1. Mɛni ji ní komɛ nɛ ma nyɛ ma ná bɔ nɛ nyumu ko kɛ e yo kɛ e bimɛ hiɔ si ha a nɔ he wami?

KƐ O naa “yi yemi” ha kɛɛ? Nyumu komɛ haa nɛ a kusumi loo bɔ nɛ a tsɔse mɛ ha a náa bɔ nɛ a kɛ a yo kɛ a bimɛ hii si ha a nɔ he wami. Nyɛmiyo ko nɛ a tsɛɛ lɛ ke Yanita nɛ e ngɛ Europe ɔ de ke: “Ngɛ ye ma a mi ɔ, nihi susuɔ kaa nyumuhi a he ngɛ se nami pe yihi, nɛ e sa nɛ a na yihi kaa nyɔguɛhi. Susumi nɛ ɔ ná nihi a nɔ he wami wawɛɛ.” Nyɛminyumu ko hu nɛ a tsɛɛ lɛ ke Luke nɛ e ngɛ United States ɔ de ke: “Tsɛmɛ komɛ tsɔɔ a bimɛ nyumuhi kaa yihi a munyu he hia we, nɛ ke a tsɔɔ a juɛmi ngɛ nɔ́ ko he po ɔ, e sɛ nɛ a buɔ mɛ tue.” Se tsa pi jã nɛ Yehowa suɔ kaa hunomɛ kɛ a yihi nɛ hi si. (Kɛ to Maako 7:13 ɔ he.) Lɛɛ mɛni nɛ nyumu ma nyɛ maa pee konɛ e pee weku yi kpakpa?

2. Mɛni nɛ e sa nɛ weku yi nɛ le, nɛ mɛni he je?

² Loko nyumu ko maa pee weku yi kpakpa a, jã e nu nɔ́ nɛ Yehowa ngɛ hlae nɛ e pee ɔ sisi kekle. Jehanɛ hu ɔ, e sa nɛ e le nɔ́ he je nɛ Yehowa to yi yemi he blɔ nya, kɛ blɔ nɔ nɛ e maa gu kɛ kase nɔ hyɛmi nɔ́ nɛ Yehowa kɛ Yesu peeɔ ɔ. Se mɛni he je nɛ e sa nɛ nyumu nɛ le ní nɛ ɔmɛ ɔ? E sa nɛ e le ejakaa Yehowa kɛ he blɔ komɛ wo weku yihi a dɛ, nɛ e hyɛɛ blɔ kaa a kɛ he blɔ nɛ ɔmɛ ma tsu ní saminya.​—Luka 12:48b.

3. Mɛni wa kaseɔ ngɛ yi yemi he ngɛ nɔ́ nɛ Baiblo ɔ de ngɛ 1 Korinto Bi 11:3 ɔ nya?

³ Kane 1 Korinto Bi 11:3. Ngmami nɛ ɔ tsɔɔ bɔ nɛ Yehowa to e weku nɛ ngɛ hiɔwe kɛ zugba a nɔ ɔ he blɔ nya ha. Lɛ ji yi kɛ ha nɔ́ fɛɛ nɔ́ ko. E to yi yemi he blɔ nya, nɛ e ha ni komɛ he  blɔ komɛ, se a maa bu bɔ nɛ a kɛ he blɔ nɛ Yehowa ha mɛ ɔ ma tsu ní ha a he akɔtaa ha lɛ. (Rom. 14:10; Efe. 3:14, 15) Yehowa ha Yesu he blɔ kaa e hyɛ asafo ɔ nɔ, se Yesu maa bu bɔ nɛ e kɛ wɔ hiɔ si ha a he akɔtaa ha Yehowa. (1 Kor. 15:27) Yehowa ha huno he blɔ kaa e hyɛ e yo kɛ e bimɛ a nɔ, se e maa bu bɔ nɛ e kɛ mɛ hiɔ si ha a he akɔtaa ha Yehowa kɛ Yesu.​—1 Pet. 3:7.

4. Mɛni he blɔ nɛ Yehowa kɛ Yesu ngɛ?

⁴ Akɛnɛ Yehowa ji yi kɛ ha e weku nɛ ngɛ hiɔwe kɛ zugba a nɔ tsuo he je ɔ, e ngɛ he blɔ nɛ e woɔ e weku mi bimɛ ɔmɛ mlaahi ngɛ bɔ nɛ e sa nɛ a ba a je mi ha a he, nɛ e ngɛ he blɔ nɛ e hyɛɛ kaa a kɛ mlaa amɛ ngɛ ní tsue lo. (Yes. 33:22, 23) Yesu hu ji yi kɛ ha Kristofohi asafo ɔ, enɛ ɔ he ɔ, e ngɛ he blɔ nɛ e woɔ asafo ɔ mlaahi, nɛ e ngɛ he blɔ nɛ e hyɛɛ kaa a ngɛ mlaa amɛ a nɔ yee lo.​—Gal. 6:2; Kol. 1:18-20.

5. Mɛni he blɔ nɛ weku yi ngɛ, se mɛni he blɔhi nɛ e be?

⁵ Kaa bɔ nɛ e ngɛ ngɛ Yehowa kɛ Yesu blɔ fa mi ɔ, weku yi ngɛ he blɔ kaa e mwɔɔ yi mi kpɔhi kɛ haa e weku ɔ. (Rom. 7:2; Efe. 6:4) Se ní komɛ ngɛ nɛ e be he blɔ kaa e peeɔ. Kaa nɔ hyɛmi nɔ́ ɔ, e sa nɛ e da sisi tomi mlaahi nɛ ngɛ Mawu Munyu ɔ mi ɔ nɔ kɛ wo mlaahi. (Abɛ 3:5, 6) E be he blɔ kaa e woɔ nihi nɛ a be e weku ɔ mi ɔ mlaahi. (Rom. 14:4) Jehanɛ hu ɔ, ke e bimɛ nyumuhi kɛ yihi wa nɛ a je we mi ɔ, a yaa nɔ nɛ a jeɔ bumi kpo kɛ tsɔɔ lɛ, se tsa pi lɛ ji a yi hu.​—Mat. 19:5.

6. Mɛni he je nɛ Yehowa to yi yemi he blɔ nya?

⁶ Yehowa to yi yemi he blɔ nya ejakaa e suɔ e weku ɔ. E ji nike ní nɛ je e ngɔ. Blɔ nya tomi nɛ ɔ haa nɛ tue mi jɔmi hii Yehowa weku ɔ mi, nɛ níhi yaa nɔ saminya ngɛ mi. (1 Kor. 14:33, 40) Ke a li nɔ nɛ ji yi ngɛ Yehowa weku ɔ mi ɔ, níhi be nɔ yae saminya, nɛ weku mi bimɛ ɔmɛ a bua be jɔe. Kaa nɔ hyɛmi nɔ́ ɔ, nɔ ko be lee nɔ nɛ ngɛ he blɔ kaa e mwɔɔ yi mi kpɔhi ngɛ weku ɔ mi, kɛ nɔ nɛ e sa nɛ e hyɛ konɛ a kɛ yi mi kpɔ mwɔmi nɛ ɔmɛ nɛ tsu ní.

7. Kɛ Efeso Bi 5:25, 28 ɔ tsɔɔ kaa e sa nɛ nyumuhi kɛ a yihi nɛ hi si ha kɛɛ?

⁷ Ke yi yemi he blɔ nya nɛ Yehowa to ɔ hi ɔ, lɛɛ mɛni he je nɛ mwɔnɛ ɔ, yihi fuu nuɔ he kaa a hunomɛ waa mɛ yi mi nɛ a yeɔ a nɔ ɔ? Nɔ́ he je ji kaa nyumuhi fuu nyɛɛɔ kusumihi a se mohu pe nɛ a kɛ sisi tomi mlaahi nɛ Yehowa to he blɔ nya kɛ ha wekuhi ɔ ma tsu ní. Be komɛ hu ɔ, a waa a yi ɔmɛ yi mi konɛ mɛ nitsɛmɛ a ná bua jɔmi. Kaa nɔ hyɛmi nɔ́ ɔ, eko ɔ, nyumu ko maa ye e yo nɔ ngɛ blɔ nɛ dɛ nɔ konɛ e nu he kaa e he hia wawɛɛ, aloo e kɛ ha nɛ ni kpahi nɛ a le kaa “nyumu” ji lɛ. Eko ɔ, e ma susu kaa e be nyɛe maa nyɛ e yo ɔ nɔ kaa e suɔ lɛ, se e ma nyɛ maa nyɛ e nɔ nɛ e ye lɛ gbeye. Nɛ ke e ha nɛ e yo ɔ ye lɛ gbeye ɔ, lɔ ɔ ma ha nɛ e ye e nɔ. * Susumi nɛ ɔ nɛ nyumu komɛ hɛɛ kɛ ní nɛ ɔmɛ nɛ a peeɔ ɔ dɛ kulaa. A bui yihi kaa bɔ nɛ e sa nɛ a bu mɛ ɔ, nɛ ní peepee nɛ ɔ kɛ Yehowa suɔmi nya ní kɔ we.​—Kane Efeso Bi 5:25, 28.

8. Mɛni nɛ nyumu ko ma nyɛ maa pee konɛ e pee weku yi kpakpa?

⁸ Nyumu ko ma nyɛ maa pee weku yi kpakpa ke e kaseɔ bɔ nɛ Yehowa kɛ Yesu kɛ a yi yemi blɔ nya nɛ a ngɛ ɔ tsuɔ ní ha a. Nyɛ ha nɛ wa susu su enyɔ komɛ nɛ Yehowa kɛ Yesu je kpo ɔ a he, nɛ waa hyɛ bɔ nɛ weku yi ko ma nyɛ ma je su nɛ ɔmɛ kpo ngɛ bɔ nɛ e kɛ e yo kɛ e bimɛ hiɔ si ha a mi.

9. Ngɛ mɛni blɔ nɔ nɛ Yehowa baa e he si?

 ⁹ He si bami. Yehowa le ní pe nɔ fɛɛ nɔ, se kɛ̃ ɔ, ke e sɔmɔli ngɛ a juɛmi tsɔɔe ngɛ nɔ́ ko he ɔ, e buɔ tue. (1 Mose 18:23, 24, 32) E ha nihi nɛ a ngɛ e sisi ɔ he blɔ nɛ a tsɔɔ a juɛmi ngɛ níhi a he. (1 Ma. 22:19-22) Yehowa ye mluku, se e hyɛ we blɔ kaa waa pee wa ní kaa nihi nɛ a ye mluku, mohu ɔ, e yeɔ bua adesahi nɛ a suɔ nɛ a sɔmɔ lɛ ɔ konɛ a ye manye. (La 113:6, 7) Ngɛ anɔkuale mi ɔ, Baiblo ɔ kale Yehowa kaa e ji “yemi kɛ bualɔ.” (La 27:9; Heb. 13:6) Matsɛ David tsɔɔ kaa Yehowa he si nɛ e baa kɛ yemi kɛ buami nɛ e kɛ ha lɛ ɔ he je nɛ e nyɛ tsu ní tsumi nguanguahi nɛ a kɛ wo e dɛ ɔ nɛ.​—2 Sam. 22:36.

10. Mɛni Yesu pee kɛ tsɔɔ kaa e baa e he si?

¹⁰ Nyɛ ha nɛ wa susu nɔ hyɛmi nɔ́ nɛ Yesu pee ɔ he nɛ waa hyɛ. E ngɛ mi kaa Yesu ji Nyɔmtsɛ kɛ ha e kaseli ɔmɛ mohu lɛɛ, se e fɔ a nane he ha mɛ. Mɛni ji yi mi tomi kake he je nɛ Yehowa ha nɛ a ngma nɔ́ nɛ Yesu pee ɔ ngɛ Baiblo ɔ mi? A ngma konɛ a kɛ pee nɔ hyɛmi nɔ́ kɛ ha nihi tsuo nɛ weku yihi hu piɛɛ he ɔ. Yesu nitsɛ de ke: “I pee nɔ hyɛmi nɔ́ kɛ ha nyɛ, konɛ kaa bɔ nɛ i pee kɛ ha nyɛ ɔ, nyɛ hu nyɛɛ pee jã.” (Yoh. 13:12-17) E ngɛ mi kaa Yesu ngɛ he blɔ nɛ nɔ kuɔ wawɛɛ mohu lɛɛ, se e hyɛ we blɔ kaa nihi nɛ a sɔmɔ lɛ, mohu ɔ, e sɔmɔ ni kpahi.​—Mat. 20:28.

11. Mɛni nɛ weku yi ma nyɛ maa kase ngɛ he si bami he nɔ hyɛmi nɔ́ nɛ Yehowa kɛ Yesu pee ɔ mi?

¹¹ Níhi nɛ wa ma nyɛ maa kase. Weku yi ma nyɛ ma je he si bami kpo ngɛ blɔ slɔɔtohi a nɔ. Kaa nɔ hyɛmi nɔ́ ɔ, e hyɛ we blɔ kaa e yo kɛ e bimɛ maa pee a ní kaa nihi nɛ a ye mluku. Ke e yo kɛ e bimɛ ngɛ a juɛmi tsɔɔe ngɛ nɔ́ ko he, nɛ e kɛ mɛ kpa we gbi po ɔ, e buɔ mɛ tue. Marley nɛ e ngɛ United States ɔ de ke: “E suu be nɛ i kɛ ye huno ɔ kpa we gbi ngɛ níhi a he. Se i nuɔ he kaa e buɔ mi, ejakaa e haa nɛ i tsɔɔ ye juɛmi ngɛ níhi a he nɛ e susuɔ nɔ́ nɛ i deɔ ɔ he saminya loko e mwɔɔ yi mi kpɔ.” Jehanɛ hu ɔ, huno nɛ baa e he si ɔ suɔ nɛ e tsu we mi ní tsumihi ke nihi nɛ a ngɛ e kpɔ ɔ mi ɔ susu kaa yihi a ní tsumi ji lɔ ɔ po. Enɛ ɔ ma nyɛ maa pee nyagba wawɛɛ. Mɛni he je? Nyɛmiyo ko nɛ a tsɛɛ lɛ ke Rachel ɔ de ke: “Ngɛ he nɛ i je ɔ, ke huno ko ye bua e yo kɛ sa tsesihi a mi loo kɛ dla we mi ɔ, e kpɔ mi bi kɛ e weku li ma susu kaa tsa pi ‘nyumu’ ji lɛ. A ma susu kaa  e yo ɔ ngɛ e nɔ yee.” Ke susumi nɛ ɔ nɛ nihi fuu hɛɛ ngɛ he nɛ o ngɛ ɔ, lɛɛ mo kai kaa Yesu fɔ e kaseli ɔmɛ a nane he, e ngɛ mi kaa a naa ní tsumi nɛ ɔ kaa nyɔguɛhi a ní tsumi. Weku yi kpakpa be níhi nɛ ma ha nɛ nihi nɛ a susu kaa e ngɛ he wami loo e he hia a pee, mohu ɔ, e peeɔ níhi nɛ ma ha nɛ e yo ɔ kɛ e bimɛ a bua maa jɔ. Ngɛ he si bami se ɔ, mɛni su kpa ko nɛ e maa ye bua weku yi kpakpa?

12. Mɛni nɛ suɔmi haa nɛ Yehowa kɛ Yesu peeɔ?

¹² Suɔmi. Suɔmi ji nɔ́ nɛ kudɔɔ nɔ́ fɛɛ nɔ́ nɛ Yehowa peeɔ. (1 Yoh. 4:7, 8) E jeɔ suɔmi mi kɛ haa wɔ wa mumi mi hiami níhi kɛ gu e Munyu nɛ ji Baiblo ɔ kɛ e we asafo ɔ nɔ. E haa nɛ wa náa nɔ mi mami kaa e suɔ wɔ, nɛ lɔ ɔ haa nɛ wa nuɔ he kaa wa ngɛ slɔkee. Nɛ wa he lo nya hiami níhi hu nɛɛ? Yehowa “haa wɔ níhi tsuo nɛ wa náa a mi ngɔɔmi.” (1 Tim. 6:17) Ke wa tɔ̃ ɔ, e dlaa wɔ, nɛ loloolo ɔ, e yaa nɔ nɛ e jeɔ suɔmi kpo kɛ tsɔɔ wɔ. Suɔmi mi nɛ Yehowa je kɛ to kpɔmi nɔ́ ɔ he blɔ nya kɛ ha wɔ. Yesu hu suɔ wɔ wawɛɛ, nɛ lɔ ɔ he je nɛ e ngɔ e wami kɛ ha ngɛ wa he ɔ nɛ. (Yoh. 3:16; 15:13) Nɔ́ ko be nyɛe maa tsi suɔmi nɛ Yehowa kɛ Yesu ngɛ kɛ ha nihi nɛ a yeɔ mɛ anɔkuale ɔ nya.​—Yoh. 13:1; Rom. 8:35, 38, 39.

13. Mɛni he je nɛ e sa nɛ weku yi nɛ je suɔmi kpo kɛ tsɔɔ e weku ɔ? (Hyɛ daka nɛ ji, “ Ke O Ji Nyumu Nɛ O Sɛ Gba Si Himi Mi Ehe ɔ, Mɛni O Ma Nyɛ Maa Pee Konɛ O Yo Nɛ Je Bumi Kpo Kɛ Tsɔɔ Mo?” ɔ hulɔ.)

¹³ Níhi nɛ wa ma nyɛ maa kase. E sa nɛ suɔmi nɛ kudɔ nɔ́ fɛɛ nɔ́ nɛ weku yi peeɔ ɔ. Mɛni he je nɛ enɛ ɔ he hia? Bɔfo Yohane de ke: “Nɔ nɛ e sume e nyɛmi [loo weku] nɛ e naa lɛ ɔ, e be nyɛe maa suɔ Mawu, nɔ nɛ e nɛ lɛ ɔ.” (1 Yoh. 4:11, 20) Nyumu nɛ e suɔ e weku mi bimɛ nɛ e suɔ nɛ e kase Yehowa kɛ Yesu ɔ maa ye bua e weku ɔ konɛ huɛ bɔmi kpakpa nɛ hi a kɛ Yehowa a kpɛti, a hi si slɔkee, nɛ e ha mɛ a he lo nya hiami níhi hulɔ. (1 Tim. 5:8) E maa tsɔɔ e bimɛ ní, nɛ e ma tsɔse mɛ. Jehanɛ hu ɔ, e maa ya nɔ maa mwɔ yi mi kpɔhi nɛ maa wo Yehowa hɛ mi nyami nɛ maa ye bua e weku ɔ. Nyɛ ha nɛ wa susu ní nɛ ɔmɛ a he nɛ waa hyɛ bɔ nɛ weku yi ma nyɛ maa kase Yehowa kɛ Yesu ha.

14. Kɛ weku yi ko ma plɛ kɛ ye bua e weku ɔ nɛ a hɛ kɛ su Yehowa he ha kɛɛ?

¹⁴ E haa e weku mi bimɛ a mumi mi hiami níhi. Yesu kɛ e ní peepee tsɔɔ kaa e ngɛ kaa e Tsɛ ɔ, ejakaa e suɔ nɛ e ye bua e se nyɛɛli ɔmɛ nɛ a ha nɛ a hemi kɛ yemi mi nɛ wa. (Mat. 5:3, 6; Maak. 6:34) Jã nɔuu kɛ̃ nɛ e sa nɛ weku yi hu nɛ ngɔ e weku mi bimɛ a mumi mi hiami níhi kɛ ye kekle blɔ he ngɛ e si himi mi. (5 Mose 6:6-9) E peeɔ jã kɛ guɔ Mawu Munyu ɔ nɛ e kɛ weku ɔ peeɔ kake kɛ kaseɔ, asafo mi kpehi nɛ a yaa, sane kpakpa a nɛ a fiɛɛɔ, kɛ huɛ bɔmi kpakpa nɛ e haa nɛ e hiɔ a kɛ Yehowa a kpɛti ɔ nɔ.

15. Mɛni nɛ weku yi ma nyɛ maa pee konɛ e weku mi bimɛ nɛ a nu he kaa a ngɛ slɔkee?

¹⁵ E haa nɛ e weku mi bimɛ nuɔ he kaa a ngɛ slɔkee. Yehowa de Yesu kaa e suɔ lɛ ngɛ nihi a hɛ mi. (Mat. 3:17) Behi fuu ɔ, Yesu guɔ e munyu tutui kɛ e ní peepee nɔ kɛ haa nɛ e kaseli ɔmɛ naa kaa e suɔ mɛ, nɛ mɛ hu a deɔ lɛ kaa a suɔ lɛ. (Yoh. 15:9, 12, 13; 21:16) Weku yi ma nyɛ ma ha nɛ e yo kɛ e bimɛ nɛ a na kaa e suɔ mɛ kɛ gu e ní peepee nɔ. Kaa nɔ hyɛmi nɔ́ ɔ, e kɛ mɛ maa pee kake kɛ kase Baiblo ɔ. Jehanɛ hu ɔ, e sa nɛ e de mɛ kaa e suɔ mɛ, nɛ a he jua wa ha lɛ. Nɛ ke e he ba hia nɛ e je a yi ngɛ ni kpahi a hɛ mi hu ɔ, e sa nɛ e pee jã.​—Abɛ 31:28, 29.

16. Mɛni hu nɛ e sa nɛ weku yi nɛ pee, nɛ mɛni nɛ e sɛ nɛ e pee?

¹⁶ E haa e weku mi bimɛ a he lo nya hiami níhi. Yehowa ha Israel bi ɔmɛ a hiami níhi benɛ e ngɛ a tue gblae ngɛ a tue gbomi ɔ he je po ɔ. (5 Mose 2:7; 29:5) Jã nɔuu kɛ̃ nɛ mwɔnɛ ɔ hu ɔ, e haa wɔ wa hiami níhi. (Mat. 6:31-33; 7:11) Yesu hu ha e se nyɛɛli ɔmɛ niye ní. (Mat. 14:17-20) Jehanɛ hu ɔ, e tsa nihi nɛ a be he wami ɔ. (Mat. 4:24) E sa nɛ weku yi nɛ e ha e weku mi bimɛ a he lo nya hiami ní loko e ma nyɛ maa sa Yehowa hɛ mi. Se kɛ̃ ɔ, nɔ́ ko ngɛ nɛ e sɛ nɛ e pee. E sɛ nɛ e ngɔ e be tsuo kɛ tsu he lo nya ní tsumi. Ke e pee jã a, e be nyɛe ma ha e weku ɔ mi bimɛ a mumi mi hiami ní bɔ nɛ sa, nɛ e weku ɔ be slɔkee pee hulɔ.

17. Ngɛ mɛni blɔ nɔ nɛ Yehowa kɛ Yesu tsɔɔ wɔ ní nɛ a tsɔseɔ wɔ?

¹⁷ E tsɔseɔ e weku mi bimɛ. Yehowa tsɔɔ wɔ ní nɛ e tsɔseɔ wɔ ejakaa e suɔ nɛ e ye bua wɔ. (Heb. 12:7-9) Yesu jeɔ suɔmi mi kɛ tsɔɔ nihi nɛ e hyɛɛ a nɔ ɔ ní kaa bɔ nɛ e Tsɛ ɔ peeɔ ɔ. (Yoh. 15:14, 15) E dla a susumi ngɛ níhi a he, se kɛ̃ ɔ, e je mi mi jɔmi mi kɛ pee jã. (Mat. 20:24-28) E le kaa wa yi mluku nɛ wa ma nyɛ ma tɔ̃.​—Mat. 26:41.

18. Mɛni nɛ e sa nɛ weku yi kpakpa nɛ kai?

¹⁸ Weku yi nɛ e kaseɔ Yehowa kɛ Yesu ɔ kaiɔ kaa e weku mi bimɛ yi mluku. Ke e yo loo e bimɛ pee nɔ́ ko ɔ, e ‘mi mi fu we mɛ wawɛɛ.’ (Kol. 3:19) Mohu ɔ, e ngɔɔ sisi tomi mlaa nɛ ngɛ Galatia Bi 6:1 ɔ kɛ tsuɔ ní, nɛ e bɔɔ mɔde  kaa e ma dla a juɛmi ngɛ “he jɔmi mumi mi,” ejakaa e kaiɔ kaa lɛ hu e yi mluku. E yɔseɔ kaa blɔ nɛ hi pe kulaa nɛ e maa gu nɔ kɛ tsɔɔ mɛ ní ji kaa e maa pee nɔ hyɛmi nɔ́ kpakpa kɛ ha mɛ kaa bɔ nɛ Yesu pee ɔ.​—1 Pet. 2:21.

19-20. Ke weku yi maa mwɔ yi mi kpɔhi ɔ, mɛni blɔ nɔ e ma nyɛ maa gu kɛ kase Yehowa kɛ Yesu?

¹⁹ E mwɔɔ yi mi kpɔhi nɛ maa ye bua e weku mi bimɛ. Yehowa mwɔɔ yi mi kpɔhi nɛ maa ye bua ni kpahi. Kaa nɔ hyɛmi nɔ́ ɔ, Yehowa bɔɛ níhi nɛ wami ngɛ a mi konɛ lɛ nitsɛ e ná he se, mohu ɔ, e pee jã ejakaa e suɔ nɛ adesahi nɛ a ná bua jɔmi ngɛ si himi mi. Nɔ ko nyɛ we Yehowa nɔ kaa e ngɔ e Bi ɔ kɛ ha ngɛ wa yayami ɔmɛ a he. Lɛ nitsɛ nɛ e je e suɔmi mi nɛ e ngɔ e Bi ɔ kɛ ha konɛ wa ná he se. Yesu hu mwɔ yi mi kpɔhi nɛ ni kpahi ná he se. (Rom. 15:3) Kaa nɔ hyɛmi nɔ́ ɔ, benɛ pɔ tɔ e he nɛ e sa nɛ e jɔɔ e he po ɔ, e ya nɔ nɛ e tsɔɔ asafo babauu ní.​—Maak. 6:31-34.

²⁰ Weku yi kpakpa le kaa nɔ́ ko nɛ he wa nɛ e sa kaa e pee ji kaa e maa mwɔ yi mi kpɔhi nɛ da kɛ ha e weku ɔ, nɛ e naa blɔ nya ní tsumi nɛ ɔ kaa e he hia wawɛɛ. E bɔɔ mɔde kaa e be e he numi nɔ dae kɛ mwɔ yi mi kpɔhi ha e weku ɔ, mohu ɔ, e ma ha nɛ Yehowa nɛ ye bua lɛ konɛ e mwɔ yi mi kpɔhi nɛ da. * (Abɛ 2:6, 7) Jã nɛ e peeɔ ɔ, tsɔɔ kaa e susuɔ ni kpahi a he, se pi lɛ nitsɛ e he.​—Filip. 2:4.

21. Mɛni nɛ wa ma susu he ngɛ ní kasemi nɛ nyɛɛ se ɔ mi?

²¹ Yehowa ngɔ ní tsumi nɛ he wa kɛ wo weku yihi a dɛ, nɛ a maa bu akɔtaa ngɛ bɔ nɛ a ma tsu ní tsumi nɛ ɔ ha a he. Se ke huno ko bɔ mɔde nɛ e kase Yehowa kɛ Yesu a nɔ hyɛmi nɔ́ ɔ, e maa pee weku yi kpakpa. Nɛ ke e yo ɔ hu tsu e blɔ nya ní tsumi ɔ, bua jɔmi maa hi a gba a mi. Kɛ e sa nɛ yogbayo nɛ na yi yemi ha kɛɛ, nɛ mɛni nyagba nɛ e kɛ ma nyɛ maa kpe? Ní kasemi nɛ nyɛɛ se ɔ ma ha sane bimi nɛ ɔmɛ a heto.