Harvey bekangulomdzala kubomnakabo labatsatfu. Umndeni wakubo wafundza liciniso eMidland Junction, eWestern Australia, ngesikhatsi kunetinkinga temnotfo ngabo-1930. Harvey wagcina amtsandza Jehova futsi wabhajatiswa nakaneminyaka lengu-14. Wafundza kwemukela yonkhe imisebenti lanikwa yona ebandleni. Asengumfana, wake wala kufundza tigaba emhlanganweni weSicongosekulindza, acabanga kutsi angeke akhone kutifundza kahle. Kodvwa lomunye umzalwane wasita Harvey kutsi acabange ngalenye indlela, watsi: “Nangabe lotsite enhlanganweni yaJehova akucela kutsi wente lokutsite, usuke acabanga kutsi ungakhona kukwenta!”—2 Khor. 3:5.

Ngafundza liciniso eNgilandi, nginamake wami nasisi wami lomdzala. Babe wami wacale wangabatsandzi BoFakazi BaJehova, kodvwa ngekuhamba kwesikhatsi naye waba nguFakazi. Ngabhajatiswa ngineminyaka lengu-9 budzala, ngisho nobe babe bekangafuni kutsi ngibhajatiswe. Ngatibekela umgomo wekuba lihlahlandlela nekuba  sitfunywa selivangeli. Kodvwa babe bekangafuni kutsi ngibe lihlahlandlela ngingakafiki eminyakeni lengu-21. Bengingafuni kulindza sikhatsi lesidze kangaka. Ngako nangineminyaka lengu-16, babe wangivumela kutsi ngiye e-Australia ngiyohlala nasisi wami lomdzala, lobekatfutsele kulelolive. Ngacala kuba lihlahlandlela nangineminyaka lengu-18.

Nangise-Australia, ngahlangana naHarvey. Sobabili besifuna kukhonta Jehova sititfunywa telivangeli. Sashada nga-1951. Ngemuva kwekuba ngemahlahlandlela sobabili iminyaka lemibili, sacelwa kutsi sente umsebenti wekujikeleta. Sigodzi setfu lebesiseNshonalanga ye-Australia besisikhulu kakhulu, ngako bekudzingeka sihambe emabanga lamadze emgwacweni logcwele lutfuli.

Nga-1954, samenywa kutsi sibe seklasini lesi-25 laseGileyadi. Sifiso setfu sekuba titfunywa telivangeli besesitawufezeka! Safika eNew York ngemkhumbi futsi sacala kufundzisisa liBhayibheli. Esikolweni saseGileyadi bekufanele sifundze Spanish, futsi bekumatima ngaHarvey ngobe bekangakhoni kuphimisela kahle “r.”

Esikolweni, labo lebebasifundzisa batsi bonkhe labo labafuna kuyokhonta eJapan ababhale emagama abo phansi, kuze batofundza lulwimi lwaseJapan. Sancuma kutsi sitawuvumela Jehova asikhetsele sabelo. Ngekushesha ngemuva kwaloko, Albert Schroeder, lobekangulomunye wabothishela, wabona kutsi besingakawabhali emagama etfu. Watsi kitsi: “Cabangisisani ngako.” Ngemuva kwesikhatsi solo singawabhali emagama etfu phansi, uMzalwane Schroeder watsi: “Mine nalabanye bothishela sesinibhalisile. Yetamani kufundza siJapanese.” Harvey washeshe walufundza lolulwimi.

Safika eJapan nga-1955 futsi bekunebamemeteli labangu 500 kuphela. Harvey bekaneminyaka lengu-26, futsi mine ngineminyaka lengu-24. Satfunyelwa edolobheni lokutsiwa yiKobe, futsi sakhonta khona iminyaka lemine. Sajabula kakhulu nasibuyela emsebentini wekujikeleta futsi sakhonta endzaweni lebeyidvutane nelidolobha laseNagoya. Besisitsandza kakhulu sabelo setfu—sitsandza bazalwane, kudla kwakhona kanye nalendzawo. Kungakapheli sikhatsi lesidze saphindze satfola litfuba lekwenta loko Jehova lacela kutsi sikwente.

Ngemuva kweminyaka lemitsatfu sisemsebentini wekujikeleta, ligatja laseJapan lasicela kutsi  siye eTaiwan siyoshumayela bantfu labakhuluma si-Amis. Labanye bazalwane labakhuluma si-Amis besebahlubukile, futsi ligatja laseTaiwan belidzinga umzalwane lobekakhuluma siJapanese lobekatawusita kulesimo. * Lesi bekusincumo lesimatima ngobe besikutsandza kuba seJapan. Kodvwa Harvey bekafundzile kutsi kufanele emukele nobe ngusiphi sabelo lanikwa sona, ngako savuma kuya eTaiwan.

Safika ngaNovember 1962. ITaiwan beyinebamemeteli labangu-2 271, futsi labanyenti babo bebakhuluma si-Amis. Kodvwa kwadzingeka sicale sifundze siChinese. Besinencwadzi yinye lebeyitasisita sifundze siChinese, nathishela lobekangasikhulumi siNgisi, kodvwa sagcine sisifundzile.

Ngekushesha nje nasifika eTaiwan, Harvey wanikwa sabelo sekuba yinceku yeligatja. Leligatja belilincane, ngako Harvey bekanaso sikhatsi sekwenta umsebenti wakhe wasehhovisi futsi aphindze asebente nebazalwane labakhuluma si-Amis emaviki lamatsatfu ngenyanga. Ngasikhatsi bekaphindze ente umsebenti wekujikeleta, lebekufaka ekhatsi kubeka tinkhulumo emihlanganweni yesigodzi. Harvey bekangatibeka tinkhulumo ngesiJapanese, futsi bazalwane labakhuluma si-Amis bebangakhona kutiva futsi baticondze kahle. Nobe kunjalo, hulumende bekavumele kutsi imibutsano yenkholo ichutjwe ngesiChinese kuphela. Ngako Harvey wabeka tinkhulumo takhe ngesiChinese nanobe belumatima kuye lolulwimi, futsi lomunye umzalwane bekatihumusha ngesi-Amis.

ITaiwan beyinemitsetfo lecinile ngaleso sikhatsi, ngako bazalwane bekudzingeka kutsi babe nemvume yekuba nemhlangano wesigodzi. Bekumatima kutfola imvume, futsi ngalesinye sikhatsi bekutsatsa sikhatsi lesidze kuze uyitfole. Nangabe emaphoyisa angakayikhiphi imvume kuze kube liviki lemhlangano, Harvey bekavele ahambe ayohlala esiteshini semaphoyisa baze bamnike. Njengobe bekuwahlaza emaphoyisa kuba nemuntfu wakulelinye live esiteshini sawo, bebasheshe bayikhiphe lemvume.

Kulamaviki lebesivame kuba nebazalwane ngawo, besivame kuhamba sikhatsi lesingetulu kweli-awa, sicance tintsaba futsi siwele nemifula. Ngikhumbula ngesikhatsi ngicanca intsaba kwekucala. Ngemuva kwekudla ekuseni, sagibela ibhasi nga-5:30 ekuseni, lebeyiya endzaweni lekhashane. Sabese sewela imifula futsi sacanca intsaba ngetinyawo. Beyenyukela kangangekutsi tinyawo temzalwane losembikwami betiba ngasemehlweni ami.

Ngalelolanga, Harvey bekashumayela nalabanye bazalwane bendzawo, futsi mine bengishumayela endzaweni lapho bantfu bakhona bebakhuluma siJapanese. Kwatsi nasekuyoshaya 1 emini, besengitiva ngiphelelwa ngemandla ngobe besenginesikhatsi lesidze ngingadli. Ngatsi nangihlangana naHarvey, besebangekho labanye bazalwane. Harvey bekashintjise bomagazini ngemacandza lamatsatfu laluhlata. Wangikhombisa kutsi ngingalidla lelicandza ngekutsi ngente imbotjana ngephansi bese ngiyamunya. Ngisho nobe bekubonakala kungeke kudleke, ngetama kudla linye. Kodvwa ngubani lebekatawudla lelicandza lesitsatfu? Harvey walinika  mine, ngobe bekangacabangi kutsi utawukhona kungetfwala nangingaculeka.

Kulomunye umhlangano wesigodzi, kwenteka intfo lebeyingakavami. Besihlala ekhaya lalomunye umzalwane lebeliseceleni kweliHholwa leMbuso. Njengobe bantfu labakhuluma si-Amis batsatsa kugeza njengentfo lebaluleke kakhulu, umfati wembonisi wesigodzi wasilungiselela emanti ekugeza. Harvey bekamatasa, ngako wacela mine kutsi ngigeze kucala. Bekunemabhakede lamatsatfu: libhakede lemanti labandzako, lemanti lashisako nalelingenalutfo. Lokwangimangalisa kakhulu kutsi lomfati wembonisi wesigodzi wawabeka ngephandle lamabhakede, wawabeka abukana neliHholwa leMbuso, lapho bazalwane bebalungiselela khona umhlangano wesigodzi. Ngamcela kutsi angiphe likhethini. Wanginiketa liplastiki lelikhulu lebewubona ngale kwalo. Ngacabanga kuya emvakwendlu, kodvwa bekunemahansa, futsi bengicabanga kutsi atangiluma. Ngacabanga kutsi: ‘Labazalwane bamatasa kakhulu, ngeke banake kutsi ngiyageza. Futsi batawuphatseka kabi nangingagezi. Ngako ngavele ngageza.

Harvey wabona kutsi bekumatima ngebazalwane labakhuluma si-Amis kutsi babe nekukholwa lokucinile ngobe labanyenti babo bebangakhoni kufundza futsi bebete tincwadzi ngelulwimi lwabo. Njengobe lulwimi lwesi-Amis belusandza kucalwa kubhalwa ngetinhlavu tesiRoman, kwabonakala kukuhle kutsi labazalwane bafundziswe kufundza lulwimi lwabo. Lona bekungumsebenti lomkhulu, kodvwa labazalwane bagcine bakhonile kutifundzela. Tincwadzi tesi-Amis tacala kutfolakala ngasekupheleni kwabo 1960, futsi nga-1968 Sicongosekulindza sesi-Amis sacala kushicilelwa.

Kodvwa hulumende bekangafuni kutsi sisakate tincwadzi letingasito tesiChinese. Kuze sigweme tinkinga, Sicongosekulindza sesi-Amis sashicilelwa ngetindlela letinyenti. Nasi sibonelo, kwaphela sikhashana sisebentisa Sicongosekulindza lesibhalwe ngelulwimi lwesiMandarin nesi-Amis. Nangabe kukhona lobekaba nemibuto, bekubonakala ngatsi sisebentisa lomagazini kuze sifundzise bantfu siChinese. Kusukela ngaleso sikhatsi, inhlangano yaJehova seyicale kushicilela tincwadzi ngelulwimi lwesi-Amis kuze tisite bantfu kutsi bafundze liciniso leliseBhayibhelini.—Imis. 10:34, 35.

Ngabo-1960 nangabo-1970, bazalwane labanyenti labakhuluma si-Amis bebangaphili ngetimiso taNkulunkulu. Njengobe bebangaticondzi kahle timiso teliBhayibheli, labanye bebatiphatsa kabi, badzakwa, nobe basebentise insangu ne-betel nut. Harvey wavakashela emabandla lamanyenti kuze etame kusita bazalwane bacondze timiso taJehova ngaloku. Kulolunye luhambo kwenteka naku lengikhulume ngako ekucaleni.

Bazalwane labatfobekile bebafuna kwenta lushintjo, kodvwa lokubuhlungu kutsi labanyenti bebangafuni, futsi linani lebamemeteli eTaiwan lehla lisuka ku-2 450 laya ku-900 ngeminyaka nje lengu-20. Loku kwasidvumata kakhulu. Kodvwa besati kutsi Jehova angeke ayibusise inhlangano lengakahlanteki. (2 Khor. 7:1) Ngekuhamba kwesikhatsi, emabandla besekakhonta Jehova ngendlela lekahle futsi wawabusisa, ngobe nyalo eTaiwan kunebamemeteli labangetulu kwa-11 000.

Kusukela ngabo 1980 kuchubeke, sabona kutsi bazalwane labasemabandleni esi-Amis besebanekukholwa lokucinile, futsi Harvey besekaba nesikhatsi lesinyenti nebazalwane labakhuluma siChinese. Bekakujabulela kusita emadvodza abodzadze labanyenti kutsi abe BoFakazi BaJehova. Ngiyakhumbula asho kutsi wajabula kanjani ngesikhatsi lenye yalamadvodza ithantaza kwekucala kuJehova. Nami ngiyajabula kutsi banyenti bantfu labatfobekile lengabafundzisa liciniso. Ngaphindze ngajabulela kusebenta egatjeni laseTaiwan nalenye indvodzana nendvodzakati yalabanye lebengifundza nabo liBhayibheli.

Ngashonelwa yindvodza yami. Ngemuva kweminyaka lecishe ibe ngu-59 sishadile, indvodza yami lengiyitsandzako yashona ngaJanuary 1, 2010, yabulawa ngumdlavuza. Besekaneminyaka lecishe ibe ngu-60 emsebentini wasikhatsi sonkhe! Ngisamkhumbula kakhulu. Kodvwa ngijabula kakhulu kutsi ngakhona kwenta naye umsebenti waJehova emaveni lamabili. Safundza kukhuluma tilwimi letimbili letilukhuni tase-Asia, futsi Harvey wafundza nekutibhala.

Ngemuva kweminyaka lembalwa, ngenca yekutsi besengikhulile ngeminyaka Sigungu Lesibusako satsi kuncono ngibuyele e-Australia. Lokwafika kucala engcondvweni yami kwaba kutsi, ‘Angifuni kuhamba eTaiwan.’ Kodvwa Harvey bekangifundzisile kutsi ngibokwenta konkhe loko inhlangano yaJehova letsi angikwente. Ngekuhamba kwesikhatsi ngabuyela e-Australia futsi ngabona kutsi ngenta kahle ngekubuyela emuva.

Lamuhla, ngisebenta egatjeni lase-Australia futsi ngikhonta ebandleni lelidvutane nakhona. EBethel, ngiyajabula kusebentisa lulwimi lwesiJapanese nesiChinese kuze ngikhulume nalabavakashile. Ngisibuke ngalabovu sikhatsi lapho Jehova atawuvusa khona labafile, futsi ngiyati kutsi utamkhumbula Harvey, lobekenta konkhe loko Jehova lebekamcela kutsi akwente.—Joh. 5:28, 29.