Harvey aari mwaana opacerya oyariwa. Emusi awe yiixuntte ekeekhai oMidland Junction, wAustrália. Iyaakha sa 1930, atthu a elapo ele khiyaareere ohaawa. Harvey aahipacerya omphenta Yehova ni aahipatisiwa orina ene iyaakha 14. Moohipisa owo aahiixutta ohikhootta miritti aavahiwa awe mmulokoni. Masi okathi aari awe mmiravo, owo aahikhootta osoma erevista Owehaweha mmuthukumanoni uupuwelaka wira khaaphwanelela. Masi munna mmosa aahimukhaliherya Harvey oturuka muupuwelo awe oriki: “Akhala wira mutthu mmosa mmutthenkesoni mwa Yehova onnoovekelani opaka etthu, owo oroosuwela wira munoowerya!”—2 aKor. 3:5.

Miyo kiixuntte ekeekhai wInglaterra ni maama aka vamosa ni muulupale aka. Wanipacerya paapa aka khaaphavela Anamoona a Yehova, masi muhoolo mwaya aahipatisiwa khukhala Namoona a Yehova. Nnaamwi paapa aka ahaaphavela, miyo kaahipatisiwa kirina ene iyaakha 9. Nave yoolukama aka yaari okhala pioneera muhoolo mwaya okhala misionaaria. Mooriipiha murima paapa aka aahikikhoottiherya okhala pioneera, maana aaphavela wira kikhale  pioneera kaphiyeriha iyaakha 21. Masi miyo nkaawerya olipelela okathi munceene. Kirina ene iyaakha 16, paapa aka aahikeemererya wira kakhaleke wAustrália ni muulupale aka yoowo aathaamenle elapo ele. Nto kaahipacerya orumeela ntoko pioneera kirina ene iyaakha 18.

Kiri ene wAustrália, kaahimusuwela Harvey. Hiyo naamakela ovaanela voohimya sa omurumeela Yehova nri ene mamisionaario. Nto naahithelana mwakha wa 1951. Nuumala oviriha iyaakha piili nrumeelaka ntoko mapioneero, naahilattuliwa wira narumeeleke osirkwiitu. Esirkwiitu ahu yaari yuulupale, mpantta onikela epheyo wAustrália, nto naaneetta mikwaha soorakama nrowaka mapuro oorakamela opooma.

Mwakha wa 1954, naahilattuliwa wiirela mpantta eturma 25 ya oGileadi. Vano yoolukama ahu ya okhala mamisionaario yaahala vakhaani wiiraneya! Naaronwe oNova York ni ekalawa, nto naahipacerya omusoma Biibiliya vanceene oxikola ya oGileadi. Nave exikola ya oGileadi yaahela muhina osoma espanyola, nto eyo yaahimuxankiha vanceene Harvey maana khaasuwela oromola oratteene eleetera r.

Nlelo nisomaka, maprusoore ahu yaahinileela wira ale yaaphavela orumeela oJapão yaahaana wiilepiha wira asomeke nttaava na oJapão. Masi hiyo naahihiya wira mutthenkeso onithaanlele mapuro naatthuneya ahu orumeela. Moohipisa prusoore iitthaniwa Albert Schroeder aahisuwela wira khinailepinhe. Nto owo aahinleela wira: “Muupuwele saana mwaha owo”. Okhala wira naanoovelela munna Schroeder aahinleela wira: “Maprusoore makina ni miyo nihoolepihasani. Nwehe mwaatthunaka owerya wiixutta nttaava na oJapão”. Harvey vaanimukhweela olavula nttaava na oJapão ovikana Espanyola.

Naaphiyale oJapão mwakha wa 1955, okathi ole yaakhanle anamalaleerya 500 paahi elapo yotheene ya oJapão. Harvey aarina iyaakha 26, miyo kaarina iyaakha 24. Hiyo naathanleliwe epooma ya oKobe, weiwo naarumenle ahu iyaakha xexe. Nuumala-vo, naahitthikela orumeela osirkwiitu. Nto naarumeela waattamela epooma ya oNagoya. Yaaninsivela vanceene makhalelo a yoothanleliwa ahu, itthu ntoko anna, yoolya ni makhalelo a elapo ele. Moohipisa naahikhalana eparakha ekina ya ohikhootta ovara muteko wa Yehova.

Nuuvira iyaakha tthaaru nrumeelaka osirkwiitu, efiliyaali ya oJapão yaahinivekela akhala wira naamweemererya orowa orumeela oTaiwan, naalaleeryaka  atthu a nloko Amis. Anna akina a nloko Amis yaahipakeya anammwareya, nto efiliyaali ya oTaiwan yaanimphavela munna aasuwela olavula oratteene eJaponês wira aakhaliherye anna awo ohiya okhala anammwareya. * Waaninsivela vanceene muteko ahu oJapão, hiyo khinaaphavela ohiya. Okhala wira Harvey aahiixutta oohikhootta muteko wa Yehova, hiyo naaheemererya khurowa.

Naaphiyale oTaiwan Novembro a 1962. Okathi ole oTaiwan yaari anamalaleerya 2.271, anamunceene a yaawo yaari a nloko Amis. Masi wanipacerya naahaana wiixutta eChinês. Hiyo naarina eliivuru emosa paahi ya eChinês, nave muthiyana aanisomiha khaasuwela olavula Enkelexi, masi hata vari siiso naahiixutta.

Moohipisa nuumala ophiya oTaiwan, Harvey aahithanliwa okhala muhooleli a efiliyaali. Okhala wira efiliyaali yaari yaamukhaani, Harvey aaniwerya ovara miteko sawe oskritoorio, ni ovara vamosa ni anna a nloko Amis isumana tthaaru vamweerini. Nave ikwaha sikina Harvey aanikhala mutokweene a edistritu, eyo yaahela muhina olavula myaha okathi wa asembeleya. Ekeekhai wira Harvey anwerya olavula myaha ni nttaava na eJaponês, ni anna nloko Amis yaamwiiwa. Masi guvernu aahimya wira mithukumano sa etiini, saahaana opakiwa paahi ni eChinês. Nnaamwi aahasuwela saana, Harvey aanilavula myaha ni eChinês nto anna akina anataphulela para nloko Amis.

Elapo ya oTaiwan naahipakiwa nlamulo, nto wira anna ampake asembeleya yaahaana weemereriwa ni guvernu. Khivaakhweya ophwanya elisensa wira nimpake asembeleya, nto ikwaha sikina mapoliisia yaanipisa opaka elisensa eyo. Akhala wira mapoliisia yaampisa opaka elisensa eyo mpakha ophiya esumana ya asembeleya, Harvey aanikilathi opoliisia iwo mpakha awo opaka elisensa eyo. Mapoliisia yaanuuliwa muru onweha mutthu a elapo ekina okilaathalene opoliisia iwoora sinceene, nto eyo yaanikhaliherya.

Isumana naakhala ahu hoothe ni anna, okhala wene naaneetta ewoora emosa wala ovikana, niwelaka myaako ni olapuwa miro. Mpakha-va kinnuupuwela mwaako kipacenrye aka owela. Nuumala olya moowakuveya matabixu, naahivenya 5:30 ni ekaaro, nrowaka muttetthe woorakamela. Muttetthe ole naahilapuwa miro nave naahiwela myaako. Muhoolo mwaya, kaahinweha munna owelaka mwaako, nave metto sawe saaluluwannye maitho aka.

Voosiisu wa nihiku nne, Harvey alaleerya ni anna akina a muttetthe ole, vano miyo kaalaleerya mekhaka atthu yaalavula eJaponês muttetthe ole. Nuumala oruma 13 oora, miyo kaahikhulumuwa vanceene, okhala wira saahivira iwoora sinceene kihilyiiye etthu. Okathi kaatthinke aka kaahimphwanya Harvey ori ene mekhawe. Nto kaamphwanye Harvey oturunke ene irevista ni mooce mararu ohaapeiwa a mwalyakhu. Nuumala-vo aahikiixuttiha moota woothorola vakhaani khiyanuula. Nnaamwi yaahakisivela vanceene, kaaheererya nimosa. Nto tani aarowa ohalana nooce na neeraru? Harvey aahikihiyerya okhala wira aahoona wira khaarowa owerya okiteexa, vaakhanle wira kammora vamwaako mwaha woovoliwa etala.

Asembeleya mmosa a esirkwiitu, waahikhumelela muxankiho mmosa wahaatonko okikhumelela. Hiyo naamaanke empa ya munna waattamela Empa ya Omwene. Okhala wira atthu a nloko na Amis annivaha efaita yinceene orapa, nto mwaara a mutokweene a esirkwiitu aahireherya maasi wira narape. Okhala wira Harvey khaareere waatteliwa miteko, aahikivekela wira kapaceryeke orapa. Opuro woorapa saahikhala ipasia tthaaru: Emosa ya maasi ooviha, ekina ya maasi ooriirya ni ekina yoohikhala etthu. Etthu yaakitikininhe, okhala wira mwaara a mutokweene a esirkwitu, aahipweha ipasia iyo ota anna yaakhaliherya omulokiherya asembeleya yaawerya aya oweha. Nuumala-vo kaahinvekela wira okivahe ekortina. Nto owo aahikiruhela plastiku oowooneela! Miyo kaahuupuwela orowa ophiryo, okhala wira waahikhala opuro waatekeleeliwe vaaweryaneya aya wiipitha. Nto kaahupuwela so: ‘Anna khaareere waatteliwa miteko khanrowa okiweha kirapaka. Vakhanle wira nkaarampe anna ale yaamunyoonyiheya. Nto kaahaana opaka etthu! Kaahirapa’.

Harvey aahoona wira anna a nloko Amis khiyaakela vahoolo mwa omunepani okhala wira khiyaarina iliivuru sa nttaava naya ni khiyaawerya osoma. Okhala wira nttaava na nloko Amis naahipacerya olempwa sirumeeliwaka ikarateri Romano, vaari vooloka owiixuttiha anna moota woosoma nttaava naya. Owo waari muteko munceene, masi nuuvira okathi anna ni arokora yaahipacerya osoma mekhaya. Iyaakha sa 1960 saahipacerya opakiwa iliivuru sa nttaava na nloko Amis, nto mwaakha wa 1968, erevista Owehaweha yaahikumiheriwa ni nttaava na nloko Amis.

Nto muhoolo mwaya, guvernu aahipacerya okhoottiha iliivuru sihikhanle sa nttaava na eChinês. Wira sihikhumelele mixankiho, erevista Owehaweha ya nttaava na nloko Amis, yaahikaiwa mwa inamuna soovirikana. Mwa ntakiheryo, okathi mukina hiyo naanirumela erevista Owehaweha elempwale nttaava na eChinês ni nttaava na nloko Amis. Akhala wira ookhala aanikoha, vaakhala ntoko wira irevista sahu, naixuttiha nttaava na eChinês. Nto okhuma okathi ole mutthenkeso wa Yehova waanikumiherya iliivuru  sinceene sa nttaava na nloko Amis, wira saakhaliherye atthu anceene a muttetthe ole wiixutta ikeekhai sa mBiibiliyani.—Mit. 10:34, 35.

Iyaakha sa 1960 ni 1970, anna anceene a nloko Amis khiyaiwelela oratteene malamulo a Muluku. Okhala wira khiyaiwexexa oratteene malakiheryo a mBiibiliyani, anna akina yaanirupihana moohiloka, ohapaliwa, ompaha soona ni olya mirette sikina soohapala. Harvey aanixukurya miloko sinceene aakhaliheryaka anna ni arokora, wiiwexexa moonelo wa Yehova voohimya sa myaha iyo. Okathi omosa naaxukurya ahu, tiyaakhumelenle aya yowiiraneya kilavunle aka wanipacerya.

Anna akina oowiyeeviha yaaheemererya opaka marukunuxo, masi mooriipiha murima akina nnaari, nto mwa iyaakha 20 anamalaleerya yaahivukuwa okhuma 2.450 mpakha 900. Tthiri eyo yaari yookhulumula vanceene. Masi hiyo naahisuwela wira Yehova khaarowa oreeliha mutthenkeso woohiloka. (2 aKor. 7:1) Nuuvira okathi, itthu soohiloka saahikumihiwa mmulokoni. Nto nireelihiwaka ni Yehova olelo-va oTaiwan, akhala anamalaleerya anivikana 11.000.

Okhuma iyaakha sa 1980, vannooneya wira mukhalelo wa omunepani wa anna a nloko Amis waahiloka, nto Harvey aaniviriha iwoora sinceene ni anna anlavula eChinês. Tthiri Harvey aanisiveliwa waakhaliherya axiiyaya arokora akina a mmulokoni okhala Anamoona a Yehova. Kinnupuwela okathi omosa aakilenle awe wira aahihakalala okhala wira mulopwana mmosa aahihimya wira aahinvekela Yehova ekwaha yoopacerya mookumini mwawe. Ni miyo-tho kinnihakalala osuwela wira kihaakhaliherya atthu anceene omusuwela ni okhalana waataana wooloka ni Yehova. Kaahihakalala ovarana vamosa eBetheli ya oTaiwan ni anamwane a atthu akina kaasomihaka Biibiliya khalai.

Olelo-va kinkhala mekhaka. Nuuvira iyaakha 59 nithelane ene, iyaka kamphentexaka Harvey ohookhwa 1 a Janero a 2010 mwaha wa kanser. Harvey aahanle oviriha iyaakha 60 ovaraka muteko wa Muluku wa okathi wotheene. Kinnihakalala wuupuwela wira kaahimukhaliherya mahiku oopacerya orumeela ilapo piili sookuxa murima! Nahiixutta olavula ni Harvey ahiixutta-tho olepa mattaava manli oovirikana a wÁsia.

Iyaakha vakhaani muhoolo mwaya, Nikhuuru Noolamulela nahoona oreerela wira okhala wira kihuuluvala kaahaana otthikela wAustrália. Nto wanipacerya kuupuwenle so: ‘Nkinphavela okhuma oTaiwan’. Masi Harvey aahikiixuttiha ohikhootta ele ninvekeliwa ahu ni mutthenkeso wa Yehova, nto kaahithaamela wAustrália. Nuuvira okathi kihoona wira vaari vooloka othaama.

Olelo-va kinrumeela eFiliyaali ya wAustralasia eriyari ya esumana nto wuumalani wa esumana kinrumeela muloko kithanleliwe aka. OBetheli kinnihakalala orumeela eChinês ni eJaponês okathi anna anixukurya aya eBetheli. Kinnilipelela nihiku atthu akhwiiye anrowa aya ohihimuxiwa. Nto kinniroromela wira Harvey yoowo aahaakhootta miritti aavahiwa awe ni mutthenkeso wa Yehova, onnuupuweliwa ni Yehova.—Yoh. 5:28, 29.