Pel aghị epẹ ogọ bọ raraạr phọ

Pel aghị epẹ ogọ bọ raraạr phọ

EMHUOGHAẠPH ITUUGHẠ PHỌ 5

‘AKraist Kụ Uw-emhụ Atorobọ Olephiri Oọny’

‘AKraist Kụ Uw-emhụ Atorobọ Olephiri Oọny’

“AKraist kụ [uw-emhụ] atorobọ olephiri oọny.”—1 KỌR. 11:3.

AḌUỌR PHỌ 12 Great God, Jehovah

OGHAẠPH OOKARAGH *

1. Eeghe araraạr kụ ketue etir ephoghom mọ epẹ olhephiri oọny amhoọgh bọ aghị esi adọl uw-emhụ?

EKPO ONHỤ phọ ‘uw-emhụ’ remạ ghan eeghe esi anạ? Abuniin alhephiri anmụny mongọ ogẹl m’eḍighinhom iyaạr, eten adọl aghuḍum ekpisi abidị, obobọ ipẹ ookonhom bọ bidị etir eten phọ epẹ bidị rozoọm ghan bọ nmariịr r’ibạm anmụny abidị. Onyọ umarani dị odi ghan epẹ Europe, dị oghol mọ Yanita aḅẹm mọ, “Epẹ mị odi ghan bọ awe omiịn nmariịr idiphọ awe dị osoorom, ḅilhẹ mọ okpẹ osighẹ idiphọ arebenhẹ.” Kụ onyọ umor dị oghol mọ Luke, dị odi ghan epẹ United States, aḅẹm mọ, “Abuniin aburudẹ rotughemhị ghan nmụny abidị mọ anmariịr okpẹ ghan oḅoorian bịn kụ ophogh aani ghan, mọ i/moghi olher ghan arurụ ongọ aḍiitughiạn abidị.” Toroboiperolbọ, eegharạ phọ epẹ phọ ii/ghironhaan eten phọ epẹ aZihova rawạ bọ mọ alhephiri anmụny ozoọm ghan nmariịr phọ. (Poghom Mạk 7:13.) Ika nuụn kụ edị olhephiri oọny katue bọ atuughạ oḍighi ogey uw-emhụ eghunotu?

2. Eeghe iyaạr kụ edị ewạ mọ uw-emhụ eghunotu alhegheri, kụ eeghe kụ iḍighi?

2 Orue oḍighi ogey uw-emhụ eghunotu, olhephiri oọny amoọgh onhaghanhạn ipẹ aZihova rawạ bọ mọ odị aḍighi. Ewạ kẹn dị odị kalegheri iyaạr phọ eḍighi bọ kụ aZihova angọ bọ buniin iikpọ ophogh abunhọn ḅilhẹ r’ipẹ odị katue bọ atuughaạny eḍeenhaan phọ aZihova r’aZizọs ophighi bọ. Eeghe kụ iḍighi kụ emhạn bọ maạr dị olhephiri oọny kalegheri iphẹn phọ? Loor esi dị, aZihova mangọ ruw-emhụ eghunotu iikpọ, kụ odị rawạ mọ bidị oḍighinhom agey iikpọ phọ ongọ bọ bidị.—Luk 12:48b.

UW-EMHỤ P’EEGHE?

3. Odaphạn 1 Korịnt 11:3 ika kụ idị aZihova adẹ eghunotu phọ odị?

3 Bạl 1 Korịnt 11:3. Ekpịgh phọ ephẹn phọ ekaạph ilọ eten phọ epẹ aZihova adẹ bọ eghunotu phọ odị, emhiigh epẹ k’akẹ kụ esi siẹn ade phọ. Oḍighi uw-emhụ aḅaramaạm iyạl araraạr—iikpọ r’ongọ igbiighi ipẹ odị aḍighi bọ. AZihova kụ ogbogh ‘uw-emhụ’ obobọ oye dị amhoọgh iikpọ dị epelheghiom, kụ odị kụ rapogh ghan oomo anmụny phọ odị, emhiigh ruukpaạny phọ kụ esi omhạr awe. (Rom. 14:10; Efẹ. 3:14, 15) AZihova mangọ Zizọs iikpọ ophogh ookpomhoghan phọ, kuolọ aZizọs kangọ ni igbiighi ilọ eten phọ epẹ odị uzoọm bọ iyira. (1 Kọr. 15:27) AZihova angọ kẹn ni olom iikpọ ophogh anhịr r’ibạm anmụny phọ odị, Kuolọ olom mọ kangọ ni igbiighi aZihova r’aZizọs ilọ eten phọ epẹ odị aphogh bọ eghunotu phọ odị.—1 Pit. 3:7.

4. AZihova r’aZizọs omoọgh eeghe iikpọ?

4 Idiphọ uw-emhụ oomo aḅirinhi phọ, aZihova amoọgh ni iikpọ otọ ipẹ anmụny phọ odị kozọ ghan bọ, ḅilhẹ r’omhiịn mọ bidị odaphạn ni itọ phọ odị. (Isa. 33:22) Idiphọ uw-emhụ ookpomhoghan aKristẹn phọ, aZizọs amoọgh ni iikpọ olhọgh iilhogh ḅilhẹ r’omhiịn mọ odaphạn ni.—Gal. 6:2; Kọl. 1:18-20.

5. Eeghe iikpọ kụ edị onyọ aKristẹn dị aḍighi uw-emhụ eghunotu amhoọgh, kụ iikpọ phọ odị esi ḍighen?

5 Odaphạn iphẹn aZihova r’aZizọs ophighi bọ, onyọ aKristẹn dị aḍighi uw-emhụ eghunotu amoọgh ni iikpọ ongọ ghan itọ eghunotu phọ odị. (Rom. 7:2; Efẹ. 6:4) Toroboiperolbọ, iikpọ phọ odị emoọgh ni esi dị ekpọ ukpe. Esi omaạm, itọ phọ odị emoọgh okpasị ghan isiphẹ asinhị iilhogh phọ edi bọ siphẹ Ekpo Onhụ phọ Enhaạn. (Prov. 3:5, 6) Ḅilhẹ uw-emhụ eghunotu o/mhoọgh iikpọ odoghoḍi iilhogh ongọ abudị u/ḍighi aani buọ eghunotu odị. (Rom. 14:4) Ḅilhẹ kẹn, mem dị anmụny r’anmanyaạn uw-emhụ eghunotu omhanhạm kụ orugh ḍiọ abidị, bidị kokiọm ni ghisigh olọgh ghan eegu odẹ phọ abidị, kuolọ bidị u/lo mun eeḍiạn itooghị odị.—Mat. 19:5.

EEGHE KỤ IḌIGHI KỤ AZIHOVA AMITEOM BỌ IIKOLHOBIAN ARUW-EMHỤ PHỌ?

6. Eeghe kụ iḍighi kụ aZihova aphighi bọ iikolhobian aruw-emhụ phọ?

6 AZihova aphighi iikolhobian aruw-emhụ loor esi ephomhoghiạn phọ odị amhoọgh bọ aghị esi eghunotu phọ odị. Eḍighi inmo dị eḍuạ ḍighaạgh odị kụ eru. Iikolhobian aruw-emhụ phọ reḍighi ghan idị eghunotu phọ aZihova keḍighi esi eephọ, r’oḅoonhomhị ghan oomo araraạr. (1 Kọr. 14:33, 40) Iikolhobian aruw-emhụ phọ kụ mi/lo bọ, obọ eghunotu phọ aZihova miwalhawalhạ ni ḅilhẹ oḅaạl olhoghi mu/tọl. Esi omaạm, obọ oye r’oye mu/legheri oye dị akpẹ ghan ongọ osopha mem lọ ophạm raghaạph ḅilhẹ r’oye dị kaḍiemhiom oḍighi ipẹ mosopha bọ.

7. Odaphạn Efesọs 5:25, 28, eḍighi ni edị aZihova rawạ mọ alhephiri anmụny phọ oponomaam nmariịr phọ ḍughụm?

7 Eḍighi maạr dị iikpọ phọ uw-emhụ eghunotu amhoọgh bọ eḍighi ni inmo k’Enhaạn, eeghe kụ iḍighi kụ ibadị anmariịr ḍio arodon ologhoma bọ mọ aburulom mọ abidị owiririom ni bidị? Iphẹn phọ remite ghan loor esi dị ibadị alhephiri anmụny mogunhọm siigbu phọ aZihova aphighinhaan bọ rughunotu, bịn osaḅạr odạph iḍighinhom araraạr ekpisi abidị. Ḅilhẹ kẹn bidị otue ni otuạn ogbaanyamhị eephuạ abidị bịn ozoọm nmariịr phọ abidị eten dị i/nighẹ. Esi omaạm, olom atue ni aponomaam anhịr phọ odị ilọ oḍeenhaan mọ onọ aḍigh ni eghuan ḅilhẹ mọ onọ “olhephiri oọny.” Eeni odị atue ni aatughiạn mọ onọ ka/tue akpaariọm anhịr phọ odị ophomhoghiạn odị, kuolọ mọ onọ katue ni aḍighi idị anhịr phọ odị kakiilhaan ghan nyodị. Bịn eeni anhịr phọ aḍighi ghan torobọ ilọ odị aḅẹm loor oghiilhaan. * Aḍiitughiạn phọ aḍiẹn phọ ḅilhẹ r’eegharạ phọ ephẹn phọ repiemhi ghan eegu phọ r’eghuan phọ anmariịr omhoọgh bọ, kụ iphẹn phọ ekạr kụ egbạgh r’ipẹ aZihova rawạ bọ esi aburulom.—Bạl Efesọs 5:25, 28.

IKA KỤ IDỊ OLHEPHIRI OỌNY KATUE ATUUGHẠ ILỌ OḌIGHI OGEY UW-EMHỤ EGHUNOTU?

8. Ika kụ idị olhephiri oọny katue atuughạ ilọ oḍighi ogey uw-emhụ eghunotu?

8 Olhephiri oọny katue ni atuughạ ilọ oḍighi ogey uw-emhụ eghunotu esi otuughaạny eten phọ epẹ aZihova r’aZizọs roḍighinhom ghan bọ iikpọ phọ abidị. Ooḅeghiọn iyạl araagharạ dị aZihova r’aZizọs oḍeenhaan, kụ amhiịn idị uw-emhụ eghunotu katue aḍeenhaan aani raagharạ phọ ipẹ phọ anhịr odị ḅilhẹ r’ibạm anmụny phọ.

9. Ika kụ idị aZihova aḍeenhaan osooromhi aloor?

9 Osooromhi aloor. AZihova kụ oye dị asụ olhoghi apelheghiom siẹn oomo aḅirinhi phọ, ghalhamọ r’iduọn phọ ni, odị raler ghan ni rurụ kangọ ḍiitughiạn arebenhẹ phọ odị. (Gen. 18:23, 24, 32) Odị rangọ ghan ni eepoogh buphẹ odi bọ eeḍiạn itooghị phọ odị osogh aani aḍiitughiạn. (1 Ki. 22:19-22) AZihova amunughan, kuolọ odị iyira ru/puru ghan idị ipel iyira loor. Kparipẹ ghụn, odị raloghonhaạn ghan ḍighaạgh buphẹ rokumu bọ nyodị omhoọgh ekol. (Ps. 113:6, 7) Okạr oghaạph, aBaibul phọ aḅẹm mọ aZihova “olọgh ḍighaạgh.” (Ps. 27:9; Hib. 13:6) Uw-emhạ phọ Devid aḅẹm mọ osooromhi aloor phọ aZihova kụ alhoghonhaạn bọ nyodị ḍighaạgh orue oḍighi omhunhenhi oboom oḍighi phọ ongọ bọ nyodị.—2 Sam. 22:36.

10. Ika kụ idị aZizọs aḍeenhaan osooromhi aloor?

10 Ooḅeghiọn eḍeenhaan phọ aZizọs. Ghalhamọ r’iduọn odị aḍighi bọ ni Uw-emhoọgh r’Odẹ otu abumatuạn phọ odị, odị aatol li ruwol abidị. AZihova atuạn eeghe kụ aḍighi bọ idị ogẹ iphẹn phọ oseere siẹn aBaibul phọ? Iikia i/lo, odị atuạn dị aruw-emhụ eghunotu, r’abunhọn awe, kodaphạn aani eḍeenhaan phọ ephẹn phọ. AZizọs r’aloor aḅẹm mọ: “Mị mingọ inyina iyaạr omaạm ghan mọ iḍighi ghan iphẹn mị iḍighi bọ inyina.” (Jọn 13:12-17) Ii, ghalhamọ r’iduọn odị amhoọgh bọ ni iboom iikpọ, aZizọs o/gon dị kokumu nyodị. Kparipẹ ghụn, odị kụ akumu bunhọn.—Mat. 20:28.

Uw-emhụ eghunotu kaḍeenhaan mọ onọ asooromhi ni loor aḅilhẹ apomhoghiạn eghunotu phọ odị esi ophinom aani ghan abin rukumuan olhoghotu ḅilhẹ r’olhoghonhaạn aḍighaạgh eghunotu phọ odị omhoọgh asiya dị ekpạr r’aZihova (Miịn siikpịgh phọ 11, 13)

11. Ika kụ idị uw-emhụ eghunotu katue atuughaạny eḍeenhaan phọ aZihova r’aZizọs?

11 Araraạr dị yira otuughạ. Uw-emhụ eghunotu katue ni aḍeenhaan osooromhi aloor esi ibadị areten. Esi omaạm, odị ka/gon ghan omhiịn dị anhịr phọ odị ḅilhẹ r’ibạm anmụny phọ koḍighi ghan raraạr eten dị emhunhughan. Odị kaler aani ghan rurụ angọ ḍiitughiạn anhịr phọ r’ibạm anmụny phọ odị, ghalhamọ r’amem dị egbạgh r’aḍiphẹ odị. Oniin anhịr dị odi ghan epẹ United States, dị oghol mọ Marley, aḅẹm mọ: “Eeni amem olom mọ amhị r’amhị romoọgh ghan ni ḍiitughiạn dị egbaranhaạn. Kuolọ mị raloghoma ghan ni mọ odị usereghiạn ni imhị aḅilhẹ ulhọgh imhị eegu, loor esi dị odị rameera ghan ni mọ mị ukaạph aani iyaạr, kụ aḅilhẹ amiigha loor aaḅeghiọn apogh kụ agbi nuụn osopha osopha phọ odị.” Oḅarạm isiẹn, olom dị asooromhi loor rapinom aani ghan ni bin iiḍighi olhoghotu, ghalhamọ r’amem dị awe emhạ phọ abidị osighẹ iiḍighi olhoghotu idiphọ oḍighi anmariịr. Ipẹ phọ etue ni eḍighi ipaanhaạn. Eeghe kụ iḍighi? Oniin onyọ umarani dị oghol mọ Rachel, aḅẹm mọ, “epẹ emhạ abidị, eḍighi maạr dị olom alhoghonhaạn ḍighaạgh anhịr odị ootolhogh asigbagbạ dị olheom oseere obobọ aḅeer otu, pọ amatuman r’asiya abidị kopuru ni mọ: Ophọn phọ okạr ‘olhephiri oọny ni?’ Bidị kootughiạn ghan mọ olom mọ o/rue otooghị ongọ anhịr phọ odị.” Eḍighi maạr dị aḍiitughiạn phọ aḍiphẹ phọ kụ eetura ekool phọ anyinha, pọ tuutughiạn mọ aZizọs aatol li ruwol abumatuạn phọ odị, ghalhamọ r’iduọn osighẹ bọ mọ aḍighi oḍighi arebenhẹ. Ogey uw-emhụ eghunotu ra/wạ ghan oḍighi idị odị kanighẹ ghisigh awe, kuolọ rawạ ghan oḍighi idị olhoghi anhịr phọ odị r’ibạm anmụny phọ keḅaạl. Etigheri osooromhi aloor, eeghe kụ enhọn eegharạ dị emhạn maạr dị uw-emhụ eghunotu kamoọgh?

12. Ephomhoghiạn inyu aZihova r’aZizọs oḍighi eeghe?

12 Ephomhoghiạn. AZihova rasighẹ ghan ephomhoghiạn kụ aḍighinhom torobọ iyaạr. (1 Jọn 4:7, 8) R’ephomhoghiạn, odị rakparamhị ghan siya phọ ayira r’odị dị eego esi Ekpo Onhụ phọ odị—Baibul phọ—ḅilhẹ r’ookpomhoghan phọ odị. Odị raḍighi ghan idị yira kologhoma oghoph esi oḍighi ghan idị yira kokuphom owol mọ odị uphomhoghiạn ni iyira. Kokaạph aani ika ilọ araraạr phọ ikuom bọ iyira? AZihova rungọ ghan ni “iyira oomo araraạr lọ yira koboom.” (1 Tim. 6:17) Mem lọ yira opiomạn, odị ruḅaạm ghan ni iyira, kuolọ odị ra/bilhẹ ghan ophomhoghiạn ayira. Ephomhoghiạn kụ inyu bọ aZihova omiteom iikolhobian etagharạn phọ. Ḅilhẹ aZizọs uphomhoghiạn iyira iboom dị tutụ angọ ghuḍum mọ odị loor emhụ ayira. (Jọn 3:16; 15:13) Iyaạr i/lo dị ketue ekikima aZihova r’aZizọs ophomhoghiạn abuphẹ oḅạr bọ bidị.—Jọn 13:1; Rom. 8:35, 38, 39.

13. Eeghe kụ iḍighi kụ emhạn bọ ni maạr dị uw-emhụ eghunotu kaḍeenhaan ghan ephomhoghiạn eghunotu phọ odị? (Miịn igbe phọ “ Oye Dị Purukụ Aphin Anhịr Kaḍighi Ika Kụ Anhịr Phọ Alọgh Nyodị Eegu?”)

13 Araraạr dị yira otuughạ. Uw-emhụ eghunotu asighẹ ghan ephomhoghiạn kụ aḍighinhom torobọ iyaạr. Eeghe kụ iḍighi kụ emhạn bọ maạr? Otelhedom mọ aJọn aphagharanhaạn mọ: “Oye lọ alọgh ḍien onyọ asiya odị kụ raḅẹm ghan mọ onọ apomoghiạn ni Enaạn, pọ ogbaạm okpẹ. Mọ odị o/phomoghiạn onyọ asiya phọ dị mamiịn ghan bọ, ika kụ edị odị kapomoghiạn bọ Enaạn phọ dị k”omiịn ghan bọ?” (1 Jọn 4:11, 20) Okạr oghaạph, oye dị aphomhoghiạn eghunotu odị kụ rawạ ni otuughaạny aZihova r’aZizọs, kaloghonhaạn ḍighaạgh eghunotu phọ odị omhoọgh asiya dị ekpạr r’aZihova, aḍighi idị bidị kologhoma oghoph, aḅilhẹ amiteom ghan angọ raraạr lọ ekuom eghunotu phọ odị. (1 Tim. 5:8) Katughemhị ghan aḅilhẹ aliọm ghan ibạm anmụny phọ odị. Odị kaḅilhẹ kẹn akiọm ghisigh atuughạ ilọ osopha ghan osopha dị kakuenhi aZihova ḅilhẹ engọ suọ eghunotu phọ odị. Uguạ, ooḅeghiọn ilọ atorobọ iyaạr phọ ewạ bọ dị uw-emhụ eghunotu kaḍighi, kụ omhiịn ipẹ odị katue bọ atuughaạny aZihova r’aZizọs.

ARARAẠR DỊ UW-EMHỤ EGHUNOTU KAḌIGHI

14. Ika kụ idị uw-emhụ eghunotu katue bọ aloghonhaạn ḍighaạgh eghunotu phọ odị omhoọgh asiya dị ekpạr r’aZihova?

14 Kaloghonhaạn ḍighaạgh eghunotu phọ odị omhoọgh asiya dị ekpạr r’aZihova. Idiphọ Odẹ phọ odị, aZizọs amoọgh ogbolhomaam oḍighi idị buphẹ odị rapogh bọ komoọgh siya dị ekpạr r’aZihova. (Mat. 5:3, 6; Mạk 6:34) Igina phọ kẹn ni, ekpanhạ iyaạr dị uw-emhụ eghunotu kaḍighi pọ olhoghonhaạn aḍighaạgh eghunotu phọ odị omhoọgh igey asiya r’aZihova. (Deut. 6:6-9) Iduọn phọ pọ odị kamiịn mọ odị r’eghunotu phọ odị otuughạ ghan ni Ekpo Onhụ phọ Enhaạn, okị ghan ituughạ, ogbạ ghan ikpo onhụ phọ, olọgh opophe oḅilhẹ opamanhạm siya arighirị phọ abidị r’aZihova.

15. Eghẹn kụ eniin eten dị uw-emhụ eghunotu katue aḍeenhaan mọ onọ rapogh ni eghunotu phọ odị?

15 Kaḍighi ghan idị bidị kologhoma oghoph. AZihova aḅenhị ni Zizọs esi dị abunhọn odi mọ onọ apomoghiạn ni nyodị. (Mat. 3:17) AZizọs aḅenhị ghan ni budaphạm mọ odị mọ onọ apomhoghiạn ni bidị kụ aḅilhẹ ghan aḍighi aḍeenhaan. Ḍieriphọ aḍighaạgh phọ, abumatuạn phọ uḅenhị ghan ni nyodị mọ bidị opomhoghiạn ni nyodị. (Jọn 15:9, 12, 13; 21:16) Uw-emhụ eghunotu kaḍighi ghan aḍeenhaan mọ onọ apomoghiạn ni anhịr phọ odị r’ibạm anmụny phọ, idiphọ otuughạ ghan aBaibul phọ r’abidị. Odị aḅenhị ghan kẹn bidị mọ onọ apomhoghiạn ni bidị, kụ mem lọ ekpeanhạn, asẹph ghan bidị ghisigh abunhọn awe.—Prov. 31:28, 29.

Orue oḍighi idị eḅeraạn aZihova, uw-emhụ eghunotu amoọgh omiteom ghan ongọ araraạr lọ ekuom eghunotu phọ odị (Miịn ekpịgh phọ 16)

16. Eeghe kụ edị uw-emhụ eghunotu kaḅilhẹ aḍighi, kụ ika kụ idị odị katue apamanhạm ephoghom dị eeleeny ilọ iphẹn phọ?

16 Kamiteom ghan angọ raraạr lọ ekuom eghunotu phọ odị. AZihova amiteom ghan ni angọ we phọ Izrạl raraạr lọ ekuom bidị, ghalhamọ r’amem dị odị alhiọm bidị loor oḅaạr emhụ. (Deut. 2:7; 29:5) Ḍio arodon kẹn, odị ramiteom ghan ni kungọ iyira raraạr lọ ikuom iyira. (Mat. 6:31-33; 7:11) AZizọs kẹn ni angọ ghan ni eḍien buphẹ odạph ghan bọ nyodị. (Mat. 14:17-20) Aḅilhẹ amhoọgh ogbolhomaam ilọ omhoon aloor phọ abidị. (Mat. 4:24) Oru oḍighi ipẹ eḅeraạn bọ aZihova, uw-emhụ eghunotu amoọgh omiteom ghan ongọ eghunotu phọ odị. Toroboiperolbọ, ewạ ni mọ odị amhoọgh ephoghom dị eeleeny. Odị ku/lọgh muboom amem siphẹ oḍighi owạ kụ olhe phọ odị bịn aphogh agunhọm oḍighi idị eghunotu phọ odị komoọgh siya dị ekpạr r’aZihova ḅilhẹ r’oghoph eghunotu phọ odị.

17. Eeghe eḍeenhaan kụ edị aZihova r’aZizọs ophighi esi eten phọ epẹ bidị rotughemhị ghan bọ koḅilhẹ ulhiọm iyira?

17 Katughemhị ghan. AZihova ratughemhị ghan kaḅilhẹ ulhiọm iyira ilọ olhoghonhaạn ayira ḍighaạgh. (Hib. 12:7-9) Idiphọ Odẹ phọ odị, aZizọs atughemhị ghan ni buphẹ orọl bọ eeḍiạn odị r’eten ephomhoghiạn. (Jọn 15:14, 15) Odị aḅaạm ghan ni bidị kuolọ eyoghoyoghọ eten. (Mat. 20:24-28) Odị anaghanhạn ni mọ yira u/munughan ḅilhẹ mọ yira ropiomạn ghan ni.—Mat. 26:41.

18. Eeghe iyaạr kụ edị ogey uw-emhụ eghunotu alhegheri?

18 Uw-emhụ eghunotu dị ratuughaạny aZihova r’aZizọs ralegheri ghan ni mọ anhịr phọ odị ḅilhẹ r’ibạm anmụny phọ u/munughan. Esi iduọn phọ, odị ‘ra/mooghaam ghan’ anhịr phọ odị obobọ ibạm anmụny phọ. (Kọl. 3:19) Kparipẹ ghụn, odị ‘rapoomi’ ghan ni loor kasighẹ aḍighinhom ḍinhị olhogh phọ ogẹ bọ siphẹ Galatia 6:1 orue oolemhi ghan abidị, ḅilhẹ odị alegheri ni mọ onọ kẹn o/mhunhughan aani. Idiphọ aZizọs, odị alọgh ni elhegh mọ emạ eten otughemhị ghan pọ omhoọgh emạ eḍeenhaan.—1 Pit. 2:21.

19-20. Mem dị esi osopha osopha ika kụ idị uw-emhụ eghunotu katue atuughaạny aZihova r’aZizọs?

19 Ka/sopha ghan osopha dị kengọ ogina odị suọ. AZihova rasopha ghan osopha dị keloghonhaạn aani ḍighaạgh bunhọn. Esi omaạm, odị asopha olhẹm aghuḍum, ki/lọ omhooghọm asuọ bịn, kuolọ awạ dị yira kokelhọm aani ibo aghuḍum. Oye o/lho dị mutue akpaariọm aZihova ongọ ogina Oọny phọ odị omhugh ookpereghi ikarạph phọ ayira. Kuolọ r’ophooph olhoghi, odị asopha ni ongọ Oọny phọ odị idiphọ ekiạ etagharạn pidị ilhoghonhaạn iyira ḍighaạgh. AZizọs kẹn ni asopha ghan ni osopha dị engọ bunhọn suọ. (Rom. 15:3) Esi omaạm, odị asopha ni osighẹ amem ophooghian odị otughemhiọm aḍita awe dị osoor.—Mạk 6:31-34.

20 Ogey uw-emhụ eghunotu alegheri ni mọ iyaạr dị ekpạr dị odị kaḍighi pọ osopha osopha dị kengọ suọ eghunotu phọ odị, kụ ra/peghom ghan ephegh mem lọ esi osopha osopha. Odị rakparaghạ ghan ni oḍighi idị odị ka/sopha osopha dị odị u/pụr uutughiạn, ḅilhẹ kẹn ka/daphạn ghan inyuughiom mọ odị bịn asopha osopha. Kparipẹ ghụn, odị kameera aZihova atughemhị nyodị ilọ oḍighi. * (Prov. 2:6, 7) Uw-emhụ eghunotu kụ aḍighi iphẹn phọ, pọ kaa/tughiạn ghan ilọ kengọ suọ ogina odị bịn.—Fil. 2:4.

21. Yira kooḅeghiọn eeghe siphẹ emhuoghaạph phọ etum bọ siẹn?

21 AZihova mangọ ruw-emhụ eghunotu oḍighi dị aḅarạm ni ipaanhaạn, kụ odị kamoọgh ni igbiighi r’abidị ilọ ipẹ bidị omhunhenhi bọ oḍighi phọ ophọn phọ. Kuolọ eḍighi maạr dị olom akparaghạ adaphạn eḍeenhaan phọ aZihova r’aZizọs ophighi bọ, odị kaḍighi ni ogey uw-emhụ eghunotu. Kụ eḍighi maạr dị anhịr phọ aḍighi ni ipẹ odị, pọ apinien phọ kamoọgh ni oḅaạl olhoghi. Ika nuụn kụ edị anhịr phọ kasighẹ olom mọ odị aḍighi bọ uw-emhụ eghunotu phọ, kụ eeghe ipaanhaạn kụ edị odị amhoọgh? Emhuoghaạph phọ etum bọ siẹn kepanyanhaạn ni sipuru phọ iphẹn phọ.

AḌUỌR PHỌ 16 Praise Jah for His Son, the Anointed

^ par. 5 Mem dị olhephiri oọny aphin anhịr, pọ odị maḍighi uw-emhụ eghunotu. Siẹn emhuoghaạph phọ ephẹn phọ, yira kooḅeghiọn iyaạr phọ oḍighi uw-emhụ remạ ghan bọ, ipẹ eḍighi bọ kụ aZihova amiteom bọ iikolhobian phọ iphẹn phọ, ḅilhẹ r’iyaạr dị alhephiri anmụny kotue otuughạ esi eḍeenhaan phọ aZihova r’aZizọs. Siphẹ emhuoghaạph phọ etum bọ siẹn, yira kooḅeghiọn iyaạr dị aburulom r’anmariịr ilhom kotue otuughạ esi eḍeenhaan phọ aZizọs r’inhọn areḍeenhaan awe aBaibul. Kụ siphẹ omhunhenhiom iraạr phọ, yira ooḅeghiọn ipẹ abumor koḍighinhom ghan bọ iikpọ phọ abidị siphẹ ookpomhoghan phọ.

^ par. 7 Eeni amem roḍeenhaan ghan ni siphẹ asifim mọ, esi egberi, ḅilhẹ r’olhoghi arinyạ olhephiri oọny dị ragilaạm anhịr odị, ḅilhẹ r’akuphogh. Iphẹn phọ meḍighi idị awe rootughiạn ghan mọ i/beeph dị olhephiri oọny kasighẹ iikpọ phọ odị awiririom anhịr odị.

^ par. 20 Olhegheri obughẹ ilọ orue osopha ghan ogey osopha, miịn emhuoghaạph phọ eḅẹm bọ mọ, “Make Decisions That Honor God,” siphẹ aWatchtower April 15, 2011, ipoḍi phọ 13-17.