Efatra mirahalahy iry Harvey vaotraka araiky, ke izy talan̈olo. Nipetraka ta Midland Junction, an Australie Andrefa iro. Masikiny ankamarozanolo tan̈y. Efa mandilatra 80 taon̈o nahaizany fiankavian̈any Harvey fahamarinan̈a. Nanjary tia Jehovah i Harvey, ke natao batisa izy taminizy 14 taon̈o. Mbala hely izy efa nampianarin̈y fa Jehovah koa fa man̈iraka anten̈a han̈ano raha araiky, anten̈a mila man̈eky fo. Ohatra iziô, nisy fotoan̈a izy voafidy hamaky Tilikambo Fiambesan̈a tampivorian̈a. Tamy voanalohany izy tsy nan̈eky fotony navozo izy tsao tsy ho vitany tsara han̈ano izio. Ke ho ranadahy zay taminany: “Matoa olo araiky an̈ivony fandaminan̈any Jehovah man̈iraka anao, dikanizen̈y hainy fa ho vitanao asa io.”​—2 Kor. 3:5.

Zaho ndraiky nipetraka tan Angletera. Tan̈y zahay jiabindry mamako ndreky zokiko talan̈olo nahita fahamarin̈ana. Tamy voanalohany papanay tsy tia Vavolombelon̈o Jehovah. Izikoa fa nandeha fotoan̈a, izy niova. Nanjary nan̈eky fahamarin̈ana koa izy. Tamy zaho sivy taon̈o natao batisa, fa Papa tsy ravoravo foeky. Fan̈irian̈anaka hanjary pisava lalan̈a ndreky hanjary misionera. Tsy nimboany Papanay han̈ano pisava lalan̈a zaho izikoa tsy efa feno  21 taon̈o. Fa zaho tsy tihiambin̈y ela be karaha zen̈y. Zokiko talan̈olo in̈y nifindra tan Australie. Zaho koa fa feno 16 taon̈o, zaho nambelany Papako nipetraka tamy zokiko io tan̈y. Nan̈ano pisava lalan̈a zaho koa fa feno 18 taon̈o.

Tan Australie zahay roeny Harvey nifanojy. Samby tiho loso misionera zahay roe. Ke taminy 1951 zahay nan̈ano mariazy. Taon̈o aroe nan̈anaovanay pisava lalan̈a, zahay navoatendry han̈ano asany faritry. Ten̈a maventy faritry nitsidihinay tan Australie Andrefa. Tsy maintsy nandalo tany mitokana salakady paiky zahay. Zay raha lavitry e, ke tsy maintsy nandeha tomobily zahay vo navy tamy tany nanendren̈a zahay.

Navoakaiky han̈ano Sekoliny Gileada kilasy faha-25 zahay tamy taon̈o 1954. Ho tanteraka eky fan̈irian̈anay han̈ano misionera in̈y! Nandeha sambo zahay nandeha ta New York. Raha nataonay koa fa navy tan̈y, nandalin̈y fianaran̈a Baiboly. Tan̈atiny zahay nan̈ano sekoly io tsy maintsy nianatra teny espan̈ioly koa. Sarotro taminy Harvey nianatra izio fotony tsy hainy nanon̈ono “r” tamy teny espan̈ioly.

Izikoa fa nandeha fianaran̈a, nivolan̈a taminay papianatra fa lan̈iany olo man̈iry ho voatendry a Japon mety misoratra an̈aran̈a hianatra teny japoney. Ke nanapakevitry zahay fa sitrany fandaminan̈any Jehovah fo mifidy tany hanendrena zahay. Tsy ela tafaranizen̈y, nikoran̈a taminay Albert Schroeder. An̈isany papianatra izy. Ho izy taminay: “Anaro ma mbala tsy nisoratra anaran̈a? Mandiniha tsarabe!” Fa zahay mbala nisalasala fo. Ke ho izy: “Nisoratinay papianatra an̈y an̈aranaro. Andramana antsendriky, tsao mba mety ho hainaro fo teny japoney io.” Betibetiky i Harvey efa nahay izio edy.

Navy ta Japon zahay taminy 1955. I Harvey tamy zen̈y 26 taon̈o fa zaho ndraiky 24 taon̈o. Pitory 500 fo tan̈y tamy zen̈y. Voatendry hanompo ta Kobe zahay. Nidoko tan̈y efatra taon̈o zahay. Nisy tany fitodihany sambo tamy tany io. Ravoravo mare zahay izikoa fa nirahin̈y nan̈ano asany faritry ndraiky. Voatendry marikitry tanànany Nagoya zahay. Tianay aby raha jiaby, na piaramanompo zen̈y, na hanin̈y, na tanàna.

Zahay koa fa baka nan̈ano asany faritry tan̈atiny telo taon̈o tio, nan̈ontany zahay iro tamy sampan̈any Japon tsao afaka mifindra a Taïwan zahay, hitory taminolo tamy foko amis. Nanjary pivadipinoan̈a baka piaramanompo sasany tamy foko io, ke nila ranadahy nahay volan̈a japoney tsarabe sampan̈a  handamin̈y problemo io. * Tianay mare asanay ta Japon, ke tsy hainay raha tokony hatao. Ndray izy man̈ano zen̈y, Harvey efa nampianarin̈y han̈eky fanendrena, ke ndray tsy nora taminay raha zen̈y, nikenay fo.

Tamy Novambra 1962 zahay navy ta Taïwan. Kadiriny 2 271 isakany pitory tan̈y tamy leranizen̈y, ary ankamarozandro io baka amy foko amis aby. Ke tsy maintsy nianatra teny sinoa zahay, kanefa boky fianaran̈a araiky zay edy kaihany raha nanan̈anay. Olo nampianatra zahay lastio tsy nahay teny angiley. Fa vitanay fo nianatra izio!

Tafara heliny navianay ta Taïwan, navoatendry ho pikarakara sampan̈a i Harvey. Tsy dia maventy loatra sampan̈a, ke afaka nan̈ano andraikitrinany fo i Harvey, an̈atinizen̈y nanompo niaraka tamy piaramanompo baka amy foko amis tan̈atiny telo herin̈iandra isaka fanjava. Nan̈ano andraikitrinany amy maha piandraikitry vondroparitry koa izy ndraikindraiky, tafiditry amy zen̈y fan̈anaovan̈a kabaro amy fivoriambe. Izikoa kabaro nataony aby io koa nataony tamy teny japoney, nazava tsarabe tamindro piaramanompo baka amy foko amis aby io fan̈azavan̈a. Fa nan̈aboaka didy iro tamy fitondrasan̈a fa tsy azo atao man̈ano fivorian̈a arapivavahan̈a amy volan̈a hafa ankoatrany teny sinoa. Ke nataony tamy teny sinoa kabaronany io, kanefa izy tamy zen̈y mbala tsendriky nahay tsarabe teny sinoa. Nisy rahalahy hafa amy zay nandika kabaro io amy teny amis.

Tsy maintsy nangataka lalan̈a tamy manampahifan̈a koa piaramanompo vo afaka nan̈ano fivoriambe, kanefa raha zen̈y tsy nora. Ndraikindraiky, ela be raha io vo azo! Izikoa mbala tsy namiany polisy taratasy fazahoan̈a lalan̈a io taminy herin̈iandra han̈anaovan̈a fivoriambe, nandeha tan̈y i Harvey. Tsy niala tao foeky izy izikoa tsy azony izio. Nahômby raha zen̈y fotony men̈atra iro polisy aby io nahita vazaha miambin̈y amy birôndro iô.

Zahay koa fa nitory niaraka tamy piaramanompo, zahay nandeha vity ela be, tan̈atiny lera araiky na mandilatra. Sôfy zahay nan̈onga bongo avio nitsaka ten̈arano. Misy raha azoko onon̈o tamy zaho sambany nan̈aniky bongo. Nihinan̈a mekimeky fo zahay tamy maraindrain̈izio, fotony tsy maintsy nangala bisy zahay 5h30 maraindrain̈y handeha tamy tanàna araiky lavidavitry. Nitsaka ten̈arano maventibe efa maiky zay zahay, avio nan̈onga bongo araiky. Zaho koa fa nisan̈andra nizaha tan̈abo, fananjò masonaka vitany ranadahy nandeha talohanaka, fotony bongo io nahitsy be.

Zaho tamy maraindrain̈inizio nitory tamy tanàna nisy olo nampiasa volan̈a japoney, kanefa zaho tsisy naman̈a. I Harvey in̈y ndraiky nanompo niaraka tamy ranadahy hafa. Kadiriny taminy 1h folakandra tio, zaho karaha ren̈iko nalemilemy, fotony tsy ten̈a nahampy zaho hanin̈y nihoaniko in̈y. Efa tsy tio foeky iro piaramanompo aby io tamy zahay roeny Harvey nifanojy. Nitondra antodiny akôho telo zay izy baka tan̈y. Nan̈apetraka gazety zen̈y izy ke namianolo io antody hatao takalony. Naboakany zaho karakory atao mihinan̈a antody manta. Lokàn̈a hely amy lohany ndreky vodiny, baka io tsintsefin̈y. Tsy dia nazoto zaho nihinan̈a izio fa nihoaniko fo ndraiky. Aroe antody nihoaniko avio araiky ninany. Navozo i Harvey tsao zaho ho toraka ke tsy ho vitany han̈onjon̈o zaho hijotso bongo io.

Nisy raha karaha somary hafa hely nandalo indraiky andra zay, tamy zahay nan̈aton̈o fivoriambeny faritry. Zahay taminio nipetraka tamy tran̈ony ranadahy araiky, marikitry Tran̈o Fivorian̈a. Ten̈a raha maventy aminolo amy foko amis resaka fisehan̈a. Ke nikarakara raha jiaby nilainay vadiny piandraikitriny faritry io, zahay koa fa hiseky. Mbala maro raha tokony hataony Harvey, ke zaho foeky nirahiny niseky voanalohany. Namezany rahavavy io siô zaho. Araiky misy rano manintsy, araiky misy rano mafana, avio kovety foan̈a. Lany fan̈ahy zaho fotony raha io napetrakany rahavavy io tambelan̈a tran̈o, kanefa raha aby io tazan̈a baka amy Tran̈o Fivorian̈a. Tamy Tran̈o Fivorian̈a tarỳ ndraiky nisy ranadahy maromaro nikarakara fivoriambe. Ho zaho taminany: “Tsisy raha mba mety hatao ridô ma ao rahavavy?” Ino raha nindesiny baka tan̈y, sachet plastiky maventibe zay sady amy zen̈y matify. Ke tan̈atiny jeriko tan̈y, tsaratsara aminany zaho miseky ambôhontran̈o, amy zen̈y tsisy olo mahita. Ny raha nisy, nisy gisy aby zay tao, ke navozo zaho tsao hitsikôfindro gisy aby io. Ke nimpody tamy tany nan̈apitrahany rahavavy in̈y siô aby in̈y foeky zaho. Namboariko foeky jerinaka. Ho zaho: ‘Ndray iro ranadahy aby io somariaka aminy asandro, tsy azondro onon̈o aby zaho miseky eto! Zaho niany koa tsy miseky, halahelo iro olo nitobian̈a aby ty.’ Ke tio foeky zaho niseky.

Hitany Harvey fa tsy dia nandroso arapan̈ahy iro piaramanompo tamy foko amis, fotony maro tamindro tsy nahay namaky teny. Boky ndreky gazety lastio tsisy tamy volan̈andro. Vo tsy ela fo volan̈andro nanomboko nisoratan̈a. Ke nampianarin̈y hamaky volan̈andro iro piaramanompo aby io. Zay asa e! Fa ny raha namparavoravo, izikoa fa nandeha fotoan̈a, nahavita nianatra manokan̈a iro ranadahy ndreky rahavavy aby io. Nanjary nisy boky ndreky gazety tamy volan̈a amis taminy 1966, avio nanjary nisy koa Tilikambo Fiambesan̈a nanomboko tamy taon̈o 1968.

Ny raha nisy amy zay, tsy nambelany fanjakan̈a naboaka boky ndreky gazety izikoa tsy tamy teny sinoa. Nitady hevitry foeky iro ranadahy aby io misy hiboahany Tilikambo Fiambesan̈a io tamy volan̈a amis. Tan̈atiny fanjava vitsivitsy, nasian̈a lahatsoratra tamy teny sinoa tamizio tao. Karaha in̈y, izikoa nisy olo nan̈ontany momba izio, karaha nampianatra teny sinoa iro tamy foko amis in̈y zahay. Nitady fomba hanampian̈a olo hahay ny marin̈y  amy Baiboly ao fandaminan̈a, ke nahainaro fo boky ndreky gazety naboaka tamy volan̈a amis io.​—Asa. 10:34, 35.

Maro piaramanompo nanjary tsy nan̈araka fitsipikiny Zan̈ahary eky, tan̈atiny taon̈o maro. Tsy nazava tamindro foeky toro lalan̈any Baiboly. Nisy tamindro io nijangajanga, namolava, nifima sigarety ndreky nihinan̈a lobàka, avio nihinan̈a voany betela. Nitsidiky fiangonan̈a marobe i Harvey, ke nifen̈y izy nan̈ampy iro hahay fomba fihevitriny Jehovah momba raha aby io. Tamy fotoan̈anizen̈y niboaka iro raha nandalo nitantaraiko tamy voanalohany in̈y.

Nanetry ten̈a iro rahalahy sasany ke iro von̈ono niova. Fa ny raha nampalahelo hely, maro tamindro tsy nety niala tamy raha ratsy nahazatra iro io. Ke nijotso be isakany pitory ta Taïwan tan̈atiny 20 taon̈o. Nanjary 900 isakany pitory kanefa tamy voanalohany iro mandilatra 2 450. Ten̈a nampakivy kony e! Ndray zen̈y, hainay fa Jehovah tsy mety hitahy fandaminan̈anany izikoa izio tsy madio. (2 Kor. 7:1) Izikoa fa nandeha fotoan̈a, nialandro piaramanompo aby io raha ratsy nahazatra iro io. Ke amy zioty, efa mandilatra 11 000 isakany pitory a Taïwan an̈y.

Nanomboko tamy taon̈o 1980, nahainandroso fo iro piaramanompo amy foko amis. Ke nanjary nanan̈a fotoan̈a niarahan̈a tamy fiangonan̈a mampiasa teny sinoa i Harvey. Ravoravo izy afaka nan̈ampy vadiny rahavavy maromaro hanjary Vavolombelon̈o Jehovah. Azoko onon̈o indraiky andra izy nivolan̈a fa ravoravo naharen̈y araiky taminolo nampianariny aby io nivavaka tamy Jehovah. Sambany taminio lelahy io nan̈ano zen̈y! Zaho koa ravoravo fotony zaho nahavita nan̈ampy olo tsopô marobe hanjary kamaradiny Jehovah. Nisy tamy zanakanolo nampianariko aby io niaraka nanompo taminaka tamy Betelany Taïwan. Ravoravo zaho niaraka tamindro roe mianadahy!

Very naman̈a zaho fotony voany kansera i Harvey, ke naty tamy 1 Zanvie 2010. Efa ho 59 taon̈o vadian̈anay. Efa ho 60 taon̈o tamy zen̈y nanompoany manontolo andra. Mbala ngoma izy fo zaho firaka amy zioty. Ten̈a tiako niaraka nanompo taminany ta Japon ndreky ta Taïwan. Nianatra teny aziatiky aroe sarotro mare zahay. Fa i Harvey nianatra nanoratra volan̈a aby io foeky!

Taon̈o vitsivitsy tafara tatỳ, nanapakevitry Filankevipitantan̈ana fa tsaratsara aminaka mimpody an Australie ndraiky. Efa nahazoazo taon̈o baka zaho. Fa ho zaho tamy jeriko tan̈y: ‘Zaho kony tihidôko a Taïwan e!’ Fa zaho baka tio nan̈eky fo. Nakiry zaho nifindra tan̈y!

Zaho iziô manompo amy sampan̈any Australasie eto. Miasa eto zaho an̈atiny herin̈iandra, baka io lera farany herin̈iandra, zaho miaraka manompo amy fiangonan̈a. Ravoravo zaho fa mbala afaka mampiasa teny japoney ndreky teny sinoa lera misy olo mitsidiky Betela. Efa tsy din̈iko foeky fotoan̈a hamilomany Jehovah olo maty. Amy zen̈y izy hamelon̈o i Harvey ndraiky. Nataony aby zay raha nan̈irahany Jehovah izy, ke zaho matoky fa izy tsy mety adin̈any Jehovah!—Jaona 5:28, 29.