1. Anong mga bagay an posibleng marhay na makaimpluwensiya sa pagmansay nin sarong lalaki manungod sa pagkapayo?

PARA saimo, ano an pagkapayo? May mga lalaki na tinatrato an agom saka mga aki ninda sigun sa saindang tradisyon, kultura, o kinatudan sa pamilya. Mangnuhon an sinabi ni Yanita, na sarong sister na taga Europa, “Sa lugar mi, hababa an paghiling sa mga babayi kisa sa mga lalaki; an mga babayi mga suruguon lang.” Sinabi ni Luke, na sarong brother na taga Estados Unidos, “May mga ama na itinutukdo sa mga aki nindang lalaki na an mga babayi dapat magsilensiyo lang asin na bakong mahalaga an opinyon kan mga ini.” Pero habo ni Jehova na gamiton kan mga lalaki an pagkapayo ninda sa arog kaiyan na paagi. (Ikumparar an Marcos 7:13.) Paano magigin marahay na payo nin pamilya an sarong lalaki?

2. Ano an kaipuhan na maaraman nin sarong payo nin pamilya, asin taano?

² Para magin marahay na payo nin pamilya, kaipuhan ngunang masabutan nin sarong lalaki kun ano an hinahagad saiya ni Jehova. Kaipuhan niya man na maaraman kun taano ta inestablisar ni Jehova an pagkapayo, asin kun paano niya maaarog an halimbawang itinao ni Jehova asin ni Jesus. Taano ta mahalaga na maaraman iyan nin sarong lalaki? Huling tinawan ni Jehova nin awtoridad an mga payo nin pamilya, asin inaasahan niya na gagamiton ninda iyan sa tamang paagi.—Luc. 12:48b.

3. Ano an manunudan ta sa 1 Corinto 11:3 manungod sa pagkapayo?

³ Basahon an 1 Corinto 11:3. Sinasambit sa bersikulong ini kun paano inorganisar ni Jehova an saiyang unibersal na pamilya. Kalabot sa pagkapayo an duwang mahalagang bagay—awtoridad asin paninimbagan. Si Jehova “an payo,” o an may pinakahalangkaw na awtoridad, asin an gabos niyang aki—mga anghel asin mga  tawo—maninimbag sa kun paano ninda ginagamit an saindang awtoridad. (Roma 14:10; Efe. 3:14, 15) Tinawan ni Jehova si Jesus nin awtoridad sa kongregasyon, pero maninimbag si Jesus ki Jehova sa kun paano niya kita tinatratar. (1 Cor. 15:27) Tinawan man ni Jehova nin awtoridad an agom na lalaki sa saiyang agom asin mga aki, pero maninimbag man siya ki Jehova asin ki Jesus sa kun paano niya tinatratar an saiyang pamilya.—1 Ped. 3:7.

4. Anong awtoridad igwa si Jehova asin si Jesus?

⁴ Bilang Payo kan saiyang unibersal na pamilya, may awtoridad si Jehova na gumibo nin mga susundon sa kun ano an dapat na magin paggawi kan saiyang mga aki asin na siguraduhon na nasusunod iyan. (Isa. 33:22) Bilang an payo kan Kristiyanong kongregasyon, igwa man si Jesus kan deretso na gumibo nin mga susundon asin siguraduhon na nasusunod iyan.—Gal. 6:2; Col. 1:18-20.

5. Anong awtoridad igwa an payo nin sarong Kristiyanong pamilya, asin ano an mga limitasyon kaiyan?

⁵ Arog ni Jehova asin ni Jesus, an payo nin sarong Kristiyanong pamilya igwa kan awtoridad na gumibo nin mga desisyon para sa pamilya niya. (Roma 7:2; Efe. 6:4) Pero may mga limitasyon an awtoridad niya. Halimbawa, an mga itinatao niyang susundon dapat na nakabasar sa mga prinsipyo na nasa Tataramon nin Diyos. (Tal. 3:5, 6) Asin an sarong payo nin pamilya mayo kan awtoridad na gumibo nin mga susundon para sa mga bakong miyembro kan pamilya niya. (Roma 14:4) Asin pag an mga aki niya magdarakula na asin maghali na sa harong, igagalang pa man giraray ninda siya, pero bako na sindang sakop kan pagkapayo niya.—Mat. 19:5.

6. Taano ta inestablisar ni Jehova an pagkapayo?

⁶ Inestablisar ni Jehova an pagkapayo huling namumutan niya an saiyang pamilya. Regalo iyan hali saiya. Dahil sa pagkapayo nagigin posible na magin matuninong asin organisado an pamilya ni Jehova. (1 Cor. 14:33, 40) Kun bakong malinaw kun siisay an payo, magigin dis-organisado asin bakong maugma an pamilya ni Jehova. Halimbawa, magigin bakong malinaw kun siisay an dapat na gumibo nin pinal na desisyon asin kun siisay an manginginot sa pagpautob kan mga desisyon na iyan.

7. Sigun sa Efeso 5:25, 28, gusto daw ni Jehova na dominaron nin mga lalaki an mga babayi?

⁷ Kun marahayon na bagay an areglo nin Diyos sa pagkapayo, taano ta dakul na babayi ngunyan an nakakamating maringis saka dominante an agom ninda? Dahil dakul kayang lalaki an binabaliwala an mga pamantayan ni Jehova sa pamilya asin pinipiling sundon an mga kinatudan o tradisyon sa lugar ninda. Tibaad abusuhon man ninda an saindang agom na babayi para mapaniguan an sarong makasadiring pagmawot. Halimbawa, tibaad dominaron nin sarong agom na lalaki an saiyang agom para mas mamatian niya na mas mahalaga siya o para patunayan sa iba na “tunay siyang lalaki.” Tibaad isipon niya na maski dai niya mapupuwersa an agom niya na kamutan siya, magigibo niya man na matakot ini saiya. Asin tibaad gamiton niya an takot na iyan para kontrulon an agom niya. * An kaisipan asin paggawing iyan malinaw na nakakahali kan onra asin paggalang na maninigo sa mga babayi, asin talagang kabaliktaran iyan sa gusto ni Jehova.—Basahon an Efeso 5:25, 28.

8. Paano magigin marahay na payo nin pamilya an sarong lalaki?

⁸ Magigin marahay na payo nin pamilya an sarong lalaki kun aarugon niya si Jehova asin si  Jesus sa kun paano ninda ginamit an saindang pagkapayo. Pag-isipan an duwa sana sa mga kuwalidad na ipinahiling ni Jehova asin ni Jesus, asin risahon kun paano iyan maipapahiling nin sarong payo nin pamilya sa pagtratar niya sa saiyang agom asin mga aki.

9. Paano si Jehova nagpapahiling nin kapakumbabaan?

⁹ Kapakumbabaan. Si Jehova an pinakamadunong na Persona pero dinadangog niya an opinyon kan saiyang mga lingkod. (Gen. 18:23, 24, 32) Tinugutan niya an mga nasa awtoridad niya na magtao nin mga suhestiyon. (1 Ha. 22:19-22) Perpekto si Jehova, pero dai siya naglalaom nin pagkaperpekto sato ngunyan. Imbes, tinatabangan niya an bakong perpektong mga lingkod niya na magin mapanggana. (Sal. 113:6, 7) Sa katunayan, sinasabi pa ngani kan Bibliya na si Jehova “paratabang.” (Sal. 27:9; Heb. 13:6) Sinabi ni Hading David na natapos niya an dakulang trabaho na itinao sa saiya dahil sana sa kapakumbabaan ni Jehova.—2 Sam. 22:36.

10. Paano si Jesus nagpahiling nin kapakumbabaan?

¹⁰ Pag-isipan an halimbawa ni Jesus. Dawa Kagurangnan siya kan mga disipulo niya, hinugasan niya an mga bitis ninda. Ano an sarong dahilan kaya ipinasurat ni Jehova sa Bibliya an pangyayaring ini? Siguradong para tawan nin malinaw na arugan an gabos, kaiba na an mga payo nin pamilya. Sinabi mismo ni Jesus: “Nagtao ako sa saindo nin arugan, tanganing kun ano an ginibo ko sa saindo, iyo man dapat an gibuhon nindo.” (Juan 13:12-17) Dawa igwa si Jesus nin dakulang awtoridad, dai niya linauman an iba na paglingkudan siya. Imbes, siya an naglingkod sa sainda.—Mat. 20:28.

11. Ano an manunudan nin sarong payo nin pamilya sa kapakumbabaan ni Jehova asin ni Jesus?

¹¹ Mga leksiyon para sa sato. Makakapahiling nin kapakumbabaan an sarong payo nin pamilya sa dakul na paagi. Halimbawa, dai siya naglalaom nin pagkaperpekto sa saiyang agom asin mga aki. Dinadangog niya an opinyon ninda, dawa pag iba iyan sa opinyon niya. Sinabi ni Marley na sarong sister na taga Estados Unidos: “Kun minsan, magkaiba kami nin opinyon ni agom. Pero namamatian kong pinapahalagahan niya ako saka iginagalang ta hinahagad niya an opinyon ko saka pinag-iisipan niyang marhay iyan bago gumibo nin desisyon.” Dugang pa, an sarong mapakumbabang agom na lalaki andam na tumabang sa mga gibuhon sa harong, dawa kun sa komunidad ninda ibinibilang iyan na pambabayi sana. Puwedeng magin masakit iyan. Taano? Sinabi kan sister na si Rachel: “Sa lugar mi,  kun tatabangan kan agom na lalaki an agom niya sa paghugas nin mga plato o sa paglinig sa harong, iisipon kan mga pagtaraid saka kan mga kaparyente niya na bako siyang ‘tunay na lalaki.’ Iisipon ninda na dai niya kayang kontrulon an agom niya.” Kun arog man kaiyan saindo, girumdumon na hinugasan ni Jesus an mga bitis kan mga disipulo niya, dawa ngani ibinibilang iyan kaidto na trabaho nin sarong uripon. An importante sa sarong marahay na payo nin pamilya, bako an iisipon sa saiya kan iba, kundi an kaugmahan kan saiyang agom asin mga aki. Apuwera sa kapakumbabaan, ano pang kuwalidad an kaipuhan nin sarong marahay na payo nin pamilya?

12. Pinapahiro nin pagkamuot si Jehova asin si Jesus na gibuhon an ano?

¹² Pagkamuot. An pagkamuot an nagpapahiro ki Jehova sa gabos na ginigibo niya. (1 Juan 4:7, 8) Mamumuton niya kitang tinatawan kan satong espirituwal na mga pangangaipo paagi sa saiyang nasusurat na Tataramon—an Bibliya—asin sa organisasyon niya. Itinatao niya man an satong emosyonal na mga pangangaipo paagi sa pag-asigurar sato na namumutan niya kita. Paano man an satong materyal na mga pangangaipo? Si Jehova “abundang nagtatao sa sato kan gabos na bagay para sa satuyang kaugmahan.” (1 Tim. 6:17) Pag nasasala kita, itinatanos niya kita, pero padangat pa man giraray niya kita. Dahil sa pagkamuot, itinao ni Jehova an areglo kan pantubos. Namumutan man kitang marhay ni Jesus, mala ngani ta itinao niya an saiyang buhay para sa sato. (Juan 3:16; 15:13) Mayo nin makakahali sa pagkamuot ni Jehova asin ni Jesus sa mga maimbod sa sainda.—Juan 13:1; Roma 8:35, 38, 39.

13. Taano ta mahalaga na an payo nin pamilya magpahiling nin pagkamuot sa saiyang pamilya? (Hilingon man an kahon na “ Paano Makukua nin Sarong Bagong Kasalon na Lalaki an Respeto kan Agom Niya?”)

¹³ Mga leksiyon para sa sato. Dapat na pagkamuot an nagpapahiro sa sarong payo nin pamilya sa gabos na ginigibo niya. Taano ta mahalagang marhay iyan? Nagsimbag si apostol Juan: “An saro [na] dai namumuot sa saiyang tugang [o pamilya], na nahihiling niya, dai man niya magigibong mamuot sa Diyos, na dai niya nahihiling.” (1 Juan 4:11, 20) Kun namumutan nin sarong lalaki an saiyang pamilya asin gusto niyang arugon si Jehova asin si Jesus, itatao niya an  espirituwal, emosyonal, asin materyal na mga pangangaipo kan saiyang pamilya. (1 Tim. 5:8) Sasanayon asin didisiplinahon niya an saiyang mga aki. Padagos niya man na hihinguwahon na gumibo nin mga desisyon na nagtataong onra ki Jehova asin na nakakarahay sa saiyang pamilya. Pag-ulayan ta an kada saro kaiyan asin hilingon ta kun paano maaarog nin sarong payo nin pamilya si Jehova asin si Jesus.

14. Paano maitatao kan payo nin pamilya an espirituwal na mga pangangaipo kan saiyang pamilya?

¹⁴ Itao an espirituwal na mga pangangaipo kan saiyang pamilya. Arog kan saiyang Ama, importante ki Jesus na pirming basog sa espirituwal an mga nasa pangangataman niya. (Mat. 5:3, 6; Mar. 6:34) Sa kaagid na paagi, priyoridad kan payo nin pamilya na itao an espirituwal na mga pangangaipo kan saiyang pamilya. (Deut. 6:6-9) Ginigibo niya iyan paagi sa pagsigurado na siya saka an saiyang pamilya binabasa asin pinag-aadalan an Tataramon nin Diyos, nag-aatender sa mga pagtiripon, naghuhulit kan maugmang bareta, asin hinihinguwang magkaigwa nin haraning relasyon ki Jehova asin pinagdadanay iyan.

15. Ano an sarong paagi na maitatao kan payo nin pamilya an emosyonal na mga pangangaipo kan saiyang pamilya?

¹⁵ Itao an emosyonal na mga pangangaipo kan saiyang pamilya. Hayag na sinabi ni Jehova na namumutan niya si Jesus. (Mat. 3:17) Parating ipinapahiling ni Jesus sa tataramon asin gibo na namumutan niya an saiyang mga parasunod. Kaya arog man sinda kaiyan saiya. (Juan 15:9, 12, 13; 21:16) Maipapahiling kan payo nin pamilya na namumutan niya an saiyang agom asin mga aki paagi sa mga ginigibo niya, arog baga kan pag-adal nin Bibliya kaiba sinda. Dapat niya man na sabihon sainda na padangat niya sinda, asin na mahalaga sinda saiya, asin hayag sindang komendaran pag angay iyan.—Tal. 31:28, 29.

16. Ano pa an kaipuhan na gibuhon kan payo nin pamilya, asin paano siya magdadanay na balanse?

¹⁶ Itao an materyal na mga pangangaipo kan saiyang pamilya. Itinao ni Jehova an panginot na mga pangangaipo kan mga Israelita dawa kan pinapadusahan niya sinda huli sa pagsuway. (Deut. 2:7; 29:5) Itinatao niya man sato ngunyan an satong panginot na mga pangangaipo. (Mat. 6:31-33; 7:11) Kaagid kaiyan, pinakakan ni Jesus an mga tawong nagsurunod sa saiya. (Mat. 14:17-20) Pinaumayan niya man an dakul na may hilang. (Mat. 4:24) Para mapaugma si Jehova, kaipuhan na itao kan payo nin pamilya an materyal na mga pangangaipo kan saiyang pamilya. Pero kaipuhan niyang magin balanse. Dai siya dapat sobrang magpokus sa sekular na trabaho para sustentuhan an saiyang pamilya na huli kaiyan napapabayaan niya na an espirituwal asin emosyonal na mga pangangaipo kan saiyang pamilya.

17. Paano kita sinasanay asin dinidisiplina ni Jehova?

¹⁷ Magtao nin pagsasanay. Sinasanay saka dinidisiplina kita ni Jehova para sa pinakaikakarahay ta. (Heb. 12:7-9) Arog kan saiyang Ama, sinasanay ni Jesus sa mamumuton na paagi an mga nasa awtoridad niya. (Juan 15:14, 15) Nagtatao  siya nin magabat na konseho pero sa mabuot na paagi. (Mat. 20:24-28) Nasasabutan niya na bako kitang perpekto asin parating nasasala.—Mat. 26:41.

18. Ano an pagpapasensiyahan nin sarong marahay na payo nin pamilya?

¹⁸ Kun inaarog kan payo nin pamilya si Jehova asin si Jesus, pagpapasensiyahan niya an mga kaluyahan kan saiyang agom asin mga aki. ‘Dai siya maaanggot sa sainda na may kapaitan.’ (Col. 3:19) Imbes, susundon niya an prinsipyo na nasa Galacia 6:1 asin hihinguwahon na itanos sinda sa “mahuyong paagi,” na ginigirumdom na bako man siyang perpekto. Arog ni Jesus, nasasabutan niya na an pagpahiling nin marahay na halimbawa iyo an pinakamarahay na paagi nin pagtukdo.—1 Ped. 2:21.

19-20. Pag naggigibo nin desisyon, paano maaarog nin sarong payo nin pamilya si Jehova asin si Jesus?

¹⁹ Gumibo nin bakong makasadiring mga desisyon. Para sa pinakaikakarahay kan iba an mga desisyon na ginigibo ni Jehova. Halimbawa, nagdesisyon siyang lalangon an buhay, bako para makinabang siya, kundi para ikaugma ta iyan. Mayo nin siisay man na nagpirit saiya na itao an saiyang Aki para tahuban an satong mga kasalan. Gikan sa buot siyang nagdesisyon na gibuhon an sakripisyong iyan para sa satong kapakinabangan. Naggibo man si Jesus nin mga desisyon na nakatabang sa iba. (Roma 15:3) Halimbawa, dawa kan pagalon kaidto si Jesus, dai na nguna siya nagpahingalo. Imbes, tinukduan niya an sarong grupo nin mga tawo.—Mar. 6:31-34.

²⁰ Aram nin sarong marahay na payo nin pamilya na an saro sa pinakadipisil na mga kaipuhan niyang gibuhon iyo an gumibo nin madunong na mga desisyon para sa saiyang pamilya, asin sineseryoso niya an responsabilidad na iyan. Linilikayan niyang gumibo nin pabigla-biglang mga desisyon o nin mga desisyon na nakabasar sana sa emosyon. Imbes, tinutugutan niya si Jehova na sanayon siya. * (Tal. 2:6, 7) Paagi kaiyan, an iisipon niya iyo an kapakanan kan iba, bako an sadiri niya.—Fil. 2:4.

21. Ano an pag-uulayan sa sunod na artikulo?

²¹ An pagigin payo nin pamilya sarong dipisil na asignasyon hali ki Jehova, asin maninimbag sinda saiya sa kun paano ninda isinasagibo iyan. Pero kun hinihinguwa nin sarong agom na lalaki na sunudon an halimbawa ni Jehova asin ni Jesus, magigin marahay siyang payo nin pamilya. Asin kun inuutob kan agom na babayi an papel niya, magigin maugma an pag-ibanan ninda. Paano dapat mansayon nin sarong agom na babayi an pagkapayo, asin anong mga kadipisilan an napapaatubang sa saiya? Sisimbagon sa sunod na artikulo an mga hapot na iyan.