Harvey mak oan-mane boot no iha alin naʼin-tolu. Ninia família aprende lia-loos iha Midland Juction, Austrália Oeste, tinan 80 liubá bainhira mosu problema ekonomia iha Austrália. Harvey haburas domin ba Jeová no hetan batizmu bainhira tinan 14. Nia sempre prontu atu simu knaar husi Jeová nia organizasaun. Uluk bainhira joven, nia lakohi simu knaar atu lee Livru Haklaken iha reuniaun tanba nia hanoin katak nia labele halo knaar neʼe ho didiʼak. Maibé irmaun ida hatete ba nia: “Bainhira ema ida iha Jeová nia organizasaun fó knaar ruma ba ita, neʼe tanba nia hatene katak ita bele halo ida-neʼe ho didiʼak.”—2 Kor 3:5.

Haʼu aprende lia-loos iha rai-Inglaterra hamutuk ho haʼu-nia amá no biin ida. Foufoun haʼu-nia apá la gosta Testemuña ba Jeová, maibé ikusmai nia mós simu lia-loos. Haʼu hetan batizmu bainhira haʼu tinan sia maski haʼu-nia apá la fó lisensa. Haʼu halo planu atu serbí nuʼudar pioneiru no tuirmai sai nuʼudar  misionáriu. Maibé haʼu-nia apá la fó lisensa ba haʼu atu foti pioneiru se haʼu seidauk tinan 21. Haʼu lakohi hein kleur hanesan neʼe. Bainhira haʼu tinan 16, haʼu-nia apá fó lisensa ba haʼu atu muda ba Austrália hodi hela ho haʼu-nia biin boot. Ikusmai, bainhira haʼu tinan 18, haʼu komesa pioneiru.

Iha Austrália, haʼu hasoru Harvey. Ami rua hakarak atu serbí nuʼudar misionáriu. Ami kaben iha tinan 1951. Ami serbí nuʼudar pioneiru durante tinan rua, tuirmai ami simu knaar atu serbí nuʼudar katuas área. Ami tau matan ba área luan iha Austrália Oeste, tan neʼe baibain ami lori karreta liu husi fatin neʼebé maran no izoladu.

Iha tinan 1954, ami simu konvite atu tuir Eskola Gilead klase 25. Ami-nia mehi atu serbí nuʼudar misionáriu besik atu sai loos. Ami toʼo iha Novaiorke ho ró no ami komesa estuda kleʼan Bíblia. Iha Eskola Gilead, ami mós presiza aprende lian Españól. Neʼe susar ba Harvey tanba nia labele temi letra r ho moos.

Durante Eskola Gilead, mestre sira fó anúnsiu katak ema neʼebé interese atu serbí iha rai-Japaun, bele hakerek naran atu tuir kursu lian Japonés. Ami deside katak diʼak liu se Jeová nia organizasaun mak hili knaar ba ami. Lakleur depois neʼe, mestre ida neʼebé hanorin Eskola Gilead naran Albert Schroeder nota katak ami la hakerek ami-nia naran atu tuir kursu lian Japonés. Nia hatete ba ami: “Hanoin lai kona-ba neʼe.” Liutiha tempu balu, kuandu nia nota katak ami seidauk hakerek ami-nia naran, nia hatete: “Haʼu no mestre sira seluk hakerek ona imi-nia naran atu imi tuir kursu. Imi koko toʼok aprende lian Japonés.” Tuir loloos, fasil liu ba Harvey atu temi liafuan iha lian Japonés duké iha lian Españól.

Iha tinan 1955, bainhira Harvey tinan 26 no haʼu tinan 24, ami muda ba rai-Japaun no iha tempu neʼebá iha deʼit haklaken-naʼin 500. Ami simu knaar atu serbí iha sidade Kobe, no ami serbí iha neʼebá durante tinan haat. Ami kontente atu serbí fali nuʼudar katuas área, no serbí besik sidade Nagoya. Ami gosta buat hotu kona-ba ami-nia knaar, inklui irmaun-irmán sira, ai-han no mós fatin sira. Maibé lakleur deʼit, ami hetan oportunidade seluk atu halo tuir Jeová nia hakarak.

Ami serbí nuʼudar katuas área durante tinan tolu. Tuirmai sukursál Japaun husu ami  atu muda ba rai-Taiwán atu bele haklaken hamutuk ho ema Amis sira. Irmaun Amis balu kontra lia-loos, no sukursál Taiwán presiza irmaun ida neʼebé koʼalia lian Japonés ho moos atu bele ajuda hadiʼa situasaun. * Ami gosta tebes atu serbí iha rai-Japaun, tan neʼe desizaun neʼe susar tebes ba ami. Maibé Harvey aprende ona atu sempre simu knaar husi organizasaun, entaun ami deside atu muda.

Ami toʼo iha rai-Taiwán iha fulan-Novembru tinan 1962. Rai-Taiwán iha haklaken-naʼin hamutuk 2.271, no maioria mak ema Amis. Ulukliu ami presiza aprende lian Xinés. Ami iha livru ida deʼit atu aprende lian Xinés no ami-nia mestra labele koʼalia lian Inglés. Maibé ami konsege aprende lian Xinés.

Lakleur depois ami toʼo iha rai-Taiwán, Harvey simu knaar atu tau matan ba serbisu haklaken iha neʼebá. Sukursál Taiwán mak kiʼik deʼit, tan neʼe Harvey bele halo hotu ninia serbisu iha eskritóriu no tuirmai nia uza semana tolu fulan-fulan atu haklaken hamutuk ho irmaun-irmán Amis sira. Dala ruma nia mós serbí nuʼudar katuas vizitante, neʼe inklui hatoʼo diskursu iha reuniaun boot sira. Harvey bele hatoʼo diskursu sira iha lian Japonés, no irmaun-irmán Amis sira bele komprende ida-neʼe. Maibé governu fó lisensa atu halaʼo atividade relijiaun nian hodi uza deʼit lian Xinés. Tan neʼe Harvey hatoʼo diskursu sira iha lian Xinés maski seidauk koʼalia ho momoos, no irmaun ida mak tradús ida-neʼe ba lian Amis.

Iha tempu neʼebá, forsa militár mak ukun rai-Taiwán, tan neʼe irmaun-irmán sira presiza lisensa atu bele halaʼo reuniaun boot sira. La fasil atu hetan lisensa. Dala barak polísia demora atu fó lisensa. Se polísia seidauk fó lisensa iha semana neʼebé atu halaʼo reuniaun boot, Harvey sei tuur deʼit iha postu-polísia toʼo sira fó lisensa. Tanba polísia sira sente moe bainhira ema estranjeiru hein iha sira-nia postu, sira lalais atu fó lisensa.

Durante semana sira neʼebé ami haklaken hamutuk ho irmaun-irmán sira, dala barak ami laʼo ba oras ida ka liu, saʼe foho sira no hakur mota sira. Haʼu hanoin-hetan primeiravés haʼu saʼe foho. Haʼu matabixu lalais deʼit no tuirmai iha tuku 5.30 dadeer, ami saʼe bís ba knua ida neʼebé dook, ami hakur mota, no tuirmai hakaʼas an saʼe foho neʼebé aas. Dalan atu saʼe ba foho neʼe mak subida makaʼas.

Dadeer neʼe, Harvey haklaken ho irmaun lokál balu, no haʼu haklaken mesak iha knua ida neʼebé ema koʼalia lian Japonés. Maizumenus iha tuku ida, haʼu sente atu dezmaia tanba haʼu seidauk han ba oras barak. Bainhira haʼu hasoru Harvey, nia mesak deʼit. Harvey troka ona revista balu ho manu-tolun tolu. Nia hatudu oinsá atu han manu-tolun matak, nia halo kuak kiʼik ida no tuirmai xupa ida-neʼe. Maski haʼu sente neʼe la gostu, maibé haʼu koko ida. Entaun, sé mak sei han manu-tolun ikus? Haʼu mak han, tanba Harvey  sente katak nia la iha kbiit atu koʼus haʼu tun foho se haʼu dezmaia tanba hamlaha.

Iha reuniaun boot ida, haʼu hetan esperiénsia neʼebé úniku. Ami hela iha irmaun ida nia uma besik Reuniaun-Fatin. Tuir ema Amis nia kultura, hariis mak importante. Katuas área nia feen prepara bee ba ami atu hariis. Tanba Harvey okupadu, nia husu haʼu atu hariis uluk. Iha buat tolu, iha balde ho bee manas, balde ho bee malirin, no mós iha basia mamuk. Haʼu hakfodak tanba katuas área nia feen tau balde sira-neʼe iha uma nia liʼur no irmaun-irmán sira neʼebé prepara hela ba reuniaun boot iha Reuniaun-Fatin bele haree. Haʼu husu katuas área nia feen atu lori hena ruma atu halo nuʼudar kortina. Maibé nia lori mai haʼu plástiku neʼebé bele haree borus. Haʼu hanoin atu hariis iha uma kotuk, maibé iha uma kotuk iha manu-gansu neʼebé karik sei tata haʼu. Entaun haʼu hanoin: ‘Irmaun sira okupadu, sira sei la haree haʼu hariis. No se haʼu la hariis, irmaun-irmán sira sei laran-kanek. Loos ona haʼu sei hariis.’ Entaun haʼu hariis duni.

Harvey rekoñese katak susar ba irmaun-irmán Amis sira atu laʼo ba oin tanba sira la hatene lee no la iha publikasaun iha lian Amis. Tanba ema komesa hakerek lian Amis, entaun diʼak atu hanorin irmaun-irmán sira atu lee iha sira-nia língua rasik. Neʼe mak serbisu boot, maibé ikusmai irmaun-irmán sira bele estuda mesak iha sira-nia língua rasik. Publikasaun iha lian Amis komesa fó sai maizumenus iha tinan 1966, no Livru Haklaken iha lian Amis fó sai iha tinan 1968.

Maibé governu bandu publikasaun sira neʼebé la hakerek iha lian Xinés. Tan neʼe, atu hamenus problema, Livru Haklaken iha lian Amis fó sai iha dalan oioin. Porezemplu, ba tempu balu, Livru Haklaken neʼebé ami uza hakerek ho língua rua, lian Xinés no lian Amis. Hodi halo nuneʼe, ema hanoin katak ami uza revista sira-neʼe atu hanorin lian Xinés. Husi tempu neʼebá, Jeová nia organizasaun fó sai publikasaun barak iha lian Amis atu ajuda sira aprende kona-ba Bíblia.—Após 10:34, 35.

Durante tinan barak, irmaun-irmán Amis barak la moris tuir Maromak nia matadalan. Sira la komprende ho didiʼak Bíblia nia prinsípiu, tan neʼe sira balu halaʼo moris neʼebé la iha morál, hemu lanu, fuma, no mama malus. Harvey vizita kongregasaun barak hodi koko ajuda irmaun-irmán barak atu komprende Jeová nia hanoin kona-ba buat sira-neʼe. Iha ami-nia viajen ida, ami hetan esperiénsia neʼebé haʼu temi ona ohin.

Irmaun-irmán sira neʼebé haraik an prontu atu halo mudansa, maibé triste tanba irmaun-irmán barak lakohi halo mudansa. Durante tinan 20, haklaken-naʼin iha rai-Taiwán sai menus husi ema naʼin-2.450 sai fali naʼin-900. Neʼe halo ami sente laran-kraik tebes. Maibé, ami hatene katak Jeová sei nunka haraik bensaun ba organizasaun neʼebé la moos. (2 Kor 7:1) Ikusmai, kongregasaun sai moos no Jeová haraik bensaun. Ohin loron, iha haklaken-naʼin 11.000 liu iha rai-Taiwán.

Hahú husi tinan 1980, ami haree katak irmaun-irmán sira iha kongregasaun lian Amis laʼo ba oin no Harvey bele uza tempu barak liu hamutuk ho ema Xina sira. Nia kontente atu ajuda irmán barak nia laʼen atu serbí Jeová. Haʼu hanoin-hetan Harvey sente kontente tebes bainhira ninia estudante ida halo orasaun ba Jeová ba dala primeiru. Haʼu mós kontente tanba bele hanorin ema barak neʼebé laran-loos atu hakbesik ba Jeová. Haʼu mós hetan oportunidade atu serbí iha sukursál iha rai-Taiwán hamutuk ho haʼu-nia estudante nia oan-mane no oan-feto.

Agora haʼu faluk. Depois kaben tiha maizumenus ba tinan 59, haʼu-nia laʼen Harvey mate iha loron 1 Janeiru 2010 tanba moras kankru. Nia serbí Jeová tempu-tomak maizumenus ba tinan 60. Haʼu nafatin hanoin tebes nia. Haʼu kontente tebes atu serbí hamutuk ho nia iha nasaun rua bainhira serbisu haklaken foin hahú. Ami aprende atu koʼalia língua rua neʼebé susar liu iha Ázia, no Harvey mós tenke aprende atu hakerek língua sira-neʼe.

Tinan balu liutiha, Grupu Administradór deside katak diʼak liu se haʼu fila fali ba Austrália tanba haʼu-nia idade aumenta ba daudaun. Foufoun haʼu hanoin: ‘Haʼu lakohi sai husi rai-Taiwán.’ Maibé Harvey hanorin haʼu atu sempre prontu halo tuir Jeová nia organizasaun, tan neʼe haʼu fila fali ba Austrália. Ikusmai haʼu komprende katak matenek atu fila fali ba Austrália.

Ohin loron, durante loron baileet haʼu serbí iha sukursál Australásia no iha findesemana haʼu haklaken hamutuk ho kongregasaun. Haʼu kontente atu koʼalia lian Japonés no lian Xinés ba ema sira neʼebé vizita Betel. Haʼu hein namanas ba Jeová nia promesa kona-ba moris-hiʼas. Haʼu hatene katak Jeová sei hanoin-hetan Harvey neʼebé sempre prontu atu simu knaar husi Jeová nia organizasaun.—João 5:28, 29.