Balumi bangu mbobakali bapati akati kabana basankwa bone. Mukwasyi wabo wakaiya kasimpe mu Midland Junction, ku Western Australia, ciindi nokwakali nzala kapati mucisi mumyaka yakuma 1930. Balumi bangu bakamuyanda kapati Jehova cakuti bakabbapatizyigwa kabajisi myaka iili 14. Cakufwambaana bakaiya kuzumina mikuli yakumuuya lyoonse. Kabacili baniini, aciindi cimwi bakakaka kubala Ngazi Yamulindizi kumuswaangano, nkaambo bakali kulimvwa kuti tabeeleli. Pele mukwesu umwi wakabagwasya kuzibona munzila iimbi zintu naakati, “Ciindi umwi mumbunga ya Jehova naakwaambila kucita cintu cimwi, ulizyi kuti uleelela!”—2Kor. 3:5.

Mebo, bamaama alimwi amupati wangu musimbi, twakaiya kasimpe mu England. Kumatalikilo, bataata tiibakali kubayanda Bakamboni ba Jehova, pele kumbele bakaba Bakamboni abalo. Nokuba kuti tiibakali kuyanda bataata, ndakabbapatizyigwa kandijisi buyo myaka iili fwuka. Ndakalibikkila mbaakani yakucita bupainiya akuyooba misyinali. Nokuba boobo, bataata bakali kundikasya kutalika bupainiya  kusikila mane ndikakkwanye myaka iili 21. Tiindakali kuyanda kulindila kusikila kuciindi eeco. Aboobo nondakakkwanya myaka iili 16, bakandizumizya kuunka ku Australia kuyookkala abapati bangu bakaintu, ibakalongela kucisi eeco. Mpoonya nondakakkwanya myaka iili 18, ndakatalika bupainiya.

Ku Australia, twakazyibana aba Harvey. Toonse twakali kuyanda kubelekela Jehova katuli bamisyinali. Twakakwatana mu 1951. Notwakabeleka antoomwe mumulimo wabupainiya kwamyaka yobilo, twakatumwa mumulimo wamubbazu. Bbazu lyesu mu Western Australia lyakali lipati kapati, aboobo twakali kweenda misinzo milamfwu mulusuko alimwi amasena aali kulamfwu.

Mu 1954, twakatambwa kuyoonjila cikolo ca Gileadi canamba 25. Makanze eesu aakuba bamisyinali akalaafwaafwi kuzuzikizyigwa! Twakaunka abwato ku New York akutalika lwiiyo lwamu Bbaibbele cakusitikila. Kacili cibeela calwiiyo, twakatalika kwiiya mwaambo waci Spanish, walo iwakabayumina ba Harvey akaambo kakuti bakali kwaalilwa kwaamba ma r.

Notwakali kwiiya, bamayi bakaambilizya kuti aabo ibayanda kuyoobelekela ku Japan balilembye mazina kutegwa banjile mukkilasi yakwiiya mwaambo waci Japanese. Swebo twakayeeya kuti mbunga ya Jehova ikatusalile kwakuunka. Muciindi buyo cisyoonto, mukwesu Albert Schroeder, umwi wabamayi baku Gileadi, wakazyiba kuti tiitwakalembya. Wakatwaambila kuti: “Amwaayeeyesye makani aaya.” Notwakacili kuwaya-waya, Mukwesu Schroeder wakatwaambila kuti: “Mebo abamayi bambi twamulembya. Amusole kwiiya ci Japanese.” Mwaambo ooyu wakabaubila ba Harvey kwiinda mwaambo waci Spanish.

Twakasika ku Japan mu 1955 ciindi nokwakali buyo basikumwaya ibali 500 mucisi coonse. Ba Harvey bakali aamyaka iili 26, mpoonya mebo 24. Twakatumwa mudolopo lya Kobe, kwalo nkotwakabeleka myaka yone. Mpoonya twakakkomana kujokela alimwi mumulimo wamubbazu, twakali kubelekela munsi-munsi adolopo lya Nagoya. Twakazikkomanina zyoonse izyakajatikizyidwe mumulimo wesu, nkokuti bakwesu, zyakulya alimwi azintu zyakubusena oobo. Pele kakutanainda ciindi, twakajisi coolwe cimbi cakucita kufwumbwa Jehova ncaatwaambila kuti tucite.

Notwakabeleka myaka yotatwe mumulimo wakweendeenda, bakumutabi waku Japan  bakatulomba kuunka ku Taiwan kuyookambaukila bantu bamumwaambo waci Amis. Bakwesu bamwi bamumwaambo waci Amis bakaba basiluleyo, aboobo bakumutabi waku Taiwan bakali kuyanda mukwesu iwakazyi mwaambo waci Japanese kuti akagwasyilizye kulesya luleyo oolo. * Twakalikkomene kubelekela ku Japan, aboobo cakali ciyumu kusala. Pele ba Harvey bakaiya kutakaka mulimo uuli woonse, aboobo twakazumina kuunka.

Twakasika ku Taiwan mu November 1962. Aciindi eeco kwakali basikumwaya ibali 2,271 mucisi eeci, bunji bwabo bakali ba Amis. Cakusaanguna twakeelede kwiiya ci Chinese. Twakajisi buyo bbuku lyomwe lyaci Chinese alimwi iwakali kutuyiisya tanaakacizyi Chikuwa, pesi twakaciiya ci Chinese.

Nokwakainda buyo ciindi cisyoonto kuzwa notwakasika ku Taiwan, ba Harvey bakapegwa mukuli wakulanganya mulimo mucisi eeco. Mutabi wakali musyoonto, aboobo ba Harvey bakali kucikonzya kubeleka milimo yabo yamuofesi alimwi akubeleka abakwesu ba Amis kwansondo zyotatwe mwezi amwezi. Alimwi ciindi aciindi bakali kubeleka kabali balangizi bacooko, calo icakali kubikkilizya akupa makani kumiswaangano yabbazu. Ba Harvey bakali kukonzya kupa makani muci Japanese, alimwi bakwesu ba Amis bakali kukonzya kumvwa. Pele mfwulumende yakazumizyide kuti miswaangano yabukombi kaicitwa buyo muci Chinese. Nokuba kuti ba Harvey wakali kubakatazya mwaambo, bakali kupa makani muci Chinese, mpoonya mukwesu umwi wakali kusandulula muci Amis.

Aciindi eeco, mfwulumende yakapede basikalumamba nguzu zyakweendelezya cisi ca Taiwan. Aboobo bakwesu bakeelede kubweza pepa lizumizya kucita miswaangano yabbazu. Tiicakali cuubauba kubweza mapepa aayo, alimwi kanji-kanji bakapokola bakali kumuka kutupa. Ikuti naa bamuka kutupa kusikila nsondo yamuswaangano yasika, ba Harvey bakali kukkala kupolisi kusikila mane babapa pepa. Mbwaanga bakali kulisenda kukkazika muzwakule kwaciindi cilamfwu, bupampu oobu bwakali kubeleka.

Ciindi notwakali kubeleka abakwesu, kanji-kanji twakali kweenda musinzo iwiinda awoola lyomwe, kutanta malundu akuzabuka milonga. Ndilayeeya ciindi cakusaanguna nondakatanta mulundu. Twakakkwela bbaasi ilyakali kunyamuka kuma 5:30 kuseeni kuya kumunzi iwakali kulamfwu kapati. Mpoonya twakweenda mubusena imwakali maanzi manji, alimwi akutanta mulundu mulamfwu. Wakali mulamfwu cakuti, kwakali kunga ndalanga kumbele, ndakali kubona buyo maulu aabakwesu ibakali kumbele lyangu.

Buzuba oobo, ba Harvey bakabeleka abakwesu bamwi bakubusena ooko mumulimo wamumuunda, mpoonya mebo ndakali kukambauka ndelikke mumunzi musyoonto imwakali kukkala bantu baambaula mwaambo waci Japanese. Noyakakkwana 13:00hrs, ndakagonkelwa kapati nkaambo kunyina ncondakalide kwamawoola manji. Notwakaswaangana aba Harvey, kwakanyina bakwesu bambi afwaafwi. Ba Harvey bakajisi mayi otatwe aatajikidwe ngobakacincanya amamagazini. Bakadonkola kapulo kumamanino aaji lyomwe akunywa kutegwa banditondezye mbolinyugwa. Nokuba kuti tiilyakali kunona, ndakasola kunywa. Pele ino nguni iwakeelede kunywa ji lyatatu? Ba Harvey bakandipa ndilyo,  mbwaanga bakabona kuti inga tiibacikonzya kundinyamuna kuti ndinetuke akaambo kanzala.

Mubbazu limbi, ndakacitikilwa cintu cimwi cigambya. Twakasikila aŋanda yamukwesu umwi yakali aafwaafwi a Ŋanda ya Bwami. Mbwaanga ba Amis kusamba bakubona kuba cintu ciyandika kapati, mukaintu wamulangizi wabbazu wakatupa maanzi aakusamba. Ba Harvey bakajisi bubi, aboobo bakandaambila kuti ndisaangune kuyoosamba. Nondakasika kusambilwa ndakajana mabbavwa otatwe: lyomwe lyakajisi maanzi aatontola, limwi maanzi aapya, mpoonya limbi kunyina cakaliko. Cakandigambya ncakuti, mukaintu wamulangizi wabbazu mabbavwa aayo wakaabikka anze aaŋanda alo bakwesu ibakali kugwasyilizya kulibambila muswaangano a Ŋanda ya Bwami mpobakali kulibonya caantangalala. Ndakamulomba mulembo wakuti ndilicingilizye. Mpoonya wakaleta mulembo uubalangala! Ndakayeeya kuti nduunke kunze aaŋanda, pele kwakali bayuni ibali mbuli zidada, aboobo ndakayoowa kuti inga bandigoma. Ndakalyaambauzya kuti: ‘Bakwesu bajisi bubi, tabakonzyi kubona kuti ndilasamba. Pele kuti nditasambi, ndilabatyompya. Ndakati, ndilasamba buyo!’ Aboobo ndakasamba.

Ba Harvey bakabona kuti bakwesu baambaula mwaambo waci Amis cakali kubayumina kuyaambele kumuuya akaambo kakuti banji tiibakacizyi kubala akulemba alimwi bakanyina mabbuku aamumwaambo wabo. Mbwaanga mwaambo waci Amis wakatalikide kulembwa kubelesya mabala aaci Roma, cakauba-uba kuyiisya bakwesu kubala mumwaambo wabo. Ooyu wakali mulimo mupati, pele mukuya kwaciindi, bakwesu bakali kukonzya kwiiya kujatikizya Jehova mumwaambo wabo. Kumamanino aamwaka wa 1960, mabbuku aamuci Amis akatalika kupangwa, mpoonya mu 1968, Ngazi Yamulindizi yamuci Amis yakatalika kumwaigwa.

Nokuba boobo, mfwulumende yakali kukasya kumwaya mabbuku aatakali aamuci Chinese. Aboobo kutegwa tweelebe mapenzi, Ngazi Yamulindizi yamuci Amis yakali kumwaigwa munzila ziindene-indene. Mucikozyanyo, kwaciindi cili mbocibede, Ngazi Yamulindizi njotwakali kubelesya yakalembedwe mumyaambo yobilo, nkokuti mwaambo waci Mandarin alimwi aci Amis. Kuti naa kwaba uubuzya mibuzyo, cakali mbuli kuti twakali kubelesya mamagazini aaya kuyiisya bantu ci Chinese. Kuzwa ciindi eeco, mbunga ya Jehova yali kumwaya mabbuku manji aamuci  Amis kugwasya bantu aaba kwiiya kasimpe kamu Bbaibbele.—Mil. 10:34, 35.

Mumyaka yakuma 1960 alimwi a 1970, bakwesu baambaula mwaambo waci Amis tiibakali kupona kweelana azyeelelo zya Leza. Akaambo kakuti tiibakali kuzimvwisya njiisyo zyamu Bbaibbele, bamwi tiibakali kulilemeka, bakali kukolwa, kufwinkila tombwe naa kunyeela nseke zyalubanje. Ba Harvey bakaswaya mbungano zinji, kusoleka kugwasya bakwesu kumvwisya mbwazibona zintu eezyi Jehova. Mukuswaya kumwi, ndendilyo notwakacitikilwa cintu cimwi ncondaamba kumatalikilo aacibalo eeci.

Bakwesu ibalicesya bakalilibambide kucinca, pele cuusisya cakuti, banji bakaalilwa, alimwi mweelwe wabasikumwaya mu Taiwan wakayaansi kapati, cakuti mumyaka iili 20 kwakacaala buyo basikumwaya babalilwa ku 900 akati kabasikumwaya ibainda ku 2,450 ibakaliko. Eeci cakali kutyompya kapati. Nokuba boobo, twakalizyi kuti Jehova takonzyi kulongezya mbunga iisofweede. (2Kor. 7:1) Mukuya kwaciindi, micito iitaluzi yakasalazyigwa, alimwi kwiinda mukulongezyegwa a Jehova, lino ku Taiwan kuli basikumwaya ibainda ku 11,000.

Kuzwa kuma 1980 kuya kumbele, twakabona kuti bakwesu abacizyi mumbungano zyaci Amis bakayaambele kumuuya, mpoonya ba Harvey bakali kutola ciindi cinji kuyanzana aba Chinese. Bakali kukkomana kugwasya bamaalumi ibakakwete bacizyi kutegwa babe Bakamboni ba Jehova. Ndilayeeya nobakandaambila kuti cakabakkomanisya kapati ciindi umwi wabamaalumi aaba naakapaila kuli Jehova ciindi cakusaanguna. Andime ndakakkomana akaambo kakuti ndakacikonzya kuyiisya babombe myoyo banji kuba acilongwe a Jehova. Mane buya ndakajana lukkomano kubeleka kumutabi waku Taiwan, antoomwe amwana musankwa amusimbi wamuntu ngondakali kuyiisya Bbaibbele kaindi.

Lino ndakacaala endikke. Notwakakkwanya myaka iitandila ku 59 mucikwati, balumi bangu ibayandwa ba Harvey bakafwa mu January 1, 2010, abulwazi bwakkansa. Bakabeleka mumulimo waciindi coonse myaka iitandila ku 60! Ndilabayeeya citaambiki. Pele ndakalikkomene kapati kubeleka ambabo mumasi obilo aakkomanisya kapati! Twakaiya kwaambaula myaambo yobilo iikatazya yaku Asia, balo ba Harvey bakaiya amboilembwa.

Myaka misyoonto yainda, bamu Kabunga Keendelezya bakabona kuti, akaambo kakuti ndakali kuyaabucembaala, inga cainda kubota kuti ndijokele ku Australia. Kumatalikilo ndakati, ‘Tandiyandi kuzwa ku Taiwan.’ Pele ba Harvey bakandiyiisya kutakaka kucita ncoyaamba mbunga ya Jehova, aboobo ndakajokela ku Australia. Kumbele, ndakabona kuti cakali cabusongo kulonga.

Mazuba aano, ndibelekela amutabi ku Australasia mukati kansondo, mpoonya awikkeendi ndilaunka mubukambausi ambungano yakubusena ooko. A Beteli, ndilakkomana kubelesya ci Japanese aci Chinese ciindi nondeenzeezya basikuswaya mutabi. Pele ndilangila bubuke mbwaakasyomezya Jehova. Ndilizyi kuti uyoobayeeya ba Harvey, ibakaiya kucita kufwumbwa Jehova ncaakali kubaambila kuti bacite.—Joh. 5:28, 29.