Харви семьяязы ньыль пиос пӧлысь быдӟымез вал. Солэн семьяез зэмлыкез тодӥз Мидленд-Джанкшен карын (Шундыпуксёнпал Австралия) 1930-тӥ аръёсы, куке та шаерын тросэз туж куанер улӥзы. Иеговаез яратэменыз, Харви 14 арес дыръяз пылатӥськиз. Ӝоген со валаз, кенешын кыӵе ке но уж сёто ке, соглаш кариськоно шуыса. Одӥг агай Харвиез Возьмаськон Башняез эскерон дыръя статьяез лыдӟыны куриз. Нош Харви соглаш ӧз кариськы, малы ке шуоно малпаз, уз быгаты шуыса. Нош агай солы шуиз: «Куке кин ке но Иеговалэн организацияз тыныд кыӵе ке уж сётэ, со оске, тынад ваньмыз пӧрмоз шуыса!» (2 Кор. 3:5).

Мон зэмлыкез тодӥ Англиын анаеным но бадӟым сузэреным ӵош. Нырысь атае пумит вал, ми Иеговалы мед ужаломы-тыршомы шуыса, нош аръёс ортчыса, со но зэмлыкен тодматскиз. Со пумит вал ке но, мон пылатӥськи, куке мыным дас арес но ӧй вал на. Мынам потэ вал пионер, нош собере миссионер луэме. Но мон валай, быдэ  вуытозям, атае сое лэсьтыны мыным уз лэзьы, дыр, шуыса. Но 21 арес луытозям, мынам возьмаме уг поты вал. Соин ик 16 арес дыръям, куке монэ атае лэзиз, мон кошки Австралие, кытчы бадӟым сузэре кошкемын вал ини. Отын, куке мыным 18 арес тырмиз, мон пионер луыса ужаны-тыршыны кутски!

Австралиын мон тодматски Харвиен, кудӥзлэн, мынам кадь ик, туж потэ вал миссионер луэмез. 1951-тӥ арын ми кузпалъяськимы. Кык ар ӵоже ми пионеръёс луыса ужамы-тыршимы. Нош собере милемлы ӵектӥзы Шундыпуксёнпал Австралиын мыныса-ветлыса ужан-тыршонэ пыриськыны. Милям ёросмы туж бадӟым вал, соин ик ӵемысь милемлы пӧсь куазен кыдёке ветлоно луиз.

1954-тӥ арын милемыз Галаад школалэн 25-тӥ классаз дышетскыны ӧтизы. Табере кема витем малпанмы быдэсмиз! Нью-Йорке лыктыса, ми вань дырмес но кужыммес сётӥмы Библиез эскеронлы. Галаад школаын ми дышетӥмы испан кылэз. Но Харвилы секыт вал испан сямен «р» букваез вераны.

Дышетсконмы дыръя соослы, кинъёс Япониын ужаны-тыршыны мылкыд каризы, ӵектӥзы япон кылэз дышетыны. Ми малпамы, умойгес луоз шуыса, Иеговалэн организациез ачиз ужпум кутӥз ке, кытчы милемыз ыстыны, но номыр ӧм вералэ. Та сярысь тодыса, Альберт Шрёдер, Галаад школаысь одӥгез дышетӥсь, милемлы вераз: «Та сярысь умойгес малпаське на». Но ми соку но ӧм дӥсьтэ. Соку Шрёдер агай милемлы вераз: «Ми мукет дышетӥсьёсын тӥледыз пыртӥмы ини соос пӧлы, кинъёс япон кылэз дышетозы. Адӟом, быгатоды-а та кылэз дышетыны». Испан кылэн ӵошатыса, япон кылэз Харвилы дышетыны капчигес вал.

1955-тӥ арын, куке ми Японие вуимы, та шаерын 500 ивортӥсьёс гинэ ужазы-тыршизы. Харвилы 26 арес вал, нош мыным — 24. Милемыз ыстӥзы Кобе каре, кытын ми ньыль ар ӵоже ужамы-тыршимы. Собере ми нош ик шумпотыса мыныса-ветлыса ужаны-тыршыны кутскимы. Милям ёросмы Нагоя кар вӧзын интыяськемын вал. Отын милемлы ваньмыз кельшиз: вын-агайёс но, сиён но, инкуазь но. Но ӝоген милемлы мукет уж сётӥзы. Но ми нош ик соглаш кариськимы быдэстыны сое, мае карыны милемыз Иегова куриз.

Ми куинь ар ӵоже мыныса-ветлыса ужамы-тыршимы. Собере япон филиал юаз милесьтым,  потэ-а милям Тайване мынэммы, со интыын улӥсь ами калыклы тодытон понна. Ами кылын вераськись куд-ог вын-агайёс зэмос йыбырттонлэсь палэнскизы. Та югдурез тупатон понна, филиаллы кулэ вал агай, кудӥз япон кылын умой вераське a. Милемлы туж кельшиз Япониын ужаны-тыршыны, соин ик мукет интые кошкыны секыт вал. Но Харви тодаз возиз, котьку соглаш кариськоно шуыса, куке тыныд кыӵе ке уж сёто. Соин ик ми соглаш кариськимы.

1962-тӥ арын ми вуимы Тайване. Соку отын 2 271 ивортӥсь ужаз-тыршиз (тросэз ами калыкысь). Нырысь милемлы китай кылэз дышетоно луиз. Милям одӥг гинэ учебникмы вал, нош дышетӥсьмы англи кылын ӧз вераськы. Озьы ке но ми быгатӥмы китай кылэз дышетыны.

Тайване вуэммы бере ӝоген Харви филиалын ужаны-тыршыны кутскиз. Филиал пичи вал, соин ик Харви Вефильысь вань ужзэ быдэсъяса вуэ вал но кылем дырзэ (толэзяз куддыръя куинь арня ӵоже) ами кылын вераськись вын-агайёсын тодытэ вал. Озьы ик со улосэз чаклась луыса ужаз-тыршиз но конгрессъёсын речьёс вералляз. Харви быгатысал речьёс вераны япон кылын, вын-агайёс но сое валасалзы. Но кивалтӥсьёс Инмарлы йыбыртъянэн герӟаськем ужрадъёсты китай кылын гинэ ортчытъяны лэзё вал. Соин ик Харви речьёс вералляз китай кылын, кудзэ соку со дышетэ гинэ вал. Нош кыӵе ке агай солэсь верамзэ ами кылэ берыктылӥз.

Тайваньын бугыръяськонъёс мынӥзы. Соин ик, конгрессэз ортчытон понна, кивалтӥсьёслэсь юаськоно вал. Со капчи ӧй вал. Озьы ик полиция ӵем дыръя ӧз дырты вераны, кыӵе соос ужпум кутӥзы. Конгрессэз ортчытон арнялэн кутсконаз тодмо ӧй вал ке, кыӵе ужпум кутӥзы кивалтӥсьёс, Харви мынэ вал полицие но, кулэ луись бумага сётытозязы, отын пуке вал. Кивалтӥсьёслы умой ӧз поты, соос дорын мукет шаерысь лыктэм адями пуке шуыса. Соин ик Харвилы кулэ луись бумага ӝоггес сётъязы.

Со арняосы, куке ми вын-агайёсын тодытӥмы, милемлы быдэс час ӵоже, нош куддыръя кемагес но, гурезьёстӥ но шуръёс вамен мыноно вал. Мон тодӥсько на, кызьы нырысетӥзэ гурезьёсы мынӥ. Ӵукна ми Харвиен ӝог гинэ сиськимы но, 5:30 часын пуксимы ини автобусэ, кудӥз милемыз одӥгаз палэнысь гуртэ вуттӥз. Собере ми паськыт шур вамен потӥмы но гурезе тубыны кутскимы. Со сокем меӵ вал, мон азьын мынӥсь агайлэн пыдтышъёсыз мынам син вадьсам ик вал.

Со ӵукнае Харви тодытӥз со интыысь вын-агайёсын, нош мон огнам тодытӥ гуртын, кудаз япон кылын вераськизы. Нуназе бере одӥг час котырын, сиеме потыса, мон йырсазьме ик ыштӥсько вал ини, малы ке шуоно кӧня ке часъёс ӵоже ӧй сиськы. Кӧня ке дыр ортчыса, Харви куинь ыль курегпуз вайиз, кудъёссэ солы журналъёс понна сётӥзы. Со возьматӥз мыным, кызьы соосты сиёно: курегпузэз кык палтӥз но пасьяно, собере сюпсьыса сиёно. Со туж ик сиёно кадь ӧй вал ке но, мукет сиёнмы милям ӧй вал. Одӥгзэ мон сии. Кыкетӥзэ сииз Харви. Нош мар ми каримы куинетӥ курегпузэн? Сое но мон сии, малы ке шуоно, сиеме потыса, йырсазьме ыштысал  ке, Харви монэ гурезь йылысен васькытыны ӧй быгатысал.

Одӥг пол монэн тунсыко учыр луиз. Ми Харвиен мынӥмы ёросысь конгрессэ но дугдӥмы со интыын улӥсь агай доры, кудӥз Эксэйлык юрт вӧзын ик улӥз. Ами калык трос саклыксэ висъя мугорез чылкыт возёнлы. Соин ик ёросэз чакласьлэн кышноез милемлы «ванна» дасяз. Харвилэн ужез туж трос вал, соин со ӵектӥз нырысь мыным мисьтӥськыны. Мон туж пайми, куке тодӥ, тайвань сямен «ванна» — со кезьыт вуэн ведра, пӧсь вуэн ведра но буш таз. Но мон эшшо но пайми, куке адӟи, ваньмыз та урам шорын, Эксэйлык юрт вадьсын, сылӥз шуыса, кытын соку вын-агайёс конгресслы дасяськизы. Мукетъёсыз монэ медаз адӟе шуыса, ёросэз чакласьлэн кышноезлэсь мон кыӵе ке басма кури, нош со мыным пыр адӟиськись плёнка сётӥз. Корка сьӧры но ватскыны луэ вал, но отын, кенер сьӧрын, вал ӟазегъёс, кудъёсыз чепыльтыны турттӥзы котькинэ, кин матазы лыктылӥз. Соку мон малпай: «Вын-агайёслэн ужзы трос, соос мон шоры уз учке. Нош ӧй мисьтӥськы ке, коркалэн кузёосызлэсь кӧтсэс ӝож каро». Соин ик, номыр шоры учкытэк, мисьтӥськыны малпай!

Харви валаз, ами калыкысь вын-агайёслы осконзэс юнматыны секыт, малы ке шуоно соос пӧлысь тросэз лыдӟиськыны но гожъяськыны ӧз быгатэ но та кылын Библия вылэ пыкиськыса гожтэм публикациос ӧй вал. 1963-тӥ арын ами кылын гожъяськон кылдӥз, латин алфавитэз уже кутыса. Соин ик вын-агайёс дышетыны малпазы со интыысь Адӟись-Ивортӥсьёсты лыдӟиськыны. Со капчи ӧй вал. Но солы луыса ами калыкысь вын-агайёс асьсэос быгатӥзы Библиез эскерыны. 1966-тӥ арын нырысетӥзэ потӥзы ами кылын Библия вылэ пыкиськыса гожтэм публикациос. Нош 1968-тӥ арын печатланы кутскизы «Возьмаськон башняез».

Кивалтӥсьёс публикациосты поттыны лэзизы китай кылын гинэ. Соин ик «Возьмаськон башняез» пӧртэм амалъёсын печатлано луиз. Кылсярысь, кыӵе ке дыре одӥг журналын ми кык кылэз кутӥмы — китай но ами. Со журналэз кин ке но адӟысал ке, малпасал, та журналэз кутыса, ми со интыысь калыкез китай кыллы дышетӥськомы  шуыса. Со дырысен Иеговалэн организациезлэн тыршемезлы луыса ами кылын поттэмын трос публикациос, кудъёсыз Библиысь зэмлыкен тодматскыны юртто (Ап. уж. 10:34, 35).

1960—70-тӥ аръёсы ами калыкысь тросэз вын-агайёс Иеговалэн курон-косонъёсызъя ӧз улэ. Соос Библиысь возетъёсты пумозяз ӧз валалэ бере, малпазы, номыр уродэз уз луы шуыса, азыса-калгыса, трос вина юыса, бетель сыскыса но тамак кыскыса улӥзы ке. Харви пӧртэм кенешъёсы ветлылӥз но вын-агайёслы валаны юрттӥз, кызьы та ужъёс шоры учке Иегова. Одӥгаз кенеше мыныкумы, ми сюримы учыре, кудӥз сярысь мон кутсконаз верай вал.

Зӥбыт-востэм вын-агайёс воштӥськыны дась вал. Нош жаляса верано, тросэзлэн воштӥськемзы ӧз поты. 20 ар куспын Тайваньын ивортӥсьёс ӧжытгес луизы: нырысь соос 2 450 вал, нош собере 900 мында кылизы. Со понна ми туж ӝожомыса улӥмы. Но ми валамы, ужась-тыршисьёс кырсь ужъёсын выро ке, Иегова аслэсьтыз организацизэ бакель уз кары шуыса (2 Кор. 7:1). Инмар юрттӥз кенешъёсты чылкытатыны. Али Тайваньын 11 000-лэсь тросгес ивортӥсьёс ужало-тыршо.

1980-тӥ аръёсы ами кенешъёсысь вын-агайёслэн осконзы юнмаз но, Харви быгатӥз тросгес саклыксэ висъяны китай кенешъёслы. Солэн юрттэменыз, куд-ог сузэръёсмылэн картъёссы Адӟись-Ивортӥсьёс луизы. Харви талы туж шумпотӥз. Тодӥсько на шумпотыса верамзэ, кызьы со пиосмуртъёс пӧлысь одӥгез нырысетӥзэ Иеговалы вӧсяськиз. Мон но шумпотӥсько, трос кышномуртъёслы Инмарен эшъяськыны юрттӥ шуыса. Мынам луонлыке вал со кышномуртъёс пӧлысь одӥгезлэн пиеныз но нылыныз Тайваньысь филиалын ужаны-тыршыны.

Али Харви монэн ӧвӧл ини. Ми ог 59 ар ӵоже ӵош улӥмы, но 2010-тӥ арын 1-тӥ толшоре дуно кузпалы, ракен висьыса, кулӥз. Со ог 60 ар ӵоже вань дырзэ сётыса ужаз-тыршиз! Сое ыштэменым, мынам али но сюлмы вӧсь луэ на. Но мон шумпотӥсько, соин ӵош вал шуыса, куке Япониын но Тайваньын Эксэйлыклэн ужез вӧлмыны кутскиз! Ми вераськыны дышимы, нош Харви гожъяськыны но, кык секыт кылъёсын — япон но китай.

Кӧня ке аръёс ортчыса, Кивалтӥсь кенеш ужпум кутӥз: бадӟым арлыды сэрен умойгес луоз, мон Австралие берытски ке. Нырысь мон малпай: «Уг, Тайваньысь мон нокытчы уг кошкы!» Но Харви дышетӥз монэ котьку соглаш кариськыны соин, мае ӵектэ Иеговалэн организациез. Соин ик мон соглаш луи. Дыр ортчыса, мон валай: макем со визьмо ужпум вал.

Али мон австралазийской филиалын ужасько-тыршисько. Шутэтскон нуналъёсы та интыысь одӥгеныз кенешен тодытон уже пыриськисько. Мон шумпотӥсько, Вефильын япон но китай кылъёсын экскурсиос ортчытъяны быгатӥсько шуыса. Мынэсьтым сюлэмме шунтэ Инмарлэн кылсётонэз кулэмъёсты улӟытыны! Мон тодӥсько: Иегова тодаз возе Харвиез, кудӥз солэн ӵектонъёсыныз котьку соглаш кариське вал (Иоанн 5:28, 29).