1. Aha do na mambahen piga-piga kepala keluarga dang denggan pambahenanna tu istri dohot gellengna?

MENURUT hamu, songon dia do sahalak kepala keluarga na denggan? Adong do piga-piga kepala keluarga gabe hurang denggan pambahenanna tu istri dohot gellengna ala dipengaruhi tradisi dohot latar belakang ni keluargana. Si Anita, sahalak donganta borua na tinggal di Eropa mandok, “Molo di hutakku, dao do ussangap bawa sian borua. Jala dianggap do borua i songon pembantu.” Si Luke, sahalak donganta bawa na tinggal di Amerika Serikat mandok, “Godang do ama-ama mangajarhon tu anakna dang penting manangihon pandapot ni borua. Ai dang marguna pandapot ni nasida i.” Alai dang lomo roha ni Jahowa molo songon i dibahen bawa tu istrina. (Bandingkon tu Markus 7:13.) Attong, boha do carana asa boi sahalak bawa gabe kepala keluarga na denggan?

2. Aha do na ikkon diboto sahalak kepala keluarga, jala boasa ikkon diboto ibana i?

² Asa boi sahalak bawa gabe kepala keluarga na denggan, ikkon diboto ibana do boasa adong dipillit Jahowa na gabe kepala. Ikkon diboto ibana do muse songon dia carana boi maniru Jahowa dohot Jesus. Boasa penting botoon ni akka bawa on? Ala adong do tanggung jawab na dilean Jahowa dohot Jesus tu kepala keluarga jala dipangido do asa denggan didalatton tanggung jawab i.​—Luk. 12:48b.

3. Aha do na boi taparsiajari sian 1 Korint 11:3?

³ Jaha 1 Korint 11:3. Di ayat on, dipaboa do songon dia Jahowa mangatur keluargana na adong di surgo dohot di tano on. Jahowa do kepala keluarga ni saluhutna. Ibana do na paling marhuaso, jala dang adong na untimbo sian Ibana. Alai adong  do dipillit Jahowa muse akka kepala lao mandalatton tanggung jawab di organisasina. Sude kepala i, ikkon mangalean partanggung jawaban tu Jahowa. (Rom 14:10; Eps. 3:14, 15) Misalna, dilean Jahowa do wewenang tu Jesus gabe kepala ni huria. Alai cara ni Jesus mandalatton wewenang i, ikkon partanggung jawabhononna do i tu Jahowa. (1 Kor. 15:27) Dilean Jahowa do muse wewenang tu suami lao mamimpin istri dohot gellengna. Alai cara ni suami mandalatton wewenangna i, ikkon partanggung jawabhononna do i tu Jahowa dohot tu Jesus.​—1 Ptr. 3:7.

4. Aha do wewenang ni Jahowa dohot Jesus?

⁴ Ala untimbo do huaso ni Jahowa sian saluhutna, marhak do Ibana mambahen aturan na ikkon unduk sude keluargana na di surgo dohot na di tano on tu Ibana. (Jes. 33:22) Jesus pe marhak do mambahen peraturan ala ibana do ulu ni huria.​—Gal. 6:2; Kol. 1:18-20.

5. Aha do hak ni kepala keluarga, alai aha do na so boi diulahon ibana?

⁵ Marhak do kepala keluarga mambahen keputusan tu keluargana. Alai ikkon ditiru ibana do Jahowa dohot Jesus. (Rom 7:2; Eps. 6:4) Terbatas do wewenang ni kepala keluarga i. Misalna tikki mambahen keputusan ibana ikkon sesuai do i tu prinsip ni Bibel. (Poda 3:5, 6) Jala dang boi ibana mambahen aturan tu na so anggota keluargana. Asing ni i, molo dung dewasa gellengna jala dang sajabu be nasida, dang marhak be sahalak kepala keluarga mambahen keputusan di gellengna i. (Rom 14:4) Alai ikkon torus do diargai gellengna i natua-tuana.​—Mat. 19:5.

6. Boasa adong na dibahen Jahowa gabe kepala?

⁶ Dibahen Jahowa pe adong na gabe kepala, ala holong do rohana tu keluargana. Hadiah sian Jahowa do pengaturan on, gabe boi ma sude denggan mardalan jala taratur. (1 Kor. 14:33, 40) Molo dang takkas ise na gabe kepala di keluarga ni Jahowa, boi do gabe sursar jala dang marlas ni roha. Misalna, gabe dang jelas diboto ise na marhak mambahen keputusan jala ise na mandalatton i.

7. Sesuai tu Epesus 5:25, 28, ikkon songon dia do suami tu istrina?

⁷ Molo songon i do tujuan ni pengaturan na dibahen Debata, boasa godang bawa na kasar jala lomo-lomona tu istrina? Godang nuaeng bawa na so mangihutton aturan ni Jahowa ala dipengaruhi tradisi dohot latar belakang ni keluargana. Manang olo do ra dibahen ibana songon i asa songon na jago diida halak. Misalna adong do bawa na kasar tu istrina asa dihabiari ibana jala asa didok ibana bawa na jago na boi mangatur istrina. Olo do ra didok rohana dang boi paksaonna istrina i makkaholongi ibana. Alai boi bahenonna istrina i mabiar tu ibana. Jadi songon i ma dibahen asa boi dirajai istrina i. * Sala do cara marpikkir sisongon i. Alana, i patuduhon dang arga borua di ibana, jala dang sesuai i tu lomo ni roha ni Jahowa.​—Jaha Epesus 5:25, 28.

8. Ise do na ikkon ditiru kepala keluarga?

⁸ Boi do marsiajar sahalak bawa gabe kepala keluarga na denggan sian cara ni Jahowa dohot Jesus mamakke wewenang. Saonari taulas ma dua sifat ni Jahowa dohot Jesus na boi ditiru akka kepala keluarga tikki mandalatton tanggung jawabna.

9. Songon dia do Jahowa patuduhon serep ni rohana?

⁹ Serep ni roha. Jahowa do na umbisuk sian  sasudena. Nang pe songon i olo do Ibana manangihon pandapot ni naposona. (1 Mus. 18:23, 24, 32) Hea do dipangido Jahowa pandapot ni akka suru-suruan. (1 Raj. 22:19-22) Nang pe sempurna Jahowa, alai dang dipangido Ibana hita asa sempurna. Gariada diurupi Ibana do hita asa marhasil. (Ps. 113:6, 7) Didok di Bibel olo do Jahowa “mangurupi” hita. (Ps. 27:9; Heb. 13:6) Disadari Raja Daud do boi pe ibana marhasil mangulahon akka ulaonna, ala na serep do roha ni Jahowa na olo mangurupi ibana.​—2 Sam. 22:36.

10. Songon dia do Jesus patuduhon serep ni rohana?

¹⁰ Taparrohahon ma muse sitiruon sian Jesus. Olo do ibana manussi pat ni akka siseanna nang pe Tuan dohot Guru ibana. Menurut hamu, boasa dibahen Jahowa on disurat di Bibel? Asa boi tiruon ni akka kepala keluarga. Didok Jesus do, “Nungnga hupatuduhon sitiruon tu hamu, alani i ikkon diulahon hamu do songon na hubahen i tu hamu.” (Joh. 13:12-17) Sasittongna Tuan do Jesus, alai dang sai naeng mangaturi ibana manang ikkon sihobasan. Gariada olo do ibana mangulahon tugas ni hatoban.​—Mat. 20:28.

11. Aha do na boi diparsiajari kepala keluarga sian serep ni roha na dipatudu Jahowa dohot Jesus?

¹¹ Parsiajaranna tu hita. Tarida do na serep roha ni sahalak kepala keluarga sian pambahenanna. Misalna, dang diharappon ibana istri dohot gellengna makkarejohon tugas na so sanggup diulahon nasida. Olo do ibana manangihon pandapot ni anggota keluargana. Si Marley, na tinggal di Amerika Serikat mandok, “Sipata dang sai sapandapot au dohot suamikku. Alai boi do huhilala diargai ibana au. Alana jolo disukkun ibana do pandapottu jala dipikkiri ibana do i sebelum mambahen keputusan. Olo do ibana makkarejohon karejo di jabu, nang pe godang halak mandok karejo ni boru-boru do i.” Sada tantangan na borat do on. Boasa? Si Rachel, sahalak donganta borua mandok, “Di hutakku, molo olo sahalak suami manussi piring dohot karejo di jabu, didok do ibana ‘dang bawa’. Alana bawa sisongon i didok do bawa na so boi mangatur istrina.” Molo songon i do pandangan ni halak di ingananmuna, ingot ma disussi Jesus do pat ni akka siseanna. Hape didok halak karejo ni hatoban do i. Molo kepala keluarga na burju, dang pandangan ni halak na uppenting di  ibana, alai las ni roha ni istri dohot gellengna do. Sifat aha do muse na dihaporluhon kepala keluarga?

12. Alani holongna, aha do na diulahon Jahowa dohot Jesus tu hita?

¹² Holong. Sude na diulahon Jahowa alani holong do. (1 Joh. 4:7, 8) Ala holong roha ni Jahowa tu hita, lomo do rohana asa torus hita marale-ale tu Ibana. Alani i dilehon ma tu hita Bibel dohot organisasina. Parduli do tong Debata tu perasaanta. Dipapos ibana do rohatta na holong rohana tu hita. Asing ni i diparade Jahowa do sude kebutuhanta. ‘Burju do Ibana paradehon sude na mambahen las rohatta.’ (1 Tim. 6:17) Tikki taulahon na sala, dipasingot Ibana do hita alai sai toktong dope dihaholongi. Alani holongna, diparade Ibana do tobusan lao paluahon hita. Songon i do tong Jesus, massai balga do holongna tu hita. Dilehon do ngoluna humokkop hita. (Joh. 3:16; 15:13) Dang adong na boi manirang holong ni Jahowa dohot Jesus sian akka halak na setia tu nasida.​—Joh. 13:1; Rom 8:35, 38, 39.

13. Boasa ikkon dihaholongi kepala keluarga istri dohot gellengna? (Ida kotak, “ Aha do na Ikkon Diulahon Sahalak Bawa na Baru Marrumah Tangga Asa Diargai Istrina Ibana?”)

¹³ Parsiajaranna tu hita. Sude na diulahon kepala keluarga alani holong ma nian. Boasa songon i? Didok Apostel Johannes, “Molo dang dihaholongi sasahalak donganna [manang keluargana] na niidana, dang boi ibana makkaholongi Debata na so niidana.” (1 Joh. 4:11, 20) Molo holong do roha ni kepala keluarga tu istri dohot gellengna, ikkon tiruonna do Jahowa dohot Jesus. Diurupi ibana ma keluargana asa marale-ale tu Jahowa, diparade sude kebutuhan ni nasida, jala dipastihon keluargana merasa aman jala marlas ni roha. (1 Tim. 5:8) Dung i, ikkon dilatik ibana do gellengna. Jala tikki mambahen keputusan ibana, ikkon pastihononna do keputusanna i pasangappon Jahowa jala sesuai tu kebutuhan ni keluargana. Saonari taulas ma muse songon dia sahalak kepala keluarga boi maniru Jahowa dohot Jesus lao mandalatton tanggung jawabna.

14. Aha do na ikkon diulahon kepala keluarga asa togu parale-aleon ni keluargana tu Jahowa?

¹⁴ Mangurupi keluargana marale-ale tu Jahowa. Ditiru Jesus do Jahowa. Diurupi Jesus do akka siseanna asa torus togu haporseaon ni nasida. (Mat. 5:3, 6; Mrk. 6:34) Kepala keluarga pe, ikkon diurupi do keluargana asa togu parale-aleon ni nasida tu Jahowa. (5 Mus. 6:6-9) Dipastihon ibana do keluargana manjaha dohot marsiajar Bibel, ro tu parpunguan, marbarita na uli, jala torus marale-ale tu Jahowa.

15. Aha do na ikkon diulahon kepala keluarga asa marlas ni roha keluargana?

¹⁵ Mangurupi keluargana marlas ni roha. Dihatahon Jahowa do na holong rohana tu Jesus di jolo ni godang halak. (Mat. 3:17) Jesus pe, dang maila patuduhon holongna tu akka siseanna. Dipatudu do i sian hatana dohot pambahenanna. Akka sisean pe, dihatahon do holong ni roha ni nasida tu Jesus. (Joh. 15:9, 12, 13; 21:16) Jadi ikkon songon i do tong kepala keluarga. Dipatudu ma holongna tu istri dohot gellengna. Misalna, rap marsiajar Bibel ma ibana dohot nasida. Dihatahon ibana ma na arga do keluargana i di ibana jala massai holong do rohana tu nasida. Molo boi dihatahon ma i di jolo ni na asing.​—Poda 31:28, 29.

16. Aha dope muse tanggung jawab ni kepala keluarga, alai boasa ikkon seimbang ibana?

¹⁶ Karejo lao paradehon kebutuhan ni keluargana. Tikki mangalo halak Israel tu Jahowa, dihukum do nasida. Nang pe songon i, torus do diparade Jahowa kebutuhan ni nasida. (5 Mus. 2:7; 29:5) Saonari pe diparade Jahowa do tong kebutuhanta siganup ari. (Mat. 6:31-33; 7:11) Songon i do nang Jesus, dilean ibana do mangan akka halak na mangihutton ibana. (Mat. 14:17-20) Jala dipamalum do muse akka halak na marsahit. (Mat. 4:24) Porlu do i ditiru kepala keluarga. Ikkon karejo do ibana lao paradehon kebutuhan ni keluargana asa las roha ni Jahowa tu ibana. Alai ikkon seimbang do ibana asa unang habis tikkina tu karejona i, gabe dang adong be tikkina mangurupi keluargana marale-ale tu Jahowa jala mambahen nasida marlas ni roha.

17. Boha do cara ni Jahowa dohot Jesus tikki mangalatik jala mamissang?

¹⁷ Mambahen pelatihan. Lomo do roha ni Jahowa lam denggan ngolutta. Alani i do dilatik jala dipissang Ibana hita. (Heb. 12:7-9) Jesus pe ditiru do Bapakna. Burju do ibana tikki mangalatik akka siseanna. (Joh. 15:14, 15) Sipata tegas do ibana pasingotton, alai tetap do dipatudu ibana holong. (Mat. 20:24-28) Alana diingot Jesus do molo hita jolma na so sempurna jala jotjot mangulahon na sala.​—Mat. 26:41.

18. Aha do na porlu diingot kepala keluarga?

¹⁸ Porlu do ditiru kepala keluarga Jahowa dohot Jesus. Ikkon ingotonna do na so sempurna istri dohot gellengna. Alani i dang boi ibana kasar tu nasida. (Kol. 3:19) Molo adong anggota keluargana na mangulahon na sala,  porlu do ingotonna prinsip na disurat di Galatia 6:1. Ikkon “lambok” do ibana mangurupi nasida asa muba. Ai ibana pe dang sempurna, olo do sipata ibana mangulahon na sala. Songon Jesus, ikkon gabe teladan do ibana di keluargana ala i do cara na undenggan lao mangajari.​—1 Ptr. 2:21.

19-20. Boasa porlu ditiru kepala keluarga Jahowa dohot Jesus tikki mambahen keputusan?

¹⁹ Mambahen keputusan na sesuai tu kebutuhan ni keluargana. Sude keputusan na dibahen Jahowa pasti adong manfaatna tu hita. Misalna, ditoppa Ibana pe saluhutna dang holan naeng pasonakkon dirina sandiri. Alai asa dohot do hita marlas ni roha songon Ibana. Jala berkorban pe Jahowa mangalean tobusan tu hita, dang na terpaksa Ibana mangalean i. Alai sian ias ni rohana do dilean Ibana i. Songon i do nang Jesus, tikki mambahen keputusan, dang holan naeng pasonakkon dirina sandiri ibana. (Rom 15:3) Misalna, rela do Jesus mamakke tikkina istirahat lao mangajari akka halak.​—Mrk. 6:31-34.

²⁰ Diboto kepala keluarga na burju do dang sai mura mambahen keputusan na denggan. Hape tanggung jawab na massai penting do i. Jala dang boi ibana hatop-hatop mambahen keputusan na holan mangasahon pikkiran dohot pakkilalaanna. Jadi ikkon dipangido ibana do Jahowa mangurupi ibana mambahen keputusan na denggan. * (Poda 2:6, 7) Molo dibahen songon i, gabe bermanfaat ma keputusan i tu ibana dohot tu keluargana.​—Plp. 2:4.

21. Aha do na lao taparsiajari di artikel na mangihut?

²¹ Dang mura gabe kepala keluarga. Alana diharappon Jahowa do nasida mambahen na dumenggan lao mandalatton tanggung jawabna i. Alai molo ditiru kepala keluarga i do Jahowa dohot Jesus, pasti boi do ibana gabe kepala keluarga na denggan. Jala molo didalatton istrina do tanggung jawabna, gabe marlas ni roha ma keluarga ni nasida. Songon dia do istri boi unduk tu suamina sebagai kepala keluarga jala aha do tantanganna? Taparsiajari ma i di artikel na mangihut.