Harveyeʼ letiʼ u maas nojchil tiʼ le kantúul paalal anchaj tiʼ u maamaoʼ. U láakʼtsiloʼobeʼ tu kʼaj óoltoʼob Jéeoba tiʼ junpʼéel chan kaaj kʼaj óolaʼan bey Midland Junction, tu estadoil Australia Occidental. Tu kʼaj óoltoʼob Jéeoba teʼ kʼiinoʼob táan u yilaʼal óotsilil tiʼ tuláakal yóokʼol kaab tu añoiloʼob 1930. Harveyeʼ jach tu yaabiltaj Jéeoba, ka okjaʼanaj le yaan 14 años tiʼoʼ. Le maʼ úuch okjaʼanakoʼ joʼopʼ u kʼamik le meyajoʼob ku tsʼaʼabaltiʼ ichil u kaajal Jéeobaoʼ. Juntéeneʼ aʼalaʼabtiʼ ka u xok U Pʼíich Tulumil Kanan teʼ muchʼtáambaloʼ pero maʼ tu yóotiʼ tumen tu tuklaj maʼ ten u beet maʼalob. Chéen baʼaleʼ le sukuʼun aʼaltiʼ wa jeʼel u xookoʼ tu yaʼalaj tiʼ Harvey: «Ichil u kaajal Jéeobaeʼ le kéen kʼáataʼaktech ka a beet wa baʼaxeʼ, beete. Wa ku kʼáataʼaltech ka a beeteʼ ojéelaʼan jeʼel u páajtal a beetik maʼalobeʼ» (2 Cor. 3:5).

Teneʼ tu luʼumil Inglaterra tin kanaj u jaajil, bey xan in maama yéetel in kiik. In taataeʼ jach u pʼekmaj kaʼach u testigoʼob Jéeoba, pero ka máan kʼiineʼ tu beetuba xan Testigo. Kex maʼ u kʼáat kaʼacheʼ okjaʼanajen le yaanten 9 añosoʼ. Tin chʼaʼtuklaj in beetik in precursorail utiaʼal ka béeyak in beetik in misionerail kéen máanak kʼiin. Pero in wojel in taataeʼ maʼ ten u chaʼa in beetik in precursorail  hasta in cumplirtik 21 añoseʼ. Teneʼ maʼ in kʼáat in páaʼt u máan kaʼach yaʼab tiempoiʼ. Le ka tin cumplirtaj 16 añoseʼ in taataeʼ tu tsʼáajten permiso utiaʼal in bin kajtal Australia tu yotoch in kiik. Letiʼeʼ tsʼoʼok u chan máan kʼiin xiʼik kajtaliʼiʼ. Le ka tin cumplirtaj 18 añosoʼ béeychaj in beetik in precursorail.

Tu luʼumil Australia tin kʼaj óoltaj Harvey. Tu kaʼatúulaloʼon k-kʼáat kaʼach k-meyajt Jéeoba bey misioneroʼoneʼ. Tsʼoʼok k-beel tu añoil 1951. Ka máan dos años joʼopʼok k-beetik k-precursorileʼ invitartaʼab in wíicham utiaʼal u beetik u superintendenteil tiʼ circuito teʼ Australia Occidentaloʼ. Jach nojoch le territorio tuʼux túuxtaʼaboʼonoʼ yéetel náach yanil, le oʼolal ku xáantal táan k-viajar chéen tiʼ desierto utiaʼal u béeytal k-kʼuchul teʼ múuchʼuliloʼoboʼ.

Tu añoil 1954, invitartaʼaboʼon teʼ xook 25 tiʼ Galaadoʼ. ¡Jach taʼaytak u béeytal kaʼach k-meyaj bey misioneroʼoneʼ! Tiʼ barco viajarnajoʼon tak Nueva York. Ka káaj le xookoʼ joʼopʼ túun k-xakʼaltik tubeel le Bibliaoʼ. Tu xookil Galaadeʼ aʼalaʼabtoʼon kʼaʼabéet k-kanik español, pero Harveyeʼ maʼ fácil tu yilil u kanikiʼ jach istikyaj u yaʼalik kaʼach le letra erreoʼ.

Le sukuʼunoʼob tsʼáaik le xookoʼ tu yaʼaloʼobeʼ le máaxoʼob u kʼáatoʼob bin áantaj Japón kéen tsʼoʼokok le xookoʼ unaj u tsʼíibtik u kʼaabaʼob utiaʼal u kankoʼob japonés. Toʼoneʼ t-chʼaʼtuklaj maʼ k-tsʼíibtik k-kʼaabaʼ utiaʼal k-kanik japonés tumen t-tukleʼ maas maʼalob ka aʼalaʼaktoʼon tuʼux jeʼel u páajtal k-bin áantajeʼ. Ka tu yojéeltaj le sukuʼun Albert Schroeder, juntúul tiʼ le máaxoʼob ku kaʼansaj Galaad, maʼ binoʼon k-kan japonéseʼ tu yaʼalajtoʼon: «¿Jach tu jaajil tsʼoʼok a tuklikeʼex wa maʼ kan bineʼex?». Como tu yilaj bey maʼ jach seguroʼoneʼ tu yaʼalajtoʼon: «Teen yéetel le uláakʼ sukuʼunoʼob k-kaʼansajoʼ tsʼoʼok k-tsʼáaik a kʼaabaʼex utiaʼal ka xiʼikeʼex a kaneʼex japonés. Ilawil a kankeʼex le japonésoʼ». Harveyeʼ maas fácil tu yilil u kanik japonés ke español.

Tu añoil 1955 ka kʼuchoʼon Japón. Teʼ kʼiinoʼoboʼ chéen 500 j-kʼaʼaytajoʼob yaniʼiʼ. Harveyeʼ 26 años yaantiʼ yéetel teneʼ 24 años. Túuxtaʼaboʼon meyaj tu noj kaajil Kobe, teʼeloʼ pʼáatoʼon cuatro años. Ka máan añoseʼ kaʼa invitartaʼab Harvey utiaʼal u meyaj bey superintendente tiʼ circuitoeʼ, naatsʼ tiʼ u noj kaajil Nagoya. Jach kiʼimakchaj k-óol. Jach jatsʼuts k-ilik kaʼach k-meyaj tu luʼumil Japón, k-yaabiltmaj le sukuʼunoʼoboʼ, jach kiʼ le janaloʼ yéetel yaʼab lugaroʼob jatsʼutstak yaniʼ. Pero ka máan kʼiineʼ anchaj k-kaʼa eʼesik wa jeʼel k-beetik le baʼax ku yaʼaliktoʼon Jéeobaoʼ.

Ka máan tres años táan k-xíimbaltik le múuchʼuliloʼoboʼ u Betelil Japóneʼ tu kʼáatajtoʼon wa jeʼel k-bin  áantaj Taiwáneʼ. Teʼeloʼ yaan k-kʼaʼaytaj tiʼ le amioʼoboʼ, junpʼéel grupo máakoʼob tʼanik le idioma amioʼ. Jujuntúul amioʼob sukuʼunoʼob kaʼacheʼ suunaj apóstatailoʼob. Le oʼolal u Betelil Taiwáneʼ kʼaʼabéet u túuxtik juntúul sukuʼun u yojel u tʼan japonés, beyoʼ yaan u yáantaj utiaʼal ka utskíintaʼak le baʼax ku yúuchloʼ. * U jaajileʼ maʼ fácil úuchik k-chʼaʼtuklik baʼax ken k-beetiʼ tumen jach kiʼimak k-óol táan k-áantaj tu luʼumil Japón. Pero Harveyeʼ maʼatech u yaʼalik wa maʼ ten u kʼam junpʼéel meyaj ku taal tiʼ Jéeoba.

Le ka kʼuchoʼon Taiwán tu mesil noviembre tu añoil 1962, chéen 2,271 j-kʼaʼaytajoʼob yaniʼiʼ. U maas yaʼabileʼ amioʼob le oʼolal kʼaʼabéetchaj k-kanik chino. Pero chéen junpʼéel libro yaantoʼon yéetel juntúul maestra maʼ tu tʼanik inglés. Kex beyoʼ t-ilaj k-kanik chino.

Le maʼ úuch kʼuchkoʼon Taiwánoʼ Harveyeʼ tsʼaʼab u nuʼukt le meyaj ku beetaʼal Beteloʼ. Le sucursal yaan kaʼach Taiwánoʼ maʼ jach nojochiʼ, le oʼolal Harveyeʼ ku béeytal u beetik maʼalob u meyaj yéetel u kʼaʼaytaj tu jóokʼbal le semana yéetel le sukuʼunoʼob tʼanik amioʼ. Ku beetik xan kaʼach u superintendenteil tiʼ distrito cada wa baʼax kʼiin yéetel ku discursar kaʼach teʼ asambleaʼoboʼ. Wa ka u máans le discursoʼob ich japonésoʼ jeʼel kaʼach u naʼataʼal tumen le amioʼoboʼ, pero le gobiernooʼ chéen ku chaʼik ka beetaʼak muchʼtáambaloʼob ich chinooʼ. Le oʼolal Harveyeʼ ku discursar kaʼach ich chino kex maʼ u jach ojel kaʼachiʼ. Le kéen discursarnakeʼ juntúul sukuʼun ku tʼanik amieʼ ku traducirtik le baʼax táan u yaʼalikoʼ.

Teʼ kʼiinoʼoboʼ yaj le kuxtal tu luʼumil Taiwánoʼ tumen yaʼab baʼax maʼ tu chaʼabal u beetaʼal tumen le gobiernooʼ. Le sukuʼunoʼoboʼ kʼaʼabéet kaʼach u kʼáatkoʼob permiso utiaʼal ka chaʼabak u beetkoʼob le asambleaʼoboʼ. U kʼáataʼal le permisooʼ maʼ fácil kaʼachiʼ, tsʼoʼoleʼ le policíaʼoboʼ ku xáantal ken u tsʼáaʼob. Wa tu semanail le asamblea maʼ tsʼaʼabak le permisooʼ Harveyeʼ ku bin kutal kaʼach teʼ comisaríaoʼ yéetel tiʼ ku pʼáatal kaʼach hasta u tsʼaʼabal le permiso tiʼoʼ. Le policíaʼoboʼ ku chʼaʼikoʼob suʼtal le kéen u yiloʼob yaan juntúul máak táanxel luʼumil táan u páaʼtik ka atendertaʼak, le oʼolal le kéen u yiloʼobeʼ ku maas séebtal u tsʼaʼabal le permisooʼ.

Le kéen jóokʼkoʼon kʼaʼaytaj yéetel le sukuʼunoʼoboʼ u suukileʼ k-xíimbal kex junpʼéel hora wa maas táan k-naʼaksik le montañaʼoboʼ yéetel táan k-kʼáatmáansik le ríoʼoboʼ. Jach kin kʼaʼajsik le yáax juntéen ka tin naʼaksaj junpʼéel montañaoʼ. Ka tsʼoʼok k-jáan ukʼuleʼ t-chʼaʼaj le autobús láas cinco y mediaoʼ ka binoʼon kʼaʼaytaj tiʼ junpʼéel chan kajtalil náach yanil. Ka tsʼoʼok k-kʼáatmáansik le ríooʼ ka túun káaj k-naʼakal teʼ montañaoʼ. Le montañaoʼ jach toj yanil le oʼolal le táan k-naʼakloʼ u yook le sukuʼun ku bin táanil tiʼ tenoʼ tu tojil in wichoʼob yaan.

Teʼ kʼiinaʼ Harveyeʼ táan kaʼach u kʼaʼaytaj yéetel jujuntúul sukuʼunoʼob mientras teneʼ tin juunal táan kaʼach in kʼaʼaytaj tiʼ junpʼéel chan kajtalil ku tʼaʼanal japonésiʼ. Kex bey láaunaeʼ joʼopʼ in wuʼuyik táan u xuʼupul in muukʼ tumen sáam jaanken. Le ka tin wilaj Harveyeʼ le sukuʼunoʼoboʼ tsʼoʼok kaʼach u binoʼob. Tiʼ Harveyeʼ tsʼaʼab óoxpʼéel jeʼob tu lugar jujunpʼéel revistaʼob. Letiʼeʼ tu kaʼansen in jaant le jeʼ maʼ takʼankúuntaʼanoʼ, kin beetik kaʼach u chan joolil tsʼoʼoleʼ kin wukʼik. Kex maʼ jach kiʼ in wuʼuyikeʼ tin jaantaj junpʼéeliʼ. Pero ¿máax túun kun jaantik le u tsʼookoʼ? Teen jaante, tumen como yaan k-éemsik le montañaoʼ  Harveyeʼ maʼ kun béeytal u kuchken wa kin desmayar.

Juntéeneʼ le ka anchajtoʼon junpʼéel asamblea de circuitoeʼ jach chistoso baʼax úuchten. Pʼáatoʼon tu yotoch juntúul sukuʼun kajaʼan tu tséel le tuʼux ku beetaʼal le muchʼtáambaloʼoboʼ. Utiaʼal le amioʼoboʼ u yichkíil máakeʼ jach importante. Le oʼolal u yatan le superintendente tiʼ circuitooʼ tu preparartaj le baʼax kʼaʼabéet utiaʼal k-ichkíil ka pʼáatkoʼon limpioil jeʼex suuk tiʼ le amioʼoboʼ. Como Harvey yaan baʼax ku beetik kaʼacheʼ tu yaʼalajten ka xiʼiken táanil. Le kiikoʼ tu preparartaj óoxpʼéel nuʼukuloʼob: junpʼéel chʼóoy yéetel síis jaʼ, uláakʼeʼ yéetel choko jaʼ yéetel junpʼéel palangana. Jaʼakʼ in wóol ka tin wilaj tu tsʼáaj tu táankabil le najoʼ yéetel aktáan tiʼ le tuʼux ku meyaj le sukuʼunoʼob táan u listokíinkoʼob le tuʼux kun beetbil le asambleaoʼ. Tin kʼáatajtiʼ ka u tsʼáaten junpʼéel cortina wa uláakʼ baʼal utiaʼal in pixkinba pero tu tsʼáajten junpʼéel cortina de plástico sáaskʼaleʼen. Ka tin tuklaj in bin tu paach le najoʼ, pero tiaʼan kaʼach jujuntúul gansoʼob ku tʼóochkoʼob jeʼel máaxak ka náatsʼaktiʼobeʼ. Ka túun tin tuklaj: «Le sukuʼunoʼoboʼ como yaʼab baʼax ku beetkoʼobeʼ mix ten u tsʼáaʼob cuenta wa táan in wichkíil. Tsʼoʼoleʼ wa maʼ tin beetkeʼ maʼ xaaneʼ jeʼel u ofenderoʼobeʼ, le oʼolal maas maʼalob ka in beete». Ka túun tin beetaj.

Harveyeʼ tu tsʼáaj cuentaeʼ le sukuʼunoʼob amioʼoboʼ maʼ tu jach tsʼáaik u yóoloʼob u meyajtoʼob Jéeoba, tumen u maas yaʼabileʼ maʼ u yojel xookiʼ tsʼoʼoleʼ minaʼan publicaciónoʼob ichil u idiomaʼob. Como maʼ úuch káajak u tsʼíibtaʼal le idioma ami yéetel u letrasil le abecedario suuk u meyajtoʼonoʼ t-tuklaj jeʼel u páajtal k-kaʼansik xook le sukuʼunoʼob ichil u idiomaʼoboʼ. Kex yaʼab meyaj t-beeteʼ tu taasaj utsil. Ka máan kʼiineʼ le sukuʼunoʼoboʼ tu kanoʼob xook tu juunaloʼob. Óoliʼ tu añoil 1966 ka káaj u jóoʼsaʼal publicaciónoʼob ich amioʼ. Tu añoil 1968, káaj u jóoʼsaʼal le revista U Pʼíich Tulumil Kanan ich amioʼ.

Le gobiernooʼ maʼ u kʼáat kaʼach ka jóoʼsaʼak publicaciónoʼob ich yaanal idiomaiʼ, chéen ich chino. Le oʼolaleʼ utiaʼal maʼ u yantal problemas yéetel le gobiernooʼ jejeláas bix jóoʼsaʼabik U Pʼíich Tulumil Kanan. Ichil junpʼéel tiempoeʼ le xookoʼob ku taasik U Pʼíich Tulumil Kananoʼ tsʼíibtaʼab ich kaʼapʼéel idiomaʼob, le chino mandarínoʼ yéetel le amioʼ. Beyoʼ le gobiernooʼ yaan u tuklik táan u kaʼansaʼal chino tiʼ le máakoʼoboʼ. Desde teʼ kʼiinoʼoboʼ u káajal Jéeobaeʼ tsʼoʼok u jóoʼsik yaʼab publicaciónoʼob ich ami utiaʼal u yáantaʼal le máakoʼob u kanoʼob le baʼax ku yaʼalik le Bibliaoʼ (Hech. 10:34, 35).

Yaʼab tiʼ le sukuʼunoʼob amioʼoboʼ xáanchaj 20 años utiaʼal u suuktal u kuxtaloʼob jeʼex u yaʼalik Jéeobaoʼ. Como maʼ tu naʼatkoʼob tuláakal le baʼax ku yaʼalik le Bibliaoʼ yaneʼ ku núupkʼebantal yéetel uláakʼoʼobeʼ ku káaltaloʼob, ku tsʼuʼutsʼkoʼob chamal wa ku chaʼachkoʼob nuez de areca. Harveyeʼ yaʼab múuchʼuliloʼob tu xíimbaltaj utiaʼal u yáantik le sukuʼunoʼob u naʼatoʼob bix u kʼáat Jéeoba ka adorartaʼakoʼ. Junpʼéel tiʼ le lugaroʼob t-xíimbaltoʼ úuchtoʼon le baʼax tsʼoʼok in tsikbaltikteʼex tu káajbaloʼ.

Le sukuʼunoʼob kabal u yóoloʼoboʼ tu beetoʼob le kʼeexoʼob kʼaʼabéetchajoʼ, pero yaan xaneʼ maʼ tu yóotoʼob u beetoʼobiʼ. Tiʼ le 2,450 j-kʼaʼaytajoʼob yaan kaʼach Taiwánoʼ le ka máan 20 añoseʼ náak 900 u túulal. Jach yaj le baʼax t-aktáantaʼ. K-ojel kaʼacheʼ Jéeobaeʼ maʼ ten u bendecirtik u kaajal wa maʼ tu beetaʼal baʼax maʼalobiʼ (2 Cor. 7:1). Ka máan kʼiineʼ tuláakal le baʼax maʼ maʼalob ku beetaʼaloʼ xuʼul u beetaʼal teʼ múuchʼuliloʼoboʼ. Yéetel u yáantaj Jéeobaeʼ teʼ kʼiinoʼobaʼ tu luʼumil Taiwáneʼ yaan maas tiʼ 11,000 j-kʼaʼaytajoʼobiʼ.

Desde u añoil 1980, le múuchʼuliloʼob ku tʼankoʼob amioʼ joʼopʼ u meyajtikoʼob Jéeoba jeʼex u kʼáateʼ ka muʼukʼaʼanchaj u fejoʼob. Tu yoʼolal le baʼax úuchaʼ anchaj tiempo tiʼ Harvey utiaʼal u kʼaʼaytaj tiʼ le máaxoʼob ku tʼankoʼob chinooʼ. Harveyeʼ jach kiʼimakchaj u yóol tumen páajchaj u yáantik u beetubaʼob u testigoʼob Jéeoba u yíicham jujuntúul kiikoʼob. Kʼajaʼanten bukaʼaj kiʼimakchajik u yóol le yáax juntéen ka tu yuʼubaj u orar juntúul tiʼ letiʼoboʼ. Teen xaneʼ jach kiʼimakchaj in wóol in wáantik yaʼab máakoʼob u meyajtoʼob Jéeoba. Kiʼimakchaj xan in wóol u béeytal in meyaj tu Betelil Taiwán yéetel u hijo bey xan u hija juntúul tiʼ le máaxoʼob t-tsʼáaj xook tiʼoboʼ.

Ka máan 59 años tsʼoʼokok k-beeleʼ tsaʼay cáncer tiʼ Harvey ka kíim 1 tiʼ enero tiʼ 2010. Letiʼeʼ kex 60 años tu meyajtaj Jéeoba. Yaan kʼiineʼ jach ku taaktal in wilik. Pero le kéen in kʼaʼajs bukaʼaj jatsʼutsil le meyaj t-beetaj tiʼ kaʼapʼéel luʼumiloʼoboʼ jach ku kiʼimaktal in wóol. Béeychaj k-kanik kaʼapʼéel idiomaʼob jach difíciltak, Harveyeʼ hasta tu kanaj u tsʼíibtoʼob.

Kex cuatro años kíimik Harveyeʼ le Cuerpo Gobernanteoʼ como tu yilaj tsʼoʼok u chan antal in jaʼabileʼ tu yaʼalajten maas maʼalob ka suunaken Australia. Tu káajbaleʼ tin tuklaj: «Si teneʼ maʼ in kʼáat lukʼul Taiwániʼ». Pero Harveyeʼ tu kaʼansajten kʼaʼabéet k-beetik jeʼel baʼax bíin u yaʼaltoʼon Jéeobaeʼ, le oʼolal suunajen Australia. Ka máan kʼiineʼ tin tsʼáaj cuenta jach maʼalob le baʼax tin chʼaʼtukloʼ.

Teʼ kʼiinoʼobaʼ tu yáam semanaeʼ táan in meyaj tu Betelil Australasia yéetel tu jóokʼbal le semanaoʼ kin kʼaʼaytaj tin múuchʼulil. Kéen taak le sukuʼunoʼob ku tʼankoʼob chino wa japonés u xíimbaltoʼob u najil Beteleʼ teen eʼesiktiʼob le lugaroʼ yéetel teen tsoliktiʼob baʼax ku sen beetaʼaliʼ. ¡Jach jatsʼuts in wilik in beetik le meyajaʼ! Jach kin tsʼíiboltik u kʼuchul u kʼiinil u kuxkíintaʼal le máaxoʼob k-yaabiltmaj tsʼoʼok u kíimloʼoboʼ. Harveyeʼ suukchaj u beetik jeʼel baʼaxak bíin aʼalaʼaktiʼ tumen Jéeobaeʼ, le oʼolal in wojel tiaʼan tiʼ junpʼéel lugar jach seguroeʼ, tiaʼan tu tuukul Jéeobaeʼ (Juan 5:28, 29).