LIKE SUANLƐ 5
‘Klisi yɛ ɔ sie yasua-ɔ’
‘Klisi yɛ ɔ sie yasua-ɔ.’—1 KOR. 11:3.
JUE 12 Ɲanmiɛn Kpli Zoova
I SU FITILƐ *
1. ?Wafa nga yasua wie mun nin be yi mun nin be mma’m be tran’n, ɔ fin ngue?
?WAFA sɛ yɛ amun bu sran sielɛ’n mɔ i wie yɛle awlobo’n i sielɛ’n niɔn? Wafa nga yasua wie mun nin be yi mun nin be mma’m be tran’n, ɔ fin wafa nga be tali be’n, ɔ nin be finwlɛ’n. Maan e fa e ɲin e sie i ndɛ kun mɔ aniaan bla kun kannin’n i su. Be flɛ i kɛ Yanita yɛ ɔ tran Abloki. Ɔ seli kɛ: “Lika nga n tran lɛ’n, sran’m be bu i kɛ yasua’m be ti kpa tra bla mun naan ɔ fata kɛ bla’m be su be.” Be flɛ aniaan bian kun kɛ Liki. Ɔ tran Etazinin. Ɔ seli kɛ: “Siɛ wie’m be se be mma yasua’m be kɛ ndɛ kwlaa nga bla’m be kan’n ɔ timan ndɛ naan ɔ fataman kɛ be fa be ɲin be sie su.” Sanngɛ Zoova liɛ’n ɔ kunndɛman kɛ yasua’m be nin be yi’m be tran kɛ ngalɛ’n sa. (An nian Marki 7:13 nun.) ?Ɔ maan wafa sɛ yɛ yasua kun kwla sie i awlobo’n i kpa-ɔ?
2. (1) ?Ngue yɛ ɔ fata kɛ awlobo kpɛn kun si i-ɔ? (2) ?Yɛ ngue ti-ɔ?
2 Sɛ yasua kun kunndɛ kɛ ɔ́ síe i awlobo’n i kpa’n, ɔ fata kɛ ɔ dun mmua si like nga Zoova kunndɛ kɛ ɔ yo’n. Asa ekun’n, ɔ fata kɛ ɔ si like nga ti yɛ i yɛ Zoova sieli i awlobo kpɛn’n, ɔ nin wafa ng’ɔ kwla nian Zoova nin Zezi be ajalɛ’n su’n. ?Ngue ti yɛ ɔ ti cinnjin kɛ yasua kun si ninnge kwlaa sɔ mun-ɔn? Afin Zoova mannin awlobo kpɛn’m be kwlalɛ yɛ sɛ é kwlá sé’n, ɔ kunndɛ kɛ be fa kwlalɛ sɔ’n be di junman kpa.—Lik. 12:48b.
?WAFA SƐ YƐ ZOOVA SIESIELI I AWLOBO’N NIƆN?
3. ?Ngue yɛ 1 Korɛntifuɛ Mun 11:3 kle e-ɔ?
3 An kanngan 1 Korɛntifuɛ Mun 11:3 nun. Ndɛ mma sɔ’n kan wafa nga Zoova siesieli i awlobo’n i ndɛ. Zoova yɛ ɔ ti like kwlaa su kpɛn’n niɔn. Sanngɛ ɔ mannin sran wie’m be kwlalɛ. Ɔ fata kɛ sran sɔ’m be wun i wlɛ kɛ like nga be fa kwlalɛ sɔ’n be yo’n, bé kɛ́n i su ndɛ bé klé Zoova. (Rɔm. 14:10; Efɛ. 3:14, 15) I wie yɛle kɛ Zoova sieli Zezi asɔnun’n i su kpɛn. Sanngɛ ɔ fata kɛ Zezi kan wafa ng’ɔ nian asɔnun’n i lika’n i ndɛ kle i. (1 Kor. 15:27) Asa ekun’n, Zoova mannin yasua’n i atin kɛ ɔ sie i yi nin i mma mun. I kusu ɔ fata kɛ ɔ kan wafa ng’ɔ nin i yi nin i mma’m be tran’n, i su ndɛ kle Zoova nin Zezi.—1 Piɛ. 3:7.
4. ?Ngue yɛ Zoova nin Zezi be le atin be yo-ɔ?
4 Kɛ mɔ Zoova yɛ ɔ ti i awlobo’n i su kpɛn’n ti’n, ɔ le atin kpɛ mmla mɛn i mma mun. Yɛ ɔ kunndɛ kɛ i mma’m be nanti mmla ng’ɔ kpɛ be’n be su. (Eza. 33:22) Zezi kusu ti asɔnun’n i su kpɛn. Ɔ maan ɔ le atin kpɛ mmla man be ng’ɔ sie be’n. Yɛ ɔ kunndɛ kɛ be nanti mmla sɔ’m be su wie.—Gal. 6:2; Kol. 1:18-20.
5. (1) ?Ngue yɛ awlobo kpɛn’m be le atin be yo-ɔ? (2) ?Sanngɛ ngue yɛ ɔ fataman kɛ be wla fi su-ɔ?
5 Kɛ Zoova nin Zezi be sa’n, awlobo kpɛn kun le atin fa ajalɛ wie mun. (Rɔm. 7:2; Efɛ. 6:4) Sanngɛ ɔ fataman kɛ i wla fi su kɛ i kwlalɛ liɛ’n le awɛ. I wie yɛle kɛ sɛ i waan ɔ́ fá ajalɛ wie’n, ɔ fata kɛ ɔ nian Ɲanmiɛn Ndɛ’n nun. (Nya. 3:5, 6) Kpɛkun ɔ leman atin kpɛman mmla manman be nga be timɛn i awlobofuɛ’n. (Rɔm. 14:4) Asa ekun’n, sɛ ɔ le ba naan ba sɔ’m be ɲin naan be jaso awlo nun’n, i mma’m be ɲin yí i titi. Sanngɛ nɛ́n i yɛ ɔ sie be kun-ɔn.—Mat. 19:5.
?NGUE TI YƐ ZOOVA MANNIN SRAN WIE’M BE KWLALƐ-Ɔ?
6. ?Ngue ti yɛ Zoova mannin sran wie’m be kwlalɛ-ɔ?
6 Like nga ti yɛ Zoova mannin sran wie’m be kwlalɛ’n yɛle kɛ ɔ klo i awlobofuɛ mun. Kwlalɛ sɔ m’ɔ fa mannin be’n, ɔ ti like kun m’ɔ fa cɛli be-ɔ. Asa ekun’n, i sɔ m’ɔ yoli ti’n i awlobo nunfuɛ’m be yo ninnge mun sɛsɛsɛ yɛ be bo ti kun. (1 Kor. 14:33, 40) Sɛ ɔ ti kɛ Zoova w’a yoman sɔ’n, nn i awlobo nunfuɛ’m be su yoman ninnge mun kɛ ng’ɔ nin i fata’n sa yɛ be su diman aklunjuɛ. Afin i awlo nun’n be su wunman sran ng’ɔ fata kɛ ɔ fa ajalɛ mun’n, yɛ be su wunman sran kun ng’ɔ́ nánti be su’n.
7. ?Kɛ nga Efɛzifuɛ Mun 5:25, 28 fa kan’n sa’n, wafa sɛ yɛ Zoova kunndɛ kɛ yasua kun nin i yi be tran-ɔn?
7 ?Sɛ ajalɛ nga Zoova fɛli i kɛ yasua’n yɛ ɔ sie awlo’n ɔ ti kpa’n, nn ngue ti yɛ ɔ yo bla kpanngban be kɛ be wun’m be mianmian be-ɔ? Like nga ti yɛ yasua wie’m be yo sɔ’n, yɛle kɛ be siman awlobo’n i su mmla nga Zoova kpɛli’n. Kpɛkun ɔ ju wie’n, wafa nga sran’m be yo ninnge’m be asa liɛ’n su lɔ’n, i su yɛ be nian yɛ be nin be yi’m be tran-ɔn. Asa ekun’n yasua wie’m be yo be yi’m be kpokokpoko, afin i sɔ’n man be aklunjuɛ. I wie yɛle kɛ yasua wie’m be buman be wun sran. Ɔ maan kɛ be yo be yi’m be kpokokpoko’n, ɔ yo be kɛ be o sran nun sa. Kpɛkun be yo sɔ naan be wiengu’m be si kɛ be ti yasua. Asa ekun’n, yasua kun kwla se i wun kɛ ɔ kwlá miɛnmɛn i yi’n kɛ ɔ klo i, sanngɛ ɔ kwla yo maan ɔ sro i. Kɛ ɔ yo mɔ i yi’n ko sro i’n, kpɛkun ɔ miɛn i kɛ ɔ yo like kwlaa ng’ɔ klo’n. * Yasua nga be bu i sɔ akunndan’n yɛ be yo i sɔ like’n, ɔ fata kɛ be wun i wlɛ kɛ i sɔ’n timan kpa. Afin sɛ yasua kun yo sɔ’n ɔ kle kɛ ɔ bumɛn i yi’n i sran yɛ ɔ nantiman ndɛ nga Zoova kannin’n su.—An kanngan Efɛzifuɛ Mun 5:25, 28 nun.
?WAFA SƐ YƐ YASUA KUN KWLA SIE I AWLOBO’N I KPA-Ɔ?
8. ?Wafa sɛ yɛ yasua kun kwla sie i awlobo’n i kpa-ɔ?
8 Sɛ yasua kun nian wafa nga Zoova nin Zezi be sie sran mun’n i su’n, ɔ kwla sie i awlobo’n i kpa. Ɔ maan é wá kán Zoova nin Zezi be nzuɛn nɲɔn be ndɛ. Kpɛkun é kán wafa nga awlobo kpɛn kun kwla yi nzuɛn nɲɔn sɔ’m be nglo awlo lɔ’n, i ndɛ wie.
9. ?Ngue yɛ ɔ kle kɛ Zoova ti wun ase kanfuɛ-ɔ?
9 Nzuɛn klikli’n yɛle wun ase kanlɛ’n. Sran fi siman ngwlɛlɛ traman Zoova. Ɔ nin i sɔ ngba’n kɛ i sufuɛ’m be kan ndɛ be kle i’n, ɔ sie i su tie. (Bob. 18:23, 24, 32) Asa ekun’n, sɛ i waan ɔ́ yó like kun’n, ɔ usa be ng’ɔ sie be’n like sɔ’n i su ndɛ naan be kan be liɛ nga be wunnin i’n. (1 Fam. 22:19-22) Fɔ nunman Zoova nun. Kusu ɔ kunndɛman kɛ e yo ninnge mun kɛ fɔ nunman e nun sa. Ɔ maan sɛ klɔ sran m’ɔ fɔ o be nun’n be kunndɛ kɛ bé sú i’n, ɔ uka be naan b’a kwla su i kpa. (Jue. 113:6, 7) I kpa bɔbɔ’n Biblu’n se kɛ Zoova ti e “ukafuɛ.” (Jue. 27:9; Ebr. 13:6) Famiɛn Davidi seli kɛ like nga ti yɛ ɔ kwla dili junman dan nga be fa mɛnnin i’n, yɛle kɛ Zoova ti wun ase kanfuɛ yɛ ɔ ukɛli i.—2 Sam. 22:36.
10. ?Wafa sɛ yɛ Zezi kleli kɛ ɔ ti wun ase kanfuɛ-ɔ?
10 Maan e kan ajalɛ nga Zezi kle e’n i ndɛ. Kannzɛ bɔbɔ ɔ ti i akoto’m be “Min” nin be “Like klefuɛ’n,” sanngɛ ɔ wunnzinnin be ja wun. ?Ngue ti yɛ Zoova kplinnin su kɛ be klɛ ndɛ sɔ’n Biblu’n nun-ɔn? Afin ɔ kunndɛ kɛ sran’m be kwlakwla be nian ajalɛ sɔ’n su. Awlobo kpɛn’m be o sran sɔ’m be nun wie. Zezi bɔbɔ seli kɛ: “N yoli i sɔ’n n kleli amun naan kɛ nga n fa yoli’n sa’n, amun kusu amun yo sɔ wie.” (Zan 13:12-17) Kannzɛ bɔbɔ Zezi le kwlalɛ’n, sanngɛ w’a kunndɛman kɛ sran’m be su i. I kpa bɔbɔ’n, i yɛ ɔ suli sran mun-ɔn.—Mat. 20:28.
Sɛ awlobo kpɛn kun di awlo nun junman wie mun yɛ ɔ ukɛ i awlobofuɛ mun naan b’a su Ɲanmiɛn kpa’n, ɔ́ klé kɛ ɔ klo i yi nin i mma mun naan ɔ ti wun ase kanfuɛ. (An nian ndɛ kpɔlɛ 11, 13 be nun.)
11. ?Wafa sɛ yɛ awlobo kpɛn kun kwla kle kɛ ɔ ti wun ase kanfuɛ kɛ Zoova nin Zezi be sa-ɔ?
11 Like nga ndɛ sɔ’n kle e’n. Wafa nga awlobo kpɛn kun kwla kle kɛ ɔ ti wun ase kanfuɛ’n ɔ sɔnnin. I wie yɛle kɛ ɔ fataman kɛ ɔ se i yi nin i mma’m be kɛ be yo ninnge mun kɛ fɔ nunman be nun sa. Sanngɛ ɔ fata kɛ ɔ sie i su be nuan bo. Kannzɛ ndɛ nga be kan’n ɔ timɛn i liɛ’n su’n, sanngɛ maan ɔ tie be ndɛ’n. Be flɛ aniaan bla kun kɛ Maale yɛ ɔ tran Etazinin. Ɔ seli kɛ: “Nán cɛn ngba yɛ e nin min wun’n e nuan sɛ ndɛ wie’m be su-ɔ. Sanngɛ n si kɛ ɔ bu min sran. Afin kwlaa naan w’a fa ajalɛ’n, ɔ dun mmua bo su kle min.” Awlobo kpɛn ng’ɔ ti wun ase kanfuɛ’n, ɔ miɛn i ɲin di awlo nun junman wie mun. Kannzɛ bɔbɔ lika ng’ɔ tran lɛ’n sran’m be bu i kɛ i sɔ junman’m be ti bla junman’n, sanngɛ ɔ miɛn i ɲin di be. Sanngɛ i sɔ yolɛ’n kwla yo kekle. ?Ngue ti-ɔ? Aniaan bla kun mɔ be flɛ i kɛ Rasɛli’n, ɔ seli kɛ: “Lika nga n fin lɔ’n, sɛ yasua kun ukɛ i yi naan be wunnzin talie nun annzɛ be yo awlo nun yɛinyɛin’n, be mantanfuɛ mun nin be osufuɛ’m be kwla bu i kɛ ɔ timan yasua naan i yi’n yɛ ɔ sie i-ɔ.” Sɛ a ti awlobo kpɛn naan lika nga a tran lɛ’n i sɔ akunndan yɛ sran’m be bu’n, maan ɔ wla kpɛn su kɛ Zezi bɔbɔ wunnzinnin i sɔnnzɔnfuɛ’m be ja wun. Kusu nn junman sɔ’n ɔ ti kanga’m be liɛ. Kpɛkun nán ɔ wla fi ndɛ nga su: Awlobo kpɛn ng’ɔ sie i awlo’n i kpa’n, nán like ng’ɔ ko yo naan sran’m b’a wun i kɛ kwlalɛ’n wo i sa nun’n i yolɛ’n yɛ ɔ ti i cinnjin-ɔn. Sanngɛ like ng’ɔ ko yo naan i yi nin i mma’m b’a di aklunjuɛ’n yɛ ɔ ti i cinnjin-ɔn. Siɛn’n, maan e kan nzuɛn uflɛ m’ɔ fata kɛ awlobo kpɛn kun yi i nglo’n i ndɛ.
12. ?Klolɛ mɔ Zoova nin Zezi be klo e ti’n, ngue yɛ be yoli-ɔ?
12 Nzuɛn’n i nɲɔn su’n yɛle klolɛ’n. Zoova yo like kwlaa klolɛ su. (1 Zan 4:7, 8) I wie yɛle kɛ, kɛ m’ɔ kunndɛ kɛ e yo i janvuɛ ti’n ɔ fɛli i nuan Ndɛ’n mannin e. Kpɛkun ɔ sin i anuannzɛ’n i lika kle e like. Asa ekun’n, ɔ yo maan e wun i wlɛ weiin kɛ ɔ klo e. ?Ngue yɛ Zoova yo naan y’a ɲan ninnge nga e sa mian be wun’n niɔn? Biblu’n se kɛ “ɔ fa like kwlaa ng’ɔ ti kpa’n man e klun ufue su.” (1 Tim. 6:17) Kɛ e fɔn’n ɔ tu e fɔ, sanngɛ ɔ yaciman e klolɛ. Sanngɛ like nga Zoova yoli m’ɔ kle kɛ ɔ klo e dan’n yɛle e ti kpɔlɛ tɛ m’ɔ yili’n. Zezi kusu klo e wie. Afin ɔ kplinnin su kɛ ɔ́ fɛ́ i nguan’n fá tó e ti. (Zan 3:16; 15:13) Ɔ maan be nga be nin Zoova nin Zezi be nanti klanman’n, like fi kwlá yoman naan b’a yaci be klolɛ.—Zan 13:1; Rɔm. 8:35, 38, 39.
13. ?Ngue ti yɛ ɔ fata kɛ awlobo kpɛn kun kle kɛ ɔ klo i awlobofuɛ mun-ɔn? (An nian kuku nga be flɛ i kɛ “ ?Ngue yɛ yasua ng’ɔ wa ja bla uflɛuflɛ’n kwla yo naan i yi’n i ɲin w’a yi i-ɔ?” i nun.)
13 Like nga ndɛ sɔ’n kle e’n. Ɔ fata kɛ awlobo kpɛn’m be yo like kwlaa klolɛ su. ?Ngue ti yɛ i sɔ’n ti cinnjin-ɔn? Akoto Zan seli kɛ: “Sran ng’ɔ klomɛn i niaan [annzɛ i awlobofuɛ mun’n] m’ɔ wun i’n, ɔ kwlá kloman Ɲanmiɛn m’ɔ wunmɛn i’n.” (1 Zan 4:11, 20) Yasua ng’ɔ klo i awlobofuɛ mun yɛ ɔ kunndɛ kɛ ɔ́ nían Zoova nin Zezi be ajalɛ’n su’n, ɔ ukɛ i awlobofuɛ mun naan be nin Zoova be afiɛn mantan kpa naan be wun kpaja be. Yɛ ɔ fa ninnge nga be sa mian be wun’n man be. (1 Tim. 5:8) Kpɛkun ɔ kle i mma’m be like yɛ ɔ tu be fɔ kɛ ng’ɔ nin i fata’n sa. Asa ekun’n, ɔ miɛn i ɲin fa ajalɛ nga Zoova i klun jɔ su mɔ i awlobofuɛ’m be kwla ɲan su ye’n. Siɛn’n, é wá kán wafa nga awlobo kpɛn kun kwla nian Zoova nin Zezi be ajalɛ’n su sa fanunfanun nun’n, i ndɛ.
?NGUE YƐ Ɔ FATA KƐ AWLOBO KPƐN KUN YO-Ɔ?
14. ?Wafa sɛ yɛ awlobo kpɛn kun kwla ukɛ i awlobofuɛ mun naan be nin Zoova be afiɛn w’a mantan-ɔn?
14 Ɔ fata kɛ ɔ ukɛ i awlobofuɛ mun naan be su Zoova kpa. Zezi kleli kɛ ɔ ti kɛ i Si Zoova sa. Yɛle kɛ ɔ ukɛli i sɔnnzɔnfuɛ mun naan be lafi Ɲanmiɛn su kpa. (Mat. 5:3, 6; Mar. 6:34) I wafa kunngba’n, like ng’ɔ fata kɛ ɔ yo awlobo kpɛn kun i cinnjin’n, yɛle kɛ ɔ ukɛ i awlobofuɛ mun naan be nin Zoova be afiɛn mantan kpa. (Mml. 6:6-9) I lɛ nun’n, ɔ fata kɛ ɔ yo naan i bɔbɔ nin i awlobofuɛ’m be kanngan Biblu’n nun cɛn kwlakwla yɛ be suan nun like, be tran aɲia’m be bo, be bo jasin fɛ’n yɛ be yo naan be nin Zoova be janvuɛ’n tra titi.
15. ?Wafa sɛ yɛ awlobo kpɛn kun kwla yi i nglo kɛ ɔ klo i yi nin i mma mun-ɔn?
15 Ɔ fata kɛ ɔ yi i nglo kɛ ɔ klo i awlobofuɛ mun. Sran’m be kwlaa be ɲrun’n, Zoova seli Zezi kɛ ɔ klo i. (Mat. 3:17) Zezi kusu seli i sɔnnzɔnfuɛ’m be kɛ ɔ klo be yɛ ɔ yoli ninnge wie mun fa yili i sɔ liɛ’n i nglo. I sɔnnzɔnfuɛ’m be kusu be seli i kɛ be klo i wie. (Zan 15:9, 12, 13; 21:16) Ɔ fata kɛ awlobo kpɛn kun yi i nglo kɛ ɔ klo i yi nin i mma mun. I wie yɛle kɛ ɔ nin be suan Biblu’n nun like. Asa ekun’n, maan ɔ kan kle be kɛ ɔ klo be naan i klun jɔ be wun. Kpɛkun ɔ ju wie’n ɔ fata kɛ ɔ yo be mo sran’m be kwlaa be ɲrun.—Nya. 31:28, 29.
Sɛ awlobo kpɛn kun kunndɛ kɛ Zoova i klun jɔ i wun’n, ɔ fata kɛ ɔ fa ninnge nga i awlobofuɛ’m be sa mian be wun’n man be. (An nian ndɛ kpɔlɛ 16 nun.)
16. (1) ?Ngue yɛ ɔ fata kɛ awlobo kpɛn kun yo-ɔ? (2) ?Ngue yɛ ɔ fataman kɛ ɔ yo-ɔ?
16 Ɔ fata kɛ ɔ yo naan i awlobofuɛ’m be ɲan ninnge nga be sa mian be wun’n. Zoova yoli maan Izraɛlifuɛ’m be ɲannin ninnge nga be sa mian be wun’n. I kpa bɔbɔ’n kɛ be yoli ɲin kekle m’ɔ tuli be fɔ’n, w’a yaciman be lika nianlɛ le. (Mml. 2:7; 29:5) Andɛ’n like kunngba’n yɛ ɔ yo man e-ɔ. (Mat. 6:31-33; 7:11) Zezi kusu mannin be nga be suli i su’n be aliɛ. (Mat. 14:17-20) Asa ekun’n, ɔ yoli sran kpanngban kpa be juejue. (Mat. 4:24) Sɛ awlobo kpɛn kun kunndɛ kɛ Zoova i klun jɔ i wun’n, ɔ fata kɛ ɔ niɛn i awlobofuɛ’m be lika kpa. Sanngɛ like kun o lɛ m’ɔ fataman kɛ ɔ yo-ɔ. Yɛle kɛ ɔ fataman kɛ ɔ fa junman dilɛ’n fa cici i ti dan naan i wla fi su kɛ ɔ fata kɛ ɔ ukɛ i awlobofuɛ naan be su Zoova kpa. Asa ekun’n, nán junman’n ti’n i ɲin kpa su kɛ ɔ fata kɛ ɔ kle i awlobofuɛ’m be kɛ be ndɛ lo i.
17. ?Fɔ tulɛ nin like klelɛ nun’n ajalɛ benin yɛ Zoova nin Zezi be kle e-ɔ?
17 Ɔ fata kɛ ɔ kle i awlobofuɛ’m be like. Zoova kle e like yɛ ɔ tu e fɔ. Afin ɔ kunndɛ kɛ e liɛ yo ye. (Ebr. 12:7-9) Kɛ Zoova sa’n, Zezi kusu kle be ng’ɔ sie be’n be like klolɛ su. (Zan 15:14, 15) Ɔ ju wie’n ɔ di be nanwlɛ sa wie’m be nun, sanngɛ ɔ yo i sɔ klolɛ su. (Mat. 20:24-28) Ɔ si kɛ fɔ o e nun naan ɔ ju wie’n e fɔn.—Mat. 26:41.
18. ?Ngue yɛ ɔ fataman kɛ awlobo kpɛn kun i wla fi su-ɔ?
18 Awlobo kpɛn ng’ɔ nian Zoova nin Zezi be ajalɛ’n su’n, i wla fiman su kɛ fɔ o i yi nin i mma’m be nun. Ɔ maan ‘ɔ fɛmɛn i yi nin i mma’m be wun ya.’ (Kol. 3:19) Sanngɛ ɔ nanti ndɛ ng’ɔ o Galasifuɛ Mun 6:1 nun’n i su. Sɛ be yo like wie naan i waan ɔ́ tú be fɔ’n, ɔ yo i “wɛtɛɛ su.” Afin i wla fiman su kɛ fɔ o i nun wie. Kɛ Zezi sa’n, ɔ wun i wlɛ kɛ ɔ fata kɛ ɔ kle i awlobofuɛ’m be ajalɛ.—1 Piɛ. 2:21.
19-20. ?Sɛ ɔ fata kɛ awlobo kpɛn kun fa ajalɛ’n, wafa sɛ yɛ ɔ kwla nian Zoova nin Zezi be ajalɛ’n su-ɔ?
19 Kɛ ɔ́ fá ajalɛ’n ɔ fataman kɛ ɔ bu i ngunmin i wun akunndan. Ajalɛ kwlaa nga Zoova fa be’n, sran’m be ɲan su ye. I wie yɛle kɛ like nga ti yɛ ɔ fali ajalɛ kɛ ɔ́ yí ninnge mun’n, yɛle kɛ ɔ kunndɛ kɛ ninnge sɔ’m be tran nguan naan be di aklunjuɛ wie. Asa ekun’n, kɛ e yoli sa tɛ’n e kwlá miɛnmɛn i kɛ ɔ yi e ti tɛ naan e ɲan e ti sa tɛ’n nin wie’n be sa nun. Sanngɛ i klun klo su’n, ɔ fɛli i Wa’n kpɔli e ti. Afin ɔ kunndɛ kɛ ɔ́ dé e. (Rɔm. 15:3) Zezi kusu, kɛ ɔ́ fá ajalɛ’n ɔ bumɛn i ngunmin i wun akunndan wie. I wie yɛle kɛ cɛn kun’n kannzɛ w’a fɛ kpa’n, sanngɛ ɔ kleli sran kpanngban kpa be like. Kusu nn ɔ kwla fɛ i sɔ blɛ’n lo wunmiɛn.—Mar. 6:31-34.
20 Yasua ng’ɔ sie i awlobo’n i kpa’n ɔ si kɛ, kɛ ɔ ko yo naan w’a fa ajalɛ naan i awlobofuɛ’m b’a ɲan su ye’n, i sɔ yolɛ’n timan pɔpɔ mlɔnmlɔn. Kannzɛ ɔ ti sɔ bɔbɔ’n, sanngɛ ɔ miɛn i ɲin fa ajalɛ kpa. Asa ekun’n, ɔ faman ajalɛ ngbɛnngbɛn yɛ ɔ jranman wafa nga i wun yo i’n su faman ajalɛ wie. Sanngɛ ɔ kplin su kɛ Zoova kle i wafa ng’ɔ kwla fa ajalɛ kpa’n. * (Nya. 2:6, 7) Kɛ ɔ yo sɔ’n, kɛ ɔ́ fá ajalɛ’n ɔ bumɛn i ngunmin i wun akunndan.—Fp. 2:4.
21. ?Kosan benin mun yɛ é wá tɛ́ be su like suanlɛ nga i sin liɛ’n nun-ɔn?
21 Zoova mannin awlobo kpɛn’m be junman kun mɔ i dilɛ’n timan pɔpɔ-ɔ. Kannzɛ ɔ ti sɔ bɔbɔ’n, sanngɛ ɔ kunndɛ kɛ be mian be ɲin be di junman sɔ’n i kpa. Sɛ junman sɔ’n i dilɛ nun’n, awlobo kpɛn kun nian Zoova nin Zezi be ajalɛ’n su’n, ɔ́ kwlá síe i awlobofuɛ’m be kpa. Yɛ sɛ i yi kusu miɛn i ɲin di i junman liɛ nga Ɲanmiɛn fa mɛnnin i’n, awlo’n nun jɔ́ fɔuun. ?Sanngɛ wafa sɛ yɛ ɔ fata kɛ bla kun bu sielɛ mɔ i wun’n sie i’n niɔn? ?Ngue yɛ ɔ kwla yo kekle mɛn i-ɔ? Like suanlɛ nga i sin liɛ’n nun’n, é wá tɛ́ kosan sɔ’m be su.
JUE 16 Zoova i Wa’n ti’n e mɛnmɛn i
^ ndɛ kpɔlɛ 5 Kɛ yasua kun ja bla’n ɔ kaci awlobo kpɛn. Like suanlɛ nga nun’n, é wá kán kwlalɛ nga Zoova fa mannin sran wie mun’n, ɔ nin like nga ti yɛ ɔ yoli sɔ’n be ndɛ. Kpɛkun é wá kán ajalɛ nga Zoova nin Zezi be kle yasua mun’n, i ndɛ wie. Like suanlɛ nga i sin liɛ nun’n, é wá kán ajalɛ nga Zezi ɔ nin sran wie mɔ Biblu’n kan be ndɛ’n be kle yasua kun nin i yi’n i ndɛ. Kpɛkun like suanlɛ nsan su’n nun’n, é wá kán wafa ng’ɔ fata kɛ aniaan yasua’m be sie aniaan mun asɔnun’n nun’n i ndɛ.
^ ndɛ kpɔlɛ 7 Ɔ ju wie’n, like nga ti yɛ yasua kun kwla bu i kɛ sɛ ɔ yo i yi’n i kpokokpoko’n i sɔ’n ti kpa’n, ɔ fin flimun nin anɔ nga sran’m be yi be’n be nianlɛ’n. Wie liɛ bɔbɔ’n i sɔ’n fin fluwa nga be kan aɲinsuɛ ndɛ nun’n, be nun kannganlɛ’n. Wie liɛ kusu’n sran’m be bu i kɛ bla’m be kpokokpoko yolɛ’n timan like tɛ.
^ ndɛ kpɔlɛ 20 Sɛ an kunndɛ kɛ amún sí wafa nga amun kwla fa ajalɛ kpa’n, an nian like suanlɛ nga be flɛ i kɛ “Maan ajalɛ nga é fá’n be yo naan Ɲanmiɛn ɲan ɲrun” m’ɔ o afuɛ 2011 Avrili 1 Sasafuɛ Tranwlɛ’n i bue 17-21 su’n i nun.
