STADI 5
“Kraes i Hed Blong Man”
“Kraes i hed blong man.”—1 KOR. 11:3.
SINGSING 12 Hae God Jehova
BIGFALA TINGTING *
1. ?Wanem i save gat paoa long tingting blong wan hasban?
?TOK ya “hed” i minim wanem long yu? Sam hasban oli tritim waef mo pikinini blong olgeta folem kastom, o fasin we oli gruap long hem. Makem samting we Sista Yanita long Yurop, i talem: “Long ples blong mi, ol man oli bilif strong se woman i daon moa long man, mo oli mas luk olgeta olsem ol woman blong wok nomo.” Mo Brata Luk long Yunaeted Stet, i talem se: “Sam papa oli tijim ol boe blong olgeta se oli save lukluk ol woman, be oli no mas lesin long olgeta, from we tingting blong olgeta i no impoten.” Be Jehova i no wantem se man i tingting olsem long waef blong hem. (Skelem Mak 7:13.) ?Olsem wanem wan man i save lanem blong kam wan gudfala hed blong famle?
2. ?Hed blong famle i mas save wanem, mo from wanem?
2 Blong kam wan gudfala hed blong famle, fastaem wan hasban i mas kasemsave samting we Jehova i wantem se hem i mekem. Mo tu, hem i mas save from wanem Jehova i stanemap wok ya, mo olsem wanem blong folem eksampol blong Jehova mo Jisas. ?From wanem hemia i impoten? From we Jehova i givim sam otoriti long ol hed blong famle, mo hem i ekspektem se oli yusum gud.—Luk 12:48b.
?WANEM YA “HED”?
3. ?Fas Korin 11:3 i tijim wanem long saed blong “hed”?
3 Ridim 1 Korin 11:3. Vas ya i tokbaot olsem wanem Jehova i oganaesem famle blong hem long yunives. Hed i minim tu samting—otoriti mo responsabiliti. Jehova i “hed,” o i gat ful otoriti, mo evri pikinini blong hem long heven mo wol, oli gat responsabiliti ya blong talemaot long Hem se oli yusum otoriti ya olsem wanem. (Rom 14:10; Efes. 3:14, 15) Jehova i givim otoriti long Jisas blong i lukaot long kongregesen, mo Jisas i gat responsabiliti blong tritim gud yumi olsem we Jehova i wantem. (1 Kor. 15:27) Jehova i givim otoriti tu long wan hasban blong i lukaot long waef mo ol pikinini blong hem, mo hasban ya i gat responsabiliti blong tritim famle blong hem olsem we Jehova mo Jisas i wantem.—1 Pita 3:7.
4. ?Jehova mo Jisas i gat wanem otoriti?
4 Jehova i Hed long famle blong hem long ful yunives, mo Hem i gat otoriti blong putum ol rul we ol pikinini blong hem oli mas folem, hem i gat raet blong mekem se oli obei long ol rul ya. (Aes. 33:22) Jisas i hed blong kongregesen, mo hem tu i gat raet blong putum ol rul mo mekem ol man oli obei long ol rul ya.—Gal. 6:2; Kol. 1:18-20.
5. ?Wanem otoriti we hed blong famle i gat, mo hem i no gat raet blong mekem wanem?
5 Olsem Jehova mo Jisas, hed blong wan Kristin famle i gat otoriti blong mekem ol desisen long famle. (Rom 7:2; Efes. 6:4) Nating se i olsem, hem i no gat raet o ful otoriti blong mekem sam samting. Eksampol, ol rul blong hem oli mas stanap long ol rul blong Baebol. (Prov. 3:5, 6) Mo wan hed blong famle i no gat raet o otoriti, blong putum ol rul blong olgeta we oli no famle blong hem. (Rom 14:4) Mo tu, taem ol pikinini boe mo gel oli kam bigwan mo oli aot long haos, oli gohed blong respektem hem, be hem i no moa hed blong olgeta.—Mat. 19:5.
?FROM WANEM JEHOVA I STANEMAP WOK YA?
6. ?From wanem Jehova i stanemap “hed”?
6 Jehova i stanemap “hed” from we hem i lavem ol famle blong hem. Hemia wan presen we hem i givim. Wok ya blong hed i mekem se famle blong Jehova i save wok long pis mo oda. (1 Kor. 14:33, 40) Sipos i no gat hed long famle, bambae famle blong Jehova i wok olbaot mo bambae oli no hapi. Eksampol, bambae oli no save se hu i mas mekem ol laswan desisen mo hu i mas meksua se oli folem ol desisen ya.
7. Folem Efesas 5:25, 28, ?Jehova i wantem se hasban i bos strong long waef?
7 Sipos i gud we ol man oli hed blong famle, ?from wanem plante woman tede oli filim se hasban blong olgeta i bos strong long olgeta? Hemia from we plante man oli no wantem obei long ol rul blong God, be oli jusum blong folem kastom mo tingting blong olgeta. Mo tu, maet oli tritim nogud waef blong olgeta from we oli stap tingbaot rong filing blong olgeta nomo. Eksampol, maet wan hasban i bos strong long waef blong hem blong soem se hem i moa impoten, o blong soem hem long ol narafala se hem i “taf.” Maet hem i stap tingting se hem i no save fosem waef blong i lavem hem, be hem i save mekem waef ya i fraet long hem. Mo hasban i save yusum fraet ya blong kontrolem hem. * Kaen tingting mo fasin olsem i no givim ona mo respek long ol waef olsem we God i wantem. Ol hasban olsem oli stap agensem tingting blong Jehova.—Ridim Efesas 5:25, 28.
?OLSEM WANEM WAN MAN I SAVE KAM WAN GUDFALA HED BLONG FAMLE?
8. ?Olsem wanem wan man i save kam wan gudfala hed blong famle?
8 Wan man i save kam wan gudfala hed blong famle, taem i folem fasin blong Jehova mo Jisas blong yusum otoriti. Bambae yumi tokbaot tu gudfala fasin blong tufala, mo makem olsem wanem wan hed blong famle i save soem tufala fasin ya long waef mo ol pikinini blong hem.
9. ?Wanem i soem se Jehova i gat tingting daon?
9 Tingting daon. Jehova i waes moa long eni laef samting, be yet, hem i lesin long tingting blong ol man blong hem. (Jen. 18:23, 24, 32) Hem i letem olgeta we oli stap aninit long otoriti blong hem, blong oli givim sam tingting. (1Ki 22:19-22) Jehova i stret gud olgeta, be tede hem i no ekspektem se yumi mekem samting we i stret gud olgeta. Be, hem i givhan long ol man we oli no stret gud, blong oli mekemgud wok blong Hem. (Sam. 113:6, 7) Eksampol, Baebol i soem se Jehova i wan helpa. (Sam 27:9; Hib. 13:6) King Deved i luksave se hem i naf blong finisim ol bigfala wok, jes from we Jehova i gat tingting daon blong halpem hem.—2 Saml. 22:36.
10. ?Wanem i soem se Jisas i gat tingting daon?
10 Tingbaot Jisas. Nating se hem i Masta mo Tija blong ol disaepol blong hem, be hem i wasem leg blong olgeta. ?From wanem Jehova i mekem stori ya i stap long Baebol? I klia se wan risen, hemia blong soem eksampol long ol hed blong famle. Jisas i talem se: “Mi mi soemaot eksampol long yufala. Samting we mi mekem long yufala, yufala tu i mas mekem.” (Jon 13:12-17) Nating se Jisas i gat bigfala otoriti, hem i no ekspektem se ol narafala oli mekem wok blong hem, be hem nao i mekem wok blong olgeta.—Mat. 20:28.
Hed blong famle i save soem se i gat tingting daon mo i gat lav, taem i mekem ol wok long haos mo i givim samting we famle i nidim long spirit (Haf 11, 13)
11. ?Hed blong famle i save lanem wanem long eksampol blong Jehova mo Jisas?
11 Lesen blong yumi. Hed blong famle i save soem tingting daon long plante rod. Eksampol, hem i no ekspektem se waef mo ol pikinini blong hem oli mas mekem samting we i stret gud olgeta. Hem i lesin long tingting blong ol memba blong famle, nating se oli no agri wetem hem. Marley long Yunaeted Stet i talem se: “Samtaem tingting blong mi i defren long tingting blong hasban blong mi. Be mi harem se hem i glad mo i respektem mi, from hem i askem tingting blong mi, mo i tingting gud long samting ya, bifo we i mekem wan desisen.” Mo hasban we i gat tingting daon, hem i glad blong mekem ol wok long haos, nating sipos ol man long komuniti blong hem oli ting se wok ya i wok blong ol woman nomo. Hemia wan jalens. ?From wanem? Sista Rachel i talem se: “Long ples blong mi, sipos wan hasban i givhan long waef blong wasem plet o klinim haos, ol neba mo famle bambae oli ting se hem i ‘woman.’ Bambae oli ting se hem i no save kontrolem waef blong hem.” Sipos tingting ya i stap long ples blong yu, tingbaot se Jisas i wasem leg blong ol disaepol blong hem, nating we ol man oli ting se hemia wok blong slef. Wan gudfala hed blong famle i no mas mekem ol narafala oli glad long hem, be hem i mas mekem waef mo ol pikinini blong hem oli haremgud. Antap long tingting daon, ?wanem wan narafala fasin we i impoten long wan gudfala hed blong famle?
12. ?Lav i pusum Jehova mo Jisas blong mekem wanem?
12 Lav. Evri samting we Jehova i mekem, hem i mekem from lav. (1 Jon 4:7, 8) Wetem lav, hem i yusum Baebol mo oganaesesen blong hem, blong givim ol samting we yumi nidim long spirit. Hem i mekem yumi sua se hem i lavem yumi, blong mekem yumi harem gud long filing. ?Mo olsem wanem long ol nid blong yumi long bodi? Jehova “i stap givim olgeta samting we yumi stap harem gud long olgeta.” (1 Tim. 6:17) Taem yumi mekem mastik, hem i stretem yumi, be hem i no stop blong lavem yumi. From lav, Jehova i mekem rod blong ransom i givhan long yumi. Long saed blong Jisas, hem i lavem yumi tumas nao i givim laef blong hem from yumi. (Jon 3:16; 15:13) I no gat wan samting i save blokem lav ya we Jehova mo Jisas i gat long olgeta we oli holemstrong long hem.—Jon 13:1; Rom 8:35, 38, 39.
13. ?From wanem i impoten blong hed blong famle i soem lav long famle blong hem? (Luk bokis ya “ ?Olsem Wanem Wan Niu Hasban i Save Winim Respek Blong Waef Blong Hem?”)
13 Lesen blong yumi. Evri samting we wan hed blong famle i mekem, hem i sud mekem from lav. ?From wanem i impoten tumas? Aposol Jon i ansa se: “Sipos man i no lavem brata [o famle] blong hem we hem i stap luk oltaem, hem i no save lavem God we hem i no luk hem samtaem.” (1 Jon 4:11, 20) Taswe, wan man we i lavem famle blong hem mo i wantem folem eksampol blong Jehova mo Jisas, bambae i givim samting we famle i nidim long spirit, filing, mo bodi. (1 Tim. 5:8) Bambae hem i trenemgud mo stretem ol pikinini blong hem. Mo tu, bambae hem i gohed blong lanem blong mekem ol desisen we i givim ona long Jehova mo we i givhan long famle. I gud yumi tokbaot wanwan long ol nid ya, mo luk olsem wanem hed blong famle i save folem eksampol blong Jehova mo Jisas.
SAMTING WE HED BLONG FAMLE I SUD MEKEM
14. ?Olsem wanem hed blong famle i givim samting we famle i nidim long spirit?
14 Givim samting we famle i nidim long spirit. Folem eksampol blong Papa blong hem, Jisas i tingbaot oltaem blong givim kakae long spirit long olgeta we oli stap aninit long kea blong hem. (Mat. 5:3, 6; Mak 6:34) Long sem fasin, fas samting we hed blong famle i mas tingbaot, hemia samting we famle i nidim long spirit. (Dut. 6:6-9) Hem i mekem olsem, taem i meksua se famle i ridim mo i stadi Baebol, go long miting, talemaot gud nius, mo gohed blong fren wetem Jehova oltaem.
15. ?Olsem wanem hed blong famle i save mekem famle i haremgud long filing?
15 Givim samting we famle i nidim long filing. Jehova i talem stret long Jisas se hem i lavem hem. (Mat. 3:17) Jisas i soemaot klia se hem i lavem ol man blong hem, tru long ol aksen mo toktok blong hem. Ale olgeta tu oli soem se oli lavem hem. (Jon 15:9, 12, 13; 21:16) Hed blong famle i save soem long waef mo ol pikinini blong hem se hem i lavem olgeta, taem i stadi Baebol wetem olgeta. Hem i sud talem long olgeta tu se hem i lavem olgeta mo i glad long olgeta, mo taem i stret, i talemaot samting ya long fored blong ol narafala.—Prov. 31:28, 29.
Blong mekem Jehova i glad, hed blong famle i mas givim samting we famle i nidim long bodi (Haf 16)
16. ?Wanem moa we hed blong famle i mas mekem, mo olsem wanem hem i save skelemgud?
16 Givim samting we famle i nidim long bodi. Jehova i givim samting we ol man Isrel oli nidim long bodi, nating se hem i panisim olgeta from oli no obei long hem. (Dut. 2:7; 29:5) Tede tu, hem i givim ol samting we yumi nidim long bodi. (Mat. 6:31-33; 7:11) Sem mak, Jisas i givim kakae long olgeta we oli biaen long hem. (Mat. 14:17-20) Hem i lukaot gud long helt blong olgeta. (Mat. 4:24) Blong mekem Jehova i glad, hed blong famle i mas givim samting we famle i nidim long bodi. Be hem i mas skelemgud. Hem i no sud wok bitim mak blong sapotem famle, nao i no moa givim samting we famle i nidim long spirit mo filing.
17. ?Jehova mo Jisas i trenem yumi olsem wanem?
17 Givim trening. Jehova i trenem mo i stretem yumi blong givhan long yumi. (Hib. 12:7-9) Wetem lav, Jisas tu i trenem olgeta we oli stap aninit long otoriti blong hem. (Jon 15:14, 15) Hem i tok stret be i kaen. (Mat. 20:24-28) Hem i kasemsave se yumi no stret gud, mo se yumi save mekem mastik.—Mat. 26:41.
18. ?Wan gudfala hed blong famle i tingbaot wanem?
18 Hed blong famle we i folem eksampol blong Jehova mo Jisas, i tingbaot se ol memba blong famle oli no stret gud olgeta. Hem i no “kros bitim mak” long waef o ol pikinini blong hem. (Kol. 3:19) Defren olgeta, hem i folem rul blong Galesia 6:1 mo i traem blong stretem olgeta long “kwaet fasin,” from hem i rimemba se hem tu i no stret gud olgeta. Olsem Jisas, hem i luksave se beswan rod blong tijim olgeta, hemia tru long eksampol blong hem.—1 Pita 2:21.
19-20. ?Olsem wanem hed blong famle i save folem eksampol blong Jehova mo Jisas taem i mekem desisen?
19 Tingbaot narafala taem hem i mekem desisen. Jehova i mekem ol desisen we i blong givhan long ol narafala. Eksampol, taem hem i wokem ol laef samting, hem i no mekem blong givhan long hem wan, be hem i wantem serem glad ya blong stap laef. I no gat man i save fosem hem blong givim Pikinini blong hem, blong kavremap sin blong yumi. Hem i glad nomo blong mekem sakrefaes ya, blong givhan long yumi. Jisas tu i mekem ol desisen speseli blong givhan long ol narafala. (Rom 15:3) Eksampol, hem i jusum blong no spel, blong i save tijim wan bigfala hip blong man.—Mak 6:31-34.
20 Wan gudfala hed blong famle i save se wan had samting, hemia blong mekem waes desisen blong famle, taswe hem i tinghae long responsabiliti ya. Hem i no wantem mekem ol desisen we oli olbaot o we oli stanap long filing blong hem nomo. Be hem i letem Jehova i trenem hem. * (Prov. 2:6, 7) Long rod ya, bambae hem i tingbaot blong mekem i gud moa long ol narafala i bitim hem.—Fil. 2:4.
21. ?Bambae yumi tokbaot wanem long nekis stadi?
21 Jehova i givim wan wok we i had long ol hed blong famle, mo hem i ekspektem se oli mekem bes blong olgeta long wok ya. Be sipos hasban i traehad blong folem eksampol blong Jehova mo Jisas, bambae hem i kam wan gudfala hed blong famle. Mo sipos waef i mekemgud wok blong hem, bambae tufala i gat wan hapi mared. ?Waef i sud gat wanem tingting long wok ya we hasban i hed blong hem? ?Mo wanem ol jalens we hem i fesem? Nekis stadi bambae i ansa long ol kwestin ya.
SINGSING 16 Yumi Presem God From Mesaea
^ par. 5 Taem wan man i mared, hem i kam hed blong famle blong hem. Long stadi ya, bambae yumi tokbaot se man i hed long narafala i minim wanem, from wanem Jehova i stanemap wok ya, mo ol man oli save lanem wanem long eksampol blong Jehova mo Jisas. Long nekis stadi, bambae yumi tokbaot samting we wan hasban mo waef i save lanem long Jisas mo ol nara eksampol long Baebol. Mo long namba 3 stadi, bambae yumi luk olsem wanem ol brata oli mas yusum otoriti blong olgeta long kongregesen.
^ par. 7 Tingting ya se i stret blong man i tritim nogud, o kilim waef blong hem, i kamaot samtaem long ol muvi, drama, mo long komik buk tu. Taswe, ol samting ya oli givim tingting se i stret nomo blong man i bos strong long waef blong hem.
^ par. 20 Blong save moa olsem wanem blong mekem ol gudfala desisen, luk atikol ya “Yumi Mas Mekem Ol Desisen We Oli Givim Ona Long God,” long Wajtaoa blong 15 Eprel 2011 pej 13-17.
