao hoe tsy handà ani-ze raha anendrea azy mihintsy. Farany zahay nandeha avao.

Niavy ta Taiwan any zahay tamy 1962. Nisy mpitory 2 271 ty tany, le Amis ty ankabeazan-drozy. Fe nila nianatsy safà sinoà tse zahay. Boky raiky avao ty mba nanananay, le nisy mpampianatsy sinoà zay koa fe tsy nahay anglè ie. Fe mba nihanahay avao zahay.

Lafa niavy kelikely ta Taiwan any zahay, le nivoatendry hiandraikitsy tamy sampana tao Harvey. Kelikely ty faritsy niandraiketani-sampana io, ka sady afaky nanao ty asany tao ie ro mbo afaky niaraky nanompo amy mpiara-manompo tanaty telo herinandro sambola. Nanao ty asani-mpiandraikitsy vondrom-paritsy koa ie kindraiky, le nanao lahateny tamy fivoriambe rey. Niazoni-mpiara-manompo Amis reo soa lahateny rey laha nataony amy safà japonè. Fe laha vo resaky fivavaha hoy ty lalàna any le tsy azo atao amy fivolana hafa ankoatsini-Sinoà. Farany Harvey tsy maintsy niezaky nanao lahateny amy safà sinoà, le nisy ranadahy nandika azy amy safà amis.

Mbo maramila ty nanday ani-Taiwan tamy zay le tsy maintsy nangataky lala avao ranadahy reo saky hanao fivoriambe. Tsy mora manao fangataha rey sady ela iaby ty valiny kindraiky. Laha mbo tsy ameani-polisy rey fahazoa lala iny amy herinandroni-fivoriambe iny, le linisani-Harvey amy biròn-drozy any zisiky ahazoany azy. Menatsy rozy mahita vahiny mandiny eo iny, le karakaran-drozy malaky raha iny.

Matetiky zahay niaraky nanompo tamy mpiara-manompo rey amy herinandro iny, le mandeha an-tomboky lera raiky na mandilatsini-zay niakatsy noho nijotso vohitsy. Tiaroko soa fa tamy zay ty niakarako vohitsy voalohany. Nihina kelikely tse zahay le nanatratsy bisy 5:30 maray fa hana amy tanà lavidavitsy zay. Bakeo zahay nitsaky vavarano be, le niakatsy vohitsy abo zay. Mihorira biby vohitsy iny, le hitako baka afara ato iaby ndre ty lelan-tombokini-ranadahy alohako eo iny.

Tsy niaraky nanompo zahay amy Harvey tamy maraindray iny. Niaraky nanompo amy ranadahy an-tanà eo rezay ie, le zaho nandeha raiky, nitory amy tanàn’olo manao fivolana japonè rezay. Nifany aho tokotokony tamy inera midy iny satria fa nimosarè marè. Fa tsy teo sasy ranadahy rey lafa nifankahita zahay amy Harvey. Nahazo atolin’akoho manta telo Harvey, takaloni-gazetiny rezay, le natorony ahy ty fihinana azy. Loaha hoasany sisiny roe rey le tsintsify amy zay. Tsy mampi-ta hihina raha iny fe nateliko avao. Samby nihina kiraidraiky zahay. Ka ia zany ty hihina ani-azy fahatelony iny? Nameani-Harvey ahy raha iny fa nao hoasany tsy ho zakany sasy aho laha tsipiky baka anabo vohitsy eny.

Nisy raha tsy nahazatsy ahy koa tamy zahay nanao fivoriambe raiky zay. Nivanta tamy ranadahy marìny Efitrano Fanjakà eo zay zahay. Fa  fombani-Amis reo hoe tsy maintsy mandro ty olo, farany valini-mpiandraikitsini-faritsinay iny nanoma rano handroanay. Mbo nanao raha Harvey tamy zay le nampandehaniny aloha aho. Raha telo retoa ty teo: Sihoa raiky misy rano manintsy, raiky misy rano mafana, le basìny tsy misy raha. Tseriky aho hoe tsy misy ladosy fa amonto ao ty nametrahany ani-raha rey. Amin’io le tandrify Efitrano iny, kanefa ranadahy rey mbo mamboamboatsy raha amy Efitrano eo iaby. Mba nangataky ridò amy zay aho fe sasè mangarakaraky zay ty nameany bakao! Nieritseritsy hivaliky ambalikini-trano ao amy zay koa aho, fe nisy gisa rezay tao. Fa miboaky ambalikini-griazy iny atoy vozon-drozy lava rey, parè hitsengoky ani-ze mbeo. Farany aho nanao ho zao: ‘Ranadahy tandrena miasa retia va le haharaky hoe mandro eto aho. Sady tsy mety amin-drozy koa ty hoe tsy mandro tena. Alefako any avao toy!’ Le nandro teo aho.

Nihitani-Harvey hoe tsy mora tamy mpiara-manompo Amis reo ty hana finoa matanjaky, satria tsy mahay mamaky teny ty ankamaroan-drozy sady tsy nisy boky noho gazety tamy fivolanan-drozy koa. Fanorata manahaky ahintsika toa ty nanombohani-Amis nanoratsy ty safàn-drozy. Hita hoe soa laha ampianary mamaky ty fivolanan-drozy mihintsy rozy, fe ho asa be zay. Afaky nianatsy mikasiky ani-Jehovah avao rozy lafa nandeha ty fotoa. Lasa nisy raha azoni-mpiara-manompo reo nivakỳ amy fivolana amis amy zay tamy tao 1966 tany ho any, le nanomboky nisy koa ty Tilikambo Fiambena amy safà amis liany tamy 1968.

Fe niraràni-fanjakà tany hoe tsy azo aboaky ze raha tsy amy safà sinoà. Farany naboaky tamy fomba sankarazany Tilikambo rey. Tanatini-17 vola, ohatsy, zahay nampiasa Tilikambo miharo rezay. Tilikambo raiky iny avao, sady misy safà sinoà Mandarin ty anatiny ao ro misy Amis. Lafa nisy olo nametraky fanontanea le rey ty nampianaranay an-drozy. Nampiboaky raha amy fivolana amis ty fandamina liany tamy zay mba hanampea ani-olo teani-Jehovah reo hahay ty fahamarina amy Baiboly ao.​—Asa. 10:34, 35.

Tanatini-20 tao eo ho eo, le tsy niay mifanaraky amy ty fitsipiki-Ndranahary ty  ankamaroani-mpiara-manompo Amis. Tsy de niazon-drozy soa ty torolalani-Baiboly, farany nisy amin-drozy naloto fandaisam-bata, nimamo, noho nitroky paraky na raha hafa maha ango. Nitsidiky fiangona maro Harvey, ka niezaky nanampy ty mpiara-manompo hahay hoe manao akory ty fahitani-Jehovah ani-raha reo. Tamy raiky amy fitsidiha nataonay rey ty nisehoani-raha nitantaraniko baka am-boalohany any iny.

Parè hiova ty mpiara-manompo sisany satria niambany. Fe mampalahelo fa maro ty tsy nanao ani-zay. Nihena biby ty isakini-mpitory ta Taiwan any tamy zay. Nisy 2 450 rozy fe tanatini-20 tao le 900 eo ho eo avao sisa. Tena nahakivy raha zay. Fe nihainay koa fa tsy hotahini-Jehovah mihintsy ty fandaminany laha tsy malio. (2 Kor. 7:1) Nanompo ani-Jehovah amy ty itiavany azy avao ty fiangona lafa nandeha ty fotoa. Misy mpitory 11 000 a Taiwan any henanizao satria tahini-Jehovah.

Fotoa vitsivitsy tafarani-tao 1980, le nihitanay hoe nihanatanjaky ty finoani-mpiara-manompo manao fivolana amis reo, ka afaky nifantoky tamy azy manao fivolana sinoà rey Harvey. Nanampy ty valini-rahavavy rey ho lasa Vavolombeloni-Jehovah ie. Tiaroko ie nitantara zay hoe nifalifaly biby ie satria nivavaky tamy Jehovah ty raiky amy lahilahy reo. Vo sambani-lahilahy io ty nanao ani-zay. Falifaly koa aho satria afaky nanampy olo maro hamonjy ani-Jehovah. Vomaiky nifalifaly aza aho, satria niaraky aminay nanompo tamy sampani-Taiwan any ty roe amy anakin’olo nampianariko Baiboly taloha rey.

Fa tsy eo sasy Harvey henanizao. Fa ho 59 tao ty nifanambaleanay, fe nimatini-kansera ie tamy 1 Zanviè 2010. Fa ho 60 tao ty nanompoany amy fotoa iaby! Tena mbo mahatiaro azy aho. Fe falifaly aho hoe niaraky aminy nanompo tamy tany roe soasoa rey! Niaraky nianatsy fivolana sarotsy roe fampiasan’olo an’Azỳ any zahay. Harvey moa zany nianatsy nanoratsy mihintsy.

Nivola ty Filan-kevi-pitantana, efatsy tao tafarani-zay, hoe soa aho laha mimpoly an’Ostralỳ any satria fa antitsy. ‘Zaho’, hoasako tan-tsaiko any, ‘tsy ta hiala a Taiwan atoy.’ Fe fa nampianarini-Harvey tsy handà ze raha ampanaovini-fandaminani-Jehovah mihintsy aho, ka nandeha avao. Hitako avao tafara atoy hoe soa vatany aho noly iny.

Manompo amy sampani-Ostralỳ eto aho henanizao. Tinainy zisiky Zoma aho miasa ao, le manompo miaraky amy fiangona aho lafa farani-herinandro. Falifaly aho manao fivolana japonè noho sinoà lafa manday mpitsidiky amy Betela ao rey. Tena fa tsy liniko ty fotoa hameloma ty maty. Haiko fa tsy ho halinoni-Jehovah Harvey, satria tsy nandà ze raha nampanaoviny.​—Jaona 5:28, 29.