NKHANI YAKULONGOSORA UMOYO WA MUNTHU
Tikasambira Kuchita Chilichose Icho Yehova Wakukhumba Kuti Tichite
KWATI kwachitika chivula chikuru cha chimphepo, mlonga ukazura chomene mwakuti ukayeghanga vimalibwe vikuruvikuru. Tikakhumbanga kuluta ku sirya linyake, kweni maji ghakuchimbira chomene ghakaŵa kuti ghakokolora buliji. Mfumu wane Harvey, ine pamoza na uyo wakating’anamuliranga chiyowoyero, tikawopa chomene ndipo tikasoŵa chakuchita. Ŵabali awo ŵakaŵa ku sirya linyake nawo ŵakafipa mtima chomene apo ŵakalaŵiliranga kuti tikwambuka. Pakwambuka, chakwamba tikakwezga ka Galimoto kithu kachoko mu thiraki yikuru kwambura kukakilira na vingwe panji matcheni kuti yileke kuwa. Mbwenu mwapachokopachoko thiraki yikamba kwambuka pa maji agho ghakachimbiranga chomene. Apo tikambukanga, nkhawonanga nga tikuchedwa chomene kuti tikafike ku sirya linyake, tikalombanga kwa Yehova nyengo yose apo tikambukanga m’paka tikafika makora ku sirya linyake. Ivi vikachitika mu 1971. Tikaŵa kumafumiro gha dazi kwa charu cha Taiwan, kutali chomene na uko tikababikira. Lekani nimulongosolerani mbiri yithu.
UMO TIKASAMBILIRA KUTEMWA YEHOVA
Harvey ndiyo wakaŵa mulara kwawo pa ŵana ŵanalume 4. Mbumba yakwawo yikasambira unenesko ku Midland Junction, Western Australia, vyaka 80 ivyo vyajumpha panyengo iyo mu charu ichi mukaŵa ukavu chomene. Harvey wakamba kutemwa Yehova ndipo wakabatizika wali na vyaka 14. Mwaluŵiro wakasambira kuzomera mulimo uliwose uwo wapika mu mpingo. Apo wakaŵa muchoko, nyengo yinyake wakakana kuŵazga Gongwe la Mulinda pa maungano chifukwa wakaghanaghananga kuti ngwambura kwenelera. Kweni mubali munyake wakamuphalira kuti: “Para munthu munyake mu gulu la Yehova wakupempha kuchita chinthu chinyake, ndikuti wakumanya kuti uli wakwenelera kuchita chinthu icho.”—2 Kor. 3:5.
Ine nkhasambira unenesko ku England pamoza na amama kweniso mukuru wane. Adada ŵane pakwamba ŵakaŵatinkhanga Ŵakaboni ŵa Yehova kweni pamanyuma nawo ŵakazgoka Kaboni wa Yehova. Ine nkhabatizika na vyaka 9, nangauli adada ŵakakhumbanga yayi. Nkhajiŵikira chilato kuti nambe upayiniya kuti paumaliro nizakaŵe mishonale. Kweni adada ŵane ŵakanizomerezga yayi kwamba upayiniya, ŵakakhumbanga kuti nikwaniske dankha vyaka 21. Nkhakhumba yayi kulindilira m’paka kose uku. So apo nkhaŵa na vyaka 16, ŵakanizomerezga kuluta ku Australia kuti nkhakhalenge na mukuru wane uyo wakasamira mu charu ichi. Paumaliro nati nakwaniska vyaka 18, nkhamba upayiniya.
Pa zuŵa la ukwati withu mu 1951
Ku Australia ndiko nkhakumana na Harvey. Tikayana vilato, tose tikakhumbanga kuteŵetera Yehova nga ŵamishonale. Tikatorana mu 1951. Tikati tachita upayiniya kwa vyaka viŵiri, tikamba kwendera dera. Dera ilo tikenderanga, ku Western Australia likaŵa likuru chomene, ntheura tikendanga mtunda utali kwambura kuwona ŵanthu.
CHILATO CHITHU CHIKAFISKIKA
Tikumalizga Sukulu ya Giliyadi ku Yankee Stadium mu 1955
Mu 1954, tikachemeka kuti tikanjire kilasi nambara 25 ya Sukulu ya Giliyadi. Tikawona kuti chilato chithu chakuti tiŵe ŵamishonale chikaŵa pafupi kufiskika. Tikenda pa sitima kufika ku New York, ndipo tikati tamba kusambira, tikamba kumanya vinandi vya mu Baibolo. Ku sukulu iyi, tikasambirangaso chiyowoyero cha Chispanishi, kweni Harvey wakasuzgika chomene kuti wachisambire chifukwa “r” ŵakumuzunura munthowa yinyake mu Chispanish, ntheura wakatondekanga kuti wazunure mwakwenelera.
Panyengo ya sukulu iyi, asambizgi ŵakapharazga kuti awo ŵakukhumba kukateŵetera ku Japan ŵalembeske mazina yawo kuti ŵambe kusambira Chijapanizi. Ise tikasankha kuti Gulu la Yehova ndilo litisankhire lekha uteŵeti uwo tichitenge. Kanyengo kachoko waka Albert Schroeder, uyo wakaŵa yumoza wa ŵasambizgi ŵithu, wakamanya kuti tindalembepo mazina ghithu kuti tisambirenge Chijapanizi. Mbwenu wakatiphalira kuti: “Ghanaghaniraniposo nkhani iyi.” Tikati takhalaposo waka chete kwambura kulemba mazina ghithu, Mubali Schroeder wakati: “Ine na ŵasambizgi ŵanyane talembapo mazina ghinu. Ntheura yezgani kusambira Chijapanizi.” Harvey wakachisambira mwaluŵiro chiyowoyero ichi.
Tikafika ku Japan mu 1955, ndipo kukaŵa ŵapharazgi 500 pera mu charu chose ichi. Panyengo iyi Harvey wakaŵa na vyaka 26, ndipo ine nkhaŵa na vyaka 24. Tikatumizgika kukateŵetera mu msumba wa Kobe uko tikateŵeterako vyaka 4. Pamanyuma ŵakatiphalira kuti tamwambaso mulimo wakwendera dera ndipo tikateŵeteranga pafupi na msumba wa Nagoya. Tikawutemwanga chomene uteŵeti withu uwo tikachitanga uku kweniso tikatemwanga ŵabali. Tikatemwangaso chomene chakurya na chilengiwa ku malo agha. Kweni pati pajumpha nyengo yichoko waka, tikaŵaso na mwaŵi wakuchita chilichose icho Yehova wakukhumba kuti tichite.
UTEŴETI UPHYA UKIZA NA MASUZGO GHAKE
Harvey na ine kweniso ŵamishonale ŵanyake ku Kobe Japan mu 1957
Tati tachita mulimo wakwendakwenda vyaka vitatu, ofesi ya munthavi ya Japan yikatipempha kuti tilute ku Taiwan kuti tikapharazgirenge ŵanthu ŵa fuko la Amis. Ŵabali ŵanyake ŵa fuko la Amis ŵakagaluka, ndipo ofesi ya munthavi ku Taiwan yikakhumbanga mubali uyo wakuyowoya makora Chijapanizi kuti wakawovwirepo. * Tikawutemwanga chomene uteŵeti withu ku Japan, ntheura chikaŵa chakusuzga chomene kufumako. Kweni Harvey wakaŵa wakunozgeka kuchita uteŵeti uliwose, ntheura tikakolerana kuti tilute.
Tikafika ku Taiwan mu Novembala 1962. Ndipo kukaŵa ŵapharazgi 2,271, ŵanandi mwa ŵapharazgi aŵa ŵakaŵa ŵa fuko la Amis. Kweni chakwamba tikakhumbikwiranga kusambira dankha Chitchayinizi. Tikaŵa waka na buku limoza lakuti tisambilire Chitchayinizi, ndipo msambizgi uyo wakatisambizganga, wakamanyanga yayi Chingelezi. Kweni nipera tikasambira.
Tikati tafika waka ku Taiwan, Harvey wakimikika kuti walaŵilirenge milimo mu charu ichi. Pakuti ofesi ya munthavi yikaŵa yichoko, Harvey wakafiskanga kuchita mulimo wake kweniso kuteŵetera lumoza na ŵabali ŵa fuko la Amis kwa masabata ghatatu pa mwezi. Kweniso kanandi wakateŵeterangaso nga mulaŵiliri wa chigaŵa ndipo wakayowoyanga nkhani pa ungano. Harvey wayowoyenge nkhani mu Chijapanizi, mphanyi ŵabali ŵa fuko la Amis ŵakatenge ŵapulikenge. Ndipouli, boma likazomerezganga kuti maungano gha chisopa ghachitikenge mu Chitchayinizi pera. Ntheura Harvey mwakusuzgikira wakayowoyanga nkhani mu Chitchayinizi, ndipo mubali wakang’anamuliranga mu Chiamis.
Panyengo iyo, charu cha Taiwan chikawusikanga na ŵasilikari, ntheura ŵabali ŵakeneranga kupempha dankha chikalata ku boma kuti ŵachite maungano gha dera na gha chigaŵa. Kweni chikaŵa chipusu yayi, ndipo nyengo zinyake ŵapolisi ŵakachedweskeranga dala kuti ŵatizomerezge. Para ŵapolisi ŵandatizomerezge m’paka sabata ya ungano kufika, Harvey wakakakhalanga waka pa ofesi ya polisi m’paka ŵazomerezge. Chifukwa chakuti ŵapolisi soni zikaŵakoranga kuti munthu wa ku charu chinyake walindizgenge pa ofesi pawo, ŵakaŵazomerezga mwaluŵiro.
KAKWAMBA KUKWERA PHIRI
Tikwambuka mlonga ku Taiwan kuluta mu upharazgi
Masabata ghanyake tikenderanga lumoza na ŵabali kwa ora lakujumpha limoza kukwera mapiri na kwambuka milonga iyo mukaŵa mathipa chomene. Nkhukumbuka zuŵa lakwamba kukwera phiri. Tikati tarya waka chakurya cha mulenji, tikakwera basi iyo yikanyamukanga 5:30 mulenji, kuluta ku mizi yinyake yakutali, ndipo tikati takhira tikambuka milonga yikuruyikuru na kukwera mapiri ghatalighatali. Ghakaŵa ghatali mwakuti mubali uyo wakaŵa panthazi zane wakawonekeranga patali.
Mulenji wura, Harvey wakendera lumoza mu upharazgi na ŵabali ŵa ku mizi iyi, apo ine nkhapharazganga ndekha mu kamuzi kachoko ako mukakhalanga ŵanthu awo ŵakuyowoya Chijapanizi. Kweni nyengo yikati yakwana 1 koloko, nkhongono zikanimalira chifukwa nkhakhala maora ghanandi kwambura kurya. Tati takumana na Harvey, pakaŵavya ŵabali ŵanyake. Harvey wakasinthiska magazini na masumbi ghatatu gha nkhuku. Wakanisambizga umo tikulyera masumbi agha. Nangauli nkhaghatemwa viŵi yayi, kweni nkhayezga kurya limoza. Kweni kasi ninjani wakeneranga kurya ilo likakhara? Harvey wakanipa ine chifukwa wakawonanga kuti wangakwaniska yayi kuninyamura para nazinduka (kuzemphuka) na njara.
KUGEZA MUNTHOWA YACHILENDO
Pa ungano unyake wadera, nkhakumana na suzgo linyake. Tikakhalanga mu nyumba ya mubali iyo yikaŵa pafupi na Nyumba ya Ufumu. Chifukwa chakuti fuko la Amis likuwona kugeza kuti nkhwakuzirwa chomene, muwoli wa mulaŵiliri wadera wakatinozgera maji ghakuti tigeze. Harvey wakatangwanika na vinyake, ntheura wakaniphalira kuti nidankhe ndine kugeza. Kwakugezera kukaŵa vinthu vitatu: kukaŵa baketi ya maji ghakuzizima, baketi ya maji ghakuthukira, kweniso beseni lambura maji. Kweni nkhazizwa chomene kuti mudumbu uyu wakaviŵika kuwaro kwa nyumba ndipo apo wakaŵika vikalazgirana na Nyumba ya Ufumu uko ŵabali ŵakanozgekeranga ungano. Nkhamupempha kuti wanipeko katani. Kweni wakiza na shiti yakulangara. Mbwenu nkhaghanaghana kuti nigezere kuseri kwa nyumba kweni nkhawopangaso chifukwa kukaŵa ŵa baka awo nkhaghanaghana kuti ŵanganiluma. Mbwenu mu mtima nkhati: ‘Ŵabali ŵatangwanika chomene ŵanganiwona yayi kuti nkhugeza pano. Ndipo para nigezenge yayi, mbwenu ŵakhuŵarenge chomene. Lekani nigeze waka.’ So nkhageza nadi.
Navwara malaya gha Chiamis
MABUKU GHITHU MU CHIYOWOYERO CHA CHIAMIS
Harvey wakawona kuti chikaŵa chakusuzga kuti ŵabali ŵa fuko la Amis ŵaŵe na chipulikano chakukhora chifukwa ŵakatondekanga kuŵerenga kweniso pakaŵavya mabuku gha mu chiyowoyero chawo. Chifukwa chakuti chiyowoyero cha Chiamis chikamba kulembeka mu ma alufabeti ya Chiroma, vikaŵa vyakukondweska kusambizga ŵabali kuŵerenga chiyowoyero chawo. Iyi yikaŵa ntchito yikuru chomene kweni paumaliro ŵabali ŵakamba kusambira vya Yehova mu chiyowoyero chawo. Mabuku gha chiyowoyero cha Chiamis ghakamba kusangika cha kuumaliro wa 1960 ndipo mu 1968, Gongwe la Mulinda likamba kusindikizgika mu chiyowoyero cha Chiamis.
Nangauli vikaŵa nthena, boma likakanizga kuti tigaŵirenge mabuku agho ghakaŵa mu Chitchayinizi yayi. So kuti tigege masuzgo, Gongwe la Mulinda la Chiamis, likasindikizgikanga munthowa zakupambanapambana. Mwachiyelezgero, kwakanyengo tikagwiliskiranga ntchito Gongwe la Mulinda la viyowoyero viŵiri, Chitchayinizi na Chiamis. Para munyake wanweka, tikaŵanga nga tikumusambizga munthu Chitchayinizi mwakugwiliskira ntchito magazini. Kwambira waka apa, gulu la Yehova lafumiska mabuku ghanandi mu chiyowoyero cha Chiamis kovwira ŵanthu ŵakutemweka aŵa kusambira unenesko wa mu Baibolo.—Mil. 10:34, 35.
NYENGO YAKUTOZGA
Vyaka vya m’ma 1960 na 1970, ŵabali ŵanandi ŵa fuko la Amis ŵakalondezganga yayi fundo za Yehova. Chifukwa chakuti ŵakazipulikiskanga makora yayi fundo za mu Baibolo, ŵanyake ŵakachitanga uzaghali, ŵakaloŵeranga, kweniso ŵakakhweŵanga hona na chamba. Harvey wakendera mipingo yinandi, kuti wawovwire ŵabali aŵa kuti ŵawonenge vinthu umo Yehova wakuviwonera. Pa umoza mwa maulendo agha ndipo tikakumana na suzgo ilo nangulongosora pakwamba.
Ŵabali ŵakujiyuyura ŵakaŵa ŵakunozgeka kusintha, kweni chachitima ntchakuti, ŵanandi ŵakasintha yayi, ndipo chiŵelengero cha ŵapharazgi ku Taiwan chikakhira kufuma pa ŵanthu ŵakujumpha 2,450 kufika pa 900 mu vyaka 20. Ivi vikaŵa vyakugongoweska chomene. Nangauli vikaŵa nthena, tikamanyanga kuti Yehova wangatumbika yayi gulu ilo likuchita ukazuzi. (2 Kor. 7:1) Nyengo yati yajumphapo, mipingo yikamba kusopa Yehova munthowa yakwenelera ndipo na wovwiri wa Yehova, ku Taiwan sono kuli ŵapharazgi ŵakujumpha 11,000.
Kufuma m’ma 1980 kuya kunthazi, tikamba kuwona kuti ŵabali na ŵadumbu mu mipingo ya Chiamis ŵamba kuŵa na chipulikano chakukhora, ndipo Harvey wakamba kovwira chomene awo ŵakayowoyanga Chitchayinizi. Wakakondwa chomene kovwira ŵafumu ŵa ŵadumbu ŵanyake awo ŵakaŵa ŵambura kugomezga, ndipo paumaliro ŵakaŵa Ŵakaboni ŵa Yehova. Nkhukumbuka wakayowoya kuti wakaŵa wakukondwa chomene kuwona yumoza wa ŵanalume aŵa wakulomba kwa Yehova kakwamba pa umoyo wake. Nane nkhakondwa chomene kusambizga ŵanthu ŵanandi ŵamitima yiwemi kusendelera kwa Yehova. Nkhaŵaso wakukondwa chomene kuteŵetera lumoza pa ofesi ya munthavi ya Taiwan na mwana munyamata kweniso msungwana wa yumoza wa awo nkhasambiranga nawo Baibolo kumasinda.
NYIFWA YA WAKUTEMWEKA WANE
Sono nili nekha kwambura mfumu wane. Tati takhala vyaka pafupifupi 59 mu nthengwa, mfumu wane wakutemweka Harvey wakafwa pa Janyuwale 1, 2010, wati wasuzgika nyengo yitali na kansa. Wakachita uteŵeti wanyengozose pafupifupi vyaka 60. M’paka sono nkhumusoŵa chomene. Nkhakondwanga chomene kuteŵetera nayo lumoza mu vyaru viŵiri vyakukondweska chomene. Tikasambira kuyowoya viyowoyero viŵiri vyakusuzga vya ku Asia, ndipo Harvey wakamanyanga na kulemba wuwo viyowoyero ivi.
Pati pajumpha vyaka vichoko waka, Wupu Wakulongozga ukawona kuti chifukwa cha uchekuru, vingaŵa makora kuti niwelere ku Australia. Pakwamba mu mtima nkhati: ‘Nkhukhumba yayi kufumako ku Taiwan.’ Kweni Harvey wakanisambizga kuti nichitenge chilichose icho gulu la Yehova layowoya, so nkhazomera. Pamanyuma, nkhamanya kuti chikaŵa chiwemi nadi kuti nkhawelera ku Australia.
Nkhukondwa chomene kupokelera ŵalendo awo ŵakuyowoya Chitchayinizi na Chijapanizi awo ŵiza kuzakawona malo pa Beteli
Pasono nkhuteŵetera pa ofesi ya munthavi ya Australasia ndipo pa Chisulo na pa Sabata nkhupharazga pamoza na mpingo. Pa Beteli nkhuŵa wakukondwa kupokelera ŵalendo awo ŵakuyowoya Chijapanizi na Chitchayinizi awo ŵiza kuzakawona malo. Kweniso nkhulindilira mwakunweka zuŵa la chiwuka ilo Yehova walayizga. Chifukwa nkhumanya kuti wazamumukumbuka Harvey, uyo wakasambira kuchita chilichose icho Yehova wakukhumba.—Yoh. 5:28, 29.
^ ndime 14 Nangauli pasono Chitchayinizi ndicho ntchiyowoyero cha ku Taiwan, kweni kwa vyaka vinandi Chijapanizi ndicho chikaŵa chiyowoyero cheneko cha charu ichi. Lekani mafuko ghanandi ku Taiwan yakuyowoya Chijapanizi.
