A Harvey ko te tamaliki matua kae tokotolu ana taina. Ne maua ne te lotou kāiga te munatonu i Midland Junction, i Ausetalia i Togala, i taimi ne faigata ei a mea tau tupe i te 1930 tupu. Ne alofa malosi a Harvey ki a Ieova kae ne papatiso i te taimi ko 14 ei ana tausaga. Fakamuli ifo, ne tauloto a ia ke mo a ma fakaseke so se tofiga mai te fakapotopotoga. I se taimi e tasi, kae koi talavou ei, ne ita a ia ma faitau Te Faleleoleo Maluga i se fakatasiga, me mafaufau a ia i a ia e seki fetaui ‵lei ke fai penā. Kae ne fai atu te taina telā ne fai‵pati mo Harvey, “Kafai e fai atu se tino i te fakapotopotoga a Ieova ke fai ne koe se mea, ko tena uiga e mafaufau a ia me ko fetaui ‵lei koe ke fai te mea tenā!”—2 Koli. 3:5.

Ne tauloto au ki te munatonu i Egelani, fakatasi mo toku mātua mo toku taina matua. Ne ‵teke ‵ki toku tamana i te taimi muamua, kae fakamuli ifo ne talia ne ia te munatonu. Ne papatiso au kae ko tai kātoa toku sefulu tausaga, faitalia me ne seki fiafia tou tagata. Ne kausaki au ki te galuega paenia kae ke fai pelā me se misionale fakamuli. Kae ne seki talia ne toku tamana  ke paenia au seiloga ke kātoa toku 21. Ne seki manako au o faka‵tali i se taimi leva penā. Kae i te taimi ko 16 ei au, ne talia ne ia ke olo au mo toku taina matua telā ko fano o nofo i Ausetalia. Fakamuli ifo, kae ko 18 ei au, ne kamata au o paenia.

Ne fetaui au mo Harvey i Ausetalia. Ne ma‵nako katoa māua ke tavini ki a Ieova e pelā me ne misionale. Ne avaga māua i te 1951. Mai tua o se lua tausaga ne paenia ei māua, ne fakailoa mai ke ga‵lue māua i te seketi. Ne aofia i te mā seketi se vaega lasi o Ausetalia ki Togala, tela la, ne masani māua o olo ki koga ‵mao kolā e ma‵lō kae sē tokouke a tino i ei.

I te 1954, ne ‵kami māua ke ‵kau ki te vasega 25 o te akoga i Kiliata. Ko pili fua o taunu te mā manakoga ke fai pelā me ne misionale! Ne olo māua ki Niu Ioki i se vaka kae ne kamata ei a sukesukega e uke ki te Tusi Tapu. E aofia i mea e ‵tau o fai i te akoga ko te tauloto ki te ‵gana Sepania, kae ne faigata ki a Harvey me e se mafai o faka‵leo ne ia te r i te auala tonu.

I te taimi koi fai ei te akoga, ne faka‵pula mai me i so se tino e fia galue i Tiapani ke fanatu o tusi tena igoa ke tauloto ki te ‵gana Tiapani. Ne fakaiku aka ne māua ke tuku loa ke fili ne te fakapotopotoga a Ieova a te koga ke tavini māua i ei. E seki leva, kae iloa ne Albert Schroeder, se faiakoga e tokotasi i Kiliata, me i a māua e seki tusi mā igoa. Ana muna ki a māua: “Toe mafau‵fau faka‵lei ki ei.” I te taimi ne seki tusi ei mā igoa, ne fai mai te Taina ko Schroeder: “Ko oti ne tusi ne au mo nisi faiakoga a igoa o koulua. ‵Tofo aka oulua alelo ki te ‵gana Tiapani.” Ne faigofie ki a Harvey ke tauloto te ‵gana tenā.

Ne oko māua ki Tiapani i te 1955 kae e toko 500 fua a tino talai i te fenua kātoa. Ko 26 tausaga o Harvey, kae ko au ko 24. Ne ‵tofi māua ke talai i te fakai ko Kobe, kae ne tavini māua i konā i tausaga e fa. Ne fia‵fia māua i te taimi ne toe ‵kami ei ke ga‵lue e pelā me ne ovasia faima‵laga, kae ne tavini māua i tafa o te fakai ko Nagoya. Ne ‵gali ki a māua a mea katoa i te mā taviniga—ko taina, ko meakai, mo te fenua. Kae e seki leva, ne toe maua se avanoaga ke mo a ma fai atu ikai ki a Ieova.

Mai tua o tausaga e tolu i te galuega faimalaga, ne fakamolemole mai te ofisa lagolago i Tiapani me e fia‵fia māua o olo ki Taiwan o ga‵lue fakatasi mo tino Amis kolā ko tino ‵tonu o  te fenua. Ne ‵sae aka a amioga aposetasi, kae ne manako a Taiwan ki se taina e faipati ki te ‵gana Tiapani ke fesoasoani o faka‵lei te fakalavelave. * Ne fia‵fia malosi māua ki te mā galuega i Tiapani, tela la, ne faigata ‵ki te mea tenei. Kae ko oti ne tauloto a Harvey ke mo a ma fakaseke se tofiga e tuku atu ki a ia, tenā ne talia ei ne māua.

Ne oko māua i a Novema 1962. E toko 2,271 a tino talai i Taiwan, te tokoukega o latou ne tino Amis. Kae e ‵tau o tauloto muamua māua ki te ‵gana Saina. Ne maua fua ne māua se tusi akoga o te ‵gana Saina mo se faiakoga telā e se iloa o faipati faka-Palagi, kae ne tauloto eiloa māua.

Mai tua malie o te mā okoifoga ki Taiwan, ne ‵tofi a Harvey mo fai te tavini o te ofisa lagolago. E foliki fua te ofisa lagolago, tela la, ne mafai o fai ne Harvey ana galuega i te ofisa kae ga‵lue fakatasi mo taina Amis i se tolu vaiaso i te masina. Ne tavini foki a ia pelā me se ovasia faimalaga i nisi taimi, kae fai ne ia a lāuga i taimi o fono. Ne mafai fua o fai ne Harvey ana lāuga i te ‵gana Tiapani kae malamalama i ei a taina Amis. Kae ne talia fua ne te malo ke fai a fakatasiga fakalotu i te ‵gana Saina fua. Tela la, ne fai ne Harvey, telā koi tauloto fua ki te ‵gana, ana lāuga i te ‵gana Saina kae ‵fuli ne se taina ki te ‵gana Amis.

I te taimi tenā a Taiwan e pule ne sotia, tela la, e ‵tau o isi se taliaga e maua ne taina ke mafai o fai se fono. E se faigofie ke maua se taliaga, kae tuai sāle a pulisimani o tuku mai se taliaga. Kafai e seki ai se taliaga ke maua mai i pulisimani i te vaiaso e fai ei se fono, e sagasaga loa a Harvey i te ofisa pulisimani ke oko ki te taimi e maua ei se taliaga. Ne aoga loa te togafiti tenā me ne masani o ‵ma a pulisimani māfai e isi se palagi e sagasaga i te ofisa pulisimani.

I vaiaso e ‵nofo ei māua mo taina, e masani o olo māua o sa‵sale mō se itula e tasi io me silia atu, e ‵kake i mauga kae sa‵sale ki suā feitu o te vaitafe. E masaua ne au te mauga muamua ke kake au i ei. I te otiga ne ‵kai fakavave i te tafataeao, ne olo matou i te 5:30 i se pasi ki se fakai tai ‵mao, sa‵sale atu ki te suā feitu o se vaitafe, kae ‵kake ki luga i te mauga. E ‵sifo ‵ki te mauga telā a vae o te taina i oku mua e levolo tasi fua mo oku mata.

I te tafataeao tenā, ne ga‵lue a Harvey mo nisi taina i te galuega talai, kae ne galue tokotasi au i se tamā fakai telā a tino i ei e fai‵pati ki te ‵gana Tiapani. Kāti ko te tasi i te tutonu kae lagona ne au te vāivāi i toku foitino me seki kai eiloa au mō se fia itula. I te taimi ne fetaui ei au mo Harvey, ko seai foki ne taina, ko oti katoa ne olo. Ne fesuiaki ne Harvey a nisi mekesini mo fuamoa ‵mata e tolu. Ne faka‵pu ne ia a feitu e lua o te fuamoa kae fakaasi mai ne ia te auala ke kai ei. E tiga loa e se gali kae ne kai eiloa ne au te fuamoa e tasi. Kae ko oi ne kai ne ia te tolu o fuamoa? Ko au, me e se mafai ne Harvey o sau ne ia au ki lalo i te mauga māfai ko matapō au i te fiakai.

Ne fepaki au mo se tulaga faigata i te taimi ne fai ei te fono o te seketi e tasi. Ne ‵nofo maua i se  fale o te taina telā e tu fua i tafa o te Fale Tapuaki. Ona ko te tāua ki tino Amis a te koukou, ne fakatoka ne te avaga a te ovasia o te seketi ke kou‵kou a māua. Ne fakalavelave ‵ki a Harvey, kae ne fai mai ke mua au o koukou. E tolu a mea e fakaaoga mō kou‵kou: se paketi vai ‵moko, se paketi vai ‵vela, mo se pesini masa. Ne poi au me ne tuku ne te avaga a te ovasia o te seketi a paketi konā i tua i te fale i te feitu telā e saga tonu ki te Fale Tapuaki kae ga‵lue i ei a taina o fakatoka a mea mō te fono. Ne fakamolemole au ke mai se mea mo ‵pono. Ne aumai ne ia se palasitiki telā e mafai o lavea ki te suā feitu! Ne taumafai au o fano o koukou i te feitu ki tua o te fale, kae ‵fonu loa te feitu tenā i manu ko geese kolā e mafai o ‵soka ne latou au. Ne mafaufau ifo au: ‘E seai se taina e fia saga mai ki a au e koukou me ko tō fakalave‵lave. Kae kafai e se koukou au ka se fia‵fia latou. Koukou atu fua!’ Tenā ne koukou ei au.

Ne lavea ne Harvey me e faigata o gasolo ki mua a taina Amis me tokouke latou e se iloa o fai‵tau kae e seai ne tusi i te lotou ‵gana. Ona ko te ‵gana Amis ne fatoa kamata o fai pelā me se ‵gana tusitusi mai te fakaaogaga o mataimanu Loma, se mea aoga eiloa ke akoako a taina ke iloa o fai‵tau i te lotou ‵gana totino. Se galuega lasi ‵ki tenei, kae fakamuli ne mafai ne taina o fai olotou sukesukega i te lotou ‵gana totino. Ne mafai o ‵lomi a tusi i te ‵gana Amis i te 1960 tupu, kae i te 1968, ne ‵lomi ei Te Faleleoleo Maluga i te ‵gana Amis.

Kae ko te malo ne fakatapu ne ia a tusi kolā e se ‵lomi i te ‵gana Saina. Tela la, ne ‵lomi te Faleleoleo Maluga a tino Amis i auala kese‵kese. E pelā me se fakaakoakoga, ne masani o ‵lomi ne matou Te Faleleoleo Maluga i ‵gana e lua, telā ko te ‵gana Mandarin-Amis. Kafai e isi ne fesili a se tino, e mafai o lavea mai ne latou me akoako ne matou a tino i te ‵gana Saina. Talu mai te taimi tenā, ne ‵lomi faeloa ne te fakapotopotoga a Ieova a tusi e uke i te ‵gana Amis ke fesoasoani ki tino pele konei ke tauloto ki muna‵tonu mai te Tusi Tapu.—Galu. 10:34, 35.

I te 1960 tupu ke oko ki te 1970 tupu, e tokouke a taina Amis e se ola e ‵tusa mo tulaga o te Atua. Ona ko te sē malamalama faka‵lei latou i  fakatakitakiga i te Tusi Tapu, nisi ne ola i se olaga fai amioga ma‵sei, e ko‵nā, io me ‵pusi kae fakaaoga betel nut. Ne asi a Harvey ki fakapotopotoga e uke kae taumafai o fesoasoani ki taina ke malamalama i te kilokiloga a Ieova ki mea konei. I se malaga e tasi, ne tupu ei te mea telā ne sae mai i te kamataga.

Ne loto fia‵fia a taina loto mau‵lalo o fai a ‵fuliga, kae se mea fakafanoanoa me ne seki fai penā a nisi taina e tokouke, tenā ne pakū ifo ei te aofaki o tino talai i Taiwan mai te 2,450 ki te 900 tupu i loto i se vaitaimi o tausaga e 20. E fakavāivāi ‵ki te mea tenei. Kae e iloa ne māua me e se mafai o fakamanuia ne Ieova se fakapotopotoga telā e fai i ei a amioga sē ‵ma. (2 Koli. 7:1) Fakamuli loa, ne ‵ma te fakapotopotoga mai amioga sē ‵ma, kae mai te fakamanuiaga a Ieova, ko siliga atu nei i te toko 11,000 tino talai i Taiwan.

Mai te 1980 tupu o vau, ne lavea atu te gasolo ki mua o te tulaga faka-te-agaga o te fakapotopotoga Amis, kae ko mafai o uke a taimi o Harvey mo tino Saina. Ne fia‵fia ‵ki a ia me ne mafai o fesoasoani a ia ki avaga a nisi tuagane ke fai pelā me ne tino tali‵tonu. E masaua ne au tena fiafia i te taimi ne ‵talo ei se tagata e tokotasi i a latou ki a Ieova mō te taimi muamua. Ne fiafia malosi foki au ke akoako a tino loto ‵lei e tokouke ke fakapili‵pili ki a Ieova. Se mea fakafiafia foki ki a au ke tavini fakatasi au mo te tama tagata mo te tama fafine a se akoga faka-te-Tusi Tapu a aku, i te ofisa lagolago i Taiwan.

Nei la, ko seai saku avaga. Ko tai katoa te 59 tausaga o te mā fakaipoipoga kae mate taku avaga pele ko Harvey i a Ianuali 1, 2010, i te masaki ko te kenisa. Toeitiiti ko kātoa te onosefulu tausaga o ia i te taviniga tumau! E misi malosi ne au a ia. Kae e fiafia eiloa au me ne ‵lago malosi au ki a ia i te taimi koi kamata ei te galuega i fenua ‵gali e lua! Ne tauloto māua ke fai‵pati—kae pelā mo Harvey ne tusitusi a ia—ki ‵gana faiga‵ta e lua i Asia.

I nai tausaga ki tua ifo, ne fakaiku aka ne te Potukau Pule me ona ko toku tulaga matua, se mea ‵lei ke toe foki au ki Ausetalia. Te manatu muamua ne oko ifo ki a au, ‘Au e se manako o tiaki a Taiwan.’ Kae ne akoako au ne Harvey ke mo a ma fai atu ikai ki te fakapotopotoga a Ieova, tenā ne fano ei au. Fakamuli ifo, ne lavea ne au me se fakaikuga poto eiloa tenā.

Nei la, e galue au i te ofisa lagolago i Australasia i loto i te vaiaso, kae i te fakaotiga o te vaiaso e ga‵lue au mo te fakapotopotoga. E fiafia au o fakaaoga taku ‵gana Tiapani mo taku ‵gana Saina māfai ko ‵mai a tino o matamata i te Peteli. Kae nofo fakatalitali eiloa au ki te toetuga, me iloa ne au me ka masaua eiloa ne Ieova a Harvey telā ne tauloto ke mo a ma fai atu ikai ki a Ia.—Ioa. 5:28, 29.