Harvey ben de a moro owruwan fu fo brada. A famiri fu en ben kon na ini waarheid di den ben tan na ini a foto Midland Junction na a west-sei fu Australia. Dati ben de sowan 80 yari pasa di furu sma ben e pina na ini a kondre. Harvey kon lobi Yehovah èn a teki dopu di a ben abi 14 yari. A ben leri frukufruku kaba taki te a ben kisi wan toewijzing, a ben musu du en tu. Wan leisi, den ben aksi en fu leisi A Waktitoren na a konmakandra ma a no ben wani, fu di a ben denki taki a no ben bun nofo fu du dati. Ma a brada di ben taki nanga Harvey ben taigi en: „Te wan sma na ini Yehovah organisâsi e aksi yu fu du wan sani, dan a e du dati fu di a feni taki yu man du en.”​—2 Kor. 3:5.

Mi kon na ini waarheid na ini Ingrisikondre makandra nanga mi mama nanga mi bigi sisa. Na a bigin mi papa no ben lobi Yehovah Kotoigi, ma bakaten a kon na ini waarheid tu. Mi no ben abi tin yari srefi di mi teki dopu, aladi mi papa no ben wani dati. Mi ben wani go pionier èn bakaten mi ben wani tron wan zendeling. Ma mi papa no ben wani mi fu pionier teleki mi tapu 21 yari. Mi no ben wani wakti so langa. Ma di mi tapu  16 yari mi papa ben feni en bun taki mi froisi go tan nanga mi bigi sisa na ini Australia. Te fu kaba mi bigin pionier di mi tapu 18 yari.

Mi miti Harvey na ini Australia. Wi ala tu ben wani dini Yehovah leki zendeling. Wi trow na ini 1951. Baka di wi pionier makandra tu yari langa, dan den aksi wi fu go na ini a kringwroko. A kontren fu a kring fu wi ben de wan bigi pisi fu a west-sei fu Australia. Wi ben gwenti rèi langa pasi go na farawe kontren di ben drei srefisrefi.

Na ini 1954, wi kisi a kari fu go na a di fu 25 klas fu a Gileadskoro. A dren di wi ben abi fu tron zendeling ben o kon tru. Wi doro na ini New York nanga sipi èn wi bigin studeri Bijbel finifini na a skoro. Wi ben musu leri Spanyorotongo tu. Disi ben muilek gi Harvey fu di a no ben man taki a „r” so bun.

Na a skoro den leriman ben meki bekènti taki den sma di ben wani go dini na Yapan, ben kan gi den nen fu leri Yapantongo. Wi ben feni taki na Yehovah organisâsi ben musu bosroiti gi wi pe wi ben musu go dini. Syatu baka dati, Albert Schroeder, wan fu den leriman fu a Gileadskoro, kon si taki wi no ben gi wi nen. Dati meki a taigi wi fu denki pikinso moro fu a tori. Di wi ben tweifri ete, dan Brada Schroeder taki: „Mi nanga den tra leriman poti un nen. Luku efu unu kan leri taki Yapantongo.” A ben makriki gi Harvey fu leri taki a tongo disi.

Wi doro na ini Yapan na ini 1955. Na a ten dati 500 preikiman nomo ben de na ini a heri kondre. Harvey ben abi 26 yari èn mi ben abi 24 yari. Wi ben musu go dini na ini a foto Kobe èn wi dini drape fo yari langa. Baka dati wi ben breiti taki wi ben mag go baka na ini a kringwroko èn wi go dini krosibei fu a foto Nagoya. Wi ben lobi dini drape. Wi ben lobi den brada, a nyanyan nanga a moi kontren. Ma fosi yu denki wi kisi wan tra okasi fu du san Yehovah ben aksi fu wi.

Baka di wi du a kringwroko dri yari, a bijkantoro fu Yapan aksi wi efu wi wani go na Taiwan fu go yepi den sma fu na Amis lo. Wan tu brada fu na Amis lo ben fadon komoto na bribi èn a bijkantoro fu Taiwan ben abi wan brada fanowdu di ben kan taki Yapantongo bun, fu yepi den tra brada nanga sisa drape fu no fadon komoto na  bribi tu. * A ben muilek gi wi fu teki a bosroiti disi fu di wi ben lobi a wroko na ini Yapan. Ma Harvey ben leri fu teki iniwan wroko di a ben kisi fu du. Dati meki wi bosroiti fu go.

Wi doro na Taiwan na ini november 1962. Na a ten dati Taiwan ben abi 2271 preikiman èn furu fu den ben de fu na Amis lo. Ma wi ben musu leri Sneisitongo fosi. Wi ben abi wán buku nomo fu leri Sneisitongo èn wan leriman di no ben sabi taki Ingrisitongo. Ma toku wi leri taki a tongo.

Syatu baka di wi doro na ini Taiwan, Harvey tron bijkantoro-opziener. Fu di a bijkantoro ben pikin, meki Harvey ben kan du a wroko fu en na kantoro, ma a ben abi ten ete fu wroko sowan dri wiki wan mun makandra nanga den Amis brada. Ten na ten a ben e dini tu leki distrikt-opziener èn dati meki a ben gwenti hori lezing na bigi konmakandra. Efu Harvey ben e hori den lezing na ini Yapantongo, den Amis brada ben o frustan den lezing. Ma fu di lanti ben wani taki kerki ben musu hori soso na ini Sneisitongo, meki Harvey hori den lezing na ini Sneisitongo. Te a ben e hori den lezing, dan wan brada ben e vertaal den na ini Amistongo. Na a ten dati wi ben musu kisi vergunning fu man hori bigi konmakandra. A no ben makriki fu kisi wan vergunning èn son leisi yu ben musu wakti wan heri pisi ten. Ma efu den brada no ben kisi a vergunning ete na ini a wiki fu a bigi konmakandra, dan Harvey ben e go sidon wakti na skowtu post teleki den ben gi en. Fu di den skowtu ben e syen te wan sma fu wan tra kondre ben e sidon wakti na a skowtu post fu den, meki den gi Harvey a vergunning esi-esi.

Na ini den wiki di wi ben de na den brada, wi ben gwenti waka moro leki wán yuru. Wi ben e kren bergi èn wi ben e waka na ini liba fu doro na abrasei. Mi sabi a fosi leisi ete di mi ben kren wan bergi. A mamanten dati wi nyan esi-esi, dan wi teki wan bus fu 5:30 fu go na wan farawe dorpu. Wi waka na ini wan bradi liba fu doro na abrasei èn wi kren wan bergi. Dati no ben makriki srefisrefi fu di a ben gersi leki na wan trapu wi ben e kren. Den futu fu a brada di ben e kren na mi fesi, ben de leti na mi fesi.

A mamanten dati Harvey wroko makandra na ini a preikiwroko nanga wan tu brada fu a kontren dati, aladi mi ben e preiki mi wawan na ini wan pikin dorpu pe sma ben e taki Yapantongo. Wán yuru ten mi bigin firi swaki, fu di mi no ben nyan wan tu yuru langa. Di mi miti Harvey te fu kaba, a ben de en wawan. Harvey ben prati wan tu tijdschrift èn a ben kisi dri eksi gi den tijdschrift dati. Dan a sori mi fa yu kan nyan den eksi disi lala-lala. A meki wan olo na tapusei èn na ondrosei dan a soigi na eksi. Aladi mi no ben firi fu nyan en, toku mi pruberi wan. Ma dan suma ben o nyan a di fu dri eksi? We, Harvey gi mi na eksi dati fu di a ben prakseri taki te mi ben o flaw tapu a bergi fu di angri ben e kiri mi, a no ben o man opo mi fu saka a bergi.

Na wan kring konmakandra wan sani miti mi di mi no ben fruwakti. Wi ben e tan na a oso fu wan brada, leti sei wan Kownukondre zaal. Fu di a prenspari srefisrefi gi den Amis-sma taki yu e wasi yu skin, meki a frow fu a kring-owruman poti sani gi wi fu wasi. Harvey ben abi sani fu du, dati meki a aksi mi fu go wasi fosi. A sisa poti dri sani gi wi: wan emre nanga kowru watra, wan emre nanga faya watra, nanga wan leigi beki. Ma dan a frow fu a kring-owruman poti den sani disi na dorosei pe den brada di ben e yepi seti a Kownukondre zaal gi a kring konmakandra ben kan si mi. Mi aksi en efu a ben abi wan duku gi mi di mi ben kan gebroiki leki wan garden, so taki sma no ben o man si mi. Ma dan a tyari wan pisi plastik gi mi pe sma ben o man si ala sani. Mi ben prakseri fu go na bakasei fu na oso pe sma no ben o man si mi so bun. Ma drape yu ben abi gansi di ben e pusu den ede pasa na ini a gaas èn mi ben frede taki den ben o tyopu mi. Mi taigi misrefi: „Den brada no abi ten fu tanapu luku fa mi e wasi èn efu mi no go wasi, den sma na ini na oso o firi wan fasi. Dus betre mi du en, dan a kaba.” Na so mi go wasi.

Harvey ben kon frustan taki a ben muilek gi den Amis brada fu go na fesi fu di furu fu den no ben man leisi èn fu di den no ben abi buku na ini a tongo fu den. No so langa pasa sma ben bigin skrifi na Amistongo. Dati meki wi bigin leri den brada fu leisi den eigi tongo. A sani disi ben de wan bigi wroko, ma te fu kaba den brada ben man studeri na ini den eigi tongo. Sensi 1966 buku ben de fu kisi na ini Amistongo èn na ini 1968 A Waktitoren bigin kon na doro na ini a tongo dati.

Ma lanti no ben wani taki sma prati buku di no ben de na ini Sneisitongo. Sobun, fu no kisi problema den brada tyari na Amis Waktitoren kon na doro na difrenti fasi. Fu eksempre, wan heri pisi ten den artikel na ini A Waktitoren ben de na ini Mandarijn Sneisitongo, ma den ben abi na Amistongo vertaling na ini tu. Efu wan sma ben e aksi ensrefi fu san ede disi ben de so, dan a ben o gersi leki wi ben e gebroiki a tijdschrift fu leri den Amis-sma Sneisitongo. Sensi a ten dati na organisâsi fu Yehovah sorgu taki buku nanga tra sani de fu feni na ini Amistongo, so taki sma  di e taki a tongo disi kan kon sabi den tru tori fu Bijbel.​—Tori 10:34, 35.

Sowan 20 yari langa furu Amis brada nanga sisa no ben e libi soleki fa Gado wani. Fu di den no ben frustan Bijbel gronprakseri so bun, meki sonwan fu den no ben e libi wan krin libi, den ben e drungu, den ben e smoko tabaka èn den ben e kaw pinangnoto. Harvey go na difrenti fu den gemeente èn a pruberi fu yepi den brada disi fu kon frustan fa Yehovah e si den sani disi. Wan fu den leisi dati a sani pasa nanga wi di mi ben taki na a bigin fu na artikel.

Den wan di ben abi sakafasi ben de klariklari fu tyari kenki kon. Ma a sari taki furu trawan no ben du dati. Dati meki a nomru fu preikiman na ini Taiwan saka fu 2450 go na sowan 900 na ini 20 yari. A situwâsi dati no ben makriki. Ma wi ben sabi taki Yehovah no ben o blesi en organisâsi efu a no ben krin (2 Kor. 7:1). Baka wan pisi ten, den gemeente bigin dini Yehovah soleki fa a fiti èn fu di Yehovah blesi a wroko, meki Taiwan abi moro leki 11.000 preikiman now.

Baka a yari 1980, wi si fa den brada nanga sisa na ini den Amis gemeente go na fesi. Dati meki Harvey ben kon abi moro ten gi den wan di ben e taki Sneisitongo. A ben breiti fu yepi den masra fu wan tu sisa fu tron Kotoigi. Mi sabi ete fa a ben breiti di wan fu den man disi begi Yehovah fu a fosi leisi. Mi breiti tu taki mi ben man yepi furu reti-ati sma fu kon moro krosibei na Yehovah. Mi ben abi a grani srefi fu dini na a bijkantoro fu Taiwan makandra nanga a manpikin èn na umapikin fu wan fu den owru Bijbelstudenti fu mi.

Now mi no abi mi masra moro. Mi lobi masra Harvey dede tapu 1 yanuari 2010 fu di a ben abi kanker. Wi ben trow sowan 59 yari. Harvey ben de na ini a furuten diniwroko sowan 60 yari langa. Te now ete mi e misi en, ma mi breiti taki mi ben man horibaka gi en na a bigin fu a wroko disi di wi du na ini den tu moi kondre disi. Wi leri fu taki tu muilek tongo èn Harvey ben man skrifi den srefi.

Wan tu yari baka dati a Tiri Skin bosroiti taki fu di mi kon owru kaba, a ben o moro bun efu mi drai go baka na Australia. Biginbigin mi no ben wani gowe libi Taiwan. Ma Harvey leri mi taki ala ten a bun fu du san Yehovah organisâsi wani. Fu dati ede mi bosroiti fu go. Te fu kaba mi kon frustan taki disi ben de wan koni sani.

Now mi e wroko na a Australasia bijkantoro. Tapu satra nanga sonde mi e preiki makandra nanga a gemeente. Mi breiti taki mi leri Yapantongo nanga Sneisitongo fu di te sma e kon luku Betel, mi kan taki den tongo dati te mi e sori den a presi. Mi no man wakti a dei te Yehovah o gi sma wan opobaka soleki fa a pramisi. Mi sabi taki a no o frigiti Harvey di ben leri fu du ala ten san Yehovah aksi fu en.​—Yoh. 5:28, 29.