Harvey ndeke wɔna wɔ ntondo lá wana anɛyi welá nkfumbo kɛwɔ. Nkfumbo kɛwɔ wekaka akambo wa nsɔsɔlɔ lá Midland Junction, mbandja kelá Owɛstɛ wɔ Australie, ɛnɔnyi ndekana 80 lá ntondo kɛ ndjala k’ekete keyalisa l’eteyi. Harvey afulaka la ngandji kɛ Yehova edjinge alongolaka batisimo l’ɛnɔnyi 14. Lako ndjala ilá nde awaka olakanyelo dj’ipa ntona odjito onkfumɔ wɔpɛyɛwɔ l’otshumano. Wina w’indayalaka olangala, wɔlɔmbaka djɛ nangha badji djɛ Etange k’Olami lá losanghanyɛ, ko nde atonaka ladjikɛnde nde akanelaki ante apangowala wɔlɔ. Koko wɔnanyɔ ɔmɔtshi asawolaka la Harvey djɛ ndokotshɛ djɛ nde ntshikitanyɛ ikanyi wina w’indoshimela ante: “Ntsha onto ɔmɔtshi ambɔkɔlɔmba djɛ wɛ nangha nkambo mɔtshi l’olonghanyelo wɔ Yehova, nde ndjewaka ante olekɔ l’akoka wanangha nkambo djɛsɔ!”—2 Kɔ. 3:5.

Lemi, nyɔ kɛmi, edjinge mama kɛmi tekaka akambo wa nsɔsɔlɔ l’Angleterre. Papa kɛmi atakɔpaki Ewakɛ wɛ Yehova koko, m’ɔkɔngɔ nde ayɛka ndokoma Owakɛ. Ndongolaka batisimo wina w’imayalaka l’ɛnɔnyi djuwa toko, kaanga papa ndotakɔpa. Ndawilelaka okoma wɔ ndjala yat’ekalo edjinge l’ɔkɔngɔ ndoyala misiɔnɛrɛ. Koko, papa kɛmi ndakɔpaka lemi ndoyala yat’ekalo ngo ntsha lambowa ɛnɔnyi 21.  Lemi ntakɔpa nkonga ilá nghɔsɔ. Ko wina w’imawa ɛnɔnyi 16, nde awolaka djɛ lemi ntshɔ nt’intansɛ la mama kɛmi kɛ womoto kɛsɛkwisa tá Australie. Ekomo ekomo, wina w’imawa ɛnɔnyi 18, ntateyɛka nkamba olemo wɔ yat’ekalo.

Wina w’imayalaka lá Australie, mpomanaka isa Harvey. Lemi isande tayalaki la mposɛ kɛkɔ kɛmɔ kɛ nkambela Yehova etengo wa misiɔnɛrɛ. Djɛkondeke isatshukana l’ɔnɔnyi wɔ 1951. M’ɔkɔngɔ wɔ nkamba esanga olemo wɔ yat’ekalo ɛnɔnyi epe, watɔlɔmbaka djɛ ntateyɛ nkamba olemo wɔ edjingadjinga. Edjingadjinga kɛso keyalaki lá Owɛstɛ wɔ Australie keyalaki ekekete efula, djɛkondeke tananghaki nkɛndɔ y’etale efula lá ntena djɛ taane efula edjinge otale efula.

Lá 1954, watetaka djɛ t’ingela nkalasa kɛ 25 kɛ Giliyadɛ. Dɔ djɛso djɛ ndjala wa misiɔnɛrɛ djɛkɔpa nkotshama lako ila! Tokomaka lá New York la bato edjinge m’eteyi totateyɛka wekelo wɔ Bible wɔ lotshimola. Lá Giliyadɛ, tekaki edjinge otepela wɔ Espagnol, koko nkambo ntshɔ djeyalaka okakasano le Harvey mande nde atewaki ntepela dɛta “r” etengo iyatepelaka lá Espagnol.

Wina w’isayalaka lá nkalasa, wetsha watoshimelaka ambɔ, wanɛ wakɔpa ndatoma tá Japon, wafune wiina wawɔ lá nkalasa kɛ otepela wɔ Japonais. Tɔsaka nkano dj’ipa nfuna wiina waso ladjikɛnde tɔkɔpaka djɛ olonghanyelo ntɔsɔnɛla edjena k’okokaso ntshɔ. Ndambo daambi m’ɔkɔngɔ wɔ lasɔ, wetsha wɔso ɔmɔtshi welá Nkalasa kɛ Giliyadɛ, Albert Schroeder, ewaka djɛ totafuna wiina waso. Ko nde atoshimelaka ante: “Nyokɔtɔnɔla ndambo djudji lá kɛnɛ kelendana la nkambo ntshɔ.” Etengo isakindjɛka nkakanda, wɔnanyɔ Schroeder atoshimelaka ante: “Lemi la wetsha enkina tombofuna wiina wanyu lá nkalasa kɛkɔ. Nyokohona ndjeka otepela wɔ ase Japon.” Harvey ewaka otepela wɔkɔ lankeke.

Tokomaka lá Japon l’ɔnɔnyi wɔ 1955 wina wiyayalaka ngo l’ansakodji 500 toko l’owila w’otondo. Harvey ayalaki l’ɛnɔnyi 26, edjinge lemi 24. Watotomaka tá ngando kɛ Kobe, keyalisa entshupa la ndjale, ko tokambaka l’eteyi ɛnɔnyi ɛnɛyi. Masɔ toyalaka l’osasa wɔ ndjetama djɛ ntokamba lonkina l’olemo w’edjingadjinga, entshupa la ngando kɛ Nagoya. Tɔkɔpaka nkete nkfumɔ djeyalaki lá mbandja k’iyatotome—wananyɔ, nkete djɛ ndɛ djel’eteyi, edjinge dongongo djɛ mbandja kɛkɔ. Koko, lako ndjala ilá, towaka mbamba kenkina kɛ ntona nshimela Yehova ente topakɔpɛ.

M’ɔkɔngɔ w’iso nkamba ɛnɔnyi esato l’olemo w’edjingadjinga, Betɛlɛ djelá Japon watɔlɔmbaka ntsha  iso nkɔpaka ntshɔ tá Taiwan djɛ ntopoposanyɛ le anto welá owila wɔ Amis. Wananyɔ amɔtshi w’ase Amis, wakomaka w’apɔsta, ko Betɛlɛ djɛ Taiwan ayalaka la djonyi djɛ wɔnanyɔ ɔmɔtshi wewa otepela w’ase Japon djɛ nkitshakitshɛ olakanyelo w’ongolo. * Takɔpaki olemo wɔso w’isananghaka lá Japon efula, djɛkondeke, ɔsɔ ayalaka nkano djɛ wolo efula leso. Koko Harvey awaka olakanyelo dj’ipa ntona odjito onkfumɔ wɔpɛyɛwɔ l’olonganyelo wɔ Yehova, djɛkondeke isawola dj’iso ntshɔ.

Tokomaka l’eteyi lá Ngɔndɔ kɛ djomi l’ɔmɔ 1962. Taiwan ayalaki l’ansakodji 2 271 edjinge efula kɛwɔ wayalaki ngo ase Amis. Koko, má bangabango, toyalaka la djonyi djɛ ndjeka otepela wɔ Chinoix. Tayalaki ngo l’onkanda ɔmɔ, edjinge wetsha ɔmɔ wotewaki ntepela Anglais, koko tekaka ngo ndjeka.

Atayala ilá m’ɔkɔngɔ w’iso nkoma lá Taiwan, Harvey awaka odjito wɔ ndjala onkambi wokotshɛ lá filiyalɛ. Filiyalɛ kayalaki daambi, djɛkondeke Harvey akokaki nshiyɛ elemo wɛnde welá biro, ko ndokamba esanga la wananyɔ w’ase Amis mbengo isato lá Ngɔndɔ. Lonkina, nde akambaki mbala la mbala etengo onami woheeta, edjinge apɛyɛki wamba lá nsanghanyɛ yɛ nkekete. Harvey akokaki mpɛyɛ wamba l’otepela wɔ Japonais, edjinge wananyɔ w’ase Amis wakokaki ndjoka. Koko, ewandji wɛ lɛɛta wawolaki djɛ nsanghanyɛ yɛ nkɛlɛsiya nanghema ngo l’otepela wɔ Chinoix. Djɛkondeke, Harvey akakatanaki mpɛyɛ wamba ngo l’otepela wɔ Chinoix, ko wɔnanyɔ ɔmɔtshi akadjimolaki tá otepela wɔ Amis.

Taiwan ayalaki l’anse kɛ lowandji l’angala, djɛkondeke wananyɔ wayalaki ladjɛ mba lotshungɔ lá ntondo k’iwɔ nangha nsanghanyɛ yɛ nkekete. Ayalaki okakasano djɛ mba lotshungɔ lɔsɔ, edjinge mbala efula ampoloshi watotshimbɛtshimbɛki djɛ ntɔpɛyɛ lotshungɔ. Ntsha lobengo lɔkɔ lɔ ansamble lombokoka ko ampoloshi wapatɔpɛyɛ lotshungɔ, Harvey atshɔki ntawitansela lá biro djɛwɔ tii wina wɔtɔpɛyɛwɔ lotshungɔ. Ladjikɛnde ampoloshi wokaki nsɔnyi djɛ ɔngangɛnda ndaawintansela lá biro djɛwɔ, wɔmpɛyɛki nkishi djɛnyɛ lotshungɔ lankeke.

L’ilá kɛ mbengo, tahetaki la wananyɔ, mbala efula tɔsaki wina wɔ ntango ɔmɔ kana ndekana, tahandaki enkoko edjinge topaki andjale. Mvungɔ mbala kɛmi kɛ ntondo k’imahande onkoko. M’ɔkɔngɔ wɔ ndɛ mma djɛ nkɛsɛ la nkeke la nkeke, tɔsaki otuka la nkɛsɛ djɛ 5:30, djɛ ntshɔ tá mbandja kɛmɔtshi k’otale, masɔ takɛndaki l’ekolo djɛ ndjopa ndjale kɛmɔtshi k’ekekete edjinge tahandaki enkoko wɛ nkekete. Enkoko wɛsɔ wayalaki topikɛ ladjikɛnde ekolo wɛ wɔnanyɔ wotahandaki lá ntondo kɛmi wankomaki lá wiso.

Nkɛsɛ djɛsɔ, Harvey atshɔka ntopoposanyɛ esanga la wananyɔ amɔtshi welá mbandja kɛkɔ, ko lemi mɔmɛlɛ lapoposanyɛki lá iwaandja yɛ daambi yɛ anto wa l’eteyi watepelaki otepela wɔ Japonais. Ko m’ɔkɔngɔ wɔ iso nkoma l’oshidji ɔmɔ wɔ m’ɔkɔngɔ wɔ midi, ndɛmbaka efula ladjikɛnde nanghaka wina efula ntale. Koko l’ekomo wina w’imopomanaka la Harvey, lako kaanga wɔnanyɔ ɔmɔtshi woyalisa entshupa laso. Harvey ahenghanyɛka periodikɛ yɛso l’ekele esato wɛ nkɔkɔ wetaye. Nde andakanyɛka wopo wɔ ndɛ ante, ntondola lá nsɔndji kɛnde ko nsoma. Kaanga moke weyi, mɛnaka ngo mɛna. Ko kanga lɔlisa okele w’asato na? Harvey ampɛyɛka okele wɔkɔ  ladjikɛnde nde akanelaki ante, apangotompanga mbɛmba lemi l’onkoko ntsha lambɔlɛmba.

Lá losanghanyɛ lɔmɔtshi l’enkekete l’etsho epe, mpomanaka la nkambo mɔtshi dj’ekekete dj’isotekelaki. T’intansɛka laka wɔnayɔ ɔmɔtshi woyalaki entshupa entshupa la Mvulu k’Onkfumi. Ladjikɛnde le ase Amis ɔkɛlɔ ayalaki nkambo djɛ djonyi efula, wadjɛ onami w’edjingadjinga atɔlɔngɔsɔlɛlaka washi wa ndjɔka. Harvey ananghaki olemo, djɛkondeke ndashimela djɛ lemi ntɔka ntondo. Ɔkɛlɔ wananghemaki l’awomba asato: kɛnɛ kɛ washi w’iyɛ, k’enkina kɛ washi wa ntshitshi edjinge k’ekomo oholo, lako ekete l’eteyi. Nkambo dj’imakamɔ efula nde, wadjɛ onami w’edjingadjinga antshikelaka nkete djɛso lá bandja, ndendana la Mvulu k’Onkfumi l’edjena kɛ wananyɔ iyakotshɛka djɛ ndɔngɔsɔla wayi w’ansamble. Ndɔlɔmbaka djɛ nde ndjakala lemi esendja kɛmɔtshi kɛ nkomba. Ko ndombotondjakala esendja kɛmɔtshi kɛ hangahanga! Nkɔpaka ntshɔ tá mvusulu l’edjena kɛ ndambo windjima, koko l’eteyi, ayalaki la tofulu tɔmɔtshi toyalaki etengo bata, ko ndjokaka wɔma ente wantɔtɔna. Nkanelaka lemi mɔmɛlɛ ente: ‘Wananyɔ w’ila yimba l’efula k’olemo k’onanghawɔ, mbala imɔtshi wapangɔnyɛna. Ko ntsha mpɔkisa lɔ, wangokiyana. Lasɔ, ndjɔkɛ ngo ndjɔka!’

Harvey ɛnaka djɛ wananyɔ w’ase Amis watakembaki lá nyuma ladjikɛnde efula kɛwɔ watewaki ntanga edjinge watayalaki l’enkanda l’otepela wɔwɔ. Djɛkondeke iyatateyɛ nfuna enkanda l’etepela w’ase Amis l’alɛta w’ase Ɔrɔma, ladjikɛnde ayalaki wɔlɔ ndakanyɛ wananyɔ djɛ mbala l’otepela wɔwɔ. Ɔsɔ ayalaka olemo wɔ wolo efula, koko ekomo ekomo wananyɔ wayɛka ndoyala l’akoka wa ndjeka akambo wa nsɔsɔlɔ walendana la Ndjambe l’otepela wɔwɔ. Enkanda wel’otepela wɔ Amis wetateyɛka mposa l’ekomo kɛ ɔnɔnyi wɔ 1960, ko lá 1968, Etange k’Olami ketateyɛka mposa lá Amis.

Koko, guvɛrnɛma atonaka nkapanyɛ enkanda l’otepela wɔ Chinoix. Djɛkondeke djɛ ndota ekakasano, Etange k’Olami kel’otepela wɔ Amis, ketateyɛka mposa lá topo totshikitanyi. Ndjɔmbɔmba, l’ilá kɛ ɔnɔnyi ɔmɔ la ngɔndɔ esambele, taposɛki Etange k’Olami kɛmɔ l’etepela epe l’eteyi, Chinoix Mandarin la Amis. Ntsha onto ambopola, tokadjimolaki mbala kɛkɔ kɛmɔ ente, tokamba la periodikɛ kɛnɛ djɛ ndakanyɛ wana wa mbandja otepela wɔ Chinoix. Djɛkondeke, ntateyɛ masɔ, olonghanyelo wɔ Yehova wotateyɛka mposɛ enkanda efula l’otepela wɔ Amis djɛ nkotshɛ anto wasɔ djɛ ndjewa akambo wa nsɔsɔlɔ w’ima Bible.—Ele. 10:34, 35.

L’ɛnɔnyi wɛ 1960 la wɛ 1970, efula kɛ wananyɔ wa Amis watakɛndaki lá nkilika ɛlɛmbɛ wɛ Ndjambe. Ladjikɛnde watalembetela tɔkfɔ tɔ Bible wɔlɔ wɔlɔ, amɔtshi wananghaki akambo wa mbindo, wavɔki wana, wanɔki tombaku, edjinge wanɔki kaangi. Harvey awembolaka ntshumano efula, djɛ nkotshɛ wananyɔ dj’iwɔ ndjewa ikanyi yɛ Yehova lá kɛnɛ kelendana l’akambo wasɔ. Lá mbembo kɛmɔtshi, ndeke isapomana la nkambo djɛmɔkɔndɔlaki má bango djɛ djamba djɛnɛ.

Wananyɔ wayalaki l’okitshakitshɛ wayalaka entshupa djɛ nangha etshikitano, koko nkambo djɛ lonyango nde, efula kɛwɔ watakɔpa nangha etshikitano, edjinge lofulo l’ansakodji lelá Taiwan lokitaka má ansakodji ndekana 2 450 tá 900 l’ilá k’ɛnɔnyi 20. Nkambo djɛsɔ djetɔlɛmbɛka efula. Koko, tewaka ente Yehova apatshɔkɔlaka kaanga ndambo daambi olonghanyelo wolekɔ la mbindo. (2 Kɔ. 7:1) Ekomo ekomo, ntshumano djɛlaka piyɔɔ má wayi wa mbindo, edjinge m’okotshɔ wɔ Yehova, Taiwan alekɔ win’ɔsɔ l’ansakodji ndekana 11 000.

Ntateyɛ má 1980, tɛnaka djɛ wananyɔ l’ankaana yelá ntshumano djɛ Amis watateyɛka ndjala la lonyuma lɔ wɔlɔ, edjinge Harvey atateyɛka mpetshɛ wina efula la wananyɔ watepelaki Chinoix. Nde ayalaka l’osasa efula djɛ nkotshɛ wame w’ankaana efula dj’iwɔ nkoma Ewakɛ wɛ Yehova. Ndek’ovungɔ mbala kɛmɔtshi nde atepelaka osasa woyalaki lande wina wɔ mpame kɛmɔtshi l’anteyi kɛ ampame yɛsɔ ndalɔmbɛ Yehova mbala kɛnde ntondo. Edjinge lemi ndekɔ l’osasa efula lá wopo wɔ mayale l’akoka wa ndakanyɛ wamato efula wayalaki l’eloko wɛ wɔlɔ dj’iwɔ malema Yehova. Ndjalaka edjinge l’osasa wɔ nkamba lá Betɛlɛ djɛ Taiwan esanga la wana ape wa ambeki wami wa Bible, mpame la w’omoto.

Koko lɔɔko kɛnɛ, mpalekɔ la wome lonkina. M’ɔkɔngɔ wɔ ɛnɔnyi nsuke la 59 wɛ bala djɛso, womɛmi wɔ ngandji efula Harvey avɔka Ngɔndɔ kɛ ntondo 1, 2010, m’ɔkɔngɔ wɔ nde nyɛna ndjolo l’olando wɔ kansɛrɛ. Nde ananghaka nsuke l’ɛnɔnyi akum’asamalo l’olemo wɔ wina enkfumɔ! Lemi ndokanelaka efula. Koko ndekɔ l’osasa efula wopo w’imakambe lande l’ewila epe wɛ wɔlɔ efula! Lemi isande tekaka etepela wɛ wolo w’ase Aziya, Harvey ekaka edjinge nfuna etepela wɛkɔ.

M’ɔkɔngɔ wɔ ɛnɔnyi emangha, Iloyi yɛ lɔndjɛ wɛnaka ambɔ ladjikɛnde lamboyala ekokolo edjinge ndekɔ la djonyi efula dj’okotshɔ, angoyala wɔlɔ lemi nkalɔ tá Australie. Ikanyi y’imakanela ntondo nde, ‘Mpangima má Taiwan.’ Koko Harvey andakanyɛka dj’ipa nshimela olonghanyelo wɔ Yehova ente mpakɔpɛ, djɛkondeke, ndjɛka ndɔkapa. L’ɔkɔngɔ, djɛka ndɛna djɛ ɔsɔ alekɔ nkano djɛ balo.

Lɔɔko kɛnɛ, ndek’okamba lá Betɛlɛ djɛ Australie edjinge l’ekomo kɛ lobengo, lemi mpoposanyɛka l’otshumano wɔmi. Lanɛ lá Betɛlɛ, ndekɔ I’osasa wɔ nkaemba l’etepela wɛmi epe w’imeke Japonais la Chinoix djɛ mpeetshɛka anto wayɛ ndolenda Betɛlɛ. Koko, nkongela l’oloko lukuluku Iofu lolakemisa l’ekfundwelo, ladjikɛnde lemi ndjewaka ente, Harvey, kanga l’ekisa dj’ipa nshimela Yehova ante mpakɔpɛ, alekɔ win’ɔsɔ lá wɔɔngɔ Wɔnde.—Dj. 5:28, 29.